TBP Balochi

بلوچستان ءِ دمگ مستونگ ءَ ڈرون اُرش ءَ چار مردم بیران ءُ سَے زدگ بیتگ انت- سوراب ءَ پد مستونگ ءَ ڈرون اُرش کنگ بیتگ-

مستونگ ءِ دمگ کھڈکوچہ ءِ ھند گیت ءَ باگ ءَ کار کنوکیں پوریاگرانی سر ءَ اُرش چریشی ءَ چار پوریاگر بیران ءُ سَے زدگ بیتگ انت –

زدگ ءُ بیران بیتگیں مردم نواب غوث بخش رئیسانی ھسپتال ءَ سر کنگ بیتگ انت-

بیران بیتگیں مردمانی پجار گل خان مغیری جھمنند ھاجی شھر، عمران بروھی جھمنند ھاجی شھر،عبید اللہ بروھی جھمنند ھاجی شھر، جھانزیب ابڑو ءِ ناماں زانگ بیتگ انت-

زدگ بیتگین مردمانی پجار علی رضا مینگل، نصیب اللہ ابڑو ءُ خالد حسین ھوار انت-

زانگ بہ بیت بلوچستان ءَ پاکستانی لشکر ءِ ڈرون اُرش یکشل ءَ برجاہ انت کہ دوازدہ اگست ءِ بامسار ءَ پاکستانی لشکر ءَ سوراب گدر گوندان ءَ ڈرون اُرش کتگ ات کہ اود ءَ زھگ ءُ زالبولاں ھوار بیست ءُ ھپت بیران ءُ زدگ بیتگ ات انت-

پاکستانی ڈرون اُرشانی ھلاپ ءَ بلوچ تَک ءُ پھناتاں پاکستانی پوج ءِ ھلاپ ءَ ترندین زھر ءِ درشان کنگ بیتگ ات کہ لس آبادیانی سر ءَ بمبگواری کنگ انسانی ھکانی لگتمالی یے –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ مروچی سرمچاراں پشین ءِ شھر سرانان سرجم ءَ کنٹرول کتگ ءُ پولیس تھانہ، نادرا آفس ءُ دگہ سرکاری دستیگ کتگ انت ءُ ھمے وھد ءَ پولیس کارندہ دزگیر کتگ انت ءُ پد ءَ یل داتگ انت – تھانہ ءَ بازیں کچے ءَ سلاہ ءُ گولا بارود برتگ ءُ تھانہ تراک ءَ گون تباہ کتگ-

آئی ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ سرجمیں درشان زوت رسانکدر ءَ شنگ کنگ بیت انت-

نوکتریں ھالانی رد ءَ بلوچستان ءِ دمگ پشین سرانان ءِ شھر بلوچ آجوئی لوٹوکیں سلاہ بندیں گلان کنٹرول کتگ ءُ پولیس تھانہ دستیگ کتگ-

اھوالانی رد ءَ سلاہ بندین مردم ٹوھیں کچے ءَ دمگ ءَ سر بیتگ انت ءُ جتا جتائیں جاھاں سنگر اش جوڑ کتگ ءُ اود ءَ سرانان تھانہ اش دستیگ کتگ ءُ بازیں کچے ءَ سلاہ ءُ پوجی ساز ءُ سامان اش دستیگ اش کتگ انت-

زانگ بہ بیت پشین ءَ ھوار بلوچستان ءِ دگہ جاھاں ھم سلاہ بندانی کنٹرول بازیں جاھاں گندگ ءَ کاینت کہ چُشکہ واپاری راہ ءُ دگہ دگہ دگانی سر ءَ آیانی کنٹرول گندگ ءَ کاینت-

بلوچستان ءِ دمگ مستونگ ءَ شال کراچی شھدگ سر ءَ سورگز ءِ ھند سر ءَ سلاہ بندیں مردماں ناکہ بندی میان ءَ ٹکی سردار شاہ زمان خان علیزئی ءُ آئی ءِ چُک بیگواھی ءِ ھال اِنت-

اِھوالکار ءِ رِد ءَ وئیل گوستگیں روچ ءَ ھما وھد ءَ بیتگ وھدے سردار شاہ زمان خان علیزئی وتی چُک ءِ ھمراھی ءَ چی مستونگ ءَ شال نیمگ ءَ سپر کنگ بیتگ- اِھوالکار ءِ گوشگ اِنت کہ سورگز ءِ ھند سر ءَ شال کراچی شھدگ سر ءَ سلاہ بندیں مردماں ناکہ بندی کتگ، اود ءَ گاڑیانی پٹ ءُ پول ءِ میان سردار شاہ زمان علیزئی ءُ آئی ءِ چُک گوں ویگو گاڑی ءَ ھوار وتی ھمراھی ءَ برتگ اَنت-

