TBP Balochi

بلوچستان ءِ تیابدپی شھر ءُ سی پیک ءِ بنجل گوادر ءَ گوستگیں روچ ءَ چینی انجینئرانی سر ءَ بلوچ سلاہ بندیں گل بی ایل اے ءِ فدائی اُرش ءَ پد سرجمیں شھر ءَ پٹ ءُ پولی بیڑ برجاہ اَنت-

چینی انجینئرانی کاروان ءِ سر ءَ بلوچ لبریشن آرمی ءِ مجید برگیڈ ءِ دو اُرشکاراں نشانگ کتگ – اے ترندیں اُرش داں دو اداراں برجاہ بیتگ-

دمگی مردمانی گوشگ اِنت اُرش ءَ پد گوادر شھر ءِ سیکورٹی ترند کنگ بیتگ ءُ روگ ءُ آیگی راہ ءُ دراں ترندیں پٹ ءُ پول کنگ بیتگ-

دمگی مردمانی گوشگ اِنت چینی انجینئرانی سر ءَ بیتگیں اُرش ءِ ھند ءُ دراھیں جاہ پکیر کالونی، نیاآباد، جی ڈی کالونی ءَ پاکستانی پوج ءَ لوگ لوگ ءَ دور کنان ءَ پٹ ءُ ھنڈ کتگ اَنت-

دمگی مردمانی گوشگ اِنت لوگ ءُ میتگانی پٹ ءُ پول ءِ وھد ءَ پوج ءَ چک ءُ جنین ھم لٹ ءُ کُٹ کتگ بیتگ اَنت-

مردمانی گوشگ اِنت داں انگت ءَ پوج ءَ بازیں مردمے دزگیر کتگ ءُ گون وت برتگ انت کہ تنی وھدی آیانی پجار نہ بیتگ اَنت-

بلوچستان ءِ دمگ ھزدار ءُ شال ءَ پاکستانی پوج ءَ دو ورنا آوار جنگ ءَ پد ناشناسیں جاھاں برتگ اَنت-

بیگواہ بیتگیں مردمانی پجار کامران ء سومرو خان ءُ کمبر بلوچ ء مھمد کریم ءِ ناماں زانگ بیتگ اَنت-

دمگی مردمانی گوشگ اِنت کامران ءِ سیادی ھزدار ءِ ھند مولہ ءَ اِنت کہ آ گوستگیں شپ ء ساھت یک ءَ چہ لوگ ءَ باذگیر ھزدار ءَ سلاہ بندیں مردماں آوار جتگ ءُ گون وت برتگ-

کھول ءِ رد ءَ آئی ءِ بارو ءَ داں انگت ءَ مارا ھچ گوشگ نہ بیتگ کہ آ کجا اِنت – آیاں گوشتگ ما مزنیں واک ءُ ادارھاں گوں دزبندی کن این آ کامران ءِ یل کنگ ءَ سرجمی بہ کن اَنت-

بیگواہ کنگ بیتگیں کمبر ءِ سیادی چہ کیچ ءِ ھند کولواہ ءَ اِنت ءُ آ ایف ایس سی ءِ نودربرے کہ گوستگیں شپ ءِ ساھت یک ءَ شارجہ ھوٹل شال ءَ پوج ءَ آوار جنگ ءَ پد بیگواہ کرتگ-

بلوچستان لبریشن فرنٹ ءَ گوشتگ آدینگ ءِ روچ ءَ 11 اگست 2023 ءَ دو سرمچار ءَ گوں دژمن ءَ بھادری ءَ مڑان پہ سرڈگار ءَ ندْر بیتگ اَنت۔گْوستگیں لھتے روچ اِنت کہ پاکستانی لشکر ماں کیچ ءَ زامران ءُ دشت ءَ لشکرکشی کنگ ءَ اِنت۔ 11 اگست ءِ روچ ءَ ھم مزنبند ءُ آئی ءِ کش ءُ گْوراں دژمنیں لشکر مزنیں کچے ءَ ساڑی بیتگ ءُ آیاں جنگی بالیگانی کمک ھم گون بیتگ انت۔

جارکش ءَ گوشتگ یازدہ اگست ءِ ادار یازدہ ءَ سرمچارانی رمبے پہ دژمن ءِ سر ءُ پرانی چارگ ءَ تر ءُ تاب ءَ بیتگ انت کہ ھیر آباد ءِ نزیک ءَ کارگاھی ءَ گوں دژمن لشکر ءِ پیادگیں کارمنداں دوچار کپتگ اَنت ءُ آیانی میڑ بندات بیتگ۔ دژمن ءِ کچ چہ سرمچاراں گیش بیتگ ءُ آیاں مزنیں سلاہ گون بیتگ انت بلے پد ءَ ھم سرمچاراں آیانی دیم گوں تمردی ءَ داشتگ ۔اے میان ءَ پاکستانی لشکر ءَ جنگی بالیگانی کمک ھم گون بیتگ۔سرمچاراں مھریں جاھاں سنگر گیپتگ ءُ داں سئے اَداراں دژمن ءِ پیادگیں لشکر ءِ دیم داشتگ ، اے میان ءَ ھچ سرمچار ءَ تاوان نہ بیتگ ءُ دژمن ءِ کم ءَ کم دو سپاھیگ کشگ بیتگ انت۔ پیادگیں لشکر ءِ بے سوبی ءَ پد دژمن ءَ جنگی بالیگانی کمک ءَ پہ وت دگہ سپاھیگ لوٹائینتگ ءُ کمانڈو ایر گیپتگ انت۔

