TBP Balochi

روکپتی بلوچستان ءِ دمگ سیب ءُ سوران ءُ ایرانشھر ءَ دو مردم دزگیر کنگ ءَ پد بیگواہ کنگ بیتگ اَنت-

گیشیں اھوالانی رد ءَ سیب و سوران ءَ ایرانی چیریں ادارھاں یک مردمے دزگیر کنگ ءَ پد گون وت برتگ کہ چریشی ءَ پد آئی ءِ درگت ءَ دگہ اھوال دیم ءَ نیتکگ اَنت-

آوار جنگ بیتگیں مردم ءِ پجار بیست ءُ چار سالی ئیں ورنا عبدالباسط پرکی ء واھد جھمنند کورناھوت سیب و سوران ءِ نام ءَ زانگ بیتگ-

دمگی اھوالانی رد ءَ چیریں ادارھاں عبدالباسط ءِ سر ءَ سلاہ بندین گلانی ھوار بوگ ءِ بھتام جتگ ءُ برتگ-

ھمے وڑ ءَ چہ ایرانشھر ءَ سَے شمبے ءِ روچ ءَ گوست ءَ نشہ ءِ بھتام ءَ دزگیر کنگ بیتگین ءُ پد ءَ یل بیتگیں مردمے دزگیر کتگ ءُ گون وت برتگ-

اھوالانی رد ءَ آوار جنگ بیتگین مردم ءِ پجات منصور کنبرزئی ءِ نام ءَ زانگ بیتگ-

اھوالانی رد ءَ منصور کنبرزئی ایرانی سال نود ءُ پنچ ءَ نشہ ءِ بھتام ءَ کرد دمگ ءَ دزگیر کنگ بیتگ ءُ چار سال ءَ بندیگ بوگ ءَ پد یل بیتگ-

منصور زاھدان ءِ جھمنند اِنت آ ایرانشھر ءَ روگ ءَ بیتگ کہ پولیس ءِ چوکی ءَ لٹ ءُ کُٹ کنگ ءَ پد گون وت برتگ-

منصور ءِ سر ءَ پولیس ءَ بھتام جتگ ءُ گوشتگ کہ اے مرد ڈیھ ءِ بگیری ءَ کار کنوکیں گلانی ھمکاری ءَ کنگ ءَ اِنت-

زانگ بہ بیت ایرانی پولیس ءَ گوستگیں دو روچ ءَ پیسر ھم جیش العدل ءِ سَے باسکانی دزگیری ءِ ھال داتگ ات بلے آیانی نام پدر نہ کتگ ات اَنت-

کراچی ءِ دمگ لیاری ءَ رینجرز ءِ کارمندانی کوش ءَ گمانی رنگ ءَ بنجاھی جرمکار ءُ شوٹر ءَ ھوار بلوچ آجوئی ءِ جھد ءِ سلاہ بندیں گلانی سَے باسکانی دزگیر کنگ ءِ ٹاہ دیگ بیتگ انت-

پاکستانی پوج ءِ واکداراں ٹاہ دیان ءَ گوشتگ کہ رینجرز ءِ چیرین ونگ ءِ کارمنداں تکنیکی ءِ گون ءَ دو جرمکار کراچی ءِ ھند بلدیہ ٹاؤن ءَ رائیس گوٹھ ءَ دزگیر کتگ انت کہ ایشانی پٹ ءُ پول ءَ پد بنجاھی جرمکار ءِ شوھاز کتگ ءُ بلوچستان ءِ شھر آواران ءَ بیڑ برتگ ءُ بنجاھی جرمکار دزگیر کتگ-

واکدارانی رد ءَ دزگیر کتگیں جرمکار ءَ پرپٹ ءِ پشت ءِ سیٹ ءَ تیرگواری کتگ ءُ رینجرز ءِ کارمند نشانگ کتگ، دزگیر کتگیں جرماکر آواران ءَ ءُ دگہ دو سیادی چہ کراچی ءَ اِنت – جرمکار بلوچستان ءَ آجوئی ءِ سلاہ بندیں گل بلوچستان لبریشن فرنٹ ءَ گوں سیادی کن اَنت-

