TBP Balochi

چہ ھب چوکی ءَ دو مردمانی آوار جنی ءِ بگیری ءَ ھب مزن شھدگ ءَ نندانک برجاہ انت، وھدیکہ دگ بند بوگ ءَ مساپر بازیں دلسیاھیانی آماچ انت، مساپر ءُ بار کشیں گاڑیانی لین لگ اِتگ انت –

گیشیں ھالانی رِد ءَ دوشی شپ ءِ ادار دو ءَ کراچی پولیس ءَ مزنیں کچے ءَ گِسے ءِ سر ءَ بیڑ برتگ ءُ دو مردم آوار جتگ انت کہ آھانی دزگیری ءِ بگیری ءَ دمگی مردم ءُ کھول ءِ نیمگ ءَ نندانک جنگ بوتگ ءُ چریشی ءَ ھب، وندر، بند مراد ءُ ھب شھدگ بند کُتگ انت کہ گوستگیں بازیں ادار ءِ بیت یکشل ءَ بند انت –

کراچی پولیس ءَ ھب چوکی ءَ بیڑ ءِ میان ءَ میونسپل کارپوریشن ھب ءِ کونسلر جعفر رند ءُ آئی ءِ برات دزگیر کتگ ءُ گوں وت برتگ انت –

کراچی پولیس ءِ ماں ھب بیڑ برگ ءُ میونسپل کارپوریشن ھب ءِ کونسلر جعفر رند ءُ آئی ءِ برات ءِ دزگیری ءِ بگیری ءَ ھب، وندر بند مراد ءَ ھوار دگہ جاھاں دگ بند کنگ بوتگ انت چریشی ءِ سوب ءَ گڈی ھالاں تاں دگ سرجمی ءَ بند بوتگ –

بلدیاتی ادارھانی سروک، کونسلر، جتاجتائیں سیاسی پاٹیاں بندوکیں باسک ءُ رھشوناں ھوار دمگی مردماں مزنیں کچے ءَ جعفر رند ءُ آئی ءِ برات ءِ دزگیری ءِ بگیری ءَ گوستگیں شپ ءَ ھب بائی پاس ءَ نندانک جتگ چریشی ءِ سوب ءُ سندھ ءُ بلوچستان ءَ رؤکیں سرجمیں گاڑی اوشت آماچ بوتگ انت ءُ سندھ بلوچستان ءِ زمینی رؤگ ءُ آیگ ءِ راہ بند بوتگ –

دزگیر کنگ بوتگیں مردمانی کھول ءِ گوشگ انت کہ شپ ءِ نھنگام ءَ لس مردمی پوشاک گوریں بازیں کارمنداں زورانسری گِس ءِ تہ ءَ دور کتگ جعفر رند ءُ آئی ءِ برات دزگیر کتگ ءُ گوں وت برتگ انت ھنوں مارا ھال سربوتگ کہ آ کراچی پولیس ءَ دزگیر کتگ انت –

درنگاز کنوکانی گوشگ انت کہ پولیس ءِ چو دُزانی وڈا گِس ءَ دور کنگ بید وارنٹ مردمانی آوار جنگ دزگیری ءِ نہ انت – مئے نندانک تاں ھما وھد ءَ برجاہ بیت تانکہ ھب ءِ واکدار گوں ما سنجیدگی ءَ گوں گند ءُ نند نہ کنت ءُ دزگیری مردماں یل نہ کن انت –

سرجمیں بلوچستان ءَ ورنایانی بیگواھیانی درچ یکشل ءَ ترندی ءَ گوں برجاہ اَنت ، بیست ءُ چار ادارانی تہ ءَ ھشت مردمانی بیگواھی ءِ ھال راست کنگ بیتگ انت ءُ ھمے داب ءَ دو مردم یل بیتگ اَنت-

