TBP Balochi

یک جتائیں نامے ءِ واھند بوگ ءَ ھوار بالی وڈ ءِ توک ءَ گچینی ناماں ھواریں نامانی تہ ءَ سلمان خان یکے کہ دگہ تامرکارانی رنگ ءَ ایشی ءِ ھم چاگردی ترامجاھان دوست داروکیں لکانی نا بلکیں کروڑانی ھساب ءَ اَنت-

انٹرٹینمنٹ ءِ ویب سائٹ “کوئی موئی ” ءِ رد ءَ انسٹاگرام ءَ آئی ءِ پنچ کروڑ ءُ نود ءُ پنچ لک دوست داروک اَنت بلے شمارا سرپدی بہ بیت آ بس سِی ءُ پنچ مردماں دوست دار ایت-

سلمان خان ھما مردماں دوست دار ایر کہ آیانی توک ءَ لھتے آئی ءِ سیاد ءُ وارس ءُ لھتے سنگت اَنت کہ ایشانی توک ءَ آئی ءِ برات ارباز خان، سھیل خان ءُ گوھار ارپیتا خان شرما ھوار اَنت-

سلمان خان چاگردی ترامجاہ ءَ ھردیکہ کیت اِنت گڑا گیشتر آ وتی تامرانی یا وتی بارو ءَ الم پوسٹ کنت-

سلمان خان ءِ تامت کِک ءَ ازمکاریں ھمراہ جیکلین فرنینڈیز، ڈیزی شاہ ءُ سورج پنچالی ءَ ھم دوست دار ایت بلے ایشاں ھوار اجکہ کنوکیں گپ ایش اِنت آئی ءِ فولونگ لیسٹ ءِ توک ءَ آئی ءِ گوستگیں گرل فرینڈ کترینہ کیف ءُ سنگیتا بجلانی ھم ھوار اَنت بلے ایشوریپ رائے بچن اے لسٹ ءَ ھوار نہ اِنت-

بوت کنت مردم سنگیتا بجلانی ءَ نہ زان اَنت بلے آ گوست ءِ نامی ئیں ازمکار ءُ گوستگیں مس انڈیا بیتگ کہ آئی ءِ گون ءَ سلمان خان ءِ دیشتار بندی ھم بیتگ آروس ءِ رمس ھم بیست ءُ ھپت مئی نوزدہ سد ءُ نود ءُ چار ءَ بیتگ، داوت نامہ ھم روان دیگ بیتگ اَنت بلے بھت ءَ دگہ چیزے بیتگ-

ھردوکانی میان ءَ سیادی ءِ ریشگ کروتگ ءُ اے ھما وھد ءَ بیتگ کہ سنگیتا بجلانی ءَ سلمان خان ءَ یک پاکستانی کہ امریکہ ءَ ازمکاری ءَ بیتگ کہ آئی ءِ نام سومی علی ءِ گون ءَ افیئر ھلگ ءِ سر ءَ سرپدی بیتگ گڑا آئی ءَ آروس پروشتگ –

اے وڑیں ھال ھم اشکنگ بیتگ اَنت سلمان خان ءُ کترینہ کیف ءَ یکے دومی ءَ مھر کتگ، ھردوکیں ازمکاراں تامرانی توک ءَ مھر چون کتگ “ٹائیگر زندگ اِنت” ایشی ءَ ھوار بازیں تامراں ھم کار کتگ ءُ نی اے دو ازمکار تامر “ٹائیگر تھری ” ءِ سر ءَ کار کنگ ءَ دلمانگ اَنت-

ایشی ءَ ھوار ھوار سلمان خان ءِ یک دگہ نوکیں تامرے کہ آئی ءِ نام “کسی کا بھائی کسی کی جان ” نام ءَ زانگ بیت اِنت ھمے آئید ءَ آئیگی اِنت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھر شانی برجاہ، زھرشانی بنجل ءَ مروچی چار ھزار ءُ نُھ سد ءُ نود ءُ سَے روچ سرجم بوتگ انت – مروچی چہ ھاران ءَ سیاسی ءُ چاگردی باسک بیبرگ بلوچ، نور احمد بلوچ، شیھک بلوچ ءَ ھوار دگہ جنین ءُ مردیناں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ پُرایمنیں جھد ءِ جھدکارانی یکشلیں جھد ءَ پنچ ھزار روچ سرجم بوگ ءَ انت، ما زوراکیانی بگیری ءَ توار چست کنگ بند نہ کتگ ءُ ریاست ءَ زوراکی ءِ راہ ھم یل نہ کتگ، مروچی ھم بلوچ ورنایانی جون بے وارسی نادراھجاھاں کپتگ انت ءُ لھتے ویرانگاں دور دیگ بوگ ءَ انت، ڈیھے پھازوک اے جھد ءَ مھکمی ءَ گوں برجاہ دارگ ءِ توکل ءَ دار انت –