اِھوالکار ءِ رِد ءَ وئیل ءَ پد سردار شاہ زمان علیزئی ءُ آئی ءِ چُک ءِ موباھل فون بند اَنت، چریشی ءَ پد کھول ءَ گوں ھال نہ بیتگ-

وئیل ءَ سرکاری نیمگ ءَ ھچ راستی ءُ اے درگت ءَ چہ پولیس یا دمگی انتزامیہ درشان دیم ءَ نیتکگ-

شال ءِ دمگ گشکوری ٹاؤن ءَ دو زالبول ءُ دو کسان سالیں زھگاں ھوار یکیں کھول ءِ چار مردم زورانسری بیگواہ کنگ بیتگ انت-

گیشیں ھالانی رد ءَ نوزدہ اگست دوھزار ءُ بیست ءُ شش ءِ سھب ءِ کساس چار ءَ گسکوری ٹاؤن شال ءَ چہ مستونگ ءَ سیادی داروکیں چار مردم سی ٹی ڈی ءُ ایف سی ءَ دزگیر کنگ ءَ پد بیگواہ کتگ انت-

بیگواہ کنگ بیتگیں مردمانی تہ ءَ بیست ءُ ھپت سالی ءِ عمیرہ ء عبدالرسول ءُ بیست ءُ ھشت سالی ئیں نجما ء عبدالرسول ھوار انت کہ ھردوک لوگی بانک انت – آیانی ھواری ءَ ھشت سالی ئیں پریسا ء مند دوست، کہ مونٹیسوری ءِ نودربرے ءُ یک سال ءُ نیمے زاکر ء عبدالحق بیگواہ بیتگ انت-

بلوچستان ءِ واپاری شھدگانی سر ءَ بلوچ آجوئی لوٹوکانی کنٹرول،کمپنی ءِ کنٹینر مالاں ھوار دستیگ، پورسز ءِ سر ءَ سلاہ بندیں اُرش-

کلات ءِ دمگ دشت بابا ءِ ھند ءَ سلاپ بندیں مردماں شھدگ بستگ ءُ ھمے وھد ءَ یک کمپنی ءِ کنٹینر دستیگ کتگ ءُ گون وت برتگ-

ھمے وڑ دمگ ءَ پیشگامی کنوکیں پورسز ءِ بکتربندیں گاڑی سنگر گپتگیں سلاہ بنداں نشانگ کتگ بلے داں انگت ءَ تاوانانی باور ءَ دگہ اھوال دیم ءَ نیتکگ انت-

زانگ بہ بیت گوستگیں روچ ءَ کلات مکئی ءَ یک آئی ای ڈی اُرشے ءَ پاکستانی پوج ءِ شش کارندہ بیران بیتگ ات انت-

پنجگور ڈسٹرکٹ ٹیچنگ ہسپتال ءَ پنچ مردمانی لاش سر کنگ بوتگ انت کہ ایشانی تہ ءَ دو مردمانی پجار کنگ بوتگ انت وھدے کہ 3 مردمانی پجار شناسی برجاہ انت۔

نادراھجاہ ءِ بنشون ءِ رد ءَ 19 اگست ءَ شپ ءِ 11:30 ءِ نزیک ءَ پنچ مردمانی لاش ڈسٹرکٹ ٹیچنگ نادراھجاہ پنجگور ءَ سر کنگ بوتگ اَنت ءُ نادراھجاہ ءِ کارمستر ءَ لاشانی دزکپگ ءِ ھال راست کتگ ءُ کانونی کارروائی بندات کتگ۔

نادراھجاہ ءِ بنشون ءِ رد ءَ کُشگ بوتگیں مردمانی تہ ءَ پروم ءِ نندوکیں ظاہر ء ناصر ءُ وشبود ءِ نندوکیں حافظ عمران ء منظور ھوار اَنت۔

انتزامیہ ءِ رد ءَ انگت ءَ رند ءِ سئے مردمانی پجار نہ بوتگ ءُ آھانی پجار ءِ کار برجاہ اِنت۔

ہسپتال ءِ انتزامیہ ءِ گشگ انت کہ اے وئیل ءِ دروشم ءُ دگہ ھال ءُ اھوال ءِ بابت ءَ گیشتریں ھال ءُ اھوال ھما وھد ءَ سرپد کنگ بنت تچکیں اھوال سر بنت۔

زانگ بہ بیت کہ اے ماہ ءَ پنجگور ءِ دمگ چیدگی ءَ پاکستانی لشکر ءَ آپریشن ءِ تہ ءَ پنچ مردم کُشگ ءِ ٹاپار جتگ ات بلے پد ءَ چہ آھاں سئے مردمانی پجار پیسر ءَ زورانسری بیگواھین مردمانی ناماں بوتگ ات انت۔

