TBP Balochi

بلوچستان ءِ دمگ چاگی ءَ ریکوڈک پروجیکٹ ءِ تہ ءَ دری کمپنیانی کنٹریکٹر اپسراں چار دمگی بلوچ چہ کار ءَ در کتگ انت –

اھوالکارانی رِد ءَ پوجی نامیں پھازگی کمپنی ءِ یک اپسرے ءَ نوکنڈی ءُ دالبندین ءَ سیادی داروکیں چار ورنا بید سوب ءَ چہ کار ءَ در کتگ انت ءُ آ ھکم داتگ انت کہ پیادگ ءَ ریکوڈک بنجل ءَ در بیا انت –

ھمے گوشگ بوگ ءَ انت کہ چہ کار ءَ در کنگ بوتگیں مردم سواری نہ داتگ انت ءُ آ لاچار کتگ انت کہ گرم سرا پیادگ ءَ بہ رو انت –

دمگی مردماں اے وئیلے بگیری ءَ وتی گوشتگ کہ ادا نسلی تعصب ءُ گنڈہ گردی بوگ ءَ انت بزگریں ورنا پیادگ ءَ دیم داتگ انت چریشی ءَ اے گپ پدر بیت کہ بلوچ ورنایانی نوں ریکوڈک تہ ءَ ھچ گنجائش نیست –

آھانی گوشگ ات کہ چاگی ءِ وتگڑیں نمائندگ ءُ معتبرانی اے زوراکی ءِ سر ءَ ھچ نگوشگ بازیں جست ءِ چست کنت –

بلوچ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ کیچ ءِ ھند میرانی ڈیم ءَ برجاھیں یوفون ٹاور ءِ سر ءَ بوتگیں اُرش ءِ زمہ واری منّ اِتگ –

جارکش میجر گوھرام بلوچ ءِ رِد ءَ سرمچاراں دشت کیچ ءَ میرانی ڈیم ءَ پیرانی لمب ءَ برجاھیں یوفون کمپنی ءِ موبائل ٹاور ءُ مشین مانداشتگ اَنت – اے اُرش آدینگ ءُ شمبے ءِ میانی شپ ءَ کنگ بوتگ –

جارکش ءِ رِد ءَ پاکستانی پوج رھوتکاری کمپنیانی کمک ءَ جیو فنسنگ تکنیک ءَ کارمرد کنت ءُ ھندی آبادی ءُ بلوچ سرمچارانی چست ءُ ایراں چار ایت ءُ دلگوش کن اَنت – نوکیں دور ءَ رھوتکاری نزام ءِ اَرزیشت رَد کنگ نہ بیت ءُ نہ مئے گل رھوتکاری نزام ءَ تباہ کنگ لوٹ ایت بلے پاکستانی پوج چہ مردمانی آسراتیاں وتی پوجی سیتاں کارمرد کنگ ءَ اِنت – بلوچستان ءَ موبائل پون  ٹاورانی کمک ءَ جیو فنسنگ تکنیک ءِ کارمرد کنگ ءَ ابید پاکستانی پوج آیانی سر ءَ کیمرہ ءُ دگہ چاریگی ازباب بستگ اَنت ءُ بلوچ سرمچار ءُ مردماں چار ءُ ٹپاس کنگ ءَ اَنت-

جارکش ءِ رِد ءَ موبائل ٹاورانی ماں سی پیک دگ ءَ مِک کنگ ءِ مول ءُ مُراد بلوچ جھدکارانی ٹریس کنگ ءِ ھواری ءَ ھندی چاریگانی پُرکار کنگ اِنت داں کہ آ دُژمن ءِ آسراتی دیگ ءَ گیشتِر کار کُرت بہ کن اَنت-

گڈسر ءَ بی ایل ایف ءِ جارکش ءَ گوشتگ کہ بلوچستان لبریشن فرنٹ اے اُرش ءِ زمہ واری ءَ منّ ایت ءُ مئے اُرش داں سرڈگار ءِ آجوئی ءَ زورگریں پاکستان ءِ سیتانی سر ءَ برجاہ بنت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کُرتگیں درشانے ءِ تہ ءَ گُشتگ کہ بلوچ لبریشن آرمی ءِ سرمچاراں گوستگیں شپ ءَ شال ءِ دمگ سریاب ، فیض آباد ءَ وتگڑیں پاکستان آزاتی ءِ وشی ءَ برجاھیں مراگشے ءِ سر ءَ دزبمب اُرش ءِ کُتگ کہ اُرش ءَ پد ھمے مراگِش ھلاس کنگ بُوتگ –

