TBP Balochi

پنجاپ ءَ ممبئی دیم ءَ سینزدہ رناں گوازی کٹ اِتگ، سوریہ ءُ گرین ءِ نیم سنچری پہ مپت شتگ انت، پنجاپ ءَ اے سیزن ءِ تہ ءَ وتی چارمی سوبمندی نبشتہ کنائیں اِتگ –

انڈئین پریمئیر لیگ ءِ شانزدھمی سیزن ءِ سِی ءُ یکمی گوازی ممبئی انڈینز ءُ پنجاپ کنگز ءِ میان ءَ کہ پنجاپ ءَ سینزدہ رناں گوازی کٹ اِتگ – پنجاپ ءِ نیمگ ءَ دیگ بوتگیں دوسد ءُ پانزدہ رنانی ٹارگٹ ممبئی انڈین ءِ ٹیم سوریہ کمار یادو ءُ کیمرون گرین ءِ نیم سنچریاں ابید ھم پروشت نہ کُتگ ءُ آئی شش وکٹاں بس دوسد ءُ یک رن جوڈ کتگ انت – ارشدیپ سنگھ ءَ گڈی اوور ءَ پد ماں پد دو وکٹ گپتگ –

دوسد ءُ پانزدہ رنانی ٹارگٹ ءِ پروشگ ءَ پہ ممبئی انڈینز ءِ بندات چو جوان نہ بوتگ کہ ایشان کشن زوت آؤٹ بوتگ کہ آئی ءَ بس یک رن ءِ جوڈ کتگ بوتگ بلے پدا ھم روہت شرما ءُ کیمرون ءَ وت ءَداشتگ بلے چل ءُ چار رنانی جوڈ کنگ ءَ پد روہت ھم واتر بوتگ ، روہت ءَ پد سوریہ کمار ءَ وتی جلواہ پیش داشتگ ءُ آئی ءَ بیست ءُ شش بالاں پنجاہ ءُھپت رن جوڑ کتگ – اشاں ابید ٹم ٹیوڈ ءَ بیست ءُ پنچ رن جوڑ کتگ ءُ ناٹ آؤٹ بوتگ –

اولسر ءَ بیٹنگ کنان کپٹن سیم کرن ءِ نیم سنچری ءُ پدا ہرپریٹ بھاٹیہ ءِ ھمراھی ءَ پنچمی وکٹ ءِ ھاتر ءَ پنجاہ بالاں نود ءُ دو رن ھواری جوڑ کتگ ءُ پنجاپ کنگز ءَ ھشت وکٹاں دوسد ءُ چاردہ رنانی ٹارگٹ ءِ مزنیں اسکور ءِ ایرکتگ – کرن ءَ بیست ءُ نُھ بالاں پنجاہ ءُ پنچ رن جوڈ کتگ وھدیکہ بھاٹیہ ءَ بیست ءُ ھشت بالاں چِل ءُ یک رن جوڈ کتگ – جتیش ءَ ھپت بالاں چار چکا جتگ ءُ بیست ءُ پنچ رن جوڈ کتگ – پنجاپ ءَ گڈی پنچیں اووراں نود ءُ شش رن جوڑ کتگ –

ممبئی انڈینز ءِ نیمگ ءَ پیوش ءُ کیمرون سوبمندیں بالر بوتگ انت کہ آھاں دو دو وکٹ گپتگ – جیسن، جوفرا، ارجن ءَ ھم یک یک وکٹ ءِ گپتگ- ارجن ءَ سَے اووراں چِل ءُ ھشت رن داتگ بیہرنڈورف ءَ ھم ھمنچو اوور ءَ چِل ءُ یک رن داتگ – گرین ءُ ارچر ءَ چار چار اووراں چِل ءُ یک ءُ چِل ءُ دو رن داتگ –

