TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہءَ گْوشتگ کہ سرمچاراں سے مئی 2023 ءَ کیچ ءِ دمگ بلیدہ میناز ءَ زورگریں پاکستانی پوج ءِ توژگ پُجّارینوکانی سر ءَ اُرش کتگ چریشی ءِ آسر ءَ یک دُژمنیں چاریگے کُشگ بیتگ ءُ دومی ٹپی کتگ-

جارکش ءَ گْوشتگ کہ اے چاریگ بلیدہ ءِ کش گوراں زورگریں پاکستانی پوج ءِ جتائیں بُنجل ءُ پٹ پولی پانگساں توژگ پُجّارینگ ءَ بیتگ اَنت- بی ایل اے سرمچاراں اے مردم اوشتگ ءِ اشارہ کُتگ اَنت، بلے آیاں تچگ ءِ جُھد کتگ چریشی ءِ آ نشانگ کتگ اَنت-

گُڈی ءَ آئی ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت، ما پیسر تچک کتگ ءُ گوشتگ کہ دمگی مردم زورگریں پوج ءَ را ھرچ وڑیں ساز ءَ سامان ءِ پُجّارینگ ءَ پھریز بہ کن اَنت اگاں ناں وتی جانی ءُ مالی تاوانانی زمہ وار وت بنت-

روکپتی بلوچستان ءِ بنجاھی شھر زاھدان ءَ ھمک آدینگانی وڑ ءَ اے آدینگ ءَ ھم زھرشانی کنگ بیتگ، زھرشانی ءَ بازیں کچے ءَ مردماں بھر زرتگ-

زھرشانی زھدان ءِ مکی میست ءَ بندات بیتگ ءُ شھر ءِ جتا جتائیں دگانی سر ءَ اوگام جنان ءَ گوشت ’مرگ بر خامنہ ای ‘ مئے برات ھرکس ءَ کُشتگ اَنت ما آیاں کُش ایں‘ –

زھرشانی ءَ بیگواھیں مردماں ھوار گوستگیں سال ءِ سِی ستمبر ءَ زاھدان ءَ کُشگ بیتگیں مردمانی درگت ءَ بینر نبشتگ بیتگ اَنت کہ آیانی سر ءَ سرکار ءِ ھلاپ ءَ فارسی زبان ءَ لبز نبشتگ بیتگ اَنت-

زھرشانی ءَ پاھو دیگ بیتگیں مردمانی سر ءَ ھم زھرشانی کنوکاں زھر درشان اتگ ءُ گوشتگ کہ سرکار لس بے گناھیں مردماں ماں جتا جتائیں زنداناں پاھو دیگ ءَ اِنت –

پاھو دیگ بیتگیں مردمانی بارو ءَ مکی مسیت ءِ پیش امام ءُ راج دوستیں مولانا عبدالحمید اسماعیل زئی ءَ حطبہ ءِ وھد ءَ گوشت کہ سرکار مردماں نشہ ءِ باپار ءِ بھتام جنگ ءُ آیاں پاھو دیگ اِنت-

مولانا عبدالحمید بلوچ ءَ گوشت سرکار بہ گوش ایت مردماں نوکری داتگ کہ آ مردم نشہ ءِ باپار مہ کن اَنت،؟ یا بہ گوش ایت شرین وانگ ءُ درس داتگ اَنت آ اے جان کُشین کار ءَ مہ کن اَنت-

زانگ بہ بیت اے زھرشانی ھما وھد ءَ بندات بیتگ اَنت کہ روکپتی بلوچستان ءِ تیابدپی دمگ چھبار ءَ یک کسان سالیں جنکوئے ءِ گون ءَ ایرانی پولیس آپیسر ءَ جنسی زوراکی کتگ بیتگ کہ چریشی ءَ پد روکپتی بلوچستان ءَ یک شورشے بندات بیتگ-

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ سِی ءُ چار روچ سرجم بوتگ انت – مروچی بی ایس او پجار ءِ سرکماش زبیر بلوچ، کمک سرکماش بابل بلوچ ءُ بی ایس او ءِ ھنکینی سرکماش کامریڈ اسرار بلوچ، سی سی باسک صمند بلوچ، شکور بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ بازیں سالاں زورانسری آوار جنگ بوتگیں مردمانی یل کنائینگ ءِ بدل ءَ دوسری مردم آوار جنگ ءُ بیگواہ کنگ بوگ ءَ انت – بلوچ راج ءِ زانشتی ءُ وانندگیں ورنا زورانسری آوار جنگ ءُ بیگواہ کنگ بوگ ءَ انت –

