TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ کہ مئے سرمچاراں پنجگور ءَ دو جتا جتائیں اُرشاں زورگریں پاکستانی پوج ءِ کاروان ءُ چیک پوسٹ نشانگ کرتگ اَنت، چریشاں چار کارندہ مرتگ ءُ نُھ زدگ بیتگ اَنت-

جارکش ءِ رد ءَ بی ایل اے ءِ سرمچاراں گوستگیں روچ ءِ سھب ءِ وھد ءَ بی ایل اے ءِ انٹیلی جنس ءِ ھال ءِ سر بوگ ءَ پنجگور ءِ ھند سرادک گومازن ءَ سی پیک دگ ءَ پاکستانی پوج ءِ دو گاڑیانی سر بستگ ءُ اُرش کتگ اَنت-

آئی ءَ گوشتگ کہ اُرش ءِ زد ءَ اتکگیں دشمنیں پوج ءِ یک گاڑی ءَ سواریں چار کارندہ ھما جاہ ءَ مرتگ ءُ بازینے زدگ بیتگ اَنت ءُ ھمے رنگ ءَ کپتگ دلیں دشمن ءَ تچگ ءِ جھد کتگ ءُ کمو گستائی ءَ پد گاڑی اش کلٹی بیتگ ءُ کم چہ کم ھپت کارندہ زدگ بیتگ اَنت –

جیئند بلوچ ءَ گوشتگ کہ گوستگیں شپ ءَ یک دگہ اُرشے بی ایل اے ءِ سرمچاراں پنجگور ءِ دمگ رخشان پُھل ءَ زورگریں پاکستانی لشکر ءِ یک چیک پوسٹے نشانگ کتگ، سرمچاراں دشمنیں پوج ءِ پوسٹ گرنیڈ لانچراں گوں نشانگ کتگ چریشی ءَ کساس دو کارندہ زدگ بیتگ اَنت ءُ آیاں مالی تاوانانی دیمپانی کنگ کپتگ-

آئی ءُ وتی درشان ءِ گڈسر ءَ گوشتگ کہ بلوچ لبریشن آرمی اے دویں اُرشانی زمہ واریاں من ایت ءُ اے اھد ءَ درشان کنت کہ زورگریں پوج ءِ درکپگ ءَ داں مئے اُرش برجاہ بنت-

بلوچستان: پنجگور ءِ دمگ کیلکور ءَ مروچی سھب ءَ بندات بوتگیں پاکستانی پوج ءِ زمینی ءُ برزی لشکر کشی برجاہ انت دومی نیمگ ءَ پاکستانی پوج ءِ جارکش ءَ سلاہ بندیں گلاں بندوکیں سَے مردمانی کُشگ ٹاہ داتگ –

گیشیں ھالانی رِد ءَ کیلکور ءُ کولواہ ءِ میانی کوھی دمگاں مروچی سھب ءِ ادار شش بندات بوتگیں لشکر کشی ھنگت برجاہ انت –

اھوالکار ءِ رِد ءَ اے لشکر کشی ءَ پیادگیں پوج ءَ ابید جنگی بالگرد ءُ ڈرون بالگرد ھم دمگ ءِ تہ ءَ ترءُ گرد کنگ ءَ انت –

بلے تنی وھدی ھچ وڈیں تاوان ءُ دزگیری ءِ ھال سر نہ بوتگ ءُ ناکہ لشکر کشی ءِ درگت ءَ سرکاری واکداراں درشان داتگ –

دومی نیمگ ءَ بلوچستان ءِ دمگ کیچ ءَ پاکستانی پوج ءِ جارکش ءَ سَے مردمانی کُشگ ءِ ٹاہ داتگ-

پاکستانی پوج ءِ جارکش ءِ رِد ءَ پھازگی لشکر ءِ کارمنداں مروچی کیچ ءِ دمگ گشکور ءَ لشکر کشی ءِ میان ءَ سَے مردم جتگ ءُ کُشتگ انت ءُ سلاہ بندین مردمانی بنجل ءَ بازیں کچے ءَ سِلاہ ءُ شوروانی دستیگ کنگ ءِ ٹاہ داتگ اَنت-