آئی ءَ گوشتگ کہ وی بی ایم پی ءَ اے داد گپتگ کہ وتی برجم بوگ ءِ سال دوھزار نُھ ءَ بگر تاں روچ مروچی ایمنی ءُ گیر جانبداری جھد کنگ ءَ انت – زرمبشت ءِ تہ ءَ وی بی ایم پی ءِ بلاھیں کرد ءِ بوتگ، زورانسری آوار جنگ بوتگیں مردمانی کیس میان استمانی انسانی ھکانی ادارھاں سر کتگ انت ءُ ھزارانی کچ ءَ بیگواھیں مردمانی کھولانی توار جوڈ بوتگ –

ماما ءَ گوشتگ کہ مروچی سرجمیں جھان شری ءَ سرپد انت مروچی سرجمیں جھان ءِ زمہ داریں ڈیھ پاکستان ءِ زوراکیاں سرپد انت بلے عملی ھچ کنگ ءَ نہ انت، ریاست وتی جوڈ کتگیں سلاھبندیں کشندھ ٹولیانی ھمراھی ءَ بلوچ ءِ چکچینی ءَ کنگ ءَ انت ، ریاست ءِ ایجنسیانی چیر دیگ ءِ ھاتر ءَ ھمیشاں دیما آرگ ءَ انت تانکہ ادارھ گیشتر بدنام مہ بنت –

سی ٹی ڈی ءَ وتی شنگ کرتگیں درشان ءِ تہ ءَ گوشتگ کہ دزگیر کنگ بوتگیں دو ورنا آمیدگس ءَ سزا داتگ انت –

سی ٹی ڈی ءِ رِد ءَ گوں بی ایل اے ءَ سیادی داروکیں ثاقب زیب پنام ءِ شیھک ءُ فرہاد ساجد پنام ءِ چاکر ناشرکاری ءِ آمیدگس ءَ 5-5 سال ءِ کیز ءِ سزا داتگ انت –

سی ٹی ڈی ءِ رِد ءَ اے مردم سال دوھزار بیست ءُ دو ءِ اپریل ماہ ءَ دزگیر کنگ بوتگ انت –

دی بلوچستان پوسٹ ءَ اے درگت ءَ پٹ ءُ پول کتگ گڈا ھمے ھال سر بوتگ انت کہ ثاقب زیب سرپرہ ء حاجی نثار سرپرہ ءُ فرہاد سرپرہ ء حاجی نوراللہ سرپرہ گوستگیں سال ءِ فروری ماہ ءَ پاکستانی پوج ءَ چہ حاجی نوراللہ ءِ گِس ءَ زورانسری آوار جتگ ءُ بیگواہ کتگ انت وھدیکہ سی ٹی ڈی ءَ ٹاہ داتگ کہ آ اپریل ءِ ماہ ءَ دزگیر کنگ بوتگ انت –

زانگ بہ بیت گوستگیں سال ءِ دوازدہ فروری ءَ شپ ءِ نھنگام ءَ پاکستانی پوج ءَ شال فیض آباد ءَ گِس ءِ سر ءَ بیڑ برتگ ءُ زوراکی کنان ءَ دھمی تبک ءِ نودربر سعود سرپرہ ءَ یازدھمی تبک ءِ نودربر سدیس ءِ حاجی نثار سرپرہ آوار جتگ ءُ گوں وت برتگ انت –

ھمے وڈ فروری ءِ ماہ ءَ ھم پاکستانی پوج ءَ حاجی نوراللہ ءِ گِس ءَ بیڑ برتگ ءُ آئی ءِ زھگ فرہاد سرپرہ ءُ حاجی نثار سرپرہ ءِ زھگ ثاقب سرپرہ دزگیر کتگ ءُ گوں وت برتگ انت وھدیکہ اشی ءَ چہ یک روچے ساری شش فروری ءَ پوج ءَ حاجی نثار ءِ گِس ءَ یک دگہ زھگے ھارون ولید ء حاجی نثار آوار جتگ بوتگ –

