TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کُتگیں درشانے تہءَ گُشتگ کہ مئے سرمچاراں تربت ءُ سبی ءَ سئے جتاھیں اُرشانی تہ پاکستانی چیریں ادارگانی کارمند، پاکستانی پوجءِ بُنجل ءُ ریل نشانگ کُتگ۔ کہ اِشانی تہءَ یک چاریگے کُشتگ، سئے کارندہ ٹپی کُتگ ءُ ریل گاڑی ءَ ھوار پھاٹک تاوانبار کُتگ۔

جارکشءَ گُشتگ کہ بی ایل اے ءِ سرمچاراں مروچی تربت شھرءِ بنجاھی جامع مسیت ءِ نزیک ءَ تیرگواری کُتگ ءُ پرویز مسیح ء برکت مسیح جھمنند اوکاڑہ، پنجاب کُشتگ۔

آئی ءَ گُشتگ کہ ھمے مردم سرکاری نوکری دروشم ءَ پاکستانی چیریں ادارگانی چریکی ءَ کار کنگ ءَ بیتگ۔ ما چدوپیسر 9 اپریل ءَ پدر کُتگ کہ تُربت ءَ ھوار دگہ دمگانی تہءَ قوضہ گیریں پاکستانی پوج ءُ چیریں ادارگانی داشتگیں چاریگ مئے نشانگ ءَ بنت۔

جیئند بلوچ ءَ گُشتگ کہ دومی اُرش ءِ تہءَ بلوچ لبریشن آرمی ءِ سرمچاراں تربت، آبسر ءِ تہءَ قوضہ گیریں پاکستانی پوجءِ یک چوکی ءِ نشانگ کتگ۔ اے چوکی ھما جاہ ءَ اڈ کنگ بیتگ کہ ھمودہ بلوچ ورناہ حیات بلوچ دژمنیں پوج ءَ نمیران کتگ اَت۔

آئی ءَ گُشتگ کہ بی ایل اے ءِ سرمچاراں دژمنیں پوجءِ چوکی ءِ سرءَ گرنیڈ لانچر ءَ گوں بازیں گولہ آس داتگ کہ اِشی آسرءَ کم چہ کم آئے کارندہ ٹپی بیتگ اَنت وھدیکہ آیاں مالی تاوان ءِ دیمپانی کنگ کپتگ۔

جارکش ءَ گُشتگ کہ گوستگیں روچاں بی ایل اے ءِ سرمچاراں سبی ءَ مشکاف ءِ ھندءَ جعفر ایکسپریس ریل گاڑی ھما وھدءَ گوں آئی ای ڈی ءَ نشانگ کُتگ کہ آ چہ شال ءَ دیم پہ لاھور ءَ رؤگ ءَ بیتگ۔ اُرش ءِ تہءَ ریل ءِ انجن ءَ ھوار پھاٹک ءَ باز تاوان رس اِتگ۔

جئیند بلوچ ءَ گُڈسرءَ گُشتگ کہ بلوچ لبریشن آرمی ھمے سئیں اُرشانی زمہ واری ءَ من اِیت ءُ داں سرڈگارءِ آجوئی ءِ گرگ ءَ مئے اُرش دژمنیں پوج ءُ آئی کمکارانی سرءَ برجاہ مان اَنت۔

بلوچستان ءِ دمگ جھل مگسی ءِ میتگ سارنگانی ءَ پوج ءُ دھکان کارانی میان ءَ جنگ ءُ چوپ ءَنُھ لیویز کارمند مُرتگ ءُ دھ دھکانکار ءُ زالبولاں ھوار نوزدہ مردم زدگ بوتگ انت –

گیشیں ھالانی رِد ءَ جھل مگسی ءِ اسسٹنٹ کمشنر رحمت اللہ شاہ، جھل مگسی ءِ تحصیل دار ارباب خان مگسی ءَ لیویز کارمندانی ھمراھی ءَ آمیدگس ءِ ھکم پد ءَ سارنگانی میتگ ءَ گلہ ءِ پہ رون ءَ تیاریں کشار بُراِتگ گڈا میتگ ءِ دھکانکاراں گھگیری کنان ءَ لیویز کارمندانی سر ءَ گوں لٹ ءُ ڈوکاں اُرش کُتگ –

