TBP Balochi

بلوچستان ءِ دو جتا جتائیں دمگ کیچ ءُ سبی ءَ ناشناسیں سلاہ بندیں مردماں یک مردمے کشتگ ءُ پوج ءِ سر ءَ اُرش کتگ ءُ تاوان داتگ اَنت ءُ دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں گل بی ایل ایف ءُ بی آر جی ءَ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں نُھ مارچ ءِ بیگاہ ءِ ساھت پنچ ءَ تربت ءِ دمگ سری کھن ءَ کرکٹ گراؤنڈ ءَ تیرگواری کتگ ءُ پاکستانی چاریگ ءُ ڈیتھ اسکواڈ ءِ سروک پیر جان پنّام ءِ پیرو ء میاہ داد کُشتگ-

آئی ءَ گوشتگ کہ ریاستی چاریگ ءُ ڈیتھ اسکواڈ ءِ سروک بازیں مدتے بیت کہ زورگریں دُژمن ءِ واستا کار کنگ ءَ اَنت-

آئی ءَ دیمتر ءَ گْوشتگ کہ آ بلیدہ ، ھوشاپ ، جوسک ، آبسر، گورکوپ ءُ کش گوراں گیشتر لشکر کشی ءَ پیشگامی ءِ کرد پیلو کتگ- ایشی ءَ درزنانی مردم وتی ڈیتھ اسکواڈ ءِ دست ءَ چست کنائینتگ ءُ آئی ایس آئی ءُ پاکستانی پوج ءِ دست ءَ دیگ ءَ اَبید ریاستی گوشگ ءِ پد ءَ بازیں بلوچ پُسگے وتی لوگ ءَ ازیت داتگ ءُ شھید کتگ اَنت- ایشی ءِ لوگ مھمان جاہ یک ازیت جاھے جوڑ بیتگ-

جارکش ءَ گْوشتگ کہ ریاست ءِ نیمگ ءَ چہ پیرو ءَ آوار جنگ بیتگیں بلوچانی تربت ءَ چہ گوادر ءُ گوادر ءَ چہ تربت برگ ءِ زمہ واری ھم دیگ بوتگ- بلوچ اِھوالکار رزاق گل ءِ شھادت ءَ ھم ھمے مرد ھوار بیتگ-

جارکش ءَ دیمتر ءَ گْوشتگ کہ بلوچستان لبریشن فرنٹ ءِ سرمچاراں دُژمنیں پوج ءِ اے ھاسیں کارندہ تیرگواری کتگ ءُ کُشتگ-

میجر گْوھرام بلوچ ءَ گْوشتگ کہ راج ءَ گوں دزبندی اِنت کہ وتی دمگاں ریاستی ڈیتھ اسکواڈ ءِ کارندہ ءُ کمکاراں ءَ چہ گستا بہ اِت – دُژمن پوج ءِ وڑ ءَ اشی ءِ سرجمیں چاریگ مئے نشانگ ءِ تہ ءَ اَنت-

گْوھرام بلوچ ءَ دیمتر ءَ گْوشتگ کہ زورگپتگیں بلوچستان ءِ وتواجھی ءَ تاں زورگریں دُژمنیں پوج ءُ آئی ءِ چاریگانی سر ءَ اُرش برجاہ بنت-

دومی نیمگ ءَ بلوچ ریپبلکن گارڈ ءِ جارکش دوستین بلوچ ءَ رسانکدر ءَ شنگ کتگیں یک درشانے ءِ تہ ءَ گْوشتگ کہ مئے سرمچاراں گوستگیں شپ ءَ زورگریں پاکستانی پوج سر ءَ بمب اُرشے کتگ-

جارکش ءَ گْوشتگ کہ سرمچاراں گوستگیں شپ ءَ سبی نزیک ناڑی گاج دگ ءَ پوج ءِ چیک پوسٹ سر ءَ دستی بمب اُرشے کتگ تراک ءِ آسر ءَ دُژمن ءِ دو کارندہ ٹپی بیتگ اَنت-

