TBP Balochi

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ بالگتر ءَ اسحاق ءِ گاڑی ءِ سر ءَ بوتگیں اُرش ءِ زمّہ واری منّ اِتگ ءُ گوشتگ اسحاق یعقوب پاکستانی پوج ءِ کشندہ ٹولی ءِ کارمندے بوتگ کہ تراکناکیں شوروانی نشانگ کُتگ ءُ گوں دگہ شش ھمراہ ءَ ھوار کُشتگ انت –

بی ایل ایف ءِ جارکش میجر گوھرام بلوچ ءَ اُرش ءِ سرجمیں ھال شنگ کتگ ءُ گوشتگ کہ مئے سرمچاراں گوستگیں روچ ءَ ادار پنچ ءَ بالگتر ءِ دمگ نلی ءَ پاکستان ءِ چیریں ادارہ ایم آئی ءِ کشندہ ٹولی ءِ کارمندانی راھے ءِ سر ءَ تراکناکیں شورو کل کُتگ ءُ نشانگ کتگ انت چریشی ریاستی کارمند اسحاق ء یعقوب گوں دگہ شش ھمراھاں ھوار مرتگ انت –

جارکش ءِ رِد ءَ تراکناکیں شوروانی اُرش ءِ زد ءَ اتکگیں ریاستی کارمندانی تہ ءَ راجی کتکار اسحاق ء یعقوب جھمنند نلی بازار، ابراہیم ء بدل جھمنند نلی بازار، نظام دیدار ء واجداد جھمنند نلی بازار، فدا حسین ء مومن جھمنند نلی بازار، سرفراز ء بنڈو جھمنند نلی بازار، سفر خان ء حیدر جھمنند نلی بازار قاسم ء عبدالحکیم جھمنند پروم ھوار انت –

میجر ءِ رِد ءَ اے کشندہ ٹولی پاکستان ءِ چیریں ادارہ ایم آئی ءِ چیردستی ءَ خالد ء یعقوب ءِ سروکی ءَ کار ءَ بوتگ انت ءُ بالگتر، کیلکور، کولواہ، بلیدہ ءُ کش ءُ گوری ھند ءُ دمگاں لشکر کشی، بلوچ سرمچارانی راھانی بندگ، لس مردمانی زورانسری آوار جنی ءُ کوش، مھلوک ءِ سر ءَ زوراکی کنگ ءُ دگہ بازیں چاگردی سلکاریاں اشانی دست مان بوتگ کہ گوستگیں روچ ءَ بی ایل ایف ءِ سرمچاراں نشانگ کتگ انت –

جارکش میجر گوھرام ءِ رِد ءَ اسحاق ءِ یعقوب راجی مجرم یعقوب ءِ چُک بوتگ کہ آ سال دوھزار یازدہ ءَ بلوچستان لبریشن فرنٹ ءِ سرمچاراں دگہ یازدہ ھمراھانی گوم ءَ نشانگ کتگ ءُ کشتگ – یعقوب ءِ مرگ ءَ پد پاکستانی پوج ءِ چیریں ادارہ ایم آئی ءَ آئی ءِ چک خالد ءُ اسحاق سلاہ بند کتگ ءُ خالد ءِ سروکی ءَ راجی زرمبشت ءِ بگیری ءَ کار گپتگ انت – گل ءِ نیمگ ءَ باز براں مکن کنگ ءَ ابید ھم اشاں راج دژمنی یل نداتگ – اے زورگیریں ریاستی ٹولہ ءِ بالگٹر، کیلکور ءُ دگہ بازیں ھند ءُ دمگاں بلوچ سرمچار ءُ لس بلوچانی نمیرانی ءَ اشانی دست مان بوتگ –

میجر ءِ رِد ءَ مُرتگینانی تہ ءَ باجو بوتگیں سرمچار نظام پنام ءِ دیدار ء واجداد ھم ھوار ایںکہ لھتے ماہ ساری راجی جھد ءَ چہ دزکش بوتگ ءُ دژمن ءِ ھمراہ بوتگ ءُ خالد ءِ سروکی ءَ جھدکارانی بگیری ءَ کار ءَ بوتگ –