لیویز کارمنداں دھکانکارانی درگان درگان کنگ ءِ ھاتر ءَ آیانی سر ءَ بُرزی تیرگواری کتگ – جنگ ءُ چوپ ءِ میان ءَ لیویز اپسر سابر حسین ءَ ھوار نُھ لیویز کارمند مُرتگ انت ءُ دھکانکارانی دھ زالبول زدگ بوتگ انت –

وئیل ءَ پد لیویز ءِ دگہ بازیں کارمند ءِ وئیل جاہ ءَ سر بوتگ ءُ گیشیں پٹ پول کنگ ءَ انت –

پوجی بنجل ءِ جوار دمگ ءَ اُرشکارانی شوھاز برجاہ –

بھارت ءِ گوریچانی سوبہ پنجاپ ءَ پوجی بنجلے ءِ سر ءَ سلاہ بندیں مردمانی اُرش ءَ چار مردم جنگ بوتگ انت –

پوج ءِ جارکش ءَ وتی درشان ءِ تہ ءَ گوشتگ کہ ھمودے سھب ءِ ادار چار ءُ سِی ءُ پنچ ءَ بھٹنڈہ ءِ ھند ءَ پوجی بنجلے ءِ سر ءَ سلاہ بنداں اُرش کُتگ –

جارکش ءَ گوشتگ کہ اُرش ءَ چار مردم جنگ بوتگ انت ءُ بیس ءِ کش ءُ گوراں اُرش کارانی شوھاز برجاہ انت –

بٹھنڈہ ءَ سینئر پولیس ءِ کارمند گلنیت سنگھ کھرانہ ءِ گوشگ انت کہ پولیس ٹولی پوجی بنجلے ڈن ءَ این ڈی ٹی وی ءِ ودار ءَ کنگ ءَ بوتگ انت- آئیءَ اے ھم گوشتگ کہ اے اُرش ناشرکاری اُرش ءِ نہ بوتگ زاتی دژمنی ءِ سوب ءَ کنگ بوتگ –

مائیکرو بلاگنگ ویب سائٹ ٹوئٹر ءِ واھند ایلون مسک ءَ گوشتگ کہ اگاں آئی ءُ شریں بھا زیروکے دز بہ کپ ایر گڑا آ وتی کمپنی ءَ بھا کنت –

ایلون مسک ءَ چار شمبے ءِ روچ ءَ برتانیہ ءِ ھال شنگ کنوکیں ادارہ بی بی سی ءَ گوں یک گلگدارے ءَ گوشتگ کہ کارانی گیشی ءِ سبب ءَ برے برے آ وتی کارگس ءَ وپس ایت-

آئی ءَ دیمتر ءَ گپ کنان ءَ گوشتگ کہ آئی ءَ ھما ٹوئٹر زرتگ گڑا ایشی ءِ کمپنی ءِ ملازمانی کچ ھشت ھزار بیتگ اَنت نی آ کچ کم بیتگ ءُ کساس 1500 پش کپتگ اَنت-

ملازمانی نوکریانی کشگ ءِ سر ءَ آئی ءَ گوشتگ کہ من ءَ ایشی ءِ سر ءَ ھچ وشی نہ بیتگ اے مزنیں تکلیپ دیوکیں املے بیتگ بلے من یکدم لاچار بیتگ اَنت کہ منی گور ءَ دگہ ھچ دگہ راہ نہ بیتگ پرچاکہ گڑا ما پنڈوک بیگ ءَ دیر نہ کتگ ات-

ٹوئٹر ءِ واھند ءَ وتی برانزی ٹویٹس ءَ وتی گپانی درچتاک بیت اِنت آئی ءِ سر ءَ ایراد ھم گر اَنت – آئی ءِ گوشگ ات کہ من ءَ شپ ءِ نسپ ءَ توئٹ کنگی نہ اِنت-

آئی ءَ دیمتر ءَ گوشتگ کہ ھرچی اے وڑی ءَ روگ ءَ ئے گڑا باید آ ٹوئٹ ڈرافٹ ءَ ایر کنگ بہ بیت پد ءَ دومی روچ ءَ آئی ءَ بہ چار ایت ءُ پکر بہ کنگ تو ایشی ءَ ٹوئٹ کنگ لوٹ ئے-