جارکش ءَ گوشتگ کارگاھی ءِ اے میڑ ءَ شھید لیفٹینینٹ کامران ءُ شھید سیکنڈ لیفٹینینٹ جاپر ءَ پہ وتی ھمبلانی دیمپانی ءَ دیم ءِ سنگر داشتگ اَنت ءُ دژمنیں لشکر تاوان بار کرتگ۔اے میان ءَ ارش کنان ءَ شھیدیں سرمچاراں دژمن ءِ انگر پروشتگ ءُ وتی ھمراھانی پہ دْراھی در کنگ ءَ سوبمند بیتگ اَنت ءُ وتی گرانبھائیں جان اش نْدر کرتگ اَنت۔

بی ایل ایف ءِ جارکش میجرگوھرام بلوچ ءَ گوشتگ کارگاھی ءِ میڑ ءَ شھید بیتگیں سرمچاراں ستک شانی ندْر کنت ءُ اے مسام کنت کہ شھیدانی لوٹ ءُ واھگانی پد ءَ داں آجوئی ءَ جنگ برجاہ بیت۔شھیدانی ھون ءِ بیر آجوئیں بلوچستان اِنت۔ داں بلوچستان ءِ آجوئی ءَ بی ایل ایف ءِ بیڑ برجاہ بہ اَنت۔

جارکش ءَ گوشتگ شھید لیفٹینینٹ کامران پنام نودی ء شھید گلام مستپا جھمنند کونشکلات تمپ ءِ سیادی گوں بلوچ راجی زْرمبشت ءَ بندوکیں گِسے ءَ بیتگ، آیاں پہ بلوچستان ءِ آجوئی ءَ گرانبھائیں دیمونی داتگ۔ آئی ءِ کھول شھیدانی کھول اِنت۔ 25 مئی 2013 ءَ پاکستانی لشکر ءَ کونشکلات ءَ میتگ ءِ سر ءَ اُرش کرتگ اَت، گس مانداشت اَنت ءُ شھید کامران ءِ پِت گُلام مستپا شھید کرت۔

آئی ءِ مستریں برات شھید ارپان پنام امداد ھم بی ایل ایف ءِ سرمچارے بیتگ کہ 28 ستمبر 2020 ءَ مزنبند ءَ گوں دژمن ءَ دیم پہ دیمی میڑے ءَ گوں وتی ھمراھیں سرمچار نورھان پنام بْرمش ءَ شھید بیتگ اَت ، ھمے جنگ ءَ دژمن ءَ ھم مزنیں کچے ءَ تاوان بیتگ اَت۔اے میڑ ءَ چہ دژمن ءِ چریکاں ملانٹ ءِ جھمنندیں منیر ھم کشگ بیتگ اَت۔شھید ارپان ءِ شھید بیگ ءَ پد گل ءَ آئی ءِ زمہ واری لیفٹینینٹ کامران ءَ داتگ اَنت۔

جارکش ءَ گوشتگ شھید لیفٹینینٹ کامران وتی ورنایے ءَ پہ آجوئی ءِ جھد ءَ ھدوک بیتگ۔ 2013 ءَ آ بی ایل ایف ءِ بھر جوڑ بیتگ۔ گوں وتی کسانیں سند ءُ سالاں آئی ءَ بازیں جنگاں بھر زرتگ ءُ دُژمن ءِ بگیری ءَ سوبمند بیتگ۔شھیدی ءِ وھد ءَ آ لیفٹینینٹ ءِ اگدہ ءِ سر ءَ بیتگ۔آئی ءَ دڑامب ، سیاھجی، مزن بند ، شیراز ، کلبر ، زامران ، بلیدہ ءُ بالگتر ءَ دُژمن ءِ بگیری ءَ بی ایل ایف ءِ اُرشاں بھر زرتگ۔

بی ایل ایف ءِ جارکش ءَ گوشتگ 18 فروری 2020 ءَ بلوچ آجوئیں دوستیں گلانی سنت براس (بلوچ راجی آجوئی سنگر ) ءِ بیڑے ءَ شھید کامران ٹپی بیتگ اَت،درمان ءُ دارگ ءَ پد آ دوبر آجوئی ءِ جنگ ءِ پڑ ءَ پرکار بوتگ ءُ گوں گشاد ءُ سوگھی وتی کردے پیلو کرتگ۔دو رند ءَ دژمن ءَ آ ءُ آئی ءِ کھول ءِ آدگہ مردمانی گس مانداشت اَنت ءُ آ چہ جھد ءَ دزکش بیگ ءِ سر ءَ زور دات بلے آ ءُ آئی ءِ کھول ءَ اے درسیں زوراکی پہ بچکندے اوپار کرتگ انت ءُ چہ آجوئی ءِ جھد ءَ پدکنز نہ بوت اَنت۔کامران دلسیاھی کشوک،توانمند ءُ گیدریں ھمبلے بیتگ۔

جارکش ءَ گوشتگ شھید کامران وتی جند ءِ میتگ کونشکلات ءَ گلزمین ءِ میار کنگ بیتگ۔آئی ءِ جنازہ ءِ نماز ءَ مردماں مزنیں کچے ءَ بھر زرتگ۔ آئی ءِ مانش ءِ سر ءَ آجوئیں بلوچستان ءِ بیرک مِک کنگ ءُ پہ آئی ءَ ستک درشان کنگ بیتگ۔

میجر گوھرام بلوچ ءَ گوشتگ شھید سیکنڈ لیفٹینینٹ جاپر پنام سنا ء مھمد رھیم جھمنند دشت ھسادیگ ، چہ 2014 ءَ گوں بی ایل ایف ءَ بندوک بیتگ ءُ داں دو سال ءَ گوادر ءَ شھری نیٹورک ءِ بھر بیتگ۔ آئی ءَ شھری نیٹورک ءِ تہ ءَ گل ءِ من ءُ مولانی سر ءَ کار کرتگ ۔ آ گل ءِ شور ءِ رد ءَ 2016 ءَ اوتاک ءَ اتکگ ءُ دژمن ءِ بگیری ءَ دیم پہ دیمی جنگانی بھر بیتگ۔آئی ءِ کھول ءِ دگہ مردماں ھم پہ بلوچ راجی آجوئی زْرمبشت ءَ دیمونی داتگ ءُ شھید بیتگ اَنت۔چہ آیاں شھید ایسا پنام ناکو شیرا 03 مئی 2018 ءَ شھید کنگ بیتگ، شھید سمیر پنام سوگات ء شھید ایسا 07 جولائی 2017 ءُ شھید سنا پنام سوگات 2016 ءَ شھید کنگ بیتگ انت۔

