TBP Balochi

بلوچستان ءِ دمگ چہ کیچ ءَ اھوال اَنت لوگ ءَ ناوشی ءِ سبب ءَ پت ءَ وتی کسانوکیں زھگ کُشتگ اَنت-

وئیل کیچ ءِ ھند کولواہ آشال ءِ ھند ءَ پیش اتکگ –

پولیس ءِ رد ءَ کولواہ ءِ میتگ آشال ءَ عبدالواحد ء سلیم نامیں مردمے ءَ لوگ ءَ ناوشی ءَ پد وتی کسانوکیِ زھگ پنچ سالی ئیں مینا ءُ شش سالی ئیں ایان ءِ گٹ ءَ ساد مان کتگ ءُ کشتگ اَنت-

اے دردناکیں وئیل ءَ پد دمگ ءَ کوکار مَچ اتگ انت ءُ لیویز فورس ءَ جرمکار دزگیر کتگ ءُ گیشیں پٹ ءُ پول کنگ ءَ اِنت-

کیچ ءَ اے دابیں وئیل بنداتی وئیل اِنت کہ ناوشی ءَ دیم ءَ آیگ ءَ اِنت کہ اود ءَ یک پتے ءَ وتی دو کسانوکیں زھگانی گٹاں ساد مان کتگ ءُ دراتکگ اَنت-

چد ءَ پیش دابیں وئیل بلوچستان ءَ دیم ءَ نیتکگ اَنت کہ آ دردناکیں رنگے ءَ مھلوک ءِ دل ءُ لاپاں درد ودی بہ کن اَنت-

بلوچستان ءِ تیاب دپی شھر گوادر ءَ چینی انجیئرانی کاروان ءِ سرءَ بیتگیں اُرش ءَ پد پاکستانی لشکریاں بازیں مردم دزگیر کُتگ اَنت، داں انگت دزگیریءَ پر بیگواہ بیتگیں مردمانی تہءَ سئے مردمانی پجار بیتگ۔

ھندی اھوالانی ردءَ اُرشءَ پد گوادر شھر سرجمی ءَ پوجی انگرءَ اِنت وھدیکہ ھندی آباتی ءِ سرءَ پوجی بیڑ یکشل ءَ برجاہ اِنت کہ آودہ لشکری جتاھیں ھنداں لوگ لوگ بیڑ برگ ءَ اِنت۔

اھوالانی گُشگ اِنت کہ گوستگیں بیگاہ ءِ ادار شش ءَ لشکریاں بخشی کالونی ءَ چہ بازیں مردم دزگیر کُتگ اَت کہ چریشاں سئے مردمانی پجار نوید ء یعقوب جھمنند نیو ملا بند، ظہیر جھمنند بخشی کالونی ءُ جہانزیب ءِ ناماں چہ بیتگ۔

زانگ بہ بیت کہ ‏گوادر شھر ءَ پاکستانی لشکریاں جتاھیں ھنداں راہ بستگ ءُ رؤگ ءُ آیگ ءَ بند کُتگ۔

شھریانی گُشگ اِنت کہ راھانی بندش ءَ چہ اسکولانی نودربراں ھوار دگہ مردماں جنجالانی دیمپانی کنگ کپگ ءَ اِنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءِ تہ ءَ گوشتگ کہ مئے سرمچاراں بولان، تربت، پنجگور، کلات ءُ مستونگ ءَ ھشت جتاجتائیں اُرشاں زورگریں پاکستانی پوج ءُ وتگڑیں پاکستانی آجوئی ءِ روچ ءَ مراگش نشانگ کتگ اَنت چریشاں چار کارندہ مرتگ ءُ بازینے زدگ بیتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں گوستگیں روچ ءَ بولان، کولپور ءَ وتگڑیں پاکستانی آجوئی ءِ مراگش ءَ برجم کنوکیں مردمانی سر ءَ ھما وھد ءَ دزبمبے چگل داتگ کہ آ ماشا ء اللہ ھوٹل ءِ گور ءَ مُچ بوگ ءَ بیتگ اَنت چریشی ءِ سبب ءَ کارندہ زدگ بیتگ اَنت –

