TBP Balochi

سر بیتگیں اھوالانی رد ءَ روکپتی بلوچستان ءِ دمگ پھرہ “ایرانشھر ” ءَ ناشناسیں مردم ءُ پولیس ءِ میان ءَ ناگتی جنگ ءُ چوپ بناہ بیتگ-

شنگ بیتگیں تامر بندانی توک ءَ گندگ بیت اِنت کہ اود ءَ ناشناسین سلاہ بند ءُ پولیس ءِ میان ءَ تیرگواری بوگ ءَ اِنت-

تیرگواری وئیل ایرانشھر ءِ ھند مسکونی شاہ جمال ءَ پیش اتکگ کہ اود ءَ ناشناسیں سلاہ بند ءُ پولیس ءِ میان ءَ ناگتی تیرگواری بندات بیتگ اَنت-

پولیس ءِ نیمگ ءَ تنی وھدی اے درگت ءَ دگہ گپ دیم ءَ نیتکگ اَنت بلے لس ھالانی توک ءَ دو پولیس کارندہ بیران ءُ دو زدگ بیتگ اَنت-

رژنا پگریں بھارو

نبشتہ کار : ارمان بلوچ

دی بلوچستان پوسٹ

باز جُھد کُتگ کہ وتی لاڑُکیں سنگت بھارو ءَ پہ چیزے یات ءُ ترانگ کہ منی گوْر ءَ ایر تاں ، نبشتہ بکناں بلے مںٔے وڑیں نادان ءُ ناسرجم پہ اے وڑیں کرداں نبشتگ بہ کنت چی؟ ماں ھر وھد ءَ ولید جان ءِ یاتاں کپاں تاں آئی ءِ وش تبیں کند ءُ بچکند گیر کایانت۔وتی وشیں تب ءَ گوں مںٔے اوں تبے وش کتگ اَت۔ایشی ءِ من وتی وش بھتی سمجاں کہ من شھید کمانڈو ءُ شھید حسن گونگیں سنگتانی گون ءَ بوتگ اَنت ءُ وھد گوازینتگ ءُ ھر وھد ءَ ھمے جیڑ اتگ کہ اے کسانیں اُمر ءَ اے ورنایاں چونیں مزنیں بارے وتی کوپگاں زُرتگ ، ءُ برے برے وتی کرد ءَ چہ ھم دلپروش بوتگ اَنت ۔مرچی ھمے کسان سالیں زمین ءِ تنگوئیں بچاں وتی راج ءِ ورنایانی چم جھل کُت انت ھما کہ لوگ ءَ نشتگ ءُ وش واب اِنت۔

چریشاں بھارو منی کسانی ءِ سنگتاں چہ یکے اَت ءُ من چرائی ءَ شر واکب تاں۔ چہ در کسانی آئی ءِ سوچ گوں سرمچاری ءُ گوں آشوب ءَ بندوک اَت۔13 اگست 2013 ءَ ماں آبسر ڈاکی بازار ءَ شھید امداد ءُ شھید رزاجانگیر شھید کنگ بنت ۔ اے واکیہ ءَ بھارو گوں وتی چماں گند ایت ءُ ھما سھت ءَ آ اھد کنت گوں شھیدانی ھوناں کہ “قسم من ءَ شُمئے ھونانی کہ من مزن بوتاں رواں کوہ ءَ وتی کُل شھیدانی بیراں گِراں ءُ وتی مات ءَ موکاں “۔ ھما اھد ءُ سوگند ءِ سبب ات کہ بھارو بولان ءَ ماں سارو ءِ ھند ءَ گوں جںٔوریں دژمن ءَ دیم پہ دیم ءِ جنگ ءِ تہ ءَ شھید بوت گوں کسان سالیں ورنا حسن جان ءِ ھمرھی ءَ ءُ سابت کُت ئِے کہ ما ساہ داتگ وتن نہ داتگ۔

