TBP Balochi

زورانسری آوار جنگ بوتگیں آصف ءُ رشید بلوچ ءِ گھار سائرہ بلوچ ءِ گوشگ انت کہ منی گھاراں ھوار کھول ءِ ایمدگہ مردم ناشناسیں مردمانی نیمگ ءَ ترسینگ بوگ ءَ انت، منی گھار وانگ ءِ یل کنگ ءَ لاچار کنگ بوگ ءَ انت – دمگی واکدار مئے پھریز ءَ بہ کن انت –

بلوچستان ءِ دمگ ھزدار ءِ جھمنند سائرہ بلوچ ءَ پنچ سال انت کہ وتی بیگواھیں برات آصف ءُ وارس رشید بلوچ ءِ یل کنائینگے ھاتر ءَ توار چست کنگ ءَ انت – آئی ءَ شال ءُ اسلام آباد ءَ ھم زھرشانیاں بھر زرتگ وھدیکہ ھمے میان ءَ سائرہ بلوچ بیگواھیں مردمانی ھاتر ءَ اڈ دیگ بوتگیں کمیشن ءُ آمیدگس ءَ ھم پیش بوتگ –

سائرہ بلوچ ءَ وتی درشان ءِ داتگ ءُ گوشتگ کہ گوستگیں لھتے روچ بیت کہ ھزدار ءَ منی گھار ءُ کھول ءِ ایندگہ مردم ترسینگ بوگ ءَ انت – آئی گوشتگ کہ سیاہ کانچیں گاڑی ءُ برے پرپٹ سوار منی گھارانی رندگیری ءَ کن انت کدی بیھاری کاگد چگل دئینت – منی گھار لاچار کنگ بوگ ءَ ننت کہ وتی وانگ ءَ یل بہ دئینت –

سائرہ بلوچ ءِ گوشگ ات کہ اشی ءَ ابید مناں ھوار ایندگہ مردمانی سر ءَ پون کنگ ءُ بیھار دیگ بوگ ءَ انت –

آئی ءَ گوشتگ کہ گوستگیں پنچ سال انت کہ منی برات درکانودی زورانسری آوار جنگ ءُ بیگواہ کنگ بوتگ انت – مئے دوستیگیں مردمانی یل کنگ ءِ بدل مئے کھول گنتر دلسیاہ کنگ بوگ ءَ انت – مارا وتی دوستیگیں مردمانی یل کنائینگے پُرایمنیں جھد کنگ ءِ بدل ءَ ترسینگے جھد بوگ ءَ انت –

سائرہ بلوچ ءَ گوشتگ کہ دمگی واکدار، ڈپٹی کمشنر، پولیس ءُ ایندگہ واکداراں گوں دزبندی انت کہ آ مئے پھریز ءَ بہ کن انت سر بازار وانگجاہ ٹیوشن سنٹر ءَ ڈن جنکانی ترسینوکانی بگیری ءَ گامگیج بہ زور انت -.

آئی ءَ چہ سیاسی ءُ چاگردی باسکاں ھم وٹ کتگ ءُ گوشتگ کہ آ ازیت آماچیں کھول ءِ گوم ءَ بؤکیں زوراکیانی بگیری ءَ توار چست بہ کن انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی افیشل ٹیلیگرام چینل “آشوب” ءَ شنگ کرتگیں درشانے ءِ تہ ءَ پنجگور ءُ جھاؤ ءَ بوتگیں اُرشانی زمہ واری منّ اِتگ ءُ گوشتگ کہ اے اُرشاں پوج ءَ مزنیں کچے ءَ جانی ءُ مالی تاوان رستگ –

جارکش میجر گوھرام بلوچ ءِ رِد ءَ بی ایل ایف ءِ سرمچاراں شش اگست ءِ بیگاھے ادار ھشت ءَ آواران دمگ جھاؤ کوھڑو ءَ برجاھیں پاکستانی آرمی ءِ بنجاھی بنجل ءِ سر ءَ سَے راکٹ گولہ آس داتگ ءُ وتکاریں سلاھاں گوں اُرش کُتگ – راکٹ گولہ بنجل ءِ تہ ءَ کپتگ انت کہ چریشی ءَ دو کارمند ءُ بازینے زدگ بوتگ انت – اُرش ءِ میان ءَ زورگیریں پوج ءِ یک ڈرون کیمرہ ءِ ھم بال بوتگ کہ سرمچاراں نشانگ کتگ ءُ چگل داتگ –

