TBP Balochi

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ کلات ءَ پاکستانی پوج ءِ سر ءَ بوتگیں بمب اُرش ءِ زمہ واری منّ اِتگ ءُ گوشتگ کہ سرمچاراں کلات ءَ پاکستانی پوج ءِ یک گاڑی یے تراکناکیں شوروانی نشانگ کتگ –

جارکش میجر گوھرام بلوچ ءِ رِد ءَ سرمچاراں ھژدہ اگست ءَ کلات ءُ منگچر ءِ میان ءَ مھلبی ھوٹل ءِ نزیک ءَ پاکستانی پوج ءِ یک کاروانے گوں چیرکُتگیں تراکناکیں شوروانی نشانگ کُتگ چریشی ءَ کاروان ءَ ھواریں یک ٹرکے اُرش ءِ زد ءَ اتکگ ءُ ٹرک ءَ سواریں زورگریں پوج ءِ بازیں کارمند مُرتگ ءُ زدگ بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ بی ایل ایف اے اُرش ءِ زمہ واری ءَ منیت ءُ اے دابیں اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ کوھلو ءَ مار ءِ ورگ ءَ ورنایے بیران بوتگ وھدیکہ ڈیرہ مراد جمالی ءَ لین ءِ گرگ ءَ جنینے ءَ ھوار پنچ مردم بیران بوتگ انت –

گیشیں ھالانی رِد ءَ لاسیزئی کوھلو ءَ مار ءِ وارتگیں ورنایے کھول ءَ ڈی ایچ کیو نادراھجاہ ءِ دیم ءَ زھرشانی کتگ –

کھول ءِ رِد ءَ کوھلو ءِ ڈی ایچ کیو نادراھجاہ شپ ءَ ڈاکٹر نہ بوتگ ءُ ناکہ انٹی اسنیک ویکسین بوتگ، نادراھجاہ ءِ ایم ایس ءَ وتی زَری کلینک ءِ پچ کتگ ءُ کار ءِ وھد ءَ ایم ایس وتی کلینک ءَ مشگول بوتگ، مار ءِ ویکسین ھم چہ ایم ایس ءِ گِس ءَ آرگ بوتگ –

بیران بوتگیں ورنایے پت ءَ کوھلو ءِ پولیس کارگس ءَ نادراھجاہ ءِ واکدارانی بگیری ءَ ارزی نبشتہ کتگ –

زانگ بہ بیت ھمے سال ءِ مئی ماہ ءَ کوھلو ءِ دمگ کاھان ءَ مار ءِ ورگ ءَ یکیں روچ ءَ شش مردم سانمند بوتگ انت – کوھلو کاھان ءَ ھمک روچ مار ءِ ورگ ءِ ھال آیگ ءَ انت ءُ اشی ءِ تہ ءَ گیشی آیگ ءَ انت بلے پدا ھم سرکاری نادراھجاھاں ویکسین نیست –

دومی نیمگ ءَ چہ بلوچستان ءِ دمگ ڈیرہ مراد جمالی ءَ ھمے ھال آیگ ءَ انت کہ مروچی بزاں آدینگ ءِ روچ ءَ لین ءِ گرگ ءَ جنینے ءَ ھوار پنچ مردم بیران بوتگ انت –

بیران بوتگیں مردمانی تہ ءَ بھرام ء محمد ایوب، عبدالحئی ء عبدالرؤف ءُ آئی لوگبانک ءُ زھگ ھوار اَنت – بیران بوتگیں مردمانی جون نادراھجاہ ءَ برگ بوتگ انت ءُ اودا ھژدری چار ءُ ٹپاس ءَ پد کھول ءِ دست ءَ دیگ بوتگ انت –

وئیل ءِ درگت ءَ ھمے گوشگ بوگ ءَ اِنت کہ ٹرانسپارمر ءِ تار سستگ اَنت ءُ گِس ءِ سر ءَ کپتگ اَنت چہ ایشی ءَ پنچیں مردماں لین ءَ گپتگ ءُ بیران بوتگ انت –

گوادر ءَ چینی انجینئرانی سر ءَ بیتگیں اُرش ءِ جَڑ

دی بلوچستان پوسٹ گچینی

فرید بلوچ

چین پاکستان ءِ راہ گوزی (CPEC) ءِ دل ءُ ڈولڈاریں زری شھر گوادر اے وھد ءَ مزنیں کساسے ءَ ژامبلینگ بیتگ وھدیکہ چینی انجینئرانی بروکیں کاروان سر ءَ یک مھک رنگیں اُرشے بیتگ ات – 13 اگست 2023 ءِ سھب ءَ ات فقیر کالونی پھل ءِ نزیک ءَ بازیں کساسے ءَ تراک ءُ تیرگواریانی تواراں دمگ جکسینگ بندات کتگ ات- چریشی ءَ سیاہ ءُ تھاریں شپ ءَ مانشان اتگ ات-

اُرش ءِ وھد ءُ پاس :

گڑی ءَ سھب ءِ ساھت نُھ ءُ ھژدہ دمان ات ھپت گاڑیانی کاروان ءَ ات ءُ کہ ایشی ءَ سواریں گیشتریں مردم چینی انجینئراں وت ءَ اُرش ءِ تہ ءَ ماھڑین اتگ ات- تیرانی یک توارے ءَ پد تراکانی یک مھکمیں رنگے ءَ اُرش ءِ ٹک ءُ نشان گچین کتگ ات – لھتے دماناں پد بلوچ لبریشن آرمی ءِ یک ھواریں یونٹ مجید بریگیڈ ءَ اے اُرش ءِ زمہ واری من اتگ ات – آئی ءَ یک کسانوکیں درشانے ءَ گوشتگ ات کہ اُرش داں انگت ءَ برجاہ اِنت ءُ وھد ءِ ھواری ءَ سرجمیں درشان ءِ شنگ کنگ ءِ ستکی گوشتگ ات-

