TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ مستونگ اُرش ءِ زمہ واری من اتگ ءُ گوشتگ سرمچاراں گوستگیں روچ ءَ مستونگ ءِ دمگ کھڈکوچہ ءَ زورگیریں لشکر ءِ کاروان ءِ تہ ءَ یک بکتربندیں گاڑی یے تباہ کتگ ءُ دگہ بکتربندین گاڑی ءُ دگہ گاڑیانی سربستگ ءُ اُرش کتگ انت۔ اے ترندیں اُرش ءَ زورگیریں لشکر ءِ 13 کارندہ کشتگ ءُ 10 ءَ چہ گیش ٹپیگ بوتگ اَنت۔ اے آپریشن ءَ بی ایل اے ءِ اسپیشل ٹیکٹیکل آپریشن اسکواڈ ءِ بھر ھوار انت-

آئی ءَ گوشتگ دومی نیمگ ءَ مرچی تربت ءِ دمگ حیر آباد ءَ بی ایل اے ءِ سرمچاراں اُرش ءَ زورگیریں لشکر ءِ کاروان ءُ سیکورٹی کارندہ نشانگ جوڑ کتگ اَنت کہ ایشی ءِ آسر ءَ دژمن ءِ 3 کارندہ مرتگ ءُ 3 ٹپیگ بوتگ اَنت۔ ایشی ءَ ابید بی ایل اے ءِ سرمچاراں نوشکی، کلات، خاران، واشک، زہری ءُ چاگی ءَ دگہ 8 جتا جتائیں کاروائی ھم کتگ۔

جارکش جیئند بلوچ ءَ گوشتگ ارشانی زمہ واری ءَ بلوچ لبریشن آرمی من ایت۔ اے کارروائیانی سرجمیں ھال بی ایل اے ءِ آیوکیں ھپتگی بیان ءَ شنگ کنگ بنت۔

بلوچستان ءِ جتاجتائیں دمگاں پاکستانی پوج ءِ سر ءَ بمب تراک ءُ سلاہ بندیں اُرش کنگ بیتگ-

گیشیں ھالانی رِد ءَ ھاران ءِ دمگ البت ءَ گوستگیں شپ ءَ سلاہ بندیں مردماں پاکستانی پوج ءِ یک بُنجلے نشانگ کتگ- اُرش ءِ میان ءَ بُنجل تیرگواری ءِ نشانگ کتگ-

ھمے وڑ کیچ ءِ دمگ ھیرآباد ءَ سلاہ بندیں مردماں پاکستانی پوج ءِ کارمند ھما وھد ءَ نشانگ کتگ وھدے آ پیکٹ سکیورٹی دیگ ءِ ھاتر ءَ سنگر ءَ سر بیتگ- ھالانی رِد ءَ وئیل ءَ پد سلاہ بندیں مردماں پوج ءِ کاروان ھم نشانگ کتگ-

دومی نیمگ ءَ کیچ ھیر آباد ءَ بیتگیں اُرش ءِ سرکاری واکدار ءَ راست کتگ گوشتگ کہ وئیل سُھب ءِ وھد ءَ بیتگ وھدے ایف سی ءِ کارندہ دگ ءِ پٹ ءُ پول پھازداری ءِ پٹ ءُ پول ءَ دلگوش بیتگ اَنت- ھمے میان ءَ سے موٹر سائیکلوں سوار شش سلاہ بندیں مردماں پیسر ءَ دستی بم بے چگل داتگ ءُ پد ءَ تیرگواری کتگ-

ایف سی ءِ کارندھانی پسھی تیرگواری ءَ اُرشکار ھما جاھی تتکگ اَنت- ٹپی ئیں کارمند پہ الاج ھاتر ءَ دمگی نادُراھجاہ ءَ برتگ اَنت-

ھمے وڑ واشک ءِ دمگ ارماگئے ءَ ھم پاکستانی پوج ءِ سر ءَ سلاہ بندیں اُرش ءِ ھال اِنت- وئیل ءِ تُرندی ءُ اشی ءَ بیتگیں جانی ءُ مالی تاوانانی درگت ءَ ھچ وڑیں سرپدی نیتکگ-

دومی نیمگ ءَ زھری ءِ دمگ بلبل ءَ ھم پوج ءِ پیادگ کارمند تراک ءَ چہ نشانگ کتگ اَنت- ھالانی رِد ءَ تراک ھما وھد ءَ بیتگ وھدے پوج ءِ کارندہ ھالگیں سنگرے ءَ سر بیتگ اَنت-

