TBP Balochi

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، شال پریس کلب ءِ دیم ءَ بیگواھیں مردمانی کھولانی برجاھیں اے زھرشانی بنجل ءَ پنچ ھزار ءُ سِی ءُ پنچ روچ سرجم بوتگ انت –

مروچی بلوچ وطن پاٹی ءِ بنجاھی رھشون میر حیدر رئیسانی، حاجی انور ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ باوست کنان ءَ گل ءِ کمک سرکماش ماما قدیر بلوچ ءَ گوشتگ کہ نوزدہ سد ءُ ھپتاد ءُ سَے ءَ بگر تاں روچ مرچی پاکستانی استان پوجی آپریشن کنگ انت ءُ ھزارانی کچ ءَ بلوچ آوار جنگ ءُ شھید کنگ بوتگ انت – ھستیں وھدے جاور سال دوھزار چی برجاہ انت-

ماما قدیر بلوچ ءَ گوشتگ کہ بلوچستان ءِ کُنڈ کُنڈ ءَ بمبگواری ءُ لشکر کشی ءَ تنی وھدی ھزارانی کچ ءَ بلوچ شھید کنگ بوتگ انت – بیمناکیں بمبگواریانی سوب ءَ بازیں مردماں وتی ھند ءُ دمگ مال ءُ دلوت یل داتگ انت لاچاری ءَ در پہ دری زند گوازینگ ءَ انت – اے میان ءَ شست ھزار بلوچ کہ آھانی تہ ءَ سیاسی باسک ، وکیل، نودربر ، زھگ ءُ زالبول پاکستان ءِ چیریں ادارھاں آوار جتگ ءُ بیگواہ کتگ انت آھانی تہ ءَ زرینہ مری ءَ ھوار سَے سد بلوچ زالبول ھم آوار جنگ ءُ بیگواہ کنگ بوتگ انت –

ماما قدیر بلوچ ءَ گوشتگ کہ پاکستانی استان ءُ آئی اے ایجنسیانی بلوچ راج ءَ گوں نپرت ءِ چدومستریں سبوت نہ بیت پاکستانی ھاکم ءُ پاکستان ءِ ریاستی ادارہ ءُ ایجنسی ھپتاد ءُ پنچ سال انت کہ یکشل ءَ بلوچ راج ءِ گوم ءَ زوراکی کنگ ءَ انت ءُ بلوچانی چکچینی ءِ درچ یکشل ءَ برجاہ انت –

بلوچستان ءِ دمگ آواران ءَ پاکستانی پوج ءَ دو برات زورانسری آوار جتگ ءُ بیگواہ کتگ وھدیکہ ھزدار ءَ مرتضی زھری یکرندے پدا آوار جنگ ءُ بیگواہ کنگ بوتگ کہ اے آئی ءِ چارمی رند انت کہ پوج آوار جنگ انت –

گیشیں ھالانی رِد ءَ گوستگیں روچ ءَ پاکستانی پوج ءَ چہ آواران ءَ دو برات زورانسری آوار جتگ ءُ بیگواہ کتگ انت –

آوار جنگ بوتگیں براتانی پجار سراج ءُ مھران ءِ ناماں بوتگ انت –

بلوچ نیشنل مومنٹ ءِ انسانی ھکانی ادارہ پانک ءِ رِد ءَ ھردو برات گوستگیں روچ ءَ گیشکور بنجل ءَ لوٹارینگ بوتگ انت کہ پدا ھما انت آیانی ھچ ھال اھوال نیست –

ھردو گیشکور ءِ جھمنند انت وھدیکہ اشانی تہ ءَ سراج پیسر ءَ ھم پوج ءَ آوار جتگ ءُ دو سال ءَ بیگواہ کنگ ءَ پد یل داتگ ءُ ھنو پدا دوبر آوار جتگ ءُ بیگواہ کتگ –

زورانسری آوار جنگ بوتگیں براتانی تہ ءَ مھران متحدہ عرب امارات ءَ مزوری ءَ بوتگ کہ ھنو وتی موکلانی گوازینگ ءَ بلوچستان ءَ اتکگ بوتگ –

