TBP Balochi

روکپتی بلوچستان ءِ دمگ راسک ءِ ھند جکیگور ءَ ایرانی لشکر ءَ یک لوگے ءِ سر ءَ بیڑ برتگ ءُ لوگ بمب ءُ ٹوپاں مان بستگ ءُ چریشی ءَ چہ لاپریں زالبولے ءَ ھوار شش سالی ئیں زھگے بیران بیتگ-

گیشیں اھوالانی رد ءَ جکیگور ءَ ایرانی لشکر ءَ مروچی سھب ءَ یک لوگے ءِ سر ءَ بیڑ برتگ ءُ اود ءَ لوگ ءِ لھتے چارک ڈروتگ ءُ کپتگ اَنت ءُ یک گاڑی یے ھم ستکگ ءُ تباہ بیتگ-

اھوالانی رد ءَ ایرانی لشکر ءَ کسان ءُ مزنیں سلاھانی گون ءَ لوگ ءِ سر ءَ اُرش کتگ ءُ چریشی ءَ لاپریں زالبولے ءَ ھوار شش سالی زھگے بیران بیتگ ءُ دگہ سَے کس ایرانی لشکر ءَ دزگیر کتگ اَنت-

اھوالانی رد ءَ تیرگواری ءِ آسر ءَ ایرانی لشکر ءِ چار کارندہ ھم زدگ بیتگ اَنت ءُ راسک ءِ نادراہ جاہ ءَ برگ بیتگ اَنت-

زانگ بہ بیت گوست ءَ ھم اے دابیں وئیل پیش اتکگ اَنت کہ ایرانی لشکر ءَ لوگانی سر ءَ اُرش کتگ ءُ اود ءَ تیرگواری کتگ ، مروچی بیتگیں وئیل ءِ بارو ءَ ایرانی لشکر ءِ نیمگ ءَ داں انگت ءَ دگہ اھوال دیم ءَ نیتکگ اَنت-

چہ ھاران ءِ شھر ءَ نودربر کاشف ایجباڑی ء قاری عنایت پاکستانی چیریں ادارھانی دست ءَ آوار جنگ ءَ پد بیگواہ کنگ بیتگ –

بلوچستان ءِ دمگ ھاران ءَ پاکستانی چیریں ادارھاں یک نودربرے زورانسری آوار جنگ ءَ پد ناشناسیں جاھاں برتگ – بیگواہ بیتگیں نودربر ءِ پجار ھاران ءِ دمگ نورز آباد دگ ءِ جھمنندیں نودربر کاشف ایجباڑی ء قاری عنایت اللہ ءِ نام ءَ زانگ بیتگ –

کاشف ایجباڑی ھاران ءِ نامی ئیں باپار کار وڈیرہ عبداللہ ایجباڑی ءِ نماسگ اِنت-

دمگی مردمانی رد ءَ وئیل یک اگست ءَ ایشا ءِ وھد ءَ پیش اتکگ وھدیکہ پاکستانی چیریں ادارھانی کارمندانج بازیں گاڑیاں ورنا ءِ رندگیری کتگ ءُ حافظ جمال ناصر مدرسہ ءِ نزیک ءَ آوار جنگ بیتگ-

چین ءِ بنجاھی شھر بیجنگ ءَ ترندیں ھورانی گوارگ ءَ توپانی جاور ودی بیتگ اَنت اے وھداں جتا جتائیں وئیل پیش اتکگ اَنت بیرانیانی کچ بیست ءُ یک ءَ سر بیتگ اَنت ءُ بازیں کچے ءَ مردم بیگواہ اَنت-

ھال سر کنوکیں ادارہ ایجنسی ایسوسی ایٹڈ پریس ءِ رد ءَ بیجنگ ءَ مھکمہ ءِ مولم شناساں گوشتگ کہ شمبے ءِ روچ ءَ داں چار شمبے ءِ روچ ءَ ھپت سد ءُ چل ءُ چار ملی میٹر ھور ریکارڈ کنگ بیتگ –

دمگ ءَ زری توپان ڈوکسوری ءِ گوزگ ءَ پد ءَ بیوکیں ھوراں یک سد ءُ چل سالیگیں ریکارڈ پروشتگ-

شھر ءِ دگ ءُ دمکانی ندارگ شیپانی ندارگ اَنت ءُ واکدار ربڑ بوجیگانی سر ءَ گٹیں مردماں کشگ ءِ جھد ءَ اَنت-

بیجنگ ءُ آئی ءِ نزیگیں استان ھیبی ءَ ریکارڈ ھورانی گوارگ ءَ توپان اتکگ ءُ آپ ءِ برزی بازیں رنگے ءَ برز شتگ –