پاکستان ءِ انٹر سروسز پبلک ریلیشنز (آئی ایس پی آر) ءَ ھم وتی لیکہ درشان کنان ءَ گوشتگ ات کہ ناشرکارانی پرکاری ءِ ھال اِنت ءُ پد ءَ بیڑ برجاہ اِنت – پد ءَ آئی ایس پی آر ءَ چینی انجینئرانی بروکیں کاروان ءِ سر ءَ اُرش ءِ ھال راست کتگ ات ءُ گوشتگ ات کہ ناشرکاراں کسانیں سلاہ ءُ دزبمب کارمرد کتگ اَنت – آئی ایس پی آر ءَ گوشتگ ات ’ گچین ءُ ترندیں گامگیج ءِ سر ءَ دو ناشرکار ’جھندم ‘ ءَ روان داتگ انت ءُ چریشی ءَ کجام پوجی ءُ یا لس مردم ءَ تاوان نہ بیتگ‘-

بلے گوادر ءِ جانسلامتی بنجل زدگ ءُ کشگ بیتگیں مردمانی یکجاہ کنگ ءَ دزبند بیتگ ات ھمے وڑ ءَ چاگردی ترامجاھاں شنگ بیتگیں تامر ءُ اکساں درستیں راستی پریچان کت اَنت یک راستی ءَ دروگانی بُن ٹنگ ٹنگ کت اَنت-

زمہ واری ءِ منگ ءِ یک سرجمیں سرپدی:

روچ ءِ گڈسر ءَ بی ایل اے ءَ یک مزنیں درشانے شنگ کتگ ات کہ چریشی ءَ آپریشن زِرپھازگ (OPERATION ZIR PAHAZAG) ءِ سیمی بھر آسر بیتگ ءُ ایشی ءِ مول ءُ مراد بیتگین دیم ءَ آوارتگ اَنت- اے دو اداراں تراج کشیں جنگ ءَ بی ایل اے مجید بریگیڈ ءِ باسکاں سرجم کتگ، اے کاروان چیئرمین اسھاک چوک جوڈیشل کمپلیکس ءِ نزیک ءَ نشانگ کتگ، کہ اے راہ گوادر ءِ بالی پٹ ءُ زر ءَ ھوار گیجوکیں گچینی راھے –

بی ایل اے ءِ رد ءَ اُرش ءَ چار چینی شھریاں ھوار پاکستانی پوج ءِ یازہ کارندہ کشتگ اَنت ءُ بازینے زدگ کتگ اَنت- بی ایل اے ءَ وتی گچینی ٹک ءُ نشان کتگیں گپ ءِ لیکہ ءِ سر ءَ داشتگیں گپ ءِ درشان کنان ءَ گوشتگ ات کہ کجام رنگ ءَ گاڑیانی کاروان ءِ رندگیری کتگ ءُ کجام رنگ ءَ داشتگ انت – ءُ چینی کارندھانی بروکاں ھوار جتا جتائیں پوجی ءُ پولیس ءِ گاڑی دزبمبانی نشانگ کتگ ءُ داں کساس سِی دمان ءَ اے اُرش برجاہ داشتگ-

بی ایل اے ءِ مجید بریگیڈ ءِ دو فدائین نوید بلوچ ءُ مقبول بلوچ اے بیڑ ءِ بنجاھی سروک بیتگ اَنت- بی ایل اے ءِ رد ءَ اے ھردوکیں فدائیناں آپریشن ءَ پد بازیں وھداں داں پاکستانی پوج ءِ ھلاپ ءَ گھگیری کنان ءَ داں گڈسر ءَ وتی جان ندر کتگ اَنت-

گچینتریں گپ ایش اِنت بی ایل اے ءِ درشان ءَ چین ءِ واستا تچک ءَ کلوہ ایش ات کہ آئی ءَ بلوچستان ءِ بستار ءُ سی پیک ءُ سیندک ءِ وڑیں شوربندیانی سر ءَ چین ءِ دزمانجنی ءَ ھستیں کشت ءُ کوش ءِ دلگوش ترینتگ ات انت – بی ایل اے ءَ چین ءَ بلوچستان ءَ درایگ یا دمگ ءَ وتی لوٹانی سر ءَ ترندیں اُرشانی دیمپان بیگ ءَ نَود روچ ءِ اژدری وھد داتگ ات-

کُشگ بیتگین ءُ آسر:

گوادر اُرش ءَ ترندیں پھریزی ءِ آسر ءَ بازیں گڑ ءُ مُنجیں اھوال دیم ءَ اتکگ اَنت- بی ایل اے ءِ رد ءَ اُرش ءَ پانزدہ مردم مرتگ انت ءُ چریشاں چار چینی شھری ءُ پاکستانی پوج ءِ یازدہ کارندہ مرتگ اَنت ءُ بی ایل اے ءِ دو فدائین ھوار اَنت – ایشی ءِ پژدر ءَ آئی ایس پی آر ءِ درشان ءِ بندات ءَ یکے ءِ مرگ ءُ سَے مردمانی زدگ بوگ ءِ اھوال دیم ءَ اتکگ اَنت ءُ پد آئی ءَ دو ناشرکارانی کُشگ ءِ ٹاہ داتگ ات بلے کجام شھری ءُ پوجیانی تاوان بیگ ءِ ھال دیم ءَ نیاؤرتگ ات اَنت-

گوادر اُرش ءِ پژدر، پاکستان ءَ جاڑیگیں چینی کونسل ھانہ ءَ یک درشانے ءَ گوشتگ ات کہ گچینی ءَ بلوچستان ءُ سندھ ءَ جاڑیگیں چینی شھریاں مھکمیں جاھانی نندگ ءِ کڈنی کتگ ات-

جارکش ءِ چینی وزارت ھارجہ وانگ وینبن ءَ یک درشانے ءَ ترندی ءَ کڈن کنان ءَ پاکستان ءَ را کڈن کنان ءَ گوشتگ ات آ جرمکارانی ھلاپ ءَ کاروائی سرجم ءَ بہ کن اِت- پاکستان ءَ جاڑیگیں چینی سپارت ھانہ ءَ ھم اے جزباتانی رندگیری کنان ءَ گوشتگ ات کہ سرجمیں پاکستان ءَ چینی شھری ءُ باپاری ادارھاں وتی پھریزی ءِ گیش کنگ ءِ شون داتگ ات-