جارکش ءِ رِد ءَ ھمے روچ ءَ سرمچاراں پنجگور لشکران کئور ءَ برجاھیں پوجی پانگس ءِ سر ءَ وتکار ءُ مزنیں سلاھاں گوں اُرش کتگ ءُ اُرش ءَ یک کارمندے مُرتگ ءُ یکے زدگ بوتگ –

آئی ءَ گوشتگ کہ ما اے گپ ءَ پدر کن ایں کہ بلوچستان ءِ تہ ءَ ھچ وڈیں شوربندی بلوچ راج ءِ مرزی ءُ منشا ابید منگ نہ بنت – پاکستان ءُ چین ءَ ھوار درسیں درملکی سرمایہ کاراں مکن کنیں کہ آ جنگ زدگین بلوچستان ءِ تہ ءَ سرمایہ مہ کن انت اگاں ناں وتی درسیں زمہ وار وت انت –

گڈسر ءَ آئی ءَ گوشتگ کہ بی ایل ایف اے اُرشانی زمہ واری ءَ منیت ءُ اے اُرش بلوچستان ءِ آجوئی ءَ تاں برجاہ مان انت –

روکپتی بلوچستان ءِ دمگ ھاش ءِ جھمنندیں مردمے ماں ایران ءِ اُستان کرمان ءَ پاھو دیگ بیتگ-

گیشیں اھوالانی رد ءَ مروچی ماں ایران ءِ اُستان کرمان ءَ سی ءُ ھشت سالی ئیں عبدالغفار ھاشمزئی ء غلام نبی جھمنند نوک آباد تپتان ھاش ءِ ایرانی آمیدگس ءِ ھکم ءَ پاھو دیگ بیتگ –

اھوالانی رد ءَ عبدالغفار دو سال ءَ پیش ماں اُستان کرمان ءَ ماھان در ءِ چوکی ءِ سر ءَ نشہ باپاری ءِ بھتام ءَ دزگیر کنگ بیتگ ءُ پد ءَ آ ایرانی انقلابی آمیدگس ءَ پاھو داتگ-

اھوالانی رد ءَ عبدالغفار شمبے ءِ روچ ءَ پاھو دیگ ءَ جتا یک کوٹی ءَ برگ بیتگ ءُ پد ءَ مروچی آ پاھو دیگ بیتگ –

اھوالانی رد ءَ عبدالغفار کھول گوستگیں روچ ءَ آ شتگ بیتگ ءُ آئی ءِ گڈی گندوک اش کتگ ءُ رکستی بیتگ-

چہ روکپتی بلوچستان ءَ اے اولی وئیل ءُ پاھو نہ اِنت کہ ماتانی دل ءِ جگر سندگ بیگ ءَ اَنت اے دابیں ھزارانی کساس ءَ مات ءُ سمبھتگیں بانورانی دیم جنوزام کنگ بیتگ اَنت-

ایران ءِ پاھو نامھانی سر ءَ میان اُستمانی انسانی ھکانی گل ایران ءِ سر ءَ یکشل ءَ ایراد گرگ ءَ اَنت ءُ اے پاھوانی دارگ ءُ بندیگیں مردماں انساپ ءِ ٹرائل کنگ ءِ دزبندی ءَ کنگ ءَ اَنت-

بلوچ نودربر رھشون ڈاکٹر ماہ رنگ بلوچ ءَ چاگردی تندجاہ ٹوئٹر ءَ گوشتگ تربت ءَ ریاستی ملایاں نیکراھی ءِ نام ءَ بلوچ ورنا ءِ کوش بلوچ سیکولر چاگرد ءَ یک نوکیں موڑے ئے بندات اِنت – بلے ریاست مذھبی ڈسکورس ءِ نوک نہ اِنت بلکیں بازیں سالاں چہ برجاہ اِنت ءُ چہ گوست ءَ بلوچ سیاسی زانت ءِ ھلاس کنگ ءَ ریاست ءَ ملا ڈیٹھ اسکواڈ ءِ چیردستی ءَ ڈسکورس رودینتگ-

ماہ رنگ بلوچ ءَ دیمتر ءَ گوشتگ کہ ڈیتھ اسکواڈ ءِ ھمے ٹولی ءَ آواران ءَ یک ذگر ھانہ ءِ سر ءَ اُرش کتگ جھاؤ، مشکے، کولواہ، گورکوپ، بالگتر ءُ کش ءُ گوری دمگاں بازیں جاھاں ریاست ءَ ھمے نیکراھی ڈسکورس ءِ بنھشت ایر کنگ ءِ پژدر ءَ بازیں سیاسی ٹک لس بلوچانی سر ءَ سلاہ بندیں اُرش کتگ اَنت ءُ ذگری ءُ نمازی ءِ نام ءِ سر ءَ بلوچ چاگرد ءَ یک جنگے ودی کنگ ءِ جھد کتگ ءُ تربت ءَ بیتگین وئیل ھمے ریاستی نیکراھی ڈسکورس ءِ درچ اِنت-