آوار جنگ بوتگیں ورنا چار ماہ ءَ پد پوج ءَ ھاران ءُ چمن ءِ پولیس ءِ دست ءَ داتگ انت، کہ آھانی تہ ءَ ھارون، سدیس احمد، محمد عاقب ھاران ءَ ءُ ثاقب زیب ءُ فرہاد چمن ءِ پولیس ءِ دست ءَ داتگ انت – ھارون ، سدیس ءُ عاقب چہ پولیس ءِ دست ءَ ھژدہ جون ءَ یل بوتگ ءُ وتی گِس ءَ سر بوتگ انت –

بلے پدا ھم یل کنگ بوتگیں ورنا عاقب سرپرہ ماھے ءَ پد بزاں بیست جولائی ءَ پاکستانی پوج ءُ چیریں ادارھانی کارمنداں دو بر آوار جتگ ءُ بیگواہ کتگ کہ ھنگت گار ءُ بیگواہ انت –

سی ٹی ڈی ءِ شکّی ایں کاروائیانی بگیری ءَ بلوچستان ءِ سیاسی ءُ چاگردی باسک توار چست کنگ ءَ انت وھدیکہ سی ٹی ڈی ءِ نیمگ ءَ بازیں میڑے دروگ گوشگ بوتگ کہ اودا جنگ بوتگیں مردمانی پجار بوتگ انت کہ آ پیسر ءَ زورانسری آوار جنگ ءُ بیگواھیں مردم بوتگ انت –

بلوچستان ءَ زورانسری آوار جنیانی بگیری ءَ توار چست کنوکیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ انت کہ چیریں ادارہ سی ٹی ڈی ءَ کارمرز کنگ ءَ انت ءُ دست گوشیں مردماں آوار جنگ ءُ شھید کنائینگ ءَ انت –

ماما قدیر بلوچ ءِ گوشگ انت کہ ایجنسی والھاں یک نوکیں ھنر ءِ بندات کتگ بلے سی ٹی ڈی ءِ دروگ نوں ٹنگ بوتگ انت زورانسری آوار جنگ بوتگیں ءُ زالبولانی آوار جنی ءِ درگت ءَ ریاست ءِ درشان مدامی دروگیِ درشان بوتگ انت –

مزاھمت

نبشتہ کار : واجد شئے بلوچ

دی بلوچستان پوسٹ

جنگ ءِ آجوئی بلوچ ءِ جنگ مرچی ھما منزل ءَ رس اتگ کہ بلوچ پُسگانی ھونانی برکت ءَ آجوئی منزل نزدیک اِنت بلوچستان ءِ آجوئی ءِ واستا باریں چنکس پیر ءُ ورنا ءَ زھگ ءُ زالبول ءَ وتی جان پہ آجوئی ءِ ھاترا کُربانی داتگ ءُ انگت دیگ ءَ اَنت ھمے شھیدانی پکر ءُ پلسپہ اِنت کہ بازیں ورناہ گوں مھکمی سنگر ءَ نشتگ ءُ دژمن ءَ جنگ ءَ اَنت ءُ دژمن روچ بہ روچ کمزور بوان اِنت-

ریاست ءِ پاکستان ءِ لشکراں مئے سک بازیں لیڈر شھید کتگ ءُ بازیں زندان ءَ بندیگ اَنت شھیدانی لَڑ بچاریں گُڑاں مئے روچ شپ بنت بلے شھیدانی نام انگت پشکپنت انچو کہ مئے رھشون واجہ شھید ڈاکٹر منان جان ، شھید واجہ گلام محمد بلوچ ، شھید واجہ اَلی جان ، شھید بالاچ مری سک باز اَنت کہ آوانی نام نبشتہ کنگ ھم نہ بنت بازیں ءِ زندان ءَ بندیگ اَنت سنگت زاکر مجید ، چیئرمین زاھد جان ، سنگت شبیر جان ءُ دگہ بازیں ءِ گار ءُ بیگواہ اِنت۔

بلوچ ءِ جنگ ھما جاہ ءَ رس اتگ نوں ھچبر اوشت ءِ شکار نہ بیت داں کہ آجوئی ءَ اے بلوچ ءِ گُڈی جنگ بیت-

