بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بلوچستان ءِ دمگ کچھی ءِ ھند سنی ءَ زورگریں پاکستانی پوج ءِ بُنجاھی کینٹ کسان ءُ مزنیں سلاھاں چہ تُرندیں اُرشے ءِ نشانگ کتگ- اے اُرش ءِ آسر ءَ زورگریں پوج ءَ جانی ءُ مالی تاوان چست کنگ کپتگ-
اے اُرش ءِ زمہ واری ءَ مئے گل بی آر جی منّ اِیت ءُ اے وڑیں کاروائی بلوچستان ءِ وتواجھی ءَ تاں برجاہ بنت-
بلوچستان ءِ دمگ نوشکی ءُ مستونگ ءَ پاکستانی پوج ءِ آپریشن برجاہ انت- لوگانی سر ءَ بیڑ ءِ وھد ءَ بازیں مردمانی دزگیر کنگ ءِ ھال انت-
مروچی سھب ءَ پاکستانی پوج ءَ نوشکی شھر ءَ ھواریں دمگ کلی مینگل ءُ قادر آباد انگیر کتگ ءُ لوگانی سر ءَ بیڑ برتگ – دمگی مردمانی رد ءَ سدانی کچ ءَ پوجی لشکر بھر زیرگ ءَ انت ءُ ھمے وھد ءَ بازیں مردن دزگیر کنگ ءَ پد ناشناسیں جاھاں برگ بیتگ انت-
ھمے وڑ مستونگ ءِ دمگ پنگو، دشت ءَ ھم پاکستانی لشکر لشکر کشی ءَ دزبند انت- اود ءَ بکتر بندیں گاڑیانی ھمراھی ءَ پورسز دمگ ءَ پیشگامی کنگ ءَ انت-
واکداراں داں انگت ءَ دمگانی آپریشنانی درگت ءَ سرجمیں اھوال نہ داتگ انت-
منی میتگ، تو منی ارواہ ءِ ھنکین
نبشتہ کار : زدگ بلوچ
دی بلوچستان پوسٹ
ھردیں کہ یاتانی کاروان تئی نیمگ ءَ سپر کنت، منی بھشتی میتگ، گُڑا منی دل ءِ آزمان ءَ ترانگانی استار چمک اَنت۔ پرچا کہ منی کسانی ءِ نازاکیں بھار ھمے تئی کاھگلی دیوالانی ساھگ ءَ گوستگ۔ من ءَ یات اِنت آ روچ کہ وھدے سپر چونیں نہ گْوَستیں دریائے ءَ مانند ات، ءُ ما تئی دمکانی تہ ءَ لیب ءُ گوازی ءَ سرگرم اِت ئِے۔ آ یاتانی کاروان انگت ھمود ءَ پہ منزل ءَ سرجم اِنت، بلے چے بہ بیت کہ اے یاتانی ھمراھی ءَ یک ارمان ءُ زھیرے ھم پشت کپتگ۔ من وتی کسانی ءِ موسم سرجم ءَ نہ دیست، ھچ سما نہ بوت کہ چون پُلّیں روچ زرد بوتاں ءُ زند ءِ کرنچی جلدی ءَ شت۔
مرچی سالانی داز گوستگ کہ من چہ وتی میتگ ءَ درپدر ءُ ڈگار کپتگاں۔ گُش ئے کہ من وتی دل ءِ یک ٹُکرے ءَ چِست کتگ ءُ ھمودا، تئی ھاک ءِ امانت ءَ، کل کتگ۔ من ھچبر اے گمان نہ کتگ کہ وتی میتگ ءِ مھر ءَ چہ انچو دور کپاں۔ مرچی منی دل ءِ آئینگ ءَ بس تئی اکس نکش اِنت ءُ تئی یات منی ھمراہ ءُ ھمسپر اَنت۔