آئی ءُ گوشتگ ریاست ھمے نیکراھی ڈسکورس ءِ پژدر ءَ نا ایوک ءَ مکران ءَ بلکیں سرجمیں بلوچستان ءَ چہ پنجاپ ءَ اتکگیں تبلیغیاں تالان کنگ اِنت ءُ اے پنجاپ ءَ اتکگیں ملا ملٹری گروپ یک ترندیں رنگے ءَ بلوچستان ءَ مدرساں وتی تند ءَ دور دیان اَنت-

ماہ رنگ بلوچ ءَ گوشتگ کہ اے نوکیں کالونیل گامگیج سرپد المی ءَ سرپد بوگی اِنت ءُ ایشی ءِ دارگ ءِ ھاتر ءَ سرجمیں بلوچ سیاسی زوراں گھگیری ءِ رنگ ءَ بلوچ مھلوک میدان ءَ آرگ لوٹ ایت – بستار بلوچ سیاسی باسک اگاں ما اے ریاستی نیکراھی ڈسکورس ءِ سرپد بوگ ءَ دیر کت یا اے تالان بوگ ءِ وھد دات گڑا اے بلوچ سیاسی پھناتانی سر ءَ اُرشے بیت اِنت-

رنگینیں کَبرستان

نبشتہ کار : بِنتُل بلوچ

دی بلوچستان پوسٹ

مھر ءِ مِیتّگ مئے میتّگ یک کسانیں میتّگے اَت میتّگ ءِ زِرباری نیمگ ءَ کوہ اَت انت ءُ گوریچان ءَ مُلک ءُ ڈگار مئے میتّگ ءَ یک کسانیں وانگ جاھے ھم ھست ات کلاس یک ءَ داں ھشت ءَ وانگ مئے میتگ ءَ وانگ بوت دیمتر ءِ وانگ ءِ واستا مئے مردُم پُشتی بازار ءَ شُت انت، پہ پاد مئے واستا گنٹہ ءُ نِیم ءِ سپّر اَت ھودا کلاس یک ءَ دانکہ دہ ءَ وانگ ھست ات آ میتّگ ءِ دُرائیں چُک ءُ چوریگ وانگ ءَ گوں ھُب اَت انت بَلے مئے میتّگ ءِ گِیشتِریں مردُماں وانگ ءِ ھُب ءُ واھگ نسیت ات کمیں مردُم شُت وتی وانگ ءِ سرجم کَنگ ءَ پَشت کپتگیناں نہ وَنت پرچا کہ آ گریب اَت انت پہ گریبیں مردُماں وانگ دردے سرا اَت ءُ گران اَت ، مئے میتّگ ءِ مردُماں وتی پِت ءُ پیروکی مُلک ءُ ڈگاراں کار کُت ءَ لاپ شوھازتگ وانگ ءُ زانگ آیانی وس ءَ دَر اَت وھد پِر گوزان بوت چہ زِربار اَتک یک بَلائیں توپانے اے توپان ءَ میتّگانی میتّگ وتی وڑ ءَ پَتارت ءُ شُت، گوات ءَ شِک شِکے پِر اَت مئے پِیریناں گوشت سیاہ گواتے مئے مُلک ءُ ڈگار تاوان بار بوت انت دلوت مُرتاں گْونڈالیں مَچ کپتاں گَلہ ءِ یک ھوشَگے دست نہ کپت دُرستیناں نُکسان بوت، بَلے توپان ءِ آیگ ءَ پیسر ناکو ائیبتان ءَ پیشگوئی داتگ اَت کہ اے سال ءَ بلائیں ھُدائی توپانے کیت ھرکس وتی وتی تیاری ءَ بہ کنت، ناکو ائیبتان ءَ گُشتگ اَت کہ اے توپان چیزے سال پسرا ھم اَتکگ بلائیں تاوان وارتگ مردُماں ناکو ائیبتان ءِ لوگ کوہ ءِ بُن ءَ اَت انت زِربارے اَوّلی لوگ ناکو ائیبتان ءِ لوگ اَت ناکو ائیبتان ءَ وت ءَ اے ھم شُبینَگ بوتگ ءَ کہ ناکو ائیبتان اے رندیگیں توپان ءَ رکھت نہ کنت اے بَرے ناکو ءَ ھم توپان تاوان دَنت ءُ روت-

