TBP Balochi

سر بیتگیں ھالانی رد ءَ روکپتی بلوچستان ءَ بندوکیں دگہ دو کس ایرانی آمیدگس ءَ پاھو داتگ اَنت، چریشانی ھواری ءَ پاھو دیگ بیتگیں مردمانی کساس ھپتاد ءُ دو ادارانی تہ ءَ دوازدہ ءَ سر بیتگ-

سر بیتگیں ھالانی رد ءَ روکپتی بلوچستان ءِ دمگ میناب ءَ ایرانی آمیدگس ءِ ھکم ءَ یک بندیگیں بلوچے پاھو دیگ بیتگ –

پاھو دیگ بیتگیں مردمانی پجار لال مھمد ءِ نام ءَ بیتگ –

ھمے وڑ ءَ ایران ءِ اُستان یزد ءَ ھم یک بندیھیں مردمے پہ پاھو دیگ ءَ جتائیں کوٹی ءَ برگ بیتگ-

پاھو ءِ کوٹی ءَ برگ بیتگیں مردم ءِ پجار امیر رامشک کہ آئی ءِ اُمر سِی ءُ چار سال ءُ آ رضا ءِ زھگ اِنت آ کرمان ءِ زرباری دمگ پھرج ءِ نندوک اِنت-

ھالانی رد ءَ امیر رامشک ایرانی سال سیزدہ سد ءُ نود ءُ نُھ ءَ مھریز اُستان یزد ءَ نشہ باپاری ءِ بھتام ءَ دزگیر کنگ بیتگ-

ھالانی رد ءَ مروچی آئی ءِ کھول ءِ گڈی گند کنگ بیتگ ءُ پہ پاھو ءِ دار ءَ برگ بیتگ-

زانگ بہ بیت گوستگین ھپتاد ءُ دو ادارانی تہ ءَ زالبولے ءَ ھوار دوزادھمی مردم اِنت پاھو ءِ دار ءَ درنجگ بوگ ءَ اَنت-

چد ءُ پیش موسی گورگیج، احسان گورگیج، عبداللہ زاروزئی، مدینہ سبزوان، امین اللہ کریمی کلجانی، مھمد شھبیک، گل مھمد ناروی، عبدالستار شاھوزئی، نعمت اللہ ریکی،عید مھمد شادان مھمدود رھمانی پاھو دیگ بیتگ ات اَنت کہ اے مردم روکپتی بلوچستان ءِ جتا جتائیں شھراں پاھو دیگ بیتگ اَنت-

بلوچستان ءِ دمگ پنجگور ءَ تیرسپتگیں لاشے دزکپتگ-

گیشیں ھالانی رد ءَ پنجگور ءِ دمگ سی پیک دگ ءَ جعفر باؤسنگ سکیم ءِ نزیک ءَ پولیس ءَ را یک مردمے ءِ لاش دزکپتگ کہ آ تیر جنگ ءُ کُشگ بیتگ-

آئی ءِ کِسگ ءَ یک پرچی یے دزکپتگ کہ آئی ءِ سر ءَ جماپ ء پنڈوک جھمنند ھوشاپ تربت نبشتگ بیتگ ءُ لاش پولیس ءَ چست کتگ ءُ ٹیچنگ ھسپتال پنجگور ءَ سر کتگ-

بلے داں انگت ءَ کوش ءِ سبب زانگ نہ بیتگ –

روکپتی بلوچستان ءِ دمگ سراوان ءَ گوستگیں روچاں ناشناسیں سلاہ بندیں مردمانی تیرگواری ءَ کُشگ بیتگیں علی رضاشھرکی ءِ کوشکارانی دزگیری ءِ ٹاہ پولیس ءَ داتگ-

پولیس ءِ رد ءَ کوش ءَ ھواریں مردم دزگیر کرتگ اَنت، پولیس ءِ گوشگ اِنت اے مردم علی رضا شھرکی ءِ کوش ءَ ھوار بیتگ اَنت-

دومی نیمگ ءَ سردار دوست علی جلیلیان ءَ اھوالکاران تران کنان ءَ گوشتگ کہ پولیس ءَ یک سوبین آپریشنے ءِ وھد ءَ سَے مردم دزگیر کتگ اَنت آ علی رضا شھرکی ءِ کوش ءَ ھوار اَنت ءُ سلاہ بندیں گل جیش العدل ءِ باسک اَنت –

پولیس ءَ دزگیر کتگیں مردمانی نام پجار تنی وھدی نہ کتگ اَنت، لس ھالانی ھالانی توک ءَ دزگیر کنگ بیتگ بیتگیں مردم گمانی بے گناہ گوشگ بوگ ءَ اَنت-

روکپتی بلوچستان ءَ جنگولین گل جیش العدل ءِ نیمگ ءَ تنی وھدی اے درگت ءَ دگہ گپ دیم ءَ نیتکگ اَنت نانکہ اُرش ءِ زمہ واری نانکہ وتی باسکانی دزگیری ءِ راستیں –

ایرانی لشکر ءُ لوگانی گر ءُ دار کنوکیں فاؤنڈیشن ءِ نیمگ ءَ بلوچ آبادی ھنداں مردمانی بیھار دیگ ءُ آیانی جاہ ءُ لوگانی کروجگ ءِ درچ برجاہ اَنت-

سر بیتگیں اھوالانی رد ءَ گوستگیں شپ ءَ روکپتی بلوچستان ءِ ھند چھبار ءِ دمگ مراد آباد کمب ءَ ایرانی لشکر ءُ ھاؤسنگ فاؤنڈیشن ءِ کارمنداں جھمنندی مردمانی چست بوگ ءِ بیھار دیان ءَ لٹ ءُ کُٹ کتگ اُنت-

ھالانی تہ ءَ گوشگ بیتگ کہ ھاؤسنگ فاؤنڈیشن ءِ کارمنداں لشکر ءِ ھواری ءَ اے مردمانی سر ءَ بیڑ برتگ ءُ مردیناں ھوار زھگ ءُ زالبول ھم لٹ ءُ کُٹانی نشانگ کنگ بیتگ اَنت-

چاگردی ترامجاھاں شنگ بیتگیں تامر بنداں گندگ بیت اِنت کہ اود ءَ لشکر مردماِ دکہ دیگ ءَ اِنت کہ آیاناں گوشگ اِنت اے زمین چہ کجا شما زرتگ –

ایرانی ھاؤسنگ فاؤنڈیشن ءِ گوشگ اِنت اے زمیناں کاگد نیست ءُ ایشانی سر ءَ مردم بے بنیاد ءَ نشتگ اَنت چرے ھاتر ءَ ایاں اے جاھانی سر ءَ چست بوگ کپ ایت-

دمگی مردمانی زھرشانی ءَ پد فاؤنڈیشن ءِ کارمند واتر شتگ اَنت بلے اود ءُ زالبول ءُ زھگ گیش زدگ بیتگ اَنت-

زانگ بہ بیت گوست ءَ چھبار ءُ دگہ جاھاں ھم اے دابیں وئیل پیش اتکگ بیتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں پاکستانی پوج ءِ یک چوکی ءِ سر ءَ اسنائپر ءَ اُرش کتگ ءُ یک کارندھے کُشتگ-

جارکش ءَ گْوشتگ کہ سرمچاراں مروچی سے شمبے ءَ کیچ ءِ دمگ کولواہ بلور ءِ ھند ءَ پاکستانی پوج ءِ یک چوکی ءِ سر ءَ اسنائپر چہ اُرش کتگ-

آئی ءَ دیمتر ءَ گْوشتگ کہ اُرش ءِ آسر ءَ دُژمن ءِ یک کارندھے ھما دمان ءَ مرتگ-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں دُژمن ءِ سر ءَ اُرشاں برجاہ دار اِیت-

بلوچستان ءِ دمگ سبی ءَ ھپت سال پیسر زورانسری بیگواھی ءِ آماچ بیتگیں مردم داں انگت یل نہ بیتگ۔

نورا ء دلشاد جھمنند جالڑی سانگان ءِ کھول ءِ گُشگ اِنت کہ نورا ھپت سال پیسر پاکستانی لشکریاں منڈائی ءِ ھنکین ءَ لوگے سرءَ بیڑ بری ءِ نیام ءَ دزگیر کُتگ ءُ ناشناسیں ھندی ءَ بُرتگ اَت۔

کھول ءِ گُشگ اِنت کہ اِشی ءَ پد نورا ءِ درگت ءَ کجام ھم پئیمیں اھوال دز نہ کپتگ اَت۔ آئی گُشگ اَت کہ نورا شوانگی کُتگ ءُ وتی گُذران کنگ ءَ بیتگ کہ لشکریاں آ زورانسری بیگواہ کتگ اَت۔

کھول ءَ چہ انسانی اگبالانی گلاں دزبندی کُتگ کہ نورا ءِ یل کنائنگ ءِ درگت ءَ توار چست بہ کن اَنت دانکہ ءَ گیر کانودی ءُ گیر انسانی زورانسری بیگواھی ءَ چہ آجو بہ بیت۔

سر بیتگیں ھالانی رد ءَ روکپتی بلوچستان ءِ دمگ سراوان ءَ ایرانی سپاہ ءَ تیرگواری کنان ءَ یک تیل کشے کُشتگ-

تیرگواری ءِ وئیل سراوان ءِ دمگ کلگان ءَ پیش اتکگ کہ اود ءَ پرپٹانی سر ءَ یک تیل کشوکیں مردمے سپاہ ءَ تیرجتگ ءُ کُشتگ-

بیران بیتگیں مردم ءِ پجار بیست ءُ سَے سالیگیں ثنااللہ دھواری ء سکندر جھمنند آسپیچ سراوان ءِ نام ءَ زانگ بیتگ-

زانگ بہ بیت ایرانی سپاہ ءَ ھوار دگہ ادارہ ھمک سال بازیں تیل کشانی سر ءَ تیرگواری کنگ ءُ آیاں کُشگ ءُ زدگ کنگ ءَ اَنت-

سیستان ءُ بلوچستان ءَ دگہ جوانیں کارانی نہ بوگ ءِ سبب ءَ سیمسرانی مھلوک گیشتر تیل ءِ جان کُشین باپار ءَ گوں ھمگرنچ اَنت چریشی ءَ ایرانی سرکار اے کار ءَ ماٹو کنت ءُ اے کار ءُ باری مردمانی سر ءَ سرکار ترند گندگ ءَ کیت اِنت-