سکیورٹی بنشون ءِ رد ءَ چیریں ادارھانی کارمند الشاد لیاری ءِ دمگ بھار کالونی ءَ الفلاح دگ ءَ ھپت اگست ءَ تیرگواری کنگ بیتگ ءُ کشگ بیتگ ءُ چریشی ءَ پد جرمکارانی دزگیری ءَ ٹیم شون داتگ-

زانگ بہ بیت اے کارمند ءِ کوش ءِ زمہ واری بلوچستان لبریشن فرنٹ ءَ زرتگ ءُ بلے دزگیریانی درگت ےَ بی ایل ایف ءِ نیمگ ءَ گپ دیم ءَ نیتکگ اَنت-

گدر چھڈی سناڑی ءَ بورنگ چاتے ءَ نُھ سالی زھگے کپتگ ءُ بیران بیتگ – انتزامیہ ءِ جاڑیگی ءَ کمکی کار برجاہ بیتگ اَنت-

گیشیں اھوالانی رد ءَ گدر یوسی چھڈ شیر علی گدر ءِ ھند ءَ سناڑی میتگ ءِ نزیک نُھ سالی ئیں حق نواز سناڑی وتی پساں چارگ ءَ بیتگ کہ ناگتی پنچ سد فُٹی بورنگ ءِ چات ءَ کپتگ ءُ بیران بیتگ-

وئیل ءِ ھال ءِ سر بوگ ءَ دمگدار ءُ دمگی مردماں چات ءَ کپتگیں زھگ ءِ لاش ءِ کشگ ءِ جھد کتگ بلے جوانیں آسراتی ءِ نہ بوگ ءَ مردماں مشکلانی دیمپانی کنگ کپتگ-

دومی نیمگ ءَ ایکسپرٹ استاد شکیل اھمد ریکی ءُ استاد امان اللہ وتی موٹرانی گون ءَ کشگ ءِ جھد اش کتگ –

روکپتی بلوچستان ءِ نامی ئیں عالم دین رھشون مولانا عبدالغفار نقشبندی ءَ چاگردی ترامجاہ ایکس ءَ ھانی گل ءُ آئی ءِ لوگ واجہ سمیر بلوچ ءُ رودراتکی ءِ ھند تربت ءَ نیکراھی ءِ نام ءَ کشگ بیتگیں رؤف ءِ کوش ایر جتگ اَنت-

چاگردی ترامجاہ گوستگیں ٹوئٹر ایکس رودراتکی بلوچستان ءِ انسانی ھکانی باسک ھانی گل ءُ آئی ءِ لوگ واجہ ءِ اکس شنگ کنان ءَ گوشتگ وتی ساہ ءِ رکینگ ءَ روکپتی بلوچستان ءَ اتکگ انت ءُ اد ءَ ھم زالماں پدردیں رنگے ءَ کُشتگ اَنت-

آئی ءَ کشندھاناں جست کنان ءَ گوشتگ کہ اسلام ءِ بیرک ءِ چیر ءَ اے وڑیں زلم چون کنگ بیت اِنت-

آئی ءَ وتی ایکس ءَ نبشتگ کنان ءَ اے وئیل ترندی ءَ ایر جتگ ءُ گوشتگ اے دابیں کوشانی زُلم ھدا ءِ دربار ءَ جست کنگ بنت اِنت-

دومی در ءَ آئی ءَ تربت ءَ نیکراھی ءِ لگتمالی ءِ بھتام ءَ کشگ بیتگیں روف ءِ اکس شنگ کنان ءَ گوشتگ کہ مردماں نیکراھی ءِ نام ءَ اے ورنا کشتگ بلے اے اکس ءِ توک ءَ گندگ بیت اِنت کہ اے ورنا سجدو ءَ کپتگ ءُ ھدا ءِ در ءَ نماز کنگ ءَ اِنت –

آئی ءَ گوشتگ کہ اے نیکراھی ءِ نام ءَ مردماں کشگ ءُ جنگ ءَ اَنت کہ ایشی ءِ یکیں در اِنت اے زیردستیں راج ءِ پُسگ انت ءُ زیردست کنگ بیتگ ءُ آیانی سر ءَ زُلم ءِ آس گوارگ ءَ اِنت-

سر بیتگیں ھالانی رد ءَ روکپتی بلوچستان ءَ تیرگواری وئیلے ءَ سَے مردم بیران بیتگ اَنت ءُ یکے زدگ بیتگ-

