TBP Balochi

بولان ءَ بازیں ھئور ءُ ھارانی سوب ءَ پنجرہ پُھل ءِ دومی راہ ھار ءَ بُرتگ – واکدار ءُ این ایچ اے ءَ دومی راہ پہ کسانیں گاڑیانی ھاتر ءَ جوڑ کتگ بوتگ –

گیشیں ھالانی رِد گوستگیں شپ ءَ بازیں ھئور ءُ ھارانی آیگ ءِ سوب ءَ بولان شھدگ این اے 65 ءِ گوستگیں سال ءِ ھار ءَ پُرشگ ءَ پد آئی ءِ ادارکی گوزگی راہ ءِ جوڑ کنگ بوتگ کہ وت یک شمبے ءِ روچ ءَ سرجم کنگ بوتگ اے ھم ھار ءَ بُرتگ –

اے سی ڈھاڈر فھد شاہ راشدی ءِ رِد ءَ دمگی واکداراں بولان ءَ پہ کمکی ٹیمانی ھاتر ءَ گوزگ ءِ راہ جوڈ کتگ کہ اے وھدی کسانی گاڑی آئی ءِ سر ءَ گوزگ ءَ بوتگ انت – وھدیکہ دومی مزنیں مال کش ایں گاڑہ پنجرہ پُھل ھِ گوازینگ بنت –

آئی ءَ گوشتگ کہ پنس اِتگیں مزن ءُ کسانیں درسیں گاڑی گوازینگ بنت ءُ پدا پُرشتگیں بھر ھڈ کنگ بیت –

وھدیکہ بی این پی مینگل ءِ باسک بلوچستان اسمبلی ءِ ثنا بلوچ ءِ رِد ءَ پھل ھار ءَ بُرتگ ءُ تنی وھدی شر کنگ نہ بوتگ ھزارانی کچ زھگ ءُ زالبول، کماش ءُ ورنا پنس اِتگ انت – مردم کمک کنگ بہ بنت –

سر بیتگین ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیرین ادارھانی کارندھان سنی رھشونے آوار جنگ ءَ پد بیگواہ کرتگ-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھاں سنی رھشون مولوی عبدالعزیز عمرزئی چہ زاھدان ءَ آوار جتگ ءُ برتگ-

اھوالانی رد ءَ آئی ءِ آوار جنگ ءَ پد آئی ءِ درگت ءَ دگہ اھوال دیم ءَ نیتکگ اَنت ءُ نانکہ چیریں ادارھاں آئی ءِ بارو ءَ دگہ گپ دیم ءَ پدر کتگ اَنت-

اھولانی رد ءَ عبدالعزیز روکپتی بلوچستان ءِ بنجاھی شھر زاھدان ءَ دارلعلوم مکی ءِ نیکراھی استادے بیتگ-

زانگ بہ بیت روکپتی بلوچستان ءَ بندوکیں سنی ءِ رھشون ءُ باسک گرگ ءُ بندیگ کنگ بیتگ اَنت ءُ کہ ایشانی توک ءَ عبدالمجید مراد زئی، مولوی عبدالحمید، مولوی رضا رخشانی، مولوی عبدالرؤف رخشانی ءُ مولوی امان اللہ سعدی ءَ ھوار دگہ رھشون ھم گرگ ءُ بندیگ کنگ بیتگ اَنت –

روکپتی بلوچستان ءِ دمگ سراوان ءَ ناشناسیں سلاہ بندین مردمانی تیرگواری ءَ پولیس آپیسر بیران ءُ آئی ءِ لوگ بانک زدگ بیتگ-

گیشیں ھالانی رد ءَ سراوان ناھوک چار راہ ءَ سلاہ بندیں مردماں تیرگواری کنان ءَ پولیس آپیسر علیرضا شھرکی کُشتگ ءُ آئی ءِ لوگ بانک زدگ کتگ-

وئیل مروچی پیش اتکگ کہ علیرضا شھرکی ءِ گاڑی ءِ سر ءَ ناشناسیں مردماں تیرگواری کرتگ ءُ چریشی ءَ آ ھما جاہ ءَ بیران بیتگ ءُ آئی ءِ لوگ بانک سک ءَ ٹپیگ کنگ بیتگ-

وئیل ءَ پد آئی ءِ لاش ءُ زدگ بیتگیں لوگ بانک نادراہ جاہ ءَ سر کنگ بیتگ اَنت-

علیرضا شھرکی سراوان پولیس ءِ سروک اِنت ءُ اھوالانی رد ءَ آئی ءِ سر ءَ ’بھتام بیتگ کہ آئی ءَ گوستگیں زھرشانیانی وھد ءَ مردم گپتگ ءُ زندانی کتگ اَنت‘-