کوہ ءِ آھگ ءَ ساری بھارو ءِ رھوت گوں من ھست اَت من ءَ ھر وھد ءَ ھال کُت ئے گُڑا گپ ایش ھمیش تاں کہ ارمان، منی کسانی ءِ واھشت اِنت کہ من یک برے کوہ ءُ وتی نازاکیں سنگتاں بہ گنداں۔ گڑا یک روچے من ھال داتوں کہ تیار بو سنگت ترا سمبال اَنت ۔گُشت ئِے “من ھر وھد ءَ تیاراں بس تو ھکم کن” گڑا من ٹیمب دات ءُ شپے ھشت ءَ اتک شار ءَ ما دستی کُت ءُ دیم پہ اوتاک ءَ راھدگ بوتاں۔ سک باز گَل اَت۔ھمیکر گل کہ اے وڑ گل من وتی زند ءَ کَس نہ دیستگ اَت۔ گڑا راہ ءَ آھگ آھگ ءَ ما گنداں کہ بھارو ءَ یک تاھے چمپلے پادا اِنت ءُ دومی پادا نہ اِنت۔چو بیت کہ راہ ءَ آھان آھان ءَ بھارو ءِ پادے چمپلے یک تاھے سد ایت ۔اے بھتاور ءَ پادا بیت چمپل کوہ ءِ توک ءَ چمپل ءُ پاد شپادی ءِ مانا یک اِنت ما جُست کُت کہ بھتاور تو شپادے پرچی ؟پسو دات ئِے کہ ایچ مسلہ نہ انت پُل ،اے زمین ءِ مھر اَنت گڑا مئے بڈے چادر ءِ توک ءَ جُتکے بوٹ مان اَت ۔ما دات اَنت ءُ گُشت اوں کہ ایشاں پادا کن کہ اے کوہ اِنت ءُ پد ءَ بولان اِنت ۔شپاد ءَ پند کنگ، جنگ ءِ درور اِنت ما پند جت ءُ اوتاک ءَ سنگتانی گوْر ءَ سر بوت آں ۔سنگت اش دیست اَنت سک سک باز وش بوت گُشے آئی ءِ زند ءِ دراھیں واھگ سرجم بوت اَنت۔ اے بھتاور ءَ شھر ءَ کُتگ نشہ ءُ کش اتگ چرس ۔ چوشیں روچے ھم نہ بوتگ کہ آ بے نشہ ھارام ءِ دل واب کپتگ۔گڑا اوتاک ءَ کہ اتکگ اولی روچ ءَ طبیعت ئِے کمو نہ وش بوتگ ،چرس ءِ پلجی ءَ جتگ بلے یک رندے ھم نہ گُشتگ ئِے کہ من ءَ یک دانگے سگریٹ بہ دے ات۔ ھو اڑے زمین ءِ مھر تو چونیں چیزے اے کہ ورنا ھر چیز ءِ یلا دیگ ءَ سرین بنداں بلے مرزبوم ءِ ھاتر ءَ وتی ھر چیزے قربان کنگ ءَ تیار انت۔واکی ھانُل ءِ پکاںٔیں مریداں۔کاش کہ بلوچستان ءِ ھمک مات ءَ بھارو ءِ ڈولیں مرید ودی کُتیں تاں مروچی آجوئی ءِ درپشوکیں بام دور نہ اَت۔