ھردیں کہ تھنایاں کپاں، گُڑا تئی ھمک ساہ دار، ھمک دمک ءُ در، ھمک پرشتگیں لوگ ءُ ابیتکیں دیوال من آں توار کن اَنت۔ گُش ئے کہ آ منی کسّہ ءَ کن اَنت، آ منی یاتانی گواچن اَنت۔ گوات کہ اے ویرانیاں لئیٹ اِیت، گُش ئے گوستگیں زمانگ ءِ ھالاں کاریت ءُ منی گوشانی تہ ءَ سرگوشیاں کنت۔ من ءَ سما اِنت کہ من وتی وشیاں گوں آھانی دامُن ءَ کل کتگ اَنت۔
اگاں زند ءِ روچ پہ منی بامرادیاں روگ اِتک، ءُ اجل ءِ دستاں مُھلتے دات، گُڑا من الم پہ تو واتر کناں، منی بھشتیں میتگ۔ پہ توار کناں کہ بیا من آتکگاں، وتی یاتانی ھمراہ ءَ پہ ھمگرنچ بوھگ ءَ، دانکہ من واتر بہ باں ءُ وتی ارواہ ءَ گوں تئی ھاک ءَ ھوار بہ کناں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچستان ءَ واپاری راہ ءِ سر ءَ گاڑیانی سر ءَ اُرشانی درچ یکشل ءَ برجاہ انت – شال تپان شھدگ ءِ سر ءَ مزنیں گاڑیانی کاروان ءِ سر ءَ یک دگہ اُرشے کنگ بیتگ-
چاگی ءِ دمگ چھتر ءَ گیس پلانٹ ءِ ھند ءَ سلاہ بندیں مردماں گوستگیں روچ ءَ واپری گاڑیانی یک کاروانے ءِ سر بستگ ءُ اود ءَ چار گاڑی گپتگ ءُ آ تیرگواری کنگ ءُ ناکارہ کنگ بیتگ انت-
اے گاڑی ھما وھد ءَ نشانگ کنگ بیتگ انت کہ آ پورسز ءِ ھمراھی ءَ کاروان ءِ سیکورٹی ءَ مُچی ءَ گوازینگ ءَ بیتگ ئے بلے آ پھازداری ءَ بے سوب بیتگ-
زانگ بہ بیت یکشمبے ءِ روچ ءَ چاگی ءِ دمگ چارسر ءَ تجارتی گاڑی ءُ آیانی سیکورٹی ءِ واستا فورسز ءِ سر ءَ سلاہ بنداں اُرش کتگ ات کہ چریشی ءَ پورسز ءِ سَے کارندھانی مرگ ءِ ھال راست بیتگ ات-
چارسر ءَ بیتگیں اُرش ءِ زمہ واری بلوچ لبریشن آرمی ءَ من اتگ ات-
بلوچستان ءَ زورانسری بیگواہ کنگ ءِ درچ برجاہ اِنت کہ اود ءَ چہ شال ءُ آواران ءَ سئے مردمانی زورانسری بیگواہ کنگ ءِ ھال دیم ءَ اتکگ انت ءُ چہ آواران ءَ آوار جنگ بوتگیں شاکر بلوچ ءُ آئی ءِ جن گل بانک یل کنگ بیتگ انت اَنت۔
ھالانی رد ءَ شال ءَ 16 سالی ئیں نودربر آغا گل ء سعید احمد کیازئی 21 اگست 2026 ءِ شپ ءِ چار بج ءَ چہ وتی لوگ ءَ آوار جنگ بوتگ۔ کھول ءِ رد ءَ آغا گل ءِ زورانسری بیگواہ کنگ ءَ ایف سی ءُ سی ٹی ڈی ءِ کارندہ ھوار اَنت۔