شپ اَت مھلوک ئے ھِچ توار ءُ بَرمش نیست اَت تھارونکی اَت شَپ ءِ پیمناکیں تُرس اَت دُنیا واب کَپتگ اَت باند ءِ ودارے ءَ،ناکو ائیبتان چہ واب ءَ جھسُرت کاشیں کُڈ ءَ چہ ڈن ءَ دراتک چارِتے کہ آزمان ءَ سیائیں شالے مانپوشتگ جمبر چوں لَھڑیں لوھگ ءَ جوش وراں انت ناکو ائیبتان دیم پہ پساں شُت کہ پَساں واڑ ءَ بند ات انت
گِروک ءَ شبم دات ءُ گَرانداں چوں بمبانی توار کُت ناکو ءَ اِشتاپ اِشتاپ ءَ پَس واڑ ءِ تہ ءَ کُت انت دیم پہ کُڈ ءَ دات کہ ھُودا ناکو ءِ چُک شَلّی ءُ میراث واب اَت انت چوں مہ بیت کہ شَلّی ءُ میراث دِلترک بہ بنت اے گرندانی توار ءَ ناکو ائیبتان ءِ کُڈ ءِ سَر بوگ ءَ پیسر ناکو ءِ کُڈ ءِ تیر پُروشت. وابیں شَلّی ءُ میراث سیائیں سیاہ گوات ءِ میار بوت انت، جمبراں گُوارگ بِندات کُت گوات پہ دیمے ءُ گِرندانی توار پہ دیمے نپس ءَ نپسی اَت میتّگ تباہ بوتگ اَت بس گِرندانی توار اَت جھان ھسَرتگ اَت تُرس اَت کوکار اَت، مئے میِتّگ مئے کَبرستان بوت۔ ھو ! کَبرستان بَلے رنگینیں کَبرستان، کہ اِدا شَلّی ءُ میراث کَل اَت انت اِدا باریں دِگہ چُنت کل بیت باریں اے رنگینیں کَبر پہ کئے ءَ نسیب ءَ بیت،باریں اے کَبرستان جاگہ کنت اگاں نہ کنت؟ چہ زِربار ءَ اتکَگیں ھما بَرمش انگت ءَ بَرمش ءَ انت ھما مِیتّگ ھما سیائیں سیاہ گوات ھما توار ھما رنگینیں ھما کبرستان، ما کِشتَگ اَت مُلک ءُ میراث رُس اتگ اَنت کَبر رنگیں مئے کمر ء رنگینیں کَبرستان شاری ءِ سُھرچکیں ھونانی بوہ ءَ کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچی زبان ءِ ندکار جمیل مھراب ءِ آزمانکانی کتاب “ھورکیں زندمان ” چہ ملا اسمائیل لبزانکی گل پُل آباد ءِ نیمگ ءَ چاپ ءُ شنگ بوتگ –

ھورکیں زندمان جمیل مھراب ءِ اولی آزمانکانی دپتر انت، کہ آئی ءِ سرجمی ءَ یکسد ءُ دوازدہ تاکدیم انت – کتاب ءِ سر تاک جواد واھگ ءَ ءُ آئی ءِ گالسنج ءُ تراشکار بیبگر الھی ایں کتاب انام رزا ءَ ھورتی ءَ گوں ونتگ ءُ پدا چہ ملا اسمائیل لبزانکی گل ءِ نیمگ ءَ چاپ ءُ شنگ کنگ بوتگ –

کتاب ءِ درگت ءَ اصغر بلوچ ءَ وتی ھیال درشان اِتگ ءُ گوشتگ کہ مروچی بلوچ یک انچیں جاورھالے ءَ دوچار اِنت کہ بلوچ راج ءِ لبزانک کالونیل اھد ءَ اِنت۔ ءُ جمیل مھراب ءِ آزمانک کالونیل اھد ءِ مانزمانی ءَ کن اَنت۔ اے ھمے اھد اِنت۔کہ زبان ءِ پھازگ ءِ جھد ءَ بگر داں بلوچ ءِ تب ءُ جیڑہ، جمیل ءِ آزمانکانی سرھال اَنت۔ اے ھمے باریگ اِنت ھمود ءَ کہ راجدپتر نویس، راجدپتر ءَ نبشتہ کت نہ کنت، اھوالکار ھستیں جاوراں نبشتہ کنگ ءَ مَکن کنگ بیت۔ راجی سیاست پہ لس مھلوک ءَ ھرام کنگ بیت۔ رسانکدر ءِ چم کور ءُ للک بُرگ بیت۔ راجی زبان ءُ ربیت لگتمال کنگ بنت، راج ءَ راجدپتری کوراسی ءِ نیمگ ءَ برگ ءِ ھر وڑیں پندل سازگ بنت۔ گڑا اے وڑیں جاورھالاں لبزانک دراھیں زمبلاں وتی بڈ ءَ زور ایت۔

