TBP Balochi

بلوچ یکجھتی کمیٹی ءِ چیردستی ءَ دفاع بلوچ اقدار ” ءِ نام ءَ بلوچستان ءِ بازیں ھند ءُ دمگاں سرپدی ءُ زھرشانی روانکانی درچ برجاہ انت –

بلوچ یکجھتی کمیٹی (حب زون) ءِ نیمگ ءَ کراچی ءِ دمگ لیاری ءَ پولیس ءِ کریک ڈاؤن ءُ ملیر روانک ءَ بھر زوروکیں دمگی مردمانی نام ءَ دروگیں ارزی ءُ دزگیری ءِ بگیری ءَ ھب چوکی ءَ روانکے کشگ بوتگ ءُ زھرشانی کنگ بوتگ –

روانک ءَ ھواریں درنگاز کنوک مزنیں کچے ءَ اتکگ ءُ ھب پریس کلب ءِ دیم ءَ مُچ بوتگ انت کہ اودا مدامی وڈا واکداراں زھرشانی ءِ بے سوب کنگے جھد کتگ ءُ بُچانی گاڑی ءُ فائر برگیڈ گاڑی راھے سر ءَ آؤرتگ ءُ اشتارینتگ انت -.

بلے پدا ھم درنگاز کنوکاں درسیں اڈاند سرگوز کتگ ءُ روانک سوبین کتگ کہ شھر ءِ بازیں دگانی سر ءَ اوگام جتگ ءُ پریس کلب ءِ دیم ءَ مُچ بوتگ نندانک جتگ –

ھمے وھد ءَ مھلوک ءَ گوں تران کنان ءَ بلوچ یکجھتی کمیٹی ھب زون ءِ آرگنائزر ءُ بیگواھیں راشد حسین ءِ گھار زتک ماہ زیب بلوچ ءُ چہ کراچی ءَ بالاچ بلوچ ءَ گوں مھلوک ءَ لوٹ کتگ کہ بیست ءُ پنچ جنوری ءِ ماں ڈالبندین ءَ بؤکیں راجی مُچی ءَ بھر بہ زور انت –

ھمے وڈ بلوچ یکجھتی کمیٹی چاگی زون نیمگ ءَ ھم ڈالبندین ءَ “دفاع بلوچ اقدار” نام ءَ یک روانک ءِ کش اِتگ کہ عرب مسیت ءَ بندات بوتگ ءُ اوگام جنان ءَ قاسم خان پٹ سر بوتگ انت –

روانک ءَ بنجاھی رھشون ڈاکٹر صبیحہ بلوچ ھم ھوار بوتگ ءُ درنگاز کنوکاں چہ مھلوک ءَ لوٹ کتگ کہ مزنیں کچے ےَ ڈالبندین ءَ سر بہ بنت ءُ زرمبشت ءِ بھر جوڈ بہ باں –

زانگ بہ بیت لھتے روچ ساری کراچی دمگ لیاری ءَ پولیس ءَ بلوچ یکجھتی کمیٹی ءِ سر ءَ کریک ڈاؤن کتگ ءُ بازیں مردین ءُ زالبولے دزگیر کتگ کہ آئی ءِ بگیری ءَ بلوچ یکجھتی کمیٹی ءَ ” دفاع بلوچ اقدار” نام ءَ زھرشانی زرمبشت ءِ جار جتگ بوتگ –

پولیس ءِ نیمگ ءَ کتابی میڑھانی سر ءَ بیڑ برگ، چار بلوچ نودربرانی درکانودی دزگیری ءُ آیانی ارزی نبشتہ کنگ ءِ بگیری ءَ نودربراں بازیں جاھاں زھرشانی ءُ روانک کش اِتگ –

گوادر ءَ بلوچ اسٹوڈنٹس ایکشن کمیٹی ءِ کتاب کاروان ءِ رِد ءَ برجاھیں کتابی میڑھے ءِ سر ءَ پولیس ءَ بیڑ برگ ءُ آیانی لٹ شاپ کنگ ءُ نودربرانی دزگیری ءِ بگیری ءَ تربت، گوادر، شال ءُ ڈیرہ مراد جمالی ءَ بلوچ نودربراں مزنیں کچے ءَ روانک کش اِتگ ءُ زھرشانی کتگ –

درنگاز کنوکاں نارہ جتگ ءُ نودربرانی یل کنگے لوٹ کتگ ءُ آیانی بگیری ءِ ارزی ھلاس کنگ ءِ کوٹ کتگ –