جارکش ءِ رِد ءَ اے کشندہ ٹولی ءِ سروکی ءَ خالد ء یعقوب کنگ ءَ انت کہ مئے ٹارگٹ لڑ ءَ ھوار انت ءُ آئی ءَ راج دژمنی سزا الم دیگ بیت – دمگ ءِ تہ ءَ لھتے وتگڑیں سیاسی مردم، میر متبر خالد ءِ پشت پناھی ءَ کنگ ءَ انت ما آیاں تچکی ءَ مکن کنیں کہ وڈیں کتکارانی کار ءَ میا انت، مئے جھد پہ راجی آجوئی ءِ ھاتر ءَ انت اگاں اے دابیں ھر وڈیں مردمے دشمن ءِ کمک کار بوت گڈا ھچ وڈا پھل کنگ نہ بیت –

گڈسر ءَ میجر گوھرام بلوچ ءَ وتی درشان ءِ تہ ءَ گوشتگ کہ اے راجی مجرمانی کوش ءِ زمہ واری ءَ بی ایل ایف منیت ءُ اے اُرش ءِ تامر ھم گل ءِ گور ءَ ھست انت ھمے زوتاں شنگ کنگ بیت –

ھالانی رِد ءَ واشک ءِ دمگ جھلوار ءَ پاکستانی پوج ایف سی ءَ گسانی سر ءَ بیڑ برتگ ءُ زوراکی کتگ –

دمگی مردمانی رِد ءَ پوج بازیں گسے ءِ تہ ءَ زورانسری مانریتکگ ءُ زوراکی کنان ءَ چادر ءُ چاردیوالی لگتمال کتگ –

دمگی مردمانی رِد ءَ بیڑ میان ءَ ایف سی ءَ گسانی تہ ءِ الماری ءُ ایندگہ سامان پُرشتگ انت ءُ بلوچ زالبولانی گُد لنگ ءُ لانگ کتگ انت کہ جھلوار ءِ مردماں اے کار وتی گیرت ءِ سر ءَ اُرش ءِ لیک اِتگ ءُ اشی ءِ بگیری ءَ زھرشانی ءَ در اتکگ انت دگ بند کتگ انت چریشی ءَ رؤگ ءُ آیگے در بند انت –

سربوتگیں ھالانی رِد ءَ بلوچستان ءِ بنجاھی شھر شال ءُ کلات ءَ پاکستانی پوج ءِ سر ءَ اُرش کنگ بوتگ، چہ اے اُرشاں دوکارمند مُرتگ ءُ دو زدگ بوتگ انت –

گیشیں ھالانی رِد ءَ کلات ءِ دمگ جوہان کراس ءَ ناشناسیں سلاہ بندیں مردماں پاکستانی پوج ءِ دو کارمندانی سرا تیرگواری کتگ ءُ کشتگ انت –

دمگی بنشون ءِ رِد ءَ پوجی کارمنداں چہ بازار ءَ درمان ءُ دگہ وردنی سامان زرتگ ءُ واتر رؤگ ءَ بوتگ انت کہ نشانگ کنگ بوتگ انت –

زانگ بہ بیت گوستگیں شپ ءَ ھم جوھان ءَ پاکستانی پوج ءِ بنجلے سر ءَ اُرش کنگ بوتگ ات ءُ اے کارمند ھمے جوھان بنجل ءَ درمان برگ ءَ بوتگ انت –

دومی نیمگ ءَ بلوچستان ءِ بنجاھی شھر شال ءَ دز بمب اُرشے ءَ دو پوجی کارمندانی زدگ بوگ ءِ ھال انت-

پاکستانی پوج شال ءِ دمگ سریاب دگ ءَ زیارت کالونی ھند ءَ نشانگ کنگ بوتگ انت –

بنشون ءِ رِد ءَ ھمے جاہ ءَ برجاھیں پاکستانی پوجی پانگس ءِ سر ءَ ناشناسیں مردماں دزبمب ءِ چگل داتگ ءُ در شُتگ انت ءُ دزبمب مزنیں توارے ءَ گوں ترک اِتگ –