بلوچستان لبریشن فرنٹ ءِ جارکش میجر گوھرام ءَ بلوچ ءَ وتی آفیشل ٹیلگرام چینل آشوب ءَ شنگ کُرتگیں درشانے ءَ گْوشتگ کہ مئے سرمچاراں تربت بالی پَٹ دَگ ءَ برجاھیں پاکستانی پوج ءِ پانگس ءِ سر ءَ اُرش کُرتگ ءُ پروم ءَ یوفون ءِ ٹاور مانداشتگ اَنت –

جارکش ءَ گوشتگ کہ سرمچاراں بیست ءُ یک اپریل ءِ بیگاہ ءِ ادار ھشت ءُ بیست ءَ کیچ ءِ بنجاھی شھر تربت ءَ بالی پَٹ دگ ءَ برجاھیں پاکستانی پوج ءِ پانگس ءِ سر ءَ دز بمب اُرشے کُرتگ ،اُرش ءَ پاکستانی پوج ءِ دو کارمند زدگ بوتگ انت –

میجر ءَ دیمتر ءَ گوشتگ کہ سرمچاراں گوستگیں شپ ءَ پنجگور ءِ دمگ پروم دِز ءُ جائین ءَ پاکستان ٹیلی کمیونیکیشن لمیٹڈ ءِ موبائل کمپنی یوپون ءِ دو ٹاور مانداشتگ انت –

میجر ءَ گوشتگ کہ پاکستان ءِ پوج ءُ آئی ءِ زورگری شوربندی مئے نشانگ ءَ اَنت ءُ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ تیاب دپی دمگ پسنی ءَ ائید ءِ اولی روچ ءَ بیگاہ ءِ ادار چار ءَ ازم آزمان پسنی ءِ چیردستی ءَ یک پُرمڑاہیں مراگشے ماں پبلک ویلفئیر سینٹر پسنی ءَ برجم دارگ بوتگ، اے مراگش ءِ دو بھر بوتگ اَنت اولی بھر ءَ شئر ءُ شئیری دیوانے بوتگ ءُ دومی بھر ءَ تژن ءُ بچکندی کسمانکے پیش دارگ بوتگ-

مراگش ءِ اولی بھر شائری دیوان ءَ برکت راج، رشید داد، ایاز فراز، فراز مہر، فراز نور، اِکرام اسلم، نواب ساھل، نظام اللہ بخش، ساھل اکرم، یونس یوسف، آصف نور، غفور اکبر، میر تنویر، طاھر واحد، ریاض چراگ، ،ماسٹرعبدالرشید، شاہ بلوچ، سلیم ارمان، عرفان اسلم، تنویر دیدگ، زاھد داد، ملا واحد نوری، کامران اسلم، اکبر حسن، عادل سجاد، ساجد نور، زبیر مختار ءُ مبارک قاضی ھوار بوتگ اَنت وتی شئر درشان اِتگ انت شئیری دیوان ءِ جارچینی ءِ ڈبہ ورنائیں نبشتہ کار عرفان اسلم ءَ گون بوتگ –

مراگش ءِ دومی بھر ءَ نعیم قاضی ءِ نبشتہ کتگیں بچکندی کسمانکے وحید قاضی ءِ سر ءُ سوجی ءَ پیش کنگ بوتگ اے بچکندی کسمانک ءِ تہ ءَ نعیم قاضی، امتیاز اسلم، ظریف شے، ارسلان اسلم، نعیم نعیمک، دودا بلوچ خان، پھلان بزنجو، عدیل سکندر ءُ تجمل ءَ وتی ازم ءِ درانگازی کتگ ءُ لس مھلوک وشنود کتگ –

بلوچستان ءَ زورانسری آوار جنیانی ھلاپ ءُ عید ءِ روچ ءَ تربت، گوادر، شال، ھزدار ءُ پنجگور ءَ ھوار اسلام آباد ءَ زھرشانی کنگ بیتگ اَنت-

