TBP Balochi

بلوچستان ءِ تیابدپی شھدگ این 10 ءَ اورماڑہ ءِ ھند بی ٹو ءَ بوزر گاڑی ءُ ٹویوٹا کرولا گاڑی ءِ میان ءَ وئیلے پیش اتکگ کہ اود ءَ سواری گاڑی ءَ سواریں شش مردم بیران بیتگ انت کہ آیانی توک ءَ دو مردین، دو زالبول ءُ دو زھگ ھوار انت-

ایس پی کوسٹل ھائی وے اسلم بنگلزئی ءِ رد ءَ ٹویوٹا رجسٹریشن نمبر BJN-481 دیم پہ تربت ءَ روگ ءَ بیتگ بوزر کراچی ءَ روگ ءَ بیتگ کہ وئی پیش اتکگ – چریشی ءِ شش مردم بیران بیتگ انت – کرولا گاڑی ءِ ڈرائیور ءِ پجار اسلم ءِ نام ءَ بیتگ-

وئیل ءَ پد شھدگ پچ کنگ بیتگ ءُ پولیس ءِ رد ءَ بیران بیتگیں مردمانی کھول وئیل ءِ بارو ءَ کوسٹل ھائی وے پولیس ءَ رھوت کت کن انت-

بلوچستان ءِ گچی واپاری راہ شال تپتان شھدگ ءِ سر ءَ سلاہ بندانی کنٹرول برجاہ ، سدانی کچ ءَ گاڑیانی کاروان ءَ سیکیورٹی دیگ ءَ پورسز بے سوب، یک دگہ گاڑی یے سلاہ بنداں دستیگ کتگ-

چاگی ءِ دمگ دالبندین ءِ ھند چھتر ءَ سلاہ بندین مردماں واپافی گاڑیانی مزنیں کاروان ءَ ھواریں یک واپاری گاڑی ءَ لوڈ ءَ ھوار گون وت برتگ-

زانگ بہ بیت گوستگیں روچ ءَ ھم ھمے شھدگ ءِ سر ءَ گاڑیانی دستیگ، ڈرائیور ءِ دزگیر کنگ ءِ وئیل پیش اتکگ انت- ءُ پورسز ءِ سر ءَ اُرشانی ھال ھم دیم ءَ اتکگ انت-

اھوالانی رد ءَ چاگی ءِ دمگ دالبندین چارسر ءَ پورسز ءُ واپاری گاڑیانی سر ءَ دگہ سے جاھاں اُرش کنگ بیتگ-

بلوچستان ءِ دمگ چاگی ءُ شال ءَ ھوار کراچی ءِ دمگ چہ ماڑی پور ءَ ھپت مردم زورانسری آوار جنی ءِ ھال دیم ءَ اَتکگ، وھدے چہ شال ءَ زورانسری بیگواہ کنگ بیتگیں مردم یل کنگ بیتگ اَنت-

ھالانی رِد ءَ چار اگست 2026 ءَ چاگی ءِ دمگ چہ کلی سید قادر ءَ دو ورنا سید نظام شاہ ء سید غیاث ءُ اظھر الحق ء عبدالحکیم ءَ فرنٹیئر کور (ایف سی) کارندھاں شپ سے ءَ لوگاں چہ آوار جتگ ءُ بیگوای کتگ اَنت – 22 سالی ئیں سید نظام شاہ زراعت ءَ چہ ھمگرنچ اِنت، وھدے کہ 18 سالی ئیں اظھر الحق دکاندارے-

دومی نیمگ ءَ کراچی ءِ دمگ چہ ماڑی پور، ٹکری ولیج ءَ 16 اگست ءَ پنچ مردم سی ٹی ڈی ءَ پولیس ءُ رینجرز ءَ لوگاں چہ آوار جنگ ءَ پد بیگواہ کتگ-

