TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ کہ گوستگیں روچ ءَ یازدہ مئی ءَ بیگاہ ءِ ساھت شش ءَ مشکے ءِ ھند میانی کلات ءَ پاکستانی پوج ءِ کارندھانی سر ءَ اُرش کتگ-

آئی ءَ گوشتگ کہ اے اُرش ھما ساھت ءَ کتگ کہ زورگریں لشکر ءِ پنچ کارندہ وتی چوکی ءَ دراتکگ ءُ پند ءَ روگ ءَ بیتگ اَنت ءُ دو کارندہ مرتگ ءُ یکے زدگ بیتگ-

گوھرام بلوچ ءَ گوشتگ بلوچستان لبریشن فرنٹ اے اُرش ءِ زمہ واری ءَ من اِیت – بلوچستان ءِ آجوئی ءَ داں اے اُرش برجاہ بنت-

بلوچستان ءِ دمگ قلعہ سیف اللہ ءَ سلاہ بندیں مردماں ایف سی ءِ ھیڈ کوارٹر ءِ سر ءَ اُرش کتگ – کم چہ کم دو وتکش تراکاراں وت ءَ تراک ءَ گوں تراکینتگ-

سر بیتگیں ھالانی رد ءَ گوستگیں شپ ءَ مسلم باگ ءَ سلاہ بندیں مردماں پاکستانی پیرا ملٹری لشکر فرنٹیئر کور ءِ ھیڈ کوارٹر ءِ سر ءَ اُرش کتگ- اُرش ءِ وھد ءَ ترندیں تیرگواری ءُ تراکانی توار ایش کُنگ بیتگ اَنت ءُ داں انگت ءَ اُرشکار ھیڈ کوارٹر ءِ توک ءَ جاڑیگ اَنت بلے داں انگت ءَ تراکارانی کَچ گوشگ نہ بوتگ-

رسانکدرانی رد ءَ کم چہ کم دو وتکش تراک بیتگ اَنت ءُ بازیں کساسے ءَ لشکر ءِ جانی تاوانانی اھوال آیگ ءَ اَنت- لشکری بنشونانی نیمگ ءَ تنی وھدی دگہ چوشیں گپ دیم ءَ نیتکگ اَنت-

تھریک جھاد پاکستان نامیں گلے ءَ اُرش ءِ زمہ واری من اتگ- جارکش ملا مھمد قاسم ءَ وتی کسانوکیں درشانے ءَ گوشتگ کہ گوستگیں شپ ءَ چہ مئے فدائی اُرشکار مسلم باگ بلوچستان ءَ ایف سی ءِ بنجل ءَ پترتگ اَنت ءُ داں انگت ءَ ترندیں جنگ برجاہ اِنت-

آئی ءَ گوشتگ کہ پاکستانی پوجی کارندہ بنجل ءِ دیوالاں شوروانی گون ءَ پروشگ ءُ تچگ ءَ اَنت داں انگت ءَ چل پوجیانی لاش مئے ھمراھانی دیم ءَ کپتگ اَنت-

انڈین پریمئیر لیگ ءِ پنجاہ ءُ ششمی گوازی راجستھان رائل ءُ کولکاتہ نائٹ رائیڈر ءِ میان ءَ کنگ بوتگ کہ راجستھان ءَ کے کے آر دیم ءَ نُھ وکٹاں گوازی کٹ اِتگ –

راجستھان رائل ءَ دوازدھ گوازیانی تہ ءَ شش گوازی کٹ اِتگ انت دوازدہ پوئنٹانی ھمراھی ءَ راجستھان پوئنٹ ٹیبل ءِ تہ ءَ سیمی نمبر ءَ سربوتگ – وھدیکہ کے کے آر ءِ دوازدہ گوازیانی تہ ءَ دھ پونٹ ءِ ھمراھی ءَ دھ ٹیمانی تہ ءَ ھپتمی نمبر انت ءُ پہ پلے آف ءِ ھاتر ءَ آئی ءِ گرانتریں راہ انت –