ماما قدیر بلوچ ءَ گوشتگ کہ مئے ایردستی ءُ بے وسی ءِ اندازگ اے گپ ءَ جنگ بیت – مروچی بلوچ راج ءِ تمرد ءُ بے وسیں مات مئے دیم ءَ انت – مروچی مارا وتی ایردستی زانگی انت کہ اے استان ءَ مارا چوں دلسیاہ کتگ مارا بے کساس چیر ترینگ ءُ ایرموش کنگ ءِ جھد ءَ کنگ ءَ انت – مروچی مئے بلوچانی زمیر پرچا پاد نہ انت؟ ما پرچا زوراکی ءِ بگیری ءَ توار چست نہ کن ایں مارا زلم زوراکیانی بگیری ءَ توار چست کنگی انت –

ماما قدیر ءَ گوشتگ کہ زاناں ھنگت وپسگی انت؟ مروچی مئے مات ءُ گھارانی درد ءُ دلسیاھی مئے دیم ءَ انت درسانی زانگ ءَ ابید ھم مئے گیرت پاد نہ ایت –

آئی ءَ گوشتگ کہ بلوچاں یکجاہ بوگ ءُ وتی باندات رکینگی انت تانکہ ما وت ءَ زندگ داشت بہ کنیں –

بلوچستان ءَ وتکشی ءِ وئیل اوشتگ ءِ نام ءَ زانگ ءَ نہ اَنت، نوکیں ھالانی رِد ءَ دگہ دو جنکاں ھوار سے مردم ءَ وتکشی کتگ-

وتکشی ءِ وئیل باپاری شھر ھب چوکی، دکی ءُ ھُزدار ءَ دیم ءَ اَتکگ اَنت-

ھب چوکی ءَ پولیس رِد ءَ پشمبے ءِ شپ ءَ کار ءُ باری جاگہ ءَ برجاھیں بسکونی نامیں شرکتے ءَ یک پرائیوٹ پھازوکی شرکتے ءِ پھاوزک ءَ وتکشی کتگ کہ آئی ءِ پجّار احمد خان مگسی ء بھادر خان ءِ نام ءَ چہ بیتگ آئی ءِ وتی تُپنگ سر ءَ وت ءَ تیر جتگ ءُ وتکشی کتگ-

ھمے وڑ دکی ءَ یارو شھر ءِ دمگ ءَ ورنا ایں جنکے ءَ تیرگواری کتگ ءُ وتکشی کتگ- آئی ءِ پجّار بی بی صدیقہ ء وزیر خان جھمنند یارو شھر ءِ نام ءَ چہ بیتگ-

ھمے وڑ ھُزدار ءِ دمگ زھری ءَ چہ ھم ھال اِنت کہ یک جنکے ءَ وتکشی کتگ ءُ وتی زندمان ھلاس کتگ-

زانگ بہ بیت کہ بلوچستان ءَ وتکشی ءِ وئیل تُرندی ءِ گوم ءَ دیم ءَ آھگ ءَ اَنت- ھمے سال ءَ بلوچستان ءِ جتاجتائیں دمگاں چہ وتکشی ءِ وئیل نکش بیتگ اَنت، کہ آیانی کچّانی تہ ءَ ھمکروچ گیشی آھگ ءَ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ وتی شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں چار مئی ءِ شپ ھشت ءُ سی ملٹ ءَ کیچ ءِ بُنجاھی شھر تربت ءَ جنکانی کالج ءِ نزیک ءَ ملٹری انٹیلی جنس ( ایم آئی) بُنجل ءِ پھازوکی پانگس سر ءَ دستی بمب ءَ گوں اُرش کتگ-

میجر گْوھرام ءَ گْوشتگ کہ دستی بمب چوکی ءِ تہ ءَ کپتگ، چریشی ءَ اود ءَ پھازوکی ءِ ھاتر ءَ اوشتوکیں کارندہ ھما دمان ءَ مرتگ-

جارکش ءَ گْوشتگ کہ لھتے وتگڑیں ” سیاسی ءُ چاگردی مردم ” ھمکروچ ایم آئی ءِ بُنجل ءَ روگ ءُ زاھری دیگ ءَ اَنت ءُ وتی ھالاں پیش کن اَنت- اے وڑیں سرجمیں مردمانی کارپدانی سرپدی مئے گور ءَ ھست اَنت – آیاں مکن کن ایں کہ آ وتی ذاتی مپادانی ھاتر ءَ راجی جُھد ءِ کشک ءَ اَڑان مہ بنت اگاں ناں وتی تاوانانی زمہ وار وت بنت-

جارکش ءَ دیمتر ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ، بلوچستان ءِ وتواجھی ءَ تاں مئے اُرش تُرندی ءَ گوں برجاہ بنت-

روکپتی بلوچستان ءَ بندوکیں دگہ پنچ کس ایران ءِ جتا جتائیں زنداناں پاھو دیگ بیتگ کہ اے پاھو دیگانی کساسی ھواری ءَ چیزے روچانی توک ءَ پاھو دیگ بیتگیں مردمانی کساس ھژدہ ءَ سر بیتگ اَنت-