زھرشانیانی جار بیگواھیں بلوچانی کھول، نودربر گل ءُ سیاسی گلانی نیمگ ءَ دیگ بیتگ اَنت، اے زھرشانیاں جتاجتا تکاں بندوکیں مردماں بھر زرتگ ءُ بیگواھیں بلوچانی کھولانی گون ءَ ھمدردی درشان کتگ ءُ بیگواھیں مردمانی یل کنگ ءِ لوٹ کتگ اَنت-

تربت:
زورانسری آوارجنیانی ھلاپ ءَ بنداتی زھرشانی کیچ ءِ بنجاھی شھر تربت ءَ بیگواھیں مردمانی کھول ءُ بی ایس او ءِ چیردستی ءَ کنگ بیتگ –

تربت ءَ زھرشانی کنوکاں ھمے وھد ءَ گوشتگ کہ مروچی زھرشانی ءِ مول ءُ مراد راجی ءُ میان استمانی پھناتاں ریاستی زوراکی ءُ لَٹ ءُ کُٹ ءُ بلوچ راج ءِ گون ءَ رسری رویشانی پیشدارگ ءَ دنیا ءِ دیم ءَ پاشک کنگ اِنت تانکہ دودمانی مھلوک بلوچستان ءَ ریاستی زوراکیانی سر ءَ چار ءُ ٹپاس بہ کنت ءُ اد ءِ مھلوک ءَ زوراکیانی سر ءَ کپتگیں ساھیلاں ھلاس بہ کنت-

تربت ءَ زھرشانی ءَ تران کنان ءَ گوشتگ ات کہ ریاست ءَ لوٹ ایت کہ آ وتی پالیسیاں چار ءُ ٹپاس بہ کنت چوش مہ بیت کہ وھد بہ گوز ایت ٹ بلوچ راج دگانی سر ءَ کپتگیں سنگ نہ اِنت چست کن ءُ دیولانی سر ءَ ایرش بہ کن ءُ آ بے توار بہ بنت- بلوچ بنچک ءَ چہ گھگیری ءِ واھند اَنت – اگاں گپ بلوچ ءِ زند ءِ بہ بیت گڑا کجام تکاں داں شت کنت-

ھزدار:

ھزدار ءَ زورانسری آوار جنیانی ھلاپ ءَ بیگواھیں مردمانی کھولاں عید ءِ روچ ءَ دگانی سر ءَ درکپتگ اَنت ءُ سالانی سال زورانسری بیگواہ کنگ بیتگیں جگر ءِ ٹکرانی یل کنگ ءِ لوٹ اش کتگ-

ھزدار ءَ بیگواھیں مردمانی کھولانی نیمگ ءَ شھید عبدالرزاق چار راہ ءَ زھرشانی کنگ بیتگ-

ھمے وھد ءَ بیگواھیں مردمانی کھولاں گوشتگ کہ زورانسری آوارجنیاں اے زالمیں ریاست ءِ کانون ءُ وتی دوستگیں مردمانی سلامتی ءَ یل کنگ ءِ واستا یک رندے پد ءَ عید ءِ روچ ءَ عید ءِ دارگ ءَ ابید وتی دوستیگین مردمانی یل کنگ ءِ ھاتر ءَ زھرشانی کنگ ءَ اَنت-

گوادر:

عید ءِ روچ ءَ گوادر ءَ ھم ھق دو تھریک ءُ بیگواھیں مردمانی کھولانی نیمگ ءَ زورانسری بیگواھیانی ھلاپ ءَ زھرشانی کنگ بیتگ-

گوادر ءَ زھرشانی ءَ پوج ءِ دست ءَ بیگواھیں عظیم دوست بلوچ، بولان کریم، نسیم بلوچ ءِ کھول ءُ دگہ بیگواھیں مردمانی کھولاں ھوار ھق دو تھریک ءِ رھشون ءُ جتا جتائیں سیاسی پاٹیاں ھوار زھگ ءُ زالبولاں بھر زرتگ-