گیشیں اھولانی رد ءَ روکپتی بلوچستان ءِ دمگ ایرانشھر ءَ ناشناسیں مردماں تیرگواری کنان ءَ سَے مردم کُشتگ اَنت-

اھوالانی رد ءَ تیرگواری ءِ وئیل ایرانشھر ءِ ھند بیست ءُ دو بھمن بلاک ءَ پیش اتکگ کہ اود ءَ تیرگواری اش کتگ ءُ سَے مردم کُشتگ اَنت ئِے-

تیرگواری ءِ وئیل ءَ بیران بیتگیں مردمانی پجار بشیر ، عادل ءُ یاسر ءِ ناماں زانگ بیتگ اَنت ءُ زدگ بیتگیں مردم ءِ پجار رشید ءِ نام ءَ زانگ بیتگ-

اھوالانی رد ءَ تیرگواری کنوکاں ھما وھد ءَ تیرگواری کتگ کہ اے مردم وتی گاڑی ءَ سوار بوگ ءَ بیتگ اَنت کہ ناشناساں جتگ اَنت ءُ تتکگ اَنت-

تیرگواری ءَ عادل ءُ بشیر ھما جاہ ءَ بیران بیتگ انت ءُ یاسر زدگ بیتگ ءُ ھاتم الاانبیاء ھسپتال ءَ برگ ءِ وھد ءَ آئی ءَ وتی ساہ داتگ اَنت ءُ رشید ماں ھاتم الاانبیا نادراہ ءَ ٹپانی درمانی ءَ برگ بیتگ ءُ اود ءَ آئی ءِ جاور ناگیگ گوشگ بوگ ءَ اَنت –

تیرگواری ءِ سبب زانگ نہ بیتگ ءُ کشوک تچگ ءُ روگ ءَ سوبمند بیتگ اَنت- روکپتی بلوچستان ءَ اے دابیں وئیل یکشل ءَ پیش آیگ ءَ اَنت-

سربوتگیں ھالانی رِد بلوچستان جتا جتائیں ھند ءُ دمگاں تیرگواری ءُ بمب تراک ءَ پولیس ءُ سی ٹی ڈی کارمند زدگ بوتگ انت وھدیکہ یک نودربرے بیران بوتگ، دومی نیمگ ءَ ھب چوکی، مستونگ، ھزدار تیرگواری ءُ دگ ءِ وائیلاں سینزدہ مردم زدگ ءُ دو بیران بوتگ انت –

گیشیں ھالانی رِد ءَ ھزدار ءَ تیرگواری ءُ تراک ءِ دو جتائیں وئیلاں یک نودربرے بیران بوتگ –

کُشگ بوتگیں نودربرے پجار انجینئرنگ شھدربرجاہ ءِ نودربر فقیر محمد پنام ءِ بابل ءِ نام ءَ بوتگ – بلے تنی وھدی وئیل ءِ درگت ءَ.ھچ وڈیں سرپدی نہ رستگ کہ کجام سوب ءَ جنگ بوتگ –

ھالانی رِد ءَ ھزدار ءِ دمگ شھزاد سٹی دگ ءِ نزیک ءَ تراکناکیں شوروانی تراک ءَ پولیس گاڑی ءَ تاوان رستگ وھدیکہ گاڑی ڈرائیور اسداللہ زدگ بوتگ –

مستونگ ءَ سربوتگیں ھالانی رِد ءَ تھانہ ولی خان ءَ پڑنگ آباد ءَ سی ٹی ڈی ءِ کارمندانی سر ءَ تیرگواری کنگ بوتگ ءُ چریشی ءَ یک کارمندے سک زدگ بوتگ پہ جاندراھی ءِ ھاتر ءَ شال ءَ دیم دیگ بوتگ – زدگ بوتگیں کارمندے پجار نادر ءِ نام ءَ بوتگ –

چہ ھاران ءَ ھم تیرگواری ءِ ھال آیگ انت کہ سلاہ بندیں مردمانی تیرگواری ءَ ٹکی رھشون حاجی غلامی نبی زدگ بوتگ –

ھمے وڈ بلوچستان ءِ باپاری شھر ھب چوکی ءَ ساکران 2 ءِ نزیک ءَ ناشناسیں مردمانی تیرگواری ءَ یک مردمے بیران بوتگ –

