TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں نوشکی، سوراب، چاگی، مشکے، شادی کور، بلیدہ، ھاران، تمپ، مند، ھُزدار، کلات ءُ جھاؤ ءِ دمگاں زورگریں پاکستانی پوج، ملٹری انٹیلی جنس (MI) فرنٹیئر کور (FC) , پوجی چوکی، پولیس تھانہ ءُ کشندہ ٹولی ءِ ھلاپ ءَ پد ماں پد 23 پوجی کاروائی کتگ، پوج ءِ پیشگامی بے سوب کتگ ءُ شھدگانی ناکہ بندی کتگ-

جارکش ءَ گوشتگ 16 اگست 2026 ءَ سرمچاراں نوشکی ءِ دمگ ملّ کوچال ءَ زورگریں پوج ءِ کاروان مزنیں ءُ وتکاریں سلاھاں چہ نشانگ کتگ – اے کاروائی ءِ میان ءَ پوج ءِ دو گاڑی تچکی ءَ نشانگ ءَ اَتکگ، چریشی ءِ آسر ءَ چار پوجی کارندہ جاہ پہ جاھی مرتگ اَنت ءُ دو ٹپی بیتگ اَنت، وھدے کہ دوئیں گاڑی سرجمی ءَ ناکاراہ بوتگ اَنت-

آئی ءَ گوشتگ کہ 15 اگست 2026 ءَ سرمچاراں سوراب ءِ دمگ پدگ ءَ زورگریں پوج ءِ ھشت گاڑیانی کاروان ھما وھد ءَ اُرش ءِ نشانگ کتگ وھدے آ سوراب ءَ چہ درتکگ پارم بُنجل ءِ نیمگ ءَ روگ ءَ بیتگ- اُرش ءِ آسر ءَ کاروان ءَ ھوار سے گاڑی تچکی ءَ نشانگ ءَ اَتکگ اَنت، آیاں سوار شش پوجی کارندہ مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ ھمے روچ ءَ دگہ یک کاروائی ءِ میان ءَ سرمچاراں چاگی ءِ دمگ یکمچ ءَ برجاہ پولیس ءِ تھانہ ءِ سر ءَ اُرش کتگ سرجمی ءَ وتی دستیگ کتگ- سرمچاراں تھانہ ءَ ھستیں سرجمیں ریکارڈاں ھوار وائرلیس ءَ دگہ جائیداد مانداشتگ اَنت، وھدے کہ اود ءَ پولیس کارندہ تُرندی ءَ کڈن کنگ ءَ پد انسانی ہمدردی بُنیاد ءَ یل کتگ اَنت-

جارکش ءَ گوشتگ 14 اگست 2026 ءَ سرمچاراں گومازی ءَ شھید کیپٹن جھانگیر ءِ لوگ سر ءَ برجاہ زورگریں پاکستانی پوج ءِ چوکی نشانگ کتگ بازیں گرینیڈ لانچر ءِ گولہ آس داتگ، اے اُرش ءَ سرجمیں گولہ وتی نشانگ ءَ شتگ ءُ کپتگ اَنت چریشی ءِ آسر ءَ زورگریں پوج ءَ جانی تاوان چست کنگ کپتگ-

آئی ءَ گوشتگ ھمے یکیں روچ ءَ سرمچاراں مشکے ءِ دمگ داھرہ ءَ برجاہ زورگریں پوج ءِ پھازداری چوکی ءِ سر ءَ مزنیں ءُ وتکاریں سلاھاں چہ اُرش کتگ- اے کاروائی ءِ آسر ءَ پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ 13 اگست 2026 ءَ سرمچاراں شادی کور ءَ برجاہ زورگریں پوج ءِ کبڈی بُنجل ءِ سر ءَ گرینیڈ لانچر ءَ چہ بازیں گولھے آس داتگ کہ وتی نشانگ ءَ کپتگ اَنت، چریشی ءِ آسر ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گوشتگ ھمے روچ ءَ مئے سرمچاراں بلیدہ ءِ دمگ بِٹ ءَ برجاہ زورگریں پاکستانی پوج ءِ بُنجاھی بُنجل 107mm راکٹ گولہ ءَ چہ نشانگ کتگ – آس داتگیں راکٹ وتی نشانگ ءَ کپتگ اَنت، چریشی ءِ آسر ءَ دُژمن ءِ یک گچین ءِ پھازدی سنگرے سرجمی ءَ تباہ بوتگ، وھدے کہ سنگر ءَ ساڑی دو کارندہ جاہ پہ جاھی مرتگ اَنت ءُ بُنجل ءَ ھستیں آ دگہ کارمند ٹپی بوتگ- اشی ءَ اَبید بُنجل ءِ توک ءَ اوشتوکیں زورگریں پوج ءِ بازیں گاڑیاں ھم تاوان رس اِتگ-

جارکش ءَ گوشتگ اشی ءَ اَبید سرمچاراں ھاران ءِ شھر ءِ سکیں ھاس ریڈزون ءَ برجاہ ملٹری انٹیلی جنس (MI) ءِ کارگس ءِ سر ءَ گرینیڈ لانچر ءَ چہ پنچ گولہ آس داتگ کہ وتی نشانگ ءَ کپتگ اَنت- اے کاروائی ءِ آسر ءَ زورگریں پوج ءِ کارندھاں جانی ءُ مالی تاوان چست کنگ کپتگ-

جارکش ءَ گوشتگ کہ مئے سرمچاراں ھاران ءِ شھر ءَ تُرندیں پھازداری ءَ برجاہ فرنٹیئر کور (ایف سی) ءِ بُنجاھی ھیڈکوارٹر ھم گرینیڈ لانچر ءَ چہ نشانگ کتگ، چریشی ءَ چہ زورگریں پوج ءَ جانی ءُ مالی تاوان چست کنگ کپتگ-

آئی ءَ گوشتگ کہ ھمے روچ ءَ دگہ یک کاروائی ءَ سرمچاراں تمپ ءِ دمگ آسیاآباد ءَ برجاہ زورگریں پوج ءِ چوکی راکٹ لانچراں چہ نشانگ کتگ- اے کاروائی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ دگہ یک کاروائی ءَ سرمچاراں مند ءِ دمگ گوَک ءَ برجاہ چیک پوسٹ ءِ سر ءَ گرینیڈ لانچر ءَ چہ آس داتگ، چریشی ءِ آسر ءَ دُژمن ءَ جانی ءُ مالی تاوان چست کنگ کپتگ-

آئی ءَ گوشتگ کہ اشی ءَ اَبید مئے سرمچاراں مند ءِ دمگ کوہ ڈگار ءَ بُنجاھی شھدگ سر ءَ ناکہ بندی کتگ گاڑی پٹ ءُ پول کتگ اَنت – ناکہ بندی ءِ مول ءُ مراد وتی تاکت ءِ برجاہ دارگ ءُ زورگریں پوج ءُ آئی ءِ کمکارانی سر ءَ نگاہ ایر کنگ بوتگ-

جارکش ءَ گوشتگ دگہ یک کاروائی ءَ سرمچاراں مند ءِ دمگ بلّو ءُ بلوچ آباد ءِ بُنجاھی بازاراں ناکہ بندی کتگ دراجیں وھدے ءَ تاں پٹ ءُ پول کتگ، گاڑیانی پٹ ءُ پول ءُ دمگی راج ءَ گوں تران کنان ءَ راجی جُھد ءِ مول ءُ مراد ءِ درگت ءَ سرپدی داتگ اَنت-

جارکش ءَ گوشتگ 12 اگست ءَ سرمچاراں ھُزدار ءِ دمگ وڈہ کی نمی کنڈگ ءِ ھند سر ءَ سنگر گپتگ ءُ زورگریں فرنٹیئر کور ءِ کاروان مزنیں ءُ وتکاریں سلاھاں چہ نشانگ کتگ- اے کاروائی ءِ میان ءَ ایف سی ءِ یک پک اپ ءُ یک بکتر بند گاڑی یے تچکی ءَ تیرگواری ءِ نشانگ ءَ اَتکگ اَنت، چریشی ءِ آسر ءَ 12 کارمند مرتگ ءُ بازین ئِے ٹپی بوتگ اَنت- مرتگ ءُ ٹپیانی تہ ءَ ایف سی 141 ونگ ءُ 15 ایپ ایپ ءِ کارمند ھوار بیتگ اَنت-