بلوچستان ءِ بنجاھی شھر شال ءَ ھال اِنت کہ پاکستانی پوج ءَ فری میڈیکل ءِ نودربر آوار جنگ ءَ پد بیگواہ کتف – بیگواہ کنگ بیتگیں ورنا ءِ پجار ابرار شاہ ء سید فقیر شاہ ءِ نام ءَ زانگ بیتگ کہ ھاران ءِ جھمنند گوشگ بوگ ءَ اِنت-

دمگی مردمانی رد ءَ ابرار شاہ ایف ایس سی ءِ نودربرے ءُ اے وھد ءَ شال ءَ فری میڈیکل ءِ چن ءُ لانچ ءَ بیتگ – گوستگیں شپ ءِ ساھت دو ءَ شال ءَ کواری دگ ءَ چلڈرن ھسپتال ءِ نزیک ءَ آئی ءِ کوٹی ءِ سر ءَ پاکستانی پوج ءُ چیریں ادارھاں بیڑ برتگ ءُ دزگیر کنگ ءَ پد بیگواہ کتگ-

ھمے وڑ ءَ بلوچستان ءِ دمگ چہ کیچ ءَ اھوال اَنت کہ شش اگست ءِ شپ ءِ ساھت دوازدہ ءَ پاکستانی پوج ءَ تمپ ءِ دمگ پل آباد ءَ بیڑ برتگ ےُ برکت مراد نامیں مردمے ءِ گیس انگیر کتگ ءُ برکت مراد گوں سَے زھگاں ھوار آوار جتگ ءُ بیگواہ کتگ –

بیگواہ کنگ بیتگیں مردمانی پجار برکت مراد ءُ آئی ءِ زھگ شوکت مراد، بابت مراد ءُ ایاز مراد ءِ ناماں زانگ بیتگ اَنت-

زانگ بہ بیت ایشی ءَ پیش پانزدہ جولائی ءَ پوج ءَ ھمے مرد ءِ لوگ ءِ سر ءَ بیڑ برتگ ءُ اود ءَ جاڑیگیں زھگ ءُ زالبول ءَ لٹ ءُ کٹ کتگ اَنت ءُ بابت مراد آوار جتگ ءُ پد ءَ یل داتگ نی یک رندے پد ءَ بیگواہ کنگ بیتگ –

دومی نیمگ ءَ اھوال اَنت چہ شال ءَ ھمے ماہ ءَ دومی رند ءَ بیگواہ کنگ بیتگیں فیاض علی یل بیتگ ءُ وتی گس ءَ سر بیتگ-

ھمے داب ءَ چہ ھاران ءَ اھوال اَنت یک اگست ءَ بگر داں انگت ءَ پاکستانی پوج ءِ یکشلیں لشکر کشی برجاہ اَنت-

بیڑ ءِ وھد ءَ ھاران ءَ بازیں مردمے پوج ءَ آوار جتگ ءُ بیگواہ کتگ اَنت کہ آیانی توک ءَ نودربر کاشف ایجباڑی، صمد ساسولی، مھمد عیسی ڈومکی ءُ حفیظ لوراجہ ھوار اَنت-

ھمے وڑ چہ کیچ ءَ دوازدہ اگست ءِ شپ ءَ بیڑ ءِ وھد ءَ دزگیر کنگ بیتگیں مراد ء عبدالمالک جھمنند دازن تمپ یل بیتگ ءُ وتی لوگ ءَ سر بیتگ-

سر بیتگین اھوالانی رد ءَ روکپتی بلوچستان ءَ دو کس آوار جنگ ءَ پد بیگواہ کنگ بیتگ اَنت-

گیشیں اھوالانی رد ءَ روکپتی بلوچستان ءِ دمگ مھمد رئیسی ء جاندور جھمنند کسرکند بنامین چاکری ء گل مھمد چھبار ءِ ناماں زانگ بیتگ انت-

اھوالانی رد ءَ اے مردم دیم پہ کسرکند ءَ روگ ءَ بیتگ اَنت کہ ایرانی لشکر ءَ آوار جتگ ءُ بیگواہ کتگ اَنت-