ھمے وڑ ءَ اُرش ءَ پد گوادر ءِ دمگی آبادی ءَ پاکستانی پوج گیش مانرچان ءُ پرکاریانی سبب ءَ بازیں کچے ءَ مشکلانی دیمپانی کنگ کپتگ ار- اُرش ءَ پد کساس گوادر ءِ شھر ءَ بیست ءُ چار اداراں داں پوج ءِ دست ءَ بیتگ ات – فقیر کالونی، نیا آباد ءُ جی ڈی کالونی ءِ وڑیں ھنداں بیڑ ءِ وھد ءَ گمانی رنگ ءَ بازیں مردم دزگیر کنگ بیتگ اَنت ءُ پد ءَ آ ناشناسیں جاھاں برگ بیتگ اَنت-

چم دیستگیں مردمانی رد ءَ دمگی مردماں ہاکستانی پوج ءِ نیمگ ءَ گیش کپتگیں پٹ ءُ پول ءُ پوجی بیڑ درشان کتگ اَنت چریشی ءِ آسر ءَ شھریانی ترسینگ ءُ گمانی رنگ ءَ لٹ ءُ کٹ کنگ ءُ لوگانی سر ءَ بیڑ برگ جتا جتائیں بازیں وئیل دیم ءَ اتکگ بیتگ اَنت – ترندیں پھریزی ءِ پھریزی ءِ پٹ ءُ پول ءُ دگانی سر ءَ راہ ءُ درانی بندگ ءُ گوادر ءِ شھر ءَ ناوشیں جاورھالے ودی بیتگ ات-

یک راجدپتری پٹ ءُ پولے: چینی لوٹانی سر ءَ گوست ءَ بیتگیں اُرش

دوھزار ءُ سیزدہ ءَ چین پاکستان رھگوزی (CPEC)ءِ بندات ءَ پد ، بلوچستان ءَ چینی باپارکارانی دمگی کشت ءُ کوش بندات بیتگ – ھمود ءَ اسلام آباد ءُ بیجنگ ءِ میان ءَ سی پیک ءِ وشھالی ءُ دو نیمگی سیادی ساڑاھگ بیتگ ءُ ھمود ءَ بلوچ راجدوست اے پل ءُ پانچی ءَ وتی زمین ءَ لُٹ ءُ پُلے ءِ دروشم ءَ چار اَنت- گچینی گپ ایش اِنت کہ بلوچ لبریشن آرمی (بی ایل اے) اے درگت ءَ گیشتر توار چست کنگ ءَ اِنت ءُ ایشی ءِ توک ءَ زرکاری ءِ گامگیج ءُ ڈالچاری ءُ پُلپھانچی ءِ بازیں کساسانی راجدپتری درشاناں جوڑشت کن اَنت-

اے سالانی وھد ءَ بلوچ راجدوست ءُ آجوئی ءِ منوکیں ٹولی اے گامگیج ءِ سر ءَ ترندیں بگیر دار اَنت ایشی ءَ بلوچستان ءَ ابرمی مڈیانی سر ءَ نپ چست کنوک ءَ سامراجی شوربندی ءِ نام ءَ دے اَنت ءُ چین ءَ اے دمگ ءَ روگ ءِ سرپد کنگ ءَ اَنت- بلے بوت کنت اے سان ءَ کمے کساس ءَ سرپد بیتگ انت ءُ چین ءَ دیم ءِ روگ ءِ جار جتگ بیتگ اے رد ھما وھد ءَ بیتگ ات کہ وھدیکہ بلوچ آجوئی لوٹوکیں گل، گچینتر بی ایل اے ءِ مجید بریگیڈ ءَ دوھزار ءُ ھژدہ ءِ میان ءَ یک جوانیں رنگے ءَ چینی مڈی ءُ کارندہ نشانگ کنگ بندات کتگ ات- جھل ءَ نبشتگیں اُرش نبشتگ اَنت-

یازدہ اگست دوھزار ءُ ھژدہ ءَ دالبندین ءَ بی ایل اے ءَ یک وتکش اُرشے ءَ چینی انجینئرانی بسے نشانگ کتگ ات – اُرش ریھان اسلم بلوچ ءَ کتگ ات کہ مجید بریگیڈ ءِ بنھشت ایر کنوک ءُ بی ایل اے ءِ ھما وھد ءِ سروک اسلم بلوچ ءِ زھگ ات –

بیست ءُ سَے نومبر دوھزار ءُ ھژدہ ءَ مجید بریگیڈ ءَ کراچی ءَ چینی کونسل ھانہ ءِ سر ءَ یک مھکمیں اُرشے کتگ ات چریشی ءَ بلوچ آجوئی جنز ءَ میان اُستمان ءِ نگاہ وتی نیمگ ءَ ترینتگ ات اَنت-

یازدہ مئی دوھزار ءُ نوزدہ ءَ گوادر ءَ پرل کانٹی نینٹک ھوٹل ءَ بیست ءُ چار اداراں داں بی ایل اے ءِ انگیر برجاہ ات اود ءَ گمانی رنگ ءَ سی پیک ءَ بندوکیں مردم جھمنند بیتگ اَنت ءُ اے اُرش ءِ آسر ءَ بازیں بیرانی بیتگ ات اَنت-

نوزدہ اگست دوھزار ءُ بیست ءُ یک ءَ پد ءَ یک رندے گوادر ءَ چینی انجینئرانی سر ءَ پدائی اُرشے کنگ بیتگ ات-

بیست ءُ شش اپریل دوھزار ءُ بیست ءُ دو ءَ کراچی یونیورسٹی ءَ کنفیوشش انسٹی ٹیوٹ ءَ چینی مردمانی سر ءَ وتکش تراکے ءَ بی ایل اے ءِ توک ءَ زالبولانی ھوار بوگ ءِ پدراھی پدر کتگ ات-

چین ءِ پھریزی گامگیج:

بی ایل اے مجید بریگیڈ سی پیک ءُ ایشی ءَ ھواریں دگہ شوربندی ءُ چینی شھریاں ترندی ءَ گوں نشانگ کنگ ءَ اِنت، چین گوادر ءُ وتی گیش کپتگیں سر ءُ پرانی جھد ءَ سیکیورٹی ءِ چیلنجانی دیمپانی ءَ کنگ ءَ اِنت – اے اُرشانی آسر ءَ چین ءَ بازیں پسھی ءَ وتی گامگیج زرتگ اَنت کہ جھل ءَ نبشتگ اَنت-

ڈنی پھریزداری ءِ شون: بیجنگ ءَ بازین پھریزی ءِ گامگیجانی سر ءَ چار ءُ ٹپاس بیتگ ھنچش کہ یک چار ءُ ٹپاسے اے بیتگ کہ چریشی ءَ چین ءَ لس سیکورٹی کمپنیاں پاکستان ءَ وتی شھریانی پھریزگ ءِ چار ءُ ٹپاس کنگ ءِ گپ بیتگ، گمانی رنگ ءَ اے اسلام آباد ءَ رد کتگ ءُ ایشی ءِ ھواری ءَ چین ءَ پاکستانی پوج ءَ سی پیک ءِ پھریزگ ءَ پاکستانی پوج ءَ ھیلکاری ءِ سَلاہ ھم جتگ بیتگ-

دربندی گامگیج: وتی مڈی ءُ کار کنوکانی سر ءَ ترس ءَ رکینگ ءِ واستا اے وڑیں ھال ھم ھست اَنت چین بازیں جاھاں ھوار گیش گوادر ءِ پورٹ ءِ کش ءُ گوراں کمپان ءَ کنگ ءَ اِنت-

کمکی دروشم ءَ پھزداری ءِ چن ءُ لانچ: بلوچستان ءَ ھواریں لوٹانی منگ ءَ پد بیجنگ ءُ اسلام آباد ءَ ھردوکاں پھزداری ءِ کمک ءِ گیش کتگ گوست ءِ لھتیں نیاداں یکشل ءَ سی پیک ءِ پھریزی ءِ گامگیج ءِ گیش کنگ ءَ کڈنی کنگ بیتگ-

بلے اے اُرشاں ابید ھم چینی لوٹانی سر ءَ یکشل ءَ گچینی اُرش برجاہ اَنت – اے دابیں وئیل چین ءُ پاکستان ءِ سیادی ناگیگ کت کن اَنت، بیجنگ ءَ پاکستان ءَ جاڑیگیں چینی شھریانی پھریزگ ناکامی گوشتگ – یکشلیں اُرشاں آئی ءِ گچینی گمان ءَ ایوک ءَ پھریزی ءِ سر ءَ گامگیج زیرگ بیتگ بلکیں دراجیں شریداری ءَ ھم سان زرتگ ءُ ایشی ءِ سر ءَ ھم چار ءُ ٹپاس بیگ ءَ اِنت-

بیتگیں گچینی اُرشاں سی پیک پولنگ کتگ – ایشی ءَ نا ایوک ءَ چین پاکستان ءِ شریداری ءَ اسرمند بیتگ بلکیں بلوچستان ءَ کجام درملکی زردارانی آیوکیں باندات ءِ سر ءَ لنکک چست بیت اِنت-

بلوچستان ءَ درملکی زرکارانی آیوکیں باندات :

ابرمی مڈیاں سرگنجی ءِ ھواری ءَ بلوچستان میان اُستمانی تکاں ماہ ءِ رنگ ءَ ترپگ ءَ اِنت – گوادر ءِ وڑیں زر ءُ ریکوڈک ءِ مائن ءِ وڑیں سائٹس ءِ بستار ءَ دار ایت ءُ ایشی ءِ گرگ ءَ میانی اُستمانی نگاہ ایر اَنت-

بلے چینی شھریانی سر ءَ گیش بیتگیں اُرش باز جھلانکی رنگ ءَ پشت ءَ بر اَنت کہ سی پیک دوھزار ءُ سیزدہ ءَ بندات بیگ ءَ ھم ھونریچی ءَ بیتگ – سی پیک نا ایوک ءَ زرکاری ءِ نگاھاں چارگ بیت اِنت بلکیں ڈنی سان ءُ دمگی بلوچانی لٹ ءُ پلانی چیدگی ءَ چارگ بیت اِنت – ایشی ءِ ھیال مزنیں اسٹیک ھولڈرز، ھنچش چین ءُ پاکستان مڈی ءِ نھاد ءَ بلوچ مھلوک ءِ پل ءُ پھانچ ءَ کنگ ءَ اَنت-

بیرک گولڈ کارپوریشن ءِ نیمگ ءَ دوھزار ءُ بیست ءُ دو ءَ REKODIQ ءِ مسام کنگ میان استمانی زرکاریانی واستا بلوچستان مڈیانی برگ ءِ پدراھی اِنت – بلے ھرت چاری ءِ رنگ ءَ چارگ بہ بیت گڑا ھنچش چین وتی لوٹانی سر ءَ پھریزانی دیمپان اِنت گڑا بلوچستان ءَ اے داب ءَ نگاہ ایر کنوکیں دگہ کارپوریشناں ھم وتی پھریزی ءِ واستا الکاپ ءَ ھیال کنگی اِنت-

بلوچ رھشون ءُ راجداری باسک یکشل ءَ وتی لوٹ ءَ دیم ءَ ارگ ءَ اَنت کہ زرکاری ءَ یل بہ کن ات بلے بلوچستان ءِ آجوئی ءَ پد آیانی گوشگ اِنت بلوچستان ءِ راستیں اسٹیک ھولڈرزانی گون ءَ بس راستی رنگ ءَ گپ بس آجوئی ءَ گوں بیت اِنت – اے زرکاری ءِ پلپھانچی ءِ زوراک ءَ ابید لس دیمروئی دیوک راستیں شریداری ءِ رنگ ءَ بہ چار انت-