بلوچستان ءِ مزن شھر شال ءَ پاکستانی لشکر ءِ سر ءَ اُرش کنگ بیتگ ءَ شھر ءَ تراکانی توار اشکنگ بیتگ انت ۔

ھالانی رد ءَ چار شمبے ءِ روچ ءَ سریاب کیچی بیگ ءَ پولیس تھانہ ءِ سر ءَ دزبمب اُرش کنگ بوتگ وھدے کہ منیر احمد روڈ ءِ سر ءَ ایف سی ءِ چیک پوسٹ ھم سلاہ بندیں مردمانی نشانگ جوڑ کتگ ۔

بنشون ءِ رد ءَ سلاہ بندیں اُرشانی تہ ءَ پاکستانی لشکر ءَ جانی تاوان رس اتگ۔ البت تاں انوگ ءَ واکداراں دگہ درشان دیم ءَ نیاؤرتگ انت-

زانگ بہ بیت مروچی بلوچستان ءِ دمگ چاگی ءُ کلات ءَ پاکستانی لشکر ءِ سر ءَ ھم اُرش کنگ بیتگ انت کہ ایشی ءِ تہ ءَ بازیں کارندہ بیران ءُ ٹپیگ بیتگ اَنت۔

بلوچ راجی آجوئی سنگر (براس) ءِ سرمچاراں نوشکی ءَ زورگریں پاکستانی پوج ءِ سر ءَ تُرندیں اُرشے کتگ مزنیں کچے ءَ جانی ءُ مالی تاوان ءِ دیمپانی کنگ کپتگ-

جارکش ءَ گوشتگ براس ءِ سرمچاراں ھپدہ اگست دوشمبے ءِ روچ ءَ نوشکی ءِ دمگ کچکی ءَ لیویز تھانہ ءِ نزیک ءَ زورگریں پاکستانی پوج ءِ گاڑیانی یک کاروان سنگر گپتگ ءُ تُرندیں اُرشے ءِ نشانگ کتگ اَنت- اے کاروائی ءِ آسر ءَ زورگریں پوج ءِ سے گاڑی تچکی ءَ اُرش ءِ نشانگ ءَ اتکگ اَنت، چریشی ءَ چہ دُژمن ءِ ھپت کارندہ جاہ پہ جاھی مرتگ اَنت ءُ ھشت ءَ چہ گیش سک ٹپی بیتگ اَنت- اے کاروائی ءِ میان ءَ سرمچاراں دُژمن ءِ یک کواڈ کاپٹرے ھم جتگ دور داتگ-

جارکش ءَ گوشتگ کہ بلوچ راجی آجوئی سنگر (براس) اے سوبمندیں کاروائی زمہ واری ءَ منّ اِیت ءُ اے اِھد کنت کہ بلوچ سرڈگار ءِ سرجمی آجوئی ءُ زورگریں پوج ءِ دراھگ ءَ تاں مئے اے اُرش گیش تُرندی ءِ ھمراھی ءَ برجاہ بنت- براس تچک کنت کہ بلوچ سرڈگار مڈیانی لُٹ ءُ پُل زورگری ءَ ھلاپ ءَ جُھد آجوئی ءِ منزل ءِ مول ءُ مراد تاں بے اوشت ءَ برجاہ بنت-

بلوچستان ءِ دمگ کلات ءَ تراکے ءِ سبب ءَ پاکستانی لشکر ءَ جانی تاوانانی دیمپانی کنگ کپتگ۔

گوستگیں روچ ءَ کلات ءِ منگچر ءِ نزیک ءَ مکئی ءِ ھند ءَ پاکستانی لشکر وتی پوسٹانی نیمگ ءَ دیم ءَ روگ ءِ وھد ءَ آئی ای ڈی تراک ءَ نشانگ جوڑ کنگ بوتگ اَنت۔

بنشون ءِ رد ءَ اے تراک ءَ 6 پاکستانی لشکر بیران بوتگ انت کہ ایشانی تہ ءَ یکے ءِ پجار امداد اللہ ءِ نام ءَ زانگ بیتگ کہ آ ونڈا چکری ، لکی مروت ءِ نندوک اِنت۔

گوستگیں روچاں کلات ءِ دمگ رودینجو ءِ مستریں شھدگ ءِ سر ءَ تراک ءِ سبب ءَ پاکستانی فوج ءِ کاروان ءِ سر ءَ تراک ءِ نشانگ جوڑ کنگ بوتگ کہ ایشی ءِ آسر ءَ فورسز ءَ جانی تاوان بوتگ ات وھدے کہ مزن شھدگ ساھتانی ساھت بند بوتگ۔

ارش ءِ زمہ واری بلوچ لبریشن آرمی ءَ من اتگ ات۔ بلے انگت ءَ مکئی ءَ بوتگیں تراک ءِ زمہ واری کس ءَ نہ زرتگ۔