زانگ بہ بیت کار کمپنی ٹیسلا ءُ راکٹ فرم اسپیس ایکس ءِ واھند ایلون مسک ءَ ٹوئٹر گوستگیں سال ءِ اکتوبر ماہ ءُ چل ء چار بلین ڈالر ءَ زرتگ بیتگ –

بلوچستان ءِ دمگ مچ ءُ کش ءُ گوری دمگاں پوجی بیڑ برجاہ، دمگی مردمانی رد ءَ پوجی ھیلی کاپٹرانی آیگ ءُ نندگ برجاہ اَنت بلے داں انگت ءَ دگہ جانی ءُ مالی تاوانانی ھال نیتکگ اَنت-

زانگ بہ بیت بولان ءَ ھم ھمے ھپتگ ءَ پوجی لشکر کشی بندات کنگ بیتگ اَنت دمگی مردمانی رد ءَ سارو ءُ کش ءُ گوری دمگاں داں انگت ءَ پوجی کارندہ جاڑیگ اَنت-

زانگ بہ بیت بلوچ راج دوست ءُ انسانی ھکانی گل بلوچستان ءَ پوجی آپریشنانی وھد ءَ لس آبادیانی سر ءَ بمب گواری، تیرگواری ءُ دزگیریانی بھتاماں پوج ءِ سر ءَ لڈگ ءَ اَنت-

راجدوستیں گلانی گوشگ اِنت پاکستانی پوج لشکر کشیانی وھد ءَ لس شھری نشانگ کنگ بوگ ءَ اَنت-

ھمے وڑ ءَ بولان ءُ دگ ءِ کش ءَ ایریں بمبے بے سوب کنگ بیتگ-

واکداراں ٹاہ داتگ کہ بلوچستان ءِ دمگ کچی ءِ ھند بولان ءَ دگ ءِ کش ءَ ایریں بمب بے سوب کتگ-

انتزامیہ ءِ رد ءَ ناشناسیں مردماں اُرشکاری ءِ واستا دگ ءِ کش ءَ بمبے ایر کتگ ءُ چریشی ءِ گندگ ءَ پد لیویز ءُ ایف سی ءِ بازیں کارندھاں دمگ انگیر ءَ کتگ –

دمگی پولیس ءِ رد ءَ ناشناسیں مردماں بمب پلاسٹکے ءِ توک ءَ کتگ ءُ دگ ءِ کش ءَ ایر کتگ –

امریکہ ءِ گوستگیں سروک ڈونلڈ ٹرمپ ءَ جرمکاری ءِ پٹ ءُ پول ءَ پد وتی اولی گلگدار ءَ گوشتگ سعودی ءِ مردم جوانین مردم اَنت ءُ آ امریکہ ءِ کمک ءِ اش لوٹ اتگ-

عرب نیوز ءِ رد ءَ امریکہ چینل فوکس نیوز ءَ داتگیں گلگدار ءَ ڈونلڈ ٹرمپ ءَ سروک بائیڈن ءَ سعودی عرب ءَ ’ ایوک ‘ کنگ ءِ درگت ءَ گوشتگ کہ سعودی عرب ءَ بہ چار ءُ بہ چار چی بیتگ – آ جوانیں مردم اَنت ءُ آیاں مئے کمک کنگ لوٹ اَنت آ سروک جوبائیڈن شتگ ءُ آیاں گوں دستے ملائینتگ نی شما سرپد اِت کہ چی بیتگ اے دست ءُ دروھتی ءَ سر دراھورتگ من ءَ گوں دست ءُ دروتی مہ کن تئی دست گندگ اَنت-

ڈونلڈ ٹرمپ ءَ وتی گپ درشان کنان ءَ گوشتگ کہ آئی ءِ پٹ ءُ پول کتگ اے سرپدی بوگی اِنت شما درست زان ات من آیاں دست ءُ دروھتی نہ آں بلے شما پرچا واھگ دار اِت-