تو اوتاک ءَ ھر کارے کُت ئِے گوں پور ءَ ایں ایمانداری ءَ کُت ئِے۔ءُ باکی سنگتاں ھر وھد ءَ ھمے پنت ءُ نسیھت دات ںٔے کہ مارا بے کار وتی جندے کار سمجگی اِنت ، اے وتن وتی سمجگی اِنت ءُ مارا اے کار گوں ایمانداری ءَ کنگی اِنت۔ یک شپے ما کُل سنگت نندوک تاں ءُ فتح اسکواڈ ءِ بابت ءَ گپ بوھگ ءَ اَت ۔گڑا یک سنگتے بھارو ءَ جُست کنت کہ “کمانڈو تو فتح اسکواڈ ءَ بھر زورے کہ ناں ؟ پسو داتے کہ ،ناں ما دگہ سوچ ءِ مالکاں۔ سنگت اں کندت۔ او اڑے بھارو ترا دژمن ءَ چو زوت مارا چہ جتا کُت بلے تئی ھیشتگیں یات ءُ گپ انگت گوں ایر اَنت۔ھمے دوا کناں گوں رب ءَ کہ ھمے وڑیں مردی شھادتے تو کَٹ اِت ،ھمے وڑیں شھادت ءَ مئے ھم نسیب ءَ بات ءُ مئے پگر گوں تئی پگر ءَ بندوک بات تاں آجوئی۔
بھارو نمیران انت
حسن جان نمیران انت
کل شھید نمیران انت
بلوچستان نمیران انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں دو روچ پیش ماں صالح آباد ءَ ایرانی چیریں ادارھاں سَے مردم آوار جنگ ءَ پد بیگواہ کتگ اَنت-

گیشیں ھالانی رد ءَ استان خراسان رضوی ءِ ھند صالح آباد ءَ سَے مردم آوار جنگ ءَ پد ناشناسیں جاھاں برتگ اَنت-

آوار جنگ بیتگیں مردمانی پجار گل مھمد دروگر ء رھمان، ھادی گورگیج ء عبدالرھمان ءُ مھمود پوریان گورگیج ء اھمد ءِ ناماں زانگ بیتگ اَنت-

اھولانی رد ءَ اے مردم ایرانی چیریں ادارھاں جتا جتائیں جاھاں آوار جتگ ءُ بیگواہ کتگ اَنت-

ھالانی رد ءَ گوشگ بیتگ کہ اے مردم آوار جنگ ءَ پد صالح آباد ءِ زندان ءَ برتگ اَنت ءُ پد ءَ دیم پہ مشھد ءَ برتگ اَنت ءُ پد آیانی بارو ءَ دگہ اھوال دیم ءَ نیتکگ اَنت-

ھالانی رد ءَ گوشگ بیتگ گل مھمد در صالح آباد، ھادی گورگیج کاریزک ءُ برجک ءَ آوار جتگ ءُ برتگ اَنت-

ترکی ءِ سروک رجب طیب اردوغان یک تاکتوریں سیکورلر حریپے ءِ ھلاپ ءَ وتی سیاسی زندگی ءِ جنگ ءَ پیش استنبول ءِ راجدپتر ءَ اتکگ بیرگ آ صوفیہ مسیت ءُ بیوکیں دویاں بھر زور ایت اِنت-

ھال سر کنوکیں پرانسیسی ادارہ اے ایف پی ءِ رد ءَ شست ءُ نُھ سالیگیں ترک سروک وتی دود ءِ پاسداری ءَ کنت ھما کہ عثمانء سلطان ءَ وتی مردماناں جنگ ءَ روان دیگ ءَ پیش پاسداری کتگ اَنت – اردوغان یک شمبے ءِ روچ ءَ بیوکین پارلیمانی ءُ سروکی گچینکاری ءِ واستا تیار اِنت-

آئی ءَ ایشی ءَ پیز توانمندی ءُ ھمسنتی ءِ دیمپانی نہ بیتگ کہ اے وھد ءَ ریٹائرڈ سرکار ءِ ملازم کمال قلیچ داروغلو ءِ چیرداتی ءَ شش ٹولیانی ھمسنتیں پاٹی ءِ دیمپانی اِنت-

رجب طیب اردوغان بیست ءَ یک سال ءَ وتی بگیر دار بھر ءُ بانگ کتگ اَنت یکے ءَ پد گچینکاری ءِ سوبمندی ءَ اتکگ بلے آئی ءِ اسلامی بنیاد ءِ ایر کنوکیں پاٹی آئی ءِ دومی ھاکمانی وھد ءَ ڈیھ ءَ ناگیگیں جاورانی ءُ شھریانی آجوئی ءِ سر ءَ بندش جنگ ءِ سبب ءَ گزبانی دیمپانی کنگے کپتگ-