آئی ءَ گوشتگ 11 اگست 2026 ءَ سرمچاراں کلات ءِ دمگ منگچر ءِ بُنجاھی بازار ءَ برجاہ زورگریں پاکستانی پوج ءِ یک گچین ءِ پھازداری چوکی مزنیں ءُ وتکاریں سلاھاں چہ نشانگ کتگ- اے کاروائی ءِ آسر ءَ زورگریں پوج ءِ دو کارمند مرتگ ءُ بازین ئِے ٹپی بوتگ اَنت-

جارکش ءَ گوشتگ کہ ھمیں یکیں روچ ءَ سرمچاراں جھاؤ ءِ دمگ ڈولیجی ءَ برجاہ زورگریں پوج ءِ بُنجل ءِ سر ءَ اسنائپر ءَ چہ اُرش کتگ یک کارندھے کشتگ- پد ءَ سرمچاراں مزنیں ءُ وتکاریں سلاھاں چہ بُنجل ءِ سر ءَ اُرش کتگ، چریشی ءِ آسر ءَ زورگریں پوج ءَ گیش جانی ءُ مالی تاوان رس اِتگ-

جارکش ءَ گْوشتگ کہ 10 اگست 2026 سرمچاراں مند ءِ دمگ گیاب ءَ برجاہ زورگریں پاکستانی پوج ءِ بُنجل ءِ سر ءَ اُرش کتگ آ مزنیں ءُ وتکار ءُ گرینیڈ لانچراں چہ نشانگ کتگ، چریشی ءِ آسر ءَ زورگریں پوج ءَ سک جانی ءُ مالی چست کنگ کپتگ-

جارکش ءَ گوشتگ کہ ھمے روچ ءَ سرمچاراں مند ءِ دمگ بلّو ءَ ھستیں وائی پائی انٹرنیٹ ٹاور ءُ آئی ءِ سرجمیں مشینری تیرگواری کتگ ءُ سرجمی ءَ ناکارہ کتگ اَنت، کہ زورگریں پوج سرمچارانی چاریگی، کواڈ کاپٹر ءُ ڈرون آپریشنز ءُ چاروگی ءِ ھاتر ءَ کارمرز کنگ ءَ بوتگ-

جارکش ءَ گوشتگ 09 اگست 2026 ءَ مئے سرمچاراِں جھاؤ ءِ دمگ ءَ یک گشتے ءَ بوتگ کہ میرانی کور ءِ ھند سر ءَ زورگریں پوج ءُ دمگی کُشندہ ٹولی کارندھاں سرمچارانی راہ ءِ داشتگ ءُ سنگر گپتگ ءُ اُرش ءِ جُھد کتگ بلے جاڑیگیں سرمچاراں پیسر ءَ اُرش کنان ءَ زورگریں پوج ءُ کُشندہ ٹولی ءِ سر ءَ اُرش کتگ- اے میڑ ءِ آسر ءَ کُشندہ ٹولی ءِ بازیں کارندھے مرتگ وھدے کہ زورگریں پوج پُشتکنزی ءَ لاچار بوتگ- پد ءَ سرمچاراں دُژمن ءِ سلاہ ءُ سامان وتی دستیگ کتگ اَنت-

آئی ءَ گوشتگ کہ ھمے روچ ءَ سرمچاراں گومازی ءَ دازی شیپ ءِ ھند سر ءَ سنگر گپتگ زورگریں پوج ءُ کُشندہ ٹولی ءِ ھمگرنچیں کاروان نشانگ کتگ، کہ دمگ پوجی زوراکی مول ءُ مراد ءَ چہ پُترگ ءَ بوتگ اَنت- اُرش ءِ میان ءَ نوکیں سلاہ ءُ گرینیڈ لانچر کارمرز کتگ، چریشی ءِ آسر ءَ زورگریں پوج ءِ دو کارندہ جاہ پہ جاھی مرتگ وھدے کہ زورگریں پوج ءُ کُشندہ ٹولی ءِ باز کارندہ ٹپی بوتگ اَنت-

جارکش ءَ گوشتگ کہ 08 اگست 2026 ءَ ھاران ءِ دمگ کلّگ تنک ءَ زورگریں پاکستانی پوج ءَ راسکوہ ءِ کوھی دْرچ ءِ نیمگ ءَ پیشگامی ءِ جُھد کتگ، کہ کوہ ءُ شھدگانی سر ءَ پیسر ءَ جاڑیگیں سرمچاراں اُرش کتگ ءُ بے سوب کتگ، چریشی ءَ پد زورگریں پوج پُشتکبزی ءَ لاچار بوتگ-

آئی ءَ گْوشتگ 07 اگست 2026 ءَ سرمچاراں ھاران تا یکمچ سی پیک لنک دگ سر ءَ بیگاہ پنچ ءَ بگر داں شپ ءِ نُھ ءَ ناکہ بندی کتگ پٹ ءُ پول کتگ، وھدے کہ سرگُردان، ساراگے ءُ گْواش ءِ جتاجتائیں دمگاں گشت کتگ- اے میان ءَ سرمچاراں سرگُردان ءِ ھند سر ءَ شھید نثار صباء پنّام ءِ میرل ءِ مانش ءِ سر ءَ گل ءِ بیرک مک کتگ ءُ دروت ندر کتگ-

جارکش ءَ گوشتگ کہ 30 جولائی 2026 ءَ سرمچاراں مند ءِ دمگ سورو ءَ برجاہ زورگریں پاکستانی پوج ءِ ملٹری انٹیلی جنس ءِ کارگس سر ءَ گرینیڈ لانچر ءَ چہ اُرش کتگ، چریشی ءِ آسر ءَ ملٹری انٹیلی جنس ءَ جانی ءُ مالی تاوان چست کنگ کپتگ-

گُڈی ءَ جارکش ءَ گوشتگ بی ایل ایف اے سرجمیں اُرشانی زمہ واری ءَ منّ اِیت ءُ اے اِھد کنت کہ چہ بلوچستان ءَ زورگریں پوج ءِ سرجمی ءَ دراھگ ءَ تاں وتی جُھد ءَ گوں تاکت ءَ برجاہ بیت-

بلوچستان ءِ دمگ کیچ ءِ ھند چہ مند ءَ سر بیتگیں اھوالانی رد ءَ مروچی بامسار ءِ ساھت سَے ءَ پوجی آپریشن بندات بیتگ-

دمگی مردمانی رد ءَ مند ءِ کوھی دمگ نھنگ، گرناز شیپ، کرگیٹ، سوری، لوھی کھن، دمبانی، بردست تلار ءُ ترادان ڈن ءَ مروچی بامسار ءِ ساھت سَے بج ءَ پاکستانی لشکر ءَ ٹوھیں کچے ءَ پیشگامی بندات کتگ-

دمگی مردمانی رد ءَ وھد وھد ءِ سر ءَ کوھی دمگاں مارٹر آس دیگ بوگ ءَ انت بلے تنی وھدی دگہ تاوانانی اھوال دیم ءَ نیتکگ انت-

واکدارانی نیمگ ءَ ھم اے تنی وھدی اے درگت ءَ آپریشن ءِ بارو ءَ گپ دیم ءَ نیتکگ انت-

