TBP Balochi

گوستگیں سروزیر پاکستان عمران خان رینجرز ءُ نیب ءَ القادر ٹرسٹ ءِ کیس ءَ دزگیر کتگ-

عمراب خان بائیو میٹرک کنگ ءِ واستا ھنچش ھائی کورٹ ءِ ھواریں کارگس ءَ روگ ءَ دلمانگ بیتگ کہ آ رینجرز ءَ دزگیر کتگ ءُ برتگ-

عمران خان ءِ دزگیری ءِ وھد ءَ اود ءَ جاڑیگیں پولیس ءَ ھم پی ٹی آئی ءِ وکلاء ءِ میان ءَ دست جنگی بیتگ اَنت-

آئی جی اسلام آباد ءَ گوشتگ کہ عمران خان القادر ٹرسٹ کیس ءَ دزگیر کتگ-

زانگ بہ بیت گوستگیں لھتے روچاں پاکستانی پوج ءُ عمران ءِ میان ءَ ترندکشیں درشانی کنگ ءَ بیتگ اَنت-

گوستگیں سال ءَ وزیر آباد ءَ پی ٹی آئی ءِ سروک ءِ سر ءَ ناگتی اُرش بیتگ ات ءُ چریشی ءَ پد عمران ءَ پاکستانی سروزیر شھباز شریف، وزیر داکلہ رانا سناء اللہ ءُ یک کلانیں انٹیلی جنسے آپیسر ءِ ئے سر ءَ کوش ءِ بھتام جتگ ات-

چریشی ءِ پسو ءَ گوستگیں روچ ءَ پاکستانی سروزیر شھباز شریف ءَ گوشتگ ات کہ عمران نیازی ءِ کسانوکیں سیاسی نپے ءِ ھاتر ءَ پاکستان ءِ پوج ءُ انٹیلی جنس ایجنسی ءَ بنام کنگ اِنت ءُ اے بیھار ایرجنی اَنت جنرل پیسل نسیر ءُ مئے انٹیلی جنس ایجنسی ءِ ھلاپ ءَ ابید ءِ سبوت ءَ بھتام جنگ ءِ اجازت نہ دے ءُ ناکہ اے دابیں گپانی اوپار کنگ بیت اِنت-

پاکستانی پوج ءِ جارکش ءَ گوشتگ کہ گوشتگ گوستگیں یک سالے ءُ چہ اے گپ اڑینگ ءَ اِنت کہ پوج ءُ چیریں ادارہ سیاسی لوٹانی ھاتر ءَ وسرا کامرد بوگ ءُ آیانی ھلاپ ءَ پندل سازگ ءَ اَنت-

جارکش ءَ گوشتگ ات کہ عمران خان ءَ ابید منانک ءَ یک جاڑیگیں پوجی آپیسرے ءِ سر ءَ بھتام جتگ ءُ اے دابیں گیر زمہ داریں بیان ءُ بے بن اَنت-

آئی ءَ گوشتگ کہ ما اے درگت ءَ سیاسی رھشوناں لوٹ کن ایں آ کانونی ترز ءَ کارمرد بہ کن اَنت دروکیں بھتام جنی ءَ یل بہ کن اَنت-

جارکش ءَ گوشتگ ات کہ اے دابیں آڑینوک ءُ بدنیتی ءِ چکاریں بھتام باز پدردی اَنت اے ایرجنی اَنت جارکش ءَ گوشتگ کہ ادار تچک کنت دروک ءُ ردیں درشان ءُ پندل سازوکانی ھلاپ ءَ کانونی کاروائی کنگ ءِ ھک ءَ دار ایت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کتگیں درشان ءِ توک ءَ گوشتگ کہ بی ایل ایف ءِ سرمچاراں گوستگیں روچ ءَ آواران ءِ دمگ جھاؤ ءَ ملائی گزی ءِ ھند ءَ ھستیں پاکستانی پوج ءِ چوکی ءِ سر ءَ اسنائپر ءُ وتکاریں سلاھانی گون ءَ اُرش کتگ-

آئی ءَ گوشتگ اُرش ءِ آسر ءَ دشمنیں پوج ءَ جانی ءُ مالی تاوانانی دیمپانی کنگ کپتگ-

جارکش ءَ گوشتگ کہ بی ایل ایف اے اُرش ءِ زمہ واری ءَ من ایت ءُ بلوچستان ءِ آجوئی ءَ داں اے دابیں اُرش برجاہ بنت-

سر بیتگیں ھالانی رد ءَ گوستگیں شپ ءَ روکپتی بلوچستان ءِ بنجاھی شھر زاھدان ءَ پولیس ءَ تیرگواری کنان ءَ دو مردم زدگ کتگ اَنت-

زدگ بیتگیں مردمانی پجار سعید ناروئی ء علی شیر ءُ وھید سارانی ءِ ناماں زانگ بیتگ اَنت-

ھالانی رد ءَ اے ھردوک گوستگیں شپ ءَ روگ ءَ بیتگ اَنت کہ پولیس ءَ آیانی سر ءَ تیرگواری کرتگ کہ چریشی ءَ ھردوک پولیس ءَ گپتگ اَنت ءُ لٹ ءُ کُٹ ھم کتگ اَنت-

اھوالانی تہ ءَ گوشگ بیتگ کہ پولیس ءِ تیرگواری ءَ سعید ناروئی سک زدگ بیتگ ءُ آ اے وھد ءَ نادراہ ءَ تھتیگ اِنت-

اھوالانی تہ ءَ گوشگ بیتگ کہ وھد ءِ پولیس ءَ لَٹ ءُ کُٹ کنان ءَ گون وت برتگ کہ چریشی ءَ پد آئی ءِ درگت ءَ اھوال دیم ءَ نیتکگ اَنت-

دو شمبے ءِ شپ ءَ بلوچستان ءِ دمگ سوراب ءَ پاکستانی پوج ءِ یک چیک پوسٹے نشانگ کنگ بیتگ-

گیشیں اھوالانی رد ءَ ناشناسیں مردماں پیگک ءِ ھند ءَ پاکستانی پوج ءِ چیک پوسٹ ءِ سر ءَ دزبمبے چگل داتگ ءُ پشت مانداتگ ءُ شتگ اَنت-

وئیل ءَ پد پوج ءَ دمگ انگیر کرتگ ءُ ارشکارانی پٹ ءُ پول بندات کتگ –

زانگ بہ بیت اے دمگ ءَ بلوچ آجوئی لوٹوکیں سلاہ بندین گل پرکار اَنت ءُ پوج ءِ سر ءَ اُرشانی زمہ واریاں منگ ءَ اَنت بلے داں انگت ےَ اے اُرش ءِ زمہ واری کس ءَ پہ وت ءَ نہ زرتگ-