تران کنوکاں گوشتگ ریاست مجرم اِنت ھما کس کہ سالانی سال مردماں بیگواہ کنت – اگاں اے مردم مجرم اَنت گڑا آیاں آمیدگس ءَ پیش بہ کن ات اے وڑ ءَ بیگواہ کنگ جرمے ءُ اے جرم ریاست ءِ نیمگ ءَ کنگ بوگ ءَ اِنت-

گوادر ءِ زھرشانی ءَ بھر زیروکیں بیگواھیں عظیم دوست ءِ گوھار رخسانہ دوست ءَ گوشتگ کہ منی برات ءِ زورانسری آوار جنی ءَ ھشت سال سرجم بیتگ – ھمک روچ ما دگانی سر ءَ در کپ ایں لوٹ کن ایں – بلے اے کساس ءَ زھرشانی کنگ ءَ ابید ھم واکدارانی بیگواہ کنوکانی سر ءَ ھچ آسر کپگ ءَ نہ اِنت-

رخسانہ دوست ءَ گوشتگ کہ مئے لوٹ ھروھد ءَ بیتگ برات ءَ یلو بہ کن ات ما ھروھد ءَ ھمے یکیں لوٹ ءَ کنگ ءَ ایں اگاں مجرم آمیدگس ءَ پیشے بہ کن ات ئے ءُ آئی ءِ سر ءَ جرم ءِ منانک ءَ بیار ات بلے آمیدگس ھم شھریانی انساپ دیگ ءَ بے سوب بیتگ اَنت-

گوادر ءِ زھرشانیاں ھق دو تھریک ءِ رھشون مولانا ھدایت الرھمان ءِ یل کنگ ءِ ھم لوٹ کنگ بیتگ اَنت-

مروچی جتا جتائیں شھراں زھرشانیانی وھد ءَ پولیس ءُ پاکستانی پوج ءِ نیمگ ءَ زھرشانیانی دارگ ءِ ھاتر ءَ اڑانگ ودینگ بیتگ اَنت ءُ ھمے وڑ گوادر ءَ پولیس ءَ زھرشانی کنوکانی دارگ ءِ ھاتر ءَ جھد بیتگ ءُ ھمے رنگ ءَ ھزدار ءَ ھم ایف سی ءِ نیمگ ءَ زھرشانی کنوک ترسینگ بیتگ اَنت-

شال:

عید ءِ روچ ءَ جتا جتائیں شھراں زھرشانیانی ھواری ءَ بلوچستان ءِ بنجاھی شھر شال ءَ ھم وائس فار بلوچ مسنگ پرسنز ءُ بلوچ یکجھتی کمیٹی ءِ نیمگ ءَ زھرشانی روانک کشگ بیتگ اَنت-

زھرشانی کنوک شال ءِ پریس کلب ءِ دیم ءَ زھرشانی ایش یاداشت کنان ءَ بلوچستان ءَ زورانسری آوار جنیانی دارگ ءُ بیگواھیں مردمانی یل کنگ ءِ لوٹ بیتگ اَنت، اے وھد ءَ بلوچستان نیشنل پاٹی، بی ایس او ءَ ھوار جتا جتائیں سیاسی ءُ چاگردی گلانی رھشون ھوار بیتگ اَنت-

پنجگور:

پنجگور ھمے رنگ ءَ بلوچستان ءِ دمگ پنجگور ءَ ھم عید ءِ روچ ءَ زورانسری آوار جنیانی ھلاپ ءَ زھرشانی ءُ بیگواھیں مردمانی یل کنگ ءِ لوٹ کنگ بیتگ اَنت-

پنجگور ءَ زھرشانی کنوکاں گوشتگ کہ بلوچستان ءَ زورانسری آوارجنیانی جاورھال بلوچستان ءِ جاور گیش ناوش کتگ اَنت- ریاست بلوچانی ھلاپ ءَ اے رویش ءَ بہ دار ایت اگاں گڑا جاور ھال گیش ناگیگ بنت ءُ گڑا دراھیں جاورھالانی زمہ وار ریاست بیت اِنت –