جارکش ءِ رِد ءَ اے مراگِش چاردہ اگست ءِ روچ ءَ نہ بوھگ ءِ سوب ءَ بہادر کرد نامیں مردمے ءِ سروکی ءَ مروچی شمبے ءِ روچ ءَ یک وانگ جاھے ءَ زورگیریں وج ءُ چیریں ادارھانی چیر دستی ءَ برجم دارگ بوتگ کہ آئی ءِ مول ءُ مُراد وتگڑیں آزاتی ءِ وشی ءَ بلوچ مھلونک ءِ ھواری پیش دارگ بُوتگ-

جارکش جیئند بلوچ ءِ رِد ءَ اے اُرش بس یک بیھارے بوتگ کہ بی ایل اے ءِ سرمچاراں ھمے جاہ ءَ انچیں وھدے ءَ نشانگ کُتگ وھدیکہ آ جاہ ءَ ھِچ کس نہ بُوتگ – زورگیریں دژمن ءَ چہ اِشی ءَ پیش بلوچستان ءِ جتائیں دمگاں وانگ جاھانی نودربر کارمرز کُرتگ ءُ دُگنیا ءِ دیما “ڈرامہ” یے کُرتگ –

جارکش جیئند بلوچ ءِ رِد ءَ ما زورگیریں پوج ءُ چیریں ادارھانی دست ءَ کار کنوکیں مردماں مکن کنیں کہ آ اے وڑیں کاراں یلہ بِکن انت اگاں نہ آ وتی مالی ءُ جانی تاوانانی زمہ وار وت انت –

روکپتی بلوچستان ءِ دمگ نیکشھر ءَ ناشناسیں مردماں تیرگواری کنان ءَ وانگ جاہ ءِ یک اُستادے کشتگ-

کُشگ بیتگیں مردم ءِ پجار رسول بخش بلوچ ءِ نام ءَ زانگ بیتگ –

اھوالانی رسول مروچی سھب ءَ ماں نیکشھر ءَ یک دمکے ءِ توک ءَ تیرانی آماچ کنگ ءُ کشگ بیتگ-

اھوالانی رد ءَ رسول بکش نیکشھر ءِ ھند رمضان بازار ءَ یک وانگجاھے ءِ استاد بیتگ-

آئی ءِ کوش ءِ سبب تنی وھدی زانگ نہ بیتگ ءُ نانکہ سرکاری تکاں دگہ گامگیج زورگ ءَ گندگ بیتگ اَنت-

زانگ بہ بیت روکپتی بلوچستان ءَ مردمانی کُشگ یکشل ءَ برجاہ اَنت کہ اے سال ءَ داں انگت ءَ چِل ءُ شش مردم تیرانی آماچ کنگ ءُ کُشگ بیتگ اَنت-

بلوچستان ءِ دمگ بولان ءَ گوستگیں روچ ءَ سلاہ بندیں مردماں دو جنک تیرباران کتگ کُشتگ انت –

تیرگواری ءِ وئیل ڈھاڈر ءِ نزیک ءَ فیض محمد گوٹ ءَ بوتگ –

پولیس ءِ گوشگ انت کہ بیست ءُ دو سالی ءُ ھژدہ سالی تیر جنگ ءُ کشگ بوتگ انت – بلے پدا ھم کوش ءِدرگت ءَ ھچ سرپدی نہ رستگ کہ کجام سوب ءَ کُشگ بوتگ انت –

پولیس ءَ جون سول نادراھجاہ ڈھاڈر ءَ برتگ انت کہ اودا ھژدری چار ءُ ٹپاس پد جون کھول ءِ دست ءَ دیگ بوتگ انت –