آیوکیں زرکاراں وتی توم ءِ کشگ ءَ پیسر یک گچینیں چار ءُ ٹپاسے ءِ درکاری اِنت نا ایوک ءَ زرکاری ءِ نپ ءَ گرگ اِنت بلکیں دمگی بلوچ آبادیانی شک ءُ گماناں دور بہ کن اَنت-گمانی زرکاریانی واستا اے اژدری اِنت آ دمگ ءِ جھل ءُ بیٹگان سرپد بہ بنت ءُ بلوچ ءِ واھشتانی سرجم کنوکیں راستیں مردماں گوں گپ بہ کن اَنت ءُ ایشی ءَ چہ دیمروئی ءُ ایمنی اتکگ کنت اِنت-

بلوچستان ءِ بنجاھی شھر شال ءَ ناشناسیں سلاہ بندیں مردمانی تیرگواری ءَ نیشنل پاٹی ءِ رھشون ءُ گوستگیں سوبائی اسمبلی امیتوار میر دوران خان کھوسہ زدگ بوتگ –

تیرگواری ءِ وئیل شال ءِ دمگ سریاب دگ ءَ برما ہوٹل ءِ نزیک ءَ بوتگ –

اے وئیل ءِ ھبر نیشنل پاٹی ءَ راست کتگ ءُ گوشتگ کہ میر دوران خان زدگیں جاوراں ٹراما سنٹر برگ بوتگ ءُ ھنو آ وشتر انت –

نیشنل پاٹی ءَ اے اُرش ترندی ءَ گوں ایرجتگ ءُ چہ سرکار ءَ لوٹ کتگ کہ ارشکار دزگیر کنگ بہ بنت –

درشان ءِ تہ ءَ گوشگ بوتگ کہ سرکار ءِ زمہ واری انت کہ سیاسی مردمانی پھریز ءَ بہ کنت، ءُ زدگ بوتگیں دوران خان کھوسہ شریں وڈی ءَ الاج کنگ بہ بیت –

وئیل ءِ درگت ءَ تنی وھدی زانگ نہ بیت کہ کجام سوب ءَ اشی ءِ سر ءَ اُرش کنگ بوتگ –

سربوتگیں ھالانی رِد ءَ بلوچستان ءِ دمگ کلات ءَ ناشناسیں مردماں پاکستانی پوج ءِ کاروان تراک ناکیں شوروانی نشانگ کتگ –

پوج ءِ کاروان ولات ءِ دمگ مہلبی ہوٹل ءِ نزیک ءَ نشانگ کنگ بوتگ –

اھوالکار ءِ رِد ءَ اُرش ءَ پوج ءَ جانی ءُ مالی تاوان ءِ دیمپانی کنگ کپتگ بلے تنی وھدی واکدارانی نیمگ ءَ اے درگت ءَ ھچ گوشگ بوگ ءَ نہ انت –

زانگ بہ بیت اے دمگاں پاکستانی پوج ءِ سر ءَ بوتگیں اُرشاں گیشتر بلوچ آجوئی لوٹوکیں سلاہ بندیں گل من انت بلے اے اُرش ءِ زمہ واری تنی وھدی ھچ گل ءَ نہ منّ اِتگ –

بلوچستان ءِ بنجاھی شھر شال ءَ پاکستانی پوج ءَ یک ورنایے آوار جتگ ءُ ناشناسیں زنداناں برتگ-

گیشیں اھوالانی رد ءَ شال ءَ اے ون سٹی ءِ ھند ءَ گوستگیں روچ ءِ بامسار ءِ ساھت چار ءَ پاکستانی پوج ءَ یک ورنایے آوار جتگ ءُ ناشناسیں زنداناں برتگ –

آوار جنگ بیتگیں ورنا ءِ پجار نبی بخش بلوچ ء جان مھمد ءِ نام ءَ زانگ بیتگ کہ کیچ ءِ ھند بالگتر ءِ جھمنند گوشگ بوگ ءَ اِنت-

دومی نیمگ ءَ بلوچستان ءِ دمگ ھاران ءَ چاردہ اگست ءِ شپ ءَ سلاہ بندانی دست ءَ آوار جنگ بیتگیں باپاری مردم حفیظ اللہ لوراجہ یل بیتگ ءُ وتی لوگ ءَ سر بیتگ –

زانگ بہ بیت حفیظ اللہ لوراجہ ءِ آوار جنگ ءَ دزمانیں لیویز مھرر واشک ءِ دزگیری ءَ پد حفیظ اللہ لوراجہ ءِ یل بیگ سرجم بیتگ-

امریکہ ءَ پائلٹس ءِ ھیلکاری ءِ سرجم بوگ ءَ یوکرین ءَ روس ءِ ھلاپ ءَ پھریزگ ءَ ڈنمارک ءُ ھالینڈ ءَ ایف 16 جنگی بالیگانی دیم دیگ ءِ پرمان کتگ –

برتانیہ ءِ ھال سرکنوکیں روئٹرز ءِ رد ءَ امریکہ ءِ اگدو دارے ءَ اے گپ راست کتگ ءُ گوشتگ واشنگٹن ءَ ڈنمارک ءُ ھالینڈ ستکی کنان ءَ گوشتگ وھدیکہ پائلٹس ءِ ھیلکاری سرجم بیت اِنت گڑا امریکہ ایف 16 بالیگ یوکرین ءَ دیگ ءِ دزبندی ءَ سرجم کنت اِنت-

یوکرین ءَ روس ءِ برزی اُرشانی دارگ ءِ واستا امریکہ ءِ جوڑ کرتگیں ایف 16 جنگی بالیگ ءِ درکاری اِنت-

ڈنمارک ءُ ھالینڈ ءَ ھمے زوتاں اے ستکی ءِ واستا گوشتگ کہ امریکہ وتی ھمسنتانی پوجی بالیگانی دیم دیگ لوٹ اَنت-

یازدہ ڈیھانی ھمسنتی ھمے ماہ ءَ ڈنمارک ءَ یوکرین ءِ پائلٹس ءَ ایف 16 بالیگ ءِ بال دیگ ءِ ھیلکاری ءَ بندات کنگ ءَ اِنت-

