TBP Balochi

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ سِی ءُ سَے روچ سرجم بوتگ انت – مروچی ایڈوکیٹ محمد حسین مینگل، بی ایس او ءِ گوستگیں سرکماش محمد خان مینگل ءُ دگہ مردین ءُ جنیناں بنجل ءَ اتکگ ءُ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ گوستگیں سروزیراں بازیں رنداں اے درشان داتگ کہ بلوچستان ءَ زورانسری آوارجنیانی تہ ءَ چیریں ادارہ، ایف سی، سی ٹی ڈی ھوار انت ءُ ایف سی بلوچستان سرکار ءِ چیر دست نہ انت –

آئی ءَ گوشتگ کہ بلوچستان ءَ انسانی ھکانی لگتمالی، زورانسری آوار جنی ءُ ژانگولیں جونانی دست کپگ ءِ درگت ءَ انسانی ھکانی میان استمانی گلاں ھوار اقوام متحدہ ءُ یورپی یونین دلگوش گور کتگ – اقوام متحدہ ءِ انسانی ھکانی کونسل ءَ بلوچستان ءَ پاکستانی پوج ءِ نیمگ ءَ بلوچ چکچینی، بلوچستان ءَ مردمانی سرا بمبگواری مزنیں کچے ءَ مردماں درپہ درکنگ بوگ انت بلوچ راج ءِ وتواکی ءُ بلوچ پرایمنیں جھد ءِ پلامرزی ءَ درشان ءُ ھاسکر بلوچانی زورانسری آوار جنی ءُ ژانگولیں جونانی دست کپگ ءَ آھاں دلپدردی ھم درشان اِتگ –

بلوچستان ءَ ھمے زوتاں بوتگیں ھئوراں مالی تاواناں ھوار جانی تاوان ءِ ھم ھال است انت –

گیشیں ھالانی رِد ءَ بلوچستان ءَ موسم سرما ءُ بھار ءِ ھئور، گرند ءِ کپگ ءَ ھوار دگہ وئیلاں سِی ءُ یک مردم بیران بوتگ انت وھدیکہ چِل ءَ گیش مردم زدگ بوتگ انت ءُ بازیں گس، کشار ءُ دگاں ھم تاوان رستگ –

پی ڈیم ایم اے ءِ رپورٹ رِد ءَ بلوچستان ءَ گوستگیں سال ءِ بشی ھئور بیست ءُ پنچ اگست ءَ ھلاس بوتگ انت کہ پدا رند ءَ نومبر ءِ ماہ ءَ موسم سرما ءِ ھئور بندات بوتگ انت کہ ھنگت برجاہ انت – موسم سرما ءُ بھار ءِ ھئورانی میان ءَ بازیں تاوان ءِ بوتگ کہ گِس ءُ دیوال کپتگ انت، ھار ءُ آزمانی گروک ءِ کپگ ءِ وئیلاں سِی ءُ یک مردم بیران بوتگ انت –

بیران بوتگیں مردمانی تہ ءَ دوازدہ مردین ءُ دھ زالبول ءُ نُھ زھگ ھوار انت کہ آھانی تہ ءَ نُھ مردمانی سیادی چہ ھزدار وھدیکہ چِل ءَ گیش مردم زدگ بوتگ انت –

شش گِس سرجمی ءَ کپتگ انت وھدیکہ پانزدہ گِساں تاوان رستگ، بازیں ھئور ءُ ھاراں سِی ءَ گیش دلوت کور ءِ ھار ءَ بُرتگ انت، پجاہ ایکڑ زمین ءِ کشتگیں گلہ آپ برتگ ءُ سِی باگ تباہ بوتگ – پنچ دگ دو مزنیں دگ ءُ یک پھلے ءَ تاوان رستگ –

پی ڈی ایم اے ءَ یک دگہ مگربی ھئور ءِ آیگ ءِ گمان زاھر کتگ –

جتا جتائیں ھند ءُ دمگاں ھئور، ترونگل گوات ءِ آیگ ءِگمان انت مگربی سسٹم سوب ءَ ھزدار، لورلائی موسی خیل، شیرانی مکران لسبیلہ ءُ کوہ ءِ سلیمان ءَ ترندیں ھئور ءِ گمان انت، ژوب، بارکھان، کوھلو، تربت ءُ چاگی ءَ ھوار پاکستان ءُ ایرانی سیمسراں ھم ھئور ءِ گمان انت – پی ڈی ایم اے ءِ رِد ءَ ترندیں ھئوراں توہان ءِ ھم آیگ ءِ گمان انت –

پی ڈی ایم ءَ درسیں ڈپٹء کمشنرز اے درگت ءَ سرپد کتگ انت کہ شیوار بہ بیت –

ھزدار ءَ نودربرانی ترسینگ ءِ بگیری ءَ بلوچستان یونیورسٹی آف انجینئرنگ اینڈ ٹیکنالوجی ءِ نودربراں وتی زھرشانی نبشتہ کنائیں اِتگ –

