TBP Balochi

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مشکے ءَ زاکر ء جمال ءِ کوش ءِ زمہ واری منّ اِتگ ءُ گوشتگ کہ اے مرد ریاستی چاریگ ءِ بوتگ ءُ اشی ءِ توپک دستیگ کتگ –

جارکش میجر ءَ گوشتگ کہ سرمچاراں نھ اگست ءَ مشکے ءِ کلات ءِ چیر ءَ پاکستانی پوج ءُ چیریں ادارھانی چاریگ زاکر ء جمال تیرگواری کرتگ ءُ کشتگ ءُ آئی توپک، ءُ پرپٹ دستیگ کرتگ اَنت –

آئی ءَ گوشتگ کہ گوشتگ کہ اے ریاست ءِ چاریگ ھمے ھند ءَ جھدکارانی چاریگی، لّس مردمانی دلسیاہ کنگ ءُ دگہ بازیں چاگردی سلکاریاں ھوار بوتگ –

آئی گوشتگ کہ ما باز رند ءَ اے گپ تچک کتگ ءُ گوشتگ کہ پاکستان بلوچستان ءَ چکچینی کنگ ءَ اِنت، آئی ءِ کمک کنوک ھم میارباری ءَ شریداری اِنت۔ بلوچ چکچینی ءَ ھواریں مردمانی سزا دیگ مئے زمہ واری ءُ پرز اِنت –

جارکش ءَ گڈسر ءَوتی درشان ءِ تہ ءَ گوشتگ کہ پاکستانی پوج، شرکت ءُ آئی ءِ کمکارانی سر ءَ مئے اُرش برجاہ مان انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ شال ءُ تمپ ءُ تربت ءَ پاکستانی پوج ءُ آئی ءِ کمکارانی سر ءَ بوتگیں اُرش ءِ زمہ واری منّ اِتگ ءُ گوشتگ کہ اے اُرشاں دو دژمن کارمند مُرتگ ءُ یازدہ زدگ بوتگ انت وھدیکہ وتگڑیں پاکستانی آجوئی شاتکامی ءِ دکان ءِ تباہ کتگ –

بی ایل اے ءِ جارکش ءَ گوشتگ کہ سرمچاراں شال ءَ موتی رام دگ ءَ زورگریں پاکستانی پوج ءِ سروکی ءَ پَچ کنگ بیتگیں پاکستانی بیرکانی یک دکانے گوں چیرکُرتگیں شورھاں نشانگ کُرتگ۔ تراک ءِ آسر ءَ دو دُکاندار ءُ دُژمن ءِ کمکار مُرتگ ءُ چار ٹپی بیتگ، دُکان تباہ بوتگ –

آئی ءَ گوشتگ کہ پہ وتگڑیں پاکستانی آجوئی ءِ شاتکامی ءَ برجاھیں دُکانانی پھریزگ ءَ ساڑی ئیں دُژمنیں پوج ءُ چیریں ادارھانی کارمنداں داں دیر ءَ وتسر ءَ تیرگْواری کُرتگ ءُ چو مدامی ءِ وڑ ءَ رسانکدر ءَ وتی بےسوبی ءِ ھبر ءِچیردیگ ءِ جُھد کُرتگ –

جارکش ءَ گوشتگ کہ ھمے وڑ ءَ بی ایل اے ءِ سرمچاراں شال ءِ روکپتی بائی پاس ءَ ھزارہ ٹاون ءِ نزیک ءَ زورگریں پاکستانی پوج ءِ حیدر کرار پانگس یکسد ءُ چارمی ونگ ءِ پھازگی سنگر ءِ سر ءَ دستی بمب اُرشے کُرتگ، تراک ءِ آسر ءَ دُژمن ءِ دو کارمند ھما جاہ مُرتگ انت ءُ یکے زدگ بوتگ – تراک ءَ پَد زورگریں پوج ءَ تیرگْواری کُرتگ ءُ یک رھگْوزے کُشتگ –