آئی ءَ گوشتگ کہ ھمے رنگ ءَ جمیل ءِ آزمانک ءِ سرھال بلوچ راج ءِ ھستیں جاورھال اَنت۔ بلے اے ایوک ءَ سیاسی نارہ نہ انت، بلکیں آ آزمانک ءِ ازم ءِ ھیالداری ءَ اوں کنت۔ ھمے واستا آئی ءِ آزمانک وانوک ءَ وتی ھمراہ کن اَنت-

ھمے وڈ مجاہد زاھد ءَ کتاب ءِ سر ءَ وتی چمشانک داتگ ءُ گوشتگ کہ کسھی لبزانک ءِ دگنیا یک انچیں پُر لزتیں دگنیا یے کہ بنیادم ءَ ھزاراں کشک ءِ رندگ پرمائیت، ھزاراں میلانی سپر ءَ در کنت۔ مستریں وشی ایش اِنت کہ فکشن مردم ءَ آگھی ءَ واب گندگ پرمائیت، انچیں واب کہ چہ راستی ءَ راستِر ءُ مانادار تِر اَنت۔ من چہ فکشن ءَ دربرگ ءِ ھمراھی ءَ پہ تاھیر گرگ ءَ اوں وان انت۔ پد ءَ لھتے انچیں کسہ بنت کہ آیانی وانگ ءَ کہ مردم بِندات کنت گُڑا آ کسہ ءِ شیِرکینی ءُ ھما بے دروریں مارشت یک دمانے ءَ مردم ءَ اَچ کتاب ءَ دور بوگ ءَ نیل اَنت۔

آئی ءَ گوشتگ کہ بلے بژن کہ اگاں کسے چشیں تاھیر دئیں ساچشت، بلوچی لبزانک ءِ تہ ءَ شوھازگ ءِ جھد ءَ بہ کنت کہ پہ دمانے ءَ وت ءَ ملما کناں گڑا اد ءَ چُشیں ھاسیں ساچشت کم دست کپ ایت، بید ء چہ لھتیں مردمانی نبشتیگیناں۔ پرچاکہ مئے کر ءَ مردماں تھنا آزمانک ءُ گدار ءِ راھبند دربرتگ اَنت، پمیشکا بس کسہ آرگ ءَ اَنت، بلے فکشن ءِ ازم ءِ رد ءَ اینکدر جوان نہ اَنت۔ پد ءَ گپ کیت ءُ ھمود ءَ اوشت ایت کہ فکشن ءِ ساچگ ءِ واستا تھنا فکشن ناں، بلکیں ایشی ءِ ھمراھی ءَ فلسفہ، تبزانتی ءُ ایدگہ دراھیں پڑ ءَ وانگ ءُ وت ءَ تیار کنگی اِنت۔انچشکہ پالو کولو ءَ پہ ”دا الکیمسٹ“ (The Alchemist) ءِ نبیسگ ءِ واستا پُرّیں چاردہ ءَ سال ءَ ارب ءِ چاگرد ءِ درگت ءَ ونتگ، پٹ ءُ پول کُتگ،آیانی تب ءُ مارشتاں گوں وت ءَ دوچار کنائینتگ، نی آ یک گدارے ءِ نبشتہ کنگ ءَ سوبمند بیتگ۔ بلے مئے کر ءَ ھرکس کہ چہ واب ءَ جاہ جنت، نبشتہ ءَ بندات کنت، چُش نہ چار ایت کہ منی زانت ءُ کُتہ کاری ءِ کد چینچک اِنت، یا من اے درگت ءَ چینچو ونتگ ءُ ھوژیار آں، کہ ناگھی کسہ آئی ءَ مہ مرین ایت۔

