نبشتانک: من ھما کندیل ءِ پیم ءَ رژن بالینتگ وتی
نبشتہ کار: نودگیر بلوچ
دی بلوچستان پوسٹ
آجوئی ءِ گرانیں کشکانی مساپر اے ھبر ءَ سَدّک اَنت کہ پہ وتی داشتگیں سِتکانی دَیناں یک روچے مارا لازم روگی اِنت۔ بلئے پرے گپ ءَ آ نزور نہ بنت۔ آیانی توکل مھکم ءُ سر بُلند بنت۔
راجی زرمبشتانی اے سرمچنڈیں کارست زان اَنت کہ پہ وتی ڈیھ ءِ آجوئی ءِ وشیں سباھانی گندگ ءَ ما گون نہ بہ ایں ۔ بلئے انگت اے گَٹاں گشاد کنان اَنت کہ چہ ایشاں پد آیوکیں مساپرانی بھر ءَ اے سپر کمتر پَشت بہ کپ ایت آ روان اَنت ءُ راہ ءَ وتی گرانیں پندانی چیدگاں مِک کنان اَنت۔
ھمے زمین دیوانکانی تہ ءَ یک نامے واجہ گلام مھمد ئیگ اِنت کہ بلوچ راج ءَ گیشتِر چیئرمین ءِ نام ءَ زانگ بیت۔ بید ء آئی ءِ نام ءَ بلوچ راجی زرمبشت ءِ دپتر نا سرجم اِنت۔ آئی ءَ سک باز بَر ءَ مَرگ وتی نزیک ءَ دیستگ بلے آ مَرگ ءَ ھجبر پروش دات نہ کُتگ۔
“ساہ ءَ منی دلجم بہ بیت مَرگ ءِ لوار کُشت نہ کنت “
“من کہ نہ بنت بازین بنت آ شادِھاں گوں تو ھوار “
آئی ءَ زانتگ اَت اے راہ ءِ آسر مَرگ اِنت بلئے آ اے گپ ءَ ھم دلجم اَت کہ منی ھون پہ بلوچ راج ءُ بلوچ سرڈگار ءَ وشیں بانداتے ءِ مانزمان اِنت۔ اے سپر ءَ آئی ءَ بازیں گرانی یے دیست، لگوریں ھمراھاں دروہ اِت، زندانی بوت، گژن ءُ نیزگاری یے سگ اِت بلئے چہ مادنیں کشک ءَ گسر نہ بوت۔ آزاتی ءِ اے سپر ءَ آئی ءَ لکھاں بلوچ گوں وت ھوار گیپتک۔ لکھاں بلوچ ءِ سکین جوڑ بوت۔ مرچی ھمے راہ ءَ آئی ءِ رندپداں ھزاراں زالبول، ورنا ءُ پیرمرد راھی اَنت۔
چہ درکسانی ءَ آ لھتیں سوال جست کنان اَت۔ مسال ء ھبر ءَ اے ایردستی داں کَدین ءَ؟ پہ ایردستی ءِ بگیری ءَ زوراک ءِ دیم ءَ تھنا دو مردم پرچا جنگ ءَ اِنت؟ آ دگہ مردم بس سُھریں سلامانی دیگ ءَ زندگ اَنت ؟ آ پِگر کنان اَت جیڑان اَت اے گلامی ءِ سِلیں پوست چہ جان ءَ چون لگوشگ بیت اِنت ۔
واجہ ءِ مستریں بْرات واجہ یوسپ وتی گیرانی دپتر ءَ نبشتہ کنت کہ یک روچے منی پِت ءُ من ءَ ءُ گلام مھمد ءَ را ھسپتال ءَ برتگ ئے گوں۔ ھمودا دو مانش ھست اَت ۔ منی پِت ءَ اے مانشانی سرا پاتیا ونت گڑا من جست کُت زاناں اے مئے سْیاد ءُ وارسانی کبر اَنت ، پِت ءَ پسہ دات کہ اناں اے ھما دویں ورنایانی کبر اَنت کہ انگریزانی گلامی ءِ بگیری ءَ جنگ اِش کُتگ ءُ نمیران بیتگ اَنت۔
آ وھد ءَ واجہ گلام مھمد ءِ اُمر نوکی 5 سال اَت ۔ ھاموش اَت بے تواری ءَ مارا گوشدارگ ءَ اَت ۔ پت گپ ءَ اَت کہ اشاں انگریزانی ایردستی نہ مَن اِتگ کہ پہ زورے مارا گلام اِش کتگ۔
گڑا ھمدا گلام مھمد وتی ھاموشی ءَ پُروش ایت ءُ گُش یت گلام گلام گلام پِت آئی ءَ وتی امبازاں زُور یت ءُ گشت ئِے منی چُک چون بوت ترا؟