ڈنمارک ءِ ھستیں وزیر پھریز ٹرولس پولسن ءَ جولائی ءِ ماہ ءَ گوشتگ ات کہ ڈیھ ءَ سال دوھزار ءُ بیست ءُ چار ءَ ھیلکاری ءِ آسر گندگ ءَ کاینت اِنت-

نیٹو ءِ باسکی ڈیھ ڈنمارک ءُ نیدرلینڈز پائلٹس ءَ ھیلکاری ءِ دیگ ءِ ھواری دگہ کارانی ھیلکاری ءُ بالیگ ءِ چار ءُ گزار ءُ یوکرین ءَ روس ءِ گون ءَ جنگ ءَ ایف 16 کارمرد کنگ ءِ بودشت ءِ آرگ ءُ میان اُستمانی جھدانی چیردستی ءَ بوگ ءَ اَنت-

امریکہ ءِ اگدودار ءَ گوشتگ وزیر ھارجہ انٹونی بلنکب ءَ وتی ڈنمارک ءُ ڈچ ءَ ھم شوربندیانی نمدی دیم داتگ ءُ آ ستکی کتگ اَنت دزبندی ءَ من ایت-

انٹونی بلنکن ءَ ھردوکانی واکداراں نمدی نبشتگ کتگ ءُ گوشتگ کہ یوکرین ءَ ایف 16 جنگی بالیگ ءِ دیگ ءُ یوکرین ءِ پائلٹس ءِ بودشت کنگ انسٹرکٹرز ءِ کمک ءَ ھیلکاری دیگ ءِ واستا امریکہ سرجم ءَ پلامرزی کنت اِنت-

آئی ءَ گوشتگ کہ ما اے جوان اِنت یوکرین ءَ روس ءِ زوراکی ءُ آ وتی وتواجھی ءِ لگتمالی ءِ ھلاپ ءَ وتی پھریز ءَ بہ کنت اِنت-

آئی ءَ گوشتگ کہ ھنچش کہ پائلٹس وتی ھیلکاری ءَ سرجم کنت اِنت دزبندیانی منگ ءَ یوکرین ءَ وتی نوکتریں نپانی سوبمندی ءَ زرت کنت اِنت-

یوکرین دراج کشیں وھدے ءَ نوکتریں جنگی بالیگانی لوٹگ ءِ دزبندی ءَ کنگ ءَ اِنت- دانکہ آئی ءَ جنگ ءِ کٹگ ءِ سوبمندی بہ رس ایت ءُ پرچاکہ آ روس ءِ اُرشانی دیمپانی ءَ کنگ ءَ اِنت-

بائیڈن ءِ انتزامیہ ءَ یک سالے ءَ گیش اِنت کہ یوکرین ءَ بالیگانی روان دیگ یا پائلٹسانی ٹریننگ دیگ ءِ انکاری کنگ ءَ پد پیسلہ دوبر واتر زرتگ ات-

امریکہ ءِ واکداراں ایف 16 بالیگ ءِ دیگ ءِ ھلاپ ءَ اے بنگپ ایر کتگ اے کہ اے وڑیں بالیگانی دیگ ءُ ھژار کنگ ءُ سر ءُ پر مشکلیں کار اَنت ءُ ایشی ءِ واستا بازیں ماہ درکاری ءَ اَنت-

روکپتی بلوچستان ءِ دمگ ایرانشھر ءَ ناشناساں تیرگواری کنان ءَ یک مردمے کُشتگ ءُ یک مردمے زدگ کتگ ءُ تیرگواری کنوکاں پشت مانداتگ ءُ شتگ اَنت-

بیران بیتگیں مردم ءِ پجار شھریار امینی ء عبدالسلام.جھمنند چاہ جمال ایرانشھر ءِ نام ءَ زانگ بیتگ-

اھوالانی رد ءَ وئیل گوستگیں روچ ءَ پیش اتکگ کہ اود ءَ شھریار وتی سنگتانی ھمراھی ءَ ایرانشھر ءِ ھند دامن ءَ سیل ءُ سواد ءَ شتگ بیتگ کہ اود ءَ ناشناسیں مردماں تیرگواری کتگ ءُ کشتگ-

اھوالانی رد ءَ تیرگواری کنوکاں شھریانی ھمراھی ءَ دگہ مردمے زدگ ھم کتگ ءُ تیرگواری ءِ وھد ءَ شھریار ءَ باز تیرانی لگگ ءَ شھریار ءَ وتی ساہ داتگ اَنت-

زانگ بہ بیت روکپتی بلوچستان ءَ ایرانی چیریں ادارھانی نیمگ ءَ لس مردماناں توپک دیگ بیتگ اَنت اے توپک باز وھد ءَ ٹکی جنگ ءُ جیڑھانی سر ءَ کارمرد بوگ ءَ اَنت-

بلوچ اجوئی لوٹوکیں سلاہ بندیں گل بلوچ لبریشن آرمی ءَ وتی آفیشل ٹیلی گرام چینل ھکل ءَ گوستگیں روچاں بزاں سیزدہ اگست ءَ بلوچستان ءِ تیاب دپی دمگ گوادر ءَ چینی انجینئرانی کاروان ءِ سر ءَ اُرش کنوکیں بی ایل اے مجید برگیڈ ءِ دو اُرشکارانی تامری کلوہ شنگ کتگ –

اے نُھ دمان ءِ تامُرے ءُ اشی ءِ بندات ءَ ھمے گندگ بیت کہ بی ایل اے مجید برگیڈ ھردو اُرشکار ٹریننگ کنگ ءَ انت –