راجستھان ءِ نیمگ ءَ یشسوی ءَ کے کے آر ءِ بالر الکاپ ءَ شُشتگ انت – یشسوی ءَ چِل ءُ ھپت بالاں نود ءُ ھشت رن جوڈ کتگ ءُ ناٹ آؤٹ بوتگ ءُ اے میان ءَ آئی سینزدہ چوکا ءُ پنچ چکا جتگ – یشسوی ءَ اے گوازی ءَ آئی پی ایل گوستانک ءِ زوت تریں نیم سنچری بوتگ کہ آئی ءَ سینزدہ بالاں وتی نیم سنچری کتگ –

رائلز ءِ کپٹن سنجو سیمسن ءَ ٹاس کٹ اِتگ بلے اولسر ءَ بالنگ کنگ ءِ شور کُتگ ءُ آئی ءِ بالراں کولکاتہ نائٹ رائیڈر ھشت وکٹانی تاوان ءَ یکسد ءُ چِل ءُ نُھ رناں داشتگ ءُ پسوی ءَ رائلز ءَ یک وکٹ ءِ تاوان ءَ سینزدہ اووراں ٹارگٹ پروشتگ –

جیسوال ءِ سنچری ءَ بس دو رن بچ اِتگ آئی ءَ وتی اننگز ءَ دوازدہ چوکا ءُ پنچ چکا جتگ – کپٹن سیمسن ءَ بیست ءُ نُھ بالاں چِل ءُ ھشت رن جوڈ کتگ ءُ ناٹ آؤٹ بوتگ – کے کے آر ءِ بالراں یک وکٹ ءِ ھم گپت نہ کُتگ ءُ رائلز ءِ نیمگ ءَ جوس بٹلر ءِ وکٹ زیرو سر ءَ کپتگ بلے آ ھم رن آؤٹ بوتگ –

دکی ءِ ھند کلی ٹھڈڑی ءَ ھپت اپریل ءَ بیگواہ بیتگیں دو سالیگیں زھگ ءِ لاش دزکپتگ-

اھوالانی رد ءَ لاش اشکرانی کھن ءَ دزکپتگ،پولیس ءِ گوشگ اِنت زھگ ءِ لاش بندیں کھن ءَ دزکپتگ –

پولیس ءِ رد ءَ کھن ءِ جھلی سد فُٹ بیتگ ءُ کھن ءِ توک ءَ جاڑیگین آپ ءُ چِڈانی توک ءَ بیتگ ءُ لاش کش اتگ ءُ شال ءَ پہ پوسٹ مارٹم ءَ برتگ-

وئیل ءُ زھگ ءِ بیگواھی ءِ بارو ءَ دگہ سرپدی نہ بیتگ اَنت ءُ پولیس پٹ ءُ پول کنگ ءَ اِنت-

روکپتی بلوچستان ءِ بنجاھی شھر زاھدان ءَ گاڑی ءِ چپ بوگ ءَ دو کس زدگ ءُ بیران بیتگ اَنت-

وئیل زاھدان ءِ ھند ساپیا ءَ پیش اتکگ کہ اود ءَ یک گاڑی یے چپ بوگ ءَ دو کس زدگ ءُ بیران بیتگ اَنت-

بیران بیتگیں مردم ءِ پجار بیست ءُ پنچ سالیگیں دلاور درکزئی ء اشرف جھنند شورک سرجنگل زاھدان ءِ نام ءَ زانگ بیتگ – ءُ زدگ بیتگین ءِ پجار زکریا درکزئی ءِ نام ءَ زانگ بیتگ کہ اے وھد ءَ زاھدان ءِ بیمارستان ءَ تھتیگ اِنت-

روکپتی بلوچستان ءَ تیل کشانی بیرانی زدگ بوگ اے لس وئیلے جوڑ بیتگ کہ اود ءَ ھمک روچ مردم پہ چُنڈے نانے ءَ جگر کُشیں کار ءِ دیمپان اَنت-

سیاسی کواسانی گوشگ اِنت پاکستان ءَ بیوکیں ناوشیں جاورھالانی پھناتاں میانی اُستمانی پنڈ دیوک ( آئی ایم ایف) ءِ گون ءَ بیوکیں مسام اسرمند بیت کُت کنت-

برتانیہ ءِ ھال سرکنوکین روئٹرز ءَ کواسانی درور دیان ءَ گوشتگ کہ گوستگیں وئیلاں اے اُمیتانی توک ءَ کمی گندگ ءَ اتکگ کہ ھما پاکستان ءَ آئی ایم ایف ءِ گون ءَ بندوکی بیتگ- اژدری درکاری ءَ اے وھد ءَ آئی ایم ایف ءِ نیاد ءِ زرکاری زوت ءَ ٹریک ءَ کیت اِنت-