زانگ بہ بیت بلوچستان ءِ دمگ مند ءِ پیم ءَ دگہ جاھاں ھم گوستگیں روچ ءَ پاکستانی پوج ءِ نیمگ ءَ آپریشن ءِ ھال بیتگ انت کہ اود ءَ ڈرون اُرش کنگ بیتگ ءُ جانی تاوانانی اھوال دیم ءَ اتکگ انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سرمچاراں ھشت روچانی تہ ءَ 22 جتا جتائیں کارروائیاں پاکستانی لشکر، ریاستی ’’ڈیتھ اسکواڈ‘‘ ءِ کارندہ ءُ فوجی ءُ زرکاری پریام نشانگ جوڑ کتگ انت۔ اے ترندیں اُرشانی آسر ءَ زورگیریں لشکر ءُ ڈیتھ اسکواڈ ءِ 26 کارندہ مرتگ ءُ بازیں ٹپی بوتگ اَنت ءُ ڈیتھ اسکواڈ ءِ کارندھے زندگی ءَ دزگیر کتگ ۔ سرمچاراں پولیس تھانہ ءُ سیکورٹی پوسٹاں ھوار بازیں پُھل تراکاں فوں تباہ کتگ ءُ کاروائیاں واپاری بندش ءِ چیر ءَ 9 تجارتی ءُ لٹ ءُ پلی گاڑی ناکارہ کتگ اَنت وھدے کہ زورگیریں لشکر بازیں آئی ای ڈی تراک ءِ تہ ءَ نشانگ جوڑ کتگ کہ ایشی ءَ چہ مزنیں جانی ءُ مال ءِ تاوان اش بوتگ انت۔

جارکش ءَ گوشتگ گوں زورگیریں لشکر ءَ یکشلیں جنگ ءُ چوپانی وھد ءَ دو بھادریں سرمچار شھید بوتگ اَنت ءُ بزدلیں لشکر ءَ چہ وتی کمشرپی پروش ءَ پد بندیگ جاھاں بندیگیں بیگواھیں دیم پہ دیمی میڑ ءِ نام کُشگ ءُ لس آبادیانی سر ءَ رستری بمبگواری کتگ ءُ وتی زوراکی برجاہ داشتگ انت-

جارکش ءَ گوشتگ 9اگست: چاگی ءَ شال ءُ تپتان ءِ تجارتی راہ ءِ سر ءَ نوکچاہ ءَ سرمچاراں سئے تجارتی گاڑی دستیگ کتگ انت۔ ھمے شپ ءَ سرمچاراں شال ءَ قمبرانی روڈ ءَ پولیس ءِ ’’ایگل اسکواڈ‘‘ ءِ کارندہ دزگیر کتگ اَنت ءُ آیانی سرجمیں جنگی سلاھ ءُ سامان برتگ اَنت۔

جارکش ءَ گوشتگ 10 اگست ءَ خاران ءِ مزن شھدگ ےِ سر ءَ زومی ءَ پولیس ءِ کارندہ دزگیر کنگ ءَ پد سرمچاراں گوں تراکناکیں چیزاں ہمگرنچیں پوسٹ تباہ کتگ۔ پد ءَ سرجمیں کارندہ بیھار دیگ ءَ پد یلہ کتگ اَنت۔

جارکش ءَ گوشتگ 11 اگست ءَ بلیدہ ءِ سوراپ ءَ سرمچاراں انٹیلی جنس ءِ بنیاد ءَ آپریشن ءِ بھر ءِ رد ءَ ’’ڈیتھ اسکواڈ‘‘ ءِ یک پناہ گاھے ءِ سر ءَ اُرش کتگ۔ اے سوبمندیں آپریشن ءِ تہ ءَ سلاہ بندیں ڈیتھ اسکواڈ ءِ گل ءِ سروک مسلم جیئند جاہ ءَ بیران بوتگ ءُ آئی ءِ چار کارندہ محب اللہ، درا، احمد ءُ طلحہ سک ٹپیگ بوتگ اَنت۔ سرمچاراں آپریشن ءِ وھد ءَ دگہ یک کارندھے دزگیر کتگ۔ زانگ بہ بیت کہ کُشگ بوتگیں مسلم جیئند بُلیدہ ءُ آئی ءِ کش ءُ گوراں ڈیتھ اسکواڈ ءِ مستریں سروک بوتگ کہ آ دمگ ءِ ورنایاں ٹارگٹ کلنگ، زورگیریں لشکر ءِ سرپرستی ءَ زورانسری بیگواہ کنگ ءُ زلم ءُ زوراکیانی تہ ءَ تچک ءَ ھوار بوتگ۔ اے سلاہ بندیں گل بلیدہ ءُ پروم ءَ ھوار جتا جتائیں دمگاں زورگیریں لشکر ءِ رستری کاروائیانی گون ءَ رھشونی ءَ ھوار بوتگ-

جارکش ءَ گوشتگ 12اگست ءَ چاگی ءِ چھتر پولیس تھانہ سرمچاراں بارودی شورواں گوں تباہ کتگ۔ دومی نیمگ ءَ بارتاگزی ءَ زورگیریں لشکر ءِ گاڑیانی سر ءَ سلاہ بندیں اُرش کتگ مزنیں تاوانے داتگ۔ ھمے شپ ءَ یکمچ بازار ءَ سرمچاراں واپاری بندش ءِ چیردستی ءَ سئے تجارتی گاڑیانی سر ءَ تیرگواری کتگ ءُ تاوان داتگ انت ءُ یک گاڑی یے دستیگ کتگ۔

جیئند بلوچ ءَ گوشتگ ھمے روچ ءَ کلات ءِ دمگ رودینجو ءَ سرمچاراں تراکناکیں شورواں گوں باریں گاڑی ءِ کارمرد کنگ ءَ ریموٹ کنٹرول ءِ آئی ای ڈی ءَ گوں زورگیریں لشکر ءِ کاروان ءَ نشانگ جوڑ کتگ۔ اے ترندیں تراک ءِ آسر ءَ 17 کارندہ جاہ پہ جاہ ءَ مرتگ انت ءُ مزنیں کساسے ءَ ٹپیگ بوتگ اَنت ءُ زورگیریں لشکر ءِ یک گاڑی یے سرجم ءَ تباہ بوتگ ءُ دومی گاڑی ءَ را سک باز تاوان رس اتگ۔ دومی نیمگ ءَ سوراب ءَ سرمچاراں آئی ای ڈی ءِ تراک ءَ زورگیریں لشکر ءِ دگہ گاڑی یے تباہ کتگ کہ ایشی ءِ تہ ءَ 3 کارندہ مرتگ ءُ بازینے ٹپیگ بوتگ اَنت۔

جارکش ءَ گوشتگ 13 اگست ءَ پنجگور ءِ دمگ چتکان ءَ سرمچاراں پولیس ءِ لائنز ءِ سر ءَ دستی بمب ءِ سر ءَ اُرش کتگ ءُ یک کارندھے ٹپیگ بوتگ۔ بلیدہ ءِ دمگ گِلی ءَ سرمچاراں زورگیریں لشکر ءِ نیمگ ءَ ایر کتگیں نوکیں جاسوسی ءُ شپ گندیں کیمرہ تباہ کتگ اَنت۔ اے کاروائی ءِ وھد ءَ زورگیریں لشکر ءَ پہ برزی نگرانی ءَ کواڈ کاپٹر کارمرز کتگ کہ سرمچاراں نشانگ جوڑ کتگ ءُ دور داتگ۔ ھمے روچ ءَ چاگی ءِ دمگ تالو ءَ لُٹ ءُ پلی کمپنی ءِ دگہ گاڑی یے سوتکگ۔

جارکش ءَ گوشتگ ھمے روچ ءَ سرمچاراں نوشکی ءِ بدل کاریز کراس ءَ زورگیریں پاکستانی لشکر ءِ سر ءَ ترندیں سلاہ بندیں اُرشے کتگ کہ ایشی ءِ آسر ءَ 2 کارندہ جاہ پہ جاہ ءَ مرتگ اَنت۔

جارکش ءَ گوشتگ 14 اگست ءَ تربت شھر ءَ سرمچاراں زورگیریں لشکر ءِ کاروان ءَ را موٹر سائیکل ءِ سر ءَ ایریں ریموٹ کنٹرول آئی ای ڈی ءَ نشانگ جوڑ کتگ وھدے کہ آ دو گاڑیانی ھواری ءَ گوزگ ءَ بوتگ انت۔ تراک ءَ یک گاڑی یے سرجم ءَ تباہ بیتگ ءُ ایشی ءِ آسر ءَ 3 کارندہ مرتگ امت ءُ 4 سک ٹپیگ بوتگ اَنت۔