دومی نیمگ ءَ بلوچستان ءِ ھزدار ءَ مرتضی زھری یکرندے پدا آوار جنگ ءُ بیگواہ کنگ بوتگ –

کھول ءِ رِد ءَ آ گوستگیں روچ ءَ پاکستانی پوج سی ٹی ڈیءُ چیریں ادارھانی کارمنداں زورانسری آوار جتگ ءُ بیواگواہ کتگ –

زانگ بہ بیت مرتضی زھری ءِ اے چارمی رند انت کہ بیگواہ کنگ بوگ ءَ انت چدوپیسر آ سال دوھزار دھ، دوھزار پانزدہ ءُ دوھزار بیست ءُ یک ءَ ھم آوار جنگ بوتگ –

بلوچستان ءَ زورانسری آوار جنیانی تہ ءَ یکرندے پدا گیشی اتکگ ھزدار ءَ ھمے سال ءَ دوھزار بیست ءُ سَے ءَزورانسری آوار جنی ءِ دھ رپورٹ اتکگ انت کہ آھانی تہ ءَ گیشتریں کچ نودربرانی انت –

ھمے ماہ ءَ چہ ھزدار ءَ آوار جنی ءَ پد بیگواہ بوتگین جاوید بلوچ ء بشیر احمد جھمنند ھزدار، بشیر احمد ء تاج محمد سمالانی ءُ آئی ءِ کستریں برات ھوار انت – جاوید گوستگیں روچ ءَ چہ وتی دکان ءَ آوار جنگ بوتگ –

ھمے سال ءِ اپریل ماہ ءَ ھما ھال کہ دی بلوچستان پوسٹ ءَ سربوتگ انت اھانی تہ ءَ شھزاد رئیسانی، جلیل بلوچ، ابرار جتک، جاوید زھری علی حسن زھری ھوار انت –
.چدوپیسر مارچ ماہ ءَ زورانسری آوار جنی آماچ بوتگیں مردمانی تہ ءَ خالد ء محمد حسن، آصف ء عبداللہ ھوار انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلیگرام چینل آشوب ءَ دو جتائیں درشانانی تہ ءَ ھاران ءُ شور ءِ اوتاک ءِ کماندار مُلا ابراھیم بلوچ ءِ اناگتی بیرانی ءَ آ دروت ندرکتگ ءُ بلیدہ ءَ پہ پوج ءَ راشن سرکنوکیں ٹرک ءِ سرءَ بوتگیں اُرش ءِ زمّہ واری منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ ھاران ءُ شور ءَ بلوچستان لبریشن فرنٹ ءِ اوتاک کماندار عصا امین ء محمد امین پنام ءِ میجر ملا ابراھیم بلوچ گوستگیں روچ ءَ اناگتی بیران بوتگ کہ آ گل ءِ سرمچاراں کل ءُ کسارت کتگ –

جارکش ءَ گوشتگ کہ ھُدامُرزی یک نہ تُرس،جپاکش، دورچار ءُ اوپاری ئیں سرمچارے بوتگ ءُ آ بازیں سال ءِ بیت بلوچستان ءِ آجوئی ءِ جُھد ءِ ھاتر ءَ گوں بی ایل ایپ ءَ ھمگرنچ بوتگ-

میجر ءَ گوشتگ کہ میجر ملا ابراھیم ءَ پہ بلوچستان ءِ آجوئی زْرمبشت ءَ آئی ءِ راجی جپاکشی ءُ جُھد ءَ دروت ندر کنیں –

بی ایل ایف ءِ جارکش میجر گوھرام بلوچ ءَ وتی دومی درشان ءَ بلیدہ ءَ پہ پوج ءَ راشن سرکنوکیں ٹرک ءِ نشانگ کنگ ءِ زمہ واری منّ اِتگ ءُ گوشتگ کہ بی ایل ایف ءِ سرمچاراں پنچ مئی ءَ ادار چار ءَ کیچ ءِ دمگ بُلیدہ گلی ءَ پوج ءِ بنجل ءَ چہ کمے دور پہ پاکستانی پوج ءَ راشن سرکنوکیں ٹرک ءِ سرا اُرش کرتگ، چریشی ءَ گاڑی تباہ بوتگ-