بلے تنی وھدی ھر سَئیں مردمانی سرجمیں ھال ءُ آھانی پجار دیم ءَ نہ اتکگ انت اے درگت ءَ گیشیں پٹ ءُ پول برجاہ انت –

سپارتی سیادمندی ءَ پد ایران ءِ سپارت جاہ ھپت سال ءَ پد بنجاھی شھر ریاض ءَ پچ کنگ بیتگ-

عرب نیوز ءِ رد ءَ ایرانی وزارت ھارجہ ءِ جارکش ناصر کنعانی ءَ گوشتگ ایران ءُ سعودی عرب ءِ میان ءَ بتگیں مسام ءِ لڑ ءَ سپارتجاھانی پرکاری دوبر پچ کنان ءَ ایرانی ءِ گچینی ءِ باسک چار شَمبے ءِ روچ ءَ ریاض ءَ سر بیتگ اَنت کہ اود ءَ واکداراں وشھتی ءَ دیم ءَ اتکگ اَنت-

ایرانی باسک سعودی عرب ءَ سر بوگ ءَ پد لھتے اداراں پد سپارتجاہ ءِ دزوازگ پچ کنگ بیتگ-

جارکش ناصر کنعانی ءَ دیمتر ءَ گوشتگ کہ ایرانی باسک ریاض ءَ سپارت جاہ ءُ جدہ ءَ قونصل ھانہ ءِ پچ کنگ ءَ ھواری ءَ اسلامی “تعاون گل ” ءِ ایران ءِ ایوکیں مندوب ءِ پرکاریاں اژدری گامگیج زور ایت-

زانگ بہ بیت ھردوکیں ڈیھانی وزرائے ھارجہ ھمے ماہ ءَ چین ءَ گند ءُ نند بیتگ اَنت ءُ گوستگیں ھپتگ ءَ سعودی ءِ یک باسکے تھران ءَ ایرانی چیف آف پروٹوکول ءَ دُچار کپتگ ءُ مروچی پشمبے ءِ روچ ءَ مشھد ءَ رو ات اِنت-

مارچ ءَ چین ءِ کرد ءَ ایران ءُ سعودی عرب ءِ میان ءَ سپارتجاھانی پچ بوگ ءَ پد یک جوانیں گامگیج گندگ ءَ کیت اِت اِنت-

اے چیز ھم گندگ ءَ کیت اِت اِنت ھردوکیں ڈیھانی گند ءُ نند ءَ پد سعودی عرب یمن ءَ ایرانی پلامرزی ءَ ھستیِ حوثی ملیشیا ءِ گون ءَ ھم گپ ءُ تران کنگ ءَ اِنت دانکہ نُھ سالیگیں جنگ ءُ جِدال ھلاس کنگ بہ بیت-

سعودی ءِ سپیر مھمد الجبری حوثیانی دستیگی ءَ یمن ءِ بنجاھی شھر ثنا ءَ اود ءَ جنگ بندی ءُ حوثیانی گون ءَ یمن ءِ سرکار ءِ گون ءَ ھمگرنچ بیگ ءُ سیاسی وڑ ءُ پئیماں اے جیڑہ ءَ گچینگ ءِ جھد ءَ اَنت-

گپ ءُ تران ءِ بنداتی آسری گامگیج ءَ نُھ سد بندیگانی یل کنگ ءِ مسام اِنت کہ اے آدینگ ءِ روچ ءَ بندات کنگ بیت اِنت-

زانتکاراں عرب نیوز ءَ گوشتگ کہ سعودی عرب ءُ ایران ءِ میان ءَ سپارتجاھانی سیادی ءِ پچ بوگ یمن ءَ ایمنی ءِ آیگ یک رندے پد ءَ زندگ بیتگ –