یک جستے ءِ پسھی ءَ گوشتگ کہ ڈونلڈ ٹرمپ ءَ چین ءِ سروک شی جن پنگ ءَ را درستاں جوانتر ھوشدار گوشان ءَ گوشتگ کہ آئی ءِ وڑیں کس نیست اِنت آ مئے جوانتر ءُ نزیکتریں مردم اِنت-

گچینکاری ءِ درگت ءَ گپ کنان ءَ گوشتگ کہ ڈونلڈ ٹرمپ ءَ گوشتگ کہ جوبائیڈن 2024 ءِ سروکی گچینکاری ءَ میدان ءَ گندگ نہ بیت اِنت-

آئی ءَ گوشگ ات اے نا وشی یے بیت اِنت یا من ءَ بوگ ءُ نابوگی ءَ گندگ ءَ اِنت آئی ءِ عمر ءَ گوں ھچ سیادی نیست اِنت-

آئی ءَ گوشتگ کہ آیوکیں گچینکاری ءَ نائب سروک کملا ھیرس ناگتی ڈیموکریٹ پاٹی ءِ سروکی ءَ کت کنت بلے منی گمان اِنت آئی ءَ مزنیں اسٹیجے ءِ سر ءَ فارمنسے گندگ ءَ نیت اِنت یا من رد باں –

مئے اَهد ءِ شیرزال لُمہ کریمہ

نبشتہ کار: کندیل بلوچ

دی بلوچستان پوسٹ

جلواھے لوٹ ئے گُڑا کردار ءَ سمبهین
هُشکیں بالاد ءَ مسینگار من ءَ کندگ کیت

کردار بنی آدم ءِ پجار اِنت هر مردم ءِ بہ بیت چہ وتی کردار ءَ زانگ بیتگ آ کِرد هرابینے بہ بیت یا شرینے اِے درگت ءَ هم مردم وتی کردار ءَ سمبهینت کنت چہ وتی زاتی واهشتاں دست بردار بہ بیت ءُ وتی راجی دیمروئی ءِ هاتر ءَ ساجو بہ کنت هر مردمے بہ بیت آ پہ وتی کردار ءِ سمبهینگ ءَ وتی دل ءَ یکّ واهگے ءُ هیالے دار ایت بلّئے سوبین هما مردم بیت کہ وتی تہ ءَ توکل ءُ هاٹیگے ودی بہ کنت-

اِے گّپ ءَ چہ هچ وڑیں بِهک ءِ نیست کہ لھتے مردم چہ مرگ ءَ پد هم زندگ بنت بلّکیں پہ مُدامی ابدمان ءُ نمیران بنت گُڑا چہ بازیں هبراں اِے پدر بیت کہ اِے نمیرانی ءِ پُشدار ءَ کردار اِنت شریں کردانی واهُند کرنانی کرن مان بنت آهاں هرکّس زانت اِے جھان ءَ بنی آدم ءِ لڑ سکّ مزن اِنت دائم مردم ودی بوگ ءُ مِرگ ءَ اَنت بلّے همے مرتگینانی تہ ءَ لھتے اَنچیں کارست ھست کہ آ اَنگت زندگ اَنت پہ درور چی گویر، مارکس، چیئرمین ماؤ، لیلاخالد، بهگت سنگھ ءُ دیگہ هم باز ھست کہ آهاں پہ وتی آزاتی ءَ جُھد کُتگ ءُ سوبین بوتگ اَنت-

آجوئی ءِ جُھد ءَ هوار بوتگیں مردم وتی دل ءَ سدکّاں کہ مارا وتی داشتگیں سیتانی دینا یکّ روچ ءِ الّم روگی اِنت بلّئے اَنگت پہ وتی هاک ءِ پهازگ ءَ هچ وڑ ءَ چک ءُ پد نہ بنت نہ کہ چہ دژمن ءِ پاتراپ ءُ بیھاراں چہ جُھد ءَ پدکنز بنت بلّکیں دژمن ءِ زُلم ءُ زوراکی آهانی جُھد ءَ را پہ مُدامی مُهکم کنت ءُ آهاناں پہ دیم ءِ آهوکیں بیھارانی دیم ءِ دارگ ءَ توانگر کنت-