جارکش ءَ گوشتگ ھمے روچ ءَ شال ءِ زیارت کالونی ءِ نزیک ءَ زورگیریں ریاست ءِ وتگڑیً ’جشن‘ ءِ مراگش ءَ سرمچاراں گرنیڈ لانچر بازیں گولہ آس داتگ اَنت کہ اود ءَ سی ٹی ڈی ءُ زورگیریں لشکر ءِ کارندہ مزنیں کساسے ءَ جاڑیگ بوتگ اَنت۔ ھمے شپ ءَ سرمچاراں نوشکی ءِ دمگ احمدوال ءَ زورگیریں لشکر ءِ مزنیں بنجل گوں مزنیں سلاھاں نشانگ جوڑ کتگ کہ ایشی ءِ آسر ءَ دژمن ءَ بازیں کساسے ءَ جانی ءُ مالی تاوان رس اتگ انت-

جارکش ءَ گوشتگ ایشی ءَ ابید چاگی ءِ دمگ برتاگزی ءَ تجارتی راہ ءِ سر ءَ دو گاڑی ناکارہ کتگ اَنت وھدے کہ سرمچاراں جوجکی ءَ ریل ءِ ٹریک تراک ءَ گوں تباہ کتگ

جارکش ءَ گوشتگ 15 اگست ءَ سرمچاراں سوراب ءِ مل مدرسہ ءَ زورگریں لشکر ءِ کارمرد کتگیں دو گچینی پوسٹ ءُ یک پھلے تراکاں گون تباہ کتگ انت-

جارکش ءَ گوشتگ زورگیریں پاکستانی لشکر ءَ 10 اگست (دوشمبے) ءَ پنجگور ءِ دمگ چیدگی ءَ لس آبادی ءُ بلوچ راج ءِ سر ءَ زمینی پیشگامی بندات کتگ۔ دمگ ءَ ھستیں بی ایل اے ءِ گشت ءِ ٹیم ءَ وتی راجی پرز ءُ بلوچ راج ءِ پھریزگ ءَ ھیال ءَ دارگ ءَ گوں دلیری ءَ دیم ءَ روگ ءَ دژمن ءِ لشکر ءِ راہ بند کتگ ءُ اُرش کتگ۔ اے ھونریچیں جنگ ءُ چوپ ساھتانی ساھت برجاہ بوتگ ، دژمن ءِ لشکر ءَ مزنیں کساسے ءَ جانی ءُ مالی تاوان رس اتگ۔ بلے بلوچ سرڈگار ءِ رکّینگ ءِ واستا جنگ ءِ وھد ءَ بی ایل اے ءِ دو بھادریں سرمچار سنگت وزیر احمد پنام ءِ زاھد ءُ سنگت جاسم پنام ءِ مھراج بھادری ءَ گوں وتی جان ندر کتگ اَنت۔ بلوچ لبریشن آرمی اے شرپ شانیں شھیدانی ابدمانیں کربانی، مھکمیں جزم ءُ دلیری ءَ گچینی لبزاں سھرین دروت ندر کنت۔ ایشانی رچوکیں ھون ءِ ھمک تچک بلوچستان ءِ آجوئی ءِ چراگ اِنت ءُ ایشانی مشن گوں سرجمی ءَ ترندی ءَ برجاہ مان اِیت داں منزل ءَ سر بہ بیت۔

جنگ ءِ میدان ءَ سرمچارانی دست ءَ کمشرپی پروش ءُ مزنیں تاوان ءِ آماچ بوھگ ءَ پد زورگیریں پاکستانی لشکر ءَ وتی دود ءُ ربیدگ ءِ وڑ ءَ وتی روایتی بزدلی ، چالاکی ءِ پندل ءُ جنگی جرم ءِ درشانی کتگ۔ پنجگور ءَ وتی ناکامی ءُ پُشت کشّی ءِ پُشدر کنگ ءِ ھاترا ریاستی ادارھاں سئے بے سلاہ ءُ زورانسری ءَ بیگواہ کتگیں بلوچ ورناہ بندیگ جاھاں کش اتگ ءُ کشتگ انت، یک دروگیں میڑے ءِ نام داتگ انت کہ آ چیدگی ءَ جنگ ءِ وھد ءَ کشگ بیتگ انت – زورگریں پوج ءِ جارکش ( ڈی جی آئی ایس پی آر) وتی رزوائی ءُ گوستانکی پروشی ءِ اندیم کنگ ءَ لس ءُ بے وسیں بندیگاں درکانودی کشگ ءُ آیاں دروگیں انکاؤنٹر ءِ نام دیگ ءُ رسانکدراں پیش کنگ انت- چوشکہ آئی ءِ شرپ داری ءُ رستری ءِ پدراھی ءَ کنت-

دروگیں میڑ ءِ نام دیگ ءُ آ بے گناھیں بلوچ بندیانی تہ ءَ حافظ مدثر ء نور احمد ( جھمنند عیسیٰ سندے سر ہنجگور کہ 15 جون 2026 ءَ زورانسری بیگواہ کنگ بیتگ)، شعیب ء محمد ایوب (جھمنند ھدابادان پنجگور ھشت پروری 2023) ءُ پیر جان ء کچکول ( جھمنند راھی 10 جون 2026 ءَ آوار جنگ بوتگ) ۔ اے وئیل اے گپ ءِ پدّریں راستی انت کہ پاکستانی لشکر ءَ گوں بلوچ سرمچاران جنگ ءِ میدان ءَ جنگ کنگ ءِ ھچ زور نیست ءُ نوں چہ وتی زندانانی تہ ءَ بندیگیں بے سلاھیں بلوچ بندیگاں چہ وتی نپرت ءُ بے سوبی ءِ بدل ءَ زورگ ءَ اِنت۔

جارکش ءَ گوشتگ سرمچارانی اُرش ءُ زمینی پشتکنزی ءِ ترس ءَ بزدلیں زورگیریں لشکر ءَ جنگ ءِ سرجمیں میان اُستمانی انسانی کانود ءُ رھبندانی ھلاپ ءَ 12 اگست ءَ سوراب ءِ گدار (گوندان) ءِ دمگ ءَ بے سلاہیں شھری مردمانی سر ءَ گوں جنگی بالی گراباں زھرناکیں کوریں بمباری یے کُتگ۔ اے زالمیں ناشرکاری ءُ بے رھبندیں برزی زوراکی ءِ آسر ءَ 27 بے گناہیں لس مردم شھید کنگ بوتگ اَنت کہ آھانی تہ ءَ کسانیں چُک، جنین، مردین ءُ پیریں مردم ھوار اَنت۔ بلوچ لبریشن آرمی اے گپ ءَ پدّر کنت کہ بلوچ راج ءِ ناھکین ھون، زندانیانی درکانودی کُشگ ءُ لس مردمانی سر ءَ بمباری کنگ ءِ ھساب ءَ چہ زورگیریں دژمن ءَ جنگ ءِ میدان ءَ ھساب ءُ کتاب کنگ بنت ءُ اے جُنز بے شک ءَ گوں گیشتریں تیزی ءَ برجاہ مان ایت داں آجوئیں بلوچستان ءِ سرجمی ءَ۔

بلوچستان ءِ جتاجتائیں دمگ مستونگ ءُ ھُزدار ءَ پاکستانی پوج ءِ آپریشن، ھیلی کاپٹر شیلنگ ءُ ڈرون اُرش ءَ چہ یک مردمے بیران بیتگ-

گیشیں ھالانی رِد ءَ مستونگ ءِ دمگ چہ کھڈکوچہ ءَ ھالانی رِد ءَ کھڈکوچہ، شریف آباد ءَ پاکستانی پوج ءِ ڈرون اُرش ءَ سندھ ءِ دمگ لاڑکانہ ءِ جھمنند حبیب اللہ نامیں مردمے بیران بیتگ-

اِھوالکار ءِ رِد ءَ حبیب اللہ کھڈکوچہ ءَ دھکانکاری کار ءَ بیتگ، وھدے کہ اے ھما وھد ءَ پوجی ڈرون اُرش ءِ نشانگ کنگ بیتگ آ کشت ءُ کشاری ءَ دلگوش بیتگ-

