TBP Balochi

بلوچستان ءِ جتا جتائیں ھند ءُ دمگاں بوتگیں دگ ءِ وئیلاں کسانیں جنکوے ءَ ھوار پنچ مردم بیران ءُ ھپت زدگ بوتگ انت –

گیشیں ھالانی رِد ءَ بلوچستان ءِ دمگ جعفرآباد ، ڈیرہ اللہ یار ءَ کسانین جنکویں دگ ءِ آ نیمگ ءَ رؤگ ءَ بوتگ کہ تیز رؤکیں ٹرکے ءَ ڈیکر کتگ –

وئیل ءَ بیران بوتگیں جنکو پولیس ءَ نادراھجاہ ءَ سرکتگ ءُ ٹرک ءِ ڈرائیور دزگیر کتگ –

دومی نیمگ ءَ بلوچستان ءِ دمگ لورلائی ءَ شال دگ ءَ ٹرکے ءَ پرپٹے ڈیکر کتگ چریشی ءَ پرپٹ سوار بیران بوتگ – ریسکیو ءَ جون دست گپتگ ءُ نادراھجاہ ءَ سر کتگ –

لورلائی ءِ واکدارانی رِد ءَ وئیل ءَ بیران بوتگیں مردمے پجار نہ بوتگ وھدیکہ آئی جون ھنگت نادراھجاہ ءَ انت –

ھمے وڈ ھب ءِ دمگ ساکران دگ ءَ تیز رؤکیں ڈمپر ء دو پرپٹ سوار ڈیکر کتگ انت چریشی ءَ ھردو زدگ بوتگ انت – زدگ بوتگییں ھردو مردم نادراھجاہ ءَ برگ بوتگ انت ءُ اودا درمان کنگ ءَ پد گیشیں الاج ءِ ھاتر ءَ کراچی ءَ برگ بوتگ انت –

پنچپائی مشوانی ٹاؤن ءِ نزیک ءَ لندن دگ ءِ سر ءَ ٹوڈی گاڑی ءَ پرپٹ ءِ ڈیکر کتگ چریشی ءَ یک مردمے بیران ءُ سَے زھگ زدگ بوتگ انت –

بیران بوتگیں مردمے پجار حاجی درمحمد سمالانی انت ءُ زھگ آئی ءِ نماسگ بوتگ انت –

چہ کلات ءَ ھال ایگ ءَ انت کہ مغلزئی ءَ اے ٹی سی گاڑی ءِ بریکانی نہ گرگ ءَ ٹرلرے ءَ گوں ڈیک وارتگ چریشی ءَ کنڈیٹر اے ٹی سی عطاء اللہ جھمنند شال ھما دمان ءَ بیران بوتگ وھدیکہ ڈرائیور روزی خان ء وزیر خان اچکزئی جھمنند شال زدگ بوتگ –

بیران ءُ زدگ بوتگیں مردم کلات ءِ پولیس ءَ نادراھجاہ ءَ برتگ انت کہ اودا چار ءُ ٹپاس ءَ پد ھردو شال ءَ دیم دیگ بوتگ انت –

سربوتگیں ھالانی رِد ءَ بلوچستان ءِ دمگ ھزدار ءَ ناشناسیں سلاہ بندیں مردماں پولیس کارمندانی سر ءَ اُرش کتگ، پولیس ءَ پسوی تیرگواری کتگ بلے اُرشکار درآیگ ءُ روگ ءَ سوبمند بوتگ انت –

اھوالکار ءِ رِد ءَ اے اُرش گوستگیں شپ ءَ ھزدار ءِ دمگ محمد شئی کھٹان ءَ پولیس چیک پوسٹ ءِ نزیک ءَ بوتگ کہ سلاہ بندیں مردماں پولیس کارمند جلیل احمد ءِ سر ءَ اُرش کتگ، پولیس ءَ پسوی تیرگواری کُتگ ارشکار تچگ ءُ رؤگ ءَ سوبمند بوتگ انت ھچ وڈیں جانی تاوان نہ بوتگ –

پولیس ءِ نیمگ ءَ اُرشکارانی پٹ پول برجاہ انت –

دمگی مردماں وئیلے بگیری ءَ زھرشانی کتگ ءُ چہ بُرزی تبک ءِ واکداراں گوں لوٹ کتگ کہ پولیس کارمندانء پھازگ ءَ گامگیج بہ زوریت ءُ آھانی سپاھیاں گیش بہ کنت –

دومی نیمگ ءَ شال ءِ دمگ قمبرانی دگ ءَ جنکانی مزنیں وانگجاھے نزیک ءَ دزبمب ءِ دست کپتگ –