تنی وھدے اے بیتگیں سرجمیں اُرشانی زمہ واری ھچ گل ءَ نہ زرتگ اَنت-

بلوچستان ءِ دمگ چہ پنجگور ءَ پنچ ناشناسیں مردمانی لاش دزکپتگ انت کہ پولیس ءَ چِست کتگ ءُ ھپستال ءَ سر کتگ انت-

پنجگور ءَ دست کپتگیں لاشانی پجار امام الدین ء اسھاک جھمنند سوردو، ماجد ء عبدالمجید جھمنند سوردو، ضیاء ء نوراللہ جھمنند سوردو، سلمان ء پیران جھمنند جھمنند بونستان ءُ حفیظ ء عبدالرحمن جھمنند تارافس ءِ ناماں زانگ بیتگ انت۔

ھالانی رد ءَ ماجد 2022 ءَ چہ سردو ءَ پاکستانی لشکر ءَ دزگیر کتگ ءُ پد ءَ آ لشکر ءِ دست ءَ بوتگ۔ ھمے رنگ ءَ ضیاء ھم 2022 ءِ شپ ءِ نیم ءَ چہ آئی ءِ لوگ ءَ لشکر ءَ دزگیر کتگ۔

دمگی مردمانی رد ءَ 3 مردم ھم پیسر ءَ بیگواہ بوتگ اَنت کہ آھانی لاش گوستگیں روچ ءَ فورسز ءَ نادراھجاہ ءَ سر کتگ اَنت۔

زانگ بہ بیت اے ھپتگ ءَ پنجگور ءَ اے دومی وئیل اِنت کہ یکیں وھد ءَ پنچ مردمانی جون ٹیچنگ ھسپتال ءَ آرگ بیتگ اَنت۔ پیسری ھمے ھپتگ ءِ تہ ءَ 5 لاش نادراھجاہ ءَ آرگ بیتگ اَنت کہ رند ءَ پجار بوتگ اَنت۔

اے وئیل ءَ پد بلوچ یکجھتی کمیٹی ءُ دگہ بنی آدمی ھکانی گلاں گْوشتگ کہ بُرز ءَ گْوشگ بوتگیں لاش ھما مردمانی بوتگ اَنت کہ پاکستانی لشکر ءَ پہ زور بیگواہ کتگ اَنت۔

زانگ بہ بیت پنجگور ءَ ھوار بلوچستان ءِ بازیں دمگاں لاشانی دزکپگ ءِ امل گوستگیں دو دھک ءَ چہ برجاہ اِنت۔ بلوچستان ءِ انسانی ھکانی گل ءُ لھتے دمگ ءِ ھیال اِنت کہ اے لاشانی گیشتریں بھر ھما مردمانی اَنت کہ زورانسری ءَ بیگواہ کنگ بوتگ اَنت، کہ پاکستانی لشکر ءِ دست ءَ بوھگ ءِ وھد ءَ دروگیں انکاؤنٹرانی نام دیگ بیگ ءَ اَنت۔

لھتے وھداں ھنچیں لاش دزکپ انت کہ آیانی پجار ءُ شناس ناممکن انت-

بلوچستان ءِ دمگ مستونگ ءَ پاکستانی لشکر ءِ سر ءَ ٹوھیں اُرشے ءَ فوج ءَ جانی تاوان رس اتگ۔ مروچی سھب ءَ سیکورٹی ءِ مشکلانی سبب ءَ سرجمیں دمگ ءَ کرفیو ءِ جار جنگ بوتگ ءُ رھوتی ءِ نزام ھم بندش ءِ آماچ انت۔

گوستگیں روچ ءَ مستونگ ءِ دمگ کھڈکوچہ ءَ تراک ءِ تہ ءَ پاکستانی لشکر ءِ کاروان ءِ بکتر بندیں گاڑی نشانگ جوڑ کنگ بوتگ ءُ تباہ کنگ بوتگ ءُ تراک ءِ تہ ءَ دگہ بکتر بندیں گاڑی ءَ را سک باز تاوان رس اتگ۔

دمگی مردماں گوں ٹی بی پی ءَ گْوشتگ کہ پد ءَ سلاہ بندیں مردماں فورسز ءِ گاڑیانی سر بستگ ءُ نشانگ جوڑ کتگ انت ءُ دگہ گاڑی یے ءَ را سک باز تاوان رس اتگ۔