اسلام آباد:

عید ءِ اولی روچ ءَ بلوچستان ءِ جتا جتائیں شھراں زورانسریانی ھلاپ ءَ زھرشانی ھواری ءَ پاکستان ءِ بنجاھی شھر اسلام آباد ءُ بلوچ نودربر گلانی نیمگ ءَ اسلام آباد نیشنل پریس کلب ءِ دیم ءَ زھرشانی یاداشت کنائینگ بیتگ کہ اود ءَ زھرشانی کنوکاں پاکستانی پوج ءِ دست ءَ دستگیر بیتگیں ماھل بلوچ ءُ دگہ بیگواھیں مردمانی اکس دستان اش بیتگ اَنت-

اسلام آباد ءَ زھرشانی کنوکاں تران کنان ءَ گوشتگ کہ بلوچستان ءَ زورانسری آوار جنی گیش ترند کنگ بیتگ اَنت پیسر ءَ ایوک ءَ مردین چِست کنگ بیتگ اَنت نی زالبول ھم چست کنگ بوگ اَنت بلے ریاست اے وڑیں تماشھاں بس جاور ھالاں پہ وتی واستا ناگیگ کنگ اِنت-

نودربرانی گوشگ ات کہ ما وتی لوگاں عید ءِ روچ ءَ ھمے واستا نہ رویں مئے لوگاں ترس اِنت مارا چست کن اَنت بلے نی جاور اے کچ ءَ سر بیتگ اَنت بلوچ نودر ءُ شھری پنجاپ ءِ شھراں ھم مھپوز نہ اَنت-

ھمے وڑ ءَ اسلام آباد ءَ بلوچ نودربرانی زھرشانی ءَ سول سوسائٹی ءِ بازیں باسک ھوار بیتگ اَنت-

بلوچستان ءَ ائید ءُ زورانسری بیگواھیانی ھاتر ءَ جوڑ کنگ بیتگیں کمیشن ءِ رپورٹ

ٹی بی پی شونگال

ائید چہ وشیاں چکاریں نیکراھی وشیانی روچ اِنت بلے بلوچستان ءَ زورانسری بیگواھیں مردمانی کھول ائید ءِ روچ ءَ ھم زھرشانیانی تہ ءَ گوازین اَنت۔ مروچی ائید ءِ روچ ءَ شال، تربت، ھزدار، گوادر ءُ اسلام آباد ءَ زورانسری بیگواہ بیتگیں مردمانی یل کنائنگ ءِ ھاتر ءَ زھر شانی بئیگ ءَ اَنت۔ ائید ءِ روچ ءَ زھرشانی ءُ کھولاں گوں یکجاھی درشانگ ءِ ھاتر ءَ چاگردی رسانکدر ءِ تندجاہ ٹوئیٹر ءِ سر ءَ کمپئن ھم جُنزگ ءَ اَنت۔

خضدار ءَ سائرہ بلوچ وتی برات آصف ءُ رشید ءِ یل کنائنگ ءِ ھاتر ءَ زھرشانی کنگ ءَ اِنت کہ آ گوستگیں پنچ سالاں چہ زورانسری بیگواھی ءِ آماچ اَنت، گودار ءَ رخسانہ بلوچ وتی دہ سالاں چہ زورانسری بیگواھیں اعظم دوست ءِ ھاتر ءَ پہ زھرشانی ءَ درکپگ ءَ اِنت ءُ شال ءَ پنچ ھزار روچاں چہ زھرشانی بنجل ءَ نشتگیں ماما قدیر بلوچستان ءِ تہ ءَ برجاھیں زورانسری بیگواھیانی ھلاس کنگ ءَ پہ ائید ءِ روچ ءَ ھم زھرشانی ءِ تہ ءَ گوازینگ ءَ اِنت۔

