TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بارکھان ءِ دمگ بغاؤ ءِ دگ لھتے بلوچ دُژمنیں مردمانی سپر کنگ ءِ ھال گل ءِ انٹیلیجنس ونگ ءَ دزکپتگ کہ چریشی ءَ بلوچستان لبریشن فرنٹ ءِ سرمچاراں ونگاٹک ھند ءَ شھدگ بستگ رؤکیں ءُ آؤکیں سرجمیں گاڑی پٹ ءُ پول کتگ اَنت- اے پٹ ءُ پول مروچی بیست ءُ پنچ نومبر دوھزار ءُ بیست ءُ چار ءِ روچ ءَ ساھت سے ءَ بگر تاں بیگاہ ءِ پنچ ءَ تاں برجاہ بیتگ-

جارکش ءَ گْوشتگ کہ ما بلوچ دُژمنیں مردماں کڈن کن ایں کہ وتی بلوچ دُژمنی ءَ یل بدے اَنت اگاں ناں زورگپتگیں بلوچستان ءَ آ ھچ جاہ ءَ مُھر نہ اَنت- اے وڑیں مردم وتی لوگاں، کارگساں ءُ سپر ءِ وھد ءَ مُھر نہ اَنت بلوچ سرمچار کجام ھما وھد ءُ جاہ ءَ ایشاں نشانگ کن اَنت ایشانی میارباری ءِ سزا ءَ دات کت کن انت-

جارکش میجر گوھرام بلوچ ءَ دیمتر ءَ گْوشتگ کہ بی ایل ایف اے راہ بندگ ءِ زمہ واری ءَ منّ اِیت ءُ اے پٹ ءُ پول ءِ سبب ءَ مساپراں دلسیاھی رس اِتگ ایشاں چہ پھلی لوٹ ایں-

کلات ءَ یک دگہ بمب تراکے ءَ پاکستانی لشکر نشانگ کنگ بیتگ-

کلات ءِ دمگ ھربوئی ءَ مروچی سھب ءَ تراک جاہ ءَ سر بیوکیں پاکستانی لشکر ءِ گاڑی ناشناسیں مردماں تراک ءِ نشانگ کتگ-

ھالانی رد ءَ تراک ءِ آسر ءَ پورسز ءَ جانی ءُ مال تاوان رس اتگ۔

دمگی مردمانی رد ءَ اے دمگ ءَ ھیلی کاپٹر ھم گندگ بیتگ انت-

زانگ بہ بیت کہ مرچی سھب ءَ ھربوئی ءَ تراک ءِ تہ ءَ پاکستانی لشکر ءِ کارندہ نشانگ جوڑ کنگ بوتگ اَنت کہ آ لشکر کشی ءِ چن ءُ لانچ ءَ اتکگ بیتگ اَنت-

دمگی مردماں ٹی بی پی ءَ گوں تران کنان ءَ گْوشتگ کہ ناشناسیں مردماں پیسر ءَ چہ فورسز ءِ ھالیگیں پوسٹ ءَ مزنیں کساسے ءَ تراکناکیں شورو ایر کتگ اَنت۔

آئی ءَ گوشت کہ وھدے پورسز ءِ نزیک ءَ دہ کارندہ ھمے چیک پوسٹ ءَ سر بوتگ انت گڑا مزنیں تراکے بوتگ کہ آئی ءِ توار دور اشکنگ بیتگ۔

تراک ءِ تہ ءَ لورسز ءِ کارندہ تاوان ءِ آماچ بوتگ اَنت۔ واکداراں انگت ءَ دوئیں تراکانی بابت ءَ ھچ وڑیں ھال ءُ اھوال نہ داتگ انت۔

آجوئی لوٹوکیں بلوچ سلاہ دمگ ءَ پرکار اَنت، بلے انگت ءَ کس ءَ مروچیگیں اُرشانی زمہ واری نہ زرتگ انت۔

روکپتی بلوچستان ءِ دمگ سراوان ءَ ایرانی لشکر ءِ لس پوشاکی کارمنداں یک مردمے آوار جتگ ءُ بیگواہ کرتگ –

اھوالانی رد ءَ سراوان ءِ شھر ءَ ایرانی لس پوشاکی کارمنداں عمران ء مولوی اھمد جھمنند گشت آوارجتگ ءُ گون وت برتگ-

اھوالانی رد ءَ عمران پرپٹانی جوڑ کنوکیں یک مِستری یے کہ آ گوستگیں روچ ءَ سراوان ءِ شھر ءَ ایرانی لس پوشاکی کارمنداں آوار جتگ ءُ برتگ-