اُرش ءَ بیران بوتگیں دوئیں کارندہ ءُ 8 ٹپیگیں کارندھانی لاش زوت مستونگ ءَ نواب غوث بخش رئیسانی میموریل ہسپتال ءَ سر کنگ بوتگ اَنت ءُ دگہ کارندہ ھیلی کاپٹرانی وسیلگ ءَ سی ایم ایچ شال ءَ سر کنگ بوتگ اَنت۔

واکداراں انگت ءَ اے اُرش ءِ تہ ءَ بیران بوتگیں مردمانی بابت ءَ ھچ وڑیں ھال ءُ اھوال شنگ نہ کتگ بلے دمگ ءَ سرجمیں کرفیو ءِ جار جنگ بوتگ۔

مھکمہ داکلہ بلوچستان ءَ کھڈکوچہ ءَ مرچی یک شمبے ءِ سھب ءِ ہفت ءَ بگر داں دگہ ھال ءِ شنگ کنگ ءَ (پہ نہ ھَلوکیں مدتے ءَ) کرفیو ایر کتگ۔

محکمہ داخلہ ءِ رد ءَ دمگء انتزامیہ ءُ قانون سازمان کنوکیں ادارگاں دمگ ءَ سیکورٹی ءِ بندوبست گیش کتگ انت تانکہ ہرچ ناشریں وئیلے ءِ وھد ءِ سر ءَ گر ءُ دار کنگ بہ بیت۔ پرمان ءِ رد ءَ کرفیو ءِ وھد ءَ مردم وتی گسانی تہ ءَ بہ نند اَنت ءُ کرفیو ءِ ایر کنگ ءَ پد کھڈکوچپ ءُ آئی ءِ کش ءُ گور ءِ دمگاں سرکاری دگ ءُ بازارانی سر ءَ مردمانی روگ ءُ آیگ ءِ سر ءَ سرجمیں بندش جنئگ بوتگ ۔

گوستگیں ماہ ءِ 17 ءِ روچ ءَ کھڈکوچہ ءِ دمگ ءَ مزنیں اُرشے ءَ پاکستانی لشکر ءَ بازیں کچے ءَ جانی تاوانانی دیمپانی کنگ کپتگ۔

اے اُرش ھما وھد ءَ کنگ بوتگ کہ پاکستانی لشکر ءِ کارندہ سواریں ھژدہ ءَ چہ گیش بس ءُ سیکورٹی گاڑی روگ ءَ بوتگ اَنت۔ کاروان چہ شال ءَ دیم پہ کراچی ءَ روگ ءَ بوتگ۔ چہ اے اُرش ءَ بساں ھوار سیکورٹی گاڑی تباہ کنگ بوتگ اَنت، اُرش کنوکاں مزنیں سلاہاں گوں ھیلی کاپٹر ھم نشانگ جوڑ کتگ اَنت۔

ارش ءِ ذمہ واری بلوچ لبریشن آرمی ءَ من اتگ ات ۔ جارکش جیئند بلوچ ءَ گْوشتگ: بی ایل اے ءِ ھاسیں لشکر فتح اسکواڈ ءَ آپریشن کتگ، وھدیکہ اُرش ےَ 62 ءَ گیش کارندہ مرتگ ءُ زدگ بیتگ انت۔

کھڈکوچہ کجا اِنت؟

کھڈکوچپ مستونگ شھر ءِ زرباری روکپت ءَ کساس 35 کلومیٹر دور انت۔ اے مستونگ ءِ سبزوگیً دمگے کہ اود ءَ سروپ ءُ انگور ءُ دگہ نیبگانی باگ ھست انت۔

مستونگ شال ءِ نزیکیں دمگے ءُ آئی ءِ بنجاہی کارگس مستونگ شھر اِنت کہ بلوچستان ءِ بنجاھی شھر چہ شال ءَ 45 کلومیٹر ءِ دور اِنت۔

مستونگ بلوچستان ءِ ہما دمگاں چہ یکے کہ شورش ءَ گیشتر آماچ بوتگ۔ پاکستانی لشکر مستونگ ءَ بلوچ آجوئی لوٹوکیں مردمانی نیمگ ءَ وڑ وڑیں اُرشانی آماچ بیتگ۔

بلوچستان ءِ دو جتا جتائیں جاہ نوشکی ءُ پنجگور ءَ پوج ءُ تجارتی گاڑیانی سر ءَ اُرش-

چہ نوشکی ءَ سر بیتگیں ھالانی رد ءَ سلتان چڑھائی ءِ ھند ءَ سلاہ بندیں مردماں دو واپاری گاڑیانی سر ءَ اُرش-