واکداراں اے اُرش ءَ دو کارمندانی زدگ بوگ ءِ ھبر راست کتگ ءُ گوشتگ کہ زدگ بوتگیں کارمندانی نام سپاھیگ رحیم شاہ ءُ ثناء اللہ انت –

زانگ بہ بیت شال ءُ کلات ءَ ھوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّ اِنت بلے اے اُرشانی زمہ واری تنی وھدی ھچ گل ءَ نہ منّ اِتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ کلات ءُ تربت ءَ دو ریاستی کارمندانی کوش ءِ زمہ واری منّ اِتگ ءُ گوشتگ کہ ھردو کارمند پاکستانی پوج ءُ چیریں ادارھانی چاریگی ءِ کار ءَ بوتگ انت-

جارکش جیئند بلوچ ءَ گوشتگ کہ بی ایل اے ءِ سرمچاراں گوستگیں شپ ءَ کلات ءِ دمگ منگوچر ءِ جوھان کراس ءَ تیرگواری کرتگ ءُ یک چاریگے کشتگ- اے کارمند ءَ دیر اِنت کہ وت ءَ گنوکے کرتگ ءُ منگوچر ءِ ھواری ءَ کلات شھر ءَ زورگریں پاکستانی پوج ءُ چیریں ادارھانہ واست ءَ چاریگی کنگ ءَ بوتگ –

جارکش ءَ گوشتگ کہ ھمے وڑ ءَ بی ایل اے ءِ سرمچاراں تربت ءِ سنگانی سر ءَ یک کوٹی یے ءَ زورگریں پاکستانی پوج ءِ چاریگ سفیان ء عبدالمجید جھمنند کراچی تیرگواری کرتگ ءُ کشتگ – اے کارمند گوادر ءَ دُژمنیں پوج ءِ چیردستی ءَ چاریگری کنگ ءَ پد تربت ءَ آتکگ، گوستگیں بازیں روچے بیت کہ کوٹی یے ءِ تہ ءَ چیر بوتگ –

جارکش جیئند بلوچ ءَ گوشتگ کہ بی ایل اے ءَ گوستگیں روچاں بیست ءُ نُھ جولائی ءَ وتی درشان ءَ تچک کرتگ گوشتگ کہ تربت شھر ءُ کِر ءُ کشاں ھوٹل ءُ کوٹی واھند اے وڑیں مردماں جاگہ مہ دے اَنت، اگاں نہ چو آدگرانی وڑ ءَ وتی جان ءُ مال ءِ زمہ وار وت بہ انت –

گڈسر ءَ بی ایل اے ءِ جارکش ءَ وتی درشان ءِ تہ ءَ گوشتگ کہ بلوچ لبریشن آرمی ھردو اُرشانی زمہ واری ءَ منیت، وتی منزل ءَ سربوگ ءَ تاں پاکستانی پوج ءُ آئی ءِ کمکارانی سر ءَ مئے اُرش برجاہ مان انت –

گوادر شھدربرجاہ لاھور، گیشواری لوٹ کنت

ٹی بی پی گچینی

زارین بلوچ

ابکھی پئیم ءَ پاکستان ءِ راجی پتر ءَ شون داتگیں منگ نامگ، کہ ایشی ءِ تہ ءَ پنجاب ءِ بنجاھی شھر لاھور ءَ پاک چائنہ گوادر شھدبرجاہ ءِ جوڑینگ من اِتگ۔ اے گامگیج ءَ بازیں مردم ابکہ کُتگ اَنت ءُ چاگردی رسانکدر ءِ سر ءَ گرما گرمیں باوستے چیڑینتگ، پرچاکہ شھدربرجاہ ءِ نام وَ بلوچستان ءِ تیاب دپی شھر گوادر ءَ بندوک اِنت، بلے اے لاھور ءَ جوڑ کنگ بئیگ ءَ اِنت۔ اے بِل ءِ منگ بوگ ءَ گوں پاکستانی ڈیھ ءِ پیسلہ سازی ءُ واھشتانی سر ءَ بازیں جست چِست کنگ ءَ لاچار کُتگ انت۔ بِل ءِ منارینوکیں سیاستداناں لس زھر ءُ گم ءُ ایراد ءِ پد ءَ ھچ پئیمیں لیکہ ءُ درشان ءِ ھم نہ داتگ۔