زانگ بہ بیت روکپتی بلوچستان ءَ گوست ءَ ھم ایرانی لشکر ءَ مردم بیگواہ کتگ اَنت-

گوستگیں روچاں رژن انسٹیٹیوٹ “اسٹوڈنٹ ویک” ءَ چارمی تبک ءِ بلوچ نودربر مناہل علی بخش ءَ نامداریں ناولسٹ الیف شفاک ءِ کتاب “The Forty Role Of Love ” ءِ سر ءَ چمشانک ءِ داتگ –

بلوچ جنکوے اے زیبا ءُ مانا داریں چمشانک چاگردی ترامجاھاں شنگ بوتگ ءُ اے تامُر کتاب ءِ نبشتہ کار الیف شفاک ءَ سربوتگ –

کتاب ءِ نبشتکار ءَ اے چمشانک سک باز دوست بوتگ ءُ آئی ءَ وتی انستاگرام اکاؤنٹ ءَ مناہل ھمے تامر شنگ کُتگ ءُ گوشتگ ” آہ منی دل، اے سک باز گرانبھائیں دانک انت، مناہل تئی زیبائیں دانک ءُ کتاب سرا چمشانک ءِ منت وار ” –

زانگ بہ بیت اے ندکار میان استمانی تک ءَ باز نامداریں نبشتکارے ءُ آئی بازیں زانشتی ءُ لبزانکی سوگات دیگ بوتگ وھدیکہ کساس پنجاہ ءُ پنچ زباناں آئی ءِ کتاب رجانک کنگ بوتگ انت –

دومی نیمگ ءَ رژن انسٹیٹیوٹ ءِ ماسٹرانی گوشگ انت کی رژن انسٹیٹیوٹ ءِ ماسٹر ءُ نودربراں ھشت سال کہ بید پگار ءُ بلڈنگ ءَ اے ادارہ ءَ دیم ءَ برگ ءَ انت – سنٹر ءِ بلڈنگ سک ھراب انت ءُ بازیں دلسیاھیاں ابید ھم اے کاروان دیما روان انت – مارا چہ چی ستا لوٹیت کہ یورپ ءِ یک میان استمانی ندکار ءِ ھمے بگوشیت کہ مناہل تئی منت وار اے گرانبھائیں دانک انت –

بلوچستان ءَ ھوار دگہ ھند ءُ دمگاں پاکستانی پوج ءِ زوراکی ءُ زورانسری آوار جنیانی بگیری ءَ کراچی پریس کلب ءِ دیم ءَ دو روچی زھرشانی بنجلے برجم دارگ بوتگ –

اے زھرشانی بنجل بلوچ یکجھتی کمیٹی ءِ نیمگ ءَ مروچی برجم دارگ بوتگ وھدیکہ باندا زھرشانی کنگ ءِ جار ھم جنگ بوتگ –

کراچی زھرشانی ءَ بلوچ یکجھتی کمیٹی ءِ باسکاں ھوار گوستگیں روچاں چہ کراچی ءَ زورانسری آوار جنگ بوتگیں ورنا دادشاہ بلوچ ءِ کھول ھم ھوار بوتگ وھدیکہ درنگاز کنوکانی دست ءَ زورانسری آوار جنگ بوتگیں مردمانی اکس بوتگ انت ءُ آیانی یل کنگ ءِ لوٹ کتگ –

درنگاز کنوکانی گوشگ انت کہ اے زھرشانی بنجل ءِ مول مراد یکبرے پدا بلوچ ورنایانی زورانسری آوار جنی، بلوچستان ءَ برجاھیں ریاستی کریک ڈاؤن ءُ بیگواھیں مردمانی وش ءُ سلامتی کانودی یل کنگ ھاتر ءَ انت – بلوچ یکجھتی کمیٹی زورانسری آوار جنگ بوتگیں مردمانی کھولاں گوں ھمکوپگ انت ءُ مدامی اے ناانساپیانی توار چست کنت –