ھورانی گوارگ ءَ دگ پرشتگ اَنت بجلی ءِ لائن ءُ ورگی آپ ءِ لائن پائپاں ھم تاوانانی دیمپانی کنگ کپتگ-

بنجاھی شھر بیجنگ ءَ.ھواریں زربارء شھر زھوزھو ءَ ھم توپانی جاور اَنت ءُ سَے شمبے ءِ شپ ءَ پولیس ءَ اود ءَ دزبندی کتگ ات کہ وتی گور ءِ سر بوگ ءَ چراگ روک بہ کن اَنت-

شال ءَ جنگ ءُ چوپ ءَ تیرگواری ءَ سَے مردم کُشگ بیتگ اَنت-

بلوچستان ءِ بنجاھی شھر شال ءَ سریاب دگ ءَ بس ٹرمینل ءِ نزیک ءَ دو ٹولیانی میان ءَ جنگ ءُ چوپ ءَ پد تیرگواری کنگ بیتگ ءُ چریشی ءِ آسر ءَ بلوچستان ءِ گوستگیں سر وزیر نواب اسلم رئیسانی ءِ برات زتک ھارون رئیسانی ءُ آئی ءِ دو پھزدار کُشگ بیتگ اَنت-

دومی نیمگ ءَ تیرگواری ءَ سدابھار ٹرمینل ءِ واھند ھاجی فیروز لھڑی ءِ نماسگ ھم کُشگ بیتگ –

وئیل ءَ پد پولیس وئیلجاہ ءَ سر بیتگ ءُ لاش اش چست کتگ ءُ نادراہ جاہ ءَ برتگ انت ئِے پولیس ءِ رد ءَ دو مردم زدگ ھم بیتگ اَنت-

پولیس ءِ رد ءَ آ پٹ ءُ پول کنگ ءَ اِنت بلے داں انگت ءَ جنگ ءُ چوپ ءِ سبب زانگ نہ بیتگ اَنت-

بلوچستان ءَ بشامی ھورانی گوارگ ءَ چہ بیرانیانی درچ برجاہ اِنت، بلوچستان ءَ ھورانی گوارگ ءَ پیش اتکگیں وئیلاں بیران بیتگیں مردمانی کچ 14 ءَ سر بیتگ اَنت-

بلوچستان ءَ بشی ھورانی گوارگ ءَ تاوانانی ھال ءِ شنگ کنان ءَ مھکمہ ءِ پی ڈی ایم اے ءِ رپورٹ ءِ رد ءَ لورالائی ءَ دو زھگانی ھار ءِ بڈگ ءَ پد بیرانیانی کچ چاردہ بیتگ اَنت-

پی ڈی ایم اے ءِ رپورٹ ءِ رد ءَ لورالائی ءَ سَے، ژوب ءُ نسیر آباد ءَ دو دو، آواران، قلعہ سیف اللہ ، ھزدار ، ڈیرہ بگٹی ، پشین ، کیچ ءُ جھل مگسی ءَ ھورانی گوارگ ءَ یک یک مردم بیران بیتگ اَنت-

ھورانی گوارگ ءَ استان ءَ چار مردم زدگ بیتگ اَنت ءُ سَے سد ءُ سی ءُ دو لوگ سرجم ءَ کپتگ اَنت ءُ سَے سد ءُ سی ءُ چار ءَ کمے کساس ءَ تاوان بیتگ اَنت ءُ ھشت کلو میٹر دگ پرشتگ اَنت ءُ سَے سد ءُ بیست سولر پلیٹاں تاوان بیتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ پاکستانی لشکر ءِ سر ءَ بیتگیں اُرش ءِ زمہ واری من اتگ ءُ گوشتگ کہ بلوچ سرمچاراں 31 جولائی ءِ بیگاہ ءِ پنچ ءَ کیچ ءِ ھند تمپ ءَ عبدوئی ءُ شیپچار ءِ میان ءَ برجاھیں پاکستانی لشکر ءِ پانگس ءِ سر ءَ ارش کتگ – چہ اے ارش ءَ یک لشکری کارمندے کشتگ ءُ دگرے ٹپی کتگ۔

جارکش ءَ گوشتگ بی ایل ایف ءِ ٹک تیراں ھما وھد ءَ لشکر ءِ سر ءَ اُرش کرتگ کہ دشمن نشانگ ءِ زد ءَ بیتگ اَنت۔پہ نشانگ ءَ روکیں سرمچارانی گیپتگیں اکس رسانکدر ءَ شنگ کنگ بیتگ کہ آئی ءِ تہ ءَ نشانگ سھرائیں رنگے ءَ گندگ بیگ ءَ اَنت ءُ پد ءَ نشانگ کتگ –