ھال چاگردی رسانکدر ءَ ترندی ءَ گوں شنگ بوتگ، بلوچستان ھوار ھاسیں پئیم ءَ مکران ءِ مھلوک ءَ گوادر ءِ جاہ ءَ لاھور ءَ گوادر شھدربرجاہ ءِ اڈ بئیگ ءَ مناپکت نامینتگ۔ اے وئیل ءَ ڈیھ ءِ چَپ ءُ چوٹیں واھشت ءُ آسراتیانی گیر انساپیں بھر ءُ بانگی گیشتر پدر کُتگ۔

زانگ بہ بیت اے بل ءِ منارینگ یکدم اڑوکیں گامگیجے بیتگ، دیوان ءِ نیام ءَ یک ادارے کسانیں وھدے ئے تہ ءَ 29 بل منارینگ بیتگ اَنت، اود ءَ سرکاری ھمسنتی ءِ تھنا 15 باسک ساڑی بیتگ اَنت، ءُ اپوزیشن ءِ یک ھم باسکے ساڑی نہ بوتگ۔ اے بلانی تہ ءَ 24 نوکیں شھدربرجاہ ءُ وانگی ادارگانی اڈ کنگ ءِ بابت ءَ بیتگ اَنت، کہ ایشانی تہ ءَ پاک چائنہ گوادر شھدربرجاہ ھم ھوار اِنت۔ گیشتر اجکہ کنوکیں گپ ایش اِنت کہ ایشانی تہ ءَ گیشتریں بل ابید کجام ھم دلجمیں پَٹ ءُ پول ءُ اگاں کمیٹیانی گورا دیم دیگ ءَ ابید منارینگ بیتگ اَنت۔

زند ءِ جتائیں تکاں سیادی داروکیں مردم ءُ ٹولیاں اے منگ نامہ ءِ منگ بوگ ءِ سر ءَ نادوستی ءُ وسواسی یے درشان کُتگ۔ گوادر ءِ ھندی مھلوک ءَ گُشتگ کہ لاھور ءَ شھدربرجاہ ءِ اڈ کنگ ءِ جار آیانی دمگ ءَ سرجمی ءَ ناانساپی یے ءُ اے دلیل داتگ کہ چین پاکستان زرکاری راھداری ءِ بندات ءَ بگر داں انگت آھاں ھچ پئیمیں پائدگ نہ دیستگ۔ جتائیں باسک ءُ زانشت ءِ زانتکاراں گوادر ءُ بلوچستان‌‌ ءِ جتاجتائیں دمگانی تہ ءَ پیسر ءَ چہ آدراھیں وانگی بودشت ءِ جاورانی سر ءَ تُرس ءِ درشان کُتگ۔

بلوچ انسانی اگبالانی باسک ڈاکٹر ماھرنگ بلوچ ءَ اڑوکی بل ءَ چہ راجی اسمبلی ءَ منگ بوگ ءِ سر ءَ پدگرد درشان کنان ءَ ڈیھ ءِ دیمروئی ءِ نام ءَ بلوچستان ءِ آسراتیانی پُل ءُ پانچ کنگ ءِ سر ءَ ترندیں ایرادگری ءِ نشانگ کُتگ۔

چاگردی رسانکدر ءِ تندجاہ ءَ یک ‌ ٹویٹے ءِ تہ ءَ آئی ءَ گُشتگ کہ ڈیھ بودشتی واکدار بلوچستان ءِ مڈیاں پُلگ ءُ پنجاب ءِ ھزمت ءِ ھاتر ءَ کار کن اَنت۔ آئی ءِ گُشگ اَت مئے پجار تنگی ءِ آماچ اِنت۔ وتگڑیں دیمروئی ءِ نام ءَ بلوچ ءِ آسراتیانی ناجائزیں پُل پانچ ءِ بگیری ءَ جد ءُ جھد ءِ برجاہ دارگ المی اِنت۔

