TBP Balochi

گوستگین بازیں ماھاں سرجمیں بلوچستان ءَ بلوچ لبریشن آرمی ءِ ترسناکیں اُرشاں پولیس ءِ سلاھانی پچگرگ ءَ پد مستونگ پولیس ءَ وتی سلاھانی بنجل ھالیگ کتگ ءُ کارمنداں توپگ داتگ انت اش کہ وتی لوگاں بر اِت اش-

یک مردمے ءَ دی بلوچستان پوسٹ ءَ گوں گوشتگ دراھیں ملازماں یک یک سلاھے ءُ دو دو میگزین دیگ بوتگ اَنت ءُ ھکم اش ھم داتگ کہ آ سلاھاں وتی لوگاں برت کن اَنت ءُ اگاں کجام ملازم ءَ وتی لوگاں سلاہ ءِ برگ ءِ انکاری کت گڑا آئی ءِ ھلاپ ءَ مھکمانگ ءَ رنگ ءَ کاروائی کنگ بیت اِنت-

زانگ بہ بیت سرجمیں بلوچستان لھتے وھداں بلوچ لبریشن آرمی ءِ نیمگ ءَ جتا جتائیں جاھاں آپریشن ھیروپ ءِ وھد ءَ پولیس ءُ لیویز کارمندانی کارگسانی دستیگ کنگ ءَ پد اود ءَ جاڑیگیں سلاہ ءُ ساز ءُ سامان برگ بیتگ اَنت-

دمگی مردمابی رد ءَ ڈی پی او مستونگ رھمت اللہ ءِ ھکم ءِ رد ءَ سٹی تھانہ مستونگ ءَ جاڑیگیں سلاہ ءُ ایمونیشنز پولیس ءِ ملازمانی نام ءَ الاٹ کتگ ءُ داتگ انت کہ دانکہ ملام سلاہ ءُ ایمونیشنزاں وتی لوگاں برت بہ کن اَنت-

زانگ بہ بیت پولیس سٹی تھانہ مستونگ ءِ بازار ءِ میان ءَ جاڑیگ انت کہ آئی ءِ رودراتک ھاجی گنی مارکیٹ گوریچان ڈی ایچ کیو ھسپتال ءُ سینٹرل جیل کالونی ءَ انت گوریچاب سینٹرل جیل ءُ زربار مسیت روڈ ءَ اِنت-

دمگی مردماں گوشتگ مُچی ءَ جاڑہگیں G3, Ak 47 ,9mm ءُ آنسوگیس بازیں کچے ءَ جاڑیگ بیتگ اَنت نی ملازمانی نامان الاٹ کنگ بوگ ءَ اَنت-

نوشکی ءَ لشکر کشی ءِ وھد ءَ پاکستانی پوج ءَ ھشت مردم دزگیر کتگ ءُ بیگواہ کرتگ اَنت-

گوستگیں روچاں بلوچستان ءِ دمگ نوشکی ءِ کوھی دمگاں پاکستانی پوج ءِ نیمگ ءَ سَے روچاں آپریشن برجاہ بیتگ- آپریشن ءِ وھد ءَ گن شپ ھیلی کاپٹر ءُ دگہ ھیلی کاپٹراں بھر زرتگ- ھمے وھداں بازیں جاھاں لشکری کارندہ ایرگیجگ بیتگ اَنت-

اھوالانی رد ءَ آپریشن ءِ وھد ءَ پوج ءَ ھشت مردم آوار جتگ ءُ برتگ اَنت کہ آیانی توک ءَ ملا نزیر سمالانی، فقیر مھمد سمالانی، جان مھمد سمالانی، زپر اللہ ء جان مھمد سمالانی، مھمد وارس سمالانی ءُ ھاشم ء سید خان ساسولہ ھوار اَنت- ھمے وڑ دو رھگیر ھم بیگواہ کنگ بیتگ اَنت کہ آیانی پجار نہ بیتگ اَنت-

زانگ بہ بیت آپریشن ءَ پوجی کارمنداں دمگی مردمانی لوگانی ماندارگ ءَ ھوار دمگ ءَ مارٹر گولاھانی آس دیگ ءِ ھال ھم بیتگ اَنت-

آپریشن ءَ دزبندیں کارندھانی سر ءَ پشمبے ءِ شپ ءَ بلوچ لبریشن آرمی ءَ یک اُرشے ءِ نشانگ کتگ اَنت کہ زمہ واری منان ءَ جارکش جیئند بلوچ ءَ گوشتگ سرمچاراں وتکاریں سلاہ ءُ گرنیڈ لانچرانی آس دیگ ءَ دشمن ءِ دو کارندہ جاہ پہ جاہ ءَ کشتگ اَنت کم چہ کم چار زدگ کتگ اَنت-