شھید جاپر ءَ دشت، مند، زامران ، بلیدہ ، گوادر ءُ آدگہ جاھاں بی ایل ایف ءِ بیڑاں بھر زرتگ ءُ پہ دژمن ءِ تاوان ءَ وتی کِرد پیلو کرتگ۔

بی ایل ایف ءَ گوشتگ شھید سیکنڈ لیپٹینینٹ بھادریں جنگولے ءِ پجیگ ءَ تکنیکی کاراں ھم سوگہ بیتگ ۔ آئی ءَ بازیں جنگاں پہ گل ءِ رسانکی کاراں تامرگرگ ءِ زمہ واری ھم پیلو کرتگ انت۔

شھید سنا گوادر ءَ ’شمبے اسمائیل میتگ‘ ءَ گلزمین ءِ میار کنگ بیتگ۔آئی ءِ جنازہ ءِ نماز ءَ مردماں مزنیں کچے ءَ بھر زرتگ ءُ گوں راجی منگہ ءُ مڑاھاں گلزمین ءَ ایر داتگ ۔

تائیوان ءِ نائب سروک امریکہ ءِ تر ءُ تاب ءِ وھد ءَ گوشتگ کہ اگاں تائیوان مھکم اِنت گڑا مھکم اِنت ءُ زوراک ءُ زوردستانی پنجگاں چہ تائیوان پشت نہ کنز ایت-

ھال سرکنوکیں ادارہ روئٹرز ءِ رد ءَ بیجنگ ءَ تائیوان ءِ نائب سدر ولیم لائی ءَ امریکہ ءِ تر ءُ تاب ایر جتگ-

ولیم لائی ایوکیں گچینکاری ءَ سروک جوڑ بوگ ءِ ھاتر ءَ یک مھکمیں مردمے ءُ اے ھد ءَ امریکہ ءِ تر ءُ تاب ءَ اِنت-

آئی ءَ پیراگوئے ءِ تر ءُ تاب ءَ پیش امریکہ ءَ جَل اتگ پیراگوئے ھما سیزدھیں ڈیھاں یکیں ڈیھ اِنت چریشی ءَ چین ءِ بیھاراں ابید ھم تائیوان ءِ گون ءَ اوشتوک بیتگ-

تائیوان ءُ امریکہ ءِ اے تر ءُ تاب ءَ نیزور دابی گوشتگ بلے چین ءَ اے تر ءُ تاب ایر جتگ ءُ سروک ولیم لائی آجو دوستی ءِ جیڑہ ءِ ودی کنگ ءِ بھتام جتگ-

تائیوان ءِ مھتری ماڑی ءِ درشان ءِ رد ءَ نائب سدر ءَ گوشتگ اگاں تائیوان مھکم اِنت گڑا دنیا مھکم اِنت ءُ اگاں تائیوان ءِ زمین ءَ ایمنی اِنت گڑا دنیا ءِ زمین ءَ ھم ایمنی اِنت-

آئی ءَ گوشتگ ما راستیں راہ ءَ اِنت ءُ زوراک ءِ گیش کپتگیں ترس ءَ چہ ترس ءِ آماچ نہ اِنت ءُ نانکہ پشتکنزی کن ایں – تائیوان جمھوری راہ ءَ بندوکی ءِ جنزگ ءَ مارا بھادر ءُ مھکم بوگی اِنت-

چین ولیم لائی ءِ دوستی ءَ جوانیں نگاھاں نہ چار ایت ءُ آئی ءَ وت تائیوان ءِ آجوئی ءِ واستا یک جوانیں گامگیج کارے گوشتگ –

ولیم لائی ءَ نیویارک ءَ اے گپ پدر کرتگ کہ تائیوان ءِ سروک ءِ پالیسانی رد ءَ برابری ءِ بنیات ءَ آ چین ءَ گپ ءُ تران کنگ ءَ تیار اِنت ایمنی ءِ اُمیت ءِ واھگ ءَ دار ایت-

آئی ءَ گوشتگ کہ آ تائیوان ءِ وت واجھی ءِ پھریزگ ءِ گپ ءَ جنت ءُ بس شھری وتی آیوکیں باندات ءِ لیکہ ءَ ایر کت بہ کن اَنت بلے تائیوان چین ءِ گوشتگیں گپانی باپند نہ اِنت-

بلوچ نیشنل مومنٹ ءِ سروک ڈاکٹر نسیم بلوچ ءَ گوشتگ بلوچ راج گوں ھما راجاں ھوار اِنت کہ آیاں بھ زوراکی ءِ دیم ءَ سر جھل نہ کرتگ ءُ ایردستی نہ من اتگ ، مروچی ھم درانڈیھ بہ بیت یا گلزمین بلوچ راج ھرچ وڑیں سکی سگگ ءَ اِنت ءُ وتی آجوئی ءِ جھد ءَ دیم ءَ برگ ءَ اِنت۔اے گپ 11 اگست ، سوگند سرسبزی روچ ءِ درگت ءَ بی این ایم مشکے ھنکین ءِ چیردستی ءَ برجاہ دارگ بیتگیں مچی ءَ تْران کنان بی این ایم ءِ ھنکینی راھشوناں درشانتگ اَنت۔