آپریشن زرپھازگ ءِ سانمندی

ٹی بی پی شونگال

گوادر ءَ چینیانی سر ءَ یکشلیں اُرش برجاہ اَنت، مئی دو ھزار ءُ نوزدہ ءَ گوادر ءِ پرل کانٹینینٹل ھوٹل ءِ سر ءَ اُرش کُت ءُ مجید بریگیڈ ءِ چار اُرشکاراں بیست ءُ چار ساھتاں گیش ھوٹل وتی دستیگی ءَ کُتگ اَت، اگست دو ھزار ءُ بیست ءُ یک ءَ چینی انجینئرزانی گاڑی ءِ سر ءَ دگہ یک پدائی اُرشے کنگ بیتگ اَت ءُ گوستگیں روچاں مجید بریگیڈ ءِ دو “پدائی آں” چینی انجینئرانی کاروان اُرش ءِ نشانگ کُتگ اَت۔

بلوچ راجی آجوئی ءِ جُنز ءَ بندوکیں سلاہ بندیں گل ءُ سیاسی پاٹی مدامی بھتام جنگ ءَ اَنت کہ چین ءِ کمیونسٹ سرکار بلوچ راجی آجوئی ءِ جنگ ءَ ھلاس کنگ ءِ ھاتر ءَ پاکستان ءِ کمک ءَ کنگ ءَ اِنت۔ آجوئی لوٹوکیں ادارگ بلوچستان ءِ لُٹ ءُ پُل ءُ بلوچ نسل کشی ءِ تہ ءَ چین ءَ پاکستان ءِ ھمکار نامین اَنت۔

پاکستانی سرکار مدام درشان کنگ ءَ اِنت بلوچستان پہ زرکاری پھازیتگیں ڈیھہ اِنت بلے چین ءُ آئی ءِ شوربندیانی سر ءَ یکشلی ءَ گوں اُرش ھمے پدر کنت کہ بلوچ راجے لوٹ ءُ واھگ ءَ ابید بلوچستان ءَ کجام ھم پئیمیں سرمایہ کاری نہ رکیتگ۔

بلوچ لبریشن آرمی ءَ آپریشن زرپھازگ ءِ سیمی اُرش ءَ پد چائنہ ءَ بیھار داتگ کہ اگاں چین ءَ نود روچانی تہ ءَ وتی شوربندی ھلاس نہ کُت اَنت ءُ چہ بلوچستان ءَ در نہ کپ ایت گُڑا بلوچ لبریشن آرمی چین ءِ ھلاپ ءَ وتی اُرشانی کساس ءُ ترندی ءَ گیشتر تیزی کار ایت۔ بلوچ لبریشن آرمی ءِ انیگیں سالانی تہ ءَ چینیانی سر ءَ اُرشانی دپتر ءَ چہ ما ھمے آسر ءَ سر بیت کن ایں کہ اگاں چین ءِ شوربندی بلوچستان ءَ برجاہ مان اِت اَنت گُڑا چینی لوٹانی دیمتر ءَ ھم ترندی ءَ گوں اُرش برجاہ مان اَنت۔

پاکستان چہ دو دھکاں برجاھیں راجی آجوئی ءِ ھاتر ءَ جُنزوکیں بلوچ جنگ ءَ ھلاس کنگ ءَ بے سوب بیتگ۔ بلوچ جیڑہ ءِ گیش ءُ گیوار کنگ ءَ ابید بلوچستان ءَ جنگ برجاہ مان ایت ءُ پاکستان ءِ ٹاھاں ابید ھم بلوچستان کجام ھم ملک ءِ زرکاری رک ات نہ بنت۔ بلوچ راجی تاکتاں گوں برپارو ترانکاریانی بندات ءَ ابید چین ءُ جھان ءِ کجام ھم دومی ڈیھانی سرمایہ کاری ءُ آیانی راجی لوٹاں بلوچستان ءَ پھاز اتگ نہ بنت۔

پاکستانی پوج ءَ نوشکی ءَ بازیں لوگانی سر ءَ بیڑ برتگ ءُ پنچ مردم آوار جنگ ءَ پد بیگواہ کتگ اَنت ءُ پوج ءَ زھگ ءُ زالبول ھم لٹ ءُ کُٹ کتگ اَنت-

بلوچستان ءِ دمگ نوشکی ءِ جتا جتائیں جاھاں پاکستانی پوج ءَ شپ ءَ بیڑ برتگ ءُ پنچ مردم آوار جنگ ءَ پد زورانسری بیگواھی ءِ آماچ کتگ اَنت-