آئی ءَ گوشتگ کہ گوستگیں شپ ءَ بی ایل اے ءِ سرمچاراں تربت ءِ شھر گنہ ءِ ھند ءَ زورگریں پاکستانی پوج ءِ بنجاھی بنجل ءِ سر ءَ گرنیڈ لانچر آس داتگ انت ءُ چریشی ءَ دشمن ءِ سَے کارندہ زدگ بیتگ انت ءُ آیاں مالی تاوان بیتگ اَنت-

جیئند بلوچ ءَ گوشتگ کہ سیزدہ اگست ءِ شپ ءَ بلوچ لبریشن آرمی ءِ سرمچاراں گوکدان ءِ ھند ءَ یک کریش پلانٹے ءِ سر ءَ بیڑ برتگ ءُ زورگریں پوج ءِ کمکار صدام حسین ء مھمد یاسین جھمنند لودھراں پنجاب ءُ مھمد ثاقب ء مھمد مرسلین جھمنند بھاولنگر پنجاب تیرگواری کتگ ءُ کشتگ اَنت –

آئی ءَ گوشتگ کہ گوستگیں شپ ءَ بی ایل اے ءِ سرمچاراں پنجگور ءِ شھر ءَ ڈپڑی کمشنر ءِ ھاؤس ءِ سر ءَ یک دزبمبے چگل داتگ – اُرش کنگ بیتگیں ڈی سی ءِ سروکی ءَ وتگڑیں پاکستانی آجوئی ءَ برجم کنگ ءَ بیتگ اَنت-

درشان ءَ گوشگ بیتگ کہ بی ایل اے اے مرد ءَ را سرپد کنگ آ زورگریں پوج ءِ گوشگ ءَ اے دابیں دشمن کار مہ کنت اگاں ناں گڑا وتی جانی ءُ مالی تاوانانی زمہ وار وت بہ بیت اِنت-

جارکش ءَ گوشتگ کہ یک دگہ اُرشے پنجگور ءِ دمگ گچک ءَ سیزدہ اگست دوھزار ءُ بیست ءُ سَے ءِ شپ ءَ بی ایل اے ءِ سرمچاراں زورگریں پاکستانی پوج ءِ کارندہ ھما وھد ءَ نشانگ کتگ انت آ گشت کنگ ءَ بیتگ انت – اُرش ءِ آسر ءَ دشمنیں لشکر ءَ تاوانانی دیمپانی کنگ کپتگ-

جیئند بلوچ ءَ گوشتگ بلوچ لبریشن آرمی ءِ سرمچاراں کلات ءِ دمگ منگچر ءَ سیزدہ اگست دو ھزار ءُ بیست ءُ سَے ءِ شپ ءَ زورگریں پاکستانی پوج ءِ بنجاھی بنجل ءِ واستا پھریزوکیں چوکی پشت ما پشت ءَ دو نیمگ ءَ اُرش کتگ ءُ سرمچاراں بازیں گرنیڈ لانچرانی گون ءَ دشمن ءِ کارندھانی سر ءَ بازیں آس داتگ ءُ نوکیں سلاھانی گون ءَ اُرش کتگ-

اُرش ءَ دشمن ءِ دو کارندہ مرتگ انت ءُ دشمن ءَ دگہ جانی تاوان بیتگ اَنت – اُرش ءَ پد پروش وارتگیں لشکر ءَ جتا جتائیں نیمگاں لس آبادی ءِ سر ءَ تیرگواری کتگ ءُ چریشی ءَ تمب ءَ نندوکیں شوانگ عبدالنبی سرمستانی بیران بیتگ-