جارکش ءَ گوشتگ کہ ڈرائیور ءُ کلینر بلوچ بوگ ءِ سوب ءَ مکن کرتگ ءُ یل داتگ اَنت – ما پیش ءَ ھم ٹرانسپورٹر ءُ ڈرائیور تچکی ءَ گوشتگ اَنت کہ آ زورگریں پوج ءَ پہ راشن سرکنگ ءَ بند بہ کن اَنت – ما آھاں ءَ یک رندے پد ءَ مکن کنیں کہ آ چہ وتی نابزانتی ءَ پوج ءِ کمکار مہ بنت، اگاں نہ وتی جان ءُ مال ءِ تاوان ءِ زمہ وار وت اَنت –

بی ایل ایف ءِ جارکش ءَ میجر گھرام ءَ گڈسر ءَ گوشتگ کہ اے اُرش ءِ زمہ واری منّ ایں ءُ بلوچستان ءِ آجوئی ءَ تاں مئے اُرش برجاہ مان انت –

ایران ءِ اُستان گلستان ءَ چیریں ادارھانی کارندھاں گنبدکاووس ءَ یک بلوچ زالبولے دزگیر کنگ ءَ پد ناشناسیں زنداناں برتگ-

دزگیر کنگ بیتگیں زالبول ءِ پجار سِی ءُ سَے سالیگیں راھلہ ناروئی ءِ نام ءَ زانگ بیتگ کہ آ سَے زھگانی مات ءُ آزاد شھر گلستان ءِ نندوک اِنت-

اھوالانی رد ءَ راھلہ ناروئی ءِ لوگ واجہ گوست ءَ دزگیر کنگ بیتگ ءُ پد زندان ءِ توک ءَ بے کساس لٹ ءُ کُٹاں پد آئی ءِ جاور ناگیگ بیتگ ءُ آ نادراہ جاہ ءَ آرگ بیتگ ءُ آئی ءَ وتی ساہ داتگ اَنتٹ

اھوالانی تہ ءَ گوشگ بیتگ کہ آئی ءِ لوگ واجہ ءِ بیرانی ءَ پد آ ھسپتال ءَ لوٹائینگ بیتگ ء پد ءَ آئی ءَ پولیس ءَ یک سادکیں کاگدے ءِ سر ءَ دسھت کنگ ءِ پرمان داتگ ءُ چریشی ءَ پد پولیس ءَ آ کاگد ءِ سر ءَ بھتام جتگ کہ راھلہ ناروی وتی لوگ واجہ ءِ کوشکار اِنت-

چرے بھتام ءَ پد راھلہ ناروئی دزگیر کنگ ءُ برگ بیتگ ءُ آئی ءِ سر ءَ نشہ باپاری ءُ وتی لوگ واجہ ءِ کوش ءِ بھتام لڈگ بیتگ اَنت-

لس اھوالانی ءُ پولیس ءِ نیمگ ءَ تنی وھدی اے ھال ءِ راستی نہ بیتگ ءُ نانکہ دگہ اھوالانی ایشی ءِ درگت ءَ گپ کنگ بیتگ اَنت بلے آئی ءِ دزگیر کنگ ءِ ھال پولیس ءَ تالان کتگ-

ریکوڈک ءُ بیرک گولڈ کارپوریشن

ٹی بی پی شونگال

سال دو ھزار ءُ بیست دو ءَ بلوچستان ءِ سرکار ءُ کینیڈین شرکت بیرک گولڈ کارپوریشن ءِ نیام ءَ ریکوڈک ءِ سر ءَ دزنبشتگ بیتگ اَت، کہ ایشی ءِ تہ ءَ بیست ءُ پنچ درسد بھر بلوچستان سرکار ءَ رسگی بیتگ، وھدیکہ بیست ءُ پنچ درسد پاکستان ءِ بنجاھی سرکار ءَ ءُ ایندگہ پنجاہ درسد زرکارانی ( بیرک گولڈ کارپوریشن ) بھر بیتگ کہ اِیشی ءِ آسر ءَ بلوچستان ءِ سرکار ءَ ریکوڈک کاریز بیرک گولڈ کارپوریشن ءِ دست ءَ داتگ اَت۔

