پیپلز اسٹوڈنٹس فیڈریشن بلوچستان ءِ جارکش ءَ وتی یک نبشتھی درشانے تہءَ گُشتگ کہ گوستگیں روچاں اے ڈیھہ ءِ درستاں مستریں وانگجاہ ءِ تہءَ دو زیردستیں راجانی نودربرانی یک دومیگ ءَ گِر ءُ چِل بئیگ زانت ءُ پھم ءَ چہ دری ھبر اِنت۔ راجدپتر شاھد اِنت کہ کدی ھم کجام پدمنتگیں راجے ءَ دومی پدمنتگیں راجی ءَ گوں زوراکی کُتگ گُڑءَ آئی تاوان پر کنگ بیت نہ کن اَنت۔
بلوچ ءُ پشتون راج گوستانک ءِ تہءَ یک دومیگ ءِ باسک بیتگ اَنت بلے گوستگیں لھتیں دھکاں چہ اے دوھیں راجانی ورناھاں میڑ ینگ ءِ کوشست کنگ بیتگ اَنت۔
آئی ءَ گُوشتگ کہ اے دوھیں راج یک شور بستگیں پندلے ءِ ردءَ یک دومیگ ءَ تاوانبار کنگ ءَ اَنت۔
جارکش ءَ گُشتگ کہ قائد اعظم شھدربرجاہ وئیل ءِ سرءَ پرارزشتیں سیاسی ءُ چاگردی کارست وتی کردءَ پیلو بہ کن اَنت ءُ دوھیں راجانی نودربراں وشان کنگ ءِ تہءَ وتی کرد ءَ پیلو بہ کن اَنت۔
آئی ءَ گُشتگ کہ پی ایس ایف بلوچستان ءَ مدام پدمنتگیں راجانی اگبالانی جدوجھد ءِ اولی سرف ءَ بیتگ۔