بنجل ءَ اتکگیں مردمانی گوشگ ات کہ ھمے ماہ ءِ دومی ھپتگ ءَ کساس سِی مردم زورانسری آوار جنگ ءُ بیگواہ کنگ بوتگ انت ءُ ھمک روچ اشی ءِ تہ ءَ گیشی آیان انت – ھمک روچ یک ورنایے پوسٹر جوڈ بوان انت – وھدیکہ ریاست اے درسیں زوراکیانی تہ ءَ سیاسی ءُ پوجی رِد ءَ وتی کرد ءَ پیلو کنان انت ءُ اے زوراکی پاکستان ءِ جوڈ بوگ ءَ بگر تاں روچ مروچی برجاہ انت –

بنجل ءَ اتکگیں چہ کراچی ہاکس بے ءَ پوج ءُ چیریں ادارھانی دست ءَ زورانسری آوار جنگ بوتگیں دادشاہ بلوچ ءِ گھار فوزیہ بلوچ ءِ گوشگ ات کہ یازدہ اگست ءِ شپ ءَ پھازگی لشکر ءَ آئی ءِ گس ءَ بیڑ برتگ ءُ پت ءِ دیم ءَ منی برات زورانسری آوار جتگ ءُ گوں وت برتگ –

فوزیہ بلوچ ءِ رِد ءَ آئی ءِ برات ھم ایندگہ بے گناھیں بلوچ ورنایانی وڈا زورانسری آوار جتگ ءُ مئے کھول ازیت ءِ تہ ءَ کتگ منی برات زوت زاھر کنگ ءُ یل کنگ بہ بیت –

بلوچ یکجھتی کمیٹی کراچی ءَ مروچی بندات بوتگیں زھرشانی بنجل ءَ چہ کراچی ءِ سیاسی ءُ انسانی ھکانی باسکاں گوں لوٹ کتگ ءُ گوشتگ کہ آ بنجل ءَ بیا انت ءُ بیگواھیں مردمانی توار جوڈ بہ بنت –

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گوشتگ بی ایل اے ءِ سرمچاراں کلات، کیچ ءُ شال ءَ پاکستانی پوج ءُ آئی ءِ کمکارانی نشانگ کتگ، بیڑانی تہ ءَ دمگی کارندھے ءَ ھوار دو کارندہ کشتگ اَنت ءُ بازینے زدگ بیتگ اَنت-

آئی ءَ درشان ءَ گوشتگ کہ بلوچ لبریشن آرمی ءِ سرمچاراں کلات ءِ ھند گزگ ءَ بیڑ برتگ ءُ زورگریں پاکستانی پوج ءُ چیریں ادارھانی کارندہ اللہ بخش ء ھمت خان دزگیر کتگ – گپتگیں کارندہ ءَ جست ءُ پدانی وھد ءَ من اتگ کہ بازیں وھدے ءَ زورگریں پاکستانی پوج ءُ چیریں ادارھانی چیردستی ءَ بلوچ جھدکارامی ھلاپ ءَ چاریگری ءَ کار ءَ بیتگ –

آئی ءَ گوشتگ اللہ بخش ءَ اے ھم من اتگ آ کلات، منگچر ءُ کش گوری ھنداں چاریگری ءِ کتگ ءُ زورگریں پاکستانی پوج ءِ دست ءَ وزیر خان، علی نواز ء وزیر خان، لعل مھمد، امان اللہ، امیر مھمد، اکرم، یونس، مھمد خیر، سکندر ءُ رحیم داد زورانسری آوار جنیاں ھوار بیتگ-

جیئند بلوچ ءَ گوشتگ اے مرد ءَ جست ءُ پدانی وھد ءَ من اتگ آئی ءَ دشمن ءِ گوشگ ءَ زبیر جھمنند کلات ءِ شھر ءَ تیرگواری کتگ ءُ کشتگ-

آئی ءَ گوشتگ اللہ بخش ءَ من اتگ آ بازیں وھداں زورگریں پاکستانی پوج ءُ چیریں ادارھانی نیمگ ءَ ڈیتھ اسکواڈز ءِ ھمراھی ءَ آپریشناں دشمنیں لشکر ءِ سوھوکار بیتگ –