آئی ءِ آوار جنگ ءَ پد آئی ءِ بارو ءَ دگہ اھوال دیم ءَ نیتکگ اَنت-

بلوچستان ءِ دمگ کلات ءَ پاکستانی پوج یک بمب تراکے ءِ نشانگ کتگ-

کلات ءِ دمگ ھربوئی ءَ مروچی سھب ءَ پاکستانی پوج ءِ کارمند ھما وھد ءَ نشانگ کتگ اَنت وھدے کہ آ لشکر کشی ءِ نیئت دمگ ءَ پیشگامی کنگ ءَ بیتگ اَنت-

دمگی اِھوالکار ءَ ٹی بی پی ءَ گوشتگ کہ ناشناسیں مردماں پوج ھالیگ ءِ چوکی پیسر ءَ چہ مزنیں کچے تراکناکیں شورو ایر کتگ-

آئی ءَ گوشتگ کہ دہ نزیک ءَ پوج ءِ کارمند اے چوکی ءَ سر بیتگ ءُ تُرندیں تراکے بیتگ چریشی ءِ توار دیر دیر اش کنگ بیتگ-

تراک پوج کارمنداں جانی تاوان ءِ دیمپانی کنگ کپتگ – واکدار ءَ انگت اے درگت ءَ ھچ وڑیں درشان دیم ءَ نیاورتگ-

زانگ بہ بیت ھمے ماہ ءِ شانزدہ نومبر ءَ بلوچ لبریشن آرمی ءَ یک تُرندیں اُرشے کلات ءِ دمگ شاہ مردان ءَ پاکستان پوج ءِ یک بُنجاھی بُنجل ءُ پھازوکی چوکیانی سر ءَ اُرش کتگ اَت-

اے اُرش ءَ پاکستانی واکدار ءَ ھپت کارمندانی بیران ءُ ھژدہ ءِ ٹپی بیگ گپ راسے کتگ-

بی ایل اے ءِ جارکش جیئند بلوچ ءَ درشان ءِ تہ ءَ گوشتگ کہ اُرش ءَ پاکستانی پوج ءِ سی کارمند مرتگ ءُ دہ ءَ چہ گیش ٹپی کتگ اَنت – آئی ءَ گوشتگ سرمچاراں پاکستان پوج ءِ سلاہ گولہ شورو وتی دستیگ کتگ اَنت-

جیئند بلوچ ءَ درشان ءِ تہ ءَ گوشتگ کہ اے اُرش بی ایل اے ھاسیں ٹولی فتح اسکواڈ ءَ کتگ وھدے کہ میڑ ءَ فتح اسکواڈ باسک شاہ زیب ساتکزئی ھم جنگ بیتگ-

چہ شال ءَ بیگواہ بیتگیں کسان سالیں زھگ ءِ دیم ءَ نیارگ ءِ ھلاپ ءَ مروچی سرجمیں بلوچستان ءَ دگ بندیں ھرتال اِنت-

ھرتال ءِ سبب ءَ بلوچستان ءِ بازیں جاھاں دگ ءُ وانگی ادارہ بند اَنت-

دَہ سالی ئیں زھگ ءِ یل نہ کنگ ءِ ھلاپ ءَ کھول، سیاسی پاٹی، استادانی گل ءُ ٹرانسپورٹرانی دزبندی ءَ مروچی سرجمیں بلوچستان ءَ دگ بندیں ھرتال کنگ بیتگ-

واکدارانی رد ءَ ھرتال ءِ کال ءَ پد چمن، کوھلو ءُ ھزدار ءَ ھوار بلوچستان ءِ بازیں جاھاں وانگی ادارہ بند اَنت ءُ مروچی بوھوکیں پرچہ دارگ بیتگ اَنت-

زانگ بہ بیت لھتے روچ پیش دَہ سالی ئیں زھگ مسور ناشناسیں مردماں چہ شال ءَ اسکول وین ءَ آوار جتگ ءُ برتگ کہ چریشی ءَ پد زھگ ءِ بارو ءَ ھچ وڑیں ھال ءُ اھوال دیم ءَ نیتکگ اَنت-

سندھودیش روولیوشنری آرمی ( ایس آر اے) ءِ جارکش سوڈھو سندھی ءَ شنگ کتگیں درشان ءَ گوشتگ لاڑکانہ سٹی ءَ پنجاپی سیٹلر ءُ چاریگ مھمد فاروق آرائیں ءِ سر ءَ بیتگیں اُرش ءِ زمہ واری ءَ من ایں-

