TBP Balochi

سرجمیں جھان ءَ یک مئی ءَ پوریاگرانی میان استمانی روچ دارگ بیت اے روچ ءِ دارگ ءِ مول مراد امریکہ ءِ شھر شکاگو ءِ پوریا گرانی جھد یات کنگ بیت مردمانی گوستانک ءَ اے روچ مھنت ءُ جھد ءِ نام ءَ زانگ بیت ءُ دارگ بیت –

یورپ ءُ امریکہ ءَ وھدیکہ سرمایہ داری ءِ نزام چست بوتگ گڈا آئی ءِ سرجمیں زور پوریاگرانی سر ءَ کپتگ، پوریاگرانی گوم ءَ در انسانی رویش دارگ بوتگ ءُ آھانی کار ءِ وھد ھم گشینگ نہ بوتگ انت کدی آ دوازدہ ادار کار گرگ بوتگ انت ءُ کدی چاردہ ءُ ھژدہ ادار فکٹریانی تہ ءَ کار گرگ بوتگ انت –

شکاگو ءَ وھدیکہ پوریاگرانی سر ءَ زوراکی کنگ بیت گڈا آھاں پہ وتی ھکانی پچ گرگ ءَ جھد کنگ بندات کتگ ءُ آھاں اے زوراکی ءِ نزام ءَ رکگ ءِ ھاتر ءَ زرمبشت ءِ بندات کتگ ءُ سال 1886 ءَ امریکہ ءِ پوریا گراں شکاگو ءِ سرمایہ دارانی بگیری ءَ ترندیں زھرشانی کتگ –

یک مئی ءَ بندات بوتگیں اے زھرشانی تاں سَے روچ ءَ برجاہ بوتگ ءُ پدا سَے مئی ءَ شکاگو ءَ برجاھیں پوریا گرانی زھرشانی ءِ سر ءَ پولیس بیڑ بارت کہ چار پوریاگر بیران بنت – وھدیکہ وئیل ءِ بگیری ءَ پوریاگر یکبرے پدا مُچ بنت گڈا پولیس یکرندے پدا پوریاگرانی دارگ ءِ ھاتر ءَ آھانی سر ءَ بیڑ بارت ءُ لٹ شاپ کنت ءُ ھمے میان ءَ یک بمب تراک ءِ کنگ بیت ءُ یک پولیس افسر ءِ مریت گڈا پولیس زھرشانی کنوکانی سر ءَ تیرگواری کنت ءُ چریشی ءَ بازیں پوریاگرے بیران ءُ بازینے زدگ بیت انت –

سَے مئی ءَ پولیس ءِ تیرگواری ءَ بیران بوتگیں پوریاگرانی ھک ءَ شکاگو ءِ تہ ءَ پُرایمنیں زھرشانی بندات بوتگ انت ءُ چاراں چاران ءَ سرجمیں امریکہ ءَ ھر کجا چماں شانک دئے روانک گندگ ءَ کائنت –

روانک ءُ زھرشانیاں ھواریں ھر یک مردمے ءِ زبان ءَ یکیں گپ ات کہ پوریاگرانی وھد ءُ پاس گچین کنگ نہ بنت ءُ آیانی دیاڈی گیش کنگ بہ بیت ءُ یک رمس ءِ گچین کنگ بہ بیت کہ آیاں مزوری ءِ زر دیگ بہ بنت ءُ پدا چہ ھمدا مزور انکلاب ءُ یونیز بندات بوتگ ءُ پدا سال 1887 ءِ نومبر ءِ ماہ ءَ یک پوریاگر ءَ پاھو ءِ سزا ھم دیگ بیت کہ پدا رند ءَ اے زرمبشت ءَ سرجمیں جھان دیم ءَ اتک –

1889 ءَ ریمنڈ لیون ءِ گوشگ ءِ پد ءَ سال 1890 ءَ اولی رند ءَ یک مئی پوریاگرانی روچ ءِ نام ءَ یات کنگ بوت-

بلے دومی نیمگ ءَ پہ پوریاگرانی ھاتر ءَ دارگ بؤکیں اے روچ ءِ درگت ءَ پوریا گرانی جند سرپد نہ انت آ ھمے روچ ءَ ھم وتی زھگانی ھاتر ءَ کار کنگ انت –

