TBP Balochi

بلوچستان ءِ دمگ ھزدار، نوشکی ءُ مستونگ ءَ پاکستانی پوج ءَ دو براتاں ھوار ھپت مردم آوار جتگ ءُ بیگواہ کتگ اَنت ءُ ھمے وڑ زورانسری آوار جنی ءِ آماچیں دو مردم یل کنگ ءُ وتی لوگاں سر بیتگ اَنت-

بیگواہ بیتگیں مردمانی پجار اسامہ ء ھاجی واھد مینگل، نصیب اللہ ء ھاجی واھد مینگل جھمنند نوشکی کازی آباد، نادر حسین ء محمد خان جھمنند مشکے گجر، مھمد آصف ء مراد، جاوید ء عبداللہ جھمنند ھزدار، فھاد ء محمد وارس ءُ اسلم کرد ءِ ناماں زانگ بیتگ اَنت-

اے دوئیں برات اسامہ نصیب اللہ پاکستانی پوج ءَ گوستگیں روچاں نوشکی ءِ ھند کازی آباد ءَ دزگیر کنگ ءَ پد بیگواہ کتگ اَنت – نصیب اللہ ملتان یونیورستی پنجاپ ءَ وتی وانگے سرجم کتگ ءُ نوشکی ءَ اتکگ بیتگ –

ھمے وڑ نادر حسین ءُ محمد آصف گوستگیں ھزدار ءِ دمگ کوشک ءَ آیانی نزیکیں سیادانی گس ءَ آوار جنگ ءَ پد بیگواہ کنگ بیتگ اَنت-

دمگی مردمانی رد ءُ نادرحسین یک نودربرے کہ مشکے ءِ جھمنند اِنت ءُ پوجی بیڑانی سبب ءَ وتی دمگ ءَ چہ لڈ ءُ بارے کتگ ءُ ھب چوکی ءَ زندگی ءِ گوازینگ ءَ لاچار بیتگ ءُ آ گوستگیں روچاں ھزدار ءَ وتی گوھار ءِ گندوک ءَ اتکگ بیتگ ءُ پد ءَ چمود ءَ چہ بیگواہ کنگ بیتگ-

ھمے وڑ ءَ ھزدار جعفر آباد ءَ پاکستانی پوج ءَ جاوید ء عبداللہ ءُ فھاد ء مھمد وارس دزگیر کنگ ءَ پد بیگواہ کتگ اَنت-

چہ ھزدار ءَ دگہ چار کسانی بیگواھی ءِ اھوال بیتگ بلے تنی وھدی اے درگت ءَ دگہ راستی دیم ءَ نیتکگ اَنت-

ھمے وڑ ءَ گوستگیں روچاں مستونگ دشت ءَ اسلم کرد نامیں یک مردمے پاکستانی پوج ءَ دزگیر کتگ ءُ برتگ کہ آئی ءِ بنکی سیادی مَچ ءَ اِنت اے وھد ءَ دشت ءَ وتی گزران ءِ ھاتر ءَ کار ءَ بیتگ-

چہ بولان ءَ اھوالانی رد ءَ پاکستانی پوج ءِ دست ءَ آوار جنگ بیتگیں کماش حمزہ ء شکارء ءُ جوسل ء خیرو یل بیتگ ءُ وتی گساں سر بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ٹیلی کمیونیکشن ءِ ملازماں پنشنانی نہ رسگ ءُ کمی ءِ ھلاپ ءَ زھرشانی کتگ-

مروچی سَے شمبے ءِ روچ ءَ ملازماں زھرشانی کنان ءَ گوشتگ کہ چہ سرکاری ٹیلی کمیونیکشن ءِ نیمگ ءَ مئے پنشن کم کنگ ءُ پد ءَ پہ وھد نہ رسگ ءَ اَنت، آیاں گوشتگ مئے مال ءُ متاہ تھنا ھمے والینگی پنشن اَنت ایشاں سرکار نہ دنت گڑا ما چہ کجا وتی گزران ءَ بہ کن ایں-

زاھدان ءَ ھوار ایران ءِ دگہ اُستان تھران، اسپھان، خوزستان، اراک، قزوین، الیام، ھرمزگان، کرمانشاہ، فارس، کردستان، لرستان ءُ چھار مھل بختیار ءِ اُستاناں ھم ریٹائرمنٹیں ملازماں وتی ھکانی ھاتر ءَ زھرشانی کتگ-

آیانی گوشگ اِنت اے گرانھادی ءَ چہ کجا ما وتی لوگ ءِ گنجاں سرجم کت کن ایں اے کمے نھاداں اگاں سرکار کاٹان کنت گڑا ما شُدکشی ءِ دیمپان بہ ایں-