جیئند بلوچ ءَ گوشتگ کہ سرمچاراں سیمی اُرش تربت ءِ دمگ ناصر آباد ءَ مگرب ءِ وھد ءَ کُرتگ، سرمچاراں زورگریں پاکستانی پوج ءِ پانگس ءَ ساڑی ئیں کارمندانی سر ءَ دز بمب اُرشے کُرتگ، اُرش ءَ دُژمن ءِ دو کارمند زدگ بوتگ ءُ پانگس ءَ باز تاوان رستگ –

آئی ءَ گوشتگ کہ بی ایل اے ءِ سرمچاراں یک دگہ اُرشے گْوستگیں شپ ءَ کیچ ءِ ھند تمپ ءِ کلاھو ءَ زورگریں پاکستانی پوج ءِ پانگس ءِ سر ءَ کتگ – اے اُرش ءَ سرمچاراں گرنیڈ لانچر ءِ بازیں گولہ آس داتگ انت ، چریشی ءَ کم چہ کم دُژمن ءِ سَے کارمند زدگ بوتط انت ءُ دُژمن ءَ مالی تاوان رستگ –

بی ایل اے ءِ جارکش جیئند بلوچ ءَ وتی درشان ءِ گڈسر ءَ گوشتگ کہ اے اُرشانی زمہ واری بی ایل اے منیت ءُ ما کول کن ایں کہ زورگریں پاکستانی پوج ءِ دراھگ ءَ تاں مئے اُرش برجاہ مان انت –

سربوتگیں ھالانی رِد ءَ گوستگیں روچ ءَ کیچ ءِ بنجاھی شھر تربت ءَ ناشناسیں سلاہ بندیں مردمانی تیرگواری ءَ یک مردمے بیران بوتگ وھدیکہ زالبولے تیرانی زدگ اتکگ ءُ زدگ بوتگ –

تیرگواری ءِ وئیل کیچ ءِ دمگ گورکوپ ءَ بوتگ –

دمگی اھوالکارانی رِد ءَ شپ ءِ ادار نُھ ءِ نزیک ءَ ناشناسیں پرپٹ سوارانی تیرگواری ءَ یک مردمے بیران بوتگ کہ آئی ءِ پجار ڈاکٹر علی جان ء صاحب داد ءِ نام ءَ چہ بوتگ وھدیکہ تیرانی لگگ ءَ آئی ءِ نشار زدگ بوتگ –

زدگ بوتگیں زالبول پہ الاج ءِ ھاتر ءَ ٹیچنگ نادراھجاہ تربت ءَ برگ بوتگ بلے تنی وھدی اے درگت ءَ ھچ وڈیں سرپدی نہ رستگ کہ کجام سوب ءَ جنگ بوتگ انت –

سربوتگیں ھالانی رِد ءَ پاکستانی پوج ءَ دو مردم زورانسری آوار جتگ ءُ گوں وت برتگ انت –

گیشیں ھالانی رِد ءَ گوستگیں روچ ءَ پنچ شمبے ءَ کیچ ءِ بنجاھی شھر تربت ءَ پاکستانی پوج ءُ چیریں ادارھانی کارمنداں دو ورنا زورانسری آوار جتگ ءُ گوں وت برتگ انت –

اھوالکار ءِ رِد ءَ ھردو ورنا پاکستانی پوج ءَ تربت ءِ دمگ آپسر ءَ کولوائی بازار ءَ چہ یک دکانے ءِ تہ ءَ زورانسری آوار جتگ ءُ گوں وت برتگ انت کہ آھانی نام ظریف ءُ طاہر بلوچ ءِ ناماں چہ بوتگ انت –

ھالانی رِد ءَ پوج ءِ دست ءَ زورانسری آوار جنگ بوتگیں ورنایانی تہ ءَ طاہر بلوچ یل کنگ بوتگ بلے ظریف بلوچ ھنگت بیگواہ انت –

زانگ بہ بیت بلوچستان ءِ تہ ءَ زورانسری آوار جنیانی درچ یکشل ءَ برجاہ انت – ھمے ماھے دھیں روچانی میان ءَ بلوچستان ءِ جتا جتائیں ھند ءُ دمگاں ھپت مردم زورانسری آوار جنگ ءُ بیگواہ کنگ بوتگ انت وھدیکہ یک مردمے یل کنگ بوتگ –