بیگواہ کنگ بیتگیں مردمانی تہ ءَ 30 سالی ئیں امیر ء احمد، 25 سالی ئیں دوست محمد ء قاسم، 20 سالی ئیں محمد خالد ء محمد شفیع، 20 سالی ئیں شھباز احمد ء نیاز احمد ءُ 25 سالی ئیں سخی ء کریم داد ھوار اَنت- ھالانی رِد ءَ امیر ءُ سخی شپ کساس دو ءَ وھدے کہ دوست محمد، محمد خالد ءُ شھباز احمد بیگاہ 7:30 ءَ آئی ءِ لوگ ءَ چہ چست کتگ برتگ-

اے مردمانی تہ ءَ امیر ءُ سخی دریاورد اَنت، دوست محمد مزدور، محمد خالد دریاورد وھدے کہ شھباز احمد نودربرے-

ھمے وڑ چہ شال ءَ زورانسری آوار جنی ءِ نشانگ بیتگیں سفی اللہ بلوچ، مدثر بلوچ ءُ آصف علی یل کنگ بیتگ اَنت-

سفی اللہ بلوچ ء مھر اللہ بلوچ ءُ مدثر بلوچ ء شیر دل بلوچ 24 جولائی 2026 ءَ چہ سریاب دگ شال ءَ بیگواہ کنگ بیتگ اَت – دوئیں 13 اگست 2026 ءَ چہ شال ءِ ٹیکسی اسٹینڈ ءَ یل کنگ بیتگ-

ھمے وڑ آصف علی ء احمد یک اگست 2026 ءَ چہ کلی شھید حاجی رمضان، جبل نور بائی ہاس شال ءَ بیگواہ کنگ بیتگ، کہ 17 اگست 2026 ءَ چہ شال ءَ یل کنگ بیتگ-

سلاہ بندیں مردماں چار جتاجتائیں کاروائیاں پاکستانی پوج ءُ ڈیتھ اسکواڈ نشانگ کتگ، ڈرائیور دزگیر –

چاگی، پھاٹک ءِ نزیک ءَ کرودک ھند سر ءَ سلاہ بندیں مردماں پاکستانی پوج ھما وھد ءَ اُرش ءِ نشانگ کتگ وھدے آ چہ اود ءَ گوزگ ءَ بیتگ اَنت-

ھمے وڑ نوکچاہ ءِ ھند سر ءَ ناشناسیں سلاہ بندیں مردماں پاکستانی پوج ءِ پلامرزی ڈیتھ اسکواڈ ٹولی ءِ یک گاڑی یے راکٹ اُرش ءَ نشانگ کتگ ، وھدے کہ ھمے ھند ءِ سر ءَ پیشگانی کنوکیں پوج ھم اُرش ءِ نشانگ کنگ بیتگ-

ھالانی رِد ءَ سئیں کاروائیاں پاکستانی پوج کارندہ ءُ ڈیتھ اسکواڈ ءِ باسک بیران بیتگ اَنت-

دومی نیمگ ءَ مروچی بارتاگزئی ءِ ھند سر ءَ سلاہ بندیں مردماں شھدگ سر ءَ ناکہ بندی ءِ میان ءَ اوپاری گاڑیانی گرگ ءَ پد دو ڈرائیور دزگیر کتگ اَنت-

زانگ بہ بیت اے دمگ ءَ اشی ءَ ساری ھم ہاکستانی پوج ءُ مڈی بروکیں ٹرکانی سر ءَ اُرشانی وئیل دیم ءَ اتکگ اَنت کہ آیانی زمہ واری بلوچ آجوئی لوٹوکاں اُرش کتگ ، بلے مروچی بیتگیں اُرشانی زمہ واری انگت ھچ گل ءَ نہ زرتگ اَنت-