ریکوڈک کاریزکاری ءِ شوربندی اِنت، کہ بلوچستان ءِ چاغی دمگ ءِ ھنکین ریکوڈک ءَ اِنت ءُ اے جھان ءَ تلاہ ءُ رُود ءِ مستریں امباراں چہ یکے- بلوچستان ءَ راجدوستیں پاٹی، راجکاریں ءُ سلاہ بندیں آجوئی لوٹوکیں پاٹی ریکوڈک، سی پیک، سیندک پئیمیں شوربندیاں پُل ءُ پانچی شوربندی نامین اَنت۔

کینیڈا ءَ بیرک گولڈ کارپوریشن ءِ بھر دارانی نیاد (شیئر ہولڈر میٹنگ) ءِ نیام ءَ انسانی اگبالانی باسک لطیف جوھر بلوچ ءَ کارپوریشن ءِ چیف ایکزیکٹو مارک برسٹو ءَ گوں وتی تُرس ءِ درشان کنان ءَ گُشت کہ بیرک گولڈ کارپوریشن ءَ ھندی مردمانی رزامندی ءَ ابید پاکستانی سرکار ءُ پوج ءِ واھگانی پد ءَ دزنبشتگ اڈ داتگ کہ ایشی ءَ بلوچستان ءِ گیشتر پوجی بیڑ ءُ ھندی مردماں گوں گیر انسانی رویش ءِ سوب جوڑ بیت بلے بیرگ گولڈ کارپوریشن ءِ سی ای او ءَ آئی ءِ جستانی پسہ کنگ ءُ ترس ءِ ھلاس کنگ ءَ ابید راستی ءَ رد کنان ءَ گُشتگ کہ آ بیرگ گولڈ کارپوریشن ءُ بلوچستان سرکار ءِ نیام ءَ برجاھیں ءِ بابت ءَ دروگ بندگ ءَ اِنت۔

بلوچستان ءِ نگیگیں جاورانی سوب ءَ جھانی شرکت، چین ءُ دگہ ڈیھاں بلوچستان ءِ اربانی ڈالر ءِ شوربندیانی پھازگی ءِ بابت ءَ تُرس ءَ درشان کُتگ ءُ بلوچ آجوئی لوٹوکیں سلاہ بندیں گلانی ھمسَنتی بلوچ راجی آجوئی سنگر (براس) ءَ ھم گوستگیں سال ءَ وتی درشانے ءِ تہ ءَ بیرک گولڈ کارپوریشن ءَ اے دزنبشتگ ءِ بابت ءَ ھژار کُتگ اَت وھدیکہ بلوچ سلاہ بندیں گل دراں ڈیھی زرکار ءُ ڈیھہ ھژار کُتگ اَنت کہ بلوچستان ءِ تہ ءَ پُل ءُ پانچی شوربندیانی تہ ءَ پاکستان ءِ ھمکاری مہ کن اَنت۔

بلوچ راج ءِ بیم ءُ گمانانی ھلاس کنگ ءَ ابید ءُ برپاور ءَ بلوچ راج ءِ جھگیریں ادارگانی رزامندی ءَ ابید بلوچستان ءِ جنگ زدگیں جاورانی تہ ءَ اے شوربندیانی سوبمندی ءَ گوں سرجم جنجالی بیت-بیرک گولڈ کارپوریشن ءَ ھوار جھانی شرکت ءُ ڈیھاں بلوچ راج ءِ بیم ءُ گمانانی دیر کنگ ءِ ھاتر ءَ گامگیج زیرگ لوٹ ایت ءُ برپاور گپ تران کنگ ءِ ھاتر ءَ گام زیرگ لوٹ ایت دانکہ اے شوربندی ھونریچی ءَ ابید دیمروئی ءِ چیدگ جوڑ بہ بنت۔

