TBP Balochi

بلوچستان ءِ باپاری شھر ھب ءِ ھند پلال گوٹھ ءَ ناشناسیں مردماں تیرگواری کرتگ ءُ یک ورنایے کُشتگ-

ریسکیو بنشون ءِ رد ءَ باپاری شھر ھب ءِ ھند پلال گوٹھ ءِ نزیک ءَ ھبدہ سالی ئءں راھب الی ء عبدالحمید جھمنند ڈیرہ مراد جمالی ناشناساں تیرباران کُتگ ءُ کُشتگ-

وئیل ءَ پد سلاہ بند تچگ ءُ روگ ءَ سوبمند بیتگ اَنت-

ھب پولیس وئیل جاہ ءَ سر بیتگ ءُ لاشے چِست کتگ ءُ میر گلام کادر ھسپتال ءَ رسینتگ ات ءُ وئیل ءِ پَٹ ءُ پول پولیس ءَ بندات کتگ-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءِ توک ءَ پنجگور ءَ پوج ءِ سر ءَ بیتگیں اُرش ءِ زمہ واری من اتگ-

جارکش ءَ گوشتگ کہ گوستگیں بیگاہ ءِ شپ ءِ ھشت ءَ پنجگور ءِ بنجاھی بازار ءَ چتکان ءَ کلم چوک ءَ پاکستانی پوج ءِ چوکی ءِ سر ءَ دزبمبے چگل داتگ –

دزبمب چوکی ءِ توک ءَ کپتگ ءُ یک پوجی کارندھے مرتگ-

میجر گوھرام بلوچ ءَ گوشتگ بی ایل ایف اے اُرش ءِ زمہ واری ءَ من ایر ءَ بلوچستان ءِ آجوئی ءَ داں اُرش برھاہ بنت-

روکپتی بلوچستان ءِ بنجاھی شھر زاھدان ءَ ایرانی لشکر ءَ یک ورنایے آوار جنگ ءَ پد بیگواہ کتگ –

گیشیں ھالانی رد ءَ آوار جنگ بیتگیں مردم ءِ پجار امین جھمنند زاھدان ءِ نام ءَ زانگ بیتگ-

ھالانی رد ءَ گوشگ بیتگ کہ آ وتی لوگ ءِ گور ءَ روگ ءَ بیتگ کہ چیریں ادارھانی کارمنداں دزگیر کتگ ءُ پد ءَ ناشناسیں جاھاں برتگ-

آوار جنگ بیتگیں ورنا ءِ درگت ءَ چیریں ادارھانی نیمگ ءَ تنی وھدی دگہ گپ دیم ءَ نیتکگ اَنت-

زانگ بہ بیت گوستگیں شپ ءَ ھم ھاش ءَ یک لوگے ءِ سر ءَ پولیس ءُ چیریں ادارھاں بیڑ برتگ ات ءُ پد ءَ ھردوکیں نیمگاں تیرگواری بندات بیتگ ات داں سھب ءِ بامسار ءَ انگیر پروشگ بیتگ ءُ جنگ ءُ چوپ ھلاس بیتگ –

اے بیڑ ءَ ایرانی اطلاعات ءِ یک آپیسرے ءَ ھوار دو کارندہ کُشگ بیتگ ات اَنت ءُ ھمے وڑ ءَ دومی نیمگ ءِ سلاہ بنداں ایرانی پولیس ءِ کارندھانی لوگی داشتگ بیتگ اَنت ءُ پد دمگی سروکانی مانزمانی ءَ مردم یل کنگ بیتگ اَنت ءُ سلاہ بنداں وت ءَ کش اتگ-

ھمے وڑ ءَ گوستگیں روچ ءَ ایرانشھر ءِ ھند جمال چاہ ءَ ھم پولیس ءَ یک لوگے ءِ سر ءَ بیڑ برتگ ات ءُ اود ءَ کس کُشگ بیتگ اِت اَنت-

زانگ بہ روکپتی بلوچستان ءَ بندات بیتگیں زھرشانیاں پد اود ءَ مردمانی آوار جنگ ءُ بیگواہ کنگ ءِ درچ یکشل ءَ برجاہ اَنت-

بلوچستان ءِ بُجاھی شھر شال ءُ پنجگور ءَ بیتگیں دو جتائیں وئیلاں دو کسانیں زھگاں ھوار شش مردم بیران ءُ ھشت ٹپی بیتگ اَنت-

ھالانی رِد ءَ شال ءِ دمگ سریاب دگ ءَ دو ٹولیانی میان ءَ جنگ ءُ چوپ ءِ آسر ءَ چار مردم بیران وھدے کہ ھشت ٹپی بیتگ اَنت-

بیران بیتگیں مردمانی پجّار غلام فاروق ء حاجی بور جان لھڑی ، محمد دین ء حاجی بور جان ، محمد حنیف ء حاجی بور جان ءُ نصراللہ ء حاجی بور جان نام ءَ چہ بیتگ اَنت-

ٹپیانی تہ ءَ عبدالوحید ء یار محمد ، احمد دین ء جعفر خان ، بابل ء بور جان ، حاجی شاھنواز ء بور جان، جلال ء بور جان ، مزمل ء جلال خان ءُ شیر محمد ء یار محمد ھوار اَنت-