بم ڈسپوزل ءَ دز بمب ناکارہ کتگ – سریاب ءِ ایس ایچ او ءِ گوشگ انت جنکانی مزنیں وانگجاھ ءَ بمب دست کپتگ – ھالے سر بوگ ءَ بم ڈسپوزل ءَ وت ءَ ھمے جاہ ءَ سر کتگ ءُ دزبمب ناکارہ جوڈ کتگ – اے درگت ءَ گیشیں پٹ پول برجاہ انت –

مشکے : بلوچ راج گوں ھما راجاں ھوار اِنت کہ آیاں بھ زوراکی ءِ دیم ءَ سر جھل نہ کرتگ ءُ ایردستی نہ من اتگ ، مروچی ھم درانڈیھ بہ بیت یا گلزمین بلوچ راج ھرچ وڑیں سکی سگگ ءَ اِنت ءُ وتی آجوئی ءِ جھد ءَ دیم ءَ برگ ءَ اِنت۔اے گپ 11 اگست ، سوگند سرسبزی روچ ءِ درگت ءَ بی این ایم مشکے ھنکین ءِ چیردستی ءَ برجاہ دارگ بیتگیں مچی ءَ تْران کنان بی این ایم ءِ ھنکینی راھشوناں درشانتگ اَنت۔

گوں مراگِش ءَ تْران کنان استاد مھران ءَ گْوشتگ کہ بلوچستان چہ بِندات ءَ آجو ءُ وت واجھیں ڈیھے بوتگ پہ بلوچستانءِ پھریزگ ءَ بلوچ ءِ پیر ءُ کماشاں وتی ھون ریتکگ ءُ بلوچستان پھز اتگ۔اے گپ راستے کہ دری زوراکانی زوراکیانی آماچ بوتگ بلے بلوچستان ءُ بلوچ راج ءَ بھ دری راجانی ایردستی نہ من اتگ ءُ پہ وتی راجی آجوئیءِ پھریزگ ءِ مدام جاڑیگ بوتگ۔

آئیءَ گوشتگ وھدے انگریزاں بلوچستانءِ بادشاہ میر مھراب ھانءَ ھمے گْوشتگ کہ تو منی پرمان ءِ پابند ءُ منی کوتلی بہ بہ ئے بلے مھراب ھان انگریزانی ایردست بیگ ءَ ساڑی نہ بوت پمیشکا انگریزاں گوں وتی لشکر ءَ بلوچستانءِ سر ءَ ارس کرت ءُ 1839 ءَ بلوچستان زور گیپت۔ ھمے ایردستی ءِ بگیری ءَ بلوچاں ڈیھ پھزی ءِ راہ گچینت ءُ انگریز ءِ بگیری ءَ چیرکی جنگ بنا کرت ءُ انگریز ماں بلوچ گلزمین ءَ پہ ایمنی ءَ نندگ ءَ نہ اشت اَنت ، ھمے ارشانی پد ءَ پہ انگریزاں باز جیڑہ ودی بوتگ۔

دیمترا آئی ءَ گْوشتگ وھدے دومی جھانی جنگ ءَ پد انگریز چہ ھرچ نیمگ ءَ ایردستیں راجاں ماں بست گڑا آ چہ اے دمگ ءَ در کپگ ءَ لاچار بوت ، چہ انگریز ءَ در کپگ ءَ 11 اگست 1947 ءَ بلوچستان ءِ آجوئی سرسبز اِت ءُ بلوچ یک رندے پد ءَ وتی گلزمین ءِ وتواجہ جوڑ بوت اَنت۔آجوئی ءِ رسگ ءَ پد آیاں نوکیں دودانی پد ءَ گچینکاری کرت۔ بلوچستان گوں جھان ءِ کوپگے ءَ دیم ءَ جزگ ءَ ساڑی اَت ، آئی ءِ دو پارلیمان اَت اَنت ، جھگیرانی پارلیمان (زیریں پارلیمان ) ءُ گچینی پارلیمان ( بالائیں پارلیمان)۔بلے انگریزاں اے دمگ ءَ پہ وتی سیتانی پانک ءَ پانگے پکار اَت پمیشکا آیاں ھندوستان دو جاہ ءَ ونڈ کرت ءُ پاکستان ءِ نام ءَ ڈیھے جوڑ کرت۔وتی جھانی سیتانی دیمپانی ءَ پہ انگریزاں بلوچستان ءِ آجوئی مزنیں اڑاندے اَت ، آیاں چیراندری پاکستان ءِ کمک کرت ءُ بلوچستان پاکستان ءِ ایردست کنائینت۔