نودربرانی گوشگ انت کہ آ شھدربرجاہ ءِ نیمگ ءَ مدامی ترسینگ بنت کدی چکاس ءُ کدی ایڈمنسٹریشن نیمگ ءُ پوج ءِ بیھار دیگ بیت – مئے زھرشانی تاں ھما وھد ءَ برجاہ بیت تانکہ مئے لوٹانی سر ءَ گامگیج زورگ نہ بیت –

درنگاز کنوکاں وتی دھ لوٹانی چارٹر آف ڈیمانڈ دیم ءَ آؤرتگ –

چار آف ڈیمانڈ ءَ نودربرانی گوشگ انت کہ شھدربرجاہ ءِ واکدار ءُ پھازگی لشکر ءِ نیمگ ءَ نودربرانی ترسینگ بند کنگ بہ بیت – کنٹرولر ایگزامیشن ءِ نودربرانی گوم ءَ ردیں رویش ءُ بیھارانی سوب ءَ آھانی اگدہ پچ گرگ بہ بیت ءُ شھدربرجاہ ءَ سیاسی گلانی چست ءُ ایر دارگ مہ بنت –

نودربرانی لوٹ انت کہ نودربر چدوگیشتر مھدود کنگ مہ بنت، OBE سسٹم نہ بوگ ءِ سوب ءَ نودربر پیپر رپیٹ ءُ ناٹ پروموٹ بنت آ پروموٹ کنگ بہ بنت ءُ نودربرانی ھاتر ءَ شریں پیپر ایرکنگ بہ بیت درسیں اسکالر شپس پچ کنگ بہ بنت ءُ BEEF اسکالر شپ batch_18 ءِ وڈا انرجی ءُ الیکرانکس اسٹوڈنٹس ءَ دیگ بہ بنت ءُ ڈاریکٹریٹ اسکالر شپ ءِ ھاتر ءَ کمیٹی ءِ جوڈ کنگ بہ بیت –

نودربراں گوشتگ کہ ہاسٹلانی تر ءُ تاب وارڈنانی نیمگ ءَ پہ وھد کنگ بہ بنت ءُ ھاسٹل ءِ تہ ءَ ھما کیمرہ کہ اژدری نہ انت ءُ سرکٹ درکنگ بہ بنت ءُ نیوز پیپر اسٹیڈ ءَ جنگ بہ بنت ایڈمیشن فارم ءِ ھواری ءَ نودربر پراسپیکٹس ہارڈ ھم دیگ بہ بنت ءُ شھدربر جاہ پروسپیکٹ ءِ رد ءَ چلائینگ بہ بیت – سمسٹر فیسانی ھاتر ءَ نودربر دلسیاہ ءُ بیھار دیگ مہ بنت –

اشی ءَ ابید درنگاز کنوکیں نودربرانی گوشگ ات کہ نودربرانی ھاسٹل ءَ نوکیں کتاب جاہ ءُ ہاسٹل 9 ءِ وائی زوتاں زوت شرکنگ بہ بیت میڈ پیپر سیگزامز دوبر شیڈول کنگ بہ بنت –

ھاش ءُ زاھدان ءَ ھوارین دمگاں گاڑیانی ٹکر ورگ ءَ سَے مردم بیران، ایرانی لشکر ءِ تیرگواری ءَ ورنایے بیران-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءُ ھاش ءِ میانی دگ ءَ دو تیل کشیں گاڑیاں ٹکر وارتگ کہ چریشی ءَ سَے مردم بیران بیتگ اَنت-

وئیل ءَ ھردوکیں گاڑیاں آس کپتگ ءُ ھردوکیں گاڑیانی مردم ستکگ ءُ بیران بیتگ اَنت – وئیل ءَ بیران بیتگیں مردمانی پجار نہ بیتگ اَنت-

زانگ بہ بیت چیزے روچ پیش ھم زاھدان ءُ ھاش ءِ دگ ءَ سَے گاڑیاں ٹکر وارتگ کہ چریشی ءَ سَے مردم ستکگ ءُ بیران بیتگ ات اَنت-

ھمے وڑ ءَ ھیرمند ءِ دمگ دوست محمد بازار ءَ ایرانی لشکر ءَ تیرگواری کنان ءَ یک ورنایے کُشتگ-

کُشگ بیتگیں ورنا ءِ پجار بیست ءُ دو سالیگیں امید کلجائی ء غلام حضرت ءِ نام ءَ زانگ بیتگ –

بلوچستان ءِ تیاب دپی دمگ گوادر ءَ یک مردمے ءِ جونے دست کپتگ وھدیکہ بلیدہ ءَ تیرگواری ءِ وئیل ءَ یک مردمے بیران ءُ یکے زدگ بوتگ –