گوں مراگِش ءَ تْران کنان استاد مھران ءَ گْوشتگ کہ بلوچستان چہ بِندات ءَ آجو ءُ وت واجھیں ڈیھے بوتگ پہ بلوچستانءِ پھریزگ ءَ بلوچ ءِ پیر ءُ کماشاں وتی ھون ریتکگ ءُ بلوچستان پھز اتگ۔اے گپ راستے کہ دری زوراکانی زوراکیانی آماچ بوتگ بلے بلوچستان ءُ بلوچ راج ءَ بھ دری راجانی ایردستی نہ من اتگ ءُ پہ وتی راجی آجوئیءِ پھریزگ ءِ مدام جاڑیگ بوتگ۔

آئیءَ گوشتگ وھدے انگریزاں بلوچستانءِ بادشاہ میر مھراب ھانءَ ھمے گْوشتگ کہ تو منی پرمان ءِ پابند ءُ منی کوتلی بہ بہ ئے بلے مھراب ھان انگریزانی ایردست بیگ ءَ ساڑی نہ بوت پمیشکا انگریزاں گوں وتی لشکر ءَ بلوچستانءِ سر ءَ ارس کرت ءُ 1839 ءَ بلوچستان زور گیپت۔ ھمے ایردستی ءِ بگیری ءَ بلوچاں ڈیھ پھزی ءِ راہ گچینت ءُ انگریز ءِ بگیری ءَ چیرکی جنگ بنا کرت ءُ انگریز ماں بلوچ گلزمین ءَ پہ ایمنی ءَ نندگ ءَ نہ اشت اَنت ، ھمے ارشانی پد ءَ پہ انگریزاں باز جیڑہ ودی بوت۔

دیمترا آئی ءَ گْوشتگ وھدے دومی جھانی جنگ ءَ پد انگریز چہ ھرچ نیمگ ءَ ایردستیں راجاں ماں بست گڑا آ چہ اے دمگ ءَ در کپگ ءَ لاچار بوت ، چہ انگریز ءَ در کپگ ءَ 11 اگست 1947 ءَ بلوچستان ءِ آجوئی سرسبز اِت ءُ بلوچ یک رندے پد ءَ وتی گلزمین ءِ وتواجہ جوڑ بوت اَنت۔آجوئی ءِ رسگ ءَ پد آیاں نوکیں دودانی پد ءَ گچینکاری کرت۔ بلوچستان گوں جھان ءِ کوپگے ءَ دیم ءَ جزگ ءَ ساڑی اَت ، آئی ءِ دو پارلیمان اَت اَنت ، جھگیرانی پارلیمان (زیریں پارلیمان ) ءُ گچینی پارلیمان ( بالائیں پارلیمان)۔بلے انگریزاں اے دمگ ءَ پہ وتی سیتانی پانک ءَ پانگے پکار اَت پمیشکا آیاں ھندوستان دو جاہ ءَ ونڈ کرت ءُ پاکستان ءِ نام ءَ ڈیھے جوڑ کرت۔وتی جھانی سیتانی دیمپانی ءَ پہ انگریزاں بلوچستان ءِ آجوئی مزنیں اڑاندے اَت ، آیاں چیراندری پاکستان ءِ کمک کرت ءُ بلوچستان پاکستان ءِ ایردست کنائینت۔

استاد مھرا ن ءَ گْوشتگ کہ یازدہ اگستءِ دارگ ءِ مول ھمیش اِنت کہ ما وتی پہ آجوئی ءِ گرگ ءَ کرتگیں مسام ءَ یات بہ کن ایں، سوگند ءَ بہ سبز این ءُ پاکستان ءُ دری ٹیکاں ھمے کلوہ ءَ بہ شکسا ایں کہ بلوچستان ءَ وھدے چہ انگریز وڑیں زوراکی ءَ وتی ڈیھ ءِ آجوئی پچ گیپتگ گڑا پاکستان ءِ بنیاد ءُ منک اینچو مگیم نہ اَنت کہ بلوچستان ءِ سر ءَ وتی سردستی ءَ برجاہ داشت بہ کنت ، الم آ زوراکی کنت ، کشت ءُ کشار کنت انچوش کہ داں انیگ ءَ آئی ءَ ھمینچو بلوچ کشتگ کہ انگریزاں وتی سد سال ءِ سردستی ءِ میان نہ کشتگ ، گار ءُ گمسار نہ کرتگ۔ پرچا کہ زوراک مدام ھمے وش منی ءَ بیت کہ آ گوں زوراکی ءَ راجانی وتواجھی ایرموش کرت کن اَنت بلے مردم ءِ گْوستانک چوشیں زوراکیانی سوبمندی ءِ گواھی نہ دنت۔

آئی ءَ گوشتگ کہ بلوچ راج جھان ءَ گوں ھما راجاں ھوار اِنت کہ آ راجاں بھ کسی ایردستی نہ من اتگ جھان ءِ مزنیں زوراکاں گوں ھوار ھما راج کہ اسلام ءِ نام ءِ سر ءَ سھرائی ءَ وت ءَ بلوچ ءِ دوست پیش کنت بلے چیراندری منگلی ریچیں سیاہ مار ءِ پیم ءَ بلوچ ءَ وت ءَڈنگ ئِے جتگ۔بلوچ ھچ ناسرپد نہ اِنت بلوچ جْوانے ءَ سرپد اِنت کہ من ءَ پہ وتی راجی سیت ءُ پہ وتی آیوکیں پدریچ ءِ آجوئی ءُ پہ آئی ءِ پانک ءَ چی کنگی اِنت۔