نوشاد بلوچ ءِ یل نہ کنگ ءِ بگیری ءَ آئی ءِ کھول ءِ مردماں تربت ءَ زھرشانی ءُ روانک کش اِتگ –

نوشاد ء میانداد کہ آ گوستگیں ماہ ءَ جولائی ءَ پاکستانی پوج ءَ چہ تربت آپسر پانگس ءَ زورانسری آوار جتگ ءُ گوں وت برتگ کہ ھما انت گار ءُ بیگواہ انت –

نوشاد بلوچ ءِ کھول ءُ بلوچ یکجھتی کمیٹی ءِ نیمگ ءَ مروچی پنچ شمبے ءِ روچ ءَ مزنیں کچے ءَ مردماں روانک کش اِتگ ءُ زھرشانی کتگ، درنگاز کنوکاں تربت ءِ کمشنر ءِ گِس ءِ دپ ءَ نندانک جتگ ءُ وتی زھرشانی نبشتہ کنائیں اِتگ –

اے درگت ءَ تربت پریس کلب ءَ آئی ءِ کھول ءَ گوں اھوالکاراں تران کنان ءَ گوشتگ کہ نوشاد گِس ءِ کارے ءَ تربت ءَ شُتگ بوتگ ءُ واتر آیگ ءَ بوتگ کہ آپسر پانگس ءِ نزیک ءَ زورانسری آوار جنگ ءُ بیگواہ کنگ بوتگ –

آیانی گوشگ ات کہ بلوچستان ءَ ھمک روچ زورانسری آوارجنیانی تہ ءَ گیشی آیگ ءَ انت – بلوچ مات وتی زھگاں ورنا کن انت گڈا آ آوار جنگ بنت – اگاں مئے زھگ کتکار انت گڈا آیانی کتکاری زاھر کنگ بہ بیت اے وڈ آیاں آوار جنگ ءُ بیگواہ کنگ ءَ ھچ کانود موکل نہ دنت –

نوشاد بلوچ ءِ کھول ءَ کیچ ءِ واکدار، بلوچستان ءِ سرکار ءَ ھوار انسانی ھکانی ادارھاں گوں لوٹ کتگ ءُ گوشتگ کہ نوشاد بلوچ ءِ وش ءُ سلامتی یل کنائیگ ءَ وتی کرد ءَ پیلو بہ کن انت –

کھول ءَ گوشتگ کہ گس ءِ ورنایے بیگواھی دردناک انت ءُ مئے زھگ اے وڈیں ھچ کارانی بھر نہ بوتگ انت کہ چریشی ءَ ریاست ءَ تاوان بہ رسیت ھمے ھاتر ءَ نوشاد زاھر کنگ بہ بیت ءُ یل کنگ بہ بیت –

سربوتگیں ھالانی رِد ءَ مروچی پنچ شمبے ءِ روچ ءِ سھب ءَ پاکستانی پوج دشت ءُ تمپ ءِ میانی دمگ مزن بند ءُ زامران ءِ کوھاں مان ریتکگ لشکر کشی کنگ ءَ انت، پاکستانی پوج ءَ زمینی ءُ بُرزی کمک ھم گون انت –

دمگی اھوالکارانی رِد ءَ دشت ءُ تمپ ءَ ھردو نیمگاں پاکستانی پوج مزنیں کچے ءَ کوھانی تہ ءَ سر بوتگ –

اھولکار ءِ رِد سُھبگینیں اے دمگاں جنگی بالگرد ءُ ڈرون بالگتر تر ءُ تاب کنگ ءَ انت انت –

اے ھم گوشگ بوگ ءَ انت چہ بلیدہ ءَ نیمروچ ءِ وھد ءَ پاکستانی پوج ءِ گاڑی زامران ءِ کوھانی تہ ءَ شُتگ انت –

بلے تنی وھدی پوجی واکدارانی نیمگ ءَ اے درگت ءَ ھچ وڈیں درشان دیگ نہ بوتگ ناکہ تنی وھدی جانی تاوان ءِ ھال انت –

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی پنچ ھزار ءُ یکسد ءُ سِی ءُ سَے روچ سرجم بوتگ انت –