استاد مھرا ن ءَ گْوشتگ کہ یازدہ اگستءِ دارگ ءِ مول ھمیش اِنت کہ ما وتی پہ آجوئی ءِ گرگ ءَ کرتگیں مسام ءَ یات بہ کن ایں، سوگند ءَ بہ سبز این ءُ پاکستان ءُ دری ٹیکاں ھمے کلوہ ءَ بہ شکسا ایں کہ بلوچستان ءَ وھدے چہ انگریز وڑیں زوراکی ءَ وتی ڈیھ ءِ آجوئی پچ گیپتگ گڑا پاکستان ءِ بنیاد ءُ منک ءُ اینچو مگیم نہ اَنت کہ بلوچستان ءِ سر ءَ وتی سردستی ءَ برجاہ داشت بہ کنت ، الم آ زوراکی کنت ، کشت ءُ کشار کنت انچوش کہ داں انیگ ءَ آئی ءَ ھمینچو بلوچ کشتگ کہ انگریزاں وتی سد سال ءِ سردستی ءِ میان نہ کشتگ ، گار ءُ گمسار نہ کرتگ۔ پرچا کہ زوراک مدام ھمے وش منی ءَ بیت کہ آ گوں زوراکی ءَ راجانی وتواجھی ایرموش کرت کن اَنت بلے مردم ءِ گْوستانک چوشیں زوراکیانی سوبمندی ءِ گواھی نہ دنت۔

آئی ءَ گوشتگ کہ بلوچ راج جھان ءَ گوں ھما راجاں ھوار اِنت کہ آ راجاں بھ کسی ایردستی نہ من اتگ جھان ءِ مزنیں زوراکاں گوں ھوار ھما راج کہ اسلام ءِ نام ءِ سر ءَ سھرائی ءَ وت ءَ بلوچ ءِ دوست پیش کنت بلے چیراندری منگلی ریچیں سیاہ مار ءِ پیم ءَ بلوچ ءَ وت ءَڈنگ ئِے جتگ۔بلوچ ھچ ناسرپد نہ اِنت بلوچ جْوانے ءَ سرپد اِنت کہ من ءَ پہ وتی راجی سیت ءُ پہ وتی آیوکیں پدریچ ءِ آجوئی ءُ پہ آئی ءِ پانک ءَ چی کنگی اِنت۔

بی این ایم ءِ گْوستگیں سی سی باسک ڈاکٹر شئے ءَ تران کرتگ ءُ گْوشتگ مروچی مئے اے مچی ءَ ھما مردم ساڑی اَنت کہ آیانی گسانی تہ ءَ یک یک شھیدے ھست اِنت ، ھما شھید کہ آیاں پہ وتی راج ءِ باندات ءَ جیڑ اتگ ءُ وتی ساہ نْدر کرتگ اَنت۔ آیانی لیکہ ءُ سسا سک بلند ءُ برزاد بیتگ اَ نت پمیشکا ما آیانی رندگیری کن ایں۔

دیمتر آئیءَ گْوشتگ یازدہ اگست ھما روچ اِنت کہ بلوچ ءَ را سد سال ءَ رند چہ انگریز ءَ آجوئی رس اتگ ۔زوراک ءُ گیشواھی کنوکیں راجاں مدام دگہ راجانی پل ءُ پانچ بیڑ برتگ انچوش پہ بلوچ ءَ ھم مدام آیانی نپت ءُ بیراں گْورتگ بلے بلوچ ءَ سر داتگ ، وتی منگہ ءُ ماتیں گلزمین نہ داتگ۔انچوش کہ ما گپ اش کرتگ کہ الی مھمد مینگل ءِ ، نورا مینگل یا کہ ھمل جیھند ءُ بلوچ ھان ءِ ، اے ھما مردم بوتگ اَنت کہ ایشاں گوں زورگراں جنگ کرتگ۔انگریز سد سال ءَ بلوچستان ءِ سر ءَ سردست اَنت بلے گڈ ءَ بلوچاں آ چہ وتی سرڈگار ءَ در کرت اَنت ءُ آجوئی گیپت پمیشکا اے روچ ءِ پہ بلوچاں مزنیں ارزشتے ھست اِنت۔