دگہ وئیلے ھزدار باگبانہ ءَ گریڈ اسٹیشن ءِ نزیک ءَ بوتگ کہ پرپٹے ءَ گوں گاڑی ءَ ڈیک وارتگ چریشی ءَ یک مردمے بیران ءُ یکے زدگ بوتگ زدگ ءُ بیران بوتگیں ھردو مردم ٹیچنگ نادراھجاہ ءَ برگ بوتگ انت –

دومی نیمگ ءَ شال تاں کراچی ءَ رؤکیں شھدگ لکپاس ءِ نزیک ءَ پک اپ گاڑی ءِ ٹیر ءِ ترکگے سوب ءَ چپی بوتگ، وئیل ءَ دوازدہ مردم زدگ بوتگ انت –

وئیلے آماچ بوتگیں مردم ریسکیو کارمنداں زدگ بوتگیں مردم غوث بخش رئیسانی نادراھجاہ ءَ برگ بوتگ انت –

چہ کیچ ءَ ھمے ھال آیگ ءَ انت دشت ءِ دمگ بلنگور ءِ میتگ دلسرد میتگ ءَ ناشناسیں مردماں مروچی سھب ءَ موبائیل ٹاور تیر جتگ ءُ آئی ءِ مشین ءُ دگہ ازباب مانداشتگ انت –

سربوتگیں ھالانی رِد ءَ شال ءِ جھمنندیں ورنائیں نودربرے چہ پاکستان بنجاھی شھر اسلام آباد ءَ بیگواہ کنگ بوتگ، دومی نیمگ ءَ کیچ ءِ بنجاھی شھر تربت ءَ ھم یک ورنایے زورانسری آوار جنی ءَ پد بیگواہ کنگ بوتگ –

گیشیں ھالانی رِد ءَ کیچ ءِ بنجاھی شھر تربت کھن پُشت ءَ یک ورنایے زورانسری آوار جنی ءَ پد بیگواہ کنگ بوتگ – آوار جنگ بوتگیں ورنایے پجار دادا رحیم ء الیاس ءِ نام ءَ چہ بوتگ –

ھالانی رِد ءَ دادا رحیم ھمے سال ءِ بیست ءُ سَے اگست ءِ بیگاھے ادار پنچ ءَ ناشناسیں گاڑی سواراں چہ کھن پُشت کنشکلات ءَ زورانسری آوار جتگ ءُ بیگواہ کتگ –

ھمے گوشگ بوگ ءَ انت کہ دادا رحیم بارڈر ءِ سرا ٹیل کشی ءِ باپاری ءِ بوتگ-

دومی نیمگ ءَ ھمے روچ ءَ بزاں بیست ءُ سَے اگست ءَ چہ اسلام آباد ءَ ھم شال ءِ جھمنندیں یک نودربرے ءِ بیگواھی ءِ ھال انت – آئی ءِ پجار حضرت عمر ناصر ءِ نام ءَ بوتگ –

بیگواھیں ورنایے برات ءِ گوشگ انت کہ آ سی ڈی اے اسلام آباد ءَ سول انجینئر ءِ بوتگ، سی ڈی اے اسلام آباد ءَ واتر فیض آباد ءِ نیمگ ءَ آیگ ءَ بوتگ کہ بیگواہ انت –

بیگواہ بوتگیں مردمے برات عجب خان ناصر ءِ رِد ءَ آئی برات بیست ءُ سَے اگست چہ بیگواہ انت آئی ءِ ھچ وڈیں ھال اھوال نیست –

روکپتی بلوچستان ءِ بنجاھی شھر زاھدان ءَ ھوار راسک، ھاش، سرباز ءُ دگہ دگہ جاھاں مولانا فتح مھمد نقشبندی ءِ بیگواھی ءِ ھلاپ ءَ زھرشانی کتگ –

زھرشانی کنوکاں زاھدان ءَ نماز ءَ پد روانکی دروشم ءَ زھرشانی کنان ءَ ایرانی سرکار ءِ ھلاپ ءَ،’مرگ بر دیکتاتور ‘ ءِ اوگام جتگ بیتگ-