مروچی کمیونسٹ پاٹی پاکستان ءِ بنجاھی سیکریٹری جنرل قاضی امداد سلطان، یحییٰ نیک محمد ءُ بلوچ وطن پاٹی ءِ بنجاھی کنوینر حیدر رئیسانی ءَ ھوار دگہ مردماں بنجل ءَ اتکگ ءُ بیگواھیں مردمانی کھولءِ گوم ءَ دلدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ زورانسری آوار جنیانی درچ یکشل ءَ تیزی ءِ گوم ءَ برجاہ انت – سیاسی باسک ءُ نودربر زورانسری آوار جنگ ءُ بیگواہ کنگ بوگ ءَ انت – اے ریاستی زوراکیانی بگیری ءَ مئے جھد برجاہ مانیت –

دومی نیمگ ءَ عبدالرحمن ء محمد بخش مری ءِ کھول ءَ وتی شنگ کرتگیں درشان ءِ تہ ءَ گوشتگ کہ عبدالرحمن سیزدہ جنوری سال دوھزار پانزدہ سھب ءِ ادار ھشت ءَ چہ نیوکاھان ھزار گنجی ءَ پولیس ءُ چیریں ادارھانی کارمنداں وتی گِس ءِ تہ ءَ زورانسری آوار جتگ ءُ شال ءِ پولیس تھانہ کسٹم ءَ برتگ پدا رند ءَ یک مردمے ءِ دیم زیر بوگ ءَ ایس ایچ او قادر قمبرانی ءَ آ یل داتگ- دومی روچ ءَ پدا قادر قمبرانی ھال کتگ کہ دوبر پیش بہ بیت آ شتگ پیش بوتگ ءُ اودا سریاب ء ایس پی ظہور احمد آفریدی ءُ ایس پی غفور لاگانی مری ھم ساڑی بوتگ انت ءُ پدا عبدالرحمن گوں دگہ چار مردم ءَ شال ءِ بجلی گھر تانہ ءَ برگ بوتگ انت ءُ یک شپ ءِ ھمودا بوتگ انت پدا مگرب ءِ نماز ءِ وھد ءَ چیریں ادارھانی کارمند اتکگ ءُ عبدالرحمن ھوار ایندگہ مردمانی چم بستگ ءُ ناشناسیں جاھے ءَ برتگ انت –

آئی ءَ گوشتگ کہ بیست روچ ءَ پد ماسٹر اعظم ء احمد خان یل کنگ بوتگ پدا ھشت ماھ ءَ پد حمید اللہ ء احمد حفظ اللہ ء یار خان، نجب اللہ ء نصیب اللہ شپ ءِ ادار یازدہ ءَ قمبرانی دگ ءَ یل کنگ بوتگ انت بلے عبدالرحمن ھنگت گار ءُ بیگوای انت –

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں پاکستانی بیرک بھا کنوکیں اسٹالے ءِ سر ءَ دز بمب اُرش ءِ کتگ ، دومی نیمگ ءَ بلوچستان ءِ دمگ تمپ ءُ جھاؤ ناشناسیں مردماں پاکستانی پوج ءِ بنجلانی سر ءَ اُرش کُتگ –

گیشیں ھالانی رِد ءَ گوستگیں شپ ءَ ناشناسیں سلاہ بندیں مردماں کیچ ءِ دمگ تمپ ءَ پاکستانی پوج ءِ بنجل ءِ سر ءَ اُرش کُتگ ءُ درشُتگ انت –

اے اُرش تمپ ءِ دمگ کلاھو ءَ برجاھیں پوجی بنجل ءِ سر ءَ کنگ بوتگ اھوالکار ءِ رِد ءَ اُرش ءِ وھد ءَ سک باز تیرگواری ءُ تراکانی توار بوتگ –

ھمے وڈ آواران ءِ دمگ جھاؤ ءَ ھم سلاہ بندیں مردماں پاکستانی پوج ءِ بنجلے ءِ سر ءَ اُرش کتگ ءُ جانی تاوان ءِ ھال انت –

