TBP Balochi

بلوچستان ءِ دمگ کلات ءَ سلاہ بندیں مردماں پاکستانی پوج ءِ کارندھانی سر ءَ ناشناساں اُرش کتگ-

سر بیتگیں ھالانی رد ءَ کلات ءِ کوھی دمگ ھربوئی ءَ پاکستانی پوج ءِ یک گاڑی یے سر ءَ ناشناسیں سلاہ بندین مردماں اُرش کتگ – چریشی ءِ آسر ءَ پوجی کارندھاں جانی تاوانانی دیمپانی کنگ کپتگ-

دمگی مردماں ٹی بی پی ءَ گوں گوشتگ کہ اے کارندھ دمگ ءَ تیل ءُ گیس ءِ شوھاز کنوکیں کمپنی ءِ کارمندانی پھزداری ءَ بیتگ اَنت-

سرکار ءِ نیمگ ءَ تنی وھدی اے وئیل ءِ درگت ءَ دگہ گپ دیم ءَ نیتکگ اَنت-

بلوچستان ءَ تیل ءُ گیس ءِ شوھاز کنوکیں کمپنیاں ھوار دگہ پراجیکٹسانی سر ءَ بلوچ آجوئی لوٹوکیں سلاہ بندیں گل نشانگ کنگ ءَ اَنت- گوستگین روچاں بلوچ لبریشن آرمی ءَ تجابان ءَ سی پیک دگ ءَ پاکستانی پوج ءُ کلات ءَ مڈی بروکین گاڑیانی سر ءَ اُرش کتگ ات-

بلوچ آجوئی لوٹوکیں گل اے پراجیکٹساں پلپھانچی پراجیکٹس گوشگ ءَ اَنت – سی پیک ءَ ھوار ھوار دگہ پراجیکٹسانی سر ءَ فدائی اُرشاں ھوار دگہ ترندیں اُرش ھم کنگ بیتگ اَنت-

پاکستان پوج ءِ جارکش (آئی ایس پی آر) ءَ یک شنگ کُتگیں درشانے تہءَ ٹاہ داتگ کہ سلاہ بندیں مردماں بلوچستان ءِ ھنکین ھوشاب ءَ لشکریانی یک بُنجل ءِ سرءَ اُرش کُتگ۔

جارکش ءَ دیمترءَ گُشتگ کہ اُرش ءِ سوبمندیءَ گوں بے سوب کنگ ءَ پد سلاہ بندیں مردمانی سرءَ آزمانی سرپانکی کارمرز کنان ءَ نزیکی کوھاں آیانی رندگیری کتُگ، ھمے نیام ءَ آ انگر کتگ اَنت ءُ اُرش کتگ وھدیکہ سلاہ بندیں مردم ءُ لشکریانی نیام ءَ ترندیں تیر گواری بیتگ۔

پاکستانی پوج ءِ ٹاہ ءِ ردءَ جنگ ءِ نیام ءَ پنچ سلاہ بندیں مردم کُشگ بیتگ اَنت۔

البت آئی ایس پی آر ءِ ٹاہ ءَ برھلاپ بلوچ سلاہ بندیں آجوئیں لوٹوکیں گلابی ردءَ داں اَنگت ھچ پئیمیں لیکہ دیما نئیتکگ اَنت۔

زانگ بہ بیت کہ ھمے دمگانی تہءَ سلاہ بندیں بلوچ آجوئی لوٹوکیں گل سُر ءُ پُر کنگ ءَ اَنت ءُ لشکریانی سرءَ اُرشانی ذمہ واریاں من اَنت۔

بلوچستان ءِ دمگ پنجگور ءَ پاکستانی لشکریاں یک مردمے زورانسری بیگواھی ءِ آماچ کُتگ ءُ ناشناسیں ھنداں بُرتگ۔

بیگواہ بیتگیں ورناھے پجار مجاھد ء فضل ءِ نام ءَ چہ بیتگ۔

اھوالانی ردءَ گوستگیں شپءَ لشکریاں پنجگور ءِ ھنکین بونستان ءَ لوگانی سرءَ بیڑ بُرتگ ءُ ھمے ورناہ زورانسری بیگواھی ءِ آماچ کُتگ۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات، زامران ءُ کولواہ ءَ سے جتائیں اُرشاں زورگریں پاکستانی پوج نشانگ کتگ- اُرش ءَ یک دُژمن ءِ کارندھے کُشتگ ءُ پنچ ٹپی کتگ اَنت-

جارکش ءَ گْوشتگ کہ بی ایل اے سرمچاراں گوستگیں شپ ءَ کلات ءِ دمگ منگچر ءَ زورگریں پاکستانی پوج ءِ بُنجاھی بُنجل ءِ پھازوکی پانگس سر ءَ گرنیڈ لانچر ءَ چہ بازیں گولھے آس داتگ چریشی ءِ آسر ءَ پانگس ءَ ساڑی ئیں دو دُژمنیں کارندہ ٹپی بیتگ اَنت وھدے کہ بُنجل ءِ تہ ءَ گولہ ءِ لگگ ءَ چہ دُژمن ءَ گیش جانی ءُ مالی تاوان چست کنگ کپتگ-