بلوچستان ءِ جتا جتائیں جاھاں پنچ مردمانی لاش دزکپتگ انت-

گیشیں ھالانی رد ءَ ھاران ءِ جتا جتائیں جاہ زاروزئی ءُ سور بڑو ءَ دو مردمابی لاش دزکپتگ انت- زاروزئی ءَ دزکپتگیں لاش ءِ پجار غلام حیدر ء شاھجان ءِ نام ءَ بیتگ، چہ سوو بڑو ءَ دزکپتگیں لاش ءِ پجار نہ بیتگ-

پولیس ءَ ھردوکیں لاش پجار ءُ اژدری چار ءُ ٹپاس ءِ ھاتر ءَ ڈی ایچ کیو ھسپتال ءَ سر کتگ انت-

ھمے وڑ چہ ھب ءَ پولیس ءَ ھب بائی پاس ءَ ھزدار ءِ دمگ ھیراوہ ءِ جھمنندیں فرید اللہ ء علی احمد ءِ لاش دزکپتگ – آ تیر جنگ ءُ کشگ بیتگ-

دومی نیمگ ءَ گوستگیں روچ ءَ ھزدار ءِ دمگ آپک ڈیم ءَ یک ھبدہ سالی ئیں مردمے ءِ لاش دزکپتگ –

ھمے وڑ چہ سوراب ءَ ورنایے ءِ لاش دزکپتگ کہ آئی ءِ پجار نہ بیتگ-

بلوچستان ءِ دمگ کیچ ءِ ھند چہ تمپ ءَ پاکستانی لشکر ءَ چار مردم آوار جنگ ءَ پد بیگواہ کتگ انت-

آوار جنگ بیتگیں مردمانی پجار جاوید ء عظیم، مقبول ء نعمت اللہ، مجیب ء لال بخش ءُ توفیق ء فیصل ءِ ناماں زانگ بیتگ انت-

دمگی مردمانی رد ءَ اے آوار جنگ بیتگیں مردم نھنگ کور ءَ ماھیگ ءِ گرگ ءَ شتگ انت ءُ ھمے وھد ءَ پاکستانی لشکر ءَ آوار جتگ ءُ برتگ انت-

زانگ بہ بیت بلوچستان ءَ لس مھلوک ءِ آوار جنگ ءُ بیگواہ کنگ ءِ درچ یک دراجیں وھدے ءَ برجاہ انت کہ اود ءَ ھزارانی ھساب ءَ مردم گرگ ءُ بیگواہ کنگ ءُ کشگ ءُ چگل دیگ بوتگ انت ءُ اے درچ داں انگت ءَ ترندی ءَ گوں برجاہ انت-

چاگی ءِ دمگ چھتر ءِ نزیک ءَ سَے شمبے ءِ سھب ءَ سلاہ بندیں مردماں پاکستانی لشکر ءِ گاڑی ءُ تجارتی کاروان ءِ سر بستگ ءُ نشانگ جوڑ کتگ ءُ ایشی ءَ پد دمگ ءَ مزنیں تیرگواری ءُ تراکانی توار اشکنگ بیتگ انت۔

دمگی مردمانی رد ءَ اُرش کنوکاں فورسز ءِ گاڑی ءُ کاروان ءِ نشانگ جوڑ کتگ کہ آ تجارتی شھدگ ءِ سر ءَ چہ دمگ ءَ گوزگ ءَ بیتگ انت۔ بنشون ءِ گشگ انت کہ تیر گواری ءُ تراک 30 منٹ ءَ گیش برجاہ بوتگ۔

بنداتی ھالانی رد ءَ اے اُرش ءَ کم چہ کم 7 پاکستانی لشکر ءِ کارندہ بیران یا ٹپیگ بوتگ اَنت۔ البت چہ ٹپیانی گڈی کساس ءِ بابت ءَ ھچ وڑیں سرجمیں سرکاری بیان شنگ نہ بوتگ۔