میجر گوھرام بلوچ ءَ پاکستانی لشکر بلوچستان ءِ ھمک بٹک ءَ گھگیری ءِ دیمپان اِنت ءُ بلوچ سرمچار دژمن ءِ مھریں رکاں پترگ ءُ وتی نشانگانی گرگ ءِ بودشت دار اَنت۔

آئی ءَ گوشتگ میان استمانی سرمایہ کار گوں پاکستان ءَ ھمکاری ءَ پھریز بہ کن اَنت ما ھچ چوشیں شوربندیاں سوبمند بیگ ءَ نہ ھل ایں کہ آ بلوچ سیتانی بگیر بہ بہ اَنت ءُ ما بلوچستان ءِ مڈیانی لٹ ءُ پل ءَ ھرچ پیم کن ءُ دار ایں۔

گڈسر ءَ بی ایل ایف ءِ جارکش ءَ گوشتگ داں زیردستیں بلوچستان ءِ آجوئی ءَ دژمن ءِ سیتانی سر ءَ ارش برجاہ مان اَنت۔

بلوچستان ءِ بنجاھی شھر شال ءَ گوستگیں بیست ءُ چار ادارانی میان ءَ تیر جنگ ءُ نشانگ ءَ سَے پولیس کارندہ کُشگ بیتگ اَنت-

نوکتریں وئیل مروچی سھب ءَ اسپنی دگ ءَ ناشناسیں سلاہ بندیں مردماں تیرگواری کتگ ءُ یک.پولیس کارندھے کُشتگ، کُشگ بیتگیں پولیس کارندہ ءِ پجار مھمد جواد ءِ نام ءَ زانگ بیتگ –

زانگ بہ بیت گوستگیں روچ ءَ پولیو مھم ءِ وھد ءَ ناشناسیں مردماں تیرگواری کتگ ءُ دو پولیس کارندہ کشتگ اَنت-

کشگ بیتگیں ھرسئیں پولیس کارندھانی سیادی ھزارہ برادری ءَ اِنت-

داں انگت ءَ پولیس کارندھانی کوشانی سبب زانگ نہ بیتگ اَنت ءُ نانکہ دگہ گلے ءَ اے اُرشانی زمہ واری پہ وت ءَ زرتگ-

بلوچ لبریشن آرمی ءِ جارکش جیئند بلوچ ءَ رسانکدراں شنگ کُتگیں درشانے تہءَ گُشتگ کہ پاکستانی لشکر ءُ مادن بروکیں گاڑیانی سرءَ سئے جتاھیں ارشانی ذمہ واری ءَ من ایں۔

جیئند بلوچ ءَ درشانے تہءَ گُشتگ کہ بی ایل اے ءِ سرمچاراں بولان، پنجگور ءُ قلات ءَ قوضہ گیریں پاکستانی پوج ءُ مادن بروکیں گاڑی سئے جتاھیں ارشانی تہءَ نشانگ کُتگ اَنت، کہ اِشانی آسرءَ یک دژمن کارمندے مُرتگ وھدیکہ چار ٹپی بیتگ اَنت وھدیکہ یک گاڑی ءِ تباہ بیتگ۔

آئی ءَ گُشتگ کہ بی ایل اے ءِ سرمچاراں بولان ءِ ھند مارگٹ ءَ چُنگی ءِ ھدءَ قوضہ گیریں پاکستانی پوج ءِ یک پوسٹ ءِ گوں گرنیڈ لانچر ءُ دگہ مزنیں سلاھاں گوں نشانگ کُتگ، ارش ءِ تہءَ یک دژمن کارندھے مُرتگ ءُ کم چہ کم دو ٹپی بیتگ اَنت۔

جئیند بلوچ ءَ دیمترءَ گُشتگ کہ سرمچاراں دگہ یک اُرشے ءَ گوستگیں شپ ءَ پنجگور، گرمکان ءِ ھندءَ قوضہ گیریں پاکستانی پوج ءِ چوکی ءِ سرءَ گرنیڈ لانچر ءَ بازیں گرنیڈ آس داتگ اَنت، اُرش ءَ چوکی ھستیں کم چہ کم دو کارندہ ٹپی بیتگ اَنت۔

جیئند بلوچ ءَ گُشتگ کہ قلات ءِ ھنکین منگچر ءَ چاربوز ءِ ھندءَ بی ایل اے ءِ سرمچاراں مادن بروکیں گاڑی نشانگ کُتگ اَنت، سرمچاراں یک گاڑی ءِ مانداشتگ وھدیکہ دگہ یک گاڑی تیر گواری کُتگ ءُ تاوانبار کُتگ۔