زورانسری بیگواھیاں بلوچستان ءِ ھزارانی کھول ذھنی ءُ زری رد ءَ ترندی ءَ گوں سانمند کُتگ اَنت ءُ بلوچستان ءَ نیکراھی ءُ راجی وشی ءُ شاتمانیانی روچ ھم زھرشانیانی تہ ءَ گوز انت، مزن مدتیں زھرشانی، لانگ مارچ ءُ ننداکاں ابید ھم زورانسری بیگواھیانی تہ ءَ کمی ءِ جاہ ءَ گیشی گندگ ءَ پیداک ءُ زورانسری بیگواھیں مردماں دروگیں میڑانی تہ ءَ کُشگ بئیگ ءَ اِنت۔

چہ ائید ءَ لھتیں روچ پیسر ہیومن رائٹس کمیشن آف پاکستان ءَ وتی ’امیت ءِ شوھاز ءَ سرگردان ءِ بلوچستان‘ ءِ نام ءَ مردمی اگبالانی بگیریانی سر ءَ راستی پولوکیں رپورٹ ءِ تہ ءَ بلوچستان ءَ زورانسری بیگواھیانی وئیلانی سر ءَ تُرس ءُ بیم ءِ درشان کنان ءَ گُشتگ کہ ڈیھ ایرادگیریں لیکھانی ھلاس کنگ ءِ ھاتر ءَ مزنیں کچے ءَ زورانسری بیگواھیاں کارمرز کنگ ءَ اِنت ءُ بلوچستان ءِ سیاسی جیڑھانی تہ ءَ ایسٹیبلشمنٹ ءِ دزمانجنی ءِ دارگ، زورانسری بیگواھیانی وئیلانی تہ ءَ ھواریں مردمانی پَٹ ءُ پول کنگ ءُ رسانکدراں بندوکیں مردمانی سلامتی ءُ آجوئی ءَ باوری کنگ ءِ ھاتر ءَ بلوچستان اسمبلی ءِ کانود اڈ دیگ ءِ لوٹ کنگ بیتگ۔

اسلام آباد مزن آمید ءِ چیف جسٹس اطھر من اللہ ءِ پرمان ءِ سر ءَ سردار اخترمینگل ءِ مستری ءَ بلوچ نودربرانی زورانسری بیگواھیانی بگیر ءَ جوڑ کنگ بیتگیں کمیشن ءَ فروری 2023ء ءِ تہ ءَ وتی رپورٹ سرجم کُتگ ءُ اسلام آباد مزن آمید گِس ءَ پیش کُتگ۔ کمیشن ءِ رپورٹ ءِ تہ ءَ بلوچستان ءَ زورانسری بیگواھیاں یک انچائیں ٹپے نامینگ بیتگ کہ آ پاکستان ءِ ھستی ءَ یکشل ءَ نزور کنگ ءَ اِنت ءُ کمیشن ءَ رپورٹ ءِ تہ ءَ گُشتگ کہ پاکستان ءِ جتاھیں شھدربرجاھانی تہ ءَ بلوچ نودربرانی نسل پرستی ھم بیگ ءَ اِنت۔ کمیشن رپوٹ ءِ تہ ءَ پدر کنگ بیتگ کہ بلوچ نودربرانی زورانسری بیگواھیانی تہءَ ڈیھی ادارگ ھوار اَنت ءُ آیانی گامگیج ھواریں راجانی پتر ءِ چارٹر ءِ ٹِک 55 بگیری اِنت۔