یمن ءِ زانتکار بدر الکھتانی ءَ گوشتگ کہ دمگ ءِ امن ءُ ایمنی ءِ مساماں زوت جاور شر بیت نہ کن اَنت بلے اے دمگ ءَ تاکت وتی ھمسنتانی زور ءَ یکجاہ کت کن اَنت ءُ آیانی ستک ءُ باور ءُ گھتری بنت-

دیوانگیں ھَمبلو بالاچ جان

نبشتہ کار: خلیف بلوچ

دی بلوچستان پوسٹ

شھید بالاچ جان یک دیوانگے اَت من وَھدے بالاچ دیست گُڑا من ءَ ھچ بِھیسَہ نَہ بُوّت کہ بالاچ باندا روچ یک سرمچارے بیت یک روچے بالاچ نِشتگ ءَ گُڑا من بالاچ جان ءَ گُشت کہ تو یک اَنچیں کارے بِہ کن کہ تئی نام باندا بلوچ راجدَپتر ءَ ایر بِہ بیت کَندگے جَت ئِے ءُ گُشت ئِے یار من یک دیوانگے آں  من چے کُت کَن اِیں پَہ راج ءَ گُڑا من گُشت پُلّ تو باز کار کُت کَن ئے پہ وتی بَزّگیں راج ءَ پَہ وتی گُلامیں کُوم ءَ گُشئی منی سَر ءَ کَسّ بِھیسَہ نَہ کَنت پَرچاکہ من یک دیوانگے آں من گُشت پُلّ ھَر کَسّ ءَ وتی بِھیسَہ وت ءَ کَنگی اِنت گُڈّسَر ءَ من گُشت من زان آں تو روچے چیزے کَن ئے پَہ بَزّگیں راج ءَ شَرّ پُلّ سلامت بات ئے من پاد اَتک اوں ۔

  چیزے وَھد ءَ رَند پَد ءَ من وت کوہ ءَ رَپت آں من ءَ کوہ ءَ بازیں وَھدے گوَست یک روچے من گوں ھمبلاں سَپر ءَ دَر کَپت آں ما دیم ءَ شُتاں منی ھمرائی ءَ گُشت کہ کَسّے راہ ءَ پیداک اِنت منی ھیال ءَ سَبرو اِنت ما نَزّیک ءَ شُت اِیں راستے ءَ سبرو اَت مارا دیستے کوہ ءِ توک ءَ گُڑا ما نِشت اِیں دیوان کُت  ھلاکہ ءِ ھال گِپتاں من گُشت ھالاں بِہ دئے باریں تو کُج ءَ رَوَگ ءَ کُج ءَ بُوّتگ ئے گُشئی من کولواہ ءَ بُوّتگ آں جھاؤ ءَ رَوَگ ءَ آں  گُڑا سَبرو ءَ ناھے گون اَت مارا دات ئِے ما وارت او پَد ءَ ما دَر کَپتیں وتی سَپر ءَ ، ما وتی سَپرجَت او پَد ءَ واتر اَتکیں اوتاک ءَ ۔