دوستیں بلوچ ءَ گْوشتگ کہ مئے گل اے اُرش زمہ واری ءَ منّ اِیت- زورگریں پاکستانی پوج ءِ بلوچستان ءِ دراھگ ءَ تاں مئے اُرش برجاہ بنت-

آزاد لچّہ

لچہ کار: سنگت ساگر

دی بلوچستان پوسٹ

ماتی منی
دست ءَ بجن
بڈ ءَ منا
من نوں رواں
پہ گُلزمین ءِ ھاترا
گوں ھمبلاں من درکپاں
کوہ ءُ تلاراں سرگراں
من پہ زمین ءَ ھاشکاں
بانور بیت ماتیں زمین
سالونک بنت مئے نرمزار
کلیں بلوچانی توار
ما سرمچار ما سرمچار

پہ دژمن ءَ راھے روگ
پہ سنگتاں کھولے کنگ
گوں آبد ءَ گوں یحییٰ ءَ
ھک ءِ شوھاز ءَ درکپاں
پہ سرزمین ءِ شھدانی ءَ
ساہ ءَ دایاں نوجوانی ءَ
کندان کندان ءَ وتا
گوں ٹریگر ءَ رُکست کناں
چہ گُلامی ءَ رک کنت وتا
آ پہ زمین شھدا سر اَنت
بیت آجوئی ءُ بامسار
ما سرمچار ما سرمچار

او لونڈوائیں پنجاء پتی
گوشدار منی تو ھالو ءَ
من ہم زمین ءِ وارثاں
پہ سنگتاں رپتاں شُتاں
کوہ من کُتگ مات ءِ زمین
سرجاہ کُتگ سِنگ ءِ بدل
لیلو من ءَ دات دلوتاں
گوں سنگتاں جاڑیگ باں
من پہ زمین ءَ ھاشکاں
من پہ زمین شھدا ھزار
ما سرمچار ما سرمچار

ماھُو منی ارواہ نَپس
من پہ زمین ءَ رپتگاں
کوہ ءُ تلار ءُ گریشگ آں
است اِنت من ءَ باندات ءِ گم
مرچی وتی جان ءَ دایاں
باندا ترا مُزّے رسیت
مئے زھگ گل بنت پہ دل ءَ
ابّا منی جنگ ءَ شُتگ
پہ گلزمین ءِ ھاترا
پہ مادرے رکینگ ءَ
بستگ دل ءَ کول ءُ کرار
ما سرمچار ما سرمچار

امّاں دل ءَ سدّک ببو
نوں واتری دروگیں منی
آزاتی ءِ رژنےچراگ
بستگ دل ءَ پہ ھاکمی
من سنگتاں گوں رپتگاں
پہ دژمناں تیر سُپتگاں
من پہ زمین بستگ کپن
ھِنّی بہ اَنت ھونانی رنگ
نودان بی سالونک زمین
پہ ساگر ءَ ارساں مہ گوار
ما سرمچار ما سرمچار

ایمنسٹی ساؤتھ ائیشیاء ءِ نیمگ ءَ شنگ کتگیں درشان ءَ گوشگ بیتگ کہ گل ءَ عابد میر زورانسری آوار جنی ءِ سر ءَ پژدر ءَ پدردی درشان کتگ-

بلوچستان ءِ دمگ جھل مگسی ءَ سیادی داروکیں اھوالکار ءُ نبشتہ کار دو روچ پیش اسلام آباد ءَ ناگتی بیگواہ بیتگ – اھوالکار عابد میر ءِ بیگواھی ءِ ھال آئی ءِ برات خالد میر ءَ اسلام آباد پولیس ھال داتگ-

عابد میر ءِ برات ءِ رد ءَ ھشت مارچ ءَ آئی ءِ برات چہ لوگ ءَ بینک ءِ واستا دراتکگ چریشی ءَ پد آ واتر نہ بیتگ ءُ آئی ءِ نمبر بند اِنت-