روکپتی بلوچستان ءَ یکیں ھپتگ ءَ پاھو دیگ بیتگیں مردمانی کچ دَہ ءَ سر بیتگ اَنت پاھو دیگ بیتگیں مردم بنجاھی شھر زاھدان، ایرانشھر، بندر عباس، ایشی ءَ ھوار ھوار اُستان زابل ءُ مشھد ءَ دیگ بیتگ اَنت –

روکپتی بلوچستان ءِ تیابدپی دمگ بندر عباس ءَ ایرانی آمیدگس ءَ نشہ باپاری ءِ بھتام ءَ دو کس پاھو داتگ اَنت-

پاھو دیگ بیتگیں مردمانی پجار موسی موسیٰ گورگیج ء حسین ءُ احدان گورگیج سید خان ھردوک زاھدان ءِ جھمنند گوشگ بوگ ءَ اَنت-

ھالانی رد ءَ موسیٰ ءُ احسان ایرانی سال 1399 ءَ ماں بندر عباس ءَ دادگاہ انقلاب ایران ءَ گپتگ ءُ پاھو ءِ ھکم داتگ اَنت-

ھالانی رد ءَ گوشگ بیتگ کہ اے ھردوکانی گڈی گندوک گوں کھول ءَ گوستگیں روچ ءَ کنگ بیتگ اَنت-

روکپتی بلوچستان ءَ یکیں ھپتگ ءِ توک ءَ دَہ مردم پاھو دیگ بیتگ اَنت کہ ایشانی توک ءَ یک زالبولے ھم ھوار اِنت –

روکپتی بلوچستان ءِ پاھو دیگانی درچ کسانیں ائید ءَ پد یک ترندی ءِ رنگ ءَ گندگ پیش کنگ ءَ اِنت-

ایتیزَم، اگنوسٹسزم، ءُ سیکولرازم ءِ میانجی ءَ چے تپاوت ھست؟

نبشتہ کار: شاھد اھمد

دی بلوچستان پوسٹ

( Atheism, Agnosticism and Secularism )

( ایتیزَم )ایتیزَم ءِ لبزی مانا اے لبز یونانی لبز تھیوس (theos) ءَ چِہ درآتکگ ایشی ءِ بزانت “ھدا” اِنت ءُ اے تھیوس (a.theos) ءِ متلب بہ بیت ئِے بزاں ھچ ھدا نیست۔ ایتیزَم ءِ زگریں مانا ءُ بزانت اے ھما سوچ ءُ پگر ءِ نام اِنت کہ ایشی ءِ واست ءَ کسے کہ ھدا مانا نیست، ءُ ایتھیسٹ ھما مردم ءَ گْوش اَنت کہ آئی ءِ گْوشگ ءِ درگت ءَ کہ ھچ ھدا نیست۔ اے پگر، اگنوسٹسزم ءِ بگیری ءَ گیشتر زوراور ءُ راستی اِنت، ھمے واست ءَ کہ ھدا ءِ وجود ھچبر نیست۔

(اگنوسٹسزم) ءِ لبزی مانا اگنوسٹسزم ھم یونانی لبزے، ایگناسٹوز (agnōstos) ءَ چِہ درآتکگ ایشی ءِ مانا “کس نیست” بزاں کسے نہ گِند اِیت ئِے ءُ اگنوسٹک ھما مردم ءَ گْوش اَنت کہ کسے گْوش اِیت کہ من ئِے نہ زاناں ءُ نہ دیستگیں چیزے کہ راستی ھدا ھست کہ نیست؟ اگنوسٹسزم ءِ زگریں مانا اگنوسٹسزم یک انچیں سوچ ءُ پگرئِے ءِ نام اِنت کہ ایشی ءَ ھمے گْوش اَنت کہ کسے ھدا بوت کنت یا نہ کنت ھم ھمے سوچ ءُ پگر ءِ درگت ءَ انسان ءِ ھدا ءِ ھستی ءَ بہ زُور ھچ اِش ءُ گندگ ءَ نزیکی نہ بیت، بزاں انسان ناں کہ سابت کُت کنت کہ کسے ھدا یے ءُ ناں کہ گْوشت کنت کہ ھدا نیست، ھمے پگر ءُ سوچ ءِ ھساب ءَ انسانی اگک چہ ھمے گپ اَبکہ اِنت کہ آ سْوَڑگ کنت کہ ھدا ھست یا کہ ھدا نیست اِنت-