بی ایل اے ءِ جارکش ءَ گوشتگ راجی گداری ءِ سبب ءَ بلوچ راجی آمیدگس ءَ اللہ بخش ءَ مرگ ءِ سزا داتگ چریشی ءِ سر ءَ سرمچاراں چاردہ اگست ءِ شپ ءَ نرمک ءَ تیرگواری کتگ ءُ گڈی آسر ءَ سر کتگ-

جیئند بلوچ ءَ درشان ءَ گوشتگ گوستگیں شپ ءَ بلوچ لبریشن آرمی ءِ سرمچاراں کیچ ءِ دمگ درمکول ءُ پیدراک ءِ میان ءَ زورگریں پاکستانی پوج ءِ پوسٹ ءِ یک کارندھے اسنائپر ءِ گون ءَ نشانگ کتگ ءُ کشتگ-

جارکش ءَ گوشتگ یک دگہ بیڑے پانزدہ اگست ءِ شپ ءَ کساس ساھت دَہ ءُ چل ءُ پنچ دمان ءَ شال ءِ شھر ءَ ریلو ءِ اسٹیشن ءِ ھند ءَ زورگریں پاکستانی پوج ءِ سروکی ءَ وتگڑیں پاکستانی پوج ءِ جشن آجوئی ءَ برجم کتگیں مراگش ءِ سر ءَ دزبمبے چگل داتگ – تراک ءِ آسر ءَ مراگش ءِ برجم کنوکیں کارندہ زدگ بیتگ اَنت-

بی ایل اے ءِ جارکش ءَ گوشتگ شال ءِ شھر ءَ ھمک جاہ ءَ پوجی کارندھانی اوشتوک ءَ نشانگ بیوکیں پروش وارتگیں لشکر وتی تاواناں چیر دیگ ءِ جھد ءَ کنت-

جیئند بلوچ ءَ بلوچ لبریشن آرمی اے اُرشانی زمہ واریاں من ایت ءُ ایشی ءِ سر ءَ ستک دار ایت کہ زورگریں پاکستانی پوج ءِ سرجم ءَ درایگ مئے کاروائی برجاہ بنت اِنت-

بلوچستان ءِ کیچ ءُ مستونگ ءَ دو جتاجتائیں وئیلانی اھوال بیتگ اَنت کہ کیچ ءَ زھگانی کشوکیں پت ءَ وتکشی کتگ ءُ مستونگ ءَ گیرت ءِ نام ءَ زالبولے ءَ ھوار سَے مردم کُشگ بیتگ اَنت-

پولیس ءِ رد ءَ کیچ ءِ دمگ کولواہ آشال ءِ جھمنندیں عبدالواحد ء سلیم نامیں مردمے ءَ وتی گٹ ءَ ساد مان کتگ ءُ وتکشی کتگ-

زانگ بہ بیت وتکشی کنوکیں مردم ءَ گوستگیں روچ ءَ لوگی جیڑہ ءِ سبب ءَ وتی دو کسانوکیں زھگانی گُٹ داشتگ ءُ کشتگ اَنت ءُ پد ءَ تتکگ –

پولیس ءِ رد ءَ آئی ءِ لاش چارشمبے ءِ سھب ءَ دمگ ءَ یک درچکے ءَ ٹنگوکے ءِ دروشم ءَ گندگ بیتگ-

ھمے وڑ ءَ مستونگ ءِ دمگ کردگاپ ءَ لڈی دشت ءِ ھند ءَ تیرگواری ءِ وئیلے پیش اتکگ کہ اود ءَ یک زالبولے ءَ ھوار سَے مردم کُشگ بیتگ اَنت-

پولیس ءِ رد ءَ وئیل گمانی دروشم ءَ گیرت ءِ نام ءَ بیتگ ءُ لیویز انتزامیہ ءَ لاش ڈی ایچ کیو ھسپتال ءَ سر کتگ اَنت-