گڈسر ءَ آئی ءَ گوشتگ بی ایل اے ءِ سرمچاراں یازدہ اگست دوھزار ءُ بیست ءُ سَے ءِ شپ ءَ مستونگ ءَ دو دزبمب اُرشاں پولیس لائن ءُ میونسپل کمیٹی آفس نشانگ کتگ انت تراک ءِ آسر ءَ زورگریں پوج ءِ چانیگواریں پولیس ءَ مالی تاوانانی دیمپانی کنگ کپتگ-

بلوچ ریپبلکن گارڈز ءِ جارکش دوستین بلوچ ءَ گُشتگ کہ مئے سرمچاراں گوستگیں شپءَ شال ءَ قوضہ گیریں پاکستانی پولیس یک بمب تراکے ءَ نشانگ کُتگ اَنت۔

آئی ءَ گُشتگ بی آر جی ءِ سر مچاراں کیچی بیگ تھانہ ءِ سرءَ دستی بمب ءَ گوں اُرش کُتگ، تراکے آسرءَ زوگیپتیں پولیس ءَ جانی ءُ مالی تاوان بیتگ۔

جارکش ءَ گُشتگ مئے گل اے اُرش ءِ ذمہ واری ءَ من آیت ءُ قوضہ گیریں پاکستانی پوج ءِ بلوچستان ءَ چہ درکپگءَ داں مئے اُرش برجاہ مان اَنت۔

بلوچستان لبریشن فرنٹ ءِ جارکش میجر گھرام ءَ وتی شنگ کُتگیں درشانے تہءَ گُشتگ کہ بی ایل ایف ءِ سرمچاراں کیچ ءِ ھند گورکوپ ءَ زورگریں پاکستانی لشکر ءِ بنجل ءِ سر ءَ اُرش کُرتگ ءُ دو کارمند کُشتگ ءُ دو ٹپی کُرتگ۔

جارکش ءِ ردءَ سرمچاراں 14 اگست ءِ بیگاہ ءِ ھپت ءُ نیم ءَ گورکوپ، سْھروردی ءَ برجاھیں زورگریں پاکستانی لشکر ءِ بنجل ءِ سر ءَ راکٹ ءُ ٹوھیں سلاھاں گوں اُرش کُرتگ، راکٹ ءِ گولا بنجل ءِ تہ ءَ کپتگ اَنت چہ ایشی ءَ زورگریں لشکر ءِ دو کارمند مُرتگ ءُ دو سَک ٹپی بیتگ۔

آئی ءَ گُشتگ اُرش ھما وھد ءَ کنگ بیتگ وھدے لشکری کارمند بنجل ءِ تہ ءَ وتگڑیں چاردہ اگست ءِ شاتکامی ءَ برجم دارگ ءَ بیتگ اَنت۔ راکٹ ءِ دو گولا بنجل ءِ تہ ءَ کپتگ ءُ پد ءَ سرمچاراں گوں نوکیں سلاھاں بنجل ءِ پھازگی سنگر نشانگ کُرتگ اَنت۔

میجر گھرام ءَ گُڈسرءَ گُشتگ کہ بلوچستان لبریشن فرنٹ اُرش ءِ زمہ واری ءَ منّ ایت، ءُ دُژمنیں لشکر ءِ سر ءَ مئے اُرش داں زورگیپتیں بلوچستان ءِ آجوئی ءَ برجاہ بنت۔

بلوچستان ءِ دمگ ھزدار ءَ پاکستانی پوج ءَ یک مردمے دزگیر کنگ ءَ پد بیگواہ کتگ-

گیشیں اھوالانی رد ءَ ھزدار کھنڈ ءِ جھمنند فضل یعقوب ء مھمد یعقوب گوستگیں شپ ءِ ساھت یک ءِ نزیک ءَ چہ جند ءِ لوگ ءَ زورانسری آوار جنگ بیتگ-