مجاھد زاہد ءَ گوشتگ کہ بلے وھدیکہ گپ جمیل ءِ کسہ ساچی ءِ ھُنر ءَ سر بیت،تاں من گشاں جمیل بے ھد سوبمند بوتگ، آئی ءِ ساچشتاں من ءَ مدام تاھیر داتگ، مستریں سوب ایش اِنت کہ جمیل وانوکیں مردمے، باریں چونیں چونیں کتاب،چہ کجا کجا پٹ ایت ءُ وان ایت۔ جمیل فکشن ءِ ھمراھی ءَ ایدگہ دراھیں تکاں وان ایت ،آ توری فلسفہ بہ بیت، تبزانتی یا سیاست بہ بنت، یا لبزانک ءِ ایدگہ پِڑ، ھمے جھد ءُ وانگانی برورد اِنت کہ جمیل وتی کار ءَ سوبمند اِنت۔
اے کتاب آئی ءِ آزمانکانی اولی کتاب اِنت، من ءَ ایشانی وانگ بے کساس وش بوتگ، بلے ھرکسی وتی یک جتائیں تبے، ھرکس چیزاں وتی داب ءَ وان ایت ءُ چار ایت، نوں اے آزمانک ایوک ءَ جمیل ءِ نہ انت بلکیں دراھیں ھما مردمانی ئیگ انت کہ آ اے آزمانکانی دگنیا ءَ وتی نگاھاں شانک دے انت ءُ وتی دیدانک ءَ درنگاز کن انت –

روکپتی بلوچستان ءِ دمگ ایرانشھر ءَ یک ماھے ءَ پیش بیگواہ بیتگیں ورنا ءِ لاش دزکپتگ-

روکپتی بلوچستان ءَ سر بیتگیں اھوالانی رد ءَ لاش گوستگیں ھپتگ ءَ دزکپتگ ءُ گوستگیں روچ ءَ آئی ءِ کھول ءَ پجار کتگ-

اھوالانی رد ءَ لاش ءِ پجار سِی ءُ دو سالی ئیں داؤد ملکزئی ء مھمد علی جھنند سرباز ءُ ایرانشھر ءِ نام ءَ زانگ بیتگ-

داؤد کساس یک ماھے ءَ پیش بیگواہ بیتگ ءُ آئی ءِ لاش گوستگیں ھپتگ ءَ دزکپتگ ءُ لاش ءِ پجار مشکلیں رنگے ءَ کتگ بیتگ-

اھوالانی رد ءَ لاش ءَ تیرانی ٹپ ھم پر بیتگ اَنت ءُ لاش یک بندیں لوگے ءِ توک ءَ دزکپتگ –

زانگ بہ بیت روکپتی بلوچستان ءَ اے لھتیں وھدانی توک ءَ اود ءَ مردمانی بیگواہ بیگ یا لاشانی دزکپگ گیش ودان اَنت چِد ءُ پیسر گوستگیں ماہ ءَ ھم ایرانشھر ءَ یک مردمے ءِ لاش گوں ھمراھے گاڑی ءَ دزکپتگ کہ آ ناشناساں آوار جنگ ءُ تیر جنگ ءَ پد لاش چگل داتگ بیتگ-

روکپتی بلوچستان ءَ اے دابیں وئیلانی بارو ءَ یا ایشانی بیگواہ کنگ ءُ اے داب ءَ لاشانی دزکپگ تنی وھدی ھاسیں رنگے ءَ زانگ نہ بیتگ اَنت-

بلوچستان ءِ بنجاھی شھر شال ءَ بلوچ اکیڈمی ءِ شست ءُ پنچمی سالروچ ءِ درگت دیوانے بلوچی اکیڈمی ءِ سرکماش سنگت رفیق ءِ پاگواجھی ءَ برجم دارگ بوتگ – دیوان ءَ اکیڈمی ءِ باسکاں بھر زرتگ ءُ دیوان ءَ بلوچی اکیڈمی ءِ کارگشاد ڈاکٹر بیزن سبا ءَ ھمک سالی کارگزاری ءِ درگت ءَ حال داتگ انت ءُ سال ءَ داشتگیں لبزانکی مراگش ، شنگکاری کارانی باروا سرپدی، اکیڈمی ءِ اے دگہ سُر ءُ پُر ءُ شؤر بندیانی درگت ءَ باسک سرپدی داتگ انت – چہ ایشی ءَ ابید سال ءِ میان ءَ مالی ھرچ ءُ درچ ءِ درگت ءَ حال داتگ ءُ آیانی شور ءُ سلاہ زُرتگ اَنت –

دیوان ءَ اکیڈمی ءِ باسکاں بلوچستان سرکار ءِ سر وزیر میر عبدالقدوس بزنجو ءِ منّت گپتگ کہ آئی ءَ پہ بلوچی زبان ءِ دیمروئی ءَ اکیڈمی ءِ سالانہ گرانٹ ودّینتگ ءُ پنچ کروڑ کُتگ –