آئی ءَ درائینت ، اے مزنیں گپے کہ مئے مردم ھمینکس کہ در پہ در بیتگ اَنت ، بلے آیاں وتی مول ءُ لیکہ یلہ نہ کرتگ ، گوں وتی سسا ءُ شھیدانی جھد ءَ بندوک اَنت۔ واری ءُ بزگی سگگ ءَ اَنت بلے چہ وتی مول ءَ پشت ءَ نہ شتگ اَنت۔ اے پہ ما بلائیں گپے کہ مروچی ما وتی کار یلہ کرتگ ءُ اد ءَ مچ بیتگ ایں کہ چار گپ گوش دار ایں۔ اے بلوچ راج ءِ آیوکیں پدریچ اِنت۔ درست اے گپ ءَ بہ زان اَنت کہ بلوچ ءَ مروچی وتی جنگ ھما ھنداں آؤرتگ کہ نی منزل چماں اندر اِنت ، اوست پزور اِنت۔ بوت کنت کہ آجوئی ءِ جنگانی تہ ءَ پند سک دراج بہ اَنت ، پنجاہ سال ، سد سال گْوز ایت بلے اے دْرچ کہ روگ ءَ اِنت وتی منزل ءَ الم سربیت اِنت۔

روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ بندیگیں مردمے پاھو دیگ بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں زندان ءَ بندیگیں مردمے مروچی بامسار ءَ پاھو دیگ بیتگ-

پاھو دیگ بیتگیں مردم ءِ پجار سِی سالی ئیں چراگ علی بامری جھمنند دلگان ءِ نام ءَ زانگ بیتگ –

اھوالانی چراگ ایرانی سال سیزدہ سد ءُ نود ءُ نھ ءَ بزانکہ سَے سال ءَ پیسر کوش ءِ بھتام ءَ گرگ بیتگ ءُ پد ءَ ایرانی انکلابی دادگاہ ءَ پاھو ءِ ھکم داتگ بیتگ-

اھوالانی رد ءَ چراگ پشمبے ءِ روچ ءَ ماں پاھو ءِ واستا جتائیں یل کوٹی ءَ برگ بیتگ ءُ مروچی سھب ءَ جلاد ءَ آئی ءِ ساہ گپتگ ءُ پاھو داتگ بیتگ-

زانگ بہ بیت روکپتی بلوچستان ءَ بندوکیں مردم یکشل ءَ پاھو دیگ بیگ ءَ اَنت ءُ آیانی توک ءَ گیشترین مردم نشہ باپاری ءِ بھتام ءَ پاھو دیگ بیگ ءَ اَنت-

بلوچستان ءِ دمگ کیچ تمپ ءُ دشت ءِ میانی کوہ مزن بند ءَ پوج ءِ لشکر کشی ءِ میان ءَ جنگ بیتگیں دو مردمانی نماز جنازہ مروچی وانگ بیتگ اَنت-

گیشیں اھوالانی رد ءَ مزن بند دشت ءَ پوج ءِ میان ءَ جنگ ءَ نمیران بیتگیں دو ورنایانی لاش ماں کھولاں دست گپتگ ءُ مروچی ھردوک کل ءُ کسارت کنگ بیتگ اَنت-

جنگ بیتگیں مردمانی پجار سناء ء مھمد رھیم جھمنند دشت ھسادیگ ءُ کامران جھمنند کونشکلات ءِ ناماں زانگ بیتگ ات اَنت-

جنگ بیتگین سنا ماں گوادر نیاآباد ءَ کل ءُ کسارت کنگ بیتگ کہ اود ءَ بازیں کچے ءَ مردماں بھر زرتگ ءُ زمین ءِ میار کتگ- ءُ ھمے وڑ ءَ کامران ماں تمپ کونشکلات ءَ کل ءُ کسارت کنگ بیتگ-

جنگ بیتگیں مردمانی گڈی دیدار ءَ آزاد بلوچستان ءِ بیرک ھم گندگ ءَ اتکگ کہ اود ءَ مردماں وتی ھمسنتی ءِ درشان ءِ لیکہ ءَ گڈی دیداری ءَ بیرک ماں ادیرہ ءِ سر ءَ مِک کتگ-

زانگ بہ بیت گوستگیں سَے روچاں مزن بند ءَ داں انگت ءَ پوج ءِ لشکر کشی مروچی ھم برجاہ اِنت ءُ اے مردم گوستگیں روچ ءَ جنگ بیتگ ءُ آیانی لاش انتزامیہ ءَ تربت سول ھسپتال ءَ رسینتگ انت ءُ اود ءَ آ پجار کنگ ءُ کھولانی دست ءَ دیگ بیتگ اَنت-

یک دراجیں مُدتے ءَ پد بلوچستان ءَ پوج ءِ میان ءَ جنگ بیتگیں مردمانی نماز جنازہ ءِ ھواری ءَ بلوچستان ءِ بیرک گندگ ءَ آیگ ءَ اِنت کہ چد ءُ پیسر لس مھلوک ءَ ھمے زوتاں اے دابیں چیزانی توک ءَ ترس ءُ ھیال گمان کتگ بیتگ-