کھول ءِ رد ءَ ھپت ویگو گاڑیاں سواریں پاکستانی پوج ءِ کارمند لوگ ءَ مانریتکگ اَنت ءُ زھگ ءُ زالبول اش لٹ ءُ کُٹانی نشانگ اش کتگ انت ءُ فضل بلوچ دزگیر کنگ ءَ پد ناشناسیں جاھاں برتگ ات ءُ چریشی ءَ پد آئی ءِ درگت ءَ ھچ اھوال نیست اِنت-

کھول ءِ گوشگ اِنت چریشی ءَ پد پولیس اسٹیشن ءَ شتگ اِنت وئیل ءِ ھال داتگ گڑا پولیس ءَ ناروائیں ھیال درشان کتگ اَنت ھمے وڑ پد ءَ ڈپٹی کمشنر ھزدار ءَ رھوت کتگ ءُ وئیل ءِ بارو ءَ گپ جتگ گڑا آئی ءَ گپ اشکتگ ءُ پون بند کتگ-

کھول ءِ گوشگ اِنت فضل بلوچ بھاوالدین زکریا یونیورسٹی ملتان ءَ گریجویشنے کتگ ءُ آ ایجوکیشنل گل سیو اسٹوڈنٹس فیوچر ءِ بنھشت ایر کنوک ءُ گل ءِ گوستگیں سروک ھم بیتگ-

زانگ بہ بیت دو روچ ءَ پیسر فضل بلوچ ءِ براتزتک شمس بلوچ ھم پاکستانی پوج ءُ چیریں ادارھانی کارمنداں آئی ءِ لوگ ءَ آوار جتگ ءُ گون وت برتگ کہ داں انگت بیگواہ اِنت ھمے داب ءَ دمگی انتزامیہ ارزی ءِ نبشتگ کنگ ءَ ابید ایس ایچ او عبداللہ پندرانی کھول ءَ ترسینگ اِنت-

روکپتی بلوچستان ءَ پاھو ءِ ھکم ءِ آیگ ءَ پد بندیگیں ورنایے زمانتے سر ءَ یل کنگ بیتگ-

گیشیں اھوالانی رد ءَ روکپتی بلوچستان ءِ بنجاھی شھر زاھدان ءَ گوستگیں سال ءِ پنچ اکتوبر ءَ ڈیھ ءِ ھلاپ ءَ بیوکیں زھرشانیانی پژدر ءَ دزگیر بیتگیں شعیب میر بلوچ زئی یل کنگ بیتگ-

گیشیں اھوالانی رد ءَ شعیب میر بلوچ زئی گوستگیں سال ءَ دزگیر کنگ بیتگ ءُ چریشی ءَ پد آئی ءِ سر ءَ ایرانی آمیدگس ءَ پاھو ءِ ھکم داتگ بیتگ –

شعیب میر بلوچ زئی ءِ بندیگی ءِ ھلاپ ءَ چاگردی ترامجاھاں کمپئن ھم ھل اتگ ءُ انسانی ھکانی باسکاں ھم آئی ءِ یل کنگ ءِ لوٹ کتگ بیتگ-

شعیب میر بلوچ زئی گوستگیں روچ ءَ زمانت ءِ سر ءَ ماں زاھدان ءِ زندان ءَ یل کنگ بیتگ ءُ وتی گس ءَ سر بیتگ-

زانگ بہ بیت روکپتی بلوچستان ءَ زھرشانیانی پژدر ءَ بازین مردمے دزگیر کنگ ءُ بازیں مردمے کشگ ءُ زدگ کنگ بیتگ ات اَنت-