ھمے وڑ مستونگ ءَ زھری گٹ ءِ ھند سر ءَ ڈرون ءَ چہ مزائل آس دیگ ءِ ھال اِنت، وھدے کہ ھُزدار ءِ دمگ گرو ءِ نزیک ءَ پاکستانی پوج ءِ تیرگواریں ھیلی کاپٹراں چہ یکشل ءَ شیلنگ کنگ بیتگ ءُ ٍڈرون بالگرداں چہ گولہ آس داتگ-

اے دمگاں یکشل ءَ تراکانی توار اش کنگ بیتگ، وھدے نہ پوجی آپریشن یکشل ءَ برجاہ ءَ اِنت-

زانگ بہ بیت کہ گوستگیں روچاں بیتگیں پاکستانی پوج ءِ بمبگواری ءَ ڈرون اُرشاں تاں انو بلوچستان ءِ جتاجتائیں دمگاں سی ءَ چہ گیش شھری بیران بیتگ اَنت کہ آیانی تہ ءَ یک مزنیں کچے ءَ چُک ءُ زالبولانیگ اِنت-

ھمے وڑ گوستگیں روچ ءَ ھاران ءِ دمگ لجے ءَ برجاھیں پوجی آپریشن ءِ میان ءَ پاکستانی پوج ءِ ڈرون اُرش ءَ یک دھکانکار، سلطان محمد ء حاجی ملک عثمان ساسولی، بیران بیتگ اَت –

ھمے وڑ دوازدہ اگست ءَ سوراب ءَ پاکستانی جیٹ بالگردانی بمبگواری ءَ چہ بیست ءُ ھپت ءَ چہ نزیک لَس شھری، آیانی تہ ءَ زالبول ءُ چُک ھم ھوار بیتگ اَنت کہ بیران ءُ ٹپی بیتگ اَنت-

ھاران ءَ ھوار ھُزدار ءِ جتاجتائیں دمگاں زھری ءُ مولہ ءَ ھم ڈرون اُرشاں یکیں کھول ءِ بازیں مردمے نشانگ بیتگ-

کلات ءَ پاکستانی لشکر ءِ گاڑی ءِ سر ءَ بمب تراک، کیچ ءَ سلاہ بندانی ناکہ بندی –

بلوچستان ءِ دمگ چہ کلات ءَ سر بوتگیں ھالانی رد ءَ پاکستانی لشکر رودینجو کلات ءِ نزیک ءَ اُرش کنگ بوتگ۔ فورسز ءِ سر ءَ تراک مرچی سھب ءِ 10 ءِ نزیک ءَ بوتگ کہ تراک ءِ آسر ءَ فورسز ءِ گاڑی تباہ بوتگ۔

ھالانی ردا گاڑی ءَ سواریں پاکستانی فورسز ءِ کارندہ بیران ءُ ٹپیگ بوتگ انت۔

زانگ بہ بیت گْوستگیں بازیں روچاں چہ پاکستانی لشکر ءَ اے دمگ ءَ کرفیو ءِ جار جتگ بیتگ، وھدیکہ قلات شھر ءِ شاھدگانی سر ءَ گار برگ بیتگ ءُ اندری ءُ درائیں راہانی سر ءَ چیک پوسٹ جوڑ کنگ بیتگ اَنت۔

اُرش ءَ پد پاکستانی لشکر ءِ گیشیں کارندہ وئیل جاہ ءَ سر بوتگ اَنت ءُ وئیل ءِ سر ءَ سیل کتگ ۔

دومی نیمگ ءَ چہ کیچ ءِ دمگ تولگی دشت ءَ سلاہ بنداں ناکہ بندی کتگ ءُ چیکینگ کتگ-

ناکہ بندی ءِ وھد ءَ زالبولیں سلاہ بند ھم ھوار بیتگ انت- ءُ آیاں بیرک چِست کتگ بیتگ ءُ مھلوک ءَ گوں تران کتگ-

بلوچستان ءِ جتا جتائیں دمگاں ناکہ بندی ءُ بمب تراک، پورس ءُ سلاہ بندانی میان ءَ جنگ ءُ چوپ-

بلوچستان ءِ دمگ چہ سوراب ءَ ھالانی رد ءَ گدد ءَ نزیک ءَ شاھدگ ءِ سر ءَ مزنیں کساسے ءَ سلاہ بندیں مردماں راہ بستگ ءُ ھمے وڑ بسیمہ پتک ءُ زیک ءَ ھم مزنیں کساسے ءَ سلاہ بند جاڑیگ انت-

سلاہ بندیں مردماں گوں مزنیں سلاھاں چیک پوسٹ جوڑ کتگ ءُ شاھدگانی سر ءَ کنٹرول کتگ۔

ھالانی رد ءَ سلاہ بند ءُ پاکستانی لشکر ءِ نیام ءَ زبردستیں جنگ ءُ چوپ برجاہ انت ءُ اے جاھاں تیر گواری ءُ تراکانی توار اشکنگ بیتگ انت۔

پولیس ءَ شھریاں چہ اے دمگاں سپر کنگ ءَ بند کتگ انت وھدے کہ جنگ ءُ چوپ ءِ وھد ءَ پاکستانی لشکر ءِ تاوان ءِ ھال ھست انت۔

زانگ بہ بیت کہ اے دمگ ءَ بلوچ آجوئی لوٹوکیں سلاھ بندیں گل پرکار اَنت ءُ پیسر ءَ ھم پاکستانی لشکر ءِ سر ءَ ناکہ بندی ءُ اُرشانی تہ ءَ اھوال دیم ءَ اتکگ انت بلے انگت ءَ ھچ گل ءَ مرچیگیں وئیل ءِ زمہ واری نہ زرتگ۔

ھمے وڑ ءَ شال ھنہ وڑک ولی تنگی ءَ دوا دگ ءَ آئی ای ڈی اُرش ءِ آسر ءَ دو مردم بیران ءُ دو زدگ بیتگ انت-

بیران ءُ زدگ بیتگیں مردمانی سیادی شال ءَ انت-

یک جنینے کہ ایم فل ءِ ڈگری ءِ واھند اِنت، آروسے کتگ ءُ چُکے ھست۔ آئی ءِ مرد شریں کارے کنگ ءَ اِنت وھدے کہ جنین وت شریں پگارے زرت کنت۔ اگاں اے جنین ءِ مات ءُ پت وانگ ءُ زانگ ءِ ادارہاں بہ بنت ءُ آ وت کُش بمب تراک کنوک بہ بیت، ایشی ءِ سبب ھست، نزام ءِ تہ ءَ ردی یے ھست۔

اے ھیال ءُ لیکہ پاکستان ءِ پیسریگیں مزن وزیر شاہد خاقان عباسی ءَ ’بلیک ہول‘ ءِ گپ ءُ تران ءِ دیوان ءِ ساھت ءَ درشان کتگ اَنت۔

پیسریگیں مزن وزیر ءَ بلوچ ‘فدائی’ زالبول شاری بلوچ ءِ بابت ءَ گپ جنان ءَ گشتگ کہ آئی ءِ وت کُش بوگ ءِ سبب نزام ءِ تہ ءَ ردی یے بوتگ۔

خاقان عباسی ءَ گیش گْوشتگ کہ ما اے گپ ءَ منگ ءَ چہ انکار کن ایں، ما اے گپ ءَ منگ ءَ چہ انکار کن ایں کہ اے جیڑھے یا نہ اِنت، منی ھیال ءَ اے سکیں مزنیں جیڑھے ۔ اے جیڑہ ءَ را گیش ءُ گیوار کنگی اِنت۔ اے جیڑہ ءِ بنیاد ءَ وسائل ءِ گپ وتی جاگہ ​​ءَ انت بلے پاکستان ءَ فارم 47 چہ 18 ءَ اتکگ بلے بلوچستان ءَ چہ 88 ءَ سُچگ ءَ انت۔

آئی ءَ گوشتگ کہ وھدے شما یک راجے ءَ را آئی ءِ نمائندگی ءِ ھک ءَ چہ زبھر کن اِت آئی ءِ پکر ءِ اھترام ءَ مہ کن اِت گڑا شمئے ھم اھترام کنگ نہ بیت۔ ما اے شوھاز ءَ کنیں کہ کئے ءَ چے کُتگ، ما چوں اِد ءَ سر بوتگیں، ڈاکیومنٹیشن کنگ بہ بیت، ما درست زمہ وار ایں.