بازیں وَھدے گوَست من شُت اوں دگہ دیمے ءَ من  شش ماہ ءَ پَد اَتک اوں  جَھلّ جھاؤ ءَ گوں سنگتاں ھَوار بُوّت اوں ما سنگت مُدام سَپران اِتیں گُڑا یک روچے ما یک جاھے ءَ نِشتگ اِتیں سَبرو اَنچو اَتک مئے کِرّ ءَ مئے گون ءَ دیوانے کُت ءُ پَد ءَ مئے کماندار ءَ گُشت ئِے من شُمئے ھمراہ بئیں ءُ شُمئے گون ءَ رَھادگ بہ ایں کماندار ءَ گُشت اے جنگے سَک ءَ گران اِنت بَزّگی ءُ واری اِنت تو برداشت کُت نَہ کَن ئے کماندار ءَ گُشئی من دُرستیں چیزاں سَرپد ءُ پُوہ آں واری بَزّگی اَستیں بَلّے من لوٹاں کہ من وتی بَزّگیں راج ءُ گُلامیں کُوم ءِ واست ءَ جُھد ءَ ھَوار بِہ باں اے گَپّ راستے کہ من شوانگے آں من جَٹّے آں بَلّے منی دل ءَ اے مارشت ھست کہ من شُمئے گون ءَ ھَوار بِہ باں جُھد ءَ بس من ءَ وتی گون ءَ بُزور ءِ گوں بس ھَرچی بیت من ءَ کَبول اِنت گُڑا کماندار ءَ گُشت بِہ جیڑ لَھتے وَھد ءَ مُوکل ھست ترا، ما دَر کَپتیں دو ، سَے ماہ گوَست ما پَد ءَ ھما دیم ءَ شُت اِیں سَپر ءَ مارا مردُمے ءَ دیست ءُ گُشت ئِے سَبرو شُمئے اِنتزار ءَ اِنت باز روچ بیت کہ ھَمود ءَ نِشتگ گُڑا ما ھَمود ءَ ما شُت اِیں سَبرو نِشتگ اَت ما سلامے دات ءُ گَپّ ءُ دیوان بِنا کُت کماندار ءَ  گُشئی من جیڑ اِتگ منی راہ ھمیش اِنت من بس شُمئے گون ءَ ھَوار باں ءُ من وتی بَزّگیں راج ءَ چَہ اے پاکستان ءِ گُلامی ءَ سِندَگ لوٹاں ءُ وتی بلوچ کُوم ءَ را ھمئے گُشگ لوٹاں کہ مارا شُمارا جُھد کَنگ لوٹ اِیت گُڑا ما وتی مِنزل ءَ سَر بہ ایں ءُ مارا کُربانی دئیگی اِنت گُڑا ما سَبرو زُرْت ءُ دَر کَپتیں دیم پَہ وتی اوتاک ءَ مئے گون ءَ ھَوار بُوّت سَبرو جان ۔

گُڑا سَبرو ءِ مُدام دل ءَ اَت سنگت من ءَ سَپر ءَ بِہ بَراں گوں من ءَ بَھر ، بَھر ءَ گُشت ئِے اَڑے سَپر ءَ سنگت کَدی رَوَ انت من رَوَاں گوں من گُشت پُلّ نُوں تو اَتکگ ءِ سَپر بیت اَلّم تو ھَوار کَپ ئے گوں من دیست اے ھمبل ءِ دل گوں جنَگ ءَ اِنت بس مُدام جنگ اِیشی ءِ دل ءِ توک ءَ اَت ، گُڑا گَپّ، گَپّ ءَ مارا ھچ سَما نَہ بُوّت اوتاک اَتک سَر بُوّت دَم ءِ بالا کُرت سَبرو ءِ نام سنگتاں بالاچ پِر کُت گُڑا ما کُلیں سنگتاں کَند اِت ءُ دَروَر دات بالاچ مری ءُ بالاچ گورگیج اِنت ۔