واکداراں سَے روچاں برجاھیں آپریشن ءِ بارو ءَ دگہ اھوال دیم ءَ نیاؤرتگ اَنت-

بلوچستان ءِ سرکار ءَ ایمنی ءِ جاورھالانی گر ءُ دار کنگ ءِ ھاتر ءَ سرجمیں بلوچستان ءَ دفعہ 144 جتگ-

مھکمہ داکلہ بلوچستان ءِ نیمگ ءَ شنگ بیتگیں نوٹی پکیشن ءِ رد ءَ سلاہ زورگ روگ ءُ پنچ ءَ گیش مُچیانی سر ءَ سرجمی ءَ بندش اِنت-

نوٹی پکیشن ءِ رد ءَ دفعہ 144 ءِ وھد ءَ ھر رنگیں گیر کانونی مُچی ءُ سلاھانی کارمردی ءَ ترندی ءَ گامگیج زیرگ بیت اِنت-

زانگ بہ بیت آواران ءَ زورانسری بیگواھیں دلجان بلوچ ءِ یل نہ کنگ ءِ ھلاپ ءَ زھرشانی برجاہ ءُ ھمے ڈول ءَ شال ءَ سرینہ چوک ءَ بیگواھیں نودربر مھمد مسور ءِ یل کنائینگ ءِ ھاتر ءَ زھرشانی ءُ نندانک گوستگیں نُھ روچاں برجاہ اِنت-

ایشاں ابید بیست ءُ پنچ نومبر ءَ آل پارٹیز ءَ سرجمیں بلوچستان ءَ دگ بندین ھرتال ءِ جار جتگ-

بلوچی زبان ءِ ورنائیں نبشتہ شھزاد عبید ءِ نبشتانکانی کتاب ساچ دار لبزانکی گل ءِ نیمگ ءَ دومی چھاپ ءُ شنگ بیتگ-

بلوچی زبان ءِ ورنائیں نبشتہ کار عبید شھزاد ءِ لبزانکی تاک ‘ کسہ کار سائیکو ’ دومی ایڈیشن چھاپ ءُ شنگ کنگ بیتگ-

ساچ دار لبزانکی گل ءِ نیمگ ءَ شنگ بیتگیں درشان ءَ گوشگ بیتگ کہ اے کتاب گوناپ اونلائن پتر ءَ دز کپ ایت-

روکپتی بلوچستان ءِ تیابدپی شھر چھبار ءَ ایران ءِ میونسپل ادارہ ءَ مھلوک ءِ لوگ ڈروھینتگ اَنت-

اھوالانی رد ءَ گوستگیں شپ ءَ چھبار ءِ ھند مراد آباد ءَ ایران ءِ میونسپل ادارہ ءَ لس مردمانی لوگ زورگری ءُ بے دزشناس ءِ بنیاد ءَ ڈروھینتگ اَنت-

لس مردمانی گوشگ اِنت ایران ءِ میونسپل ادارہ بازیں نشتگیں مردماں بے کاگدیں زمینانی سر ءَ آیانی بستگیں جاھاں ڈروھینگ اِنت-

میونسپل ادارہ ءِ ھمراھی ءَ پولیس ھم گون بیتگ کہ آئی ءَ گوستگیں شپ ءِ ساھت سَے ءَ لوگ ڈروھینتگ اَنت-

آیانی گوشگ اِنت اے لوگ ءُ جاگھاں زمین شناسی نیست اِنت چرے ھاتر ءَ اے لوگ ءُ جاگہ ڈروھینگ بنت اِنت-

زانگ بہ بیت چِد ءُ پیش ھم میونسپل ادارہ ءَ چھبار ءَ ھوار زاھدان ءَ لس مردمانی لوگ ڈروھینتگ بیتگ اَنت ءُ چریشانی پژدر ءَ مھلوک ءَ زھرشانی ھم کتگ اَنت –

بلوچستان ءِ بُنجاھی شھر شال ءَ پنجاب رؤکیں سرجمیں مساپر کوچ سپر کنگ ءَ پابندی جتگ-

ٹرانسپورٹرز گوشگ اِنت کہ پابندی بیست پنچ نومبر ءَ تاں کوچانی سر ءَ پابندی ءِ سبب ءَ مساپراں سک دلسیاھی ءِ دیمپانی کپگ ءَ اِنت-