اِھوالکارانی رِد ءَ ٹپیانی تہ ءَ یک زالبولے ھم ھوار اِنت کہ آئی ءِ پجّار نہ بیتگ-

دومی نیمگ ءَ پنجگور ءِ دمگ تسپ ڈمب ءَ دو بچکو کہ آیانی پجّار یاسر ءُ بدل نام ءَ چہ بیتگ اَنت کہ آ جان شودگ وھد ءَ بُک اِتگ ءُ بیران بیتگ اَنت-

دوئیں بچکو برات اَنت کہ آیانی اُمر سیزدہ ءُ یازدہ گوشگ بوگ ءَ اِنت-

بولان ءَ ریل ءِ پھاٹک ءِ تراکینگ ءِ ذمہ واری بی ایل اے ءَ من اِتگ، وھدیکہ پنجگور ءَ پوج ءِ سرءَ بیتگیں دستی بمب اُرش ءِ اُرش ءِ ذمہ واری بی ایل ایف ءَ زُرتگ۔

بلوچ لبریشن آرمی ءِ جارکش جیئند بلوچ ءَ رسانکدرءَ شنگ کُتگیں درشانے تہءَ گُشتگ کہ مئے سرمچاراں گوستگیں روچاں بولان ءِ ھنکین مشکاف ءَ تراک ناکیں شورو کَڈ کتُگ ءُ ریل ءِ پھاٹک ءِ یک مزنیں بھرے تباہ کُتگ۔ اے اُرش ءِ ذمہ واری ءَ بی ایل اے من ایت۔

جارکش ءَ گُشتگ کہ بلوچ لبریشن آرمی اے پدر کنت کہ بلوچ سرڈگار ءِ سرجمیں آجوئی ءَ داں، زور گریں پوج، آئی داشتگیں ھندی چاریگ ءُ پوجی ھژدری داروکیں شور بندیانی سرءَ مئے اُرش برجاہ بنت۔ بلوچ مھلوک پھازیتگیں دیری بہ دار اَنت دانکہ کجام ھم اُرش ءِ دروشم ءَ جانی ءُ مالی تاوان ءَ چہ دیر بہ بنت۔

بلوچستان لبریشن فرنٹ ءِ جارکش میجر گہرام بلوچ ءَ شنگ کُتگیں درشانے تہءَ گُشتگ کہ سرمچاراں زیک شمبے ءِ روچ ءَ، بیگاہ ءِ ادار ھشت نیم ءَ پنجگور ءِ بنجاھی بازار چتکان ءَ قلم چارراہ ءِ سرءَ پاکستانی پوج ءِ بنجل ءِ سرءَ دستی بمب ءَ گوں اُرش کتُگ۔ دستی بمب ءِ پانگس ءِ تہءَ کپتگ کہ چریشی ءَ یک پوجی کارندہ ءِ مُرتگ۔

جارکش ءَ گُشتگ کہ بی ایل ایف اے اُرش ءِ ذمہ واری ءَ من ایت۔ بلوچستان ءِ آجوئی ءَ داں مئی اُرش برجاہ بنت۔

بلوچستان ءَ زورانسری آوارجنیانی درگت ءَ جوڑ کنگ بوتگیں کمیشن ءِ شنوائی ءِ میان ءَ اے گپ دیم ءَ آیگ انت کہ جج ءِ نیمگ ءَ بیگواھیں مردمانی کھولانی گوم ءَ در انسانی رویش دارگ بوگ ءَ انت –

ھالانی رِد ءَ شال ءَ کمیشن ءِ جج ریٹائرڈ فضل الرحمان ءَ بیگواھیں بلوچ باسک راشد حسین ءِ مات ءِ گپ گوش نداشتگ ءُ آمیدگسی کار ماٹو کتگ انت –

اے درگت ءَ ماں چاگردی ترامجاھاں بیگواھیں بلوچ باسک راشد حسین گھار فریدہ ءَ بلوچ ءَ گوشتگ کہ گوستگیں روچ ءَ ماں شال ءَ بیگواھیں مردمانی کمیشن ءَ زورانسری آوار جنگ بوتگیں آئی ءِ برات ءِ درگت ءَ آئی ءِ مات ءِ پیشی بوتگ بلے پدا ھم کمیشن ءِ جج فضل الرحمان ءَ اے میان ءَ کیس ءِ گوشدارگ ءِ بدل ءَ آئی مات ءِ گوم ءَ در کانودی ءُ در آمیدگسی رویش داشتگ ءُ آ گوشنداشتگ –

آئی ءَ گوشتگ کہ کمیشن ءِ جج فضل الرحمان ءَ راشد حسین ءِ کیس ءَ باز رند ءَ آئی ایس آئی والا آمیدگس ءَ لوٹاریں اِتگ انت ءُ منی مات بیھار داتگ –