بالاچ مُدام گوں سنگتاں مَزاک ءُ کَندگ اَت باز وَھد گوَست بالاچ جان ءَ وتی بلوچ کُوم ءِ واست ءَ باز جُھد کُت ءُ مادر ءِ وتن ءِ کوہ ءُ کوچگاں تَرّ ءُ گرد کُت بازیں راہ ءُ دَرے ھم زانت ئِے ءُ سنگتاں گُشت ئِے من بازیں راھاں زان آں رَوَیں کارے چیزے کَن اِیں مُدام گُشت ئے اَڑے اے ھلاکہ والا پوج ءَ من ءَ سَک بَزّگ کُتگ مُدام من ءَ داشتگ ئِے ءُ جُست ئِے کُتگ من لوٹاں کہ ھَمیشارا سَبکے بِہ دِیاں بالاچ جان ءِ مُدام دل ءَ ھست ءَ کہ من دُژمن ءَ وتی بِیر ءَ بِہ گِرَ آں گُڑا یک روچے سنگت بالاچ جان ءَ ھَوار گیجاں سَپر ءَ دُژمن سنگتاں گِیر ءَ دَنت ءُ بالاچ گوں بیت گوں سنگتاں گَھنٹھے ءَ گیش جنگ دار اِیت بالاچ جوانیں رَنگے ءَ گوں دُژمن ءَ جنگ دَنت پَد ءَ سنگت دَر کَپ اَنت بالاچ اوتاک ءَ اَتک سَر بُوّت من جُست کُت باریں ھالاں بِہ دئے چوں بُوّتگ سَپر کَندگے جَت ئِے ءُ گُشت ئِے مَروچی شوکیں جنگے بُوّتگ ءُ دُژمن ءَ را من دیم پَہ دیم ءَ دیستگ ءُ یک لاشے ھم ، یار جنگ سَک وش اِنت بَلّے نَزّیکی ءَ ۔

چیزے وَھد گوَست گُڑا دگہ سَپرے ءَ دَرکَپ اَنت کار ءَ ساری سنگتاں گُشاں کہ اے جاگہ ءَ رَوَگی اِنت بُوّت کَنت سنگتے شھید بِہ بیت  گُڑا بالاچ جان گُش ایت کہ من دیم ءَ رَوَان باں اولی سَر ءَ ھَرچی بیت بِلئے من ءَ بیت  بالاچ سَکیں بھادر اِیں ھمبلے اَت مُدام گَپّے ھمیش اَت کہ جنگے بیت یاکہ دگہ کارے سَک ایماندار ءِ گون ءَ کَنگی اِنت ۔

بالاچ جان ءَ سَک سَاربانی ءِ شوک ھست ات مُدام گُشت ئِے منی واست ءَ اُشترے بُزور اِت من وت سَاربانے باں گُڑا سنگتاں اُشترے گِپت ءُ دات مُدام وتی اُشتر ءَ گوں دَز گَٹّ اَت ، راشنے یاکہ دگہ ساز ءُ سامانے آرگی بُوّت گُڑا مُدام تیار اَت ھَرچ کار ءَ بالاچ جان مُدام ساڑی اَت سَپرے ءَ بُوّتگ ءَ اَتکگ اَت دَم بَرگ ءِ نامے نَہ زانت مُدام گردگ ءِ توک ءَ اَت بالاچ ھَر وَھد ءَ شُت کوہ ءَ پَہ آھوگ ءِ شکار ءَ ءُ مُدام گرماگی روچاں گَشتے من ھَر وَھد ءَ دیست بس وتی ءُ جُھد ءِ کارانی سَر ءَ سَک مکلس اَت من گُڑا سَپر ءَ دَر کَپت آں بازیں وَھدے گوَست من سَپر ءِ توک ءَ اِت آں من یک روچے نِشتگ اِت اوں  منی دیم ءَ نیوزے اَتک کہ کولواہ ءَ سَے ھمبل شہید بُوّتگ .(ispr) داتگ کہ من سَے سرمچار جَتگ بَلّے ھمئے گَپّ پَد ءَ گار بُوّت گُڑا یک روچے سنگتے لین ءَ اَتک من ءَ ھالِ کُت کہ سَے ھمبل شھید بُوّتگ یکے (دل سرد) اِنت یکے( ناکو مھمد صالحہ) ِانت یکے (بالاچ جان )اِنت۔