بلوچستان ءِ دمگ کیچ ءُ بنجاھی شھر شال ءَ پاکستانی پوج ءَ دو ورنا آوار جنگ ءَ پد ناشناسیں جاھاں برتگ اَنت-

بیگواہ بیتگیں مردمانی پجار یحیٰ ءُ شیر جان لیاقت امین ءِ ناماں زانگ بیتگ اَنت – بیگواہ بیتگیں مردمانی تہ ءَ یحیٰ چہ شال ءَ ءُ شیر جان چہ تربت ءَ پوج ءَ دزگیر کتگ ءُ برتگ اَنت-

دمگی مردمانی رد ءَ بیست ءُ دو سالیگیں شیر جان سیکورٹی پورس ءَ یازدہ اگست دوھزار ءُ بیست ءُ سَے ءِ بیگاہ ءِ ساھت شش ءِ نزیک ءَ بلوچی بازار آپسر تربت ءَ چہ دکان ءَ دزگیر کنگ ءَ پد بیگواہ کتگ –

زانگ بہ بیت دو روچانی توک ءَ پاکستانی پوج ءَ چہ بلوچستان ءَ چاردہ مردم دزگیر کنگ ءَ پد بیگواہ کتگ اَنت-

بیگواہ کنگ بیتگیں مردمانی تہ ءَ یکے چہ پنجگور ءَ، یکے چہ کراچی ءَ، یکے چہ ھزدار ءَ، دو چہ تربت ءَ ءُ ھپت چہ کیچ ءِ دمگ ھیر آباد ءَ دزگیر کنگ ءَ پد بیگواہ کتگ اَنت-

متھدہ عرب امارات ءَ گوستگیں روچ بزانکہ آدینگ ءِ روچ ءَ عجمان ءَ شیخ خلیفہ بند زاید سٹریٹ ءَ النعیمہ تھری ءِ ھند ءَ پانزدہ تبکی ماڑی ءَ آس کپتگ –

الامارت الیوم ءِ رد ءَ آس کپگ ءِ ھال ءِ سر بوگ ءَ عجمان پولیس شھریانی پھریزگ ءَ کمکی ٹیمانی گون ءَ سر بیتگ ءُ آس اش کشتگ – آس دومی بھر ءَ کپتگ چریشی ءَ نندوکیں مردم سلامتی ءَ کشگ بیتگ اَنت ءُ ھچ جانی تاوان دیم ءَ نیتکگ اَنت-

ڈائریکٹر جنرل پولیس آپریشنز بریگیڈیئر جنرل عبداللہ سیف المطروشی ءَ گوشتگ کہ جھمنندی ماڑی ءَ آس کپگ ءِ ھال ءِ سر بوگ ءَ پولیس جاہ ءَ سر دمگ اش انگیر ءَ کتگ –

جھمنندیانی پھریزگ ءِ درکنگ سرجم بیتگ ءُ درست سلامتی کشگ بیتگ اَنت-

درشان ءَ گوشگ بیتگ کہ آس کپگ ءِ سبب ءَ شانزدہ اپارٹمنٹس ستکگ اَنت ءُ سیزدہ گاڑیاں تاوان رس اتگ-

آس ءِ توسگ ءَ پد کولنگ ءِ سسٹم ءِ سر ءَ کار بندات بیتگ ءُ آس ءِ کپگ ءِ سبب درگیجگ بوگ ءَ اَنت-

ڈائریکٹر جنرل پولیس آپریشنز ءَ ماڑی ءِ واھند ءُ جھمنندء مردم زور داتگ انت کہ پھریزی رھبنداں سرجم بہ کن اَنت ءُ ھما چیز ءَ پھریز بہ کن اَنت چراھی ءَ آس کپ ایت-

بلوچ نیشنل مومنٹ (بی این ایم) ءِ سرکماش ڈاکٹرنسیم ءَ گْوشتگ کہ11اگست پہ بلوچ راجی گْوستانک ءَ یک چیدگے ءِ بستار ءَ دار ایت،وھدے کہ بلوچستان چہ زوراکیں برتانیا ءِ دراجکشیں زورگری ءَ آجو بوت۔ 1839 ءَ بگر داں 1947 بلوچ راج ءَ برتانیا ءِ زورگری ءِ بگیری ءَ دراجکش ءُ ھونریچیں جنگ ءُ کانودی راہ ءُ درانی جنگ ءُ سیاسی پِڑ ءَ پُرکار بیتگ،بازیں دیمونی یے ءِ دیگ ءَ پد بلوچ راج ءَ 11اگست ءَ چہ برتانیا ءِ زورگری ءَ آجوئی گیپت۔