اے زھرشانی گوستگیں سال ءِ ستمبر ماھ ءَ بندات بیتگ ات اَنت کہ چریشی ءَ پد اود ءَ ھونی جاور ودی بیت اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ بلوچستان ءِ دمگ مشکے، گچک، شاپک، جھاؤ، پیراندر، مالار ءُ کولواہ ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ ءُ گوشتگ کہ مئے سرمچاراں چاردہ اگست ءِ مراگشاں دزگٹیں زورگریں پاکستانی پوج ءِ بُنجل ءُ پانگسانی سر ءَ اُرش کُتگ ءُ اے اُرشاں کم چہ کم دہ کارمند مرتگ ءُ دہ زدگ بوتگ انت –

جارکش میجر گوھرام ءِ رِد ءَ بلوچستان لبریشن فرنٹ ءِ اُرشانی دْرچ چہ دوازدہ اگست ءَ بندات بوتگ اَنت – دوازدہ اگست ءِ شپ ءِ ھشت ءَ پنجگور ءِ کھن گچک ءَ برجاھیں زورگریں پوج ءِ بُنجل ءِ سر ءَ راکٹ ءُ ٹوھیں سلاھانی سر ءَ اُرش کُتگ، اُرش ءَ یک پوجی کارمندے مُرتگ ءُ یکے زدگ بوتگ –

دوازدہ اگست ءِ شپ ءِ دہ ءُ نیم ءَ سرمچاراں کیچ ءِ ھند شاپُک ءَ بارگ ءِ کوہ ءِ سر ءَ برجاھیں پاکستانی پوجءِ پانگس ءِ سر ءَ راکٹ ءُ ٹوھیں وتکاریں سلاھانی گون ءَ اُرش کُتگ، اُرش ءَ زورگریں دُژمن ءِ یک کارمندے مُرتگ ءُ یکے زدگ بوتگ –

جارکش ءِ رِد ءَ بلوچ سرمچاراں آواران ءَ یکشمبے ءِ روچ ءَ سیزدہ اگست ءَ زورگری پاکستانی پوج ءِ سر ءَ چار جتائیں جاھاں اُرش کُتگ-

اولی اُرش بیگاہ ءِ ھپت ءَ آواران ءِ ھند جھاؤ ءِ نوندڑہ ءَ بدرنگ ءَ برجاھیں زورگریں پوج ءِ پانگسے گوں راکٹ ءُ وتکاریں سلاھاں نشانگ کُتگ، اُرش ءَ دو پوجی کارمند مُرتگ انت ءُ یکے سَک باز بوتگ –

دومی اُرش شپ ءِ ھشت ءَ مشکے ءِ ملیش بند ءَ برجاھیں زورگریں پوج ءِ بُنجل ءِ سر ءَ گوں راکٹ ءُ ٹوھیں سلاھاں اُرش کُتگ کہ جنگ داں دیر ءَ برجاہ بوتگ، چہ ایشی ءَ زورگریں پوج ءِ دو کارمند مُرتگ انت ءُ سَے زدگ بوتگ انت –

سیمی اُرش شپ ءِ نوہ ءَ آواران ءِ پیراندر کُچ ءَ برجاھیں زورگریں پوج ءِ بُنجل سر ءَ گوں راکٹ ءُ ٹوھیں سلاھاں اُرش کتگ کہ اے اُرش ءَ یک پوجی کارمندے مُرتگ ءُ یکے زدگ بوتگ-

چارُمی اُرش شپ ءِ دہ ءِ نزیک ءَ مالار کھن آواران ءَ برجاھیں زورگریں پاکستانی پوج ءِ بُنجل ءِ سر ءَ کنگ بوتگ، اے اُرش ءَ ھم راکٹ ءِ ٹوھیں سلاہ کارمرد کنگ بوتگ انت کہ چہ ایشی ءَ دو کارمند مُرتگ انت ءُ یکے سَک باز زدگ بوتگ –