سر بیتگیں اھوالانی رد ءَ ایرانی آمیدگس ءَ عرب سیاسی باسک حبیب اسیود جھنند سوئد پاھو داتگ-

گیشیں ھالانی رد ءَ حبیب فرج اللہ پنام ءِ حبیب اسیود کہ گوستگیں جنبش النضال نامیں گلے ءِ سروک بیتگ کہ اے گل ءَ ایران ءِ سرکار ءِ بگیر داری کتگ چریشی ءَ آ گرگ بیتگ ءُ مروچی پاھو دیگ بیتگ-

پنچاہ سالیگیں حبیب چار سال ءَ پیش ماں ترکی ءَ گرگ بیتگ ءُ پد ءَ واتر ایران ءِ دست ءَ دیگ بیتگ-

حبیب فرج اللہ بازیں رندان آمیدگساں پیش کنگ بیتگ ءُ پد ءَ آئی ءَ وکیل ءِ نہ بوگ ءَ گڈی بر ءَ آئی ءُ پاھو اش داتگ-

بلوچستان ءِ دمگ کیچ ءَ ناشناسیں مردماں پاکستانی پوج ءِ واستا مڈی بروکانی سر ءَ اُرش کتگ ءُ گاڑیاناں تاوانبار کرتگ-

گیشین اھوالانی رد ءَ گوستگیں بیگاہ ءَ بلیدہ ءِ ھنکین گلی ءَ ناشناسیں مردماں پاکستانی پوج ءِ واستا مڈی سرکنوکیں گاڑی نشانگ کتگ اَنت ئِے-

دمگی مردمانی رد ءَ اُرش ءَ گاڑیاں تاوانبارانی دیمپانی کنگ کپتگ ءُ اُرشکاراں گاڑیانی ڈرائیوری دمگی بوگ ءِ پژدر ءَ یل کتگ اَنت-

زانگ بہ بیت اے دابیں اُرشاں بلوچ آجوئی لوٹوکیں سلاہ بندین گل منگ ءَ اَنت –

گوستگیں روچاں ھم بلیدہ ءَ پوج ءِ مڈی سرکنوکیں گاڑی یے نشانگ کنگ بیتگ ات کہ چریشی ءَ یک مردمے بیران ءُ یکے زدگ بیتگ ات –

اے اُرش ءِ زمہ واری بلوچ لبریشن آرمی ءَ زرتگ ات-

بلوچ لبریشن آرمی ءِ جارکش جیئند بلوچ ءَ اُرش ءِ زمہ واری منان ءَ گوشتگ ات کہ دمگی مردم پوج ءِ واستا مڈی برگ ءَ پھریز بہ کن انت اگاں وتی جان ءُ مالانی تاوانباری ءِ زمہ وار وت بہ بنت-

مروچی بیتگیں اُرش ءِ زمہ واری تنی وھدی کس ءَ پہ وت ءَ نہ زرتگ-

سر بیتگیں اھوالانی رد ءَ روکپتی بلوچستان ءِ دمگ دشتیاری ءَ ناشناسیں مردمانی تیرگواری ءَ یک ورنایے بیران بیتگ –

بیران بیتگیں ورناہ ءِ پجار حسین مھدی پور ءِ نام ءَ زانگ بیتگ کہ آ ناشناسیں مردماں دو پیش تیر جتگ ءُ زدگ کتگ بیتگ بلے گوستگیں روچ ءَ آئی ءُ وتی ساہ داتگ اَنت-

اھوالانی رد ءَ حسین مھدی سَے مئی ءَ تیر جنگ بیتگ ءُ آ نادراہ جاہ ءَ شتگ بیتگ ءُ گوستگیں روچ ءَ نادراہ جاہ ءِ تھتیگی ءَ ساہ داتگ اَنت-