اھوالکار ءِ رد ءَ اے اُرش دوشی شپ ءِ ادار یازدہ ءَ جھاؤ ءِ بگاڑی زیلگ ءَ برجاھیں پاکستانی پوج ءِ بنجل ءِ سر ءَ کنگ بوتگ ءُ اے اُرش داں شپ ءِ ادار یک ءَ برجاہ بیتگ – تیر ءُ تراکانی توار داں دور ءَ اش کنگ بیتگ اَنت۔ اُرش ءِ آسر ءَ زورگریں پاکستانی پوج ءِ جانی تاوان ءِ ھال اِنت –

دومی نیمگ ءَ بلوچستان ءِ بنجاھی شھر شال ءَ موتی رام دگ ءَ تراک ءُ تیرانی توار اشکُنگ بوتگ –

پولیس ءِ رِد ءَ ناشناسیں مردماں چاردہ اگست ءِ درگت ءَ جنگ بوتگیں پاکستانی بیرکانی اسٹالے ءِ سر ءَ بمب اُرش ءِ کتگ ءُ چریشی ءَ دو مردم زدگ بوتگ انت –

اُرش ءَ پد پوج ءِ نیمگ ءَ تیرگواری کنگ بوتگ ءُ دمگ انگر کتگ –

زانگ بہ بیت گوستگیں روچ ءَ شال ءَ جوائنٹ دگ ءَ پاکستانی بیرک بھا کنوکیں یک اسٹالے ءِ سر ءَ ھم دزبمب اُرش ءِ کنگ بوتگ ات کہ چریشی ءَ دو پوجی کارمنداں ھوار شش مردم زدگ بوتگ اِتاں ءُ اُرش ءِ زمہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ ات – بلے اے اُرش ءِ زمہ واری ھچ گل ءَ نہ من اِتگ –

ھمے وڈ بلوچستان ءِ جتا جتائیں ھند ءُ دمگاں پاکستانی پوج ءِ سرا بوتگیں اُرشانی زمہ واری ءَ ھم گیشتر بلوچ آجوئی لوٹوکیں سلاہ بندیں گل منّ اِنت بلے اے ھردو اُرشانی زمہ واری تنی وھدی منگ نہ بوتگ انت –

وکیل آباد ءِ زندان ءَ بندیگیں دو بلوچ پاھو دیگ بیتگ اَنت-

گیشیں اھوالانی رد ءَ ایران ءِ اُستان مشھد ءَ دو بندیگیں بلوچ ایرانی انکلاب ءِ آمیدگس ءِ ھکم ءَ پاھو دیگ بیتگ اَنت-

پاھو دیگ بیتگیں مردمانی پجار سِی ءُ پنچ سالی ئیں اھمد کریمدادزئی ء عبداللہ جھمنند تاجر آباد مشھد ءُ سِی ءُ چار سالی ئیں حمید گرخیل ء مجید جھمنند زابل ءِ ناماں زانگ بیتگ اَنت-

اھوالانی رد ءَ اے ھردوک دو سال ءَ پیش ماں نشہ باپاری ءِ پژدر ءَ گرگ بیتگ اَنت ءُ پد ءَ ایران ءِ انکلاب ءِ آشوب ءِ آمیدگس ءَ پاھو دیگ ءِ ھکم داتگ اَنت-

اھوالانی رد ءَ ھردوکیں مردمانی کھول سرپد کنگ نہ بیتگ اَنت ءُ اے بندیگ پاھو دیگ بیتگ اَنت-

زانگ بہ بیت ایران ءَ پاھو دیگ ءِ وئیل یک ترسناکیں رنگے ءِ دروشم ءَ روگ ءَ اَنت کہ اود ءَ لس مردم اے ترس ءُ بیم ءِ ودار ءِ ھلاس ءِ اُمیت ءَ راھیگ اَنت-

اِستانی مُلا ءُ بلوچ راج

نبشتہ کار: زھیر بلوچ

دی بلوچستان پوسٹ

وھدے یازدہ ساچان نوزدہ سد ءُ چِل ءُ ھپت ءَ بلوچستان چہ زورگریں برتانیہ ءِ چَنگُلاں آجو بیت ءُ یک وتواجھیں ڈیھے ءِ بستار ءَ دُگنیا ءِ دیم ءَ منّگ بیت گُڑا آ وھد ءَ پاکستان نامیں مُلک نہ بیت ءُ ھِندوستان پروشت ءُ پروش نہ بیت۔ ھِندوستان ءِ تہ ءَ مسلمان ءُ ھندواں ھوار دُرستیں نیکراھی منوگر برتانیہ ءِ بگیری ءَ ھندوستان ءِ آجوئی ءِ ھاتر ءَ گھگیری کن اَنت۔