بلوچ ءِ جنگ ءَ را یک نوکیں رنگے ءَ بُرت فدائیاں ءُ بلوچ زالبولانی تہ ءَ شاری بلوچ اولی فدائی زانگ بیت اِنت پہ بلوچ راج ءِ واستا وتی درائیں واھشتے ندرےکتگ اَنت شاری بلوچ ءِ دو ماسومیں زھگ ھم اَست اَنت بلے شاری بلوچ ءَ وتی زھگانی پرواہ نہ کرتگ پہ بلوچ راج ءِ باندات ءِ واستا وتی جانے ندر کت۔ مرچی دژمن ءَ انچوش پُروش وارتگ دگہ راھے پش نہ کپتگ کہ مئے مات ءُ گھاراں چست کنگ ءُ بندیگ کنگ ءَ اِنت-

مئے کوم ءَ را ھمے پاکستان ءَ انچو مَجگی گلام جوڑ کُتگ اے میر ءُ سردارنی گلام جوڑ اَنت ھمے میر ءُ سردار اَنت مئے جند ءِ برات وت ما وت میڑ ءِ اَنت نوں مارا پَھمگی اِنت سرپد بوھگی اِنت اے میر ءُ سردارانی گلام جوڑ بوئگی نہ اِنت نا کہ پاکستان ءِ مارا اے گلامی ءِ ھلاپ آواز چست کنگی اِنت ما آواز چست نہ کُت ما مزاھمت نہ کُت مئے نام ءُ نشان گار ءُ بیگواہ بیت مارا ھمکوپگی بوئگی اِنت مزاھمت کنگی اِنت جُھد کنگی اِنت داں کہ مئے وتن آجوئی بہ بیت اِنت۔

آجوئی ءَ مئے ءُ شمئے کُلیں بلوچ کوم ءِ یک وشھالیں زندے گوازینت کن اِت آجوئی ھون لوٹ اِیت داں کہ ما ءُ شما وتی سرانی کُربانی نہ داتگ مئے وتن آجو نہ بیت۔ مارا وتی گلزمین آجو کنگ ءِ واست اَلم جنگ کنگی اِنت مزاھمت کنگی اِنت نوں مئے ءُ شمئے مات ءُ گھار یک وشھالیں زندے گوازینت کن اَنت۔ بلوچستان زندگ بات، بلوچ راج یک مُشت ءُ تپاک بات اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سی ٹی ڈی ءِ دزگیریں مردمانی منگی تامر بند

ٹی بی پی شونگال

بیست ءُ دو مارچ ءَ بلوچستان سول سیکٹریٹ ءَ سر وزیر بلوچستان ءِ جارکش بابر یوسفزئی ءُ سی ٹی ڈی ءِ ڈی آئی جی اعتزاز گورائیہ ءَ ماھل بلوچ ءِ دزگیر کنگ ءُ بھتامانی درگت ءَ رسانک تران کُت ءُ ایشی ءِ تہ ءَ دزگیریں ماھل بلوچ ءِ مَنَگی تامر بند شنگ کُتگ، کہ اِیشی ءِ تہ ءَ ماھل بلوچ ءَ گوں بی ایل ایف ءَ سیادی دارگ ءِ گپ من اِتگ۔ وھدیکہ دومی نیمگ ءَ ماھل بلوچ ءِ کھول ءِ گشگ اِنت کہ اے منگی تامر بند زورانسری جوڑ کنائنگ بیتگ۔

ماھل بلوچ ءِ سی ٹی ڈی ءِ دزگیری ءَ اولی تامر بند نہ اِنت، دو ھزار ءُ پانزدہ ءَ پاکستانی واکداراں ٹاہ داتگ اَت کہ بلوچ سلاہ بندیں گلے ءِ دو باسک شفقت رودینی ءُ ابراھیم نیچاری بیڑیے ءِ نیام ءَ دزگیر کنگ بیتگ اَنت ءُ پد ءَ ھما دویں مردماں دزگیری ءِ نیام ءَ تامر بند ءِ جوڑ کنائنگ بیتگ اَت ءُ ھما وھدے بلوچستان ءِ تھ ئِے کارانی وزیر سرفراز بگٹی ءِ ھستی ءَ شال پریس کلب ءَ رسانکدر ءِ دیما شنگ کنگ بیتگ اَت بلے رسانکدر ءِ دیم ءَ مَنَگ نامہ ءَ پد ھم شفقت رودینی ءُ ابراھیم نیچاری مستونگ ءِ ھند کانک، کلی کنڈاوا ءَ یک دروگیں میڑ ئے تہ ءَ پولیس ءَ گوں دیم پہ دیمی جنگ ءَ جنگ بیت اَنت۔