سیکولرازم ءِ گال، لاتینی زبان ءِ گال چہ”سیکولم” ءَ در آتکگ ءُ ایشی ءِ لبزی متلب “دنیا”۔ ایشی ءَ چہ ابید “بے دینی” یا “نا پاک ” بزاں پلگار نہ اِنت” ھم سیکولر ءِ لبزی مانا ءُ بزانت ءَ کارمرز بیت اِنت۔ بلے بس لبزی مانا ءَ چِہ ما نزریاتی مانا ءُ متلب ءَ شَری ءِ سر ءَ نہ پَھم آن اِیں۔ بزانت سیکولرازم یک انچیں نزریا یے کہ ایشی ءِ تہ ءَ دین ءُ مزھب ءَ زندگی ءِ سجُھیں پِڑاں انچوش کہ وردن ءُ وراک، راجکاری ءُ راجمانی ءِ تہ کَشّگ، ایشی ءَ را یک جتائیں پِڑے ءِ بستار ءَ زانگ بہ بیت انچوش کہ ھمے وڑ ءَ دین ءُ مزھب ءَ دومی سجھیں پڑاں چہ ھچ سْیادی مہ دار اِیت، بزاں ھمے پگر ءُ سوچ ءِ بستار ءَ دین ءُ مزھب ءَ سْیادی انسان ءِ جند ءِ وتی بہ بیت ءُ دگہ چاگرد ءِ راج ءُ راجکاری جیڑ ءَ اَنت، ایشی ءِ تہ ءَ دین ءُ مزھب ءَ ھچ کِرد نیست. پہ درور: اگاں تو مسلمانے ئے ءُ تئی مزھب ءُ تئی مزھبی دود مَسیت ءَ بہ بیت بس یا تئی جند ءِ سر ءَ بہ دار اِیت کسے ءَ گوں کار مہ بیت، یا پہ دگہ درورے: اگاں تو ھِندو یے ئے گڑا تو ھم وتی مَنْدر ءُ مزھبی دوداں گوں گٹ بہ بَہ ئے ءُ دگہ راج ءُ راجکاری ھچ مزھب ءَ کِردے مہ بیت ءُ سیکولر ھما مردم ءَ گْوش اَنت کہ آ پَھم اِیت کہ ھچ مزھب ءَ ءُ مزھبی دوداں کار مہ بیت گوں راج ءُ راجکاری چِست ءُ ایراں۔

دلگوش: ایتیزَم ءِ گْوشگ اِنت کہ ھدا ءِ ھستی جند نیست۔ بزاں کہ ناں کہ تو ھدا ءَ دیست کن ئے ءُ ناں کہ سابت کُت کن ئے کہ ھدا ھست دومی نیمگ ءَ اگنوسٹسزم ءِ گْوشگ اِنت کہ ھدا ءِ ھستی ءَ ثابت کُت کن ئے ءُ نئیکہ بیدے سبوت ءَ آئی ءِ ھست ءَ نہ مَنّ اِت کُت کن ئے۔ متلب اے گپ ءِ زانگ سک باز گران اِنت کہ بلے ھدا ھست یا نیست۔

ءُ سیکولرازم چہ اے دوئیں نزریاتاں جتا اِنت ، اے نزریا ءِ گْوشگ اِنت، اگاں کسے ھم کجام مزھب ءِ مَنوک اِنت بلے سیکولرازم ءِ گْوشگ اِنت کہ کَسے ھم دین ءُ مزھب ءَ راجمانی، راجکاری، چاگردی دود ءُ دودمان ءِ کرد گون نہ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ بندوکیں مردمانی پاھو دیگانی وئیلانی اے ھشتمی وئیل اِنت کہ یکیں ھپتگ ءَ ھشت مردم پاھو دیگ بیتگ اَنت-

گیشیں ھالانی رد ءَ ایران ءِ اُستان بیرجند زابل ءَ ایرانی آمیدگس ءِ ھکم ءَ زالبولے ءَ ھوار سَے بندیگ پاھو دیگ بیتگ اَنت-

پاھو دیگ بیتگیں زالبول ءِ پجار مدینہ سبزواں ء غلام مھمد شھبیک جھمنند زاھدان شیر آباد، عبداللہ زاروزئی ء زوان خان جھمنند زابل، مھمد شھبیک ء سعید جھمنند کریم آباد زاھدان ءِ ناماں زانگ بیتگ اَنت-

ھرسئیں مردمانی سر ءَ نشہ باپاری ءِ بھتام بیتگ کہ آیاں نشہ ءِ باپاری ءِ پژدر ءَ گپتگ ءُ مرگ ءِ سزا داتگ اَنت-

ھمے وڑ ءَ مشھد ءَ وکیل آباد زندان ءَ ھم یک بندیگیں بلوچے پاھو دیگ بیتگ –

مشھد ءَ پاھو دیگ بیتگیں مردم ءِ پجار امین اللہ ءِ نام ءَ زانگ بیتگ – امین اللہ ءَ وتی لوگ بانک ءِ ھمراھی ءَ سال دوھزار ءُ بیست ءَ ھشت جولائی ءَ دزگیر کنگ بیتگ-

آئی ءِ لوگ بانک ءِ سر ءَ دَہ سال سزا اتکگ بیتگ ءُ آئی ءَ را گوستگیں روچ ءَ ایرانی آمیدگس ءَ پاھو داتگ –