وھدے کہ زورگریں برتانیہ چار ایت کہ نوں آئی ءِ زور نِزور بوان اِنت گُڑا آ گوں جناھ ءُ ایدگہ لُچیں مسلماناں شور کنت کہ شما مسلمان باید اِنت چہ ھِندواں جُتا بہ بہ اِت ءُ وتی مسلمانیں ڈیھے جوڑ بکن اِت۔ چی ءَ کہ زورگریں برتانیہ چار ایت اگاں باندا روچ ھندوستان آجو بہ بیت ءُ اے درُستیں ملک یکجاہ بہ بیت گُڑا ایشیا ءِ تہ ءَ برتانیہ ءِ واجھی ھلاس بیت پمیشکا برتانیہ وتی یک کاسگ چٹیں مُلکے پاکستان ءِ نام ءَ دیم ءَ آرگ لوٹ ایت۔ گُڑا ھمے وڑ ءَ نیکراھی ءِ نام ءِ سر ءَ مردم گنوک کنگ بنت ءُ اے وتگڑیں پاکستان نامیں اِستان ءَ برتانیہ جوڑ کنت۔

وتگڑیں پاکستان ءِ جوڑ بوگ ءَ پَد جناھ ءُ برتانیہ ءِ چم بلوچستان ءَ سک بنت آ نہ لوٹ اَنت کہ بلوچ وتواجہ بہ بنت ءُ وتی ڈیھ ءِ سر ءَ ایمنیں زندے بہ گوازین اَنت۔ پمیشکا لُچیں جناھ نیکراہ ءِ نام ءِ سر ءَ بلوچاں گوں پاکستان ءَ ھوار بوگ ءِ سلاہ ءَ جنت بلے بلوچ ھما روچ ءَ اے گپ ءَ رَد کن اَنت کہ بلوچ پرچا مزھب ءِ نام ءِ سر ءَ گوں پاکستان ءَ ھوار بہ بنت۔ بلوچانی زمین جتا اَنت، زبان ءُ دودمان جتا اَنت۔

گُڑا ھما روچ ءَ پَد زورگریں پاکستان لھتیں وتگڑیں سرداراں پہ لب ءُ لالچ ءُ پہ مزھب ءِ نام ءِ سر ءَ گوں وت ھوار کنت ءُ بلوچستان ءِ سر ءَ اُرش کنت ءُ بلوچ ڈیھ ءَ ایردست کنت۔

نوں اِد ءَ اے گپ پدر بیت کہ بلوچ ءَ نیکراہ ءَ چہ پیسر وتی راج، دود ءُ ربیدگ ءُ وتی زمین دوست اَنت۔ پمیشکا زورگریں پاکستان بلوچ ڈیھ ءِ ایردست کنگ ءَ پَد وڑ وڑیں پندلانی رِد ءَ بلوچ ءِ چُکچینی ءَ کنگ ءَ اِنت۔ چی ءَ کہ زورگِر ءَ بلوچستان ءِ گوھر کیمتی مڈی درکار اَت۔

اے رِد ءَ زورگریں اِستان ءَ بلوچانی بھر ءُ بانگ کنگ ءُ وت ماں وت میڑینگ ءِ وڑ وڑیں پندل ساز اِتگ۔ برے زبان ءِ نام ءِ سر ءَ ۔۔ برے ھَند ءُ دمگ ءِ نام ءِ سر ءَ ۔۔۔۔برے زات ءُ زُریات ءِ نام ءِ سر ءَ ۔۔۔ ءُ برے مزھب ءُ نیکراہ ءِ نام ءِ سر ءَ ۔