ڈاکٹرنسیم ءَ گْوشتگ، بِلے کہ برتانیا ءِ زورگری ءِ میان ءَ بلوچستان آجو نہ بیتگ بلے بلوچستان ءُ نیپال بستار چہ ھندوستانی برتانیا ءِ آدگہ ریاستاں جتا ءُ گھتر بیتگ،پمشکا ھندوستان ءِ بھر ءُ بانگ کنگ ءِ میان ءَ 4 اگست ءَ وائسرائے ھند لارڈ ماؤنٹ بیٹن،مھمدالی جناہ ءُ ھان کلات اھمد یار ھان ءَ دھلی ءَ یک مسامے ءَ دزرند کُرت کہ چہ ایشی ءِ بنیاد ءَ بلوچستان ءِ آجوئی منّگ بوت بلے برتانیا ءِ مھروانیاں پاکستان ءِ سروک ءُ کلات ریاست ءِ وکیل مھمد الی جناہ ءَ آجوئیں بلوچستان ءِ بگیری ءَ پندل سازگ بندات کُرت ۔آجوئیں بلوچستان ءِ دوئیں کابینہ آنی گوں پاکستان ءَ ھوار بیگ ءِ رَد کنگ ءَ پد مھمد الی جناہ ءَ ھاران ءُ لسبیلہ ءِ در کانودی ھواری منّ اِت کہ آ کلات ریاست ءِ بھر بیتگ اَنت ءُ کلات ریاست ءُ برتانیا ءِ سرکار ءِ میان ءَ بیتگیں مُسام ءِ رِد ءَ برتانیا ءِ دراھگ ءَ پد مکران ءُ ھاران ءَ ابید باڑھی دمگ پد ءَ کلات ریاست ءَ ھوار کنگ بنت بلے پاکستان ءَ گوں دُرسیں مردمی گْوستانک ءِ گون ءَ ناھکی کُرت ءُ اے پاکستان ءَ ھوار کُرت اَنت کہ چہ ھمد ءَ بلوچ ءِ ایردستی ءِ بندات بوت۔

آئی ءَ گْوشتگ کہ بلوچستان گْوستانی بنیاد ءَ ھچبر ھندوستان ءِ بھر نہ بیتگ ءُ نہ کہ برتانیا ءِ زورگری ءِ میان ءَ برتانیا ءَ مارا ھندوستان ءِ بھر بیگ ءَ لاچار کُرتگ بلے مزھب ءِ نام ءَ برتانیا ءَ ھندوستان ءِ بھر ءُ بانگ کنگ ءِ راہ گیشینت اَنت بلے ھندوستان ءِ دُرسیں آلماں جمیئت اُلمائے ھند ءِ نیمگ ءَ بھر ءُ بانگ ءِ بگیری کُرت ءُ اے پہ مسلماناں وتکُشی یے لیک اِت بلے کانگریس ءِ سروکانی لوٹ ءُ برتانیا ءِ پندل سوبمند بوت اَنت، ھندوستان بھر بوت ءُ ایشی ءِ سزا نوہ ماہ ءَ پد بلوچستان ءَ رَس اِت، روکپتی زوراکاں یک پانپانے رس اِت بلے مزھب ءِ نام ءَ جوڑ بیتگیں پانپان نہ ایوک ءَ بلوچ بلکیں پہ دمگ ءُ سرجمیں جھان ءَ یک اِلتے جوڑ بیتگ۔ مرچی پاکستان ءِ مزھبی گنوکیں لشکر ءِ” اسلامی ” زھرناکیں سلاھاں،ناشرکارانی بُنجاہ ءُ ناشرکاریاں تچکی ءَ بیم ھست۔

ڈاکٹرنسیم ءَ گْوشتگ کہ زورگری ءَ پَد بلوچ راج ءَ گھگیری ءِ راہ گچین کُرتگ ءُ داں مرچی ھم برجاہ اِنت۔بِلے کہ گھگیری ءِ دْرچ ءِ تہ ءَ کمی گیشی اتکگ بلے بلوچ راج ءَ ھچ وڑ ءَ دُژمن ءِ دیم ءَ سر جھل نہ کُرتگ ءُ مرچی بلوچ راجی گْوستانک ءِ مُھکم تریں گھگیری زْرمبشت برجاہ اِنت ءُ داں منزل ءِ سر بیگ ءَ ھمے وڑ ءَ برجاہ بیت۔ ھژدری گپ اِش اِنت کہ جھان ءَ زانگ لوٹ ایت کہ بلوچ راجی زْرمبشت گْوستانکی راستی ءِ بنیاد ءَ یک گْوچنی زْرمبشت ئِے ءُ میان استمانی کانودانی رد ءَ دیم ءَ روگ ءَ اِنت ءُ پاکستان وھدی لوٹے بیتگ بلے نوں پاکستان ءِ ھست بیگ ءَ دمگ ءِ تہ ءَ ھچبر ایمنی ءُ دلجمیں دیمروئی ءِ واب سرجم نہ بنت بلکیں دمگ ءَ ایمنی ءِ راہ چہ آجوئیں بلوچستان ءَ گْوز ایت ءُ اے راستی یے۔