بیگواہ کنگ بیتگیں مردمانی پجار ھکنواز جھمنند مینگل میتگ، ،ھامد جھمنند مینگل میتگ، جاپر جھمنند جمالدینی میتگ، آمر جھمنند شریپ ھان میتگ ءُ کسان سالیں یاسین جھمنند شریپ ھان میتگ ءِ ناماں زانگ بیتگ اَنت-

دمگی مردمانی رد ءَ اے مردم اگست ءَ جتا جتائیں روچاں لوگانی سر ءَ بیڑ ءِ وھد ءَ پاکستانی پوج ءُ چیریں ادارھاں آوار جتگ ءُ برتگ اَنت-

دمگی مردمانی رد ءَ بیڑ ءِ وھد ءَ پوج ءَ جاڑیگیں مردم لٹ ءُ کُٹانی نشانگ کتگ انت ءُ ھمے وڑ زالبول ھم لٹ ءُ کٹانی نشانگ کنگ بیتگ اَنت-

زانگ بہ بیت چد ءُ پیسر چہ نوشکی ءَ جمالدینی ءِ میتگ ءَ دگہ یک ورنایے آتپ ء ماسٹر آدل ھان ھم پاکستانی پوج ءِ دست ءَ زورانسری آوار جنی ءِ ھال اتکگ بیتگ ات-

دمگی واکداراں تنی وھدی اے درگت ءَ دگہ اھوال دیم ءَ نیاؤرتگ اَنت-

سرجمیں بلوچستان ءَ زورانسری آوارجنی گوستگیں بازیں سالاں چہ برجاہ اَنت ءُ گوستگیں دو ماھانی توک ءَ یک رندے پد ءَ اے وئیلانی توک ءَ ترندی گندگ آیگ ءَ اِنت-

زورانسری آوار جنیانی گیشی ءِ ھلاپ ءَ بلوچ یکجھتی کمیٹی کراچی ءِ نیمگ ءَ کراچی پریس کلب ءِ دیم ءَ دو روچی بنجلے برجم کنگ بیتگ ات ءُ پد ءَ زھرشانی روانکے کشگ بیتگ ات ءُ ھمے وڑ شال ءَ ھم بلوچ بیگواھیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ نیمگ ءَ پریس کلب ءِ دیم ءَ زھرشانی برجاہ اِنت-

وائس فار بلوچ مسنگ پرسنز ءِ رد ءَ بلوچستان ءَ زورانسری آوار جنیانی درچانی توک ءَ ترندی گندگ ءَ اتکگ گڑا ھمے داب ءَ وی بی ایم پی ءِ زالبول رھشوناں ترسینگ ءِ آماچ کنگ ءَ اَنت-

شال ءَ دزبمب اُرش ءِ سبب ءَ مروچی برجم بیوکیں چاردہ اگست ءِ مراگش دارگ بیتگ-

بلوچستان ءِ بنجاھی شھر شال ءَ گوستگیں شپ ءَ پاکستان ءِ آجوئی ءِ درگت ءَ برجم بیوکیں مراگش ءِ جاہ ءَ تراکے کنگ بیتگ-

گیشیں اھوالانی رد ءَ فیض آباد سریاب اسکول ءَ دزبمب اُرشے کنگ بیتگ – اسکول ءِ بوگ ءِ سبب ءَ دگہ جانی تاوان نہ بیتگ اَنت-

دمگی مردمانی رد ءَ اے جاہ ءَ چاردہ اگست ءِ درگت ءَ یک مراگشے برجم کنگ ءَ بیتگ اَنت-

زانگ بہ بیت بلوچستان ءَ پرکاریں سلاہ بندیں آجوئی ءِ گلاں مھلوک ءَ را چاردہ اگست ءِ مراگشاں دور بوگ ءِ دزبندی کتگ ات-

گوست ءَ پاکستان ءِ آجوئی ءِ درگت ءَ بلوچستان ءَ بیوکیں مراگشانی سر ءَ اُرشانی ھواری ءَ پاکستان ءِ بیرک ءِ بھا کنوکیں اسٹالانی سر ءَ ھم اُرش بیتگ اَنت-