بلوچی اکیڈمی ءِ باسکاں اے گپ ءِ سرا بژنی درشان کرتگ کہ سرکاری وانگ جاھاں بلوچی ءِ وانینگ ءُ بلوچی نبشتانک نبیسی ءِ کار دارگ بوتگ – چہ ایشی ءَ ابید باسکاں لوٹ کرتگ کہ وانگ جاھاں بلوچی زبان ءِ استاد دارگ بہ بنت – اکیڈمی ءِ باسکاں اے گپ ءِ سرا زور داتگ کہ بلوچستان ءِ سرکاری کالجاں پہ بلوچی ءِ ھورکیں جاھاں پبلک سروس کمیشن ءِ نیمگ ءَ گچین کرتگیں استاد دارگ بہ بنت داں کہ کالجاں بلوچی وانینگ ءِ کار گھتر بہ بیت –

دیوان ءَ ڈاکٹر بیزن سبا ءَ گوشتگ کہ اکیڈمی ءَ اے سال ءَ پہ بلوچی زبان ءِ ڈیجیٹلائزیشن ءَ یک موبائیل اپیلی کیشن ئے جوڑ کرتگ کہ ایشی ءِ تہ ءَ اکیڈمی ءِ چھاپ کُرتگیں کتاب وانگ بنت۔ ایشی ءَ ابید بلوچستانیات جرنل ءَ دھ کتاب چھاپ ءُ شنگ کرتگ ءُ دگہ دوازدہ کتاب پہ چھاپ ءَ پریس ءَ دیم دیگی انت –

اکیڈمی ءِ دیوان ءَ ھواریں باسکاں کڈن کتگ کہ آ پہ زھگاں وانگی مواد جوڑ بہ کن انت ، دری زبانانی کوٛہنیں ساچشت ماں بلوچی زبان ءَ رجانک کنگ بہ بنت ءُ بلوچی ءِ نامداریں لبزانکی ءُ تاریخی مواداں ماں انگریزی یا دگہ زباناں رجانک کنگ بہ بنت ءُ بلوچی زبان ءِ گالوار ءُ تاریخ ءِ درگت ءَ پولکاری کنگ ءُ کتاب شنگ کنگ بہ بیت –

دیوان ءَ ھواریں باسکاں سر وزیر ءُ بلوچستان اسمبلی ءِ باسکانی دلگوش اے نیمگ ءَ پِرّینتگ کہ آ بلوچی زبان ءَ ھوار بلوچستان ءِ اے دگہ مزنیں زبان براھوئی ءُ پشتو ءِ سرکاری بنداتی وانگ جاھاں وانینگ ءَ گامگیج زورگ ءَ راھبند ٹاھینگ بہ بیت – شست ءُ پنچمی دیوان ءَ باسکاں لوٹ کُتگ کہ گوادر یونیورسٹی ءَ بلوچی ڈیپارٹمنٹ پچ کنگ بہ بیت ءُ ڈیرہ اسماعیل خان یونیورسٹی (گومل) ءَ بلوچی زبان ءِ وانینگ بندات کنگ بہ بیت –

باسکاں بلوچی اکیڈمی ءِ کارانی درگت ءَ باوست کرتگ ءُ گوٛشتگ کہ اکیڈمی ءَ گوستگیں چیزے سالاں پولکاری مراگش کرتگ ، پولکاری ءِ نیمگ ءَ گیشتر دلگوش گور کتگ کہ چہ ایشی ءَ پہ بلوچی زبان ءُ لبزانک ءِ دیمروئی ءَ کمک رسِتگ – ایشی ءَ ابید بلوچی اکیڈمی ءِ جوڑ کرتگیں موبائیل ایپلی کیشن ہم اے کارانی تہ ءَ یک مزنیں گامگیجے –

برجم داشتگیں دیوان ءَ اے کول دیم ءَ آرگ بیتگ کہ بلوچستان ءِ سرکار ءَ ھوار گوں ھمے کار ءِ ادارھاں لوٹ کنگ بیت کہ بلوچستان ءِ کلیں سرکاری بنداتی وانگ جاھاں بلوچی ، پشتو ءُ براھوئی ءِ سرجمی ءَ استاد دارگ بہ بنت ءُ اے زبانانی وانینگ ءِ کار پد ءَ بندات کنگ بہ بیت۔ ریڈیو ، ٹی وی مراگشانی رہبند گھتر کنگ ءَ ابید شنگ کنگ ءِ وھد ھم گیش کنگ بہ بنت – بلوچی زبان ءَ ایپ ایم ریڈیو ءَ مراگش شنگ کنگ بہ بیت –