دومی وئیل ءَ شال ءِ کیچی بیگ ءِ نندوکیں 27 سالی ئیں حفیظ اللہ بلوچ خیر الہ 8 جولائی 2026 ءَ شپ ءِ شش ءُ نیم ءَ چہ شال ءِ شاھوانی اسٹیڈیم ءَ آوار جنگ بوتگ۔
دومی نیمگ ءَ 22 اگست 2026 ءِ شپ ءَ 12:30 ءِ نزیک ءَ چہ آواران ءِ دمگ کولواہ ءَ 40 سالی ئیں دھکان رفیق بلوچ ء بھاء الدین ءُ 34 سالی ئیں پوریاگر شاکر بلوچ ء عبداللہ 22 اگست2026 ءَ ایف سی ءُ پوج ءَ آوار جتگ ءُ بیگواہ کتگ انت-
بلے وائس فار بلوچ مسنگ پرسنز ءِ رِد ءَ شاکر بلوچ ءُ آئی ءِ لوگ بانک گل بانک کہ ھم بیگواہ بوتگ اَنت 24اگست ءَ چہ آواران ءَ یل کنگ بیتگ اَنت۔
وائس فار بلوچ مسنگ پرسنز ءَ شاکر بلوچ ءُ آئی ءِ لوگ بانک گل بانک ءِ سلامتی ءَ یل بیگ وشی لیک اتگ ءُ اے کار ءَ را یک جوانیں گامگیجے گشتگ۔ گل ءَ گشتگ کہ البت رفیق بلوچ کہ گوں آھانی ھمراھی ءَ بیگواہ کنگ بوتگ آ انگت بیگواہ انت ءُ امیت انت کہ آ ھم زوت یل کنگ بیت ءُ آئی ءِ کھول ءِ دست ءَ دیگ بیت انت۔
چہ کراچی ءَ بلوچستان ءَ سیادی داروکیں سئے بلوچ نودربر زورانسری بیگواہ کنگ بیتگ انت ۔
اھوالانی رد ءَ عبدالقدیر ءُ زبیر احمد جھمنند بسیمہ سیاھو زئی ءُ سیف الدین جھمنند سروان ھاران 23 اگست 2026 ءَ پاکستانی رینجرز ءِ نیمگ ءَ چہ کراچی ءَ دزگیر کنگ ءَ پد بیگواہ کنگ بوتگ اَنت۔
انگت ءَ اے سئیں مردمانی کھولاں آھانی بابت ءَ ھچ وڑیں ھال ءُ اھوال دیگ نہ بیتگ انت چریشی ءِ سبب ءَ کھول سکا پریشان اَنت۔ کھولاں لوٹ کتگ کہ بیگواھیں مردمانی بابت ءَ زوت سرپدی دئیگ بہ بیت ءُ اگاں آیانی سر ءَ ھرچ وڑیں بھتامے ھست گڑا آ کانود ءِ رد ءَ آمیدگس ءَ پیش کنگ بہ بنت۔
زانگ بہ بیت کہ اے سال ءَ بلوچستان ءَ ھوار کراچی ءُ پنجاب ءَ چہ بلوچ نودربر ءُ ورنایانی پہ زور بیگواہ کنگ ءِ تہ ءَ گیشی ءِ ھال دیم ءَ آیگ ءَ اِنت۔ زورانسری بیگواھی ءِ وئیلانی سوب ءَ بلوچ نودربر ءُ آھانی کھول سکیں زھنی پریشانی ءِ آماچ اَنت ءُ ھمے وھد ءَ اے وڑیں وئیل نودربرانی وانگ ءُ زانگ ءِ باندات ءَ ھم تاوان دیگ ءَ اَنت۔
بلوچستان ءِ دمگ سرانان سلیمان زئی ءَ ناشناسیں مردمانی تیرگواری ءَ بنداتی ھالانی رد ءَ پنچ مردم بیران ءُ یکے سک زدگ بیتگ-