روکپتی بلوچستان ءِ دمگ سراوان ءَ ایرانی چیریں ادارھاں دزگیر کنگ ءَ پد گون وت برتگ کہ چریشی ءَ پد آ بیگواہ اِنت-

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ سراوان ءِ ھند امام خمینی میتگ ءَ ایرانی چیریں ادارھاں یک ورنایے آوار جنگ ءَ پد بیگواہ کتگ –

بیگواہ کنگ بیتگیں ورنا ءِ پجار سِی ءُ شش سالی ئیں مھمد آصف درزدہ ء جنگیان جھمنند سراوان ءِ نام ءَ زانگ بیتگ –

اھوالانی رد ءَ چار شمبے ءِ روچ ءَ آصف وتی گاڑی ءِ شر کنگ ءَ شتگ بیتگ کہ اود ءَ چیریں ادارھانی بازیں گاڑیاں سواریں کارندھاں دزگیر کتگ ءُ پد ءَ آئی ءِ لوگ ءَ برتگ ءُ اود ءَ پٹ ءُ پول کتگ ءُ چریشی ءَ پد آئی ءِ درگت ءَ ھچ ھال نیست اَنت-

اھوالانی رد ءَ چرے وئیل ءَ پد آئی ءِ کھول چیریں ادارھانی سراوان ءِ بنجل ءَ شتگ اَنت گڑا آیاں گوشتگ اد ءَ شمئے مردم نیاؤرتگے –

پُل پدائی هُل سباهی چاڑ ءِ وتن

نبشتہ کار: کندیل بلوچ

دی بلوچستان پوسٹ

“اِے چراگانی سَپر هون مچیت رُژناه بیت
هاک ءِ وشبوهیں بهارگاه چریت رُژناه بیت”

“هون زمین زادگیں ریحان ءِ وتن گواڑگ باں
شپ جتیں کرن پہ برگیڈ ءَ بلّیت رُژناه بیت”

مروچی بلوچ راج ءُ ماتیں گُلزمین پھر ءُ شان ءَ ایں کہ پہ منی مهلبیں هاک ءِ پهازگ ءَ منی بچّ ءُ جنک وتی هیشی سراں ندر کنگ ءَ اَنت پہ وتی راج ءُ زمین ءِ پهازگ ءَ هزاراں کندیلیں سر کُربان بوتگ ءُ اَنگت کُربان کناں ءُ پیداک اَنت همے نمیرانیں سراں شھید ریحان جان هم یکّے کہ آئی ءَ وتی سر پہ وتی زمین ءِ موکگ ءَ ندر کُت-

مروچی یازده اگست بزاں کہ هما روچ اِنت کہ اِے روچ ءَ مئے ماتیں سرڈگار بلوچستان چہ گُلامی ءِ سانکلاں آجو بوتگ ءُ یکّ وشهالیں زمینے بوتگ کہ آئی ءَ سرے نیشتگیں بولک وتی زمین ءِ واجہ وت بوتگ آں بلّئے اِے وشیانی ساهت پہ مُدامی نہ اِت آں یکّ برے پد ءَ سیاه ءُ تهاریں شپے ءَ مانشان اَنت هر چیز ءِ گوں وت ءَ پیڑ اِت. جنگ ءُ چوپ کُشت ءُ کوش گار ءُ بیگواه کنگ سوچگ ماندارگ بندات بوتگ بلّئے پہ وتی زمین ءِ دوبر وتواجھی ءَ همے روچ ءَ بزاں یازده اگست ءَ لُمہ یاسمین وتی بچّ ریحان جان ءَ دست ءَ بڈ ءَ جنت پہ وتن کُربان بوگ ءَ رُکست کنت ءُ ریحان جان پہ گل ءُ شات نمیرانی ءِ راه ءَ جُنزان کنت ریحان جان ءَ زانتگ اَت اَچ من پد اِے راه ءَ هزار ریحان کاینت پہ راج ءُ زمین ءَ وت ءَ منی وڑ کُربان کن اَنت ءُ دژمن ءَ را همے کلوه ءَ دے اَنت بلوچ سرڈگار پہ زورانسری برگ پہ ترا واب ءِ کہ اِیشی ءَ را هچ وڑیں بِزانت ءُ آسر نیست اِے روچ ءَ بلوچ راج وتی آجوئی ءِ درگت ءَ یات کنت ءُ یازده اگست ءَ ریحان جان ءُ اِیدگہ ندر بوتگیں سرانی یات ءَ دنت کہ آهانی ریتکگیں هون بلوچ راج ءَ را پہ وتی آجوئی ءِ هاتر ءَ همے راه ءَ کُربان بوگ ءَ گیش ءَ چہ گیش توانگر کنت-