راجی زُرمبشتانی اِے نہ تُرسیں کارست زان اَنت کہ داں آجوئی ءِ بام ءِ ٹکّ دئیگ ءَ ما گوں نہ بنت بلّئے اِے گّپ ءَ ابید هم وتی جُہھد ءَ برجم دار انت ءُ اِے کشک ءَ گوں ایمنی ءَ سپر کن اَنت دانکہ باندا روچ اِے گلامی ءِ توک ءَ چہ آزات بوگ ءَ مئے آوکیں پدریچ چہ کُربانی ءِ دئیگ ءَ پدکنز مہ بیت ءُ دژمن ءَ سُوب مہ کنت-

بنی آدم ءِ گواستانک اِے گپ ءِ گواه اِنت کہ راجی آجوئی ءِ جنزانی تہ ءَ زالبولانی یکّ بے مٹ ءُ بے بهائیں کردارے هست سرجمیں دگنیا ءِ تہ ءَ شیرزالانی کّسہ سکّ باز اَنت وهد ءِ شیرزالانی گّپ بہ بیت گُڑا پہ پلستین ءَ لیلا خالید ءِ نام گرگ بیت آگاں الجزئیر ءِ راجی جُنز ءَ وانے ترا جمیلہ الجزائری کردار دیم ءَ کیت هندوستان ءِ راجی جُنز ءِ تہ ءَ ترا لکشمی بائی کردار گندگ ءَ کیت وهدے جرمنی ءِ راجی جُنز ءَ چارے ترا لیوڈمیلا پاولیچینکو ءِ کردار گندگ ءَ کیت اِے شیرزالاں راجدپتراں پہ ابدمانی وتی نام گوں هوناں نہ بیست ءَ پمیشکا مرچی گواستانک آهاں پہ شریں وڑے ءَ یات کنت-

بلّئے ما آگاں وتی بلوچستان ءِ گّپ ءَ بکناں گُڑا مارا یکّ دلیریں ءُ نہ تُرسیں شیرزالے ءِ نام دیم ءَ کیت “بانُک کریمہ” کہ آئی ءَ وتی سرجمیں زند پہ بلوچ راج ءُ بلوچستان ءَ ندر کُت مرچی بانُک ءَ را راج لُمہ ءِ نام ءَ یات کنت پرچہ کہ آئی ءَ پہ وتی راج ءَ مات ءِ کرد پیلو کُتگ اَت بلّکیں چہ ماتے ءَ چہ گیش سرجمیں راج ءِ ڈُبھے وتی کوپگاں زورتگ اَت هزار سکّی ءُ سوریانی دیمپان بوگ ءَ ابید هم آرا دژمن ءَ پروش دات نہ کُت آئی ءَ مرگ ءَ را باز وهد ءَ وتی نزیک ءَ دیستگ اَت بلّئے چہ آئی ءِ بُلندیں توکلاں مرگ ءَ هم آئی دیم ءَ پروش وارت-

اِے هبر راستے کہ کریمہ مئے میان ءَ نہ اِنت بلئے کریمہ ءِ جوزاگ مرچی هر بلوچ زالبول ءِ دل ءَ زندگ اِنت آئی پگّر ءُ لیکہ ءَ مرچی همّک بلوچ زالبول ءَ را اِے توکل بکّشاتگ کہ آ مرچی بلوچ ءِ چُک چُک پہ وتی آجوئی ءَ جُھد کنگ ءَ اِنت سال ءُ سن هر جیز بوگوز ایت وهد مٹ بہ بیت بلّئے بانُک ءِ پگّر ءُ سسہ اَنگت زندگ اِنت کیچ ءِ دمک ءُ دراں آئی ءِ گوشتانکی توار اَنگت کایاں تُمپ ءِ کوه ءُ گیاباں بہ بنت یا شال ءِ دمک ءُ در دُرست تئی چھرگ ءَ جن اَنت تئی آشوبی توار اَنگت ماں بلوچستان ءِ کوه ءُ کوچگاں اَنت تئی پگّر چو گواڑگ ءَ آتاران اِنت همُکّ راه ءُ راهسراں تئی پگّر ءِ ساچانیں جمبر اِنت مرچی مئے سرا ساهیل اَنت دژمن ءَ سُوب کُتک ما کریمہ کُشتگ بلّئے اِے نزانت کریمہ ءَ وتی وڑیں هزار کریمہ رودینتگ کہ مرچی آئی ءِ جُھد ءَ دیم ءَ برگ ءَ اَنت کہ بلوچستان ءِ براه اَنت ءُ بلوچستان اِش روژناه کُتگ بلوچستان ءَ چو کریمہ ءَ هزار کریمہ رودینتگ کہ پہ زمین ءُ جند ءَ پجار ءَ وتی مُدامی وتئی بے مٹیں سرانی کُربانی ءَ دے اَنت ءُ پہ اِے اهد ءِ زوراک ءَ مدامی نپت ءُ بیر بنت آهانی سرا کپ اَنت-