منی سَر ءَ سنگتے ءَ اَکس رَوَان داتاں من ءَ گُشتے بالاچ ھم شھید بُوّتگ ، باز بَر ءَ مارا مردُماں گُشتگ کہ بالاچ یک دیوانگے ءُ شُما جُھد ءَ زُرتگ اے باندا رؤت اِیں سَرنڈر کَنت گنوکے ، شوانگے شُمارا بدنامی یے سَر ءَ دَنت بَلّے مَروچی ھما مردُمانی دیم ءَ مئے سَر بُرز اِنت کہ بالاچ دانکہ گُڈّی تیر ءَ جنگ داتگ بَلّے ریاست ءِ دیم ءَ سَرے جَھلّ نَہ کُرتگ ۔ من ءَ پَھر اِنت تئی سَر ءَ منی ھمبلو نمیران انت داں جھان اَستیں تو اَبدمانے من ءَ بَکش ءَ کن منی دیوانگ-

شھادت ءِ روچ 18 مارچ 2023

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

انڈین پریمئیر لیگ ءِ ھبدھمی گوازی سِی ایس کے ءُ آر آر ءِ میان ءَ کنگ بوتگ – کپٹن مہندر سنگھ دھونی ءِ دوسدمی میچ ءَ راجستھان ءَ جوس بٹلر ءِ نیم سنچری بدولت ءَ یکسد ءُ ھپتاد ءُ پنچ رن جوڈ کتگ – چنئی ٹیم ءَ شش وکٹانی تاوان ءَ بس یکسد ءُ ھپتاد ءُ دو رن جوڑ کتگ –

چنئی سپر کنگ ءِ کپٹن مہندر سنگھ دھونی ءَ ٹاس کٹ اِتگ ءُ اولسر ءَ پالنگ کنگ ءِ شور کتگ – بندات ءَ راجستھان رائل ءَ جوانیں گوازی پیش نہ داشتگ پرچا کہ یشسوی ءَ بس دھ رن جوڈ کتگ ءُ واتر بوتگ بلے چریشی ءَ پد جوس بٹلر ءُ دیودت پڈکل جوانیں گوازی پیش داشتگ دومی وکٹ پڈکل ءِ ھما وھد ءَ کپتگ کہ آئی ءَ بیست ءُ شش بالاں سِی ءُ ھشت رن جوڑ کتگ ءُ راجستھان ءِ اسکور ھشت ءُ ھشت بوتگ ءُ نھمی اوور بوتگ – پدا کپٹن سنجو ءَ رن جوڈ نہ کتگ ءُ آؤٹ بوتگ پدا رند ءَ آر اشون ءَ بیست ءُ دو بالاں سِی رن ءُ شمرن ءَ ھژدہ بالاں سِی رن جوڑ کتگ ءُ ناٹ آؤٹ بوتگ – جوس بٹلر ءَ پہ راجستھان ءِ ھاتر ءَ درساں گیشتر رن جوڈ کتگ کہ آئی ءَ سِی ءُ شش بالاں پنجاہ ءُ دو رن جوڑ کتگ ءُ معین علی ءِ دست ءَ آؤٹ بوتگ – راجستھان ءِ ٹیم ءَ بیست اووراں ھشت وکٹانی تاوان ءَ یکسد ءُ ھپتاد ءُ پنچ رن جوڑ کتگ-

بالنگ ءَ چنئی ءِ نیمگ ءَ آکاش سنگھ ءَ چار اووراں چِل رن، تشار ےَ چار اووراں سِی ءُ ھپت رن ءُ رویندر ءَ چار اووراں بیست ءُ یک رن داتگ ءُ دو دو وکٹ گپتگ – یک وکٹ ءِ معین علی ءَ گپتگ کہ آئی ءَ دو اووراں بیست ءُ یک رن داتگ – مکیش وکٹ گرگ ءَ بے سوب بوتگ ءُ آئی ءَ چار اووراں چِل ءُ دو رن ھم داتگ – سساندا ءَ دو اووراں چاردہ رن داتگ –