زرکاری ءِ زانتکار ءُ آئی ایم ایف ءِ ھاتر ءَ کارکنوکیں مریم ضیا بلوچ ءَ آسراتیانی گورسی بھر ءِ سر ءَ زور داتگ ءُ جُست کُتگ کہ گوادر ءَ شھدربرجاہ پرچا اڈ کنگ نہ بیتگ اگاں آئی ءِ ھاتر ءَ پوڑی دیگ بیتگ اَنت۔

نیشنل پارٹی ءِ رھشون ءُ پاکستانی سینیٹ ءِ باسک تاھر بزنجو ءَ دمگانی نیام ءَ وانگی تپاوت ءَ دیما ایر کنان ءَ گوادر ءَ شھدربرجاہ ءِ اڈ کنگ ءِ سر ءَ زور داتگ۔

پیسرگیں ایم این اے ءُ نیشنل ڈیموکریٹک موومنٹ ءِ رھشون بشریٰ گوھر ءَ گوادر ءِ جاہ ءَ لاھور ءَ شھدربرجاہ ءِ اڈ کنگ ءِ پیسلہ ءِ سر ءَ جست چِست کُتگ۔

زرکاری ءِ زانتکار عزیر یونس ءَ وتی پدگرد ءِ تہ ءَ پدراھیں لبزاں گُشتگ کہ اے کانود سازی ءَ پد ڈیھ ءَ اے جُست کنگ نہ لوٹ ایت کہ ’’بلوچ پرچا بگاوت کنگ ءَ اَنت؟‘‘

بلوچ آجوئی دوستیں گلاں چہ بندات ءَ چین پاکستان زرکاری راھداری ءِ بگیری کُتگ، ءُ اے زرکاری راھداری ءَ آ بلوچستان ءِ مڈیانی پُلگ ءِ ھاتر ءَ “سامراجی” شوربندی نامین اَنت۔ آجوئی لوٹوکیں گل میگا انفراسٹرکچر شوربندیاں پُل پانچی ءُ بلوچستان ءِ مپادانی ھاتر ءَ تاوانبار سرپد بنت، ءُ اسٹبلشمنٹ ءِ سر ءَ بھتام جن اَنت کہ آ ھندی آباتیاں ھاسیں پائدگ دیگ ءَ ابید آیانی مڈیاں پُلگ ءَ اَنت۔ ھمے پُل پانچی شوربندیانی پَدگَرد ءَ آیاں بلوچستان ءُ بلوچستان ءَ ڈن چینی مپاد ءُ بُنکی کالب ءِ شوربندیانی سر ءَ اُرش کنگ ءِ راہ گچین کُتگ۔

ھاسیں پئیم ءَ بلوچ لبریشن آرمی ءِ مجید بریگیڈ اے ارشاں درستاں دیم ءَ بوتگ۔ اپریل 2022 ءَ یک وتکُشیں تراکے ءَ مجید بریگیڈ ءَ کراچی شھدربرجاہ ءِ کنفیوشس انسٹی ٹیوٹ ءِ پروفیسرز نشانگ کُتگ اَنت، کہ ایشی ءِ آسر ءَ سئے چینی زانشتی زانتکاراں ھوار چار مردم مُرتگ اَنت۔چہ اے اُرش ءَ چین پاکستان سیادی ءِ سر ءَ سکیں سان کپتگ اَنت، کہ ایشی ءَ چینی واکدارانی نیمگ ءَ چینی شھریاں پھازگی دیگ ءِ پاکستان ءِ بودشتانی سر ءَ مزنیں بے باوری ءِ ودی بیتگ اَت۔ ایشی ءِ آسر ءَ چین ءَ پاکستان ءِ درستیں کنفیوشس انسٹیٹیوٹاں چہ وتی زانتکار پد ءَ لوٹارینتگ اَنت۔