تو نمیران ءِ تو ابدمان ءِ داں جھان ھستیں تو هست ءِ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ سیل ءُ سوادی دمگ زیارت ءَ دو پاکستانی پوجی کارمندانی دزگیری ءِ ھال انت –

گیشیں ھالانی رِد ءَ گوستگیں روچ ءَ بزاں یازدہ اپریل ءَ ناشناسیں سلاہ بندیں مردماں بلوچستان ءِ دمگ زیارت ءَ پاکستانی پوج ایف سی ءِ دو کارمند دزگیر کُتگ ءُ گوں وت برتگ انت –

بلوچی راجی جنگ ءِ سر ءَ نزر ایر کنوکیں بلوچ اھوالکار باھوٹ بلوچ ءَ وتی ٹویٹر اکاؤنٹ ءَ اے ھبر راست کُتگ ءُ گوشتگ کہ سلاہ بندیں مردماں چہ زیارت ءِ نزیک ءَ دو سرکاری کارمند دزگیر کُتگ گوں وت برتگ انت – بلے تنی وھدی چہ سرکار ءِ نیمگ ءَ آھانی دزگیری ءِ ھچ وڑیں درشان دیگ نہ بوتگ –

زانگ بہ بیت چد ءُ پیسر ءَ سال دوھزار ءُ بیست ءِ دوازدہ جولائی ءَ پاکستانی پوج ءِ اپسر کرنل لئیق بیگ مرزا ھم چہ زیارت ءَ سلاہ بندیں مردماں دزگیر کتگ ءُ گوں وت برتگ ات ءُ پد ءَ رند ءَ جتگ ءُ دور اش داتگ کہ آئی ءِ دزگیری ءُ کوش ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ ات – بلے تنی وھدی چہ بلوچ آجوئی لوٹوکیں سلاہ بند ءُ دگہ گلانی نیمگ ءَ اے دوئیں پوجی کارمندانی دزگیری ءِ درگت ءَ ھچ وڑیں درشان دیگ نہ بوتگ اَنت –

انڈین پریمئیر لیگ ءِ شانزدھمی سیزن ءِ شانزدھمی گوازی ءَ پنچ رند ءَ چیمپئن بوتگیں ممبئی انڈین ءَ دھلی کیپٹلس ءِ دیم ءَ شش وکٹاں گوازی کٹ اِتگ ءُ اے سیزن ءِ تہ ءَ وتی اولی سوبمندی نبشتہ کنائیں اِتگ –

کپٹن روہت شرما ءِ سروکی ءَ ممبئی ءِ اے سیزن ءِ سَے گوازیانی تہ ءَ اولی سوبمندی انت، وھدیکہ دھلی کیپیٹلس ءِ پد ماں پد چارمی رند انت کہ بے سوب بوگ ءَ انت – گڈی بال ءَ کٹوکیں ممبئی ٹیم ءَ اے گوازی شش وکٹاں وتی نام ءَ کتگ –