تامر ءِ تہ ءَ جند ندری کنوک نوید بلوچ پنام ءِ اسلم بلوچ وتی تامری کلوہ ءِ بندات ءَ بلوچ راج ءَ ھمے کلوہ ءَ دنت گوشیت کہ ھنچوش شما دراہ سرپد ءِ کہ بلوچ سرڈگار ءِ سر ءَ جنگ ءِ بوگ ءَ انت، مارا ھم لوٹیت کہ اے جنگ ءِ بھر جوڈ بہ بئیں – بلوچ راج اے جنگ ءَ کنگ ءَ انت ءُ اے جنگ پاکستانی ریاست ءَ بلوچ راج ءِ سر ءَ زور مُشتگ ءُ بلوچ راج ءِ چکچینی ءَ کنگ ءَ انت –

نوید پنام ء اسلم ورنایاں دلگوش گور کنان ءَ گوشیت ما ورنایاں ھمے کلوہ ءَ دیگ لوٹ ایں کہ آ بیا انت ءُ اے جنگ ءِ بھر جوڈ بہ بنت ءُ اشی ءَ دیم ءَ بہ بر انت –

آ گوشیت کہ اگاں ما اے جنگ ءِ بھر جوڈ بوتیں ءُ اشی ءِ دیم ءَ برگ ءَ بے سوب بوتیں گڈا پاکستانی ریاست وتی بلوچ چکچینی ءَ برجاہ داریت ءُ آؤکیں وھد ءَ بلوچ جھان ءِ نکشہ ءِ تہ ءَ نہ مانیت ھمے ھاتر ءَ بلوچ ورنایانی سر ءَ پرز انت کہ اے جنگ ءِ بھر جوڈ بہ بنت ءُ اشی ءَ دیم ءَ بہ بر انت ءُ دژمن ءَ بے سوب بہ کن انت –

نوید پنام ءِ اسلم گوشیت کہ ھنچوش کہ مئے دومی سنگتاں پہ اے راہ ءَ دیمھونی داتگ، ھر یک انسانے ءِ واھشت بنت بلے گلام ءِ ھاتر ءَ ھچ وڈیں واھشات ارزشت نہ دار انت – مروچی ما نمیرانیں پدائی شاری ءِ درور ءَ بہ زوریں کہ آئی ءِ گور ءَ ھر وڈیں آسراتی بوتگ انت بلے آئی ءَ وتی گلامی ءِ مارشت بوتگ کہ ھمیشی ءِ ھاتر ءَ آئی ءَ وتی واھشت، وتی دو تپلیں زھگانی واھشت ءُ وت دیمھونی دات – ھمے وڈ جنرل اسلم بلوچ، پدائی ریحان اسلم بلوچ، پدائی درویش بلوچ ءُ دگہ نمیرانیں سرانی درور مئے دیم ءَ انت –

نوید بلوچ وتی تامری کلوہ ءِ تہ ءَ دیمتر ءَ گوشیت کہ ھر ھما زرمبشت کہ سوبمند بوتگ آیانی گوستانک ھمے گوشیت کہ اے راجاں جنگ کتگ ءُ وتی دژمن بے سوب کتگ ءُ سوبمندی وتی نام ءَ کتگ کہ مروچی آیاں دیمروئی کتگ – مروچی بلوچ راج ءِ سر ءَ ھم پرز انت کہ آ وتی جنگ ءَ دیم پہ منزل ءَ بہ بر انت وتی دژمن ءَ بے سوب بہ کن انت اگاں ناں آؤکیں وھد ءَ بلوچ راج ھلاس بیت ءُ جھان ءِ نکشہ ءِ تہ ءَ گار بیت –

آ گوشیت کہ پاکستان مئے مات ءُ گھاراں دگانی سر ءَ گران کنگ ءَ انت، مئے مات ءُ گھار ءُ براتانی جوناں چگل دیگ ءَ انت ، پاکستان ھمے لوٹیت کہ بلوچ ھلاس بہ بنت ءُ آئی ءِ چم بلوچ سرڈگار ءِ مڈیاں سک انت آئی ءَ بلوچ نلوٹیت بلوچستان لوٹیت ھمے ھاتر ءَ اے بلوچانی سر ءَ پرز انت ءُ ھک انت کہ وتی سرڈگار، وتی مڈی، وتی راج ءُ وتی ننگ ءُ ناموس ءِ پھریز ءَ بہ کنت –

بی ایل اے مجید برگیڈ جند ندری کنوک ایندگہ ڈیھانی درگت ءَ گوشیت جھان ءِ ھر ڈیھے کہ بلوچ ءِ چکچینی ءَ پاکستان ءِ کمک ءَ کنگ ءَ انت ما آیاں ھم گوشیں کہ آیاں ھم بلوچ راج ءِ ترندیں مزاھمت دیمپانی کنگ کپیت – بلوچ وتی ننگ ءُ ناموس، مڈی ءُ ڈیھے رکینگ ءَ کجام بی ھد ءَ شت کنت ھنچوش کہ بلوچ ءَ پیش دیمھونی داتگ ءُ دیمتر ءَ ھم اے کاروان تاں آجوئی ءَ دیما روان کنت –

نوید پنام ءِ اسلم زالبولاں دلگوش گور کنان کنت ءُ گوشیت من بلوچ زالبولاں گوشگ لوٹاں کہ آ ھر چی کُت کنان ھنچوش کہ شاری بلوچ ءَ بلوچ راج ءُ جھان ءِ دیم ءَ پدر کتگ – بلوچ زالبول ھرچی کت کناں آیانی سر ءَ اے ھم پرز انت کہ آ کجام ھم دروشم ءَ اے جنگ ءِ بھر جوڈ بہ بنت، ھنچوش مہ نند انت –

آئی ءَ گوشتگ کہ ھنچوش کہ ما وتی پیرینانی سر ءَ لنکک چست کنیں کہ پرچا آیاں جنگ نہ کتگ بوت کنت مروچی ما وشھال زند ءِ گوازینگ ءَ بوتینیں بلے مروچی اے جاور مئے سر ءَ کپتگ انت اگاں مروچی ما چیزے ءِ کنگ ءَ بے سوب بوتیں گڈا مئے پدریچ مارا لانت دنت – مروچی مئے رککگ ھمے جنگ ءَ گون بندوک انت اگان وتی رکینگ ءَ لوٹیں گڈا اے جنگ ءِ بھر جوڈ بہ بئیں –