تنی وھدے اے زانگ بیگ ءَ نہ اِنت کہ ھکومت ٹرانسپورٹرانی واستا شپ ءَ سپر کنگ ءَ پابندی پرچا جتگ، بلے بلوچستان شال، کراچی ءُ پاکستان ءِ دگہ صوبھانی میان ءَ ھمکروچ ھزرانی گاڑی رو اَنت-

لھتے مردمانی گوشگ اِنت کہ ھکومت بلوچ سلاہ بندیں گلانی اُرشانی پشدر ءَ برجاہ ءَ اِنت-

زانگ بہ بیت کہ ھمے سال ءَ ھم یک مزنیں اُرشے بیتگ اَت وھدے بلوچ لبریشن آرمی ” آپریشن ھیروف ” نام ءَ چہ بیلہ ءَ ھوار بلوچستان ءِ جتاجتائیں دمگاں پوجی مڈیانی سر ءَ اُرش کتگ – اے کاروائی ءَ پنجاہ ءَ گیش پوجی ءُ دگہ سرکاری کارمند کشگ بیتگ اَنت-

ھمے وڑ ھمے ماہ ءِ سیزدہ نومبر ءَ بلوچ آجوئی لوٹوکیں سلاہ بندیں گلاں شھیدانی روچ ءَ بلوچ سلاہ بندیں یکجاھی گل ٹولی بلوچ راجی آجوئی سنگر ( براس) بلوچستان ءِ جتاجتائیں دمگاں پنچ اُرش کنگ بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کرتگیں درشان ءَ سَے جتا جتائیں اُرشانی زمہ واری من اِتگ اَنت ءُ گوشتگ نوشکی ءَ دزبندیں زورگریں پاکستانی پوج ءِ کارندہ ، تربت ءَ دشمنیں پوج ءِ چوکی ءُ شال ءَ چاریگ ءُ کمکار نشانگ کتگ ، اُرشاں چاریگ ءَ ھوار زورگریں پوج ءِ 3 کارندہ ءُ 4 کارندہ کشتگ اَنت –

جارکش ءَ گوشتگ بی ایل اے ءِ سرمچاراں پشمبے ءِ شپ ءَ نوشکی ءِ ھند گوربرات ءَ زوراکی ءَ دزبندیں زورگریں پاکستانی پوج ءِ کارندہ یک اُرشے ءِ نشانگ کتگ بیتگ چریشی ءَ سرمچاراں وتکاریں سلاھاں گوں دشمن ءِ سر ءَ گرنیڈ لانچرانی ھواری ءَ آس داتگ اَنت ، اُرش ءَ دشمن ءِ دو کارندہ جاہ پہ جاہ ءَ مرتگ ءُ کم چہ کم چار زدگ بیتگ اَنت –

آئی ءَ گوشتگ زورگریں پاکستانی پوج 19 نومبر ءَ نوشکی ءِ ھند منجرو ، مخبلی ، گوربرات ھوار لجے ءُ شورپارود ءَ ھواریں دمگاں زوراکی ءَ دزبند بیتگ ، بزدلیں پوج ءَ سَے روچاں داں لس آبادیاں زوراکی ءِ نشانگ کنگ ءَ بیتگ لوگانی مانداگ ءِ ھواری ءَ دمگ ءِ سر ءَ مارٹر گولہ آس دیگ ءِ ھواری ءَ راکٹ ھم جتگ اَنت –

جارکش ءَ گوشتگ بلوچ لبریشن آرمی ءِ سرمچار ھروھد ءَ راج ءِ پھریزگ ءَ ساجو اَنت ، دشمن ءِ زوراکیانی پسو ترندی ءَ دیگ بنت اِنت –

آئی ءَ گوشتگ یک دگہ کاروائی ءِ گوستگیں بیگاہ ءَ بلوچ لبریشن آرمی ءِ سرمچاراں شال ءِ دمگ کیچی بیگ ، سریاب دگ ءَ زورگریں پاکستانی پوج ءِ چیردستی ءَ کار کنوکیں نصیب اللہ ء قیصر خان مری جھمنند مَچ بولان تیرگواری کرتگ ءُ کشتگ –

آئی ءَ گوشتگ چاریگ نصیب اللہ پنام ءِ چھیا ءَ حبیب خان مری ءِ ھمراھی ءَ دشمن ءِ دیم ءَ سِلاہ چگل داتگ اَنت – سرینڈر بوگ ءَ پد نصیب اللہ ءَ زورگریں پوج ءُ چیریں ادارھانی گوشگ ءَ چاریگری ءَ بندات بیتگ – مَچ شھر ءُ کَش ءُ گوری ھنداں زورگریں پوج ءِ میجر شیرجان ءَ چاریگ ءُ گچینکاری ءِ نیٹورک جوڑ کرتگ ، نصیب اللہ اے نیٹورک ءِ یک سروکے بیتگ –