گوادر ءَ بلوچ اسٹوڈنٹس ایکشن کمیٹی ءِ نیمگ ءَ کنگ بوتگیں زھرشانی ءَ نودربراں پولیس ءِ کتابانی سر ءَ بیڑ ، آیانی ترسینگ ءُ دزگیری ءِ بگیری ءَ زھرشانی کتگ –

نودربراں گوشتگ کی زانت ءِ دیمروئی جھد جرمے کنگ بوتگ کہ ایرجنگی انت –

تربت یونیورسٹی ءِ نودربراں ھم زھرشانی کنان ءَ روانکے کش اِتگ کہ اودا جنک ءُ بچکیں نودربراں مزنیں کچے ءَ بھر زرتگ، درنگاز کنوکاں کتابی سر ءَ بیڑ ریاستی زوراکی ءِ گوشتگ ءُ ایرجتگ ءُ نودربرانی یل کنگے لوٹ کتگ –

ھمے وھد ءَ شال ءُ ڈیرہ مراد جمالی ءَ ھم نودربرانی نیمگ ءَ زھرشانی کنگ بوتگ – کہ اودا درنگاز کنوکاں سرکار ءُ پولیس ءِ اے رؤیش زانت دژمنی ءِ گوشتگ –

بلوچ اسٹوڈنٹس ایکشن کمیٹی ءَ گوشتگ کی بلوچستان کتاب کاروان ءِ رِد ءَ کتابانی وانگی جھدے سر ءَ اُرش ءُ نودربرانی دزگیری ریاستی زوراکیانی درور ایں –

گل ءِ رِد ءَ کتابانی رواج دیگ ءِ دارگ زانت دژمنی گڈی سیمسر انت ءُ اشی ءِ بگیری ءَ زرمبشت برجاہ مان ایت –

زانگ بہ بیت گوادر ءَ پولیس ءَ کتابی میڑھے ءِ سر ءَ بیڑ برتگ ءُ نودربر جتگ انت ءُ ترسینتگ انت ءُ دزگیر کتگ انت پدا آیانی دروگیں ارزی ھم نبشتہ کتگ –

اے وئیلانی بگیری ءَ بلوچستان ءِ بازیِ شھراں زھرشانیانی درچ برجاہ انت کہ اودا نودربراں ھوار لس مھلوک ھم مزنیں کچے ءَ بھر زورگ ءَ انت –

بلوچستان ءِ تیاب دپی شھر گوادر ءَ سلاہ بندیں مردماں پولیس ءُ کسٹم کارمندانی سر ءَ اُرش کتگ ءُ سلاہ ءُ سامان دستیگ کتگ اَنت-

گیشیں ھالانی رِد ءَ کوسٹل ھائی وے نلینٹ زیرو پوائنٹ نزیک ءَ کوسٹل ھائی وے پولیس ءُ کسٹم پوسٹ سر ءَ ناشناسیں مردماں اُرش کتگ سلاہ ءُ سرکاری گاڑی برتگ اَنت ءُ ھما دمان ءَ تتکگ اَنت-

پچ کپتگ سامانانی تہ ءَ کسٹم ءُ کوسٹل ھائی وے پولیس ءِ پستول، ایس ایم جی ءُ گاڑی ھوار اَنت-

پوج ءَ وئیل ءَ پد دمگ انگر ءَ کتگ اُرشکارانی پٹ ءُ پول بندات کتگ-

زانگ بہ بیت بلوچستان ءَ اے وڑیں وئیلانی تہ ءَ گیشی گندگ کئیت ھمے ماہ ءَ کچھی، پنجگور ءُ تربت ءَ اے وڑیں وئیل دیم ءَ اَتکگ اَنت اود ءَ سلاہ بندیں مردماں پوج ءِ سلاہ برتگ اَنت-

تربت ءُ کچھی ءَ بیتگیں وئیل زمہ واری بلوچ آجوئی لوٹوکیں سلاہ بندیں گلاں زرتگ اَنت بلے پنجگور ءُ مروچی ءَ گوادر ءَ بیتگیں وئیل زمہ واری انگت ھچ گل ءَ نہ زرتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک درشانے ءَ گْوشتگ کہ مئے سرمچاراں نوشکی ءُ دکی ءَ سے جتاجتائیں اُرشاں زورگریں پاکستانی پوج ءُ مڈی بروکیں گاڑی نشانگ کتگ اَنت، چریشی ءِ آسر ءَ پنچ دُژمنیں کارمند مرتگ اَنت ءُ شش گاڑیاں تاوان رس اِتگ-