بی این ایم ءِ گْوستگیں سی سی باسک ڈاکٹر شئے ءَ تران کرتگ ءُ گْوشتگ مروچی مئے اے مچی ءَ ھما مردم ساڑی اَنت کہ آیانی گسانی تہ ءَ یک یک شھیدے ھست اِنت ، ھما شھید کہ آیاں پہ وتی راج ءِ باندات ءَ جیڑ اتگ ءُ وتی ساہ نْدر کرتگ اَنت۔ آیانی لیکہ ءُ سسا سک بلند ءُ برزاد بیتگ اَ نت پمیشکا ما آیانی رندگیری کن ایں۔

دیمتر آئیءَ گْوشتگ یازدہ اگست ھما روچ اِنت کہ بلوچ ءَ را سد سال ءَ رند چہ انگریز ءَ آجوئی رس اتگ ۔زوراک ءُ گیشواھی کنوکیں راجاں مدام دگہ راجانی پل ءُ پانچ بیڑ برتگ انچوش پہ بلوچ ءَ ھم مدام آیانی نپت ءُ بیراں گْورتگ بلے بلوچ ءَ سر داتگ ، وتی منگہ ءُ ماتیں گلزمین نہ داتگ۔انچوش کہ ما گپ اش کرتگ کہ الی مھمد مینگل ءِ ، نورا مینگل یا کہ ھمل جیھند ءُ بلوچ ھان ءِ ، اے ھما مردم بوتگ اَنت کہ ایشاں گوں زورگراں جنگ کرتگ۔انگریز سد سال ءَ بلوچستان ءِ سر ءَ سردست اَنت بلے گڈ ءَ بلوچاں آ چہ وتی سرڈگار ءَ در کرت اَنت ءُ آجوئی گیپت پمیشکا اے روچ ءِ پہ بلوچاں مزنیں ارزشتے ھست۔

آئی ءَ درائینت ، اے مزنیں گپے کہ مئے مردم ھمینکس کہ در پہ در بیتگ اَنت ، بلے آیاں وتی مول ءُ لیکہ یلہ نہ کرتگ ، گوں وتی سسا ءُ شھیدانی جھد ءَ بندوک اَنت۔ واری ءُ بزگی سگگ ءَ اَنت بلے چہ وتی مول ءَ پشت ءَ نہ شتگ اَنت۔ اے پہ ما بلائیں گپے کہ مروچی ما وتی کار یلہ کرتگ ءُ اد ءَ مچ بیتگ ایں کہ چار گپ گوش دار ایں۔ اے بلوچ راج ءِ آیوکیں پدریچ اِنت۔ درست اے گپ ءَ بہ زان اَنت کہ بلوچ ءَ مروچی وتی جنگ ھما ھنداں آؤرتگ کہ نی منزل چماں اندر اِنت ، اوست پزور اِنت۔ بوت کنت کہ آجوئی ءِ جنگانی تہ ءَ پند سک دراج بہ اَنت ، پنجاہ سال ، سد سال گْوز ایت بلے اے دْرچ کہ روگ ءَ اِنت وتی منزل ءَ الم سربیت۔

چین ءَ نود روچ ءِ مُھلت انت کہ بلوچستان ءَ در بہ ایت ءُ بہ روت اگاں ناں آئی ءِ بگیری ءَ اُرشانی تہ ءَ چد ءُ گیشتر ترندی آرگ بیت اِنت – جارکش جیئند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہ ءَ گوادر ءَ آپریشن “زِر پھازگ” ءِ سرجمیں ھال شنگ کرتگ ءُ گوشتگ کہ اے اُرش بی ایل اے مجید برگیڈ ءِ دو پدائی سنگتاں کُتگ ءُ چریشی ءَ چین ءِ چار جھمنند ءُ کم چہ کم یازدہ پوجی کارمند مُرتگ انت –

جارکش جیئند بلوچ ءِ رِد ءَ مروچی بزاں یکشمبے روچ ءَ بلوچ لبریشن آرمی ءِ پدائی یونٹ مجید برگیڈ ءَ بلوچستان تیاب دپی دمگ گوادر ءَ سھب ءِ ادار نُھ ءُ ھژدہ ءَ، بی ایل اے آپریشن “زرپھازگ” ءِ سیمی بھر ءِ بندات کتگ کہ دو اَدار ءَ گیش برجاہ بوگ ءَ پد نیمروچ ءَ سوبمندی ءَ گوں آسر بوتگ – اے آپریشن ءَ مجید برگیڈ ءِ دو پدائیاں ھوار بی ایل اے ءِ انٹیلیجنس ونگ ءُ ٹیکٹیکل ونگ ءَ بھر زرتگ، چہ اے آپریشن ءَ زورگیریں پاکستان ءِ کمک کار چین ءِ چارجھمنند کُشتگ انت ءُ آیانی پھازوکیں کم چہ کم یازدہ نگھپانیں پوجی کارمند ھم کُشتگ انت، وھدیکہ بازینے زدگ بوتگ انت –

جارکش ءِ رِد ءَ اے اُرش ماں گوادر ءَ جوڈیشل کمپلیکس ءِ نزیک ءَ چیرمین اسحاق چار راھ ءِ سر ءَ ھما وھد ءَ کنگ بوتگ وھدیکہ چینی انجینئیرانی کاروان مزنیں پھازگی ٹولی ءِ ھمرائی ءَ چہ بالی پٹ ءَ در آتکگ ءُ دیم پہ گوادر پورٹ ءَ رؤگ ءَ بوتگ- اے کاروان ءَ چینی جھمنندانی چار گاڑی ھوار بوتگ انت، وھدیکہ آیانی پھازگ ءَ پہ پاکستان آرمی ءِ شش، پولیس ءِ یکے، اے ٹی ایف ءِ یک گاڑی ءُ یک بکتر بندے ھوار بوتگ انت – اے کاروان ءَ آرمی ءِ چارسد ءُ چِل برگیڈ ءِ روٹ پروٹیکشن ءِ کمک ھم گون بوتگ بلے بلوچ پدائی جوانیں رپک ءُ ھنراں گوں اے جاہ ءَ سر بوگ ءَ سوبمند بوتگ انت، سنگر گپتگ ءُ اولسر ءَ گرنیڈ لانچراں گوں اُرش کتگ ءُ کاروان پہ اوشتگ ءَ لاچار کتگ چریشی ءَ پد نیم ادار ءَ تاں کاروان ءِ سر ءَ تیرگواری ءُ گرنیڈ لانچر آس داتگ چریشی ءَ چار چینی جھمنند ءُ یازدہ پوجی کارمند مرتگ انت –