روکپتی بلوچستان ءَ مردمانی پاھو دیگ یک رندے پد ءَ ترندی ءَ گوں گندگ بوگ ءَ اَنت-

بلوچستان لبریشن فرنٹ ءَ شال ءَ پولیس تھانہ ءِ سرءَ بمب اُرش، پنجگور ءَ نارکوٹیکس تھانہ ءِ سرءَ دستی بمب اُرش ءُ گریشہ ءَ یوفون ٹاور ءِ مشینریزانی ماندارگ ءِ ذمہ واری من اِتگ۔

بلوچستان لبریشن فرنٹ ءِ جارکش میجر گھرام بلوچ ءَ رسانکدر ءَ شنگ کُتگیں درشانے تہءَ گُشتگ کہ شال ءَ پولیس تھانہ دستی بمب ءَ گوں نشانگ کُتگ۔

جارکش ءَ گُشتگ کہ سرمچاراں گوستگیں شپ ءَ شال ءِ ھند کیچی بیگ ءَ پولیس تھانہ دستی بمب ءَ گوں نشانگ کُتگ۔ بمب اُرش ءِ آسر ءَ لشکریاں جانی تاوان ءِ دیمپانی کنگ کپتگ۔

میجر گھرام دگہ یک شنگ کُتگیں درشان ئے تہءَ گُشتگ کہ بلوچستان لبریشن فرنٹ ءِ سرمچاراں پنجگور ءِ نارکوٹیکس تھانہ ءِ سرءَ دستی بمب ءَ گوں اُرش کُتگ ءُ گریشہ ءَ یوفون ءِ ٹاور بیکار کتگ ءُ مشینریز مانداشتگ اَنت۔

جارکش ءَ گُشتگ کہ سرمچاراں پنجگور ءِ بنجاھی شھر چتکان ءَ تار آفیس ءِ ھندءَ گوستگیں شپ ءَ نارکوٹیکس ءِ تھانہ ءِ سرءَ دستی بمب ءَ گوں اُرش کتگ ۔ دستی بمب تھانہ ءِ تہءَ کپتگ چریشی ءَ دو کارندہ ٹپی بیتگ اَنت ءُ دو گاڑی تاوانبار بیتگ اَنت۔

میجر گھرام ءَ گُشتگ کہ دگہ یک اُرش ئے ءَ خضدار ءِ ھنکین گریشہ ءَ سرمچاراں چیل ءِ ھندءَ جوڑ کُتگیں دژمنیں پوجءِ کمک ءُ آسراتی ءَ پہ برجاھیں یوفون ءِ ٹاور نشانگ کتگ ءُ بیکار کتگ ءُ مشینریز مانداشتگ اَنت۔

آئی ءَ گُڈسرءَ گُشتگ کہ بلوچستان لبریشن فرنٹ اے اُرشانی ذمہ واری ءَ من ایت۔ زور گپتگیں بلوچستان ءِ آجوئی ءَ داں قوضہ گیریں لشکریانی سرءَ مئے اُرش برجاہ مان اَنت۔

بلوچستان ءِ دمگ چہ ھُزدار ءُ پنجگور ءَ پاکستانی پوج ءَ دو براتاں ھوار پنچ مردم زورانسری آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ ھُزدار ءِ دمگ کوڑاسک دوھلیڑی ءَ گوستگیں سے روچاں چہ لشکر کشی برجاہ ءَ اِنت لشکر کشی ءِ وھد ءَ پوج ءَ دو برات آوار جتگ ءُ بیگواہ کتگ اَنت-

ھُزدار ءَ بیگواہ کنگ بیتگیں بشیر احمد ء تاج محمد سمالانی ءُ آئی ءِ کستریں برات ھوار اَنت-

دمگی اِھوالکارانی رِد ءَ گوستگیں سے روچان چہ پوج ءِ لشکر کشی برجاہ ءَ اِنت کہ دمگ ءَ مزنیں کچے ءَ لَس مردمانی اوشتر ءُ ھر برتگ اَنت ھُزدار ءُ مشکے ءِ کوھی دمگاں پُترتگ اَنت-

تنی وھدے سرکاری واکداراں لشکر کشی ءِ درگت ءَ ھچ وڑیں درشان دیم ءَ نیتکگ-

دومی نیمگ ءَ چہ پنجگور ءَ ھال اِنت کہ گوستگیں شپ ءَ پوج ءَ یک آروسی مراگشے ءَ بیڑبرتگ ءُ سے مردم زورانسری آوار جتگ ءُ گوں وت برتگ اَنت-

بیگواہ بیتگینانی پجّار ضیاء ء نور اللہ، انعام ء اسحاق ءُ ماجد ء عبدالحمید ناماں چہ بیتگ اَنت-