دیوان ءِ گُڈسر ءَ بلوچی اکیڈمی ءِ سرکماش سنگت رفیق ءَ دیوان ءَ بھر زرتگیں کلیں باسکانی منت گپتگ ءُ گوشتگ کہ بلوچی زبان ، تاریخ ، دودمان ءُ لبزانک ءِ دیمروی ءَ وتی جھداں چد ءُ گیشتر پیلو بہ کن انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ گوستگیں روچ ءَ بلوچ لبریشن آرمی ءِ سرمچاراں بلیدہ ءَ زورگریں پاکستانی پوج ءِ واستا مڈی بروکیں گاڑی ءِ سر ءَ تیرگواری کتگ ءُ پروشتگ-

آئی ءَ گوشتگ سرمچاراں گردانک ءِ ھند ءَ دشمنیں پوج ءِ راشن دستیگ کتگ انت ءُ گاڑی پروشتگ ءُ سرمچاراں سندھ ءِ جھمنندیں ڈرائیور ءُ آئی ءِ ھمراہ سرپد کتگ ءُ یل داتگ اَنت-

جارکش ءَ گوشتگ کہ زورگریں پاکستانی لشکر کجام رنگیں آسراتی سرکنوکیں مردماں سرپد کن ایں کہ آ اے امل ءَ دور بہ بنت اگاں ناں گڑا وتی جانی ءُ مالی زمہ وار وت بہ بنت-

جارکش ءِ گوشگ ات کہ اے اُرش ءِ زمہ واری ءَ بلوچ لبریشن آرمی من ایت ءُ زورگریں پاکستانی پوج ءُ آئی ءِ کمکارانی سر ءَ مئے اُرش برجاہ بنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ یکسد ءُ بیست ءُ ھشت روچ سرجم بوتگ انت –

مروچی چہ سریاب شال ءَ سیاسی ءُ چاگردی باسک عبدالصمد بلوچ، محمد عثمان بلوچ ءُ دگہ مردماں اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ اگست ءِ ماہ بلوچستان ءِ راجدپتر ءِ تہ ءَ شری زانگ بیت کہ ھما وھد ءَ برتانیہ ءِ شاہ ءَ اے دمگ ءِ تہ ءَ درآیگ وتی رکینگ پھم اتگ گڈا بلوچ سرڈگار ھم کہ برٹش ءِ ایردست بوتگ آجو بوتگ، بلے برتانیہ ءَ اے دمگ ءِ تہ ءَ پہ وت گلام جوڈ کتگ تانکہ آؤکیں وھد ءَ سامراجیت ءِ برجاہ دارگ ءَ یس مین ءِ کرد ءَ پیلو بہ کن انت –

ماما قدیر بلوچ ءَ گوشتگ کہ بلوچ جھد ءِ اے پانزدہ سالی جھد ءَ نوکیں دور ءِ تہ ءَ پرزنداں وتی ھوناں گوں گوستانک نبیس اِتگ کہ پہ وتی پدریچ ءِ ھاتر ءَ دیم پہ منزل ءَ جنزان انت – بلوچ ءِ گوستانک کماش، پرزند ءَ زالبولانی تمردی ءِ کسہ ءَ پُر انت بلے بیست ءُ یکمی کرن ءَ سال دوھزار ءُشش ءَ اگست ءِ ماہ ءَ اسپیت ریشیں کماشے ءِ ھوناں آ پیگمبرے جوڈ کت ھمے وڈ اگست ماہ ءَ وت بلوچ پرزندانی ھونانی جو ءِ درچ جوڈ کت –

ماما قدیر ءَ گوشتگ کہ پاکستانی پوج ءِ نیمگ ءَ بلوچ مھلوک ءِ سر ءَ لشکر کشی بلوچ پرزندانی آوار جنی ءُ آیانی ژانگولیں جونانی چگل دیگ ءِ درچ برجاہ انت ءُ پوج ءَ ڈیرہ بگٹی ءَ بگر تاں مکران ءَ وتی زوراکی برجاہ داشتگ انت ـ اگست ءِ ماہ ءَ پوج ءَ.ماں ھزار گنجی ءَ پد ماں پد بازیں اُرشے کتگ مزنیں کچے ءَ بلوچ پرزند آوار جتگ ءُ لٹ پُل برجاہ داشتگ انت، نوں دو بر ھمے اگست ءَ لینڈ مافیا ءُ کیو ڈی اے ءِ لھتے اپسر مری زمینانی دستیگ کنگ ءِ جھد ءَ انت – اے ھونیگیں ماھے – مروچی بلوچ پدریچ راجی یکجھتی ءِ نیمگ ءَ الم کیت ءُ ھمیشی ءِ تہ ءَ باندات ءِ سوبمندی برورد ھست انت –