جیئند بلوچ ءِ رِد ءَ اے آپریشن بی ایل اے مجید برگیڈ دو تمردیں پدائی نوید بلوچ ء خدابخش پنام ءِ اسلم بلوچ جھمنند دشت نگور ءُ مقبول بلوچ ء پھلان پنام ءِ قائم بلوچ جھمنند آواران گیشکور ءَ کتگ – آپریشن ءِ سرجم بوگ ءَ پد آیاں تاں دیراں وتی مھکمیں سنگرانی تہ ءَ پاکستانی پوج ءِ گوم ءَ جنگ داتگ ءُ دژمن سک باز تاوان داتگ – تیرانی ھلاس بوگ ءَ پد آیاں گڈی تیرے پلسپہ وتیگی کتگ ھردو تمردیں پدائیاں گڈی تیر وتی سر ءَ جتگ ءُ وت ءَ نمیران کتگ –

جارکش ءِ رِد ءَ نمیرانیں سنگت پدائی نوید بلوچ سال دوھزار ءُ نوزدہ ءَ، ءُ نمیرانیں سنگت پدائی مقبول بلوچ سال دوھزار ءُ دوازدہ ءَ بلوچ راجی آجوئی زرمبشت ءِ سلاہ بندیں جھد ءَ بندوک بوتگ انت وھدیکہ سال دوھزار ءُ بیست ءُ یک ءَ آھاں مجید برگیڈ ءِ تہ ءَ رزاکاری وتی کرد پیلو کتگ – مجید برگیڈ ءِ رھبندانی رِد ءَ آیانی چار ءُ ٹپاس بوتگ ءُ باور کنائینتگ کہ پدائی پہ زور یا جزباتی اے پیسلہ ءِ بھر نہ بوتگ انت پد ءَ شش ماھ ءَ تاں آیانی ٹریننگ کنگ بوتگ ءُ آ وتی مشن ءِ تیاری ءَ گلائیش بوتگ انت ءُ کساس دو سالانی اوپار ءُ ودار ٹریننگ ءَ پد مروچی آیاں وتی مشن سوبمندی ءَ گوں آسر کتگ –

جیئند بلوچ ءِ رِد بلوچ لبریشن آرمی نمیرانیں پدائی نوید بلوچ ءُ نمیرانیں پدائی مقبول بلوچ ءِ بے بھائیں دیمھونی ءُ تمردی ءَ آیاں دروت ندر کنت اے کول ءَ کنت کہ بی ایل اے آجوئی پیش یا رند ءَ ھچ وڑ نمیران بوتگیں سرانی دیمھونی ءَ شموشگ ءَ نیلیت ءُ راجدپترے تہ ءَ آیانی اے دیمھونی سھریں لپزاں گوں نبشتہ کنگ بنت –

جارکش جیئند بلوچ ءِ رِد ءَ بی ایل اے جمھوریہ چین ءِ دیم ءَ اے گپ ءَ تچک کنت ءُ آئی مکن کنت کہ بلوچستان یک زورگپت ءُ بھر کتگیں استانے، بلوچ گوستگیں ھپتاد ءُ ھپت سالاں وتی آجوئی ءِ جنگ ءَ کنگ ءَ انت، چین بلوچستان ءِ تہ ءَ ناکہ تھنا زورگیریں پاکستان ءِ کمک ءَ کنگ ءَ انت ءُ اے زورگیری ءَ گیش مھکم کنگ ءَ ھوار انت بلکیں سیندک ءُ گوادر پورٹ ءِ دروشم ءَ بلوچ ءِ مال ءُ مڈیانی لٹ ءُ پُل ءَ شریدار انت – ما مدامی جمھوریہ چین مکن کُتگ کہ آ بلوچستان ءِ تہ ءَ وتی لٹ ءُ پُل ءَ بند بہ کنت در بہ ایت، ما دوبر مکن کنیں اے گپ ءَ تچک کنیں کہ دری ڈیھانی سرمایہ کاری بس بلوچ راج ءِ مرزی ءُ منشا ءُ بلوچستان ءِ آجوئی پد بوت کنت – اشی ءَ ابید زورگیر ءِ گون ءَ کنگ بوتگیں درسیں مساماں بلوچ نہ منیت، بلکیں آ گوں دژمن ءَ کنگ بوتگ انت ءُ اے وڑیں دژمن ءِ شَور بستگیں ھمبستگانی بگیری ءَ بلوچ زرمبشت ءِ سلاہ بندیں جھد آیانی پھازگ ءَ پہ اوشتوک انت –

بی ایل اے ءِ جارکش جیئند بلوچ ءِ رِد ءَ اگاں چین نود روچانی تہ ءَ چہ بلوچستان ءَ وتی پروجکٹاں بند نہ کنت ءُ در نہ ایت گڑا بلوچ لبریشن آرمی چین ءِ بگیری ءَ وتی اُرشانی تہ ءَ ترندی ءُ گیشی کاریت – ما اے گپ ءَ تچک کنیں کہ چین ءِ بازیں گچینی سر ءُ جاہ مئے نشانگ ءَ انت ءُ مئے سرمچار آیانی سر ءَ اُرش کنگ ءَ ساجو انت – اگاں جمھوریہ چین ءَ جوانیں رویشت ءِ پیش دارگ ءَ سوبمند نہ بوت گڑا مئے اُرشانی نوکتریں درچ ءِ ھاتر ءَ تیار بہ بیت –