زانگ بہ بیت کہ بلوچ لبریشن آرمی ءِ مجید بریگیڈ ءِ گوں ھمگرنچیں اولی بلوچ ‘فدائین’ زالبول شاری بلوچ ءَ 2022 ءَ کراچی ءَ کنفیوشش انسٹی ٹیوٹ ءَ گوں ھمگرنچیں چینی کارندہ گوں وت کُش جیکٹ ءَ نشانگ جوڑ کتگ اَنت۔ شاری بلوچ ءَ پد سمعیہ کلندرانی ءَ تربت ءُ ماھل بلوچ ءَ بیلہ ءَ فدائین کتگ-

ھمے سال ءَ بی ایل اے ءِ آپریشن ھیروپ دوم ءِ وھد ءَ شال، گوادر، نوشکی، پسنی ءُ دگہ دمگاں مزنیں کساسے ءَ زالبولیں ’فدائین‘ ءُ دگہ یونٹاں سرجمی ءَ بھر زرتگ۔

بلوچ لبریشن آرمی ءِ زالبولیں کمانڈر شھناز بلوچ ھم اے گپ دیم ءَ اتکگ۔ بی ایل اے ءِ آفیشل چینل ھکل ءَ شنگ بوتگیں ویڈیو ءِ تہ ءَ شھناز بلوچ پنام ءِ سدو ءَ گوں بازیں زالبولیں سرمچاراں گندگ بوتگ وھدے آئی ءَ بلوچ راج ءَ را یک کلوہ یے داتگ کہ زرمبشت ءِ بھر بہ بئے ءُ پاکستانی لشکر ءَ بیھار داتگ۔

سوراب ءِ وئیل

ٹی بی پی شونگال

بلوچستان ءِ دمگ سوراب ءِ ھند گدر گوْندان ءَ 12 اگست ءِ سھب ءَ پاکستانی بمبگواریں بالیگانی بمبگواری ءِ آسر ءَ بازیں مردمے بیران ءَ زدگ بیتگ انت- ناسرجمیں دمگی اھوالانی رد ءَ بیران ءُ زدگ بیتگیں مردمانی کساس بیست ءُ ھپت گوشگ بوتگ – اے وئیل ءِ ھلاپ ءَ کھولاں لاشانی ھمراھی ءَ شال کراچی ءِ مزن شھدگ ءِ سر ءَ زھرشانی نندانک داتگ ءُ وتی زھرشانی یاداشت کنائینتگ- وئیل ءِ سر ءَ بلوچ راجدوست پاٹی ءُ انسانی ھکانی گلانی نیمگ ءَ ترندیں ایرجنی دیم ءَ اتکگ انت-

ڈی ایچ کیو سوراب ءِ میڈیکل سپرنٹنڈنٹ ءِ نیمگ ءَ شنگ بیتگیں سرجمیں درشان ءِ رد ءَ وئیل ءَ پد ھسپتال ءَ شش لاش آرگ بیتگ انت کہ آیانی تہ ءَ زالبول ءُ زھگ ھم ھوار انت – بیران بیتگیں مردمانی اُمر دو ءَ بہ گر داں 50 سال ءِ میان ءَ گوشگ بیتگ – ھسپتال انتزامیہ ءِ رد ءَ 16 زدگ بیتگیں آرگ بیتگ انت کہ آیانی تہ ءَ گیشتر زالبول ءُ زھگ ھوار انت یکے ءَ بہ گر داں 40 سال ءِ میان ءِ اُمری مردم انت- دومی نیمگ ءَ دمگی مردمانی گوشگ انت بازیں لاش پوج ءَ دستیگ کتگ ءُ گون وت برتگ انت چریشی ءِ آسر ءَ بازیں لاش ھسپتال ءَ آرگ نہ بیتگ انت چریشی ءَ آیانی کساس ءُ پجار زانگ نہ بیتگ انت – دمگی مردمانی رد ءَ وئیل ءَ پد بازیں مردم داں انگت ءَ بیگواہ انت، بلے داں انگت ءَ اے زانگ نہ بیتگ آ انگت ءَ دیوالانی چیر ءَ انت یا ترندیں تراک ءَ آیانی ھڈ ءُ جان گندگ نہ بنت-

سوراب وئیل اے اولی وئیل نہ انت – بلوچستان ءَ گوست ءَ ھم پاکستانی بمبگواریں بالیگ ءُ گن شپ ھیکی کاپٹرانی کاروائیاں لس آبادی سانمند ءُ شھری بیران بیتگ انت – بلوچستان ءَ میان اُستمانی میڈیا آجوئی ءَ اتک نہ کنت ءُ دمگی اھوالکار ھم ریاستی زور ءِ پد ءَ کار کت نہ کنت- اے داب ءَ پوجی کاروائی ءُ لس آبادی ءِ سانمند بیتگیں وئیلاں آجوئی ءِ دروشم ءَ رپورٹنگ کنگ نا سرجمی انت – پد ءَ ریاستی ادارہ ءُ پاکستانی میڈیا ءِ زور ءَ یک لس درشاندابے دیم ءَ کیت انت – بلے سانمند بیتگیں مھلوکانی راستی ءُ زمین ءِ راستی جتا جتائیں کس پیش کن انت-

سوراب ءِ وئیل ایوک ءَ نا ریاستی ردی یا یک پوجی آپریشنے ءِ بژنیگ ءِ آسر نہ انت – اے ھنچیں زورگیری ءِ نزام انت کہ یک دگہ ھونریچیں اکسے – چریشی ءَ دھکاں بلوچستان ءِ سیاسی واک، مڈی ءُ مھلوک ءِ توار وتی زور ءِ چیر دست کنگ ءِ جھد ءَ انت- اسلام آباد بلوچستان ءِ سر ءَ ھاکمی کنگ ءِ ٹاہ ءَ الم دنت بلے ایوک ءَ تاکت ءِ کارمردی ءَ ھاکمی ءِ شرپ یا سیاسی سنچ ودینگ نہ بیت – جنگی بالیگانی روک وٹی، لوگانی تباھی، شھریانی بیرانی، زورانسری بیگواھی ءُ ترس ءِ زور ءَ کجام ھم سرڈگار ءِ مھلوک ءَ وتی زیردستی ءَ کت کن ئے بلے آیانی توار ءِ پسھوا ھچبر ھلاس کت نہ کن ئے –

پُل آباد ءِ زھگ کسانیں(گیرانک)

نبشتہ کار: ماہجان کومی

دی بلوچستان پوسٹ

پُل آباد تو من ءَ سک گیر کائے، ھردیں کہ من ترا یات کناں گڑا منی چمانی ارس بند نہ بنت۔ منی ھیال ءَ آزمان کیت ءُ زمین ءَ ڈُک ایت۔ تو بلکیں من ءَ گندے کہ منی ماہجانیں جنک ءَ من ءَ بے ھیال کتگ۔ بلے من ترا ھچبر بے ھیال نہ باں۔ پل آباد تو زان ئے کہ من پرچا مروچی کوہ ءُ اگار، جنگل پہ جنگل گردگ ءَ آں۔ دگہ یکے اگاں اے گپ ءَ نہ زانت بلے تو چہ من گیشتر زان ئے۔ تو اے گپ ءَ ھم زان ئے کہ کس پہ وش ءُ وشدلی وتی مردم، واھشت، زندگی، تھت ءُ نپاداں یلہ نہ کنت۔ مرچی تئی ھواری ءَ کلیں بلوچستان ءِ سر ءَ یک انچیں نابیکاریں رسترے ءَ وتی پنجگ دور داتگ اَنت کہ ھمیشی ءِ سبب ءَ ما تئی ھمرائی ءَ کلیں بلوچستان ءِ آجو کنگ ءَ در کپتگ ایں۔ پمیشکا منی ھم دل ءَ ھما روچ باھند کت وھدے کہ من وتی گلامی مار ات۔ وھدے کہ پاکستانی زوراکیں پوج ءَ تئی دلبند لگتمال کُت۔ گڑا منی دل ءَ ھچ مردم اے گپ ءَ سگ ات نہ کنت کہ پاکستان ءِ پوج تئی سر ءَ وتواجھی بہ کنت، منی زمین ءُ میتگاں لگتمال بہ کنت ءُ وتی چکاں وشھالیں زندے بہ بکشائیت۔ ھمے گلامی ءَ من ءَ تور ات۔ پمیشکا من چہ تو مروچی دور ءُ جتا آں۔ اے گپ پہ من بژنے کہ درامدے ترا لگتمال بہ کنت ءُ منی دپ پہ پُرکندگ بہ بیت۔ اے مارشت انچوش انت کہ آئی ءَ تھنا تئی دلبند لگتمال نہ کتگ بلکیں منی ھم سینگ ءِ سر ءَ وتی پاد ایر کتگ انت۔ گڑا اے وڑیں دمان ءَ من چون بہ ننداں تئی تھکشیں دردانی ندارگ ءَ بہ کناں؟