ایمنسٹی ساؤتھ ائیشیا ءِ نیمگ ءَ شنگ کتگیں درشان ءَ گوشگ بیتگ عابد میر ابید ارزی گرزی ءَ بیگواہ کنگ بیتگ، آئی ءِ کھول ءَ عابدمیر ءِ بارو ءَ سلامتی ءِ واستا ترس اِنت –

ایمنسٹی ساؤتھ ائیشیا ء ءَ پاکستانی واکداراں چہ لوٹ کتگ کہ آ بیگواھیں اھوالکار ءَ دیم ءَ آرگ ءُ آئی ءِ یل کنائینگ ءَ سرجم ءَ گامگیج زورگ بہ بیت – آئی ءَ گوشتگ کہ اگاں عابدمیر کانداراں برتگ گڑا آئی ءَ کانون ءِ رد ءَ آمیدگس ءَ پیش بہ کن اَنت-

گوستگیں روچ ءَ عابدمیر ءِ نزیکیں سنگت ءُ نبشتہ کار ڈاکٹر شاہ مھمد مری ءَ عابد میر ءِ سلامتی ءِ ھال شنگ کتگ ات – آئی ءَ گوشتگ ات کہ عابد میر سلامت اِنت وتی سنگتانی گور ءَ اِنت – پد ءَ خالد میر ءَ وتی شنگ کتگیں درشانے ءَ گوشتگ کہ عابد میر ءِ درگت ءَ ھم آئی ءِ دوستانی بارو ءَ ھال پیداک اَنت بلے ایشی ءَ ما یکین کت نہ کن ایں –

خالد میر ءَ یک دگہ درشانے ءَ گوشتگ کہ عابد میر ءَ یک ناشناسیں نمبرے ءَ گپ کتگ ءُ پد ءَ آئی ءَ لھتے روچاں داں گپ نہ کنگ ءِ گوشتگ –

خالد میر ءَ گوشتگ کہ منی برات ءِ سلامتی ءِ درگت ءَ داں انگت ءَ مارا ترس اِنت ءُ دانکہ عابد مئے گور ءَ نیت اِنت داں دلجم نہ اِنت-

ھمے وڑ ءَ بی ایس او، بی ایس او پجار ءُ وائس فار بلوچ مسنگ پرسنز ءَ شال ءَ پریس کانفرنس کنگ ءِ درگت ءَ جار شنگ کتگ-

کوھلو ءَ پوج ءِ بیڑ، شار مردمانی دزگیر کنگ ءِ ھال ءُ ھمے وڑ پوج داں انگت ءَ دمگ ءَ جاڑیگ اِنت-

بلوچستان ءِ دمگ کوھلو ءِ ھند جنتلی ءَ اتکگیں اھوالانی رد ءَ سر بیتگیں ھالانی رد ءَ جتا جتائیں جاھاں ھیلی کاپٹرانی زور ءَ پاکستانی پوج ءِ کارندھاں ایرگپتگ ءُ بیڑ برجاہ داشتگ-

دمگی مردمانی گوشگ اِنت دمگ ءَ کوچگ کوچگ ءَ پوجی کارندہ بازیں کچے ءَ سر بیتگ اَنت ءُ اود ءَ لوگ لوگاں پٹ ءُ پول کنگ ءَ اَنت-

دمگی مردمانی ءَ جنتلی ءِ ھند جمال،ھان زئی ءَ پوج ءَ لوگ ءَ پَٹ ءُ پول کتگ ءُ اود ءَ بشکیا خان ء مھران، مغل ء درا، موران ء درا ءَ ھوار چار مردن دزگیر کتگ ءُ گون وت برتگ اَنت ءُ چریشی ءَ پد آیانی درگت ءَ ھچ ھال نیست اِنت –

دمگی مردمانی رد ءَ پوجی کارندھاں لوگ لوگ ءَ پٹ ءُ پول ءِ وھد ءَ گوشتگ کہ اُستانی سرکار ءِ گوشگ ءَ اے بیڑ برجاہ بیتگ-

بلے داں انگت ءَ واکدارانی نیمگ ءَ ھچ چوشین ھال دیم ءَ نیتکگ اَنت-

روکپتی بلوچستان ءِ بنجاھی شھر زاھدان ءَ سیاسی زندانیانی بیگواھی ءِ ھلاپ ءَ زھرشانی ءُ روانک-

زاھدان ءِ مسیت ’مکی میست ‘ ءَ نماز جمعہ ءَ پد مھلوک ءَ زھرشانی روانک کش اتگ، روانک ءَ بازیں کچے ءَ مردماں بھر زرتگ ءُ اوگام ’ مرگ بر دیکتاتور ‘ جتگ ءُ بیگواھیں مردمانی یل کنگ ءِ لوٹ کتگ-

روانک ءَ زھرشانی کنوکانی دستاں بینر ءُ پلے کارڈ بیتگ اَنت کہ اود ءَ آیانی سر ءَ پارسی زبان ءَ مھلوک ءِ یل کنگ ءُ ایرانی سرکار ءِ زوراکیانی ھلاپ ءَ لبز نبشتگ بیتگ اَنت-

زھرشانی کنوکاں گوشتگ کہ زاھدان ءِ ھونین جمعہ ءَ سدانی کچ ءَ مردم کُشگ بیتگ اَنت ءُ بازیں کچے ءَ مردم گرگ ءُ بیگواہ کنگ بیتگ اَنت بلے زاھدان ھونین ءِ کوشکارانی سزا دیگ وتی جاہ ءَ اد ءَ مردم بیگواہ کنگ بوگ ءَ اَنت-

تران کنان ءَ مولوی عبدالحمید اسماعیل زئی ءَ گوشتگ کہ اے روچ شمئے ورنایانی وھد اِنت کہ وتی پرک ءُ پیر ءَ بہ زان ات اگاں دشمن شمارا جنگ ءُ کُشگ ءَ اَنت آیانی زُلمانی ھلاپ ءَ ھمشت ءُ تپاکی شمارا درکار اِنت-

زانگ بہ بیت زاھدان ءَ ھمک آدینگ ءَ مھلوک وتی ھک ءُ بیگواھیانی ھلاپ ءَ زھرشانی کنگ بوگ ءَ اَنت-

زاھدان ءَ گوستگیں سال ءِ سی ستمبر ءَ ماھو بلوچ ءِ انساپ ءِ ھاتر ءَ بیوکیں زھرشانی ءَ ایرانی پولیس ءِ تیرگواری ءَ سد ءِ نزیک ءَ مردم بیران ءُ سَے سد ءِ کساس ءَ زدگ بیتگ اَنت-

زاھدان ءَ مردمانی کوش ءُ دزگیری ھلاپ ءَ ایران ایمنسٹی انٹرنیشنل ءَ ھم وتی زھر ءِ درشان ءَ مردمانی انساپ ءُ کوشکارانی پدر کنگ ءِ لوٹ کتگ-

بلوچ مات

نبشتہ کار: البرز بلوچ

دی بلوچستان پوسٹ

شھید امداد بُجیر ءُ شھید رضاجھانگیر ءِ شھیدی ءِ روچ ءَ آھانی ماتانی ٹیلیفون ءَ تران۔ شہید امداد ءِ مات: ما وشیں شرّی ءَ جوڑ ات، شما چون ات؟ شھید رضا ءِ مات: اللہ شمارا جوڑ کنات، ما وشیں۔ امداد ءِ مات: شمئے چُک شرّی ءَ جوڑ اَنت؟ رضا ءِ مات: اللہ ءِ شُگر اِنت تربت ءِ دمگ ءَ دو سالونک شھید بیتگ انت۔ آھاں شھیدی مبارک بہ بات۔امداد ءِ مات: آمین بات، گوں براتاں۔ رضاءِ مات: آھاں وتی ہک ادا کُت پہ سرزمین ءَ، شھیدی مبارک بہ بات ات۔ من ءَ رضا جان ءَ کلوہ داتگ کہ پہ من مہ گرے منی مات۔ امداد ءِ مات:ھو، شھیدی مبارک بہ بات ئے وت ءَ ڈَڈ کن اے پہ ما پھری گپ ئِے۔ رضا ءِ مات: منی دل ڈَڈ اِنت انگت۔ اللہ شمئے دلاں ڈَڈ بہ کنات۔ آھانی جُھد ءَ اللہ مزن بہ کنات اللہ آہانی منزل ءَ نزیک بہ کنات۔ شئے ءِ پُشت ءَ ھُدا آئی ءِ آزاتی ءِ جلدی بہ دیات۔ امداد ءِ مات: ھو اللہ جلدی بہ دیات منی مات۔