گڈسر ءَ جارکش جیئند بلوچ ءَ گوشتگ کہ بی ایل اے یکرندے پد ءَ اے کول ءَ کنت کہ بلوچستان ءِ تہ ءَ زورگیریں پاکستان ءِ سرجمی ءَ در آیگ ءَ تاں مئے اُرش ترندی ءَ گوں برجاہ مان انت –

سربوتگیں ھالانی رِد ءَ بلوچستان ءِ دمگ پنجگور ءُ سوراب ءَ چاردہ اگست ءِ تیاری ءِ چن ءُ لانچ ءَ دزگٹیں ڈپٹی کمشنر ءِ کارگسانی سر ءَ دز بمب اُرش کنگ بوتگ، وھدیکہ پنجگور ءُ کیچ ءَ پاکستانی پوج ءِ سر ءَ ھم اُرش کنگ بوتگ –

گیشیں ھالانی رِد ءَ مروچی یکشمبے ءِ روچ ءَبلوچستان ءِ دمگ پنجگور ءَ ناشناسیں پرپٹ سواراں پنجگور ءِ ڈی سی کارگس ءِ تہ ءَ دز بمب ءِ چگل داتگ ءُ در شُتگ انت –

تراک ءِ توار چہ دُور ءَ مردماں اشکُتگ ءُ تراک ءَ پد پولیس ءُ پوج ءَ وت ءَ ھمے جاہ ءَ سر کتگ ءُ چار ءُ ٹپاس کتگ –

ھمے وڈ چہ سوراب ءَ ھمے ھال آیگ ءَ انت کہ ناشناسیں مردماں سوراب ڈپٹی کمشنر ءِ کارگس ءَ چاردہ اگست ءِ چن ءُ لانچ ءَ دزگٹیں ٹولی دز بمب اُرش ءِ نشانگ کتگ انت –

چہ پنجگور ءَ اے ھال ھم آیگ ءَ کہ گچک ءِ ھند ءَ پاکستانی پوج ءُ سلاہ بندیں مردمانی میان ءَ میڑے بوتگ بلے ھچ وڈیں جانی تاوان ءِ ھال نیست –

کیچ ءِ شھر تربت گنہ ءَ برجاھیں پاکستانی پوج ءِ پانگس ءِ سر ءَ ھم ناشناسیں سلاہ بنداں اُرش کتگ –

پولیس ءِ رِد ءَ اے اُرشاں ھچ وڈیں جانی تاوان نہ بوتگ –

ھمے کہ چاردہ اگست نزیک بیت بلوچستان ءَ اُرشانی درچ گیش بنت، چدوپیسر مروچیگیں روچ ءَ بلوچستان ءِ دمگ ھاران ءَ چاردہ اگست ءِ درگت ءَ برجاھیں فٹبال گوازی ءِ سر ءَ پد ماں پد دو تراک بوتگ انت –

بلوچستان ءِ جتا جتائیں ھند ءُ دمگاں بوتگیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّ انت بلے تنی وھدی اے اُرشانی زمہ واری ھچ گل ءَ نہ منّ اِتگ انت –

سربوتگیں ھالانی رِد ءَ چہ ھزدار ءَ پاکستانی پوج ءَ ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں شپ ءَ پاکستانی پوج ءَ چہ بلوچستان ءِ دمگ ھزدار کھنڈ ءَ سرگودھا شھدربرجاھے نودربر شمس بلوچ زورانسری آوار جتگ ءُ بیگواہ کتگ کہ ھما انت بیگواہ انت –

ھالانی رِد ءَ شمس بُنکی ءَ ھزدار ءِ دمگ مولہ ءِ نندوک انت کہ ھنو وانگ ءِ ھاتر ءَ ادارکی ھزدار ءِ شھر ءَ اتکگ بوتگ –

دوشی شپ ءَ بگر تاں ھنو چہ بلوچستان ءَ شش مردمانی زورانسری آوار جنی ءِ ھال اتکگ انت کہ گوستگیں شپ ءَ کیچ ءِ دمگ تمپ ءَ پاکستانی پوج ءَ لشکر کشی کنان ءَ پنچ مردم زورانسری آوار جتگ ءُ بیگواہ کتگ انت –

چہ تمپ ءَ زورانسری آوار جنگ بوتگیں مردمانی تہ ءَ عارف ء پنڈوک، شاھزیب ء رحمدل، بہار ء جان محمد، قادر بخش ءُ عزیز ء اسلم ھوار انت –

ھمے وڈ ھمے ھپتگے سَے روچانی تہ ءَ کساس بست مردم زورانسری آوار جنگ بوتگ انت چدو پیش گوستگیں دو روچانی میان ءَ پاکستانی پوج ءَ سرجمیں بلوچستان چاردہ مردم زورانسری آوار جتگ ءُ بیگواہ کتگ انت –

بیگواھیں مردمانی تہ ءَ چہ پنجگور ءَ یکے، ھزدار ءَ دو، تربت ءَ دو، چہ کراچی ءَ یکے، شال ءَ یکے ءُ وھدیکہ کیچ ءِ جتا جتائیں ھند ءُ دمگاں سیزدہ مردم زورانسری آوار جنگ بوتگ انت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ سِی ءُ شش روچ سرجم بوتگ انت – مروچی بی ایس او ءِ بنجاھی جنرل سیکریٹری ماما عظیم بلوچ، سیکریٹری اطلاعات بالاچ قادر، صمند بلوچ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ بلوچ چاگرد ءَ گلامی ءِ ریشگ مھکمی ءَ نہ اشتگ انت ھمے ھاتر ءَ ریاست ءَ پرایمنیں جھد ءِ کندم کنگ ءَ وتی زور جتگ ءُ زوراکی ءِ سرجمیں سیمسر گوازینتگ انت –