جارکش ءَ گوشتگ پنجاب ءِ زوراوراں یک نیمگے مھکمیں شَوربندی ءَ وتی آبادی ءَ سندھ ءَ آرگ ءُ دومی نیمگ ءَ ھمے آبادی ءِ زور ءَ سندھ ءِ کسان کسانیں شھراں انٹیلیجنس ءِ نیٹورک داشتگ راجی زرمبشت ءِ نیمگ ءَ سندھو دریا ءَ ھوار وتی ڈیھ ءِ رکینگ ءُ آجوئی ءِ واستا جد ءُ جھد ءَ کاؤنٹر کنگ ءِ واستا چاریگری ءُ دزگیری کنگ ءَ اِنت-

سوڈھو سندھی ءَ گوشتگ ایس آع اے اے وڑیں درستیں دشمنیں ریاست ءِ پیسلہ ءُ شوربندیانی دیمپانیاں کنت اِنت ءُ سندھ ءِ آجوئی ءَ داں وتی گھگیری جد ءُ جھد ءَ برجاہ کنت اِنت-

روکپتی بلوچستان ءِ جتا جتائیں دمگ نیکشھر، چھبار ءُ دلگان ءَ پیش اتکگیں وئیلاں زھگے ءَ ھوار سَے مردم بیران ءُ زلبولاں ھوار شش کس ٹپی بیتگ اَنت-

گیشیں اھوالانی رد ءَ نیکشھر ءَ یک گاڑی ءِ سر ءَ تیرگواری کنگ بیتگ کہ چریشی ءِ آسر ءَ یک مردمے بیران ءُ چار زدگ بیتگ اَنت-

بیران بیتگین مردم ءِ پجار بیست سالی ئیں سلمان بلوچی ءِ نام ءَ زانگ بیتگ کہ ءُ ھمے وڑ زدگ بیتگین ءِ پجار مھمد بلوچی، فاطمہ بلوچزئی، عابدہ ءُ مھمد ءِ گوھار ءِ ناماں زانگ بیتگ اَنت ءُ جکان نیکشھر ءِ جھمنند گوشگ بیتگ اَنت-

گاڑی ءِ سر ءَ ناشناساں تیرگواری کرتگ ءُ چریشی ءَ گاڑی ءِ ڈرائیور ءِ دست ءَ لگوشتگ ءُ چَپ بیتگ-

ھمے ڈول ءَ اَچ چھبار ءَ یک گاڑی ءِ کپگ ءَ زھگے بیران ءُ پت ءُ مات ٹپیگ بیتگ اَنت-

اھوالانی رد ءَ گاڑی ءِ کلٹی بوگ ءِ سبب ءَ زھگ بیران بیتگ ءُ پت ءُ مات سک ءَ ٹپیگ بیتگ اَنت-

ھمے وڑ دلگان ءَ تیرگواری ءِ وئیل ءَ یک مردمے بیران بیتگ-

گیشیں اھوالانی رد ءَ دلگان ءَ ناشناسیں مردماں تیرگواری کنان ءَ عید مھمد سابکی جھمنند شھرک دلگان بیران بیتگ-

زانگ بہ بیت روکپتی بلوچستان ءَ ھمک روچ اے دابیں وئیل پیش آیگ ءَ اَنت کہ اود ءَ مردم جنگ ءُ کشگ یا ٹپیگ کنگ بوگ ءَ اَنت-

سرکاری پرمان ءَ پد جتاجتائیں دمگاں چکاس ھم مھتل کنگ بیتگ اَنت-

ھکومت بلوچستان ءَ جار جتگ کہ بیست پنچ نومبر ءَ دوھزار بیست چار ءَ سرجمیں بلوچستان ءَ سرجمیں سرکاری بے سرکاری زانشتی ادارہ بند بنت- اے شور استان ءَ ٹرانسپورٹرانی نیمگ ءَ چہ جار جتگیں پرگ بندیں ھڑتال ءِ سوب ءَ کنگ بیتگ، چریشی ءِ آسر ءَ پبلک ٹرانسپورٹ ءُ شھدربرجاہ ءُ کالج بسانی بند بیگ گمان اِنت-

استانی زانتی تک ءِ نیمگ ءَ چہ شنگ کتگیں جار ءَ گوشگ بیتگ کہ اے گامگیج مول، نودربر، استاد ءُ راج ءَ دیمپان بیوکیں دلسیاھیانی کم کنگ اِنت-

جار رِد ءَ سرجمیں سرکاری کالج، شھدربرجاہ تکنیکی ادارہ بند بنت ، وھدے کہ زانشتی پُرکاری بیست شش نومبر ءَ دوبر بندات بنت-