جارکش ءَ گْوشتگ کہ بلوچ لبریشن آرمی ءِ سرمچاراں مروچی نیم روچ وھد ءَ نوشکی شھر ءِ نزیک غریب آباد بائی پاس ھند سر ءَ زورگریں پاکستانی پوج ءِ سے گاڑیانی ھمگرنچیں کاروان سر ءَ سنگر گپتگ ءُ اُرش ءِ نشانگ کتگ، دُژمنیں پوج ءِ یک گاڑی یے تچکی ءَ اُرش ءِ تہ ءَ کپتگ-

جارکش ءَ گْوشتگ کہ بی ایل اے ءِ سرمچاراں دُژمنیں پوج ءَ را وتکار ءُ گرینیڈ لانچر ءَ چہ نشانگ کتگ، چریشی ءِ آسر ءَ یک دُژمنیں کارمندے یے جاہ پہ جاھی مرتگ ءُ کم چہ کم سے ٹپی بیتگ اَنت-

جارکش ءَ گْوشتگ گوستگیں شپ ءَ بلوچ لبریشن آرمی ءِ سرمچاراں نوشکی ءَ زور آباد نزیک ءَ بُنجاھی شھدگ سر ءَ بلوچ راجی مڈیانی لُٹ ءُ پُل ءَ ھوار پنچ گاڑیانی سر ءَ اُرش کتگ – سرمچاراں سے گاڑی مانداشتگ ءُ تباہ کتگ اَنت وھدے کہ دو گاڑی تیرگواری کتگ ءُ ناکاراہ کتگ اَنت-

جارکش ءَ گْوشتگ ھمے وڑ گوستگیں شپ ءَ بلوچ لبریشن آرمی ءِ سرمچاراں دکی ءَ زورگریں پوج ءِ کاروان سنگر گپتگ ءُ اُرش ءِ نشانگ کتگ-

جارکش جیئند بلوچ ءَ گْوشتگ کہ سرمچاراں پاکستانی پوج ءِ دوازدہ گاڑیانی ھمگرنچیں کاروان مزنیں ءُ ٍوتکاریں سلاھاں چہ نشانگ کتگ اَنت، چریشی ءِ آسر ءَ کم چہ کم چار دُژمنیں پوج کارمند مرتگ اَنت-

جارکش ءَ گُڈی ءَ گوشتگ کہ بلوچ لبریشن آرمی اے اُرشانی زمہ واریاں منّ اِیت-

شال ءَ نامداریں سوشل میڈیا ایکٹوسٹ ءُ چھوٹی چڑیا ویب میڈیا ءَ بندوکیں بایزید خان خروٹی کوئلہ پھاٹک ءِ ھند ءَ ناشناسیں مردماں آوار جتگ-

چمدیستگیں مردمانی رد ءَ لس پوشاکی مردماں وتی پجار ایف آئی اے ءِ کارندھانی نام ءَ کتگ ءُ گوشتگ دزگیری آمیدگس ءِ وارنٹ ءِ بنیاد ءَ کنگ بیتگ-

چمدیستگیں مردمانی رد ءَ دزگیری ءِ وھد ءَ ھچ کارندہ وتی وردیاں نہ بیتگ انت ءُ ناشناسیں مردماِ بایزید خان خروٹی ءَ را ہتھکڑی جتگ ءُ ناشناسیں جاھے ءَ برتگ-

ھمے وھد ءَ مردماں بایزید ءِ پچگرگ ءِ جھد کتگ گڑا ناشناساں تیرگواری کتگ-

دمگی مردماں گوشتگ ایف آئی اے والا گوشتگ کمشنر شال ءِ ھلاپ ءَ چھوٹی چڑیا میڈیا ءِ ھالانی جست ءُ پرس ءَ بایزید خروٹی دزگیر کگھ-

بلے ایف آئی اے ءَ داں انگت ءَ آئی ءِ دزگیری ءِ اھوال راست نہ کتگ –

دومی نیمگ ءَ بلوچستان سرکار ءِ جارکش شاھد رند ءَ گوشتگ بایزید خروٹی ءِ دزگیری ءَ بنجاھی سرکار ءَ ھچ سیادی نیست انت ءُ نانکہ سرکاری مھکمھاں اے کاروائی کتگ-