جارکش میجر ءِ رِد ءَ یکشمبے ءِ روچ ءَ سینزدہ اگست ءَ سرمچاراں بیگاہ ءِ ھپت ءُ نیم ءَ کیچ ءِ ھند بلور کولواہ ءَ پاکستانی لشکر ءِ بنجل ءِ سر ءَ اُرش کُتگ ءُ دُژمنیں پوج ءِ یک کارمندے کُشتگ ءُ سَے زدگ کتگ انت –

جارکش ءِ رِد ءَ بلوچ سرمچاراں اے بُنجل ھما وھد ءَ نشانگ کُتگ اَنت وھدے زورگریں پاکستانی پوج وتگڑیں آجوئی ءِ روچ چاردہ اگست ءِ مراگشانی تیاریاں دزگٹ بوتگ انت –

جارکش میجر گوھرام بلوچ ءَ وتی درشان ءِ تہ ءَ گوشتگ کہ بلوچستان یک یک زورگیپتیں ڈیھے کہ پاکستان ءَ دستیگ کُتگ، پمشکا اِد ءَ دُژمن ءَ نہ وتی وتگڑیں آجوئی ءِ مراگشانی برجم دارگ ءِ ھک ھست ءُ نہ کہ موکل دیگ بیت، درامدیں پوج ءُ آئی ءِ ھندی کمکار وتی اِد ءَ وتی وتگڑیں آجوئی ءِ شاتکامیاں برجم بہ دار اَنت، چوشیں مراگش بی ایل ایف ءِ نشانگ ءَ اَنت ءُ پہ آیانی بے سوب کنگ ءَ وتی گُڈی زور ءَ جنت –

آئی ءَ گوشتگ کہ لھتیں چاگرد دُژمن ءُ ایردستی زھن ءِ مردم پہ وتی جند ءِ نپ ءُ سیتاں زورگریں پوج ءِ گون ءَ ھوار اَنت ءُ چاردہ اگست ءِ آجوئی ءِ مراگشانی برجم دارگ ءِ جُھد ءَ کنگ ءَ اَنت۔ پاکستانی پوج ءَ مردمانی مراگشانی بھر جوڑگ ءَ گْوازی، لبزانکی مراگش ءُ دگہ جتائی پندل کارمرد کنگ بوگ ءَ اَنت – چہ راج ءَ دزبندی اِنت کہ چوشیں مراگشاں بھر مہ زور اِت، دانکہ چہ بی ایل ایف ءِ اُرشاں شُمارا جانی ءُ مالی تاوان مہ بیت انت –

جارکش ءَ گوشتگ کہ بلوچستان لبریشن فرنٹ ءُ بلوچ راجی آجوئی زْرمبشت ءَ سرجم ءَ بلوچ راج ءِ کمک گون اِنت کہ زْرمبشت ءَ توانمند کنت ءُ ھر باسمائیں بلوچ زورگریں پاکستان ءِ وتگڑیں آجوئی ءِ روچ ءَ نہ منّ ایت ءُ نہ کہ مراگشاں بھر زور ایت بلے زورگریں پاکستانی پوج بلوچستان ءِ جتائیں دمگاں مردماں پہ زور چہ گِساں کَش ایت ءُ چاردہ اگست ءِ مرگشانی بھر زورگ ءَ بارت داں آیاں وتی مراگشاں چو اسپر ءِ وڑ ءَ کارمرد بہ کنت ءُ چہ بلوچ سرمچارانی اُرشاں وت ءَ بہ پھریز ایت – مردماں چو اِسپر ءِ وڑ ءَ کارمرد کنگ پاکستانی پوج ءِ بلوچ سرمچارانی بگیری ءَ پدریں پروش ورگ اِنت – ریاست ءِ پاکستان ءِ پوج نزورینانی بگیری ءَ زور ءِ کارمرد کنگ ءَ ڈڈّ اِنت بلے جنگ ءِ پِڑ ءَ چہ وتی بٹاکانی پُژدر ءَ مدام بے سوب اِنت – اگست ءِ ماہ ءَ چہ سرمچارانی اُرشانی تُرس ءَ پاکستانی پوج وتی پھازداری ءَ گھتر کن اَنت۔ شھر ءُ کوھی دمگاں بازیں کچے ءَ اُرش کنت ءُ مُچی سزا ءِ رد ءَ لس شھریاں زور بیگواہ کنت،ایشی ءَ ابید ھمک سال ءِ وڑ ءَ اے سال ءَ ھم بلوچ سرمچاراں آئی ءِ مُھکمیں سنگرانی سر ءَ اُرش کُتگ ءُ جانی ءُ مالی تاوان داتگ انت –