یکسد ءُ ھپتاد ءُ شش رنانی ٹارگٹ ءِ پروشگ ءَ اتکگیں چنئی ءِ بندات ھم جوان نہ بوتگ پرچاکہ ریتو راج ھشت رنانی جوڈ کنگ ءَ پد واتر بوتگ دومی وکٹ ءَ ڈیوون ءُ اجنکیا ءَ شست ءُ ھشت رن ھواری ءَ جوڈ کتگ، اجنکیا ءَ نوزدہ بالاں سِی ءُ یک رن جوڈ کتگ ءُ آؤٹ بوتگ چریشی ءَ پد وکٹانی کپگ بندات بوتگ یکے پد شیوم دوبے ءَ نُھ بالاں ھشت، معین علی ءَ دھ بالاں ھپت امباتی ءَ دو بالاں یک رن ءِ جوڈ کتگ ءُ واتر بوتگ ءُ پدا ڈیوون ءَ سِی ءپ ھشت بالاں پنجاہ رن جوڈ کتگ ءُ آ ھم واتر بوتگ – اے وھدی چنئی ءِ اسکور پانزدہ اووراں شش وکٹانء تاوان ءَ یکسد ءُ سینزدہ رن بوتگ بزاں پہ کٹگ ءَ سِی بالاں شست ءُ سَے رنانی لوٹ کپتگ ات -ھمے وھد ءَ کپٹن مہندر ءُ رویندر ءَ جوانی ءَ گوازی کنان ءَ گوازی پہ کٹگ ءَ سرکتگ بلے آخری بال ءَ پہ چنئی ءِ کٹگ ءَ پنچ رنانی لوٹ کپتگ ات بلے آھاں بس یک رن ءِ جوڈ کت کُتگ ءُ راجستھان ءَ اے گوازی سَے رناں کٹ اِت – دھونی ءَ ھبدہ بالاں سِی ءُ دو رن جوڈ کت ءُ ناٹ آؤٹ وھدیکہ جڈیجہ ءَ پانزدہ بالاں بیست ءُ پنچ رن جوڈ کتگ ءُ ناٹ آؤٹ بوتگ –

راجستھان ءِ نیمگ ءَ اسپنر روی چندرن ءُ یجویندر ستا کرز انت کہ آھاں چار چار اووراں بس بیست ءُ پنچ ءُ بیست ءُ ھپت رن داتگ ءُ دو دو وکٹ گپتگ – اسپنر ایڈم جمپا ءَ ھم یک وکٹ ءِ گپتگ – کلدیپ سین ءَ دو اوور گوازی کتگ ءُ بس ھشت رن داتگ بلے وکٹ نہ گپتگ – یک وکٹ سندیپ ءَ گپتگ ءُ آئی ءَ سَے اووراں سِی رن داتگ ءُ جیسن ءَ سَے اووراں سِی ءُ ھپت رن داتگ ءُ آئی ءَ ھم وکٹ نسیب ءَ نہ بوتگ –

یازدہ ءُ دوازدہ اپریل ءَ برجاہ بیتگیں یو ای ایف اے فٹبال چیمپینز لیگ ءِ کوارٹر فائنل ءِ اولی بھر ءِ گوازیانی تہءَ یازدہ اپریل ءَ بیتگیں گوازیاں بینفیکا ءُ انٹرمیلان، مانچسٹر ءُ بائرن منیُچ دیم پہ دیم بیتگ اَنت۔

وھدیکہ مروچی بیتگیں گوازیاں رئیل میڈریڈ ءُ چیلسی ءُ دومی گوازی ءَ اے سی میلان ءُ نیپولی دیم پہ دیم بیتگ اَنت۔

اولی بھر ءِ گوازیانی تہءَ مانچسٹر سٹی ءَ سئے گول داتگ ءُ باج بر بیتگ، وھدیکہ انٹرمیلان ءَ دو گول داتگ ءُ لیب وتی نام ءَ کُتگ، ھمے پئیم ءَ اَے سی میلان ءَ یک پہ ھچ ءَ چہ نیپولی پروش داتگ، وھدیکہ رئیل میڈریڈ ءَ چیلسی دو پہ ھچ ءَ چہ شکست داتگ۔