بایزید خروٹی ءِ دزگیری ءَ پد مھلوک برانز گپتگ ءُ ھیزی چوک روانی ءِ واستا بندش کتگ-

زھرشانی کنوکانی گوشگ انت بایزید خان خروٹی زوت یل کنگ بہ بیت انت-

بلوچستان ءِ دو جتاجتائیں دمگ دکی ءُ نوشکی ءَ پاکستانی پوج ءِ کاروانانی سر ءَ سلاہ بندیں مردماں اُرش کتگ-

گیشیں ھالانی رِد ءَ مروچی نوشکی ءِ دمگ غریب آباد ھند سر ءَ پاکستانی پوج ءِ کاروان نشانگ کنگ بیتگ-

اِھوالکار رِد ءَ نوشکی غریب آباد بائی پاس ءِ نزیک ءَ پیسر ءَ چہ سنگر گپتگیں ناشناسیں مردماں پاکستانی پوج ءِ کاروان نشانگ کتگ-

ھال اِنت کہ اُرش ءَ پوج ءَ تاوانانی دیمپانی اِنت بلے واکدار درشان انگت دیم ءَ نیتکگ-

ھمے وڑ گوستگیِں شپ ءَ دکی ءَ دہ گاڑیانی کاروان ءِ ھمگرنچیں پاکستانی پوج ءِ کاروان سر ءَ سلاہ بندیں مردماں اُرش کتگ-

دمگی اِھوالکار رِد ءَ اُرش وھد ءَ تُرندیں تیرگواری ءُ تراکانی توار اش کنگ بیتگ-

تنی وھدے دوئیں اُرشانی زمہ واری ھچ گل ءَ نہ زرتگ اَنت-

بلوچستان ءِ دمگ پنجگور ءَ گوستگیں شپ ءَ سلاہ بندیں مردماں لیویز فورس ءِ چوکی دستیگ کتگ-

پنجگور ءَ پل آباد ءِ دمگ ءَ سلاہ بندیں مردماں لیویز کارمندانی سرجمیں سلاہ ءُ دگہ ساز ءُ سامان وتی ھمراھی ءَ برتگ اَنت وھدے کہ روگ وھدے کہ تھانہ ھم مانداشتگ-

واکدار ءَ وئیل درگت ھچ وڑیں درشان شنگ نہ بیتگ-

ھمے ماہ ءَ بلوچستان ءَ اے پنچمی وئیل اِنت کہ لیویز فورس ءِ چوکیاں ءُ تھانہ ءَ دستیگ کنگ کارمندانی سلاہ برتگ اَنت اے وئیل زھری، تربت، ڈھاڈر ءُ پنجگور ءَ بیتگ اَنت-

گوستگیں روچاں بلوچ لبریشن آرمی ءَ ھُزدار ءِ تھسیل زھری ءِ شھر دہ کلاکاں چہ گیش وتی دست ءَ کتگ کہ اود ءَ لیویز تھانہ، نادرا کارگس، میونسپل کمیٹی ءُ بینک بلوچ آجوئی لوٹوکاں وتی دستیگ کنگ ءَ پد مانداشتگ اَنت-

بلوچستان ءِ تیابدپی شھر گوادر ءَ گوستگیں روچ ءَ ڈھوریہ اسکول ءِ دیم ءَ کتاب اسٹال ءِ برجم کنگ ءِ پژدر ءَ چار نودربرانی نام ءَ ایف آئی آر نبشتگ کنگ بیتگ انت-

زانگ بہ بیت گوستگیں روچ ءَ پولیس ءَ کتاب اسٹال ءِ سر ءَ بیڑ برتگ ءُ نودربر گوں کتاباں دزگیر کتگ انت ءُ پد پولیس ءَ یل دیگی کتگ انت بلے چیریں ادارھسں نودربر واتر داشتگ انت ءُ جست ءُ پرس کتگ ءُ مروچی آ ایف آئی آر کنگ بیتگ انت-

بساک ءَ ایف آئی آر ایر جتگ ءُ گوشتگ کہ بیت کنت دنیا ءِ اولی وئیل انت کہ کتاب اسٹال ءِ برجم کنگ ءُ الم ءِ بالینگ ءَ نودربر ایف آئی آر بنت ءُ جیلاں رو انت-