آجوئی لوٹوکیں بلوچ گل ءُ سیاسی پاٹیانی نیمگ ءَ مزنیں اھدے ءَ چہ پارلیمانی سیاست ءِ بگیر ءَ یک توانائیں لیکھے برجاہ داشتگ، آجوئی لوٹوک اے گپ ءِ سر ءَ زور دے اَنت کہ پارلیمان پرستیں سیاست دان بلوچستان ءِ پُل ءُ پانچی ءَ جائز نامینگ ءَ گوں تھنا پنجاب ءِ مپادانی ھزمت کن اَنت۔ کہ اود ءَ انیگیں کانود ءِ منگ بوگ ءُ آیانی دلیل سدکی ءَ دنت۔ راجی اسمبلی ءَ بلوچستان ءِ کانود جوڑکنوکانی پدراھیں جھگیری ءَ ابید ھم لاھور ءَ گوادر ءِ نام ءَ شھدربرجاہ ءِ اڈ بیگ ءِ منارینوکیں بِل تیزی ءَ گوں منارینگ بوت۔ اے دیمروئی ءَ پریسکارانی نیام ءَ ھاسیں ترس ودی کُتگ، کہ آ بلوچ پارلیمنٹرینزانی وتی مردمانی مپادانی پھازگ ءِ بودیشت ءِ سر ءَ جُست چست کنگ ءَ اَنت، پرچہ کہ سرزائری ءَ آ بلوچستان ءِ مڈیاں پنجاب ءَ شھدربرجاھانی اڈ کنگ ءِ ھاتر ءَ کارمرز کنگ ءَ داشت کُت نہ کُتگ اِش۔

زانگ بہ بیت پارلیمنٹ ءِ بلوچ باسک نی مشکلیں جیڑھے ءِ دیمپان اَنت پرچاکہ آیاں نی بلوچستان ءِ مھلوک ءِ ھک ءُ گھبودی ءِ پھریزگ ءِ واستا وتی سرجمیں زور ءَ گوں اوشتگ لوٹ ایت ھمے سبب ءَ آ گوست ءَ گیشتر پارلیمنٹ ءِ بھر بیتگ اَنت-

ابید دگہ راستگیں دلیل ءَ لاھور ءَ گوادر ءِ نام ءَ یک یونیورسٹی ءِ دیم ءَ ارگ ءُ بلوچ راج ءِ نیمگ ءَ سما کنگ بیتگیں سماہ ءَ ڈالچار کنگ ءَ نادلگوش کنگ ءُ وت ءَ بے ترانگی ءَ گیش دوری ودی کتگ – اے دمگانء میان ءَ دیمروئی ءُ وھد ءِ ھمراھی ءَ تپاوت ءِ یک تچکیں یاداشتی ءَ کنت چریشی ءَ بلوچستان ءِ مھلوک اے مزنیں پریم ورک ءَ وتی جاہ ءَ چیدگی ءَ گیش زانتکار بیت اِنت-

بلوچستان ءِ دمگ چہ آواران ءَ پاکستانی پوج ءَ یک مردمے دزگیر کتگ ءُ ناشناسیں زنداناں برتگ-

آوار جنگ بیتگیں مردم ءِ پجار جنگی خان ء جان مھمد جھمنند تیرتیج آواران ءِ نام ءَ زانگ بیتگ –

دمگی مردمانی رد ءَ آوار جنگ بیتگیں مردم پوج ءَ آواران ءِ دمگ تیرتیج سورھی بند ءَ دزگیر کتگ ءُ گون وت برتگ-

زانگ بہ بیت بلوچستان ءَ مردمانی آوار جنگ ءُ بیگواہ کنگ ءِ درچ یکشل ءَ برجاہ اَنت ءُ گوستگیں روچ ءَ بلوچ نیشنل مومنٹ ءِ شنگاری تک پانک ءَ جولائی ماہ ءِ رپورٹ ءَ پنجاہ ءُ ھپت مردمانی بیگواھی ءُ ھپت مردمانی کُشگ ءُ چگل دیگ ءِ ھال شنگ کتگ اَنت-