یکروچے زان ئے منی دوستیگیں مردمے ءَ من ءَ گشت کہ پل آباد سک گرم ءُ لیوار اِنت بلے پہ من تئی تبد ءُ لیوار گشئے جنت ءُ بھشت ءَ چہ کم تر نہ انت۔ پرچا کہ تو منی ماتیں گلزمین ئے۔۔۔ منی بھشت گونگیں زمین ! تئی پل رنگیں دروشم، تئی پلیں زید ءُ ندارگ، کاہ ءُ کھچر، گلزاریں باگ ءُ بوستان، مچکدگ ءُ نھنگ ءَ ترا میزران کتگ۔ بلے من گشاں تئی ھر وڑیں توسیپ ءُ ستاہ ءَ بہ کناں گڑا آ منی نز ءَ کم اِنت۔۔ بیا ترا یکبرے مانا ءِ ھساب ءَ چاراں۔۔۔

پل آباد: تو زان ئے ہما مردماں کہ تئی نام ایر کتگ گڑا آیاں زانتگ کہ تئی دلبند چنچو گل ءُ گلزار اِنت پمیشکا آیاں پُل آباد وتی میتگ ءِ نام نامینتگ۔۔ تئی دلبند ءَ ھر وڑیں کشت ءُ کشار بہ کن ئے گڑا گَمراہ بنت۔۔۔ تئی زمین تھنا پہ کشار ءَ گَمراہ نہ انت بلکیں تئی ھاک ءِ برورد اِنت کہ تو تلائیں بچ ءُ جنک پیداک کتگ، کہ آ ایماندار اَنت، سنگین اَنت، بے مٹ ءُ بے مُل اَنت۔۔ ھمے سبب ءَ آیاں تئی نام پل آباد ایر کتگ کہ تو ھر ھساب ءَ گَمراہ ءُ میزران ئے۔۔۔

کودکی:مادریں ھنکین ! تو پمیشکا من ءَ دوست بئے پرچا کہ منی ناپگ تئی سینگ ءَ کل اِنت، من پمیشکا ترا مکھیں ماتے ءِ بستار داتگ کہ من اولی گام تئی دل ءَ ایر کتگ۔ تو منی ھر وڑیں سٹ ءُ کپ وتی سینگ ءَ اوپار کتگ اَنت۔ بلوچاں گشتگ کہ کونڈانی جاگہ دل ءِ سر اِنت، گڑا منی گردگ، تچگ، لیب ءُ گوازی، شیتانی تو وتی دلبند ءَ جاہ داتگ اَنت۔۔۔چک ءِ وڑ ءَ من ءَ ساٹ اتگ۔

من وتی چم تئی شکم ءَ پچ کت اَنت۔ چپ ءُ راست ھم، زبان ءُ مھر کل چہ تو، تئی ھنکین ءَ چہ دربرتاں۔ منی ھما دوست ءُ دزگوھار کہ کسانی ءَ ما ھور ءُ تور اتیں، ھمرائی ءَ وانگ ءَ شتیں، لیب ءُ گوازی کت، درستیں کودکی ءِ سھت تئی برورد اَنت۔۔ تو مارا ساٹ ات ءُ پھاز ات۔۔

دودائیں ھنکین: او منی پل آبادیں ھنکین! تئی مردم چنچو ہمکار ءُ کمکار اَنت۔ تئی ھواری ءِ مارشت چنچو پُر لزت اِنت۔ وھدے کہ تئی ڈگار ءِ سر ءَ گَلہ، برنج ءُ ایدگہ کشارانی رون بیت گڑا مردم یک دودائیں ربیتے ءِ پاسداری ءَ کن اَنت کہ آئی ءَ رون ءُ لاب گش اَنت۔ تئی میتگ ءِ مردم بے لب ءُ لالچ رو اَنت رون ءُ لاب ءَ دھکان ءِ کمکار بنت۔ اے انچائیں سھتے نہ یے بلکیں اے راجمانی ھیلکاری ءِ بھرے، زانت ءُ زانشت ءِ مستریں وسیلہ یے، ربیدگی یادداشت، اُلسی دانائی(Folk wisdom) ءِ چیدگے۔

او منی پلگدیں دوار ! وھدے کہ تئی ھنکین ءَ کسے ءَ لوگے بندگی بیت گڑا مردم بیگاری ءِ ربیت ءُ دود ءِ پد ءَ یکجاہ رو اَنت یکے دومی ءَ کمک ءُ مدت بنت دانکہ لوگ ءَ بند اَنت۔ نہ زرے نئیکہ لبے ءُ لالچے۔۔۔ اے چونیں دودائیں انسانی مارشتے گندئے؟

سیرانی سر ءَ ما وھدے کہ شتگ ایں گڑا اُمر ءُ سید ءَ ڈُھل جتگ۔۔ اگاں ھنی ءِ شپ بوتگ گڑا بی بی سکینہ ءَ ناچ، نازینک، چاپ جتگ۔۔۔ بانورانی یکجاگہ سمبھینگ، پرداچ، سیرانی سر ءَ کمکاری، لوٹوکی، ھمک شے تو پہ وڑے وتی ھنکین ءَ سمبھینتگ اَنت دانکہ اے راجمان ءُ چاگرد دود ءُ ربیدگی تب ءَ چہ سریچ ءُ پُر مڑاہ بہ بیت۔۔

زالے کہ چلگ بوتگ چاردہ شپ ءَ سپت داشتگ۔۔۔ اگاں چوش گشگ بہ بیت کہ زھگے ءِ پیداک بوگ ءَ بہ گر داں لباہ ء کبر یک ھیلکاری یے ءِ ربیتے ءِ درشان کنوکیں ھنکینے اگاں ھست اِنت گڑا آ تو ئے۔۔

پُل آبادءِ بامردیں کارست: منی بے مُلیں دیار! تو انچو میزر ءِ کہ تئی شکم ءَ چہ ھزاراں تلائیں بچ ودی بوتگ کہ آیاں پہ سرڈگار ءَ وتی تنگوئیں جان ندر کتگ اَنت۔ آ شھید ڈاکٹر شاکر ءِ دروشم ءَ بہ بیت، شھید ماسٹر نور احمد ءِ وڑیں زانتکاریں مردمے ءِ رنگ ءَ بہ بیت، ورنائیں کریم جان، شکیل ءُ شکور ءِ گوناپ ءَ بہ بنت کہ آیاں وتی زند نہ چار اتگ بلے اے سما کتگ کہ انوں تو گلام ءِ گڑا تئی آجو کنگ اولی پرز اِنت۔۔ تو پرز شناسیں کارست پیدا کتگ۔ ہمے بامردیں کارستاں یکے منی رھدربر شہید شاکر انت کہ آئی ءَ مارا وانینتگ۔ آئی ءَ منی کوریں چم پچ کتگ اَنت، من ءَ چپ ءُ راست ءِ سوج ئِے داتگ، آئی ءَ مئے رہشونی کتگ۔ آ زورگیر ءِ پگار لاپیں مردمے نہ بوتگ بلکیں آئی ءَ وتی ھساب ءَ وانگجاھے پچ کتگ دانکہ تئی ھنکین ءِ زھگ بہ وان اَنت۔۔۔آئی ءَ ورنا ءُ نودربراں دژمن ءِ ادارھاں روگ ءُ بھر زورگ ءِ سکین نہ داتگ بلکیں تئی آجوئی ءَ پہ نودربر پوہ ءُ سرپد کتگ اَنت۔