زاھدان ءِ زندان ءَ کوش ءِ بھتام ءَ بندیگیں دو مردم پاھو ءِ زندان ءَ آجو بیتگ اَنت-

سیستان و بلوچستان ءِ جیڑھانی گیشینوکیں ادارہ ءِ سروک حمید رضا بندانی ءَ گوشتگ دو مردم بندیگانی وت ماں وتی سِلاہ بوگ ءَ اَچ پاھو ءِ زندان ءَ آجو بیتگ اَنت-

ایرنا نیوز ءِ رد ءَ رائیس مرکز جیڑھانی گیشنوک ءَ گوشتگ ھردوکیں ٹکانی وت ماں وتی سِلاہ ءَ پد اے بندیگ اَچ پاھو ءِ زندان ءَ کشگ بنت ءُ یل دیگ بنت اِنت-

زانگ بہ بیت روکپتی بلوچستان ءَ سال 2024 ءَ پاھو ءَ بچ اتگیں ھپت مردم یل بیتگ انت اے مردم کوش ءِ بھتاماں گرگ بیتگ انت ءُ پد ءَ ٹکاں وت ماں وتی دست ءُ دروتی ءَ سِلاہ کتگ-

بلوچ راج ءِ جیڑہ ءُ جاور: زلم ءِ ویراندگاں انساپ ءِ شوھازگ

نبشتہ کار: ڈاکٹر مھرنگ بلوچ

رجانکار: بلوچ داد

دی بلوچستان پوسٹ

چُکچینی ایوک ءَ یک گالبندے نہ اِنت بلکیں انسانی راجدپتر ءِ یک المی ئیں درے کہ مئے آیوکیں باندات ءِ سر ءَ جُست ایر کنت. اے ھمے ایردستانی کسہ اِنت کہ آیانی ھستی ءِ گار کنگ ءِ جھد بوتگ. چُکچینی ءِ بزانت ایوک ءَ جسمانی ءِ کُشگ نہ اِنت، بلکیں اے یک سرجمیں راجے ءِ پجار ءَ ھلاس کنگ اِنت، آیانی مڈّیانی پُلگ، ءُ آیانی دود ءُ ربیدگ ءِ ولگوج کنگ ءِ مھکمیں شوربندی یے-

بلوچستان،کہ سُھر، تانبہ، گیس، ءُ مڈّیانی بنجل ءَ چہ مالا مال اِنت، مروچی یک انچیں جنگے ءِ پِڑّے ءَ جوڑ بوتگ کہ اے جنگ زوراک ءِ نپانی ءُ ایردستے ھستی ءِ رکینگ ءِ ھاتر ءَ برجاہ اِنت بلوچ راج، کہ اے سرڈگار ءِ وارس اِنت، نہ ایوکا ءَ وتی مڈیاں چہ بے مراد اِنت بلکیں چہ وتی آجوئی، چہ وتی دود ءُ ربیدگاں، ءُ وتی زبان ءِ ھک ءَ چہ ھم بے مراد کنگ بوگ ءَ اِنت-

چُکچینی یک گام جنوکیں گامگیجے اے یک انچیں بے تواریں شوربندی یے کہ کم کم ءَ یک راجے ءِ بُن ھِشتاں ھلاس کنت. بلوچ راج ءِ گوم ءَ انچوش بوگ ءَ اِنت ایشانی میتگ سوچگ بوگ ءَ اَنت، ایشانی ورنا بیگواہ کنگ بوگ ءَ اَنت، ایشانی مات وتی چکانی ھاتر ءَ تلوسگ ءَ اَنت، ءُ ایشانی مڈی لٹ ءُ پل کنگ بوگ ءَ انت ایشاں نا گیش پدمنتگی ءَ چگل دیگ بوگ ءَ اِنت ھمے سوب اِنت کہ ما ساپ ساپ سرجمیں دنیا گوں ساپیں لبزاں ءَ گوشگ ءَ ایں کہ پاکستانی لشکر بلوچ راج ءِ چُکچینی ءَ گنگ ءَ اِنت-

چُکچینی ءِ بیمناکتریں دروشم زورانسری گار ءُ بیگواہ کنگ اِنت ھزاراں بلوچ مردین،جنین، ءُ چُک مروچی ءَ تک بیگواہ اَنت ایشانی مات ءُ پتانی ارس ءُ ایشانی برات ءُ گوھارانی پریات ءُ زاری اے راستی ءِ گواھی اِنت کہ ریاست ءِ زوراکی ءَ ھَدّ ءُ سیمسر گوازینتگ اَنت اے بیگواھیانی مکسد ایوک ءَ ترس ءِ ودی کنگ نہ اِنت بلکیں بلوچ راج ءِ آجوئی ءِ جھد ءِ ھلاس کنگ اِنت-