لیبر ڈے ءِ سر ءَ گوگل ءِ ڈوڈل ھم بدل بوتگ وھدیکہ سرجمیں جھان ءَ مروچی موکل انت –

سر بیتگیں اھوالانی رد ءَ روکپتی بلوچستان ءَ جنکانی وانگجاھانی سر ءَ ایران ءِ نیمگ ءَ (کیمیائی) اُرش یکشل ءَ برجاہ اَنت-

گیشیں ھالانی رد ءَ گوستگیں روچ ءَ کلا گنج ءَ جنکانی وانگ جاہ ءِ سر ءَ (کیمیائی) اُرش کنگ بیتگ کہ چریشی ءَ بازیں نودربرے تُستگ ءُ کپتگ اَنت-

(کیمیائی) اُرش ءِ زھر ءَ پد بازیں نودربرانی جاور ناگیگ بیتگ ءُ آ شھدائے کلا گنج ءِ نادراہ جاہ ءُ برگ بیتگ اَنت-

زانگ بہ بیت چِد ءُ پیش ھم روکپتی بلوچستان ءَ جنکانی وانگجاھانی سر ءَ کیمیائی اُرش کنگ بیتگ اَنت کہ چریشی ءَ بازیں نودربرے بے ھوش ءُ جاور اش ناگیگ بیتگ اَنت بنداتی وئیل ایرانشھر ءَ پیش اتکگ بیتگ کہ اود ءَ برانز گپتگیں نودربرانی ایرموش کنگ ءَ واکدارانی نیمگ ءَ وانگ جاہ ءِ سر ءَ کیمیائی اُرش کنگ بیتگ اَنت-

روکپتی بلوچستان ءَ وانگجاھانی سر ءَ کیمیائی اُرشانی سر ءَ سیاسی تک ءُ پھناتاں مردم اے وئیلاں ایر جنگ ءَ اَنت ءُ گوشگ اَنت کہ سرکار لس نودربراں اے دابیں نشانگ مہ کنت –

بلوچستان ءِ جتا جتائیں جاھاں ھورانی گوارگ ءِ ھواری ءَ توپانی گواتانی سبب ءَ زند ءِ وش تبیں پڑ ناگیگی ءِ آسرمندی ءِ آماچ کتگ-

ھرنائی، لورلائی، کوہ سلیمان ءَ ھوار ھوار چمن، قلعہ عبداللہ، پشین، قلعہ سیف اللہ، نوشکی، زیارت، کیچ، گوادر، لسبیلہ، مکران ڈویژن ءَ ھور بیتگ اَنت – دومی نیمگ ءَ سندھ بلوچستان ءِ دو مزنیں شھدگ ریک دزنزاں بار داتگ اَنت-

لسبیلہ ءَ شال، کراچی ءِ شھدگ، ءُ بولان ءُ شال سبی ءِ مزن شھدگ ءَ راھانی گیش ءُ گیواری ءِ کار ریسکیو ءَ بندات بیتگ –

توپانی ھاراں ھرنائی پنجاپ ءِ شھدگ جتاجتا جاھاں روانی مھتل بیتگ اَنت-

کیچ ءَ ھوراں پد میرانی ڈیم پُر بوگ ءِ نزیک ءَ سر بیتگ، آپ ءِ کچ 243.70 فٹ ءَ سر بیتگ وھدیکہ میرانی ڈیم سرگرد ءِ کساس 244 فٹ ءَ سر بیتگ –

تربت ءَ ھوار ھوار لھتے جاھاں لوگ ءُ مھلوک ءِ باگان تاونباری بیتگ اَنت-

کیچ ءِ جتا جتا جاھاں لین ءِ کمبھانی کپگ ءِ سبب ءَ بجلی مھتل بیتگ ءُ بازیں روچانی گوزگ ءَ پد ھم واکداران بجلی شر کت نہ کتگ اَنت-