آئی ءَ گْوشتگ کہ بی ایل اے ءِ سرمچاراں زورگریں پوج ءِ سر ءَ دومی اُرش زامران ءَ کتگ- آرچنان کور ءِ ھند ءَ برجاھیں پوسٹ ءَ ساڑی ئیں کارندہ بی ایل اے اسنائپر شوٹر ءَ نشانگ کتگ چریشی ءِ آسر ءَ آ دمان ءَ مرتگ-

آئی ءَ دیمتر ءَ گْوشتگ کہ ھمے کیچ ءَ کولواہ ءِ دمگ ڈنڈار ءَ آشال ءِ ھند ءَ زورگریں پاکستانی پوج ءِ بُنجل نشانگ کتگ، سرمچاراں بُنجل سر ءَ گرنیڈ لانچر چہ ءَ بازیں گولھے آس داتگ چریشی ءِ آسر ءَ کم چہ کم سے دُژمن ءِ کارندہ ٹپی بیتگ اَنت وھدے کہ دُژمنیں پوج ءَ مالی تاوان ھم چست کنگ کپتگ-

گُڈی ءَ جارکش ءَ گْوشتگ کہ بلوچ لبریشن آرمی اے سئیں اُرشانی زمہ واری ءَ منّ اِیت- زورگریں پوج ءِ سرجمی ءَ دراھگ ءَ تاں مئے اُرش برجاہ بنت-

تربت شھدربرجاہ ءَ چار نودربر چہ شھدربرجاہ ءَ در کتگ انت، نودربرانی رِد ءَ تربت شھدربرجاہ ءِ رجسٹرار ءَ باہوٹ چنگیز، یاسر بیبگر، ضمیر شوہاز ءُ بالاچ رضا چہ شھدربرجاہ ءَ در کُتگ انت –

اے نودربر لاء ڈیپارٹمنٹ ءَ ھوار شھدربرجاہ ءِ دگہ ڈیپارٹمنٹانی نودربر بوتگ انت –

گوستگیں روچاں شھدربرجاہ ءِ واکدارانی نیمگ ءَ شھدربرجاہ ءِ رھبندانی پاسداری نہ کنگ ءِ بھتام ءَ لھتے نودربرانی رزلٹ داشتگ انت، نودربراں شھدربرجاہ ءِ واکدارانی بھتام نہ منّ اِتگ ءُ اشی ءِ بگیری ءَ زھرشانی کتگ –

اے میان ءَ بیچلر آف سائنس ءِ ھپتمی سمسٹر ءِ جنک ءُ بچکیں نوربراں ھم وتی کلاس یل داتگ انت –

دومی نیمگ ءَ شھدربرجاہ ءِ واکداراں نودربرانی زھرشانی دلگوش نہ داتگ ءُ جار جتگ کہ شھدربرجاہ پنچ مئی ءَ بند کنگ بیت وھدیکہ اے میان ءَ شھدربرجاہ ءِ ھاسٹل ءِ بند کنگ ءِ جار ھم جنگ بوتگ –

نودربرانی رِد ءَ تربت شھدربرجاہ ءَ وتی ھکانی ھاتر ءَ زھرشانی کنوکیں نودربرانی بگیری ءَ اے کار کتگ ءُ شھدربرجاہ ءِ بند کنگ ءِ جار جتگ بلے پدا ھم بلوچستان گورنر ءِ دزمانجنی ءَ پد شھدربرجاہ دھ مئی ءَ پچ کنگ بوتگ –

تربت شھدربرجاہ ءِ نودربرانی یک ٹولی ءَ گوں کیچ ءِ آل پاٹی ءِ کنوینر غلام یاسین بلوچ ءَ گوں گند ءُ نند کتگ ءُ آھاں شھدربرجاہ ءِ واکدارانی نیمگ ءَ زورانسری در کنگ بوتگیں نودربرانی درگت گپ جتگ ءُ چہ آل پاٹی ءَ لوٹ کتگ کہ نودربرانی جیڑھے سر ءَ گامگیج بہ زور انت –

نودربرانی گوشگ ات کہ تربت شھدربرجاہ ءِ واکدار گیشتر ھما انت کہ آھاں نودربر سیاست ءِ تہ ءَ نام کٹ اِتگ بلے ھمے مردم نوں شھدربرجاہ ءَ اتکگ ءُ ڈکٹیٹر جوڈ بوتگ انت – وتی ھکانی ھاتر توار چست کنوکیں نودربرانی توار ءَ ایرموش ءُ زورانسری آھانی در کنگ درکانودی کار یے کہ اشی ءِ بگیری ءَ سیاسی سروکانی ھمراھی ءَ یکجاھی ءَ جھد کن ایں –

اے میان ءَ آل پاٹی کیچ ءِ کنوینر غلام یاسین ءَ نودربر باور کنائیں اِتگ انت کہ آھانی کمک ءَ کنت ءُ تربت شھدربرجاہ ءِ وائس چانسلر ءَ گوں لوٹ کتگ کہ نودربرانی جیڑھاں گیش گیوار بہ کنت ءُ زوراکی مہ کنت –

نودربراں واکدارانی نیمگ ءَ شھدربرجاہ ءِ بند کنگ ءِ جار ترندی ءَ گوں ایرجتگ ءُ گوشتگ کہ واکدار نودربرانی جیڑھے گیشگیوار ءِ بدل ءَ تچگ ءَ انت بلے نودربر تاں ھما وھد ءَ وتی زھرشانی ءَ برجاہ دار انت کہ آھانی لوٹ منگ نہ بنت ءُ رزلٹ دیگ نہ بنت –