اگست ءِ پانزدہ روچانی توک ءَ بلوچ لبریشن آرمی ءِ نیمگ ءَ شال ءَ جتا جتائیں ڈولاں پنچ بمب اُرش بیتگ اَنت کہ چریشاں پاکستانی پوج ءُ پاکستان ءِ بیرک بھا کنوک نشانگ کنگ بیتگ اَنت-

سربوتگیں ھالانی رِد ءَ گوستگیں روچ ءَ چہ کراچی ءَ پاکستانی پوج ءَ یک مردمے زورانسری آوار جنی ءَ پد بیگواہ کتگ وھدیکہ چہ شال ءَ آوار جنگ بوتگیں یک مردمے یل کنگ بوتگ –

چہ کراچی ءَ آوار جنگ بوتگیں مردمے پجار باکسر شعیب ء غلام علی بابا ءِ نام ءَ بوتگ – اے مرد گوستگیں روچ ءَ پاکستانی پوج ءَ چہ کراچی ءَ بلوچانی ھنکین لیاری سنگو لین ءَ چہ وتی جند ءِ گِس ءَ آوار جتگ ءُ بیگواہ کتگ –

دومی نیمگ ءَ گوستگیں روچاں چہ شال ءَ زورانسری آوار جنگ بوتگیں ھاران ءِ جھمنند ورنائیں نودربر ابرار شاہ یل بوتگ –

زانگ بہ بیت ابرار شاہ ایف ایس سی ءِ نودربرے ءُ اے وھد ءَ آ ماں شال ءَ فری میڈیکل ءِ تیاری ءَ کنگ ءَ بوتگ کہ گوستگیں روچاں شال کواری دگ ءَ زھگانی نادراھجاہ ءِ نزیک ءَ چہ وتی کوٹی پاکستانی پوج ءُ چیریں ادارھانی کارمنداں آوار جتگ ءُ بیگواہ کتگ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زوراکی ءُ زورانسری آوار جنیانی درچ یکشل ءَ برجاہ انت وھدیکہ لھتے ماھانی تہ ءَ اشی ءِ تہ ءَ گیشی اتکگ ـ گوستگیں روچاں ماں سندھ ءِ بنجاھی شھر کراچی ءَ بلوچانی زورانسری آوار جنی ءِ تہ ءَ گیشی آرگ ءِ بگیری ءَ بلوچ یکجھتی کمیٹی ءِ نیمگ ءَ دو روچی زھرشانی بنجل ءِ جنگ بوتگ وھدیکہ ماں شال ءَ نمیران ءُ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ پنچ ھزار ءُ یکسد ءُ چل ءُ دو روچ انت کہ برجاہ انت – گل ءِ کمک سرکماش ماما قدیر بلوچ ءِ رِد ءَ اے وھدی بلوچستان ءِ تہ ءَ ھزارانی کچ ءَ مردم زورانسری آوار جنگ ءُ بیگواہ کنگ بوتگ انت ءُ آھانی تہ ءَ بازینے ءِ ژانگولیں جون ماں ویرانگاں چگل دیگ بوتگ انت، بازینے ماں یکجاھیں کبرانی تہ ءَ کل کتگ انت –

روکپتی بلوچستان ءِ بنجاھی شھر زاھدان ءَ گوستگیں روچ ءَ ادینگ ءِ نماز ءَ پد لس مردماں زھرشانی روانک ءِ دروشم ءَ زھرشانی کتگ-

گیشیں اھوالانی رد ءَ گوستگیں روچ ءَ آدینگ ءِ نماز ءَ پد مھلوک ءَ اوگام جنان ءَ گوشتگ کہ سیاسی بندیگیں مردم یل کنگ بہ بنت ءُ آیانی بندش ھلاس کنگ بہ بیت اِنت-

آیاں گوشتگ کہ سیاسی مردم یل کنگ بہ بنت ءُ اے بھتام ھم جتگ کہ ایرانی آمیدگس لس مردماں بے بنیات ءَ پاھو دیگ ءَ اِنت ءُ باید اے بے بنیاتیں پاھواں بند بہ کنت-

زانگ بہ بیت اے زھرشانی گوستگیں سال ءِ ستمبر ءَ پد ھمک آدینگ ءَ مھلوک ءَ زھرشانی روانک کش اتگ بیتگ بلے گوستگیں لھتیں آدینگاں مردم بے توار بیتگ اَنت-