زانگ بہ بیت کہ چاگی بلوچستان ءِ یک ھاسیں سیمسری دمگے ءُ ایشی ءِ شاھدگ پہ سوداگری ءُ دمگی ٹرانسپورٹ ءَ ھاسیں زانگ بنت۔ گْوستگیں لھتیں ماھاں راہ ءِ سر ءَ بلوچ آجوئی لوٹوکیں کارانی کنٹرول ءَ بیتگ اَنت۔ بلے اے وئیل ءِ زمہ واری تاں انوگ ءَ کس ءَ نہ زرتگ۔

بلوچستان ءِ دمگ کیچ ءِ ھند ھوشاپ تل ڈمب ءِ میان ءَ پاکستانی لشکر ءِ یک گاڑی یے تراک ءِ نشانگ کنگ بیتگ- تراک ءِ آسر ءَ پوجی کارندھاں جانی ءُ مالی تاوان بوگ ءِ ھال انت-

دمگی مردمانی رد ءَ تراک ھما وھد ءَ کنگ بیتگ کہ دمگ ءَ پورس سر ءُ پر ءَ بیتگ-

وئیل ءَ پد پاکستانی لشکر ءَ دمگ انگیر کتگ – داں انگت ءَ اے وئیل ءِ زمہ واری کس ءَ پہ وت نہ زرتگ ءُ ناکہ واکداراں اے وئیل ءِ تاوانانی بارو ءَ گپ جتگ-

بلوچستان ءِ دمگ کیچ ءِ ھند تمپ نزر آباد ءَ یک لوگے ءِ سر ءَ ڈیتھ اسکواڈ ءِ کارندھاں بیڑ برتگ ءُ اود ءَ دُزی کتگ-

دمگی اھوالانی رد ءَ گوستگیں شپ ءَ نزر آباد ءَ ملا عابد نامیں مردمے ءِ لوگ ءِ سر ءَ ڈیتھ اسکواڈ ءِ کارندھاں بیڑ برتگ ءُ اود ءَ زالبولانی گون ءَ کمشرپی کتگ ءُ آیانی گوشانی والیگ ءُ سھر کش اتگ ءُ برتگ انت-

زانگ بہ بیت ڈیتھ اسکواڈ بلوچستان ءِ بازیں جاھاں ناشری، سلکاری، بلوچ ورنایانی کوش ءُ دگہ چاگردی ناشریاں ھوار بوگ ءِ بھتام جنگ بوگ ءَ انت-

کراچی ءِ دمگ ماری پور ءَ گوستگیں یک ھپتگے ءِ وھد ءَ دہ مردم دزگیر کنگ ءَ پد زورانسری بیگواہ کنگ بیتگ انت-

دمگی مردمانی رد ءَ دزگیر بیتگیں مردمانی تہ ءَ بلوچ اسٹوڈنٹ ایکشن کمیٹی ( بساک) ءِ گوستگیں چیئرمین شبیر بلوچ ءِ برات خالد بلوچ ھوار انت-

دزگیر بیتگیں دگہ مردمانی پجار سورج، شھباز، شاھجان شفیع، سخی، عامر، سمیر اللہ بخش، عامر واحد، عزیز نور داد ءُ صابر عزیز ءِ ناماں بیتگ انت-

دمگی مردمانی رد ءَ اے مردم کراچی ءِ دمگ ماری پور ءَ یک ھپتگے ءِ وھد ءَ جتا جتائیں کاروائیانی وھد ءَ آوار جنگ بیتگ انت- داں انگت ءَ اے مردمانی دزگیری یا انیگیں جاورھالانی بارو ءَ سرکاری درچ ءَ ھچ وڑیں اھوال دیم ءَ نیتکگ انت-

دمگی مردمانی رد ءَ کراچی ءِ بازیں بلوچ دمگاں گوستگیں یک ماھے ءَ آپریشن برجاہ انت- دمگی مردمانی گوشگ انت شپ ءِ وھد ءَ رینجرز ءُ چیریں ادارھانی نیمگ ءَ دمگ ءَ انگیر زیر ایت ءُ پٹ ءُ پول ءُ دزگیری برجاہ انت –