زھرشانی کنوکاں دزنویسیں تاک چست کتگ کہ آیانی سر ءَ پارسی زبان ءَ ’آزادی زندانیان سیاسی، آزادی مولوی نقشبندی ‘ ءِ نام نبشتگ بیتگ اَنت-

مھلوک ءَ ھاش ءُ راسک ءَ ھم زھرشانی کتگ ءُ اود ءَ روانکی دروشم ءَ روانک کش اتگ ءُ مولانا نقشبندی ءِ بیگواھی ءِ ھلاپ ءَ زھرشانی کتگ بیتگ-

ایشی ءِ ھواری ءَ سرباز ءَ ماں مولانا فتح مھمد نقشبندی ءِ بیگواھی ءِ ھلاپ ءَ دگ بند کتگ ءُ روڈ ءِ سر ءَ ٹائر مانداشتگ بیتگ-

زانگ بہ بیت مولانا فتح مھمد نقشبندی بیست اگست ءَ ماں چھبار ءَ روگ ءِ وھد ءَ ایرانی لشکر ءَ دزگیر کتگ ءُ برتگ –

روکپتی بلوچستان ءَ گوست ءَ ھم عالم دین دزگیر کنگ ءُ برگ بیتگ اَنت کہ آیانی سر ءَ ایرانی سرکار ءِ بھتام اِنت ڈیھ ءِ ھلاپ ءَ پرکار اَنت ءُ چریشی ءَ سنی ءُ شیعہ نیکراہ ءِ سر ءَ گیشیں ایراد ھست اَنت –

گوستگیں روچ ءَ ایرانی پولیس سپاہ ءَ وتی ٹیلگرام چینل ءَ گوشتگ بیتگ کہ بیھاری دروشم ءَ گوشتگ کہ فتح مھمد نقشبندی دزگیر کتگ ءُ نی عبدالحمید ءُ عبدالغفار ھم دزگیر کنگ بنت اِنت-

بلوچستان ءِ دمگ سوراب ، کیچ ءُ ھب ءَ سلاہ بندیں مردمانی تیرگواری ءَ چہ زالبول ءَ ھوار چار مردم بیران بیتگ اَنت یک لاشے دزکپتگ ءُ یکے ٹپی بیتگ-

سوراب ءَ تیرگواری ءِ وئیل کلی رودینی بالینہ ءِ ھند ءَ بوتگ ، تیرگواری ءَ چہ کُشگ بیتگیں مرد ءُ زال اَنت کہ آیانی پجّار مھمد ھیات ءُ آئی ءِ لوگ بانُک ھوار اَنت-

دمگی مردمانی گْوشگ اِنت کل کُشگ بیتگیں واشک ءِ دمگ بیسمہ ءِ جھمنند اَنت ، کہ آیاں چیزے وھد ءَ ساری تتکگ ءَ دوستی ءِ آروس کتگ-

مردمانی رِد ءَ جنک ءِ پت ءَ دگہ مردمانی ھمراھی ءَ ھوار بیتگ ءَ تیرگواری کتگ کُشتگ اَنت ، پولیس ءَ لاش دستیگ کتگ اَنت ڈی ایچ کیو ءَ برتگ اَنت وھدے کہ دمگ انگر ءَ کتگ ءُ کُتکارانی پٹ ءُ پول بندات کتگ-

دومی نیمگ ءَ تربت ءَ چہ ھال اِنت کہ گوستگیں شپ ءِ ساھت یک ءِ نزیک تجابان ءَ ناشناسیں مردمانی تیرگواری ءَ چہ میر دلاور ء واحد بخش نامیں مردمے کُشتگ-

وئیل ءِ سوب زانگ نہ بیتگ-

ھب ءِ دمگ ساکران مائنز نمبر دو ءَ ھب کور نزیک ءَ ناشناسیں سلاہ بندیں دُزاں دُزی ءِ وھد ءَ تیرگواری کتگ ءُ یک مردمے ٹپی کتگ ءَ نادُراھجاہ ءَ برگ ءَ بیتگ اَنت ئِے نیم راہ ءَ ٹپانی درد نہ سگ اِتگ ءُ بیران بیتگ-

دومی نیمگ ءَ ھب ءَ ساکران دگ مری چوک ءِ نزیک ءَ یک لوگے ءِ تہ ءَ لاشے دزکپتگ کہ آئی ءِ گُٹ ءَ سادے مان بیتگ ءُ درنجوک بیتگ-