رمگ ءِ ندارگ: منی بے مٹیں سرڈگار! ھردیں کہ سھبانی ترانگ ءَ کپاں گڑا من ءَ ھما دمان یات کیت اِنت کہ وھدے گونڈو مھلہ پاد اتکگاں، ماتاں چکانی ارز بستگ، گڑا دومی دیم ءَ پس ءُ دلوت کاہ ءُ کدیم کتگ اَنت دیم پہ رمگ ءَ بُرتگ اَنت۔ یکدیمے زھگ وانگجاہ ءَ روگ ءَ اَنت گڑا دومی نیمگ ءَ رمگ دیم پہ کور ءُ کوہاں جُنزگ ءَ بیتگ انت۔ پد ءَ ھمے ندارگ روزردگ ءِ سھت ءَ چون دلکش بوتگ، وھدے کہ رمگ ءَ درائی نہ کتگ گڑا کور ءَ چہ دنز چست بوتگ اَنت تاں ہر کس ءَ زانتگ کہ رمگ پیداک اِنت۔ ھمک مردم وتی وتی پس ءُ دلوتانی دیم ءَ شتگ کہ باریں گون اَنت یا کہ ناں۔۔ اے سھت سک وش بوتگ، مردمانی درآیگ، ڈُپگانی سر ءَ مک بوگ، رولہ ءِ ندارگ، رمگانی ٹیلینگ ٹیلینگ، دنز ءُ گبارانی پاد آیگ، یک زرمبشتے ات۔۔ زندگی چون روانی ءُ ندارگی ءِ میان ءَ جنزگءَ ات۔۔

گڈسر: اے گڈی دانک بہ گندئے ھچ پیم بوت مہ کن اَنت پرچا کہ تئی ستاہ ءَ ھر پیم بہ کناں گڑا کم اِنت۔۔ بلے تو رکست نہ ئے، تئی نازینگ ءَ اگاں منی ند ءِ سیاھی کُٹ اَنت بلے من انگت دم نہ براں۔ اے گپ ءُ گال منی بنداتی دانک اَنت داں ساہ مانیت ترا نازیناں۔۔ گوں شائر ء آشوب مبارک کازی ءِ شئر ءَ یکبرے چہ تو اندیم بوگ لوٹاں۔

پل آباد ءِ زھگ

‘امّاں! پس کدی (چہ) کار ءَ کئیت”
“پہ ما وشیں ھالے کاریت”
“رازی کنت مئے لاپ ءِ ترونّ ءَ ”
‘نانے کاریت، ڈالے کاریت”
“پُل آباد ءِ زھگ کسانیں”
“جست کنت ھر روچ چہ مات ءَ”
“امّاں!پس کدی (چہ) کار ءَ کئیت ”
“کاریت پہ ما ائیدءِ سواساں”
“نوک بئینت مئے جامگ کوہنیں”
“ما اوں کنیں ھیرات گرانڈے”
“موکیں وتی (کرباناں) رھنیں”
“پل آباد ءِ زھگ کسانیں”
“جست کنت ھر روچ چہ مات ءَ”
“اماں! پس کدی چہ کار ءَ کئیت”
‘نوک بہ کنت کرگین ءِ کڑبّاں”
“ما چہ ھور ءُ گواتءَ بہ رکّیں”
“گونڈُکیں”دتُو “واب کنت سیر ءَ ”
“روچ گوز انت مئے آھن ءُ سکّیں”
“پل آباد ءِ زھگ کسانیں”
“جست کنت ھروچ چہ مات ءَ”
“اماں پس کدی چہ کارءَ کئیت ”
“پہ ما کاریت کلم ءُ کتاباں ”
“ما اوں چو میرءِ زھگءَ وانیں”
“ھیل کنیں ما راستءِ سبک ءَ”
“نیک ءُ بدءَ دنیا ءِ زانیں ”
“جست کنت ھروچ چہ مات ءَ”
“پل آباد ءِ زھگ کسانیں”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت

بلوچستان ءِ جتاجتائیں دمگاں چاریگ کوش، پُھل ءُ ٹرانسمیشن لائن ءِ تراکینگ ءِ زمہ واری یو بی اے ءُ بی آر جی ءَ منّ اِتگ اَنت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراِں نُھ اگست ءِ سُھب 10:00 ءِ نزیک ءَ شال ءِ دمگ ڈغاری کراس ءَ ریاستی چاریف نصراللہ جتوئی ء حکیم تیرگواری ءِ نشانگ کتگ چریشی ءِ آسر ءَ آ جاہ پہ جاھی بیران بیتگ-

گل ءِ رِد ءَ اے مرد گوستگیں بازیں سالاں چہ پاکستانی چیریں ادارھانی واستا کار کنگ ءَ بیتگ ءُ سی ٹی ڈی ءَ چہ ھم ھمگرنچ بیتگ، اے میان ءَ بازیں بلوچ ورنایانی دزگیری ءُ جتاجتائیں وھداں بلوچ آجوئی لوٹوکانی نشان کنگ ءَ کرد پیلو کتگ-

مزار بلوچ ءِ رِد ءَ یازدہ اگست ءَ سبی ءِ دمگ بختیار آباد ڈومکی ءِ نزیک ءَ چہ ڈیرہ مراد جمالی ءَ سبی ءَ رؤکیں مزنیں ٹرانسمیشن لائن ٹاور تراکناکیں شورواں چہ تباہ کتگ اَنت چریشی ءِ آسر ءَ اوچ پاور پلانٹ ڈیرہ مراد جمالی ءَ چہ سبی ءَ گریڈ اسٹیشن ءَ بجلی پُجارینگ مھتل بیتگ-

یو بی اے ءِ جارکش ءِ رِد ءَ سیزدہ اگست ءِ شپ دو ءَ جتاجتائیں کاروائیاں بولان N-65 راجی شھدگ سر ءَ برجاہ کمبڑی پُھل تراکناکیں شورواں چہ تباہ کتگ اَنت چریشی ءِ آسر ءَ پُھل ءَ سک تاوان رس اِتگ ءَ گاڑیانی روگ ءُ آیگ مھتل بیتگ اَنت-

جارکش ءَ دیمتر ءَ گْوشتگ کہ سیزدہ اگست ءِ شپ 9:50 ءِ نزیک ءَ دگہ یک کاروائی ءَ کچھی ءِ بُنجاھی شھر ڈھاڈر سنی دگ سر ءَ برجاہ دوپاسی پُھل تراکناکیں شورواں چہ نشانگ کتگ چریشی ءِ آسر ءَ پُھل ءِ یک مزنیں بھرے سک تاوان رس اِتگ پُھل تباہ بیگ ءَ چہ ڈھاڈر ءُ سنی ءِ میان ءَ روگ ءُ آیگ مھتل بیتگ-

ھمے وڑ بی آر جی ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سیزدہ اگست ءِ شپ ءَ بلوچ ریپبلکن گارڈز ءِ سرمچاراں بلوچستان ءِ دمگ نصیر آباد ءِ ھند ڈیرہ مراد جمالی اوچ پاور پلانٹ ءَ چہ سندھ ءَ رؤکیں بجلی ءِ دو ٹاور تراکناکیں شورو پٹ کتگ ءُ تراکینتگ-

جارکش ءَ گْوشتگ کہ تراک ءَ دوئیں ٹاور تباہ کتگ-

درشانانی گُڈی دوئیں گلاں اُرشانی زمہ واری منّ اِتگ اَنت گوشتگ کہ مئے اے وڑیں کاروائی بلوچستان ءِ وتواجھی ءَ تاں برجاہ بنت-