جارکش ءَ گوشتگ پد ءَ سال 2018 ءَ دوران مری پنام ءِ بزرگ ءَ سرینڈر کنگ ءَ پد نصیب اللہ ءَ آئی ءِ سروکی ءَ دشمنیں پوج ءِ واستا کار بندات کتگ ھمے وڑ زورگریں پوج ءِ دست ءَ ظھور مری ءِ زورانسری بیگواھی ءَ نصیب اللہ مری ءِ دست تچک ءَ ھوار بیتگ پد ءَ زورگریں پوج ءَ کشتگ ءُ لاش چگل داتگ –

جارکش ءَ گوشتگ بی ایل اے ءِ سرمچاراں چاریگ نصیب اللہ کشتگ ءُ آئی ءِ گور ءَ جاڑیگیں ساز ءُ سامان برتگ اَنت ، چاریگ ءِ موبائل ءَ چہ آئی ءِ نیٹورک ءَ ھواریں دگہ چاریگانی نام ءُ راز پاشک بیتگ اَنت ءُ زوت آیانی سر ءَ کاروائی کنگ بیت اِنت –

آئی ءَ گوشتگ مروچی شپ ءَ بلوچ لبریشن آرمی ءِ سرمچاراں تربت ءِ شھر ءَ بالی پٹ ءِ دگ ءَ زورگریں پاکستانی پوج ءِ یک چوکی ءِ نشانگ کتگ ، دشمنیں پوج ءِ سر ءَ دزبمبے چگل داتگ چریشی ءِ آسر ءَ دشمنیں پوج ءَ جانی ءُ مالی تاوان بیتگ –

درشان ءِ گڈسر ءَ گوشگ بیتگ بلوچ لبریشن آرمی اے سئیں اُرشانی زمہ واریاں من ایت – زورگریں پاکستانی پوج ءُ آئی ءِ شریدارانی سر ءَ مئے اُڑش برجاہ بند اِنت –

تربت شھر ءَ یک تُرندیں تراکے توار اش کنگ بیتگ چریشی ھمراھی ءَ تیرگواری توار ھم اش کنگ بیتگ-

پولیس ءَ بنداتی گوشتگ کہ اے تراک ایئرپورٹ دگ نزیک ءَ بیتگ، بلے پولیس ءَ اے جاگہ ءَ پٹ پول کنگ جھد ءَ اِنت-

تراک ءَ پد دمگ ءَ پولیس ءُ سیکورٹی فورسز ءِ مزنیں کچے ءَ دیم داتگ اَنت، پولیس واکدار ءَ گْوشتگ کہ وئیل درگت ءَ گیش سرپدی دیگ بیت-

تنی وھدے ھچ وڑیں جانی تاوان ھال نیست-

اوگان وزارت داکلہ ءِ جارکش ءِ رد ءَ یک سلاہ بندیں اُرشے ءَ گوریچانی اُستان بگلان ءَ تیرگواری ءَ دَہ مردم کشگ بیتگ اَنت – اے اُرش ءِ زمہ واری داں کس ءَ نہ زرتگ-

گوریچانی اوگانستان ءَ سلاہ بندیں اُرشکاراں یک درگاھے ءِ سر ءَ تیرگواری ءَ کم چہ کم دَہ مردم بیران بیتگ اَنت- اوگان وزارت داکلہ ءِ جارکش عبدالمتین کنی ءَ مروچی آدینگ ءَ یک شنگ کرتگیں درشانے ءَ گوشتگ اے اُرش گوریچانی اُستان بگلان ءَ کنگ بیتگ –

جارکش ءَ گوشگگ یک مردمے ءَ دمگ نھرین ءَ یک دورجاھے ءَ یک درگاھے ءَ ھمک ھپتگی رسم داری ءَ بھر زیروکانی سر ءَ تیرگواری اش کتگ چریشی ءَ دَہ مردم بیران بیتگ اَنت-

سرجمی ءَ اے گپ پدر نہ بیتگ اُرش ءِ پشت ءَ کَے دست مان اِنت- تالبان ءِ نیمگ ءَ سال دوھزار ءُ بیست ءُ یک ءَ سرکار ءِ آیگ ءَ پد اے جنگ آماچیں ڈیھ ءِ سلامتی ءِ واستا ستک کنگ بیتگ – بلے ایشی ءَ ابید اُرشکاری برجاہ اَنت چریشانی توک ءَ گیشتر ناشرکاری اسلام اسٹیٹ ءِ ٹولی وت ءَ ھراسان گوشوک ءِ شاک منگ ءَ اِنت- ستمبر ءِ وھد ءَ میان اوگانستان ءَ یک اُرشے ءَ چاردہ مردم کشگ ءُ دگہ شش زدگ بیتگ انت کہ ایشانی زمہ واری آئی ایس ءَ من اتگ اَنت-