بی ایل اے ءِ جارکش جئیند بلوچ ءَ گُڈسرءَ گُشتگ کہ بلوچ لبریشن آرمی اے سئے اُرشانی ذمہ واری ءَ من ایت۔ قوضہ گیریں پاکستانی پوج ءِ سرجمی ءَ درکپگ ءَ داں مئے اُرش برجاہ مان اَنت۔

عراق ءَ لوگی لٹ ءُ کُٹی ءَ دردناکیں جاورے دل ءَ پدرد کنوکیں کسھے ءِ دیم ءَ آیگ ءُ دل ءَ نہ سگکویں جاورے ودی کنت- یک جنک وتی پت ءَ یک ماھے ءَ داں زنجیراں بستگ ءُ بندیگ کتگ-

ھالانی سر بوگ ءَ پولیس ءَ گامگیج زرتگ ءُ جنک چہ پت ءِ زندان ءَ آجو کتگ-

العربیہ نیٹ ءِ رد ءَ عراق ءِ کمشنری کرکوک ءَ زنجیراں بستگیں اکس چاگردی ترامجاھاں شنگ بیتگ اَنت-

ایشانی توک ءَ گندگ بیت اِنت پولیس جنک ءَ آئی ءِ پد ءِ زندان ءَ اجو کنگ ءَ اِنت- کرکوک ءِ پولیس آپیسر ءَ نام پدر نہ کنان ءَ گوشتگ کہ چاگردی ترامجاھاں شنگ بیتگیں اکس راست اَنت ءُ جنک آجو کنگ بیتگ-

پولیس ءَ ھال سر بوتگ کہ یک جنکے لوگ ءَ زندانی کنگ بیتگ کساس یک ماھے ءَ داں جنک لٹ ءُ کُٹ کنگ بیتگ- لوگی سزا ءِ ھال ءِ سر بوگ ءَ پولیس عراق ءِ شھر ءَ سر بیتگ ءُ آئی ءَ جنک ءِ پاداں بستگیں مزنیں زنجیر بر اتگ ءُ جنک آجو کتگ-

پولیس ءَ جنک ءِ پت دزگیر کتگ ءُ کانونی پٹ ءُ پول ءَ پد کیس آمیدگس ءَ دیم دیگ بیتگ-

انسانی ھکانی گلانی رد ءَ سرجمیں ڈیھ ءَ لوگی جیڑاں لٹ ءُ کُٹی جاور گیش بوتگ اَنت کہ چریشاں زالبول، زھگ ءُ کماش لٹ ءُ کُٹ کنگ بوگ ےَ اَنت یک سالے ءِ وھد ءَ پانزدہ ھزار ءَ گیش لٹ ءُ کُٹی وئیل دیم ءَ اتکگ اَنت-

زانگ بہ بیت عراق ءِ کابینہ ءَ اے درگت ءَ کانون ءِ دیم ءَ سال دوھزار ءُ بیست ءَ کاگدے پیش بیتگ ءُ بلے داں انگت ءَ پارلیمنٹ ءَ ایشی ءِ منگ نامہ دیم ءَ.نیاؤرتگ-

سربوتگیں ھالانی رِد ءَ بلوچستان ءِ تیاپ دپی دمگ گوادر ءَ پاکستانی پوج ءُ چیریں ادارھانی کارمنداں ورنائیں نودربرے زورانسری آوار جتگ ءُ بیگواہ کتگ –

زورانسری آوار جنگ بوتگیں نودربر ءِ پجار شاہد ء عبدالحمید ءِ نام ءَ بوتگ ، اھوالکار ءِ رِد ءَ شاہد گوستگیں ماہ ءِ بزاں بیست ءُ شش جولائی ءَ زورانسری آوار جنگ ءُ بیگواہ کنگ بوتگ کہ ھنگت گار ءُ بیگواہ انت –

زانگ بہ بیت بلوچستان ءِ تیاب دپی دمگ گوادر ءَ ھوار ھوار ایندگہ ھند ءُ دمگاں پاکستانی پوج ءِنیمگ ءَ ورنایانی آوار جنی ءِ درچ یکشل ءَ برجاہ انت بلے گوستگیں لھتے وھد بیت کہ زورانسری آوار جنیانی تہ ءَ یکرندے پدا گیشی آرگ بوتگ – زورانسری آوار جنگ بوتگیں مردمانی تہ ءَ گیشتریں کچ بلوچ نودربرانی انت –

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ اے وھدی بلوچستان ءِ تہ ءَ کساس پنجاہ ھزار ءَ گیش مردم زورانسری آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ بلوچ ورنا ءُ سیاسی باسکانی انت ءُ بازیں مردمانی ژانگولیں جون چگل دیگ بوتگ انت –