پانک ءِ رد ءَ جولائی ءِ ماہ ءَ جتا جتائیں ھنداں بیست ءُ دو مردم بیگواہ کنگ ءَ پد لٹ ءُ کٹ ءُ ژند ءُ پندی جاوراں یل کنگ بیتگ اَنت-

بلوچستان ءَ سیاسی ءُ چاگردی گلانی گوشگ اِنت پاکستانی پوج ءَ بلوچ ورنایانی بیگواہ کنگ ءِ درچانی توک ءَ ترندی آوارتگ ءُ ھمک روچ ورنا بیگواہ ءُ کشگ بوگ ءَ اَنت-

روکپتی بلوچستان ءِ دمگ زاھدان ءَ گوستگیں روچ ءَ ایرانی ادارہ مسکونی ءَ بازیں لوگ ڈروھینتگ ءُ دور داتگ اَنت-

اھوالانی رد ءَ زاھدان ءِ ھند جھاد ءَ گوستگیں روچ ءَ لس مھلوک ءِ لوگ ایرانی پولیس ءُ زمینانی گر ءُ دار کنوکیں فاؤنڈیشن ’مسکونی ‘ ءَ لوگ ڈوزر کتگ ءُ دور داتگ اَنت-

زمینانی گر ءُ دار کنوکانی گوشگ اِنت اے مردم اد ءَ زمینانی زورگری ءِ ھاتر ءَ نشتگ اَنت ءُ اے مردماں زمین دستیگ کتگ اَنت-

لس مھلوک ءِ گوشگ اِنت اے مردم اد ءَ بازیں وھداں چہ نندوک اَنت ءُ آیانی بازیں وھد بنت اِنت کہ اے ھند ءُ جاھاں جھمنند اَنت-

زانگ بہ بیت زاھدان ءَ ھوار روکپتی بلوچستان ءِ دگہ ھند ءُ جاھاں ھم اے دابیں کسہ گوست ءَ پیش اتکگ اَنت کہ ایشانی توک ءَ چھبار ھم ھوار اِنت –

سربوتگیں ھالانی رِد ءَ کیچ ءِ دمگ بالگتر ءَ بمب تراکے ءَ ھپت مردم مُرتگ انت وھدیکہ آواران ءِ دمگ مشکے ءَ ناشناسیں سلاہ بندیں مردماں گِسے ءَ پُترتگ ءُ پت گوں ھمراھے چُک ءَ تیرباران کُتگ ءُ کشتگ انت –

گیشیں ھالانی رِد ءَ کیچ دمگ بالگتر ءَ ناشناسیں مردماں دگ ءِ سر ءَ تراکناکیں شورہ کل کُتگ ءُ گاڑی ءِ نشانگ کُتگ چریشی ءَ ھپت مردم مرتگ انت –

پولیس ءِ رِد ءَ دوشمبے ءِ روچ ءَ بمب تراک گاڑی ءِ سر ءَ کنگ بوتگ گاڑی ءَ سواریں ھپت مردم ھما دمان ءَ مرتگ انت –

آھانی پجار اسحاق ء یعقوب جھمنند نلی بازار، ابراہیم ء بدل جھمنند نلی بازار، نظام دیدار ء واجداد جھمنند نلی بازار، فدا حسین ء مومن جھمنند نلی بازار، سرفراز ء بنڈو جھمنند نلی بازار، سفر خان ء حیدر جھمنند نلی بازار قاسم جھمنند پنجگور ناماں چہ بوتگ انت –

اے مردم نزیکیں میتگے ءَ آروسے ءَ شُتگ بوتگ انت کہ واتر آیگ ءَ بوتگ انت چاکر بازار ءِ نزیک ءَ نشانگ کنگ بوتگ انت –

دومی نیمگ ءَ مشکے ءَ بوتگیں تیرگواری ءِ وئیل جکی ءَ بوتگ – تیرگواری ءَ بیران بوتگیں مردمانی پجار مدد علی ء شفیع محمد ءُ آئی ءِ پت شفیع محمد ء نندو محمد حسنی ءِ ناماں چہ بوتگ انت وھدیکہ تیرگواری ءَ عبیداللہ ء مدد علی زدگ بوتگ –