پولیس ءِ رد ءَ وئیل ءِ ھلاپ ءَ ارزی نبشتگ کتگ ءُ جرمکارانی دزگیری ءَ پٹ ءُ پول برجاہ اَنت-

گوادر ءَ چینی شھریانی ءِ سرءَ بلوچ لبریشن آرمی ءِ اُرشءَ پد شھر ءَ کرفیو برجاہ، بازیں دزگیریانی ھال اِنت۔

13 اگست ءِ سھب ءَ بلوچستان ءِ تیاب دپی شھر سی پیک ءِ ھاترءَ بنجاھی بَندر گوادر ءَ چینی کاروان ءِ سرءَ بلوچ لبریشن آرمی ءِ “مجید برگیڈ” ءِ نیمگ ءَ بیتگیں اُرش ءَ پد پاکستانی لشکریانی نیمگءَ شھر ءِ جتاھیں ھنداں فقیر کالونی، مونڈی ءَ پٹ پولی بیڑ ءِ نیام ءَ بازیں مردم دزگیر کنگ ءَ پد ناشناسیں ھنداں برگ بیتگ اَنت۔

شھر ءِ تہءَ لشکری ءُ پولیس ءِ نیمگ ءَ دگ ءُ راھانی بندش گوستگیں سئے روچاں چہ برجاہ اِنت وھدیکہ جتاھیں ھندانی تہءَ لشکری لوگ پہ لوگ پٹ پولی بیڑ برگ ءَ اَنت۔

اھوالانی ردءَ گوستگیں روچ ءَ چہ گوادر ءَ روکپتی بلوچستان ءَ سیاسی داروکیں پنچ جنین آدم پھازگی واکداراں دزگیر کُتگ ءُ گوں وت برتگ اَنت کہ جُست ءُ پرُس ءَ پد مروچی پولیس ءِ دستءَ دئیگ بیتگ اَنت۔

پولیس ءَ فارن ایکٹ ءِ ارزی نبشتہ کُتگ ءُ جنین آدم آمید گِس ءَ پیش کُتگ اَنت کہ آ رندترءَ بندی جاہ ءَ برگ بنت۔

زانگ بہ بیت کہ گوادر ءَ چینی شرکت ءَ کارکنوکیں چینی شھری پاکستانی پھازگی لشکریانی یک کاروان ءِ یک ترندیں اُرشے تہءَ نشانگ کنگ بیتگ اِت اَنت، اے اُرش ءِ زمہ واری بلوچ لبریشن آرمی ءَ من اتگ اَت ءُ گشتگ اَت اُرش آیانی گل ءِ مجید برگیڈ ءِ نیمگ ءَ کنگ بیتگ۔

بلوچ لبریشن آرمی ءَ اے ارش ءِ تہءَ چار چینی شھری ءُ 11 پاکستانی لشکری کارمندانی کُشگ ءِ زمہ واری من اتگ اَت وھدیکہ گل ءَ چین ءَ 90 روچانی تہءَ بلوچستان ءِ یل کنگ ءِ وھد ھم داتگ۔

مجید برگیڈ ءِ اے ارش ءَ پد شھر ءَ پھازگی لشکریاں ترندیں کچے ءَ پَٹ ءُ پولی بیڑ ءِ بندات کُتگ کہ آ داں انگت برجاہ اِنت وھدیکہ داں انگت بازیں مردم دزگیری ءَ بیگواہ کنگ بیتگ اَنت کہ اشانی تہءَ سئے مردمانی پجار دی بلوچستان پوسٹ ءَ درگپتگ اَت۔

کنگ عبدالعزیز سینٹر فار ورلڈ کلچر آیوکیں ماہ ءَ چل ءُ ھشتمی ٹورنٹو انٹرنیشنل تامر فیسٹیول ءَ وتی تامر ھجان ءِ ورلڈ پریمیئر ڈیبیو ءَ کنت اِنت-