گوستگین سروزیر عمران ءِ دزگیری ءَ پد پولیس ءُ پی ٹی آئی ءِ باسکانی میان ءَ بازیں شھراں جنگ ءُ چوپانی درچ یکشل ءَ برجاہ اَنت-

کساس بیست ءُ سَے کروڑ ءِ آبادی داروکیں ڈیھ سیاسی جاورھالانی ناوشیاں یک ھنچیں وھدے ءَ مان پتاتگ کہ اے موسم ءُ تروکیں گچینکاری ءِ چن ءُ لانچ ءُ بوگ ءَ اِنت ءُ دومی بدتردیں بے زری ءِ دیمپان اِنت-

ھمے داب ءَ شش ارب ڈالر ءِ نیاد ھم جون ءَ ھلاس بوگی اِنت دگہ زرکاری پھناتاں ھم کمی گندگ ءَ آیگ ءَ اِنت –

کلانیں زرکار گءرتھ لیدر ءِ گوشگ اِنت دگانی سر ءُ زھرشانی کنوکانی جاڑیگ بوگ ءَ پد آئی ایم ایف ءِ وام ءِ زیرگ ءَ گیش چمداری کنگ کپ ایت-

ڈیھ ءَ زرکاری ھما وھدی تباھی ءِ دیمپان بیتگ کہ گوستگیں سال ءَ عمران ءِ سرکار پروشگ بیتگ-

گوستگیں دوازدہ ماھانی توک ءَ پاکستان ءِ زَر ءَ کساس پنجاہ درسد کمی اتکگ ءُ اے وھدانی توک ءَ کراچی ءِ سٹاک ایکسچینج ( کے ایس ای) ءِ کساسانی توک ءَ دو ٹک کمی گندگ ءَ اتکگ –

چارشمبے ءِ روچ ءَ زر ءِ نھاد ءَ دگہ کساس دو درسد کمی ءُ ڈیھ ءَ ڈالر ءِ نھاد دوسد ءُ نود ءَ سر بیتگ-

کیتھی ھیپورتھ ءِ رد ءَ پاکستان ءُ اود ءَ ھستیں زرکارانی واستا سیاسی چست ءُ ایر نوکیں گپے نہ اِنت بلے آئی ایم ایف ءِ درگت ءَ کمو اجکہ کنگی کتگ ءُ اے جیڑہ ءِ دیری ءُ ایشی ءَ کمو مردم بَھ بکڑ کتگ –

وھدی ترندی ءَ روان اِنت آئی ایم ایف ءِ مشن پاکستان ءِ تر ءُ تاب ءَ کساس سد روچ گوستگ- ایشانی میان ءَ داں انگت ءَ بنداتی مسام ھم نہ بیتگ کہ دانکہ دیم ءِ کِست ءِ مھکم کنگ ءَ جوانیں گامگیج زورگی کپ ایت-

اے سال دوھزار ءُ ھشت ءَ پد اے دراج تریں دگری اِنت – جی پی مورگن ءَ سیادی داروکیں کواس مائیلو گناسنگھے ءِ گوشگ اِنت کہ پاکستان ءَ پوڑی دیگ ءِ گمان سک کم اِنت-

نوکتریں ھاورھالانی سر ءَ گمانی ھردوکیں نیمگاں سیاسی گامگیج ءِ گمانی کم اِنت-

بلوچستان ءِ تیابدپی شھر گوادر ءَ اھوال اَنت کہ گوستگیں روچ ءَ ناشناسیں مردماں چہ گوادر ءَ دیم پہ کراچی ءَ روکیں گیس بروکیں ٹینکر بمب ءِ نشانگ کنگ بیتگ-

ٹینکر تیابدبی ھند ماکولا ءَ نشانگ کنگ بیتگ ءُ ٹینکر ءَ ھوار یک پُھلے ءَ ھم تاوانباری ءِ دیمپانی کنگ کپتگے

سرکاری پھناتاں تنی وھدی اے درگت ءَ دگہ گپ دیم ءَ نیتکگ اَنت ءُ نانکہ اُرش ءِ زمہ واری دگہ گلے ءَ پہ وت ءَ زرتگ-