ماما قدیر بلوچ ءَ گوشتگ کہ ریاست وتی زوراکیانی برجاہ دارگ ءَ وتی ناشرکاری شوربندیانی رِد ءَ روان انت، آئی ءِ اے کار پدر انت کہ پوج ھمک روچ بلوچ سیاسی باسک، نودربر، ورنا، ڈاکٹر، وکیل، انسانی ھکانی باسکاں ھوار ھر تک ءُ پھناتاں سیادی داروکیں مردماں آوار جنگ ءُ بیگواہ کنگ ءَ انت ءُ آیاں وتی زندانانی تہ ءَ ازیت دنت ءُ نمیران کنت، وھدیکی اے بلوچ پرزندانی ژانگولیں جون ھم ویرانگاں چگل دیگ بوگ ءَ انت –

آئی ءَ گوشتگ کہ تنی وھدی ھزارانی کچ ءَ زورانسری آوار جنگ بوتگیں مردمانی جون دست کپتگ انت وھدیکہ ھزارانی کچ ءَ آوار جتگ ءُ بیگواہ کتگ انت، سدانی کچ ءَ زالبول ءُ زھگ ءُ کماش ھم ھوار انت کہ پوج ءِ زوراکیانی نشانگ بوتگ انت ھمے وڈ ھمے سالانی تہ ءَ ریاست ءَ وتی زوراکیاں ھزاراں بلوچ نمیران کتگ انت –

ماما قدیر بلوچ ءَ گوشتگ کہ ریاست ءِ اے زورانسری آوار جنی ءُ نمیرانی ءِ درچ تاں ھما وھد ءَ برجاہ مان انت تانکہ زور بیگواھیں مردم یل کنگ مہ بنت، بلوچ وتی منزل ءَ سر مہ بنت یاکہ گلامی ءَ مہ من انت بلے پدا ھم بلوچ راج ءِ پرایمنیں جھد ءِ گیشی ءُ دیمھونیاں چہ ھمے گندگ بیت کہ بلوچ راج نوآبادیانی ریاستی اے کوش جاہ ءَ گوزیت ءُ وتی منزل ءَ سربیت –

سربوتگیں ھالانی رِد ءَ ھاران ءَ چاردہ اگست ءِ درگت ءَ برجاھیں گوازی ءِ فیسٹیولانی میان ءَ دو جتائیں جاھاں بمب اُرش ءِ ھال انت، دومی نیمگ ءَ جاؤ، ھرنائی، گچک،شاپک ءُ تربت ءَ پاکستانی پوج ءُ کریش پلانٹ ءِ سر ءَ اُرش کنگ بوتگ انت –

ھاران ءَ گوازی ءِ فیسٹیولانی سر ءَ بوتگیں اُرشاں ھچ وڈیں جانی تاوان ءِ ھال نیست وھدیکہ تراک ءَ پد ھردو جاھانی لیبی ءُ لیب چاروکاں پٹ یل داتگ ءُ تتکگ انت –

ھالانی رِد ءَ اے اُرش دو دمان ساری بزاں ادار شش ءَ ھاران ءِ شھر ءِ بنجاہ ءَ شھید نواب اکبر خان بگٹی ءِ پٹ برجاھیں فٹبال ءُ والی بال گوازی ءِ میان ءَ بوتگ انت ھمے وھد ءَ ھاران ءَ بچکانی مزنیں وانگ جاھے کرکٹ گوازی ءِ میان ءَ ھم تراک بوتگ –

اھوالکار ءِ رِد ءَ ھردو اُرش چاردہ اگست ءِ درگت ءَ برجاھیں گوازی فیسٹیولانی سر ءَ کنگ بوتگ انت –

اے گوازی دمگی گوازی ءِ اپسر حبیب کبدانی ءِ سروکی ءَ برجاہ بوتگ انت، وھدیکہ کرکٹ گوازی ءَ سروکی ءَ آصف بادینی کنگ ءَ بوتگ – اے گوازیانی تہ ءَ والی بال، فٹبال، بیڈمنٹن ءَ ھوار دگہ گوازی ھم ھوار انت –

دومی نیمگ ءَ بلوچستان ءِ دمگ تربت گوگدان ءَ ناشناسیں سلاہ بندیں مردماں کرش پلانٹ ءِ سر ءَ اُرش کرتگ اُرش ءَ دو مردم مُرتگ انت –

اھوالکارانی رد ءَ سلاہ بندیں مردماں دوشی شپ ءِ چار ءَ اُرش کرتگ ءُ پنجاپ ءِ دمگ ملتان ءِ جھمنندیں دو مردم ساقب ء مرسلین ءُ صدام ء یامین آوار جتگ اَنت ءُ پدا تیر جتگ ءُ کُشتگ اَنت –

ھمے وڈ مروچی یکشمبے ءَ ناشناسیں سلاہ بندیں مردماں بلوچستان ءِ جتا جتائیں ھند ءُ دمگ جھاؤ، ھرنائی، گچک ءُ شاپک ءَ پاکستانی پوج ءِ پانگسانی سر ءَ اُرش کتگ ءُ پوج جانی ءُ مالی تاوان داتگ –

اھوالکار ءِ رِد ءَ سلاہ بندیں مردماں راکٹ ءُ وتکاریں سلاھاں گوں پاکستانی پوج ءِ پانگسانی سر ءَ اُرش کتگ –

اے اُرشانی زمہ واری تنی وھدی ھچ گل ءَ نہ منّ اِتگ انت بلے چدوپیش اے دابیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت-