TBP Balochi

سربوتگیں ھالانی رِد ءَ مروچی پاکستانی پوج ءَ تمپ ءِ دمگ حیرآباد ءَ لشکر کشی کنان ءَ ھپت مردم زورانسری آوار جتگ ءُ بیگواہ کتگ انت –

دمگی اھوالکار ءَ گوں دی بلوچستان پوسٹ ءَ تران کنان ءَ گوشتگ کہ مروچی سھب ادار کساس ھپت ءَ پاکستانی پوج ءَ تمپ ءِ دمگ ھیر آباد ءَ بیڑ برتگ ءُ سرجمیں دمگ وتی انگر ءَ کتگ –

اھوالکار ءِ رِد ءَ پاکستانی پوج ءَ لشکر ءِ کشی ءَ میان ءَ ھپت مردم زورانسری آوار جتگ ءُ بیگواہ کتگ انت کہ آھانی تہ ءَ لیاقت ء ناگمان، ستار ء اللہ بخش، ریاز ء حیدر، خلیل نامی مردمے ءِ چُک ھوار انت وھدیکہ سَے مردمانی پجار ھنگت نہ بوتگ –

زانگ بہ بیت کیچ ءِ دمگ زامران ءُ مزن بند ءَ مروچی دومی روچ انت کہ پاکستانی پوج ءِ لشکر کشی برجاہ انت – بلوچستان ءِ جتا جتائیں ھند ءُ دمگاں پاکستانی پوج ءَ لشکر کشی ءِ میان ءَ ھزارانی کچ ءَ مردم زورانسری آوار جتگ ءُ بیگواہ کتگ انت کہ آھانی تہ ءَ کمے کساس ءَ مردم یل دیگ بوتگ انت بلے دومی نیمگ ءَ دوسری آوار جنگ ءُ بیگواہ کنگ بوتگ انت – زورانسری آوار جنگ بوتگیں مردمانی تہ ءَ گیشتریں کچ بلوچ ورنا ءُ نودربرانی انت –

ھمے درگت ءَ بلوچ ورنایے ءِ گوشگ انت کہ آوار جَنی ءِ درچ یکشلہ گوں تیزی ءَ برجاہ اِنت۔ اگاں اشی ءِ دارگ ءَ یک مزنیں گامگیجے زورگ مہ بیت۔ یک کاونٹر پالیسی ءِ دیما آرگ مہ بیت۔ یک ھدےءَ بازیں ورنایانی سما ءُ پگر گوھتگ کنگ بنت – اے تیزی ءَ بیگوائی بہ مانیت کس نہ رکیت۔ ھرکس آوار جَنگ بیت تھنا ھما کول زھرشانی بہ کنت اشی ءِ ٹوھیں سانے نہ کپیت ۔ پمشکا یک مُچانکی جھدے یک مچانکی عملے ءِ نیمگ ءَ نی روگ لوٹ ایت-

سربوتگیں ھالانی رِد ءَ کیچ ءِ دمگ زامران ءُ مزن بند ءَ مروچی دومی روچ ءَ ھم پاکستانی پوج ءِ لشکر کشی برجاہ بوتگ، پاکستانی پوج ءَ زمینی ءُ برزی کمک ھم گون بوتگ ات –

دمگی اھوالکارانی رِد ءَ اے دمگاں جنگی بالگرد ءُ ڈرون بالگرد ھم تر ءُ تاب کنگ انت –

اے ھم ھال آیگ انت کہ مزن بند ءِ کوھی دمگاں سلاہ بند ءُ پاکستانی پوج ءِ میان ءَ میڑے بوتگ میڑ ءَ ھردو نیمگاں جانی تاوان ءِ ھال انت –

وھدیکہ واکداراں دو مردمانی جون ھم تربت نادراھجاہ ءَ آؤرتگ انت کہ آھانی پجارجاپر ء محمد رحیم پنام سناء جھمنند دشت ھسادیگ ءُ کامران پنام نودی جھمنند کونشکلات تُمپ ءِ ناماں چہ بوتگ انت –

دمگی اھوالکارانی رِد ءَ اے ھردو ورنا بلوچ آجوئی لوٹوکیں سلاہ بندیں گلے ءَ گوں بندوک بوتگ انت کہ مروچی مزن بند ءِ میڑ ءَ نمیران بوتگ انت –

بلے تنی وھدی بلوچ آجوئی لوٹوکیں گلانی نیمگ ءَ اے درگت ءَ ھچ وڈیں درشان دیگ نہ بوتگ –

زورانسری آوار جنگ بوتگیں داد شاہ ءِ گھار ءَ کراچی پریس کلب ءَ گوں اھوالکاراں تران کنان ءَ گوشتگ کہ گوستگیں شپ ءِ ادار دو ءِ نزیک ءَ کراچی ہاکس بے ءَ مئے گس ءَ سی ٹی ڈی ءَ مزنیں کچے ءَ بیڑ برتگ ءُ منی ورنا ءُ نودربریں برات داد شاہ ء صبر خان درکانودی آوار جتگ ءُ بیگواہ کرتگ –

آئی ءَ گوشتگ کہ منی برات منی کماشیں پِت ءِ دیم ءَ درکانودی آوار جنگ ءُ بیگواہ کنگ بوتگ، داد شاہ ءِ ھواری ءَ پوج ءَ آئی موبائل، چارجر، سوٹ کیس ءِ تہ ءَ لھتیں گُد زرتگ ءُ گوں وت برتگ انت ءُ پوج ءَ منی پت ءِ دیم ءَ گوشتگ کہ ما سی ٹی ڈی ءِ کارمند ایں داد شاہ ءَ پہ جُست ءُ پُرس ءَ برگ ءَ ایں –

آئی ءَ دیمتر ءَ تران کنان ءَ گوشتگ کہ منی برات یک نودربرے آئی انٹرمیڈیٹ کنگ ءَ پد گِس ءِ مالی جاورانی نگیگ بوگ ءِ سوب ءَ دیم ءَ ونت نہ کرتگ ءُ دکانے پچ کرتگ – ما بنکی ءَ گریشگ ھزدار ءِ جھمنند ایں، اود ءَ جاورانی ناگیگی ءُ پہ وانگ ءَ کراچی ءَ آتکگ ایں کہ ما اد ءَ پہ ایمنی ونت بہ کن ایں اد ءَ کراچی ءَ ایمن بیتگ ایں – منی برات یک شریں انسانے ءُ آئی ءَ بلوچی زبان ءُ لبزانک ءِ بارو ءَ نبشتہ ھم کرتگ، آئی ءِ نبشتگیں کتابے زوت شنگ بیگی بوتگ، چہ ایشی ءَ اَبید آ دگہ ھچ وڑیں گل ءُ کاراں ھوار نہ بوتگ –

آئی ءَ گوشتگ کہ پہ برات ءِ درکانودی آوارجنی ءُ بیگواھی ءِ ارزی دیگ ءَ ما نزیکیں پولیس تھانہ ءَ شتگ ایں، بلے پولیس ءِ کارمستر ءَ سی ٹی ڈی ءِ کارمندانی بگیری ءَ ارزی نبشتہ نہ کرتگ ءُ مارا ھمے گوشتگ کہ آ وتی ادارھانی بگیری ءَ ارزی نبشتہ کرت نہ کن اَنت ءُ مئے ارزی اِش رد کرتگ ، وھدیکہ ما آیان ءَ گوشتگ کہ سی ٹی ڈی ءِ کارمنداں وت منی پِت ءِ دیم ءَ گوشتگ کہ آ سی ٹی ڈی ءِ کارمند اَنت ءُ آ داد شاہ ءَ برگ ءَ انت –

آئی ءَ گوشتگ کہ ما چہ ملکی ادارھانی گوں انساپ ءِ لوٹ ءَ کن ایں، مارا گوشگ بہ بیت کہ ما پہ انساپ ءَ کُج ءَ برو ایں؟ اے ڈیھ ءِ پر ایمنیں شھری ءِ بستار ءَ پوجی کارمند بے میار ءَ بیدے ایپ آئی آر ءَ شپ ءِ نھنگام ءَ اے وڑ ءَ درکانودی آوار جنت ءُ بیگواہ کن انت ءُ بیگواھی ءِ ارزی ھم نبشتہ کنگ نہ بیت ما چوں ءَ انساپ ءِ امیت داشت کنیں ؟

گڈسر ءَ آئی ءَ گوں اھوالکاراں تران کنان ءَ گوشتگ ما چہ اے کانفرنس ءَ ھمے لوٹ ءَ کنیں کہ داد شاہ زوتاں چہ زوت دیم ءَ آرگ بہ بیت ءُ مئے گوم ءَ انساپ کنگ بہ بیت – اگاں داد شاہ ءِ سر ءَ ھر وڈیں بھتامے ھست گڑا ملک ءِ آمیدگس ءَ پیش کنگ بہ بیت ، بلے مارا اے وڑ ءَ درد ءُ رنجانی آماچ کنگ مہ بیت انت – منی کماشیں پِت وتی زھگ ءِ زورانسری آوار جنی ءُ بیگواھی ءِ گماں پریشان اِنت، آئی ءَ ھمنچو گوشگ بہ بیت کہ آئی ءِ زھگ کجام میار ءَ درکانودی آوار جنگ ءُ بیگواہ کنگ بوتگ –

وائس فار بلوچ مسنگ پرسنز ءِ رھشون حوران بلوچ ءَ بیگواھیں مردمانی پانکجنیں گل وی بی ایم پی ءِ بنجل ءَ گوں اھوالکاراں تران کنان ءَ گوشتگ کہ پُرایمنیں ءُ کانودی جھد ءَ ابید ھم مناں ءُ منی کھول ءَ دلسیاہ کنگ انسانی ھکانی لگتمالی ءُ درکانودی گامگیج یے –

آئی ءَ گوشتگ کہ لھتے روچ بیت کہ ریاستی ادارہ مناں یکشل ءَ دلسیاہ کنگ ءَ انت – لھتے روچ ساری ماں چہ سریاب کلی شاہ نواز شال ءَ در اتکگ ءُ سٹلائٹ ٹاؤن ءَ اتکگیں گڈا ھما انت کہ چیریں ادارھانی کارمند مئے رندگیری ءَ کنگ ءَ انت ءُ ھمک وھد ءَ لھتے مردم گِس ءِ گیٹ دپ ءَ اتکگ ءُ مارا تُرسیں اِتگ ات – منی پت ءُ کھول ءِ دگہ لھتے مردم مئے ھما پیشی گس ءَ نشتگ انت کہ شپ ءِ کساس ادار سَے ءَ مئے کلی شاہ نواز گس ءِ سر ءَ ریاست ادارہ ءُ سی ٹی ڈی کارمنداں بیڑ برتگ گس وتی انگر ءَ کتگ ءُ چت ءَ دور کتگ مزنیں گیٹ تہ ءَ چہ پچ کُتگ ءُ گس ءِ تہ ءَ مانرتکگ انت – منی پت چہ واب پاد کتگ ءُ گس پٹ پول کتگ – گس ءِ تہ ءَ چت ءَ سی ٹی ڈی ءُ لس مردمی پوشاک گوریں سلاہ بنداں اوشتوک بوتگ انت ءُ گیٹ دپ پینٹ شٹ گوریں چیریں ادارھانی یک اپسرے ءَ منی پت ءِ گوم ءَ ترندی ءَ گپ جتگ –

آئی ءَ گوشتگ کہ منی پت ھمے گوشگ بوتگ کہ وتی زھگ ءَ دپ ءَ بند کن ءُ منی سر ءَ وڈ وڈیں بھتام ءِ جتگ ءُ ھمے گوشتگ کہ من مردماں برین واش کناں ءُ منی پت ھمے گوشگ بیتگ کہ مناں سرپد بہ کنت کہ وی بی ایم پی ءِ بنجل ءُ زھر شانیاں مہ روت اگاں ناں گڈا ما تئی کھول ءِ گوم ءَ وڈ وڈا کرت کنیں –

آئی ءَ گوشتگ کہ اے وڈیں کارانی کنگ ءَ من ھچ وڈا ھاموش نہ باں بلکنہ پہ بیگواھیں مردمانی ھاتر ءَ وائس فار بلوچ مسنگ پرسنز ءِ پلیٹ فارم ءَ وتی ہرایمنیں جھد ءَ برجاہ داراں – اگاں اے میان ءَ مناں ءُ منی کھول ءَ چیزے بہ بیت گڈا اشی ءِ زمہ دار ریاست انت –

آئی ءَ گوشتگ کہ من اے گپ ءَ تچک کناں گوشاں کہ مناں گوں ھچ وڈءں سیاسی ءُ سلاہ بندیں گلاں گوں سیادی نیست – مناں سینزدہ سال انت کہ وائس فار بلوچ مسنگ پرسنز ءِ بنجل ءَ بندوکاں ءُ من بس انسانی ھکانی باسک ءُ وائس فار بلوچ مسنگ پرسنز ءِ ریسرچ کوآرڈینٹراں ءُ من وتی گل ءِ رھبندانی رندگیری کنان ءَ ملک ءِ کانودانی رِد ءَ بیگواھیں مردمانی یل کنائینگ ءُ زورانسری آوار جنیانی بگیری ءَ جھد کنگ ءَ آں –

کراچی ءِ جتا جتائیں ھند ءُ دمگاں نشتگیں بلوچانی گس ءَ لشکر کشی برجاہ انت –

سربوتگیں ھالانی رِد ءَ عمر بلوچ میتگ، فقیر کالونی ءُ گولیمار ءَ لشکر کشی کنگ بوتگ، فقیر کالونی ءَ گوستگیں روچ ءَ پنچ شمبے ءِ بیگاھے ادار شش ءَ مزنیں کچے ءَ رینجرز آرگ بوتگ کہ آیانی تہ ءَ زالبول ھم ھوار بوتگ انت ءُ دمگ ءِ انگر کتگ –

دمگی اھوالکارانی رِد ءَ پوج گس گس ءَ شُتگ ءُ پٹ پول کتگ ، مردمانی پجار کاڑ ءُ موبائیپ ڈیٹا چیک ءُ تان کنگ بوتگ انت بلے تنی وھدی ھچ وڈیں دزگیری ءِ ھال نیست –

گولیمار ءَ ھم لشکر کشی کنگ بوتگ بلے اودا ھم تنی وھدی ھچ وڈیں دزگیری ءَ ھال سر نہ بوتگ انت –

دومی نیمگ ءَ ھب چوکی ءِ نزیکیں دمگ رئیس گوٹ ءَ گوستگیں شپ ءِ نھنگام ءَ مزنیں کچے ءَ پوج ءَ دمگ وتی انگر ءَ کتگ ءُ گس پٹ پول کتگ انت ءُ گس ءَ ساڑی ایں زھگ ءُ زالبول لٹ شاپ کتگ انت-

رئیس گوٹ ءَ پٹ پول ءِ میان ءَ باقر نامی ورنایے آوار جنگ بوتگ بلے پدا رند ءَ یل دیگ بوتگ –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ کیچ ءُ آواران ءَ پاکستانی پوج ءِ سر ءَ بوتگیں سَے اُرشانی زمہ واری منّ اِتگ ءُ گوشتگ کہ اے اُرشاں پاکستانی پوج ءِ بازیں جانی ءُ مالی تاوان رستگ –

بی ایل ایف ءِ جارکش میجر گوھرام بلوچ ءِ رِد ءَ سرمچاراں نُھ اگست ءِ بیگاہ ءِ نُھ ءُ نیم ءَ آپسر آپدارک ءَ پوج ءِ بُنجلے ءِ سر ءَ گوں راکٹ ءُ ٹوھیں سلاھاں اُرش کُرتگ، چہ ایشی ءَ زورگریں پوج ءِ دو کارمند مُرتگ ءُ دو زدگ بوتگ انت –

جارکش ءِ رِد ءَ تربت ءِ شھر ءُ کش ءُ گوراں بازیں پانگسانی بوگ ءَ ابید ھم سرمچار گوں جوانیں کارشونیاں دُژمن ءِ ڈواراں مُدام نشانگ کنگ ءَ اَنت،چہ ایشی ءَ زورگریں پوج ءَ پروش وارتگ ، پمشکا ھمک اُرش ءَ پد کورکاؤ تیرگْواری کنت ءُ لس مردماں تُرسین ایت –

میجر گوھرام بلوچ ءَ وتی دگہ درشانے ءِ تہ ءَ گوشتگ کہ بلوچستان لبریشن فرنٹ ءِ سرمچاراں زیکیں روچ ءَ کیچ ءُ آواران ءَ پاکستانی پوج ءِ دگہ دو بُنجلانی سر ءَ ھم اُرش کُرتگ –

جارکش ءِ رِد ءَ سرمچاراں زیک دہ اگست ءِ بیگاہ ءِ ھپت ءُ نیم ءَ کیچ، کولواہ ءِ شاھو باتیل ءَ برجاھیں پوجی بُنجل ءِ سر ءَ چہ دوئیں نیمگاں گوں راکٹ، وتکار ءُ ٹوھیں سلاھاں اُرش کُرتگ –

ھمے وھد ءَ سرمچاراں آواران ءِ کولواہ کنیچی ءَ برجاھیں پاکستانی پوج ءِ بُنجل ءِ سر ءَ گوں راکٹ ءُ وتکاریں سلاھاں اُرش کُرتگ –

جارکش ءِ رِد ءَ اے اُرشاں پاکستانی پوج ءَ مزنیں کچے ءَ جانی ءُ مالی تاوان رستگ –

بی ایل ایف ءِ جارکش میجر گوھرام بلوچ ءَ ھرسَئیں اُرشانی زمہ واری منّ اِتگ ءُ وتی درشان ءِ گڈسر ءَ گوشتگ کہ اے دابیں اُرش بلوچستان ءِ آجوئی ءَ تاں برجاہ مان انت –

چہ کراچی ءَ پاکستانی پوج ءَ یک مردمے دزگیر کنگ ءَ پد بیگواہ کتگ-

بیگواھیں مردمانی واستا کار کنوکیں گل وائس فار بلوچ مسنگ پرسنز ءِ رد ءَ بلوچستان ءِ دمگ ھزدار گریشہ ءِ جھمنندیں نودربر داد شاہ ء صبر خان گوستگیں شپ ءَ سی ٹی ڈی ءَ کراچی ءِ ھند ھاکس ءَ آئی ءِ لوگ ءَ گیر کانونی رنگ ءَ آوار جنگ ءَ پد بیگواہ –

وی بی ایم پی ءِ رد ءَ داد شاہ ءِ موبائل پون ءُ ساز ءُ سامان ھم برتگ اَنت، داد شاہ ءِ کھول آئی ءِ بیگواھی ءِ سر ءَ تکانسر اَنت ءُ یل کنگ ءِ لوٹ ءَ کنگ ءَ اَنت-

زانگ بہ بیت گوستگیں شپ ءَ پاکستانی رینجرز ءَ بلوچ ھلکاں بیڑ برتگ ءُ بازیں مردمے آوار جتگ ءُ برتگ اَنت-

بلوچستان ءِ جتا جتائیں دمگاں پوج ءَ سَے مردم بیگواہ کتگ اَنت-

گوستگیں شپ ءَ بلوچستان ءِ دمگ شال، ھزدار ءُ پنجگور ءَ لوگاں پوج ءَ بیڑ برتگ ءُ لوگاں مانریچان بیتگ ءُ سَے مردم آوار جنگ ءَ پد بیگواہ کتگ اَنت-

گوستگیں شپ ءَ ساھت سَے ءَ ایف سی ءَ کاؤنٹر ٹیررزم ڈیپارٹمنٹ ءِ ھمراھی ءَ ھزدار ءِ دمگ کھنڈ ءَ لوگے ءَ بیڑ برتگ ءُ لیویز کارمند سعید بلوچ زورانسری آوار جنگ ءَ پد بیگواہ کتگ –

دمگی مردمانی رد ءَ سعید بلوچ ھزدار ءَ لیویز ملازمے بیتگ ءُ ھمے وھد ءَ بیڑ برگ بیتگ آ ڈی سی ھزدار ءَ لوگ ءَ بیڑ برتگ ءُ ڈیوٹی ءَ بیتگ ءُ لوگ ءِ نیمگ ءَ روگ ءَ بیتگ کہ اود ءَ زورانسری آوار جتگ ءُ گون وت برتگ –

شال ءَ ھال اِنت کپ زورانسری آوار جنگ ءَ پد یل بیتگیں فیاض علی سرپراہ ھم یک رندے پد ءَ زورانسری آوار جنگ ءِ بیگواھی ءِ آماچ کنگ بیتگ ءُ آ شپ ءَ لوگ ءَ پوج ءَ آوار جتگ ءُ برتگ-

فیاض علی سرپراہ زورانسری آوار جنی ءِ ھال وائس فار بلوچ مسنگ پرسنز گل ءَ راست کنان ءَ گوشتگ کہ فیاض علی دوبر بیگواہ کنگ بیتگ ءُ آئی ءِ بیگواھی ءِ سر ءَ پدردی اِنت ءُ ایشی ءَ ایر جن این ءُ سلامتی ءَ یل کنگ بہ بیت-

ھمے وڑ ءَ چہ پنجگور ءَ دی بلوچستان پوسٹ ءَ سر بیتگیں اھوالانی رد ءَ پاکستانی پوج ءُ چیریں ادارھانی کارمنداں گوستگیں شپ ءُ چتکان بازار ءَ لوگے ءَ بیڑ برتگ ءُ پنجگور پروم ءِ جھمنندیں فقیر جان ء خدا دوست زورانسری آوار جنگ ءَ پد بیگواہ کتگ-

بلوچستان ءَ زورانسری آوار جنیانی وئیل یکشل ءَ برجاہ اَنت ھمے ماہ ءِ بندات ءَ داں انگت ءَ بلوچستان ءِ جتا جتائیں ھنداں پاکستانی پوج ءِ دست ءَ دَہ مردمانی آوار جنیانی ھال سر بیتگ اَنت –

لُمہ یاسمین ءِ مُھکمی ءُ ریھان ءِ کِرد

نبشتہ کار: ھَوَا بلوچ

دی بلوچستان پوسٹ

یازدہ اگست ھما روچ اِنت کہ اے روچ کَدی ھم شَموشگ نہ بیت ءُ مُدام بلوچ راج دپتر ءَ یات دارگ بیت اِنت یازدہ اگست ھر سال مارا یک انچیں مَزَن شانیں کِردارے ءِ یات ءَ دَنت ، او آ کِرد ریھان اِنت ۔

ریھان گوں کسانیں اُمر ءَ کوھیں کِردے کنت ءُ وت ءَ پہ مُدامی راج ءِ دل ءَ زندگ کنت ریھان ءِ کرِد ھَمُک مردم ءِ زھن ءِ تہ ءَ جیڑگے وَدّی کنت ءُ ریھان یازدہ اگست ءَ یک جلواناکیں روچے کَنت ، اے روچ ءِ تَہ ءَ یک مات ءُ پِتے وت ءَ گیش مُھکم کن اَنت ءُ بلوچ راجدپتر ءَ نوکیں کِسّھے بُنگیج کن اَنت ۔

چوناھا دُگنیا ءِ ھر مات ءُ پِت وتی زَھگ ءَ پَہ واھگ ءُ مُرادے رودین اَنت ءُ ورناہ کن اَنت بَلَے گَپّ کہ زمین ءِ ءُ گُلامی ءِ کئیت گُڑا مات ءُ پِت وتی زَھگاں وت دَست ءَ بَڈّ ءَ جَن اَنت ءُ کُربان کَن اَنت ۔

ما مُدام گُشتگ کہ شیرزالیں ماتے راجی جُنز ءِ ھمراہ داری بِہ کَنت گُڑا راجی جُنز ءِ تہ ءَ اَلّم سوبمندی ءُ گُشادی گِندگ بیت بلوچ راجدپتر ءَ بازیں بلوچ زالبول ءِ کِرد ھَست ءُ آیانی کُربانی ھم گِندگ باں چاگردی ءُ سیاسی کارے بیت یا کہ بلوچ ڈیھ ءِ آجوئی ءِ جُنز ھَمُک جاہ ءَ بلوچ زالبولاں گوں وتی پِت ءُ براساں گوں ھَمگام بُوتَگ اَنت ءُ اُوشتاتگ اَنت ۔

بَلَے بلوچ راجدپتر ءِ اوّلی مات لُمہ یاسمین اِنت وَھدیکہ ریھان جِند نَدْری اُرش کَنگ ءِ پیسلہ ءَ کَنت گُڑا لُمہ یاسمین وت ءَ مُھکم کَنت ءُ بلوچ راجی آجوئی ءِ جنگ ءَ یک نوکیں دْروشَمے دَنت ءُ وتی دَست ءَ ریھان ءِ بَڈّ ءَ جَنت ءُ بیرک ءَ بَڈّ ءَ مانپوش اِیت سِکین ءُ دلبڈی دَنت پَہ بلوچستان ءُ بلوچ راج ءِ آجوئی ءِ ھاتر ءَ کُربان ئِے کَنت ءُ دُژمن ءِ دل ءَ یک آسے روک کَنت کہ آ ، آس روچ ءِ مَروچی اَنگت ءَ دُژمن ءِ دل ءَ روک اِنت ۔

لُمہ یک کُلوھے ءَ وتی بلوچ ماتاں دَنت کہ وتی زَھگانی شھید بُوھَگ ءَ مُوتک میار اِت ما وت ءَ راج دوست ءُ زمین دوست گُشیں گُڑا راج دوستی ءُ زمین دوستی ءِ لیکہ چَہ ساہ ءُ سراں سَر گوازگ پرمائیت زمین چَہ ساہ ءُ سراں دوست تِرّ اِنت ساہ اَلّم درو اِیت یَکّ برے ، بَلَے زمین ھچ وڑ ءَ نہ درو اِیت ، پَہ زمین ءِ پھازگ ءِ ھاتر ءَ ماتاں ھم وَت ءَ چو مُھکمیں دِیوال ءَ کَنگی اِنت ءُ دُژمن ءِ دیم ءَ میلانک بُوھَگی اِنت دُژمن ءِ جوڑ کُتگیں راھبَند پْروش دئیگی اِنت ءُ وتی بَھشت گونگیں زمین آجو کَنگی اِنت ءُ وت ءَ گوں آجوئی ءِ جنگ ءَ ھَمگرنچ کَنگی اِنت ءُ آجوئی ءِ جنگ تَھنا ورنایانی جنگ نہ اِنت بلکیں یَکّ سَرجَمیں گُلام ءُ زُلم آماچیں راجے ، زالم ءِ ھلاپ ، آجوئی ءُ آزاتی ءِ جنگ اِنت ۔

لُمہ یاسمین ءَ اے زانت ءُ زانگ ھَست ءَ کہ راجی زندِمان مَہ رَکّ اِیت گُڑا مارا بانداتے نَہ بیت ءُ ما ھم نَہ رَکّیں ، مارا پَہ وتی باندات ءِ رَکّینگ ءِ ھاتر ءَ وتی زَھگ کُربان کَنگی اَنت مئے زَھگاں دیمونی دئیگی اِنت ءُ جِندندر بُوْھَگی اِنت ۔

لُمہ یاسمین ھما ماتیں کہ بلوچستان ءِ ھر جیڑہ ءُ جنجال ءَ آشنا اِنت چیا کہ آ یک زمین دیوانگیں زھگے ءِ مات اِنت ءُ یک شَرّیں زانتکار ءُ اُستادے ءِ لوگی اِنت ھما مردُم ءِ لوگبانُک اِنت آ اَنّیگیں جُھد ءِ راستیں رھبر ءُ راھشون اَت ، اُستاد اسلم ءَ چیریں جنگ پَدر کُت آئی ءَ وتی سَرجمیں زند پَہ بلوچستان ءِ آجوئی ءِ ھاتر ءَ کُربان کُرت ، اُستاد اسلم ءِ زندِمان پَہ بلوچ راج ءِ وَرناہ ءُ زالبولاں چوں چِراگ ءِ دْروشَم ءَ دْرَپشوک اَت ۔

اُستاد یک مھر بَکشوک ءُ رُژن پِگریں استادے اَت ، اُستاد ءَ بلوچ راج ءَ یک نوکیں راہ ءُ راھبَندے اَڈّ کُت ءُ دات بلوچ راج ءِ آجوئی ءِ جنگ یک نوکیں رنگ ءُ دْروشَمے داتے ۔

مَروچی اُستاد اسلم چَہ مارا جسمانی ھوالہ ءَ جِتا اِنت بَلَے آئی ءِ داتگیں دَرس اَنگت گوں مارا ھَمگرنچ اَنت ما ھمائی ءِ رَند پَداں گِرَان ءُ جُنزان اِیں ۔

اے مئے بلوچ راج ءِ وش بَھتی اِنت کہ اے دابیں اُستاد بلوچ راج ءَ ھَست ، راجانی اندر ءَ کہ اے دابیں اُستاد ءُ مات وَدّی بَہ اَنت کہ وتی زَھگاں پہ بَندگیں سرڈگار ءِ موکگ ءَ سِکین دیاَنت گُڑا آ راج ءَ دُگنیا ءِ ھچ وڑیں زوراک پَہ مُدامی ایردست ءُ گُلام کُت نہ کن اَنت ۔

امّا یاسمین ءِ کِرد ھما کِرد اِنت کہ بلوچ گوستانک ءِ تَہ ءَ شَموشگ نَہ بیت ءُ بلوچ ءِ زَھگ ، زھگ لُمہ ءَ سَرپَد اِنت لُمہ کہ اِنت ءُ لُمہ ءَ چونیں کِرد یے بلوچ گوستانک ءِ تَہ ءَ پیلو کُتگ لُمہ یاسمین ءَ بلوچ راج ءَ ھَوار سَرجَمیں جھان ءِ دیم ءَ پیش داشتگ کہ راج دوستی ءُ زمین دوستی چی یے ۔

دُگنیا ءِ مردُم گُش اَنت کہ زَھگ دیدگانی رُژنائی ئیں ءُ جَگر ءِ ٹُکُر اِنت چَہ زَھگ ءَ دوستریں چیز دُگنیا ءَ نیست ، بَلَے لُمہ یاسمین ءَ سَرجَمیں دُگنیا ءِ دیم ءَ پیش داشتگ کہ چَہ زمین ءَ ھچ چیز دوستِرّ نہ اِنت لُمہ یاسمین ءَ ھون واریں دُژمن ءِ دیم ءَ پَدر کُت کہ من وتی ڈیھ ءَ ترا پَہ ھَرزانی بَکشَات نَہ کَن آں کُجام رنگیں دیمونی پَہ زمین ءَ درکار بیت من دئیگ ءَ چَکّ ءُ پَد نَہ باں ۔

مَروچی امّا یاسمین ءِ وڑیں مات ترا بلوچستان ءِ ھر کُنڈ ءَ دَست کَپ اِیت چیا کہ لُمہ یاسمین ءَ بلوچ ماتاناں یک جوانیں دَرسے دات اَنت چَہ گُلامی ءَ آجوئی بُوھَگ ءِ دَرس دات اَنت کہ وت ءَ چَہ آجوئی ءِ جنگ ءَ دُور مہ دار اِت ما اَگاں وت ءَ چَہ آجوئی ءِ جنگ ءَ دُور بہ دار اِیں گُڑا جنگ اَلّم مارا تباھی ءِ نیمگ ءَ بارت مارا وت ءَ چَہ آجوئی ءِ جنگ ءَ دُور دارگی نہ اِنت گُڑا پَہ ماں آجوئی ءِ گِرَگ اَرزان بیت ۔ مَروچی لُمہ یاسمین ءِ داتگیں دروَنت ءُ دَرساں چَہ پَد بازیں ماتے چو لُمہ ءِ دْروشَم ءَ اِنت وھدیکہ سربُلند وتی کسانیں بالاد ءَ بمب ءُ شورھاں گوں وت ءَ ھَمگرنچ کنت ءُ شھات ءِ پلسپہ ءَ وت ءَ اَبدمان کَنت گُڑا آئی ءِ مات ھم وت ءَ مُھکم کنت ءُ دُژمن ءَ سِرین پْروش کَنت کہ ما چَہ مرگ ءَ نہ تُرس اِیں بلوچ راج ءِ ماتاں چہ لُمہ یاسمین ءَ پِگری ھِیل زُرتگ ءُ راجی جُنز ءِ تہ ءَ یک جوانیں مارِشتے داتگ ءُ دُژمن ءِ زوراکیاں بلوچ مات مُھکم کُتگ اَنت ۔

دُژمن تو وتی زوراکیاں اَمینچو گیش کن ئے مئے راج ءِ سر ءَ گُڑا ما پَہ وتی ساھانی سِندَگ ءَ پَد کِنز نَہ بِہ اِیں تئی ھر زوراکی ءُ زورانسری مارا گِشتر مُھکم کن اَنت ما چَہ مرگ ءَ نہ تُرسیں مرگ کُجام جاہ بیت ما آئی ءَ گوں بچکنداں وش اَتک کن اِیں ۔

ما گُشیں وھدیکہ مات ءُ پِت ءِ سِکین زَھگ ءَ گون بِہ بیت گُڑا زَھگ اَلّم یَکّ مُھکمیں جنگول ءُ شَرّیں ایمانداریں زَھگے بیت مَروچی ھمئِے رَنگ ءَ ھر مات ءُ پِت اُستاد اسلم ءُ لُمہ یاسمین ءِ رَنگ ءَ اَنت وتی لاڈُکیں پَچ ءُ جِنّکاں پَہ ایردستیں راج ءُ بَندیگیں سَرڈگار ءِ رَکّینگ ءِ ھاتر ءَ پِدا بُوْھَگ ءِ سِکین ءَ دئیگ ءَ اَنت ۔

امّا یاسمین ءِ مُھکمی ءُ جِندندر ریھان ءِ داتگیں کُربانی ءَ چَہ پَد بلوچ ورناہ ءُ زالبول وتی چاگِرد ءِ دیمروئی ءُ وتی دودمان ، زُبان ءُ زمین ءِ ارزِشت ءَ جوانیں وڑے ءَ پَھم اَنت ءُ سَرپَد بَنت ۔

جِندندْر ریھان ءَ پَہ بلوچ ورنایاں یک راھے پَلگار اِتگ ءُ گِشینتگ مَروچی ھر ورناہ چو ریھان ءِ رَنگ ءَ گِندگ بُوھَگ ءَ اِنت پَہ وتی بَھشت گونگیں زمین ءِ ھاتر ءَ وت ءَ پِدا کنگ ءَ اِنت کہ ما پَہ وتی جِند ندری ءُ کولیگ کَنگ ءَ دَرکپتگیں کہ مئے ھر گام پَہ راجی جُنز ءِ دیمروئی ءَ جُنز بِہ بیت ۔

گُڑا لُمہ یاسمین ءِ ءُ ریھان ءِ دَاستان اَلّم وانگ ءُ کِسّہ کَنگ بیت ۔

ریھان ءِ ءُ لُمہ یاسمین ءِکُربانی ءَ راجی آجوئی ءِ جَنگ ءَ را مُھکمیں سنگت داتگ بلوچ راج ءَ سَرپد اِیں ورناہ بکشاتَگ ءُ تَچکیں راہ یے پیش داشتگ ءُ اے جُھد اَنگت ءَ بَرجا اِنت روچ پَہ روچ بلوچ یاگیانی اُرش گِشتر بُوھَان اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روس ءَ کساس پنجاہ سال ءَ پد ماہ ءِ سر ءَ اولی پٹ ءُ پولی مشن روان داتگ کہ آپ ءِ جاڑیگ بوگ ءِ سرپدی ءَ زور ایت-

ھال سر کنوکیں ادارہ اے ایف پی ءِ رد ءَ 1976 ءَ پد روس ءِ لونا 25 ماہ ءِ روان دیگ ءِ اولی مشن اِنت-

زانگ بہ بیت سوویت یونین ءِ خلائی دنیا ءَ گام ایر کنوکیں بنداتی ڈیھ اِنت کہ چریشی ءَ پد دگہ ڈیھاں وتی مشن لانچ کتگ اَنت-

روس ءِ وھد ءُ پاسانی رد ءَ آدینگ ءِ سھب ءِ ساھت دو ءُ دَہ دمان ءَ لونا 25 برز ءَ روان دیگ بیتگ کہ ایشی ءِ ندارگ روس ءِ ھلائی ایجنسی راس کوس موس ءَ لائیو پیش داشتگ-

ھلائی جھاز پنچ روچانی توک ءَ ماہ ءِ سر ءَ سر بیت اِنت چریشی ءَ پد سَے یا ھپت روچاں سرجمیں جاھاں پٹ ایت ءُ پد ءَ زرباری نیمگ ءَ ایر کپ ایت-

راس کوس موس ءِ مزنیں اگدودار الیگزانڈر بلوخن ءَ وتی گوستگیں گلگدارے ءَ گوشتگ کہ راجدپتر ءَ اولی رند ءَ ماہ ءِ زرباری لمب ءَ یک مشنے نندگ ءَ اِنت – داں انگت ءَ ھمک مشن کاگدی بیتگ اَنت-

ھلائی ایجنسی ءِ یک کارندھے ءَ اے ایف پی ءَ گوں گوشتگ کہ پٹ ءُ پولی مشن بیست ءُ یک اگست ءَ ماہ روژناں ایر کپ ایت –

روس ءِ ھلائی ایجنسی ءِ گوشگ اِنت کہ مشن یک سالے ءِ واستا ماہ ءِ سر ءَ بیت اِنت نمونگانی یکجاہ کنگ ءَ ابید ریکانی پٹ ءُ پول ءَ ھم کنت ءُ دراج کشیں پٹ ءُ پول ھم کنت اِنت-

روس ءِ ماہ ءِ سر ءَ نیاد ءِ اولی مشن اِنت کہ یک ھنچیں وھدے ءَ لانچ کنگ بیتگ یوکرین ءِ جیڑہ ءِ سر ءَ ایراد گری ءِ سبب ءَ روس ءِ ھلائی ایجنسی روکپتی ڈیھانی شریداری ءَ زبھر اِنت-

روس ءِ ھلائی زانتکار وتالی آئیگوروف ءِ گوشگ اِنت سوویت یونین ءِ پروشگ ءَ پد روس ءَ اولی رند ءَ ھلائی دنیا ءَ وتی مشن ءِ روان دیگ ءِ جھد کتگ-

وتالی آئیگوروف ءَ روس ءِ واستا اے مشن باز گچین گوشتگ گچینی جست ایش انت کہ ماہ ءِ سر ءَ اے سرکپت کنت یا ناں؟

روس ءِ سروک ولادیمیر پوتن ءَ بندشاں ابید ھم ھلائی نیاد ءِ برجم دارگ ءِ پُر واھشت درشان کتگ-

گوستگیں سال ءَ یک وھدے ءَ سروک پوتن ءَ گوشتگ ات کہ سوویت یونین ءَ سال نوزدہ سد ءُ شست ءُ یک ءَ اولی انسان ھلا ءَ دیم داتگ آ وھد ےَ رودراتک ءُ روکپت ءِ میان ءَ جاور ناوش بیتگ اَنت-

آئی ءَ گوشتگ ات کہ ما دیم ءَ روگ ءِ واستا وتی بن پیروکی واھشت ءِ رھشونی ءَ کن ایں اے دراھیں مشکل ءُ ڈنی جھداں ابید ھم مارا اے وڑ کنگ ءَ دور کنگ ءِ جھد ءَ کن اَنت-