دمگی مردمانی رد ءَ سلاہ بندانی تیرگواری ءَ ھردوکیں گاڑی ناکارہ بوتگ انت-

دمگی اھوالانی رد ءَ پیشگامی کنوکیں پورسز ءِ پندی کارندھانی سر ءَ سلاہ بنداں راکٹ ءُ دگہ مزنیں سلاھانی گون ءَ اُرش کتگ-

ھمے وڑ ءَ گوستگین شپ ءَ پنجگور ءَ 125 ونگ ءِ سر ءَ اُرش کنگ بیتگ – اھوالانی رد ءَ اُرش ےَ کیمرہ ءُ کمیونیکیشن ٹاور ھم نشانگ کنگ بیتگ- ءُ اُرش ءِ آسر ءَ نائک فیصل بیران بیتگ-

اُرش ءَ دگہ نُھ کارندہ سپاھی اشتیاق، سپاھی سراج، سپاھی عابد، لانس نائک علی، سپاھی عظمت، سپاھی اقبال، سپاھی ولی، سپاھی عمران ءُ سپاھی عباس زدگ بیتگ انت-

چہ مستونگ ءَ سر بیتگیں ھالانی رد ءَ مزن شھدگ این 25 ءَ یک پھلے تراکناکیں شورواں گوں تباہ کنگ بیتگ ءُ ھمے وڑ پورسز ءِ گاڑی ھم تراک ءِ نشانگ کنگ بیتگ-

اھوالانی رد ءَ گوستگیں شپ ءَ کھڈ کوچہ ءَ انجیری کراس ءُ کھڈکوچہ ءَ ناشناسیں مردماں یک پھلے تراک ءَ گون تباہ کتگ-

اے وئیل یکین ھپتگ ءَ سیمی وئیل انت کہ پھل نشانگ کنگ بوگ ءَ انت یک روچے ءَ پیش ھزدار ءِ دمگ زیدی ءَ یک پھلے تراکناکیں تراک ءَ گوں تباہ کنگ بیتگ ءُ ایشی ءَ پیش ھاران سوتکگان ءَ یک پھلے سلاہ بنداں گون مشینریاں کروتکگ –

ھمے وڑ ءَ مستونگ کھڈ کوچہ ءِ ھند گرو ءَ پاکستانی لشکر ءِ گاڑی بمبے ءِ نشانگ کنگ بیتگ ءُ چریشی ءَ گاڑی ءَ آس کپتگ گمان کنگ بوگ ءَ انت گاڑی سرجم ءَ تباہ بیتگ-

داں انگت ءَ واکداراں اے درگت ءَ ھچ وڑیں گپ درشان نہ کتگ ءُ ناکہ دگہ سلاہ بنداں اے وئیلانی زمہ واری من اتگ انت-

بلوچستان ءِ گچینی واپاری راہ شال ءُ تپتان شاھدگ سر ءَ بلوچ آجوئی لوٹوکانی کنٹرول برجاہ، بلوچ لبریشن آرمی ءِ “ واپاری بندش” دگہ پنچ واپاری لوڈیں پنچ گاڑی سلاہ بنداں دستیگ کتگ انت-

تجارتی گاڑیانی دستیگی ءِ نوکیں وئیل گوستگیں روچ ءَ چاگی ءِ دمگ دالبندین ءِ چارسر ءَ بوتگ۔ ھما جاہ ءَ کہ تجارتی راہ ءِ سر ءَ وتی کنٹرول سلاہ بندیں مردماں چہ شال ءَ تپتان ءَ روکیں سئے ءُ تپتان ءَ چہ شال ءَ آیوکیں دو گاڑی دستیگ کتگ اَنت۔

واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

چہ گوستگیں چار ماھاں واپاری گاڑیانی سر ءَ مُدام اُرش کنگ بیتگ کہ گیشتریں بھر بلوچ لبریشن آرمی ءَ من اتگ اَنت۔ جارکش جیئند بلوچ ءَ بلوچستان ءِ مزنیں شھدگانی سر ءَ ” واپاری بندش“ ءِ جار جتگ۔

بلوچستان ءِ دمگ ھاران ءِ ھند البت ءَ مروچی نیمروچ ءِ وھد ءَ کساس ساھت دو ءَ پاکستانی پوج ءِ واستا پوسٹ جوڑ کنگ ءَ دلگوشیں شرکت ءِ کارندہ سلاہ بندیں مردماں دزگیر کتگ ءُ گوں وت برتگ اَنت-