پاھو دیگ بیتگیں مردم ایران ءِ اُستان مشھد، اسپھان، یزد ءُ دگہ دگہ جاھاں پاھو دیگ بیتگ اَنت کہ ایانی توک یک اوگانی جھمنندے ھم ھوار اِنت-

گوستگیں روچ ءَ مشھد ءَ وکیل آباد زندان ءَ دو بندیگیں مردم پاھو دیگ بیتگ اَنت –

مشھد ءَ پاھو دیگ بیتگیں مردمانی پجار ملکداد زئی ریکی ء شریف جھمنند دوست مھمد میتگ ھیرمند ءُ نور اھمد روزئی جھمنند زاھدان ءِ ناماں زانگ بیتگ اَنت-

نور اھمد ایرانی سال نود ءُ نھ ءَ نشہ باپاری ءِ بھتام ءَ مشھد ءَ گرگ بیتگ ءُ ملکداد ایرانی سال نود ءُ ھپت ءَ سھل آباد بیرجند ءَ گرگ بیتگ-

ھمے وڑ ءَ چہ اسپھان اُستان ءَ ھم یک مردمے پاھو دیگ بیتگ اَنت-

اسپھان ءَ پاھو دیگ بیتگیں مردم ءِ پجار حبیب اللہ سخی فقیر داد زئی ء مولداد جھمنند زاھدان ءِ نام ءَ زانگ بیتگ –

حبیب اللہ ایرانی سال سیزدہ سد ءُ نود ءُ نُھ ءَ نشہ باپاری ءِ بھتام ءَ اسپھان ءَ گرگ بیتگ ءُ اود ءَ انقلابِ ایران ءِ آمیدگس ءَ پاھو دیگ ءِ ھکم داتگ-

ھمے وڑ دگہ یک بندیگین مردمے تربت جام ءِ زندان ءَ پاھو دیگ بیتگ-

پاھو دیگ بیتگیں مردم ءِ پجار ادریس گورگیج جھمنند کریم آباد زاھدان ءِ نام ءَ زانگ بیتگ-

ادریس ایرانی سال چاردہ سد ءَ نشہ باپاری ءِ بھتام ءَ تربت جام ءَ گرگ بیتگ ءُ آئی ءَ را آمیدگس ءَ پاھو دیگ ءِ ھکم داتگ-

ھمے وڑ ءَ استان یزد ءَ یک بندیگیں مردمے ھم پاھو دیگ بیتگ-

چہ یزد ءَ پاھو دیگ بیتگیں مردم ءِ پجار صبور شاہ بخش جھمنند زاھدان ءِ نام ءَ زانگ بیتگ کہ آ سال سیزدہ سد ءُ نود ءَ نُھ ءَ امیر رامشک ءِ ھواری ءَ گرگ بیتگ ءُ امیر رامشک ءُ دگہ یک بلوچے گوستگیں دو روچ پیش ما یزد ءَ پاھو دیگ بیتگ ات اَنت-

روکپتی بلوچستان ءَ یکین ھپتگ ءَ بندات بیتگیں پاھو دیگ بیتگیں درچ ءَ یک نوکیں دابے ودی کتگ کہ اے درچ ءَ کساس ھشت روچانی توک ءَ 18 بندیگیں مردم ماں پاھو ءِ دار ءَ درنجگ بیتگ اَنت کہ اے مردمانی توک ءَ گیشتری بھر نشہ ءِ باپاری ءِ بھتام ءِ سر ءَ پاھو دیگ بیتگ اَنت-

روکپتی بلوچستان ءَ اگاں انسانی ھکانی گل ءُ دگہ واکدار دلگوش مہ کن اَنت گڑا اود ءَ بازیں کساسے ءَ مردم ھمے داب ءَ پاھو ءِ دار ءَ درنجگ ءُ کُشگ بنت – لس اھوالانی توک ءَ اے بندیگیں مردماں وتی سپاھی کنگ ءِ موہ دیگ بوگ ءَ نہ اِنت-

بلوچستان ءِ دمگ کیچ ءِ بنجاھی شھر تُربت ءَ ناشناسیں مردماں پاکستانی لشکری دستی بمب تراکے اُرش ءِ تہءَ نشانگ کتگ۔

اھوالانی ردءَ تُربت گرلز کالج ءِ نزیک ءَ لشکریانی پانگس ءِ سرءَ ناشناسیں مردماں دستی بمب دور داتگ ءُ تتکگ اَنت۔

اھوالانی ردءَ دستی بمب پانگس ءِ تہءَ کپتگ ءُ ترندی تراکے ءَ گوں تراکیتگ وھدیکہ اُرش ءِ آسرءَ لشکریاں تاوان ءِ دیمپانی کنگ کپتگ۔

اُرش ءِ بابت ءَ واکدارانی نیمگ ءَ داں اَنگت ھچ پئیمیں لیکہ دیما نئیتکگ ءُ نانکہ اُرش ءِ ذمہ واری داں اَنگت کجام گل ءَ من اِتگ۔