رضاءِ مات: اللہ مبارک بہ کنات مارا شمارا درستاں۔ منی ارادہ ھمیش اَت کہ منی بچ تربت ءَ سالونک بیتگ ھمود ءَ گوں شھید ءَ یکجاھ بہ بیت۔ بلے اد ءِ مردم سالونک ءِ دیدار ءِ آسر ءَ نشتگ اَنت۔ امداد ءِ مات: ھو منی مات، رضا منی بچ اِنت نی۔ ہردوئیناں یکجاہ شھیدی وتی نام ءَ کُتگ۔

رضا ءِ مات: اللہ شمئے دل ءِ ارادھاں پورہ بہ کنات، درستیں سالونکاں کامیاب بہ کنات۔ امداد جان ءَ پہ وت ءَ رژنائی ءِ پٹیت۔ آ تئی چُک نہ اَت بلوچستان ءِ چُک اَت۔ من پہ رضاء جان ءَ دوا کُتگ اَت بلے منی چُک نہ بوت سرزمین ءِ چُک بوتگ امداد ءِ مات: ھو، آ پہ سرزمین ءَ شُت اَنت منی مات۔ رضا ءِ مات: منی چُک ءِ مات توئے گِندے! امداد ءِ مات: ہو من درستیں سالونکانی مات آں، مارا نامدار اِش کُت۔ رضاءِ مات: ھو، آئی ءِ ھونریچی ھمود ءَ بوت، تئی چُک بوت منی چُک نہ بوت۔ امداد ءِ مات: ھو من ءَ اے شرپ رست ءُ منی چُک بوت۔ رضا ءِ مات: امداد جان ءَ سالونکی مبارک بہ بات۔ امداد ءِ مات: آمین بہ بات، مئے سر بُلند کت شھیداں سرزمین آباد بہ بات۔ رضا ءِ مات: اللہ مارا آھانی بود ءُ کمال ءَ بہ دیات۔ اللہ شھیدانی واباں پورہ بہ کنات ءُ مارا آزادی ءِ منزل ءَ بہ دیات- امداد ءِ مات: آمین بہ بات، کُل بلوچ قوم ءَ آہانی بود ءُ کمال بہ رسات

رضا ءِ مات: من پاداں پرشتگاں کپتگاں، ہاٹیگ مان نیست بلے من وش ءُ جوڑ آں، ڈَڈ آں ءُ رازی آں۔ امداد ءِ مات: اللہ ترا جوڑ بہ کنات کہ تو رضاء جان ءِ وڑیں بچ ئے ودی کُت۔ رضا ءِ مات: سلامت بات ئے شما درست شھیدانی مبارکی ءَ درستاں بہ دئیت۔ اللہ ءِ شُگر اِنت کہ آ وژنام بیت اَنت۔