عرب نیوز ءِ رد ءَ آیوکیں وھد ءَ آیوکیں اے تامر سعوی ءِ یک بچکے ءِ کسہ اِنت کہ وتی دوستیگیِ اوشتر ھفیرہ ءِ گون ءَ ڈیھ ءِ ریک پادی ءَ سپر ءَ بندات کنت اِنت-

میان اُستمان ءِ نیمگ ءَ ھمے سال ءَ اوشترانی میان اُستمانی سال روچ ءِ دارگ گوشتگ ھجان ءِ متلب اوشتر سوار یا اوشتر ءِ سوھوکار ءُ اے تامر سال دوھزار ءُ بیست ءُ چار ءَ شنگ بوگ ءِ واستا تیار کنگ بیتگ –

اے تامر ءِ تہ ءَ سَے گچینی مردم ازمکار ھوار اَنت آیانی توک ءَ ابوبکر شوقی، پروڈیوسر مھمد حفری ءُ اثرا تامر پروڈکشن ءِ پروڈیوسر ماجد سمان ءَ آیوکین ماہ ءَ میان اُستمانی تکاں ڈیبیو کنگ ءَ پیسر عرب نیوز ءَ گچینی رنگ ءَ گپ ءُ تران کتگ-

ماجد سمان ءَ گوشتگ ما اثرا تامر پروڈکشن ءِ گون ءَ اے دراج کشیں کسہ سعودی ءِ ٹک ءُ نشان دنیا ءِ دیم ءَ پیش کنگ ءَ باز وشی اِنت-

آئی ءَ گوشتگ کہ مئے مشن سعودی عرب ءَ گیش بوتگیں تامرکاری ءِ تکاں دیم ءَ برگ ءُ سنیماھاں پیش کنگ ءِ درکاری اِنت-

سمان ءَ گوشتگ کہ اثرا تامر ءِ جوڑ کنگ ءَ باز کمک کتگ بیتگ دو ھزار ءُ بیست ءُ دو ءِ گڈی ماھاں تامر ءِ اکسبندی گوریچانی روکپتی سعودی ءَ بیتگ ءُ ایشی ءِ ھواری ءَ اردون ءَ ھم اکسبندی کتگ بیتگ-

مصر ءُ اسٹریا ءِ دو گچینی شھری ءِ داروکیں ازمکار ابوبکر شوقی ءِ اے دومی فیچر تامر اِنت ایشی ءَ پیش آئی ءِ اولی تامر دوھزار ءُ ھژدہ ءَ فلم فیسٹیول ءَ پیش کنگ بیتگ-

پاکستانی لشکرءَ نوشکی ءَ چہ یک ورناھے دزگیر کنگ ءَ پد زورانسری بیگواہ کُتگ۔

اھوالانی ردءَ پاکستانی لشکریاں دوروچ ساری نوشکی کلی جمالدینی ءَ لوگے سرءَ بیڑ بران ءَ لوگءَ ساڑئیں مردم لٹ شاپی ءِ آماچ کنگ ءَ پد عاطف ء ماسٹر عادل خان دزگیر کُتگ ءُ گوں وت برتگ۔

بلوچستان ءَ زورانسری بیگواھیانی درچ برجاہ اِنت وھدیکہ جُنزوکیں ماہءَ زورانسری بیگواھیانی وئیلانی تہءَ گیشی اَتکگ۔ مروچی خضدار، خاران ءُ نوشکی ءَ ھوار گوادر ءَ چہ بازیں مردمانی زورانسری بیگواھی ءِ ھال دیما اَتکگ۔

گوستگیں روچاں سرجمیں بلوچستان ءَ چہ زورانسری بیگواھی ءِ بیست وئیل رپورٹ بیتگ اَنت وھدیکہ دو روچانی دگہ گشت مردمانی زورانسری بیگواھی ءِ اھوال سربیتگ اَنت چمودہ گوادر ءَ گیشتر زورانسری بیگواھیانی اھوال پیداک اَنت البت داں انگت مردمانی پجار کنگ نہ بیتگ۔