بلے اے زوراکی ایوک ءَ جسمانی نہ اَنت. چُکچینی ءِ دگہ مھکمیں دروشمے ماشی لٹ ءُ پل اِنت. کجام ھم راج ءِ مڈّیاں لٹ ءُ پل کنگ، آیانی زمین ءَ کنجر کنگ، ءُ آیانی راج ءَ را گریبی ءِ تھاری ءِ تہ ءَ دور دیگ ھم چُکچینی ءِ یک دروشمے. بلوچستان ءِ تہ ءَ ماشی لٹ ءُ پل ءِ باز درور ھست اَنت، بلے ریکوڈک ءُ سیندک پروجیکٹ ایشانی بدتریں مثال اَنت-

ریکوڈک، کہ دنیا ءِ مستریں سُھرے ءُ تانبہ ءِ ذخیرھانی تہ ءَ ھوار اِنت، پہ بلوچ راج ءَ دیمروی ءُ وشھالی ءِ وسیلہ بوت کن اَنت بلے مروچی اے پروجیکٹ پاکستانی ریاست ءُ دری کمپنیانی میان ءَ لٹ ءُ پل ءِ مرکز جوڈ بوتگ. اد ءَ چہ درکپتگیں مڈیاں پاکستان ءُ دگہ تاکت نپ چست کنگ ءَ اَنت، چوشکہ بلوچ راج ساپیں آپ، جان سلامتی ءِ آسراتی، ءُ وانگ ءُ زانگ ءِ وڑیں بنیادی ھکاں چہ زبھر اِنت-

ھمے رنگ ءَ سیندک ءِ شوربندی ماشی لٹ ءُ پل ءِ بدتریں درور اِنت چہ اد ءَ ھمک روچ لکّانی ڈالر ءِ مڈی در کنگ بیت، بلے ایشانی نپ جاھمندیں مکلوک ءَ سر بوگ ءَ نہ اَنت بلکیں پاکستانی ریاست ءُ درملکی تاکتانی گور ءَ سر بوگ ءَ اَنت اے شوربندیاں چاگی ءِ مردماں گژنگی، بے روزگاری ءُ جان سلامتی ءِ جیڑھاں تھاری ءَ دور داتگ-

اے دوئیں شوربندی اے گپ ءِ گواھی انت کہ اے ماشی چُکچینی ءِ بے تواریں دروشم اَنت بلوچ راج ءِ زمین زھریں کیمیکلاں گوں گند کنگ بوتگ اَنت، آیانی چُک جان سلامتی ءِ جیڑھاں دوچار اَنت، ءُ آیانی زندگی گیشتر پدمنتگیانی تہ ءَ دور دیگ بوتگ-

شھزانتی ھم مارا اے سرپدی ءَ دنت کہ انساپ کجام ھم راج ءِ زندگ بوگ ءِ ھاتر ءَ المی اِنت ارستو ءَ گوشتگ کہ انساپ ءِ بزانت ھر یک مردمے ءُ راجے ءَ را آئی ءِ ھک ءِ دیگ اِنت بلے وھدے کہ یک راجے ءِ ھک پچ گرگ بنت، آیانی زمین چہ آیاں پُلگ ءُ دگرانی دست ءَ دیگ، ءُ آیانی مڈیانی لٹ ءُ پل کنگ، گڑا اے نہ انساپی انسانیت ءِ بنکی راھبندانی ھلاپ ءَ مزنیں گناھے بیت-

بلوچ راج ءِ سر ءَ بیوکیں زوراکی مارا جیڑگ ءَ لاچار کنت کہ ما کجا روگ ءَ ایں ما بے توار تماشائی بئیں، یا ما پہ ایردستاں وتی توار ءَ چست کنیں، ھما اِنت کہ آیانی توار ءِ ھاموش کنگ ءِ جھد بوگ ءَ اِنت ؟ مروچی وھد اِنت کہ ما وتی زمہ واریاں سرپد بہ بئیں ءُ زوراکی ءِ دیم ءَ بہ اوشتیں-