نوید بلوچ وتی کلوہ ءِ تہ ءَ گوشیت کہ بید دیمھونی دیگ ءَ جھان ءِ ھچ راج وتی آجوئی ءَ گپت نہ کنت ھمے ھاتر ءَ وتی زاتی واھشتان کربان کنگی انت ءُ آجوئیءِ جنگ ءِ بھر جوڈ بوگی انت –

مجید برگیڈ جند ندری کنوک وتی کلوہ ءَ گوں اے گڈی گالاں آسر کنت کہ بی ایل اے زندہ باد، مجید برگیڈ زندہ باد –

ھمے تامر ءِ دومی بھر ءَ بی ایل اے مجید برگیڈ ءِ دومی جند ندری کنوک مقبول بلوچ پنام قائم بلوچ وتی کلوہ ءِ تہ ءَ گوشیت منی اے کلوہ پہ بلوچ ورنایانی نام ءَ انت من وتی ماتیں سرڈگار ءِ پھازگ ءَ پہ جنگ ءِ راہ گچین کتگ مروچی ما یک ھنچیں کاروان ءِ بھرے جوڈ بوتگیں کہ پہ آجوئی ءَ جھد کنگ ءَ انت –

مقبول پنام ءِ قائم گوشیت کہ پہ آجوئی ءِ گرگ ءَ تاں ما وتی جاناں کربان نہ کنیں گڈا گلامے ءِ نام ءَ زانگ بہ ایں مارا وتی راجی پجار ءِ رکینگ ءَ وتی جان ءُ واھشات کربان کنگی انت ھنچوش کہ سنگت شاری بلوچ ءَ وتی زند، وتی واھشات کربان کتگ انت مارا ھم وتی سرڈگار ءِ ھاتر ءَ دراہ کربان کنگی انت –

مقبول دیمتر ءَ گوشیت کہ من ھما مردمانی منت ءَ گراں کہ آیاں مناں مجید برگیڈ ءِ بھر بوگ ءِ موہ داتگ تانکہ من وتی ماتیں سرڈگار ءِ ھاتر ءَ چیزے کت بہ کناں –

مقبول بلوچ ھم وتی کلوہ ءَ گوں اے گالاں آسر کنت کہ مجید برگیڈ زندہ باد بی ایل اے زندہ باد –

تامرے گُڈسر ءَ مجید برگیڈ ءِ ھردو جند ندری کنوک وڈ وڈیں سلاھانی گوم ءَ پیشدارگ بوتگ انت وھدیکہ گڈسر ءَ اے ھم پیش دارگ بوتگ کہ کساس دھ سلاہ بندیں مردم پوجی ٹریننگ کنگ ءَ انت –

چہ ھب چوکی ءَ دو مردمانی آوار جنی ءِ بگیری ءَ ھب مزن شھدگ ءَ نندانک برجاہ انت، وھدیکہ دگ بند بوگ ءَ مساپر بازیں دلسیاھیانی آماچ انت، مساپر ءُ بار کشیں گاڑیانی لین لگ اِتگ انت –

گیشیں ھالانی رِد ءَ دوشی شپ ءِ ادار دو ءَ کراچی پولیس ءَ مزنیں کچے ءَ گِسے ءِ سر ءَ بیڑ برتگ ءُ دو مردم آوار جتگ انت کہ آھانی دزگیری ءِ بگیری ءَ دمگی مردم ءُ کھول ءِ نیمگ ءَ نندانک جنگ بوتگ ءُ چریشی ءَ ھب، وندر، بند مراد ءُ ھب شھدگ بند کُتگ انت کہ گوستگیں بازیں ادار ءِ بیت یکشل ءَ بند انت –

کراچی پولیس ءَ ھب چوکی ءَ بیڑ ءِ میان ءَ میونسپل کارپوریشن ھب ءِ کونسلر جعفر رند ءُ آئی ءِ برات دزگیر کتگ ءُ گوں وت برتگ انت –

کراچی پولیس ءِ ماں ھب بیڑ برگ ءُ میونسپل کارپوریشن ھب ءِ کونسلر جعفر رند ءُ آئی ءِ برات ءِ دزگیری ءِ بگیری ءَ ھب، وندر بند مراد ءَ ھوار دگہ جاھاں دگ بند کنگ بوتگ انت چریشی ءِ سوب ءَ گڈی ھالاں تاں دگ سرجمی ءَ بند بوتگ –

بلدیاتی ادارھانی سروک، کونسلر، جتاجتائیں سیاسی پاٹیاں بندوکیں باسک ءُ رھشوناں ھوار دمگی مردماں مزنیں کچے ءَ جعفر رند ءُ آئی ءِ برات ءِ دزگیری ءِ بگیری ءَ گوستگیں شپ ءَ ھب بائی پاس ءَ نندانک جتگ چریشی ءِ سوب ءُ سندھ ءُ بلوچستان ءَ رؤکیں سرجمیں گاڑی اوشت آماچ بوتگ انت ءُ سندھ بلوچستان ءِ زمینی رؤگ ءُ آیگ ءِ راہ بند بوتگ –

دزگیر کنگ بوتگیں مردمانی کھول ءِ گوشگ انت کہ شپ ءِ نھنگام ءَ لس مردمی پوشاک گوریں بازیں کارمنداں زورانسری گِس ءِ تہ ءَ دور کتگ جعفر رند ءُ آئی ءِ برات دزگیر کتگ ءُ گوں وت برتگ انت ھنوں مارا ھال سربوتگ کہ آ کراچی پولیس ءَ دزگیر کتگ انت –

درنگاز کنوکانی گوشگ انت کہ پولیس ءِ چو دُزانی وڈا گِس ءَ دور کنگ بید وارنٹ مردمانی آوار جنگ دزگیری ءِ نہ انت – مئے نندانک تاں ھما وھد ءَ برجاہ بیت تانکہ ھب ءِ واکدار گوں ما سنجیدگی ءَ گوں گند ءُ نند نہ کنت ءُ دزگیری مردماں یل نہ کن انت –