گڈسر ءَ میجر ءَ گوشتگ کہ بلوچستان لبریشن فرنٹ اے اُرشانی زمہ واری ءَ منّ ایت ءُ زورگریں ریاست ءِ سیت، پوج ءُ پوج ءِ کمکارانی سر ءَ مئے اُرش داں بلوچستان ءِ آجوئی ءَ برجاہ مان انت –

گوستگیں روچ ءَ گوادر ءَ چینی انجینئرانی کاروان ءِ سر ءَ اُرش کنوکیں پدائی نوید پنام ءِ اسلم ءِ نماز جنازہ بنکی ھنکین ءَ وانگ بیتگ-

نماز جنازہ بنکی ھنکین دشت کپکپار ءِ ھند ءَ وانگ بیتگ ءُ نماز جنازہ ءَ مردماں بازیں کچے ءَ بھر زرتگ-

زانگ بہ بیت گوستگیں روچ ءَ بلوچستان ءِ تیابدپی شھر گوادر ےَ بلوچ لبریشن آرمی ءِ پدائی یونٹ مجید برگیڈ ءَ چینی انجینئرانی کاروان ءِ سر ءَ اُرش ءِ زمہ واری من اتگ ات ءُ گوشتگ ات کہ ات اُرش ءَ بی ایل اے ءِ مجید برگیڈ ءِ باسک پدائین نوید بلوچ ء خدا بخش پنام ءِ اسلم جھمنند دشت نگور تربت ءُ مقبول بلوچ ء پھلان پنام ءِ قائم بلوچ جھمنند آواران گیشکور ءَ سرجم کتگ –

رسانکدراں شنگ کتگیں درشان ءَ بی ایل اے ءِ جارکش جیئند بلوچ ءَ گوشتگ کہ گوادر ءَ چینی انجنیئرانی یک گچینی کاروانے ءِ انگیر کتگ ءُ اُرش کتگ – اے بیڑ زرپھازگ دو اداراں برجاہ بیتگ، بیڑ ءِ ھلاس بوگ ءَ پد مجید بریگیڈ ءِ پدائینانی تیرانی ھلاس بوگ ءَ گڈی تیر ءَ شھیدی ءِ منگہ زرتگ-

روکپتی بلوچستان ءِ دمگ سرباز ءَ پٹرول ءِ یک دکانے ءَ آس کپتگ ءُ چریشی ءَ دکان ستکگ –

گیشیں اھوالانی رد ءَ سرباز ءَ پٹرول ءِ یک دکانے ءَ ناگتی آس کپتگ ءُ چریشی ءَ دکان ستکگ ءُ ایشی ءِ ھواری ءَ یک گاڑی یے ھم ستکگ –

آس ءِ کپگ ءَ پد آس کشیں گاڑی اتکگ ءُ آس توسینگ بیتگ – اھوالانی رد ءَ آس ءِ کپگ ءَ دگہ جانی تاوان نہ بیتگ اَنت بلے مالی تاوانانی دیمپانی بیتگ-

زانگ بہ بیت گوست ءَ ھم روکپتی بلوچستان ءِ دمگ سراوان ءُ دشتیاری ءَ ھم ھمے داب ءَ تیلانی دکاناں آس کپتگ بیتگ انت کہ آیانی سبب زانگ نہ بیتگ انت-