گلام مھمد پسو دنت کہ ما گلام اِنت؟ پرچا؟انگریزانی بگیری ءَ بس مَنْد ءِ دو مردم ءَ جنگ کُتگ آ دگہ بس پاتیا وانگ ءَ کاینت رو اَنت؟ واجہ چہ درکسانی ءَ اے گپ ءَ ملور کتگ کہ مئے راج پرچا دنیا ءِ دیمروئی کُرتگیں راجانی رِد ءَ نہ اوشاتگ۔ رند ءَ آ اے گپ ءَ مردمانی دلاں چو توم ءَ کِشان بوت کہ اے ایردستی ءِ داتگیں ٹیکی ءُ سوگات اَنت داں کہ ایردستی ھست اِنت اے جیڑھانی گیش ءُ گیوار چو نیمروچ ءِ دیستگیں واباں بے مانا اَنت۔
شھید واجہ گلام مھمد بلوچ 1جنوری 1959 ءَ واجہ مھمد ایوب ءِ لوگ ءَ ماں مَنْد سورو ءَ ودی بیتگ۔ وتی بنگیجی وانگ ءَ گورنمنٹ مڈل اسکول چہ سورو مَنْد ءَ کنت۔ 1980ءَ وتی میٹرک ءِ چکاس ءَ گورنمنٹ ھائی اسکول مَنْد سورو ءَ چہ سوبین بیت اِنت ۔ 1985 ءَ سندھ مسلم کالج کراچی ءَ چہ گریجویٹ بیت ءُ دیمتر ءَ وانگ ءِ واستا بلوچستان مزن شھدربرجاہ شال ءَ روت ۔ بی ایس او پَتر ءَ چہ وتی سْیاسی سپر ءَ بنگیج کنت۔
بی ایس او مَنْد ھنکین ءِ کمک کارگشادی ءَ بگر داں 1982 ءَ کراچی ھنکین ءِ کمک کارگشاد ءُ 1984 ءَ بی ایس او سندھ ءِ سوبائی صدر ءُ 1986 ءَ بی ایس او ءِ بنجائی کمک کارمستر ءُ داں 1990 ءَ بی ایس او ءِ چیئرمین گچین کنگ بیت۔ پد ءَ آ راجی پارٹی بی این ایم ءَ جوڑ کنت ءُ 2 مئی 2004 ءَ چیئرمین ءُ 2008 پد ءَ دوبر بی این ایم ءِ چیئرمین گچین کنگ بیت۔
آئی ءِ زند ءِ مکسد ھمیش اَت کہ وتی راج ءَ چہ اے سِلّیں بے تھمبلی ءَ بہ رکّینیت۔ اے ھاتر ءَ آ مدام جھد ءَ اَت۔ داں وتی زند ءِ گڈی روچاں ھم گشتانک دیگ ءَ اَت۔ مَنْد ءَ بہ گَر داں کراچی ءَ آئی ءَ دمبرگ نہ زانت آ یک توانا ءُ کاملیں راجی راھشونے اَت۔ آئی ءِ بازیں ھمراھاں چیر ءُ اندری ءُ بازینے ءَ سرزاھر ءَ گوں سرکار ءَ سودا جت ءُ وتی کشک مٹّات بلئے پرے گپ ءَ آ دلپروش نہ بوت۔ دانکہ آ ھست اَت جنزان اَت۔
بلوچ راج ءِ اے سوھویں رھشون مرچی مئے میان ءَ ساڑی نہ اِنت بلئے آئی ءِ کاروان پہ رژنائیں بانداتے ءَ گام جنان ءُ جنزان اِنت۔ 3 اپریل 2009 ءِ روچ ءَ کہ واجہ گلام مھمد گوں وتی دو ھمراہ ءَ آوار جَنئگ بیت ءُ شش روچ ءَ پد 9 اپریل 2009 ءَ سئیں بلوچ رھشونانی کُنٹ ماں مُرگاپ ءِ ھون سیریں زمین ءَ دز کپ اَنت ۔ ھمے روچ ءَ بلوچستان ءُ بلوچ راج ءَ سْیاہ ءُ تھاریانی کوھیں گْرند سرا کپ اَنت۔ ھما ٹپ اَنت کہ یکشل ءَ آزگ بوان اَنت ءُ بلوچ ءِ جنز ءُ آجوئی ءِ سپر پہ وتی منزل ءَ گوں تیزے ءَ گام جنان ءُ روان اِنت اے روچ الم کیت کہ بلوچ راج ءِ سرکیلیں سر چیئرمین واجہ گلام مھمد ءُ آئی ءِ ھمراھانی دیستگیں واب مانا بنت ۔
انچش کہ واجہ گوش ایت ما کہ ھمے جنگ بندات کُتگ ایشی ءِ تَھ ءَ مئے زندگ بوگ مُشکل اِنت بلئے مئے نہ بوگ ءَ منزل الم نزیک بیت اِنت۔
جنگ انگت روگ ءَ انت ، بلوچ راج وتی جانی دیمونیانی دیگ ءَ چَک ءُ پَد نہ بوگ ءَ اِنت بلوچ رھبرانی رتکگیں ھون ھمے گپ ءِ مانزمان اَنت کہ سوبمَنْدی بلوچ ئیگ اِنت۔ بلوچ الم رژنائیں روچانی بامساراں گند ایت۔
“تو پہ منی واہ ءِ پد ءَ مرواردیں ارساں مہ گوار”
“واھگ منی جند ءِ نہ انت ھست انت تئی زرد ءِ کرار”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
