مزاھمت زندگی ءِ اولی پدانک اِنت
نبشتہ کار: باھل بلوچ
دی بلوچستان پوسٹ
بلوچ ءِ جنگ ءَ منی کُلیں راج ءَ سرپد بیگی اِنت ما یک پُرگنجیں زمینے ءِ واھُندیں مئے زمین ھُدا ءِ داتگیں دادے کہ ھُدا ءَ مارا بکشاتگ اے پاک ءُ پلگاریں سرڈگار بلوچ ءِ مڈی اِنت مارا وت ءَ یک شیرکنیں زُبانے ھست مارا وت ءَ دو ءُ ربیدگ ھست مارا ایشانی کدر زانگی اَنت ۔
ما انچیں مُلکے ءِ ایر دستیں کہ آ برٹش ءُ انگریز ءِ جوڑ کُرتگیں یک ملکے تنیگا آئی ءَ وت ءَ ھاسیں دو ءُ ربیدگ ءِ نیست ناکہ زات ءُ زُبان ءِ ھست ءِ آ وتگڑی پاکستان ءِ نام ءَ چَہ زانگ بیت اِنت ۔
مارا اے گپ ءَ پوہ بیگی اِنت ما چَہ “ اے وتگڑیں ملک ءَ چے پیسر یک آجوئیں ریاستے بوتگیں بلے بہ چار اِت بے زمیریں بے ایمانیں ءُ زَر ھریدیں سردار ءُ میراں مئے پاکیں ءُ پُرگنجیں زمین پاکستان ءَ گوں آوار گِپتگ ءُ مارا پاکستان ءِ گُلام جوڑ کُرتگ“ 1948 بگر دانکہ مروچی ما پاکستان پادانی چیر ءِ گُلامی ءِ زندگی ءَ گواینگ اِنت ۔
مروچی سردار ءُ سرکار ھردوک بلوچ ءِ دُژمن جوڑ بوتگ اَنت نو مارا وتی زمین ءِ ھاتر ءَ سر کُربان کنگی اَنت وتی نوکیں پدریچ رَکینگی اِنت وتی ھاک ءُ زمین رَکینگی اَنت بلوچ مات ءُ گُھارانی ننگ ءُ ناموس رَکینگی اَنت بلوچ ءِ زندگی ءِ رَکینگی اِنت ۔
اگاں ترا وتی زمین ءُ ننگ ءِ گَم پِر اِنت گڑا بیا اِت بلوچ ءِ جنگ ءَ گون ما آوار بہ بیت اے جنگ ءِ دیم ءَ بَرگ ءِ ھاتر ءَ کوھاں در کپگی اِنت مروچی ھما بلوچ ورناہ ءُ کماش زالبول اے جنگ ءِ بھر بوتگ اَنت آھاں شپ ءُ روچ نہ چار اتگ ناکہ سرد ءُ گرم اِش چار اتگ گُژن ءُ تُن ءَ چَہ ھلاوشیں سَرانی یک بلائیِں دراجیں لَڑے ھست اِنت کہ آ پہ دژمن ءَ تیر سوھان کنگ اَنت مَرگ ءُ زند ءِ سودہ اِش ما سَر ءَ کپن بند اَنت ۔
ھمے رھنیں زمین ءِ آجوئی ءَ ھاک ءِ پَد جنگ ءَ مروچی ھزارانی کَچ ءَ پیر ءُ ورناہ شھید بوتگ اَنت ءُ وتی ایشیں سر اِش کُربان کُرتگ اَنت تُن ءُ گُژن ءِ اوپار کُرتگ آرامیں زند اِش نہ دیستگ ۔
نو ایدگہ لَس مھلوک بلوچ راج ءِ ھستیں جنگ ءَ را آ کُجام رنگ ءُ درُشم ءَ وت ءَ ھوار گپت کنت ءُ یک جاگہ بوت کُرت کنت آ ھم ا ے جنگ ءَ وتی بھر سرپد بہ بنت ءُ دانکہ اے ناپاکیں ریاست ءِ وجود ءِ دُگنیا ءُ جھان ءَ گار بہ بیت تاکہ دُگنیا ءِ تہ ءَ کُجام ایردست ءُ مظلومیں راج ءِ ھستں آئی ءِ جان رکّیت بہ کنت اے ناپاکیں دژمن بلوچ ءَ ھچ کنگ نیل اِیت نہ کار ءُ بار ءَ نکہ دیگہ چیز ءِ مئے واست تھنا جنگ پشکپتگ مئے لوگ ءُ گںسانی تہ ءَ دور کنت مئے مات ءُ گُھاراں کم شرپ کنت مئے براتاں بارت زندانی کنت کُش اِیت دور دنت-
مئے گُڈی کِشک مزاھمتیں پشکپتگ “مزاھمت کن ءِ تی ساہ ءُ مال ءُ مڈی رَکیت کُرت کن اَنت ، تی ننگ ءُ ناموس ،تی اوست ءُ توکل تی مات ءُ گھار رَک اَنت، بگِر ءِ جنگ ءَ ھچ نہ بیت نو ورناھاں وتی زندگی ءِ واھشت ءُ وش نودیں زندگی ءُ نرمیں بستراں وئیل بہ کن اَنت ءُ گلامیں زندگی یل کنگی اَنت بیا اِیت وتی براتانی ھمکوپگ بہ بیت ءُ اے جھد ءَ گوں ما آوار بہ بیت ۔
بلوچ ِچاریگیں دُژمن ءَ ءُ لگوریں سرکار ءِ داشتگیں چانوگ واراں نہ تحریک ماپ کنت نکہ بلوچ راج ایشاں ماپ کنت، راجی لگوراں ھما ابرت ناکیں مَرگ نسیب ءَ بیت تاکہ ایشانی نسل تا کیامت یاد بہ کن اَنت بلوچ یک زندگیں راج ءِ راج ھچبر ھلاس نہ بیت ۔
پاکستان ءَ وتی بام داتگ “ مئے بلوچستان ءِ آجوئی بام ءَ نو ٹِک داتگ بلوچ ءِ آجوئی دور نہ اِنت ھمت کن اِت بیلاں بلوچ ءِ جنگ ءَ وتی بھر ءُ بَر ءَ وتی کوپکانی میار بہ کن اِت ءُ راجی جنگولانی باراں ھمے سبوک تر بہ کن اِت ، زمین مئے شمئے ایمان اِنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