کمبرو مھر ءِ چیدگ

نبشتہ کار: دیدگ بلوچ

دی بلوچستان پوسٹ

من کمبر نہ زانتگ اَت گوں من ءَ ھمراہ اِنت سنگت کہ مُدام دپ ءِ پُر کندگ اَت پہ ھرکس ءَ مھراوان اَت مُدام سنگتانی دیوان براہ اَت ءُ ھرکس ءِ مزاک ءُ مسکرا اَت ءُ اگاں کسی دمانے دل گران بوت گُڑا ھما دمان ءَ آئی ءِ ھمبازاں اَت اِے بنی آدم منی چمانی دیم ءَ مُدام آھوگ بوتگ بلے ھمے کہ ما سپر ئے ءِ درتگ اِت اِیں گُڑا من آھوگ ءِ اندر کمبر دیست کُت کہ گُشے زمین ءِ سرجمیں گم ءِ کوپگ ءَ اِت اَنت ۔ ھمُک کوہ تلار ءِ مھر ملاریں کمبر اسلہ من ھم اِے زمین ءِ زیبائی کمبرو ءُ چماں دیستگ اَت ھمے کہ آ ھوناں گوں باریں زمین ءِ کوھے ءِ سرا نِشتگ اِت اَنت گُڑا آئی ءَ من ءَ اے زمین اندر ءِ زیبائی پیش داشتگ ءُ من ءَ اِے جیڑگ ءَ پہ لاچار کُتگ کہ اِے بھشت رنگیں گُلزمین ءِ سرا ما وتی وڑ ءُ پیم ءَ گَشت نہ کن اِیں نِشت نہ کن اِیں بلے وش بھت اِیں انسان اِے زمین ءِ سر ءَ ھما اِنت کہ اِے زمین ءِ رکینتگ ءِ ھاتر ءَ جُھد کنگ ءَ اِنت ھمے کوہ ءُ تْلار کہ آئی ءِ مھر ما ملاریں ھمے کوہ آئی ءَ وتی سنگر جوڑ کُتگ اَنت اے وش بھت اِین بنی آدماں یکے کمبر اَت من کمبر گیش زانگ لوٹ اِیت من کمبر ءِ چماں وتی زمین ھم گیش زانگ لوٹ اِیت۔کمبرو ھم ھما وش بھت اِیں بنی آدمانی رم ءَ ھوار بوت کہ آئی ءِ دپ ءَ مُدام ھمانی کسّہ اَت۔

زمین ءِ اِشک ءِ ملاریں آشِک ھما اِنت کہ پہ وتی ھانُل ءَ توپنگ ءِ کوپگ ءَ بہ بیت ۔ وتی ھانُل ءَ چہ بدیں رستراں رکینگ ءِ جُھد ءَ بہ بیت بلے یار آھوگ من کدی نہ زانتگ اَت تو ھم پہ وتی ھانُل ءِ رکینگ ءَ چینچو تُنیگ اَت ءِ تو پہ ھمے ھانُل ءِ ھاترا ترا مارا پہ مُدامی رُکست کُت بہ بہ ئے من چو نہ زانتگ اَت تو اینچو پہ وتی ھانُل شیدائے کہ سُھریں تیراں وتی دِلبندا جاہ دیان کن ءُ پہ وتی ھانُل ءَ سالونک بہ بہ ئے بلے ھو تو پہ وتی ھانُل ءَ سالونک بوت ئے پُلی مرچی من اِناں بلکیں تئی دُرستیں سنگت تئی سر ءَ پھر بند اَنت کہ آھوگ پہ وتی ھانُل ءَ کمبر جوُڑ بوت ھمے ھیال ءَ من مُدام وتی اندر ءِ ابیتکی ءَ نوشاں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ دگ ءِ وئیلے ءَ سَے مردم بیران بیتگ اَنت-

وئیل زاھدان ءُ ھاش ءِ میانی ءَ پیش اتکگ کہ اود ءَ سَے گاڑیانی ٹکر ورگ ءَ پد اود ءَ گاڑیاں آس کپتگ بیتگ چریشی ءِ سبب ءَ ھرسئیں گاڑیاں سواریں سَے کس سُتکگ ءُ بیران بیتگ اَنت-

وئیل ءَ بیران بیتگیں مردمانی پجار نہ بیتگ اَنت، ھالانی رد ءَ گوشگ بیتگ کہ وئیل زاھدان ءُ ھاش ءِ میانی دمگ میر آباد ءَ پیش اتکگ کہ اود ءَ گمان ھمے بوگ ءَ اِنت اے گاڑی سواری بیتگ اَنت بلے ایشانی توک ءَ مان بیتگ ءُ برگ ءَ بیتگ انت ئِے-