جنوری دو ھزار ءُ بیست ءُ یک ءَ رودراتکی بائی پاس ءَ چہ ایگل فورس ءَ سمیع اللہ پرکانی ءُ جمیل احمد پرکانی ءِ دزگیری پدر کُت ءُ آمید گِس ءَ دیم ءَ آرگ ءَ پد ھم دروگیں پولیس میڑ ءِ تہ ءَ کُشگ بیت اَنت۔ چہ ھاران ءَ سی ٹی ڈی ءَ شفقت یلانزئی ءِ دزگیر کنگ ءَ پد دزگیری ءِ نیام ءَ آئی ءِ منگی تامر شنگ کُتگ اَت وھدیکہ چہ ھزدار ءَ عبدالمنان ءُ سرفراز احمد ءِ زورانسری بیگواہ کنگ ءَ پد آیانی تامر بند شنگ بیتگ اَنت۔

کانودی زانتکارانی رد ءَ پولیس ءِ دزگیری ءَ بندیگیں مردمانی تامرانی تہ ءَ مَنَگ نامہ ءِ ھچ کانودی ارزشت نیست اِنت ءُ پاکستانی آمید گساں باز بر ءَ پولیس ءِ نیمگ ءَ دزگیری ءِ وھد ءَ گپتگیں زورانسریں درشان رد کُتگ اَنت، پمیشکا چُشیں تامر بند تھنا پندل زانگ بنت۔

ایمنسٹی انٹرنیشنل، ھیومن رائٹس کمیشن آف پاکستان ءُ سیاسی گل ماھل بلوچ ءِ دراج کُشیں دزگیری ءِ پد ءَ تُرس ءِ درشان کَنگ ءَ اَنت ءُ پاکستان ءِ انیگیں نگیگیں جاورانی تہ ءَ ڈیھی ادارگانی نیمگ ءَ چہ چُشیں وئیلانی درچ ءَ یکشلی ءَ گوں برجاہ دارگ ءَ بلوچستان ءِ ھاتر ءَ ترسناک نامینگ ءَ اَنت۔

سر وزیر بلوچستان ءَ آجوئی ءِ جد ءُ جھد ءَ گوں بندوکیں گلاں ترانکاری ءِ داوت دئیگ ءَ اَنت وھدیکہ بلوچستان سرکار ءِ مستری ءَ چُشیں وئیل آیانی گیر سنگینی ءَ پدر کنگ کہ اِیش جنگ زدگیں بلوچستان ءِ جاورانی گنتر ھراب کنگ ءِ سوب جوڑ بنت اِنت۔

ماھل بلوچ یک رندے پد ءَ اے ٹی سی ءِ آمیدگس ءَ پیش کنگ بیتگ کہ آئی ءَ گیش دہ روچ ریمانڈ ءِ ھاتر ءَ پولیس ءِ دست ءَ دیگ بیتگ۔ ریمانڈ پرمان گوستگیں روچ ءَ شال ءَ دیگ بیتگ۔

بلوچ نیشنل موومنٹ گوں ھمگرنچ انسانی اُکبال ءِ ادارگ پانک ءَ درشانے ءِ تہ ءَ گشتگ کہ ای ٹی سی آمیدگس ءَ ماھل بلوچ ءِ ریمانڈ گیش کنگ اے گپ یک پریشانی ءِ درورے کہ کجام ھساب ءَ آمیدگس ءَ ڈیپ سٹیٹ گون ءَ دارگ بوگ ءَ انت، 37 روچ ءِ سپارت کنگ چہ رند پولیس ءَ آئی ءِ ھِلاپ ءَ ڈڈین سَبوپ آرگ ءَ بے سوب بیتگ۔

گیشتر گُوشگ بیتگ کہ واکدار ءَ لس مھلوک ءَ دیم ءَ زورانسری منّ اِتگیں تامور شِنگ کنگ گوں کانود ءُ ماھل ءِ ھمرائی ءَ انسانی اُکبال پادمال کتگ۔

ماھل بلوچ ءَ گوستگیں ماہ ءَ شال ءَ چہ آئی ءِ لوگ ءَ زورانسری بیگواہ کنگ بیتگ آئی ءَ چہ پد ماھل ءِ دستگیری زاھر کنگ بیتگ۔ واکداراں گشتگ کہ ماھل بلوچ ءَ یک پارک ءِ نزدیک ءَ گوں وتکشیں جیکٹ ءِ ھُور دستگیر کُتگ البتہ ماھل ءِ کھول اے الزام ءَ منّگ ءِ چہ انکاری کتگ۔