اپوزیشن ءِ شش ٹولیانی پاٹیاں وتی سیاسی ءُ دودمانی بگیرداری ءِ دیمپانی کنان ءَ دست ماں دست بوتگ ءُ پرچاکہ آیانی یکیں لوٹ بیتگ کہ اردوغان واکداری ءَ روان دیگی اِنت-

اے ھمسنتی ءَ ڈیھ ءَ کردانی پلامرزی ھم گون اِنت – اے ٹولی دہ درسد ووٹ دار اَنت – کچ ءُ کساساں ترک ءِ سروک ءِ ھک ءَ نہ اَنت گیشتر پقلز ءَ وتی سیکولر حریف ءَ لھتے پوائنٹس جھل اَنت-

کمال قلیچ داروغلو ءُ نی ترندی ءَ پنجاہ درسد پروشگی اِنت ءُ بیست ءُ ھشت مئی ءَ رن آف ءَ رکگ ءِ جھد ءَ کنگ اِنت کہ اردوغان ءَ دوبر مھکم کنگ ءُ چیڑینگ ءِ دوبر برانز دیگ ءَ کمک کنت-

دومی نیمگ ءُ ترک ءِ سروک ءُ آدینگ ءِ شپ ءُ ٹی وی ءَ ھما وھد ءَ ناگیگیں جاورانی دیمپانی کنگ کپتگ وھدیکہ آئی ءَ جست کنگ بیتگ تو بر پرشتے گڑا چی کن ئے ؟ – آئی ءَ گوشتگ ات پسوا اے اھمکیں جستے-

ما واکداری ءَ جمھوری رنگ ءُ مھلوک ءِ لوٹانی پد ءَ اتکگ اِنت وھدیکہ مھلوک وتی مازگی ھیالاں مٹ کنت گڑا ھما کہ جمھوری کنت ما ھمائی ءِ چیر ءِ ساھگ ءَ روان بہ ایں –

چہ بلوچستان ءَ شومک ءِ نادراھی ءَ آماچیں یک دگہ مردمے بیران بوتگ –

ھالانی رِد ءَ کیچ ءِ دمگ بلیدہ ءَ سیادی داروکیں کسانسالیں جنکو آمنہ بی بی شومک ءِ نادراھی ءِ سوب ءَ کراچی ءَ الاج بوتگ کہ مروچی شمبے ءِ بیگاہ ءَ آئی ءَ کوڈھیں امروز یل داتگ –

زانگ بہ بیت بلوچستان ءَ شومک ءِ نادراھی سک باز تالان بوگ ءَ انت –

چہ کیچ ءَ گوستگیں سال ءُ ھمے سال ءَ شومک ءِ بازیں نادراھے رپورٹ بوتگ وھدیکہ آھانی تہ ءَ بیران بوتگیں مردمانی کچ ھم سک باز انت –

تربت ءَ ھوار بلوچستان ءِ ایندگہ دمگانی چاگردی باسک ھمک وھد ءَ پہ شومک ءِ نادراھجاھے ءِ ھاتر ءَ توار چست کنگ ءَ انت بلے سرکار ءِ نیمگ ءَ ایشی ءِ سر ءَ ھچ دلگوش دیگ بوگ ءَ نہ انت –

ناسرجمیں ھالانی رِد ءَ چہ کیچ ءَ اے وھدی دوازدہ مردماں گیش شومک ءِ نادراھی ءِ آماچ انت ءُ الاج کنگ ءَ انت کہ آھاں سرکار ءِ انڈومنٹ فنڈ ءَ چہ الاج ءِ ھاتر ءَ کمک کنگ بیت بلے لھتے وھد انت کہ آھانی کھول گلگ کنگ ءَ انت کہ بلے اے فنڈ پہ لس نادراھانی ھاتر ءَ جنجال ءِ جوڈ کتگ ءُ چریشی ءَ آ بازیں دلسیاھیانی دیمپانی ءَ کنگ ءَ انت –