دمگی اِھوالکار ءِ رِد ءَ وئیل ھما وھد ءَ دیم ءَ اَتکگ وھدے بند ساچی شرکت ءِ کارندہ اے دمگ ءَ پاکستانی پوج ءِ واستا پوسٹ ءِ جوڑ کنگ ءَ دلگوش بیتگ اَنت- اِھوالکار ءِ گوشگ اِنت کہ سلاہ بندیں مردماں ھمے وھد ءَ سر بیتگ اَنت شرکت ءِ کارندہ دزگیر کتگ اَنت ءُ ناشناسیں جاھے ءَ برتگ اَنت-

بلے دزگیر کنگ بیتگیں کارندھانی کچ ءُ ھستیں جاورھال ءِ درگت ءَ گیشیں سرپدی نیتکگ-

وئیل ءِ زمہ واری انگت ھچ گل ءَ نہ زرتگ-

بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ گشتگ کہ سیکورٹی ءِ نام ءَ سرجمیں ڈیھ ءَ بلوچ ءِ پجار شکی ءِ چیدگ جوڑ کنگ بوتگ۔ بلوچ ھر کجا کہ نشتگ ڈیرہ غازی خان بہ بیت، کراچی یا بلوچستان، آ مُدام یکشلیں ریاستی زُلمانی آماچ اَنت۔

آئی ءَ گوشتگ کہ بلوچستان ءَ بلوچ شھری ڈرون اُرش ءُ بالی اُرش ءِ نشانگ جوڑ کنگ بوھگ ءَ اَنت وھدیکہ کراچی ءَ بنچُکان آباد بوتگیں بلوچ کمیونٹی گیش ءَ چہ گیش آزار ءُ زُلم، چھاپہ ءُُ آپریشنانی دیمپان اَنت۔ ماری پور، لیاری ءُ دگہ بلوچ آبادی ءِ دمگاں چھاپہ ءُ آپریشن مُدام برجاہ اَنت ءُ بازیں مردم پہ زور بیگواہ کنگ بوھگ ءَ اَنت۔

بلوچستان ءِ تہ ءَ انوگیں انسانی ھکانی لگتمالی ءِ رد ءَ بلوچ یکجھتی کمیٹی ءِ سوشل میڈیا مھم ءِ بابت ءَ آئی ءَ گْوشتگ کہ اے مھم ءِ مول ءُ مراد ایش اِنت کہ اے زوراکیانی سر ءَ ھاموشی ءِ پروشگ، سانمندین کھولانی توار ءَ چست کنگ ءُ کراچی ءَ زوراکیں بیگواھی ءُ زلم ءُ زوراکیانی نیمگ ءَ دلگوش گور کنگ انت۔

آئی ءَ گوشتگ کہ من چہ ھرکس ءَ دزبندی کن آں کہ بلوچ یکجھتی کمیٹی ءِ اے مھم ءَ ھوار بہ بنت ءُ اے زُلم ءِ ھلاپ ءَ توار چست بہ کن اَنت۔

آئی ءَ گیش گوشتگ کہ زند ءِ ھک ھر انسان ءِ بنیاتی ھک اِنت۔ زورانسری بیگواھی ھلاس کنگ بہ بنت۔ سیکورٹی ءَ بلوچ راج ءِ زُلم ءُ گار کنگ ءِ توجیل ءِ بستار ءَ کارمرد کنگ یلہ کنگی اِنت۔

بلوچستان ءِ دمگ کیچ ءَ پاکستانی لشکر ءِ دست ءَ آوار جنگ بیتگین ورنایے یل کنگ بیتگ-

گیشیں ھالانی رد ءَ کیچ ھسپتال ءِ دیم ءَ 15 جنوری 2026 ءَ دشت بلنگور کلیرو ءِ جھمنندین مھران ء بیگ محمد مروچی یل کنگ بیتگ-

آ پانزدہ جنوری ءَ کیچ ھسپتال ءِ دیم ءَ پاکستانی چیریں ادارہ ایم آئی ءَ آوار جتگ ءُ گون وت برتگ بیتگ کہ مروچی آ چہ کیچ ءَ یل کنگ بیتگ ءُ آئی ءِ یل بوگ ءِ ھال کھول ءَ راست کتگ-

زانگ بہ بیت بلوچستان ءَ کمے کساس ءَ بیگواھیں مردم زندگی ءَ یل کنگ بنت ءُ دو کساس آوار جنگ بنت ءُ پد ءَ آیانی لاش دز کپ انت-