امداد ءِ مات: شُگر اِنت ھدا ءِ کہ آ پہ سرزمین ءَ شُت اَنت ءُ کُربان بیت اَنت۔ رضا ءِ مات: رضا جان ءُ امداد جان رُژنا بوت اَنت کہ آھاں شھیدی ءِ نام کٹیت۔ امداد ءِ مات: اللہ شمارا سلامت بہ کنات ءُ بلوچستان آزاد بہ بات۔ وشیں گُڑا۔ رضا ءِ مات: وشیں منی مادر وشیں۔ 8مارچ بگندے دنیا ءَ پہ جنینانی زاتی ھک ءُ آجوئی ءِ واستا دارگ بیت۔ بلے بلوچ ماتانی دلیری ءُ آہانی پِگر چہ دنیا ءِ ہر وڑیں ھکانی ارزشت ءَ چہ ہما دیم اِنت۔ ہر بلوچ شھید ءِ مات ءِ ھمت چو برزیں کوہءَ مِک اِنت ءُ پہ پھر اے گپ ءَ گوْش یت کہ آئی ءِ بچ پہ سرزمین ءَ نْدر بیتگ۔ شھید امداد ءُ رضاء جھانگیر ءِ مات ءَ بہ گِر داں شھید مُلا بھرام ، شھید ریھان، شھید نورھان ءُایندگہ کُلیں شھیدانی ماتانی ڈَڈی اِنت کہ بلوچ جھد ءِ زندگ ءُ مُھکمی ءِ دیمونی اَنت۔

دلگوش: اے گپ ءُ تران چہ شھید امداد بجیر ءُ شھید رضاء جھانگیر ءِ ماتانی ٹیلیفون ءِ سر ءَ بیوکیں گپاں چہ زُرتگ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کوھلو ءَ مروچی سھب ءَ پاکستانی پوج ءَ لشکر کشی بندات کتگ- لشکر کشی ءَ بمب گواریں ءُ دگہ بالگرداں بھر زرتگ-

دمگی اِھوالکارانی رِد ءَ جنتلی ، سخین ءُ لوپ ءِ دمگ ءُ کش گوراں لشکر کشی ءِ تہ ءَ اِنت وھدے کہ بالگردانی روگ ءُ آھگ برجاہ ءَ اِنت-

اِھوالکارانی گْوشگ اِنت کہ گوستگیں شپ ءَ ڈرون بالگرد ءِ بُرز بالی برجاہ بیتگ ءُ مروچی سھب ءَ بالگرداں جتائیں ھنداں تیرگواری کنگ ءَ پد پوجی کارندہ ایر داتگ اَنت-

دمگ اِھوال اھوالی آسراتی نہ بوگ ءَ سرجمیں ھال سر بوگ ءَ نہ اَنت نانکہ سرکاری واکدارانی نیمگ ءَ اے درگت ءَ درشان شنگ کنگ بیتگ-

گوستگیں روچاں گوادر ءِ کوھی دمگاں لشکر کشی کنگ بیتگ وھدے کہ گوادر شھر ءَ زورانسری آوار جنی وئیل دیم ءَ ھم اَتکگ اَنت-

چین ءِ پارلیمان ءَ شی جن پنگ سیمی رند ءَ سروک دارگ بیتگ-

ھال سر کنوکیں ادارہ روئٹرز ءِ رد ءَ آدینگ ءِ روچ ءَ شی جن پنگ پنچ سال ءِ سرجم بوگ ءَ پد ءَ چین ءِ سروک نامینگ بیتگ-

آئی ءَ چین ءِ بنھشت ایر کنوک ماؤ زے تنگ ءَ پد ڈیھ ءَ درستاں مستریں تاکت وتی دست ءَ کتگ-

پارلیمان ءَ نیشنل پیپلز کانگریس ءَ سَے ھزار ءِ کچ ءَ باسکاں دی گریٹ ھال ءَ شست ءُ نُھ سالی ئیں شی جِن پنگ تپاکاری ءِ رنگ ءَ ووٹ داتگ دانکہ آ سروک جوڑ بہ بیت ءُ اود ءَ دگہ کس امیت وار نہ بیتگ –

ووٹنگ کساس یک ادارے ءَ داں برجاہ بیتگ ءُ الیکٹرانک ھساب ءَ کساس پانزدہ دمان ءَ سرجم بیتگ-

شی جِن پنگ ڈیھ ءِ بنجاھی پوجی کمیشن ءِ چیئرمین ءِ دروشم ءَ سیمی رند ءَ دارگ بیتگ- پارلیمان ءَ ژاؤ لیجی چیئرمین ءُ ھان ژنگ نوکیں کسان کمک سرکماش دارگ بیتگ اے ھردوکیں مردم سروک شی جن پنگ ءِ گوستگیں ٹیم ءِ بھر اَنت-