لاش ءِ پجّار سی سالی ئیں منظور احمد نام ءَ چہ بیتگ-

پولیس ءِ گوشگ رِد ءَ اے نشہ آماچیں مردمے بیتگ لوگ مردماں دلرنج بیتگ- پولیس ءَ دیمتر ءَ گْوشتگ اے مرد ءَ وتی گُٹ ءَ سادے مان کتگ وتکشی کتگ ءُ لاشے چیزے روچاں کوھن بیتگ-

چین ءِ وزارت ھارجہ ءِ گوشگ اِنت ھندوستان ءِ سروزیر نریندر مودی ءُ چین ءِ سروک شی جن پنگ ءَ برلس ءِ سروکی نیاد ءَ گند ءُ نند کتگ ءُ انیگیں سیادی ءِ درگت ءَ دیم پہ دیم ءَ گپ جتگ –

ھندوستان ءِ روتاک ھندوستان ٹائمز ءِ رد ءَ چین ءِ وزارت ھارجہ ءِ جارکش وانگ وینبن ءَ یک درشانے ءَ گوشتگ کہ سروک ءَ بیست ءُ سَے اگست دوھزار ءُ بیست ءُ سَے ےَ برکس سروکی ءَ نیاد ءِ وھد ءَ ھندوستان ءِ سروزیر نریندر مودی ءَ گوں گپ ءُ تران کتگ-

درشان ءَ گوشگ بیتگ ھردوکیں رھشوناں چین ءُ ھندوستان ءِ انیگیں سیادیانی بارو ءَ دلگوش داری کتگ ءُ دگہ جیڑھانی سر ءَ دیم پہ دیمی گپ جتگ بیتگ اَنت-

سروک شی جن پنگ ءَ کڈنی کنان ءَ گوشتگ چین ءُ انڈیا ءِ ھردوکانی سیادی ءِ گھتری مھلوک ءِ ھمگرنچی ءُ دمگ ءِ واستا ایمنی ءُ نپ ءِ واست ءَ سوبمندی بنت اِنت-

چین ءِ وزارت ھارجہ ءِ تندجاہ ءَ شنگ کنگ بیتگیں درشان ءَ گوشگ بیتگ کہ ھردوکیں نیمگ وتی دو نیمگی سیادی ءِ گمانی سیادی ءِ سر ءَ چار ءُ ٹپاس بہ کن انت ءُ سیمسرانی سر ءَ بیتگیں جیڑہ ءِ گیش ءُ گوار ءَ بہ کن انت دانکہ ھمسنتی ءَ ھردوکانی سیمسراں ایمنی بیاینت ءُ وتی پھریز ءَ بہ کن اَنت-

پشمبے ءِ روچ ءَ ھندوستان ءِ سیکریٹری ھارجہ ونے کواترا یک نیادے ءِ وھد ءَ گوشتگ کہ نریندر مودی ءُ شی جن پنگ ءَ گوں گپ جتگ ءُ لائن آف ایکچوئل کنٹرول (ایل اے سی ) ءِ جیڑہ ءِ ھل نہ بوگ ءَ انڈیا ءِ لیکہ درشان کتگ اَنت-

آئی ءَ گوشتگ سروزیر ءَ اے گپ ءِ سر ءَ کڈنی کتگ کہ سیمسران ایمنی ءِ برجم دارگ ءُ ایل اے سی ءِ مسام ءُ شرپ دارگ انڈیا ءُ چین ءِ سیادی ءَ را دیم ءَ آرگ ءِ درکاری اِنت-

ونے کواترا دیمتر ءَ گوشتگ کہ ھردوکیں رھشونانی نیمگ ءَ سرجمی ءَ جاورھالانی گھتری ءِ آرگ ءَ واکدارانی میان ءَ گپ جتگ ءُ جنگ ءَ نیزور کنگ ءِ سر ءَ تپاک کتگ-

مزنیں سلاھانی واکداروکیں ھردوکیں ڈیھانی جاور پانزدہ جولائی ءَ لداخ ءِ ھند ءَ بیتگیں جنگ ءُ چوپ ءَ جاور ناگیگ بیتگ اَنت چریشی ءَ ھندوستان ءِ بیست پوجی کشگ بیتگ انت-