روکپتی بلوچستان ءَ دگ ءِ وئیلانی دیمپان گیشتر دل کشیں مردم اَنت کہ اود ءَ گاڑیانی وئیل ءِ آماچ بوگ ءَ پد گاڑیاں آس کپ ایت ءُ چریشی ءَ جانی تاوان پیش کاینت-

چہ کراچی ءَ سندھ پولیس ءُ پاکستانی چیریں ادارھانی دست ءَ زورانسری آوار جنگ بوتگیں عبدالحمید زھری ءِ آوار جنی ءَ دو سال سرجم بوتگ انت، چہ کھول، سیاسی ءُ چاگردی باسکانی نیمگ ءَ کراچی ءَ زھرشانی کنگ بوتگ –

بیگواھیں عبدالحمید زھری ءِ کھول ءِ نیمگ ءَ مروچی یکشمبے ءِ روچ ءَ کراچی آرٹ کونسل ءَ بگر تاں کراچی پریس کلب ءَ زھرشانی روانک ءِ کشگ بوتگ کہ اودا بلوچ ءُ سندھی سیاسی ءُ نودربر گلانی باسکاں ھوار ھر تک ءُ پھناتاں سیادی داروکیں مردماں بھر زرتگ ءُ عبدالحمید زھری ءُ ایندگہ بیگواھیں مردمانی یل کنگ ءِ لوٹ کتگ –

زھرشانی ءَ تران کنان ءَ عبدالحمید زھری ءِ زھگ سعیدہ حمید ءَ گوشتگ کہ دو سال پرگوستگ انت ھمے ودار ءَ مئے پت واتر کئیت بلے اے دراجیں وھد ءِ پرگوزگ ءَ ابید ھم مارا تنی وھدی سرپدی نیست کہ مئے پت کجا انت؟ ءُ کجام کتکاریانی سوب ءَ بیگواہ کنگ بوتگ – ھمک روچی زھرشانی ءُ آمیدگسانی روگ ءَ ابید ھم مارا انساپ دیگ بوگ ءَ نہ انت –

“دو سالانی ودار دردیگ بوتگ انت ق ما نہ زانیں مئے پت کجام ھال ءِ تہ ءَ انت – آ یک پُرایمنیں شھری ءِ بوتگ – چہ ریاست ءُ آئی ءِ آمیدگساں منی جست ایش انت کہ منی پت کدی یل کنگ بیت –

سعیدہ حمید ءَ گوشتگ کہ دو سال ساری منی پت عبدالحمید زھری چہ کراچی ءَ مئے چمانی دیم ءَ سندھ پولیس ءِ ھمراھی ءَ آوار جنگ بوتگ – پت ءِ آوار جنی ءَ پد مئے سرجمیں زند سانمند بوتگ وھدیکہ بیگواھیں مردمانی کھول زھرشانی کن انت گڈا آوار جنی ءَ ھواریں پولیس آھانی دیم ءِ اڈاند جوڈ بیت –

زانگ بہ بیت ھزدار ءِ دمگ زھری ءِ جھمنند عبدالحمید زھری دھ اپریل سال دوھزار بیست ءُ یک ءَ چہ کراچی ءَ زورانسری آوار جنگ ءُ بیگواہ کنگ بوتگ – عبدالحمید ءِ کھول ءِ رِد ءَ آ چیریں ادارھانی کارمنداں سندھ پولیس ءِ ھمراھی ءَ چہ گلستان جوھر کراچی ءَ جند ءِ گس ءَ دزگیر کتگ ءُ گوں وت برتگ –

عبدالحمید ءِ زھگ سعیدہ حمید ءَ گوستگیں دو سال انت کہ وتی پت ءِ ھاتر ءَ زھرشانی کنگ ءَ انت – سعیدہ حمید ءَ چہ سندھ ءِ سرکار ءُ انسانی ھکانی ادارھاں گوں لوٹ کتگ کہ پت ءِ یل کنائینگ ءَ وتی کرد ءَ پیلو بہ کن انت –