اے دُرستیںں پندلانی تہ ءَ زورگر ءَ دُرستاں گیشتر مزھب ءِ سر ءَ زور داتگ۔” یک گپے مارا زانگ لوٹ ایت کہ دنیا ءِ تہ ءَ ھچ چُشیں زمینے نیست کہ اود ءَ یکیں مزھب ءِ راج جھمنند بہ بنت” پمیشکا زورگریں استان بلوچاں وت ماں میڑینگ ءُ گورجیگ ءِ کنگ ءِ ھاتر ءَ وتی لھتیں مزھبی کاسگ چٹ جوڑ کتگ کہ زگری ءُ نمازی ءِ نام ءِ سر ءَ بلوچاں بہ جن اَنت ءُ وت ماں وت کُشت ءُ کوش بکن اَنت۔زورگر ءِ اے کاسگ چٹاں کمو ریش دیم ءَ داشتگ بلے بُن ازل ءَ اے ناں مُلا اَنت ءُ ناں مزھبی مردم اَنت بلکیں اے اِستانی کاسگ چٹ اَنت۔ اے بس ھما کار ءَ کن اَنت کہ اشاناں پاکستانی لشکر پرما ایت۔

اے ھمے کُشندہ ٹولی (ڈیتھ اسکواڑ) اِنت بس زورگِریں لشکر ءَ ایشی ءِ درُوشُم مَٹ کتگ دانکہ بلوچ راجی جُنز ءَ مزھب ءِ نام ءِ سر ءَ اڈاند ءِ آماچ بہ کنت ءُ پروش بہ دنت۔

وھدے کہ زورگریں استان ءَ چار اِت کہ منی دُرستیں پندل بے سوب بوتگ اَنت۔ زبان، ھند ءُ دمگ، زات ءُ زریات، میر ءُ سردارانی کارمرز ھم بے سوب بوت، زگری ءُ نمازی ءِ پندل ھم بلوچ راجی جُنز ءِ دیم ءَ بے سوب بوت۔ چی ءَ کہ بلوچ ءَ چہ مزھب ءَ پیسر وتی زمین ءُ راج ءُ وتی زبان ءُ ربیدگ دوست اَنت۔

نوں زورگریں لشکر ھمے اِستانی مُلایاں پرمایگ ءَ اِنت کہ کُپر ءُ شِرک ءِ نام ءِ سر ءَ بلوچ ءِ وانِندہ ءُ زانتکاریں مردماں بہ جن اِت۔ دانکہ بلوچ راج ءِ تہ ءَ زانشتیں سر پشت مہ کپ ایت ءُ بلوچ وتی راجی پجار ءُ وتی راجی جُنز ءَ چے گِستا بہ بیت۔

پیسر ءَ زورگریں لشکر ءَ وتی کُشندہ ٹولی ءِ دست ءَ بلوچ زانتکار ءُ وانِندہ شھید کتگ اَنت انچوشکہ شھید زاھد آسکانی، شھید اُستاد سباہ دشتیاری، شھید پروپیسر رازک بلوچ ھمے وڑ ءَ مرچی ھمے مزھبی کُشندہ ٹولی ءِ دست ءَ شھید راوُپ بلوچ ءَ را ھم شھید کُت اِش۔

بلوچ راج ءَ زورگریں اِستان ءِ دُراھیں پندل ءُ لُچی زانگ لوٹ اَنت۔ اے مُلا شاھمیر ، ملا گُلام، مُلا رمزان مینگل، مُلا اِجاز، مُلا منزور ءُ شپیک مینگل۔ اے دُرس بس نام ءِ مُلا اَنت اسل ءَ اے زورگریں پاکستانی لشکر ءِ ھاسیں مردم ءُ کُشندہ ٹولی اَنت۔انچوش کہ بلوچ راج ءَ پیسر ءَ زورگریں استان ءِ پندل بے سوب کتگ اَنت ھمے وڑ ءَ دیم ءَ ھم بلوچ راج تپاک ءُ یکجاہ بہ بیت ءُ وتی راجی آجوئی جُنز ءَ ھوار بہ بیت۔ چی ءَ کہ زورگر ءِ دُرستیں پندل ءُ زوراکیانی پُشدر بس بلوچ چُکچینی ءُ بلوچ ءِ ایردستی ءَ مھکم دارگ اِنت۔

بلوچستان آجو بات
بلوچ راج تپاک ءُ یک مُشت بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