اشی ءَ اَبید استانی وزیر ءِ زانت راحلیہ درانی ءَ راست کتگ کہ پرگ بندیں ھڑتال ءِ سوب ءَ مکران ءَ ھوار بلوچستان ءِ سرجمیں زانشتی ادارہ بند بنت-

آئی ءَ دیمتر ءَ گوشتگ کہ باندا بیوکیں سرجمیں چکاس ھم مھتل کنگ بیتگ اَنت، آیانی نوکیں تاریک ءِ جار رند ءَ کنگ بیت-

اے شور ھمے وھد ءَ دیم ءَ اَتکگ وھدے استان ءَ یازدہ سالی ئیں مسور خان ، آوار جنی ءِ ھلاپ ءَ سرجمیں پارٹی ءُ تاجرانی نیمگ ءَ چہ تھتگ بند ءُ پرگ بندیں ھڑتال جار پرینگ بیتگ – راجی رویشگ ءُ زھرشانی ءَ چارانی زانت تک ءَ اے گامگیج زرتگ-

بلے نوکیں ھالانی رِد ءَ سرجمیں پارٹیاں ءُ گلاں پرگ بندیں ھڑتال نہ کنگ جار جتگ، بلے زانشتی ادارہ یکشل ءَ بند بنت-

نوشکی ءِ جھمنند نصیب اللہ بادینی ءِ زورانسری بیگواھی ءَ دہ سال سرجم بیگ ءَ مروچی شال پریس کلب دیم کھول ءَ ، بلوچ سیاسی کارکناں نودربراں زھرشانی کتگ-

زھرشانی کنوکاں نصیب اللہ ءِ یل کنائینگ ءُ زورانسری آوار جنی ءِ ھلاس کنگ لوٹ کتگ انساپ ءِ دیگ ءَ زور داتگ-

زھرشانی ءَ نصیب اللہ بادینی، راشد لانگو ءُ دگہ بیگواھیں مردمانی کھول ھوار بیتگ اَنت، آیاں وتی دوستناکانی اکس دستاں چست کتگ بیتگ اَنت آیانی یک کنائینگ لوٹ ءَ کنگ ءَ بیتگ اَنت-

ھمے درگت ءَ زھرشانی ءَ چہ تران کنان ءَ نصیب اللہ بادینی ءِ کھول رِد ءَ، نصیب اللہ بیست پنچ نومبر دوھزار چاردہ ءَ چہ چاگی اسٹاپ، نوشکی ءَ آوار جتگ ءُ ناشناسیں جاھے ءَ برتگ – اے وھد ءَ آ دوازدھمی تبک ءِ نودربرے بیتگ ءُ وتی وانگ سر ءَ دلگوش بیتگ-

آئی ءِ گْھار ماہ پارہ بلوچ ءَ گْوشتگ کہ نصیب اللہ ھاسکار بلوچ بیگ سزا ءَ ورگ ءَ اِنت ءُ آزارجاھاں بند اِنت-

ماہ پاراہ بلوچ ءَ گوشتگ کہ نصیب اللہ آوار جنی ھلاپ ءَ سرجمیں کانودی گیچین کتگ اَنت، بلے آمیدگس ءُ ادارہ بے بس گندگ آیگ ءَ اَنت اگاں نصیب اللہ سر ءَ چُشیں جرمے ھست گُڑا آئی ءَ آمیدگس ءَ پیش بہ کن اَنت، بلے دہ سال ءِ گوزگ ءَ اَبید مارا انساپ نہ رس اِتگ-

ترانکارانی گْوشگ اِنت کہ بلوچستان ءَ زورانسری آوار جنی ءِ دْرچ بازیں دھکاں چہ برجاہ ءَ اِنت، چریشی ءَ ھزارانی کھول اسرمند اَنت- انسانی ھکانی گلانی رِد ءَ بلوچستان ءَ چل ھزار ءَ چہ گیش مردم زورانسری آوار جنی ءِ نشانگ کنگ بیتگ اَنت آیانی تہ ءَ اِھوالکار ءُ سیاسی راھشون ھوار اَنت-

آئی ءَ گوشتگ کہ انسانی ھکانی گل ءُ میانی استمانی مردم بلوچستان ءَ زورانسری آوار جنی سر ءَ دلپدردی درشان کتگ – زھرشانی کنوکاں میان استمانی مردماں چہ لوٹ کتگ کہ آ پاکستان سر ءَ زور بدے اَنت زورانسری آوار جنی ءِ جیڑہ ءُ بہ گشین اَنت-