ریحان جان ءِ کرد چو روچ ءَ راج ءُ جھان ءِ دیم ءَ روژناه اِنت ءُ چو اِستال ءَ هزار ریحانانی راه ءَ شھمگ ءَ اَنت ریحان جان ءِ هونانی لیکہ مروچی آئی ءِ گُلزمین ءِ کوچگ ءُ زیداں چو وشبوه ءَ تالان اَنت آئی ءَ بلوچ آجوئی ءِ جنگ ءَ را نوکیں رنگ ءُ دروشُم ءِ داتگ آئی ءِ گرانبهائیں دیمھونی همُکّ مردم ءَ را جیڑگ ءَ لاچار کنت گوستاتک ءَ چوشیں باز سر بوتگ انت کہ وت ءَ پہ زمین ءَ ندر اِش کُتگ بلّئے ریحان جان ءِ کُربانی پہ راج ءِ ورنایاں یکّ درونتے اگاں پہ زمین ءَ یکّ ءِ کُربان بوگ لوٹ ایت گُڑا پیسرل الّم آرا وانیت ءُ در بارت
بلوچ سرڈگار هما زمین اِنت کہ هر همُکّ دری کوماں زورانسری ایردست کنگ ءِ جُھد کُتگ بلّئے آرا وتی روتگانی مُھکّم کنگ ءَ اُمبر نہ بوتگ آئی ءُ مرچی آگاں راج اِے جھان ءَ زندگ ءُ هست اِنت چہ همے پیمیں کارستانی کُربانیانی برور ءَ ریحان جان ءِ پگّر ءِ لیکّہ مروچی هر ورناه ءِ دل ءَ اِنت ریحان جان یکّ مھکمیں پگّرے نام اِنت کہ مُھکمیں پگرانی واهنُد راج دپتراں مُدام زندگ ءُ ابدمان اَنت ریحان جان ءِ پہ وتن کُربان بوگ دوبر بلوچ راج ءَ را همے سکین ءَ دنت کہ بلوچ سرڈگار پیسرا یکّ آزاتیں زمین ءِ بوتگ کہ آرا زورگیر ءَ پہ زورآنسری کوزه کُتگ گڑا واتوجھی شاتکامی هما درچک اِنت کہ ابید هون ءُ هید ءِ ریچگ ءَ بر نہ کنت ءُ مروچی چہ ریحان جان ءَ پد هزار ورنایاں وتی سر پہ زمین ءَ ندر کُتگ ءُ دژمن ءِ دیم ءَ گوں تمردی ءَ اُوشتاتگ اَنت مروچی سرجمیں دُگنیا زانت ءُ سرپد اِنت بلوچ راج وتی سرا بوهوکیں زُلم ءُ زوراکیانی دیمپانی ءَ شر زانت ءُ پہ وتی زمین ءَ هر وڑیں کُربانی دیگ ءَ ساڑی اِنت بلوچ راج ءِ بچّ جنک پیر ءُ ورنا وتی سینگ ءَ دژمن کُشیں شورهاں بنداں ءُ لگوریں دژمن ءِ دیم ءَ چو کوه ءَ مکّ بنت اِے گرانیں بار جُھد ءَ هواریں هما ورنایانی کوپگاں اِنت کہ اِے اھد ءِ فرعون ءِ نیست نابود کنگ ءَ شری ءَ زان اَنت مرچی ریحان جان شورهاں وتی سینگ ءَ بند ایت باندا هزار ریحان ودی بیت پہ وتی زمین ءُ راج ءِ پهازگ ءَ اِے کاروان پہ مڑاهے منزل ءَ سر بیت ءُ نہ کہ اِے سرمچنڈ وتی گلزمین ءِ پھریزگ ءَ پدکنز بنت بلکیں اِے کاروان روچ پہ روچ مُھکم تر بیت ءُ دیم پہ وتی منزل آجوئی ءَ گوں تمردی ءَ جُنزان کنت ءُ ورنایانی کوهیں باتن ءَ دیمھونی دیگ ءِ جزبہ ودی بیت ءُ بلوچ مات دیگہ هزار ریحان اِیں بچّ ودی کنت پہ وتی هاک ءِ پهازگ ءَ کہ آهانی کُربانی دژمن ءِ گاری ءِ نشان بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