TBP Balochi

بلوچ اسٹوڈنس کونسل لاھور ءِ نیمگ ءَ بلوچستان ءَ ھمے زوتاں نودربرانی زورانسری جنی ءِ تہ ءَ گیشی ءُ بیگواھیں مردمانی یل نہ کنگ ءِ بگیری ءَ لاھور ءَ لبرٹی چار راہ ءَ روانک ءِ کشگ بوتگ –

اے زھرشانی روانک ءَ بلوچ جنک ءُ بچکیں نودربراں ھوار دگہ مردماں بھر زرتگ – درنگاز کنوکانی دست ءَ پاکستانی پوج ءِ دست ءَ آوار جنگ بوتگیں نودربرانی اکس بوتگ انت –

درنگاز کنوکانی گوشگ ات کہ بلوچستان ءَ زورانسری آوار جنیانی تہ ءَ یکرندے پدا گیشی اتکگ – بلوچستان ءِ جتا جتائیں ھند ءُ دمگاں تنی وھدی بازیں نودربر ءُ دگہ مردم آوار جنی ءِ آماچ بوتگ انت ءُ ھچ کس ءِ درگت ءَ آھانی کھول ءَ ھچ وڈیں سرپدی دیگ بوگ ءَ نہ انت کہ آ کجا انت ءُ کجام سوب ءَ آھاں آوار جتگ ءُ بیگواہ کتگ انت –

آھانی گوشگ ات کہ لاھور ءَ نشتگیں مردم مارا بہ چار انت ءُ اندازگ بہ جناں وتی جست ءِپسو ءَ بہ شوھاز انت کہ بلوچ ءِ جیڑہ چی انت، مارا پنجاپ ءِ جھمنندانی نیمگ ءَ مدامی ھنچیں جست کنگ بیت ما مدامی ھر ھمک دومی روچ ءَ وتی سنگتانی یل کنائینگ ءِ ھاتر ءَ زھرشانی کن ایں گڈا شما بہ زان ات کہ مئے جیڑہ چی انت –

لاھور نودربراں بیگواھیں جاوید بلوچ، مرتضی زھری ءُ بلوچستان شھدربر جاہ ءَ آوار جنگ بوتگیں سھیل ءُ فصیح بلوچ ءَ ھوار ایندگہ نودربرانی یل کنگ ءِ لوٹ کتگ –

درنگاز کنوکیں نودربرانی گوشگ ات کہ ما مدامی اِش کنیں ءُ گوشگ بیت کہ بلوچاں آھانی سردار وانگ ءَ نیل انت بلے ما ادا گندگائیں کہ مارا چہ وانگجاھاں آوار جنگ ءُ سالاں سال بیگواہ کنوک سردار ناں بلکنہ اٹک، گجرات، فیصل آباد ءَ ھوار دگہ ھنداں اتکگیں ایف سی کارمند انت – مئے وانگجاھاں بنجل جوڈ کنوک سردار ناں بلکنہ پوجی ادارہ انت –

نودربرانی گوشگ ات کہ بلوچستان ءَ برجاھیں ناھکی دارگ بہ بیت ءُ بلوچ نودربرانی سر ءَ ترس ساھگ ھلاس کنگ بہ بیت ءُ بیگواھیں مردمانی یل کنائینگ سرکار، آمیدگس ءُ انسانی ھکانی ادارہ وتی کرد ءَ پیلو بہ کن انت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، وی بی ایم پی زھرشانی بنجل ءَ مروچی پنچ ھزار ءُ سِی ءُ شش روچ سرجم بوتگ انت – مروچی چہ کلات ءَ سیاسی ءُ چاگردی باسک نسیم بلوچ، خدابخش بلوچ، نور احمد بلوچ ءُ دگہ مردماں اتکگ ءُ کھولانی گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زوراکاں ھر ھمک جاہ ءَ کہ وتی زوراکی برجاہ داشتگ انت گڈا اودے ایردستیں راجاں گھگیری کتگ ءُ چاگرد ءِ تہ ءَ ایمنی آؤرتگ – گوستانک اے گپ ءِ گواہ انت کہ سوبمندی مدامی ایردستیں راجانی بوتگ اے جھان ءِ تہ ءَ بلوچ ھم یک ایردستیں راج یے –