لیویز ءِ گوشگ انت کہ سلاہ بندیں مردماں گِس ءَ اتکگ ءُ تیرگواری کتگ وھدیکہ لیویز ءَ زدگ ءُ بیران بوتگیں مردم آر ایچ سی نادراھجاہ مشکے ءَ سرکتگ انت ءُ اودا اژدری چار ءُ ٹپاس ءَ پد کھول ءِ دست ءَ دیگ بوتگ انت –

سربوتگیں ھالانی رِد ءَ کراچی ءِ دمگ لیاری ءَ سرھوائی تیرگواری ءَ ورنایے بیران بوتگ، دومی نیمگ ءَ کیچ ءَ ناشناسیں مردمانی تیرگواری ءَ کراچی ءِ جھمنندے زدگ بوتگ وھدیکہ ھب ءَ گونی ءِ تہ ءَ بندیں مردمی جونے دست کپتگ –

گیشیں ھالانی رِد ءَ لیاری ءَ دوشی شپ لیاری ءِ دمگ بانکڑا چار راہ ءِ نزیک ءَ آروسے ءِ سر ءَ سرھوائی تیرگواری ءَ دھمی تبک ءِ نودربرے بیران بوتگ –

بیران بوتگیں نودربرے پجار شانزدہ سالی زاہد ء اسحاق بلوچ ءِ نام ءَ چہ بوتگ –

پولیس ءِ رِد ءَ بیران بوتگیں ورنا ءَ ھنوں دھمی تبک ءِ چکاس داتگ بوتگ، وئیل چو اے وڈ دیم ءَ اتکگ کہ ورنایے گس ءِ نزیک ءَ آروس ءِ بوگ ءَ بوتگ وھدیکہ زاھد وتی گس ءَ کمے دور رحمانی مسیت ءِ گور ءَ اوشتوک بوتگ کہ آروس ءِ سر ءَ یک مردمے ءَ سرھوائی تیرجتگ، کہ یک تیرے زاھد ءِ دلبند ءَ لگ اِتگ کہ ھما دمان ءَ بیران بوتگ –

پولیس ءِ رِد ءَ کھول ءِ مردم اے چیز ءَ سرپد انت کہ تیرگواری کیا کتگ ھمے واست ءَ آیاں کانودی کاروائی نہ کتگ – پولیس اے درگت ءَ پٹ ءُ پول کنگ ءَ انت –

دومی نیمگ ءَ کیچ ءِ بنجاھی شھر تربت ءَ ناشناسیں مردمانی یک مردمے زدگ بوتگ-

تیرگواری وئیل سنگانی سر ءَ بوتگ کہ چریشی ءَ کراچی ءِ جھمنندے زدگ بوتگ –

پولیس ءِ رِد ءَ ناشناسیں سلاھبندیں مردماں سنگانی سر ءَ تیرگواری کتگ ءُ کراچی ءِ جھمنند سفیان زدگ کتگ – زدگ بوتگیں مردم ھما دمان ٹیچنگ نادراھجاہ ءَ برگ بوتگ ءُ اے درگت پولیس گیشیں پٹ ءُ پول کنگ ءَ انت –

چہ بلوچستان ءِ باپاری شھر ھب ءَ ھمے ھال آیگ انت کہ گونی ءَ بندیں مردمی جونے دست کپتگ –

جون ساکران روڈ گلیکسی ٹاؤن ءَ مری چار راھے نزیک ءَ دست کپتگ کہ آ گونی ءِ تہ ءَ بند بوتگ – پولیس ءَ جون دست گپتگ ءُ ھب ءِ نادراھجاہ ءَ سرکتگ –

ایدھی ءِ کمکار عدنان بلوچ ءِ رِد ءَ جون ءِ دیم پھک ژانگول انت ءُ لٹ کٹ کنگ بوتگ ءُ جون ءَ کساس چار یا پنچ روچ بیت – پولیس گیشیں پٹ پول کنگ ءَ انت –