جنگی ھُنر

نبشتہ کار : سُن زو

رجانک: کوھسار قندیل

چارمی بھر

پوجی بندوبست

سُن زُو گُش ایت یک جوانیں جنگولے ترا پُروش وارگ ءَ چہ رَکین کُت کنت ءُ آ انچیں موھے ءِ ودار ءَ نہ دنت کہ دشمن ءَ پُروش دات کُت بہ کنت۔ وت ءَ چہ پُروش وارگ ءِ رکینگ مردم ءِ جند ءِ دست ءَ اِنت۔دشمن ءِ پرُوش ورگ دشمن ءِ جند ءِ دست ءَ اِنت، تر وت موہ دنت ،ترا بس ودار کنگی اِنت ءُ وتی چم دشمن ءِ سر ءَ سَک دیگی اَنت ءُ ترا سرپد بُوگی اِنت کُجام وھدا تو سوبمندی گِپت کُت کن ئے ءُ ترا سماء بیت کہ تو اے کار ءِ لائیک ءِ یا ناں۔

دشمن ءِ پُروش دیگ ءِ ھاتر ءَ ترا جوانیں رِپک کار مرز کنگ لوٹ ایت ءُ وتی ھم رکینگ ءَ تو تھنا زور کارمرز کُت نہ کن ئے ترا جنگی رِپک کارمرز کنگ لُوٹ ایت۔ چہ جنگی رِپک ءَ تو دشمن ءِ پُروش دیگ ءَ ھوار تو دشمن ءِ دل وتی تاکت ءُ وتی رکینگ ءِ ھُنر ءَ پیشدارے ۔چہ اے وڑین جنگی رِپک ءُ ھُنر ترا زاھر کنت کہ تو وت ءَ ھم رکینت کُت کن ئے ءُ سوبمندی ھم گِپت کُت کن ئے۔

سُن زو ءِ ھیال ھمی بُوتگ کہ سوبمندی جنگ ءَ پد پچ گرگ انچوکین مزنیں گپے نہ اِنت۔ گپ ایش اِنت کہ دشمن سرپد ھم مہ بیت تو جنگی تیاری بہ کن ئے ءُ ابید جنگ ءَ چی تو دشمن ءَ پُروش بہ دے ئے ءُ آرا سلاھانی دور دیگ ءَ مجبور بہ کن ئے۔

سُوبمندی ھما اِنت کہ آئی ءِ توک ءَ ردی مہ بیت۔دشمن زھنی شِکست بہ وارت۔سوبمندی تو انچیں وڑے ءَ بہ گِر کہ کاملیں سوبمندی ءِ بہ بیت،شکست ورگ ءِ امکان مہ بیت۔تئی سپاھیگ جنگی ھر کانودانی پابند بہ بنت ءُ یک جوانیں رھبندانی ءِ منوگر بہ بنت۔

سُن زو گیش اے شئے سر زور دنت کہ سوبمندی ھم بہ بیت ءُ جنگ ءُ کُشت ءُ کُوش ھم مہ بیت۔مار ھم بہ مِر ایت ءُ لٹ ھم سلامت بہ بیت۔اے سوبمندی ھما وھد ءَ بیت کہ تو یک جوانیں رھبندے ءِ منوگر بہ بہ ئے ۔وھد ءُ ھالات ءَ گوں شُت بہ کن ئے،تئی ھوسلہ بُرز بہ بنت۔وھد ءُ ھالاتانی ھواری ءَ تو وتی رھبندانی توک ءَ بدلی آرت کُت بہ کن ئے۔دشمن ءِ سر آنچیں وھدے ءَ اُرش بہ کن ئے کہ ھچ گمان ءَ ھم مہ بیت۔تئی اُرش ءَ چی دشمن مالی ءُ زِھنی دوئین جاھاں چی شِکست بہ وارت۔دشمن لشکر ءِ سپاھیگ چہ وتی جند ءِ لشکر ءَ دل پُروش بہ بنت۔گڑا تو یک جوانیں سوبمندے ءِ گِپت کُت کن ئے۔ءُ ھاں وھد ءُ ھالات ءَ بہ چار ءُ وتی رھبنداں بدل کن ءُ نوکیں راھاں شُوھاز کن۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-