بلے داں انگت ءَ آئی ءِ کوش ءِ بارو ءَ دگہ اھوال دیم ءَ نیتکگ اَنت-

بلوچستان ءِ دمگ خضدار ءَ پاکستانی لشکریاں یک مردمے زورانسری بیگواہ کُتگ ءُ ناشناسیں ھنداں بُرتگ اَنت۔

بیگواہ بیتگیں مردمے پجار عنایت زھری ء فیض محمد زھری جھمنند زھری ءِ نام ءَ بیتگ۔

ھندی اھوالانی رِدءَ بیگواہ بیتگیں ورناہ لشکریاں چہ دو مئی ءَ خضدار ءِ بازار اللہ والا چار راہ ءَ چہ آئی ءِ دکان ءِ سرءَ بیڑ بُرتگ ءُ دزگیر کُتگ کہ آودہ آ کار کنت۔

اھوالانی رِدءَ لشکریاں دکان ءَ ھستیں درستیں مردمانی شناختی کارڈ چارتگ ءُ عنایت اللہ پجار ءَ پد چم بستگ اَنت ءُ ویگو گاڑی ءَ مان کُتگ ءُ گوں وت بُرتگ۔

زانگ بہ بیت کہ بلوچستان ءَ زورانسری بیگواھی ءِ وئیلانی تہءَ یک برے پدءَ گیشی گندگ ءَ پیداک اِنت۔ خضدار ءَ ھمے سال 2023 ءَ زورانسری بیگواھی ءِ 10 وئیل نبشتہ کنگ بیتگ اَنت کہ اِشانی تہءَ مستریں کساس نودربرانی گنت۔

ھمے ماہ ءَ خضدار ءَ دزگیری ءَ پد بیگواہ بیتگینانی تہءَ جاوید بلوچ ء بشیر احمد جھمنند خضدار، بشیر احمد ء تاج محمد سمالانی ءُ آئی ءِ کستریں برات ھوار اَنت جاوید ء بشیر گوستگیں روچاں چہ خضدار ءَ وتی دوکان ءَ بیگواہ کنگ بیتگ۔

ھمے سال ءَ اپریل ءِ ماہ ءَ خضدار ءَ چہ زورانسری بیگواھی ءِ دی بلوچستان پوسٹ ءَ سربیتگیں اھوالانی رِدءَ شہزاد رئیسانی، جلیل بلوچ، ابرار جتک، جاوید زھری ء میر حسن زھری، علی حسن زھری ولد غلام نبی زھری ھوار بیتگ اَنت۔

چدو پیسر مارچ ءِ ماہ ءَ زورانسری بیگواھی ءِ آماچ بیتگینانی تہءَ خالد ء محمد حسن، آصف ء عبداللہ ھوار اَنت۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہءَ گْوشتگ کہ سرمچاراں سے مئی 2023 ءَ کیچ ءِ دمگ بلیدہ میناز ءَ زورگریں پاکستانی پوج ءِ توژگ پُجّارینوکانی سر ءَ اُرش کتگ چریشی ءِ آسر ءَ یک دُژمنیں چاریگے کُشگ بیتگ ءُ دومی ٹپی کتگ-

جارکش ءَ گْوشتگ کہ اے چاریگ بلیدہ ءِ کش گوراں زورگریں پاکستانی پوج ءِ جتائیں بُنجل ءُ پٹ پولی پانگساں توژگ پُجّارینگ ءَ بیتگ اَنت- بی ایل اے سرمچاراں اے مردم اوشتگ ءِ اشارہ کُتگ اَنت، بلے آیاں تچگ ءِ جُھد کتگ چریشی ءِ آ نشانگ کتگ اَنت-

گُڈی ءَ آئی ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت، ما پیسر تچک کتگ ءُ گوشتگ کہ دمگی مردم زورگریں پوج ءَ را ھرچ وڑیں ساز ءَ سامان ءِ پُجّارینگ ءَ پھریز بہ کن اَنت اگاں ناں وتی جانی ءُ مالی تاوانانی زمہ وار وت بنت-