گوادر ءَ تیاب دپ ءَ دست کپتگیں جون ءِ پجار محمد حسن ء مشتاق جھمنند ملیر کراچی ءِ نام ءَ بوتگ –

پولیس ءِ رِد ءَ محمد حسن دریا ورد ءِ بوتگ کہ شکار ءَ واتر بوتگ ءُ وتی لانچ لنگر کتگ ءُ واتر نہ بوتگ –

پولیس ءِ رِد ءَ جون ءَ کساس دو روچ بیت وھدیکہ اژدری چار ءُ ٹپاس ءَ پد جون کھول ءِ دست ءَ دیگ بوتگ –

وھدیکہ کیچ ءِ دمگ بلیدہ میناز ءَ ناشناسیں سلاہ بندیں مردمانی تیرگواری ءَ نصیر احمد ءِ عطا محمد نامی مردمے بیران بوتگ ءُ منیر احمد ء عطا محمد زدگ بوتگ –

بیران ءُ زدگ بوتگیں مردم وت ماں وت برات انت، پولیس ءَ وت ءَ وئیل جاہ ءَ سر کتگ ءُ زدگ ءُ بیران بوتگیں مردم نادراھجاہ ءَ برتگ انت –

اھوالکار ءِ رِد ءَ ھردو برات بلوچستان ءِ دمگ ھزدار ءِ جھمنند انت ءُ اے ھردو برات پاکستانی پوج ءِ ھاتر ءَ راشن سر کنگ ءَ بوتگ انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کُتگیں درشانے تہءَ گُشتگ کہ بی ایل اے ءِ سرمچاراں دو جتائیں اُرشانی تہءَ کوھلو ءُ کلات ءَ قوضہ گیریں پاکستانی پوج ءِ پانگس ءُ لُٹ پُل کنوکیں شرکت ءِ مشینری نشانگ کُتگ اَنت۔

آئی ءَ گُشتگ کہ بی ایل اے ءِ سرمچاراں کوھلو ءِ بازار ٹلینگوخ وڈھ ءِ ھند ءَ زورگیریں پاکستانی پوج ءِ یک پانگس ءِ سلاہ بندیں اُرش ئے ءَ نشانگ کُتگ، اُرش ءِ تہءَ دژمن ءَ جانی ءُ مالی تاوان ءِ دیمپانی کنگ کپتگ۔

جارکش ءَ دیمترءَ گُشتگ کہ دومی اُرش ءَ بی ایل اے ءِ سرمچاراں کلات ءِ ھنکین گراڑی ءَ یک لُٹ پلُی شوربندی ءَ پہ کوھی دمگانی تہءَ دگ ٹھینوکیں شرکت ءِ مشینری مانداشتگ۔
 
آئی ءَ گُشتگ کہ بلوچ لبریشن آرمی ھمے دوھیں اُرشانی ذمہ واریءَ من اِیت۔ جارکش ءَ گُڈسرءَ گُشتگ کہ سرڈگار ءِ آجوئی ءَ داں مئے اُرش زورگیریں پوج ءُ آئی ھمکارانی سرءَ برجاہ مان اَنت۔

یونائیٹد بلوچ آرمی ءِ جارکش مزار بلوچ ءَ رسانکدراں شنگ کُتگیں درشانے تہ ءَ گُشتگ کہ مئے سرمچاراں مروچی خضدار ءِ ھنکین وڈھ ءِ ھند ءَ بازار مسیت دگ ءِ سر ءَ بستگیں پیسرگں ایف سی چوکی گوں دستی بمب ءَ نشانگ کتگ چریشی آسر ءَ سی ٹی ڈی ءِ بازیں کارندہ ٹپی بیتگ اَنت۔

آئی ءَ گُشتگ کہ وڈھ ءِ تہ ءَ ھمے زیتاں بلوچ سرمچارانی نیمگ ءَ بیتگیں اُرشاں پد اے ایف سی چوکی ءِ تہءَ سی ٹی ڈی ءِ کارندہ آرگ بیتگ اَنت کہ آ بے سوب ءَ لس مھلوک ءَ پَٹ ءُ پول ءِ نام ءَ تنگ کنگ ءَ اَنت۔

جارکش ءَ دیمتر ءَ گُشتگ کہ اے اُرش سی ٹی ڈی ءِ ھاتر ءَ یک ڈھجار اِنت کہ آ لس مھلوک ءِ تنگ کنگ ءَ بند بہ کُنت اگاں نہ آیاں ترندیں پسہ دیگ بیت اِنت ءُ گیشتر ترندی ءَ گوں اُرش کنگ بنت اِنت۔

جارکش ءَ گُڈسر ءَ گُشتگ کہ مئے اُرش بلوچستان ءِ آجوئی ءَ داں برجاہ مان اَنت۔