بلوچ لبریشن آرمی ءِ جارکش جیئند بلوچ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات ءِ دمگ ھربوئی ءَ تیل ءُ گیس شوھاز کنوکیں پُلپانچیں شرکت ءِ پھازگی دیوکیں زورگریں پاکستانی پوج ءِ کارندہ نشانگ کتگ اَنت-

جارکش ءَ گْوشتگ کہ بی ایل اے ءِ سرمچاراں پُلپانچیں شرکت ءَ پھازگی دیوکیں کارندھانی سر ءَ ھربوئی ءَ پیسر ءَ راہ بستگ ءُ اُرش کتگ، اُرش ءِ آسر ءَ دُژمنیں کارندھاں جانی ءُ مالی تاوان چست کنگ کپتگ-

آئی ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت- ما پیسر ءَ تچک کتگ گْوشتگ کہ بلوچستان ءَ بلوچ راجی مڈیانی لُٹ ءُ پُل ءِ ھاتر ءَ ھچ وڑیں پُلپانچیں شرکتاں اجازت نہ دئیں- زورگریں پاکستانی پوج ءُ آیانی ھمکاریں شرکتانی سر ءَ مئے اُرش برجاہ بنت-

بلوچستان ءِ بنجاھی شھر شال ءَ بیگواھیں مردمانی پانکنجیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنج ھزار ءُ چِل ءُ سَے روچ سرجم بوتگ انت –

مروچی چہ سوراب ءَ محمد عالم بلوچ، عبدالحمید بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ استان ءُ آئی ءِ کمکار بلوچستان ءِ کنڈ کنڈ ءَ ھر ھما توار ءَ ایرموش کنگ لوٹ انت کہ پہ ھک ءُ راستی ءِ ھاتر ءَ چست بوگ ءَ انت –

آئی ءَ گوشتگ کہ شال ءِ تنکیں دمکاں مانشانتگیں ژند ءُ ژامبلوکیں بدن ءَ کپتگیں ریاستی زوراکی ءُ گوات ءِ بواں ھواریں دنز ءُ لوڑ انسان ءَ پدرھین اَنت لھتے ماھاں وھد وھد ءَ زوالی تچک اِنت ریاستی ناشری ءُ راجی ءُ نسلی بنچُک ءَ نشانگ کنگ ءِ ترس ءَ سماہ کنگ بیت اِنت-

آئی ءِ گوشگ ات کہ اے گریبی ءُ مھکومی بلوچستان ءِ ایندگہ ھند ءُ دمگاں چدو گیشتر انت ، ھپتاد ءُ پنچ سالاں گیش پاکستان ءِ زورگپتی ءَ بگر تاں ھنو پاکستانی استان ءُ آئی ءِ دمگی دلار ھند ءُ دمگاں مھلوکانی سر ءَ زوراکی کنگ ءَ انت –

ماما ءَ گوشتگ کہ استان ءُ ایردستیں راجانی جنگانی تہ ءَ بلوچستان ءَ گیشتر ھون ریچی بوتگ ءُ اے ملک ءِ گوستانک ءِ تہ ءَ بلوچانی پرایمنیں جھد دلیری ءَ گوں کنگ بوتگ – بلوچستان ءِ مزنیں بھرے ءِ سر ءَ پشتون جھمنند انت آ ھم چو بلوچانی وڈا ازیت ءِ آماچ انت ءُ اے مردم ایمنی ءَ گوں ھکجاہ بوتگ انت ءُ ھستیں وھد ءَ پیداک کنگ بوتگیں بازیں شیطانی شور بندی ھم اشاں ھاکاں ھوار کتگ انت –