مروچگیں زھرشانی ءِ ھمراھی ءَ شپ ھشت ءَ بگر تاں دوازدہ ءَ نصیب اللہ بادینی ءِ آوار جنی ءِ ھلاپ ءَ یک رسانکدرے مھمے ایکس سر ءَ برجم دارگ بیتگ-

بلوچ یکجھتی کمیٹی ءِ بُنجاھی سروک ڈاکٹر ماہ رنگ بلوچ ءَ گوشتگ کہ ریاستی چُکچینی ءِ پالیسیانی ھلاپ ءَ بلوچ ءَ مھکم ءُ یکجاہ بیگ ءُ پڑ ءَ درکپگ لوٹ اِیت، ریاست ءِ گور ءَ تھنا دو پالیسیاں یکے مڈیانی لُٹ ءُ پُل دومی بلوچ ءِ چُکچینی-

اے ھیال ءُ لیکھانی درشان آئی ءَ یکشمبے ءِ بیگاہ ءَ بلوچ یکجھتی کمیٹی ءِ کیچ ءَ برجم شھید فدا چوک تربت سر ءَ شھید بالاچ مولابخش ءِ اولی سال روچ درگت ءَ چہ سیمینار ءَ چہ تران کتگ-

ڈاکٹر ماہ رنگ بلوچ ءَ گْوشتگ کہ بلوچستان ءَ گوستگیں دو دھکاں چہ لاشانی دور دیگ درچ برجاہ ءَ اِنت، شھید بالاچ ءِ لاش بے وارس سرپد بیگ ءُ دور داتگ بلے شھید بالاچ ءِ کھول ءَ لاش بے تواری ءَ کل ءُ کسارت کنگ ءِ جاہ ءَ زھرشانی ءِ راہ دْرچتگ، بیست سے نومبر ءَ چہ شش دسمبر دوہزار بیست سے ءَ تاں لاش ءِ ھمراھی ءَ نندانک داتگ، کیچ ڈن ءَ درتکگ ءُ پدر کتگ کہ بالاچ مئے ئیگ اِنت – اشی ءَ پد تربت ءَ چہ اسلام آباد ءَ لانگ مارچ کتگ، یک سالے ءِ میان ءَ اے جُھد دیم ءَ شتگ، اے جُھد یک نوکیں پدریچے ءِ ھاتر ءَ اِنت-

آئی ءَ گوشتگ کہ گوستگیں یک سالے ءِ میان ءَ دو سد ءَ گیش بلوچ ورنا بیگواہ کتگ اَنت، بلوچ ءِ ھرچ لوگ ءِ درد ءِ نشان جوڑ کتگ، آئی ءَ گوشتگ کہ بلوچستان ءَ یکشل ءَ ریاستی زوراکی برجاہ ءَ اِنت بلے اشی ءَ اَبید پاکستان ءِ وتگڑیں زانتکار ءُ اِھوالکار تُرندیں لشکر کشی ءِ لوٹ ءَ کنگ ءَ اَنت، بلوچ تُرس ءَ چہ وتی دل ءَ در بکن اَنت، اے زوراکانی دیم پہ دیم ھاتر مھکم ءُ یکجاہ بیگ ءَ اَبید بلوچ چکچینی ءِ راہ ءِ دارگ ممکن نہ اِنت، چُکچینی ءِ گر ءُ دار ھاتر ءَ تُرند ءَ چہ تُرندتریں دیمونی ھاتر ءَ جاڑیگ بہ بنت-

آئی ءَ گوشتگ کہ بلوچ اگاں اے وڑ بے توار بہ بنت گُڑا گیش زُلم ءِ نشانگ کنگ بنت، بے لوگ کنت لوگاں ماندار اِیت، آواران ءَ بچار اِت کہ اشی ءِ کجام جاوراں جوڑ کتگ-

ماہ رنگ بلوچ ءَ گْوشتگ کہ مروچی آواران ءَ دلجان ءِ یل کنائینگ ھاتر ءَ زھرشانی برجاہ ءَ اِنت سرجمیں آواران بند کتگ، نیٹورکس بند کتگ اَنت بلے بژن گپ اش اِنت کہ دلجان ءِ کماشیں پت ءِ بیھار دیوک یک بلوچ زالبولے، ھما بلوچ زالبول کہ آ سرکار ءَ یک اوھدے داتگ تو برو اشانی سر ءَ زوراکی ءِ راہ ءَ پچ کن-

آئی ءَ گوشتگ کہ فورتھ شیڈول، دفعہ 144 پنجاپ ءِ مردماں تُرسینت کن ئے بلوچ چہ اشاں نہ تُرس اَنت-