ماھل بلوچ ءِ آجوئی ھاترا گوستگیں روچ ءَ ایمنسٹی انٹرنیشنل ءَ پاکستان ءِ وزیرِداخلہ ءَ نمدی روان داتگ کہ آئی توک ءَ ماہل بلوچ ءِ زُوت یل کنگ ءِ لوٹ کنگ بیتگ۔

گوستگیں روچاں ماھل بلوچ ءِ منّ اِتگیں تامورے دیم ءَ آرگ پد ھُکومت آوار بلوچ پارلیمانی پارٹی بے کساس ایرادگیری ءِ دام ءِ توک ءَ آں، البتہ آمیدگس ءِ پیشی ءُ پنچومی رند ءَ ریمانڈ ءِ اَرداس منّگ ءِ ھاتر ءَ راجکاری ءُ چاگردی تَبَکہ پریشانی ءِ دَرشان کنگ ءَ انت۔

بلوچستان ءِ دمگ بالگتر ءَ یک مردمے ءَ وتکشی کتگ – وتکشی کنوکیں مردم ءِ پجار بزو ء علی بخش ءِ نام ءَ زانگ بیتگ-

دمگی مردمانی رد ءَ ورنایا وتی گٹ ءَ ساد مان کتگ ءُ وتی زندگی ھلاس کتگ – بلے وتکشی ءِ سبب زانگ نہ بیتگ-

زانگ بہ بیت اے دمگ بلوچستان ءِ ھما دمگاں گوں ھوار اِنت کہ اود ءَ اسراتی ءِ نہ بوگ ءِ برابری اِنت ءُ اے دمگ ءَ گوستگیں ھپتگ ءَ داں انیگ ءَ دومی وتکشی ءِ وئیل اِنت-

ایشی ءَ پیش زرگل ء دوستین نامیں جنکے ءَ وتکشی کتگ ءُ وتی زند ھلاس کتگ –

بلوچستان ءِ دمگ کیچ مند ءَ سیادی داروکیں بلوچستان ءِ نامداریں اکسکار کمانچر بلوچ ءَ وتی پیس تاک ءَ اکسانی بھا کنگ ءِ جار جتگ –

کمانچر بلوچ ءَ وتی پیس بک تاک ءَ گوشتگ کہ من ءَ اے سپر ءَ چاردہ سال سرجم بیتگ کہ من بلوچستان ءِ ھمک چھرگ وتی کساس ءَ دیم ءَ آورتگ ءُ سینگار کتگ اَنت-

کمانچر بلوچ پیس تاک ءَ گوشتگ کہ من یک نودربر ءُ اکسکارے ءَ اے ھرچ مردم ءَ زلوری اِنت کہ آ وتی کار ءِ تہ ءَ الم آئی ءَ ھرچ ءُ درچ درکار بنت-

کمانچر بلوچ ءَ وتی اکسکاری ءِ لھتے ما شوک ءُ سینگارتگیں پریمانی توک ءَ کتگ ءُ آیانی نھاد ایر کتگ اَنت –

آئی ءَ وتی پیس بک تاک ءَ گوشتگ کہ من اے اکساں ھما نھاداں بھا کن آں کہ اے نھاد منی اکسکاری ءِ واستا ڈکے بہ گر اَنت –

کمانچر بلوچ بلوچستان ءِ ھما نامداریں اکسکاراں چہ یکے زانگ بیت اِنت کہ آئی ءَ تنی وھدی شش ھزار ءِ کساس ءَ اکس گپتگ ءُ وتی پیس بک تاک ءَ تالان کتگ اَنت –

آئی ءَ وتی سپر چاردہ سال ءَ بلوچستان ءِ ھما پشکپتگین دمگے ءَ بندات کتگ کہ اود ءَ مھلوک وتی زند ءِ ھمک روچی آسراتیاں ھم زبھر اَنت-

اگاں یک اکسکارے ءِ اکس بھا بہ بنت ءُ آئی ءَ اکسکاری ءِ شریں نھاد بہ رس اَنت گڑا آ گیشتر اکسکار کت کنت ءُ مھلوک ءَ سرکت کنت بلے اگاں چوشیں اکسکارانی اکس ھمے وڑ ءَ بے نھادی ءَ ایر بہ بنت گڑا پراھی ءَ ءُ آئی ءِ چاروکاں اکسکاری ھم آسر بیت کُت کنت-

کمانچر ءِ پیس تاک ءِ لنک