ہیومںن رائٹس کمیشن آف پاکستان ءِ راستی شوھازوکیں رپورٹ ءُ آمید گِسی کمیشن ءِ دزبندیانی سر ءَ گامگیج زیرگ ءُ زورانسری بیگواھیانی جیڑہ ءِ گیوار کنگ ءِ جاہ ءَ پارلیمنٹ ءُ آمید گِس ھاموش ندارگ چاروکانی کرد پیلو کنگ ءَ اَنت۔ پارلیمنٹ، زورانسری بیگواھیانی بل ءِ منارینگ ءَ ابید ھم بلوچستان ءِ تہ ءَ زورانسری بیگواھی ءُ بیگواھیں مردمانی بندیگ جاھی کوشانی دارگ ءَ بے سوب اَنت کہ اے بلوچ جیڑہ ءِ گیوار کنگ ءِ ھاتر ءَ پاکستانی پارلیمنٹ ءِ وتگڑیں سردستی ءِ راستی ءَ پجار کنت اِنت۔

بلوچستان ءِ دمگ کلات ءُ ناشناسیں مردماں ٹکی رھشون ءِ گاڑی ءِ سر ءَ اُرش کرتگ چریشی ءَ سَے مردم بیران ءُ دو زدگ بیتگ اَنت-

گیشیں ھالانی رد ءَ کلات ءِ دمگ شیخڑی ءِ ھند ءَ ناشناسیں مردماں ٹکی رھشون سردار اسد شاھوانی ءِ کاروان ءِ سر ءَ اُرش کتگ-

لیویز ءِ گوشگ اِنت اُرش ءَ سَے باڈی گارڈ بیران بیتگ اَنت ءُ سردار سک زدگ بیتگ بیران بیتگیں مردمانی پجار محمد امین ء محمد رفیق، حافظ سعید احمد ء محمد عالم ءُ محمد علی ء حاجی عبدالرشید ءِ ناماں زانگ بیتگ اَنت اُرش ءَ یک گارڈے ءَ ھوار سردار شاھوانی سک زدگ بیتگ اَنت-

زدگ بیتگیں مردم شال ءَ برگ بیتگ اَنت بلے وئیل ءِ بارو ءَ تنی وھدی دگہ سرپدی نہ بیتگ اَنت-

بلوچستان ءِ جتا جتائیں جاھاں زورانسری آوار جنگ بیتگیں پنچ مردم یل کنگ ءُ وتی گِساں سر بیتگ اَنت – بیگواہ کنگ بیتگیں مردم جتا جتائیں وھداں آوار جنگ ءُ بیگواہ کنگ بیتگ اَنت-

دی بلوچستان پوسٹ پتر ھال ءَ سر بیتگیں اھوالانی رد ءَ وھاب ء حبیب جھمنند پنجگور، خالد ء منیر احمد جھمنند نوشکی، رسول بخش ء یعقوب، چہ سوراب ءَ اللہ دین ریکی ءُ محمد آصف ریکی ھم ھوار اَنت-

یل بیتگینانی تہ ءَ وھاب پنچ سال، خالد ھشت ماہ، رسول بخش سَے سال، اللہ دین ءُ محمد آصف دو سال ءَ پیش پاکستانی پوج ءَ دزگیر کنگ ءَ پد بیگواہ کرتگ ءُ ناشناسیں زنداناں برتگ اَنت-

آصف ریکی ءُ اللہ دین ریکی بلوچستان ءَ پہ بیگواھیں مردماں جد ءُ جھد کنوکیں گل وائس فار بلوچ مسنگ پرسنز ءِ وائس چیئرمین ماما قدیر بلوچ ءِ براتزتک اَنت-

ماما قدیر بلوچ ءِ سیادانی زورانسری آوار جنی ءِ پشدر بلوچستان ءَ سیاسی گلاں اے بلوچستان ءَ برجاھیں جھلانکیں یکشلیں سزا گوشتگ ھردوکیں ورنا دو سال ءَ پد مروچی یل کنگ بیتگ اَنت-

زانگ بہ بیت بلوچستان ءَ زورانسری آوار جنی ءِ جاورھال بیمناکیں جاورے پیش کن اَنت کہ اود ءَ بازیں سالاں چہ مردم بیگواہ اَنت ءُ ایشی ءَ پد ھم اود ءَ مردم بیگواہ کنگ بنت-