اھوالانی رد ءَ آئی ءِ سر ءَ بھتام بیتگ کہ ’ آئی ءَ زندانیانی گون ءَ جنسی زوراکی ھم کتگ بیتگ اَنت ‘- وئیل ءِ بارو ءَ دگہ سرپدی نہ بیتگ اَنت ءُ نانکہ کوشکارانی درگت ءَ دگہ اھوال دیم ءَ اتکگ اَنت-

پھرہ ’ایرانشھر‘ ءَ یک تیل کشیں گاڑی یے وئیل ءِ آماچ بیتگ ءُ چریشی ءَ گاڑی آس ءَ گپتگ ءُ گاڑی ءِ ڈرائیور ستکگ –

گیشیں ھالانی رد ءَ روکپتی بلوچستان ءِ دمگ ایرانشھر ءَ یک تیل کشیں گاڑی یے وئیل ءِ آماچ بیتگ ءُ گاڑی ءَ آس کپتگ ءُ گاڑی ءِ ڈرائیور ستکگ ءُ بیران بیتگ-

بیران بیتگیں مردم ءِ پجار ھمزہ کلندر زئی ءِ نام ءَ زانگ بیتگ-

ھالانی رد ءَ وئیل پھزدارانی بنجل ءَ کمے دوری ءَ پیش اتکگ بلے گاڑی ءِ کپگ ءَ پد انتزامیہ ءِ نیاھگ ءُ مرد ءِ سوچگ اجکہ کنت-

روکپتی بلوچستان ءَ تیل کشین گاڑی یکشل ءَ وئیلانی آماچ بیگ ءُ اود ءَ گیشتر مردم ھمے داب ءَ سوچگ ءُ بیران بوگ ءَ اَنت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بلوچ لبریشن آرمی ءِ سرمچاراں گوستگیں شپ ءَ ھُزدار شھر ءَ جھالاوان کمپلیکس ءِ ھند ءَ زورگریں پاکستانی پوج ءُ چیریں ادارھانی جوڑ کتگیں ڈیتھ اسکواڈ کارندہ اسلم محمد زئی مینگل دستی بمب اُرش ءَ نشانگ کتگ چریشی ءَ آ ٹپی بیتگ-

جیئند بلوچ ءَ گْوشتگ کہ اسلم محمد زئی مینگل ءِ نائب ایں پُرکار بیتگ ءُ ھُزدار شھر کش گوراں بلوچاں نشانگ کنگ ءَ تچکی ءَ ھوار بیتگ – وھدے کہ اے کارندہ دکاندار دروشم ءَ وت ءَ چیر دیگ ءَ بیتگ-

جارکش ءَ دیمتر ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت- ما بلوچ راج ءَ چہ دزبندی کن ایں کہ دُژمن ءِ چاریگاں چہ گستا بہ بیت، آؤکیں وھداں مئے اُرش تُرندتر بنت –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءِ کارمندے ءَ کسانیں زھگے ءِ گوم ءَ جنسی زوراکی کنگ ءِ جھد کتگ –

دمگی مردماں وئیل ءِ بگیری ءَ زھرشانی کنان ءَ سی پیک شھدگ بند کُتگ ءُ نندانک برجاہ انت –

زانگ بہ بیت اے اولی رند نہ انت چدوپیسر ھم بلوچستان ءِ تہ ءَ اے دابیں وئیل بوتگ انت –

چدوپیسر بیست ءُ یک اپریل سال دوھزار ءُ بیست ءُ یک ءَ بلوچستان ءِ دمگ کیچ ءَ پیرا ملٹری فورس ایف سی ءِ کارمندے ءَ کسانیں زھگ امیر مراد جنسی زوراکی ءِ نشانگ کُتگ ءُ آ بے ھوشی جاوراں چگل داتگ ات –

دمگی مردماں وئیل ءِ بگیری ءَ زھرشانی کنان ءَ ھوشاپ شھدگ بند کتگ ات –

زانگ بہ بیت بلوچستان ءِ تہ ءَ ننسانی ھکانی گل ءُ بلوچ راجدوست مدامی بلوچستان ءِ ایف سی، پیراملٹری فورس ءِ سر ءَ انسانی ھکانی لگتمالی ءِ الزام ءَ جنگ انت –

اشی ءَ ابید پاکستانی پوج ءِ سر ءَ مردمانی زورانسری آوار جنی ءُ آھانی کوش الزام ھم جنگ بوتگ ننت –