میان استمانی جانسلامتی ءِ نیمگ ءَ بلوچستان ءِ جانسلامتی آسراتیانی درگت ءَ رپورٹ ءِ تہ ءَ گوشگ بوتگ کہ سرکاری کچ ءُ کساس ءِ رِد ءَ کاگدانی تہ ءَ 1661 نادراھجاہ، بنکی جانسلامتی ءِ بنجل ءُ رورل ہیلتھ سینٹراں ھوار دگہ جانسلامتی ءِ بنجل ھست انت -1404 جانسلامتی بنجل ءُ نادراھجاھانی رپورٹ میان استمانی جانسلامتی ءَ ادارہ ءَ شنگ کتگ ءُ آیانی تہ ءَ 257 جانسلامتی ادارہ زمین ءِ سر ءَ گواہ نہ کنت-
رپورٹ ءِ تہ ءَ گوشگ بوتگ کہ ھشت نادراھجاہ ءُ جانسلامتی بنجل سرجمی تباہ انت ءُ آھانی بجٹ ءُ درمان آیگ ءَ انت ءُ 140 جانسلامتی بنجل پھال نہ انت ءُ آیانی سر ءَ ارباں کلدار ءِ بجٹ دیگ بوگ ءَ انت – 656جانسلامتی بنجل کم باز پھال انت ءُ 220 جانسلامتی بنجلاں کم باز سر بوگ بیت –
چہ ژوب ءَ 68 جانسلامتی ادارہ گار، دومی نمبر ءَ نصیر آباد ءِ 20 گار، سبی ءِ شانزدہ، سینزدہ چہ مکران، نُھ چہ شال، سینزدہ رخشان ءُ نھ جانسلامتی ادارہ چہ کلات ءَ زمین ءِ سر ءَ زاھری نہ دئینت- 87 درسد بلڈنگ مرمت نہ کنگ ءِ سوب ءَ تباہ انت پرچا کہ اے فنڈ کرپشن بنت – 603جانسلامتی بنجلانی تہ ءَ چِل ءُ سَے درسد جانسلامتی آسراتی نہ بوگ ءَ تباہ انت –
وھدیکہ ھستیں 140 جانسلامتی ادارہ سرجمی ءَ پھال نہ انت ءُ 656 ادارہ کمے باز پچ انت – 586 جانسلامتی ادارھانی تہ ءَ ورگی آپ دست نہ کپیت ءُ 399 ادارھاں ھما آپ نیستی ءِ ھساب انت – 457 ادارھاں ھمام ءِ آسراتی نیست ءُ 592ءِ تہ ھما نیستی ھساب انت –
شال ءِ چِل ءُ نھ درسد نادراھجاھاں دستانی ساپ کنگ ءِ آسراتی نیست ھمے وڈ نصیر آباد ءَ پنجاہ ءُ شش درسد، سبی ءَ ھپتاد درسد، ژوب ءَ ھپتاد ءُ یک درسد، کلات ءَ ھشتاد ءُ سَے درسد، مکران ءَ شست ءُ نُھ درسد، رخشان ءَ پنجاہ ءُ نُھ درسد نادراھجاھاں دست شودگی سابون ءِ آسراتی نیست – بلوچستان ءِ 887 جانسلامتی بنجل ءُ نادراھجاھاں میڈیکل اوزارانی شودگ ءِ ھچ آسراتی نیست، 285ادارھانی تہ ءَ کم باز ھست بلے نیستی ھساب انت ءُ بس 82 جانسلامتی بنجلاں اے آسراتی ھست انت –
بزاں کہ الاج ءِ ھاتر ءَ پیکج، مپتی کالا یرقان ءُ ایڈز ءِ آسراتی نشہی سرکار ےَ داتگ انت – 904 جانسلامتی بنجل ءُ نادراھجاھانی گند ءُ گسڈانی مچ کنگ چگل دیگ ءِ ھچ وڈیں آسراتی نیست وھدیکہ ایندگہ بنجلانی تہ ءَ کم باز ھست انت – 809 جانسلامتی بنجلانی تہ ءَ انجکشن جنگ ءَ پد سرنج چگل دیگ نہ بیت وھدیکہ 324 بنجلاں کم باز بیت چریشی ءِ سوب ءَ ہیپاٹائٹس بی، ایڈز، ایچ آئی ءُ دگہ نادراھی شنگ ءُ تالان بنت –