منی بلوچ گوھار ءُ براتاں، اے وھد ھاموشی ءِ نہ اِنت بلکیں جدوجھد ئیگ اِنت مارا وتی درجھانی تہ ءَ تپاکی پیداک کنگ لوٹ اِیت راجدپتر مارا اے سوج دنت کہ وھدے راج یکمشت بنت، گڑا آ مزنیں مزنیں زلم ءُ زوراکیانی دیم ءَ اوشتات کن اَنت. مارا وتی دود ءُ ربیدگ، وتی زبان، ءُ وتی مڈیانی رکینگ ءِ ھاتر ءَ پاد آیگ لوٹ ایت-

بلوچ ورنایاں وانگ ءُ زانگ، سرپدی ءُ جد و جھد ءِ وسیلہ ءَ وتی ھکانی ھاتر ءَ توار چست کنگی اِنت مارا وتی مڈیانی سر ءَ مستری ءِ ھاتر ءَ جد ءُ جھد کنگی اِنت، چوکہ آ میان استمانی پلیٹ فارمز ءِ سر ءَ بہ بیت یاکہ بنجاھی تک ءَ مارا وتی جد ءُ جھد ءَ دنیا ءِ دیم ءَ آرگی اِنت کہ دنیا اے سرپد بہ بیت کہ بلوچ راجے گوم ءَ چے بوگ ءَ اِنت-

اے وھد ھاموش بوگی نہ اِنت اے وھد وتی سرزمین، وتی پجار، ءُ وتی زندگ بوگ ءَ میدان ءَ ایر کپگی اِنت زوراکی ءِ سانکل تھنا ھما وھد ءَ پروش اَنت وھدے ایردست وتی ھکانی ھاتر ءَ پاد بیا اَنت مروچی مئے توار پادمال کنگ بوگ ءَ اِنت، مئے زمین چہ مارا پلگ بوگ ءَ اَنت، ءُ مئے دود ءُ ربیدگ گار کنگ بوگ ءَ اِنت بلے ما ھاموش بوت نہ کن ایں ءُ اے زوراکیاں ءَ وتی سر ءَ گیش اوپار نہ کن ایں. مارا وتی زندگ بوگ ءِ ھاتر ءَ، وتی زھگانی آیوکیں باندات ءِ ھاتر ءَ، ءُ وتی اِزت ءُ شرپ ءِ رکینگ ءِ ھاتر ءَ یکمشت بوگ ءُ اے جد ءُ جھد ءَ تہ ءَ ھوار بوگی اِنت-

منی گوں شما درستاں دزبندی اِنت، کہ شما ھر کجا اِت، وتی لوگاں چہ در کپ اِت، وتی توار ءَ برز بہ کن اِت، ءُ اے زرمبش ءَ ھوار بہ بیت کہ پہ بلوچ راج ءِ زندگ دارگ ءِ ھاتر ءَ. اے جنگ ایوک ءَ پہ لھتیں مردماں نہ اِنت، اے پہ مئے سرجمیں راج ءَ اِنت وھد اتکگ کہ ما وتی رِد ءُ بنداں مھکم بہ کن ایں ءُ دنیا ءَ اے پیش بہ داریں کہ بلوچ راج نہ سر ءَ جھل کنت ءُ نئیکہ گار ءُ بیگواہ بوگ ءَ اِنت. بیا اِت، زلم ءِ دیم ءَ اوشت اِت، وتی زور ءُ تپاکی ءَ پیش دار اِت ءُ ھما ایردستانی ھاتر ءَ یک رژنائیں باندات ءِ بن ھشت ءَ ایر کن ایں کہ آیانی توار پادمال کنگ بوگ ءَ اِنت-

بلوچ راج ءِ راجدپتر جد ءُ جھد ءُ دلیری ءَ چہ پُر اِنت مروچی مارا وتی اے میراس زندگ کنگی اِنت ھر بلوچے ءِ سر ءَ پرز اِنت کہ آ وتی بھر ءِ کرد ءَ پیلو بہ کنت، بیا اِت، ما درست یکجاہ بئیں اے جنز ءَ سوبمند کنیں، دانکہ مئے آیوکیں پدریچ آزاتیں چاگرے ءَ ساہ بہ زور اَنت- اے وھد یکمشتی، ھمت، ءُ جد ءُ جھد ئیگ اِنت. مروچی ما کجام ھم گام ءَ چست بہ کنیں آ راجدپتر ءَ الماسیں لبزاں گوں نبشتہ بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-