آئی ءَ اے الزام ھم جتگ کہ اے جج ءِ ھمراھی ءَ مدامی پنچ یا شش چیریں ادارھانی کارمند آمیدگس ءَ پیشی ءِ میان ءَ کائنت ءُ بیگواھیں مردمانی کھولاں بے نپیں جست کن انت ءُ آھاں دلسیاہ کن انت –

زانگ بہ بیت جسٹس ریٹائرڈ فضل رحمان سال دوھزار ھژدہ ءَ وفاقی سرکار ءَ بلوچستان ءَ بیگواھیں مردمانی کمیشن ءِ سنئیریں باسک کتگ چدوپیسر آ بلوچستان ہائی کورٹ ءُ فیڈرل شریعت کورٹ ءِ جج بوتگ ءُ بیگواھیں مردمانی کمیشن ءِ سروکی ءَ ابید الیکشن کمیشن ءِ باسک ھم بوتگ –

اے درگت ءَ بلوچ نیشنل مومنٹ ءِ انسانی ھکانی ادارہ “پانک” ءَ گوشتگ کہ بلوچستان ءَ زورانسری آوار جنگ بوتگیں مردمانی درگت ءَ جوڈ کنگ بوتگیں کمیشن ءِ تہ ءَ فضل الرحمان ءِ وڈیں پوجی ججانی ساڑی بوگ گیشتر دلسیاھی سوب جوڈ بوتگ – کمیشن جج ءَ وتی زھگ ءِ آوار جنی ءِ کیس ءِ میان ءَ یک گمزگیں ماتے ءِ کمشرپی کتگ کہ آ انسانی وقار ءِ بگیری دارگ ءِ زانگ بیت –

آئی ءَ گوشتگ کہ بیگواھیں مردمانی کمیشن ءَ فضل الرحمان وڈیں ججانی آرگ ھمے پدر کنت کہ استان بیگواھیں مردمانی یل کنائینگ ءَ ھچ سنجیدگ نہ انت –

ہیومن رائٹس کونسل ءِ جارکش عبداللہ عباس ءَ اے وئیل ترندی ءَ گوں ایرجتگ ءُ گوشتگ کہ زورانسری آوار جنگ بوتگیں مردمانی درگت ءَ جوڑ کنگ بوتگیں کمیشن ءَ نشتگیں اے جج ءَ چدوپیسر ھم بازیں بیگواھیں مردمانی کھولانی گوم ءَ اے وڑیں رویش داشتگ – بیگواھیں مردمانی کمیشن ءَ روچ مروچی یک مردمے ءِ کیش ھم گیشگوار نہ کتگ اے کمیشن بس بیگواھیں مردمانی کھولاں کم شرپ کنگ ءِ ھاتر ءَ جوڑ کنگ بوتگ اے کمیشن ھلاس کنگ بہ بیت –

دومی نیمگ ءَ چاگردی ترامجاھاں بلوچ سیاسی ءُ چاگردی باسک اے لوٹ ءَ.کنگ ءَ انت کہ کمیشن ءِ جج فضل الرحمان اگدہ پچ گرگ بہ بیت ءُ کمیشن ءَ بیگواھیں مردمانی کھولانی گوم ءَ در انسانی رویش ءِ گرءُدار کنگ بہ بیت –

زانگ بہ بیت چدوپیسر ھم بیگواھیں مردمانی کمیشن ءِ گوں بیگواھیں مردمانی کھولاں گوً اے وڈیں رویش دارگ ءِ رپورٹ اتکگ انت کہ اودا بلوچ زالبول ترسینگ بوتگ انت ءُ اے ھم گوشگ بوتگ انت کہ وتی دیم ءَ چادر ءَ دور بہ کن ات –

بلے پدا ھم اے وئیلانی رپورٹ بوگ ءَ ابید ھم ھچ وڈیں گامگیج زورگ نہ بوتگ –

ڈیرہ مراد جمالی ءَ گیرت ءِ نام ءَ زالبولے ءَ ھوار دو مردم کُشگ بیتگ اَنت ءُ جرمکار تچگ ءَ سوبمند بیتگ –

پولیس ءِ رد ءَ ڈیرہ مراد جمالی ءِ وارڈ نمبر یک ءَ میر حسن دگ ءَ ناکو ءَ گیرت ءظ نام ءَ تیرگواری کنان ءَ وتی برات زتک ساجن بی بی ءُ گلزار اھمد پنام ءِ زاھرو تیرگواری کتگ ءُ کشتگ اَنت ءُ وت تتکگ ءُ پولیس ءَ ھال ءِ سر بوگ ءَ وئیل جاہ ءَ وت ءَ رسینتگ ءُ لاش چست کتگ ءُ نادراہ جاہ ءَ برتگ اَنت ءُ اود ءَ اژدری چار ءُ ٹپاس ءَ پد کھولانی ھوالگ ءَ دیگ بیتگ اَنت-

زالبولانی ھلانء واستا کار کنوکیں گیر سرکاری گل عورت فاؤنڈیشن ءِ گوشگ اِنت کہ بلوچستان ءَ ھمک سال ءَ چوشیں وئیل دیم ءَ آیگ ءَ انت کہ اود ءَ زالبول بازیں کچے ءَ گیرت ءِ نام ءَ کُشگ بوگ ءَ اَنت-