دھلی کیپٹلس ءِ نیمگ ءَ دیگ بوتگیں یکسد ءُ ھپتاد ءُ سَے رنانی ٹارگٹ ءِ پروشگ ءِ ھاتر ءَ ممبئی انڈین ءَ چار وکٹانی تاوان ءَ گوازی وتی نام ءَ کتگ – ممبئی ءِ نیمگ ءَ کپٹن روہت شرما ءَ درساں گیش شست ءُ پنچ رن جوڈ کتگ – آئی ءَ چِل ءُ پنچ بالاں شش چوکا ءُ چار چکّا جتگ – ایشن کشن ءَ سِی ءُ یک رن جوڈ کتگ ءُ آؤٹ بوتگ وھدیکہ تلک ورما ءَ بیست ءُ نُھ بالاں چِل ءُ یک رن جوڈ کتگ – سوریہ کمار اولی بال ءَ آؤٹ بوتگ ءُ واتر بوتگ – ٹم ڈیوڈ ءَ سینزدہ ءُ کیمرون ءَ ھبدہ رن جوڈ کتگ ءُ ناٹ اؤٹ بوتگ انت – ممبئی ءِ نیمگ ءَ مکیش کمار ءَ دو وکٹ گپتگ –

چدو پیسر اکشر پٹیل ءُ کپٹن وارنر ءِ نیم سنچری کنگ ءَ ابید ھم دھلی ٹیم یکسد ءُ ھپت ءُ دو رنانی جوڈ کنگ ءَ پد ھم بے سوب بوتگ – اکشر ءَ بیست ءُ پنچ بالاں پنچ چکا ءُ چار چوکائے کمک ءَ پنجاہ ءُ چار رن جوڈ کتگ ءُ ڈیوڈ ءَ چِل ءُ ھپت بالاں پنجاہ ءُ یک رن جوڈ کتگ ءُ شش چوکا جتگ ءُ اشی ءِ ھمراھی ءَ ششمی وکٹ ءِ ھاتر ءَ شست ءُ ھپت رنانی ھمراہ داری کتگ بلے اشی ءَ ابید ھم ٹیم 19.4 اووراں واتر بوتگ – اے دوئیناں ابید دھلی ءِ ھچ کس ءَ سِی رن ھم جوڈ نہ کتگ –

پہ ممبئی ءِ ھاتر ءَ تجربہ کار لیگ اسپنر پیوش چاولہ ءَ جوانی ءَ بالنگ کنان ءَ بیست ءُ دو رن داتگ ءُ سَے وکٹ گپتگ وھدیکہ جیسن ءَ بیست ءُ سَے رن داتگ ءُ سَے وکٹ گپتگ – ریلء میریڈیتھ ءَ ھم دو وکٹ گپتگ –

کراچی پولیس ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ دو باسکانی دزگیری ءِ ٹاہ داتگ –

ملیر ءِ ایس ایس پی ءَ کراچی ءَ اھوالکاراں گوں تران کنان ءَ گوشتگ کہ پولیس ءَ کاروائی کنان ءَ بی ایل ایف ءِ دو باسک دزگیر کتگ انت –

پولیس ءِ رِد ءَ دزگیر کنگ بوتگیں مردم ایران ءَ نندوکیں علی حسن سانگو نامی بی ایل ایف ءِ کماندارے ءَ گوں ھال اھوال ءَ بوتگ انت ءُ آھاں چینی کارمندانی سر ءَ اُرش کنگ ءِ شوربندی سرجم کتگ بوتگ –

ایس ایس پی ءِ گوشگ انت کہ علی حسن سانگو ءَ ھردو مردم چِل ءُ کنچ دستی بمب ءُ ھشتاد ھزار کلدار داتگ انت –

آئی ءَ گوشتگ کہ دزگیر کنگ بوتگیں مردماں شاہ لطیف ٹاؤن ءَ پولیس ءِ سر ءَ دزبمب اُرش ءِ ھم کُتگ بوتگ کہ دزبمب اُرش ءِ زمہ واری بی ایل ایف ءَ منّ اِتگ –

آئی ءَ گوشتگ کہ دزگیر کنگ بوتگیں مردماں شاری بلوچ ءِ نمیرانی سالروچ ءَ اُرش ءِ شوربندی کتگ بوتگ کہ آھاں دو روچ ءَ پد تربت ءَ روگی بوتگ ءُ واتر بیست ءُ شش ءَ آیگی بوتگ –

پولیس ءِ رِد ءَ علی حسن ایران ءَ چیر انت – بلے تنی وھدی بلوچستان لبریشن فرنٹ ءَ اے درگت ءَ ھچ وڈیں درشان نہ داتگ –