دو روچ ءَ پیش سَے مردمانی لاش پاکستانی پوج ءَ سول ھسپتال شال ءَ آرگ بیتگ اَنت کہ اود ءَ آیانی جسماں لٹ ءُ کُٹانی نشانگ بیتگ اَنت ءُ اود ءَ ھر سئیں مردمانی پجار بیگواھیں مردمانی ناماں زانگ بیتگ اَنت کہ آ جتا جتائیں وھداں آوار جنگ بیتگ اَنت-

ھمے وڑ مَچ ءَ دگہ دو لاش آرگ بیتگ اَنت داں انگت ءَ ایشانی بارو ءَ دگہ ھال دیم ءَ نیتکگ اَنت-

مروچی عید ءِ بنداتی روچ ءَ بلوچستان ءَ جتا جتائیں شھراں ھوار پاکستان ءِ بنجاھی شھر اسلام آباد ءَ بلوچستان ءَ زورانسری آوار جنگ بیتگیں مردمانی یل کنگ ءِ واستا زھرشانی کنگ ءَ اَنت-

انڈین پریمئیر لیگ ءِ بیست ءُ نھمی گوازی ماں چنئی ءَ چنئی سپر کنگز ءُ سن رائزرز حیدرآباد ءِ میان ءَ کنگ بوتگ اے گوازی چنئی ءَ ھپت وکٹاں کٹ اِتگ-

ٹاس ءِ نہ کٹگ ءَ پد اولسر ءَ بیٹنگ کنان ءَایس آر ایچ ءِ ٹیم ءَ بیست اوورانی تہ ءَ یکسد ءُ سِی ءُ چار رن ءِ ٹارگٹ ایر کُتگ، کہ سی ایس کے ءَ سَے وکٹانی تاوان ءَ ٹارگٹ پروشتگ ءُ آئی ءِ گور ءَ دگہ ھپت بال بچ اِتگ بوتگ –

سی ایس کے ءِ ڈیون کانوے بندات کنان ءَ ہنچ ھپت بالانی گوازی کتگ کہ اے میان ءَ آئی ءَ دوازدہ چوکا ءُ یک چکے ءِ جتگ ءُ ھپتاد ءُ ھپت رن جوڈ کتگ انت ءُ ناٹ آؤٹ بوتگ – کانوے ءَ ابید گائیکواڑ ھم جوانیں گوازی پیش داشتگ کہ آئی ءَ سِی بالانی تہ ءَ دو چوکا جتگ ءُ سِی ءُ پنچ رن جوڈ کتگ –

چدوپیسر ءَ ایس آر ایچ ءَ ٹاس نہ کٹ اِتگ ءُ اولسر ءَ بیٹنگ کتگ، ایس ار ایچ ءِ ھاتر ءَ درساں گیش ابھیشیک شرما رن جوڈ کتگ کہ آئی ءَ بیست ءُ شش بالاں سَے چوکا ءُ یک چکائے جتگ ءُ سِی ءُ چار رن جوڈ کتگ – شرما ءَ ابید راہل ترپاٹھی ءَ بیست ءُ یک بالاں بیست ءُ یک رن جوڈ کتگ ءُ ہیری ءَ سینزدہ بالاں ھژدہ رن جوڈ کتگ –

بالنگ ءِ تہ ءَ سی ایس کے ءِ آل راؤنڈر ویندر جڈیجہ ءَ جوانیں بالنگ کتگ کہ آئی ءَ پہ وتی ٹیم ءِ ھاتر ءَ چار اوور لیب کتگ ءُ بیست ءُ دو رن داتگ ءُ درساں گیش سَے وکٹ گپتگ – ایس آر ایچ ءِ ھاتر ءَ مینک مارکنڈے جوانتریں بالر بوتگ کہ آئی ءَ وتی ٹیم ءِ ھاتر ءَ چار اوور لیب کتگ ءُ بیست ءَ سَے رن داتگ ءُ دو وکٹ گپتگ –