زانگ بہ بیت چیمپینز لیگ کوارٹر فائنل ءِ دومی گوازی ھشدہ ءُ نوزدہ اپریل ءَ لیب کنگ بنت۔

پہ باج بر بئیگ ءِ ھاترءَ پروش وارتگیں ٹیم ءَ اولی لئیب ءَ وارتگیں گول برابر کنگی اَنت ءُ پدءَ گیشتر گول آرگی اِنت دانکہ آہ سیمی فائنل ءَ شُت بہ کن اَنت۔

اسلام آباد: سویڈن ءَ پاکستان ءِ تہءَ وتی ھستیں سپارت جاہ اسلام آباد ءِ جاورانی پدءَ نہ زانتگیں وھدءِ ھاترءَ بند کُتگ، کہ اِشی سوب ءَ درملک ءَ نشتگیں پاکستانیاں ھوار پاکستانی نودربر جیڑھانی آماچ اَنت۔

اھوالانی ردءَ اسلام آباد ءَ سویڈن سپارت جاہ پہ زانتگیں وھدءِ ھاترءَ بند کنت بیتگ، اھوالانی ردءَ سپارت جاہ ءِ بند بیگ ءِ سوب ءَ سوئیڈن ءَ جھمنندیں درملکی پاکستانی ءُ پاکستانی نودربر جنجالانی آماچ اَنت۔

سویڈش سپارت جاہ ءَ وتی درشانے تہءَ گُشتگ کہ مئے سپارجاہ اسلام آباد ءِ نگیگیں پھازگی جاورانی سوب ءَ نہ زانتگیں وھداں داں بند بیت، آیاں گُشتگ کہ اے دمان ءَ سپارت جاہ ءِ دوبر پچ بیگءِ بابت ءَ ھچ گُشگ بیت نہ کنت۔

بلوچستان ءِ دو جتاھیں دمگاں جِنِکےءَ ھوار دو مردماں وت کشی ءُ وتی زند گوں وتی دستاں آسر کُتگ۔

وت کشی کنوکانی پجار روز بی بی لوگیگ بلند خان ءُ ضیاء الدین ء شاہ زمان ءِ ناماں چہ بیتگ۔

اِشانی تہءَ وت کشی کنوکیں زالبول ءَ کوہلو ءِ ھند سفید شلوار ءَ وتی گُٹ ءَ لوپ پتاتگ ءُ وتی زند آسر کُتگ، وھدیکہ سینزدہ سالی ایں ورناہ ضیاء الدین ءَ شال ءِ ھند شاہ زمان روڈ ءَ لوگے تہءَ وت کشی کُتگ۔

اھوالانی ردءَ وت کشی کنوکیں جِنِکے ءِ آروس ھشدہ سال ءَ چہ کم امبر ءَ دو ماہ پیسر مٹ سٹ ءِ رد ءَ بیتگ اَت۔ البت وت کشی ءِ سوب داں انگت زانگ نہ بیتگ اَنت۔

زانگ بہ بیت بلوچستان ءَ نہ تھنا مردین بلکینہ زالبولانی وت کشیانی کساسءِ تہءَ گیشی گندگ پیداک اِنت۔ بلوچستان ءِ تہءَ زالبولانی زورانسری بیگواھیانی سوب ءَ ڈپریشن، بُنکی اگبالانی محرومی ءُ چاگردی ءُ کھول ءِ نیمگ ءَ زور ءِ پئیمیں سوبانی پدءَ وت کشی ءِ کوشست کن اَنت۔

ھاسیں پئیماں وت کشیانی کساس ءِ تہءَ گوستگیں لھتیں ماھانی تہءَ مزنیں گیشی ءِ گندگ ءَ اَتکگ۔ بلے بلوچستان ءَ وت کشیانی ودگ ءَ ابید ھم سرکار ءِ نیمگ ءَ پہ اِشانی دارگ ءَ ھچ پئیمیں گامگیج زیرگ نہ بیتگ۔