ھال سرکنوکیں ادارہ اے ایف پی ءِ رد ءَ شی جن پنگ دی موست پقعرفل مینن ان دی ورلڈ ءِ ھمراہصنف اڈرین جیجز ءِ گوشگ اِنت کہ آئی ءِ ھیال اِنت سروک چی تاکت ءُ دولت ءَ گوں ھُبناک نہ اِنت بلکیں چین ءِ واستا آئی ءِ وژن اِنت آ چین ءَ دنیا ءِ تاکتداریں ڈیھ گندگ لوٹ ایت-

بلے آئی ءِ سیمی رند ءَ وھد ءِ بندات ءَ دومی رند ءَ گیش مالداری ءَ چین ءَ مزنیں مشکلانی دیمپانی اِنت، زرکاری باپاری، ریئل اسٹیٹ ءِ کمی زر ءِ پیداوری ءِ وڑیں بازیں اڑ ءُ جنجالانی دیمپانی اِنت-

ھمے وڑ ءَ امریکہ ءِ گون ءَ ھم چین ءِ سیادی ناوش اَنت چوشکہ انسانی ھکانی ءُ باپاری ءُ ٹیکنالوجی ءِ سر ءَ ھردوکیں ڈیھانی میان ءَ ترندی ءِ زھر ھست اَنت-

ایس او ایس چائنا انسٹی ٹیوٹ ءِ ڈائریکٹر سٹیو سانگ ءِ گوشگ اِنت میان اُستمانی پھناتاں ما چین ءَ وت ءَ چہ گیش اُمیتداری ءَ گند ایں- ءُ دنیا ءَ اے گپ ءَ بہ من ایت-

بلوچستان ءِ دمگ چہ مستونگ جنگل کراس ءَ دزکپتگیں جون ءِ پجار داں انگت نہ بیتگ۔

گوستگیں روچ ءَ جنگل کراس ءَ دزکپتگیں جون پولیس ءَ دزگپتگ ءُ ڈی ایچ کیو نادراھجاہ مستونگ ءَ پجار ءِ ھاترءَ بُرتگ۔ داں انگت پجار ءِ بابت ءَ ھندی پولیس گیش پَٹ ءُ پول کنگ ءَ اِنت۔

زانگ بہ بیت گوست ءَ ھم بلوچستان ءَ انچیں جون دزکپتگ کہ پجار ءِ لائق نہ بیتگیں ءُ بے وارثیں جون دزکپتگ اَنت۔ گیشتر زانگولیں جون لٹ شاپی ءِ آماچ بنت ءُ ایشانی پجار کنگ باز گران بیت اِنت۔

یک ایدھی کمککار ئے رد ءَ ھرابیں جاوراں پد ھم ما ایشانی عکساں زیریں ءُ فیس بک ءُ دگہ تندجاھاں شنگ کنیں، ھمے اوست ءَ گوں کہ بیت کنت اِشانی کس وارث دز بہ کپ اَنت ءُ اے آیانی کوپگ ءَ قبرستان ءَ بہ رؤنت۔ بلے باز کوشستاں پد ھم سد ءِ تہءَ تھنا پنچ درسد مردمانی پجار بیت۔

برتانیہ ءِ شنگکاری ادارگ بی بی سی ءِ ردءَ 32 دمگ ءُ پاکستان ءِ 44 درسد زمین ءِ سرءَ بندوکیں بلوچستان ءَ تھنا شال ءِ سول نادراھجاہ ءَ پوسٹ مارٹم ءُ سرد ھانہ ءِ آسراتی ھست اِنت، کہ آودہ جہاں ڈیرہ بگٹی، لسبیلہ ءَ بگر سبی ءُ مسلم باغ ءُ تفتان ءَ چہ ھم جون آرگ بنت۔

زانگ بہ بیت کہ بلوچستان پجار نہ بیوکیں جونانی درکپگ ءَ پد بیگواھیں مردمانی کھول ءِ جنجالانی تہءَ گیشی کئیت اِنت۔