ماما قدیر بلوچ ءَ گوشتگ کہ مردمانی گوستانک اے گپ ءِ گواھی ءَ دنت کہ جھان ءِ ھچ کُنڈ ءَ پہ ھک ءِ ھاتر ءَ چست بوتگیں توار پہ کُشت کوش ءُ زوراکی ءَ ایرموش کنگ نہ بوتگ انت ءُ ناکہ ھلاس کنگ بوتگ انت مدامی زوراکاں وتی ایردستی ءِ برجاہ دارگ ءِ ھاتر ءَ وڈ وڈیں ھُنر ساز اِتگ ءُ ھنو بلوچ راج ءِ گوم ءَ ھم ھمے وڈ کنگ بوگ ءَ انت – آئی ءَ گوشتگ کہ بیا ات اے زمزیلاں پروش اِت ءُ پُرایمنین جھد ءِ بھر جوڈ بہ بے –

ھزدار ءِ دمگ وڈھ ءَ زھرشانی ءِ سوب ءَ کراچی تاں شال ءَ رؤکیں شھدگ سرجمی ءَ بند، چریشی ءَ بازیں مساپر ءِ پنس اِتگ –

گیشیں ھالانی رِد ءَمیراجی ٹک ءِ نیمگ ءَ وڈھ ءُ شاہ نورانی ءَ شال تاں کراچی ءَ رؤکیں شھدگ زھرشانی کنان ءَ سرجمی ءَ بند کتگ –

وڈھ ءِ ھند شاہ نورانی ءَ لیویز ءِ نیمگ ءَ منشیات ءِ کیس ءَ دزگیری ءِ بگیری ءَ کھول شال تاں کراچی ءَ رؤکیں شھدگ بند کتگ –

لیویز ءِ رِد ءَ شاہ نورانی ءَ عاشق علی نامی مردمے سر بازار نشہ ءِ باپاری ءَ کنگ ءَ بوتگ کہ لیویز ءَ آ دزگیر کتگ-

کھول ءِ رِد ءَ چہ لیویز ءِ نیمگ ءَ عاشق علی ءِ سر ءَ بے بُنیں بھتام جنگ بوگ ءَ انت تاں ھما وھد ءَ آ یل کنگ نہ بیت مئے زھرشانی برجاہ بیت انت –

گڈی ھالاں تاں شھدگ سرجمی ءَ بند انت چریشی ءِ سوب ءَ بازیں مساپر کش ءُ بار بریں گاڑی اشتاتگ انت وھدیکہ زالبول ءُ نادراھ سک باز دلسیاھیانی دیمپان انت –

شال فاطمہ جناح نادراھجاہ ءَ کانگو وائروس ءِ آماچیں زالبول ءِ بیران بوتگ –

نادراھجاہ ءِ واکدارانی رِد ءَ زالبول ءِ سیادی چہ اوگان ءَ بوتگ کہ ھنوں ادارکی کچلاک ءَ نندوک بوتگ –

اے درگت ءَ نادراھجاہ ءِ واکدارانی گوشگ انت کہ ھمے سال ءَ کانگو وائروس ءِ آماچ بوتگیں اے چارمی نادراھ انت کہ بیران بوتگ –

واکدارانی رِد ءَ فاطمہ جناح نادراھجاہ ءَ دگہ سَے نادراہ ھست انت کہ آھم کانگو وائروس ءَ گور جتگ انت – واکدارانی رِد ءَ اے سال ءَ کانگو وائروس ءِ تنی وھدی پانزدہ کیس رپورٹ بوتگ انت –

سر بیتگیں ھالانی رد ءَ پنجگور ءَ ناشناسیں گاڑی سواریں مردماں تیرگواری کتگ ءُ دو مردم زدگ کتگ اَنت-

گیشیں ھالانی رد ءَ پنجگور ءِ دمگ تسپ ءَ توھید آباد مدرسہ ءِ نزیک ءَ یک لوگے ءِ توک ءَ دور کتگ ءُ اود ءَ دو مردم زدگ کتگ اَنت-

زدگ بیتگیں مردمانی پجار عبدالرھمان ء چیئرمین مقبول ءُ یحیی ء ملک ءِ ناماں زانگ بیتگ اَنت-

وئیل گوستگیں شپ ءَ پیش اتکگ ھردوکیں زدگ بیتگیں مردم بنداتی درمان ءَ پد کراچی ءَ برگ بیتگ اَنت-

وئیل ءِ درگت ءَ دگہ گیشیں اھوال دیم ءَ نیتکگ اَنت –