دمگی مردمانی رد ءَ اے مردم گوستگیں روچ ءَ ھما وھد ءَ آوار جنگ بیتگ انت کہ آ قلعہ عبداللہ ءَ سپر کنگ ءَ بیتگ انت – بیران ءُ زدگ بیتگین مردمانی سیادی اَچ پنجاپ ءَ انت-
وئیل ءِ سبب ءُ آئی ءَ ھواریں مردمانی بارو ءَ سرجمی ءَ دگہ گیشین اھوال دیم ءَ نیتکگ انت-
پنجگور ءِ دمگ گوران ءَ دگ ءِ یک وئیلے ءَ چار زالبولاں ھوار پنچ مردم بیران ءُ دو زھگ ٹپیگ بیتگ انت-
وئیل یک دوھزار ماڈل ءُ ایگزیوی ءِ میان ءَ پیش اتکگ کہ چریشی ءَ چار زالبول ءُ یک ورنایے جمشید ء عبید اللہ بیران بیتگ انت-
دمگی مردمانی رد ءَ بیران بیتگیں مردمانی سیادی پنجگور پروم ءَ کھدہ عبدالحکیم بازار ءَ انت ءُ زدگ بیتگیں زھگ ھسپتال ءَ سر کنگ بیتگ انت-
بلوچستان ءِ جتا جتائیں جاھاں سلاہ بندیں مردمانی کاروائیانی اھوال دیم ءَ اتکگ انت- کہ چریشاں جھاؤ ءَ پولیس ءِ چیک پوسٹ ءِ کنٹرول کنگ ءُ واشک ءَ لیویز کارندہ دزگیر کنگ بیتگ انت-
دمگی مردمانی رد ءَ سلاہ بندیں مردماں چیک پوسٹ ءَ جاڑیگیں کارندہ انگیر کتگ ءُ اود ءَ سلاہ ءُ دگہ سامان دستیگ کتگ انت- چیک پوسٹ ءَ جاڑیگیں یک گاڑی ءُ دگہ بازیں پرپٹے مانداشتگ انت-
وئیل ءَ پد سلاہ بندیں مردماں ناکہ بندی ءِ وھد ءَ دو مردم کہ آیانی پجار ظفر ءُ فیض نامیں مردم تیرگواری کتگ ءُ کشتگ انت-
دمگی مردمانی رد ءَ ھردوکیں مردم گمانی رنگ ءَ “ ڈیتھ اسکواڈ ” ءِ باسک بیتگ انت- اُرشکاراں کشتگیں مردمانی سلاہ گون وت برتگ انت-
دومی نیمگ ءَ واشک ءَ سلاہ بندیں مردماں لیویز پورس ءِ کارندہ دزگیر کتگ انت- اے کارندہ ٹکس گرگ ءَ دزبند بیتگ انت کہ سلاہ بندیں مردماں دزگیر کتگ انت-
دمگی مردمانی رد ءَ سلاہ بنداں لیویز کارندھانی سلاہ ءُ گاڑی گون وت برتگ انت-
وئیلانی بارو ءَ واکداں داں انگت ءَ دگہ گپ دیم ءَ نیاؤرتگ انت ناکہ دگہ کسے ءَ ایشانی زمہ واری من اتگ انت-
بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ یک ھپتگے ءِ تہ ءَ بلوچستان ءِ جتا جتائیں دمگاں 36 جتا جتائیں کاروائی کتگ انت کہ ایشانی تہ ءَ 33 زورگیریں لشکر ءِ کارندہ مرتگ ءُ بازینے ٹپیگ بوتگ اَنت۔ بی ایل اے ءَ پشین ءِ سرانان شھر سرجمی ءَ کنٹرول کتگ ءُ سرکاری ماڑی تباہ کتگ انت ءُ مزنیں کساسے ءَ سلاہ ءُ گولہ بارود دستیگ کتگ انت۔ زورگیر ءِ زرکاری ناکہ بندی ءِ بھر ءِ رد ءَ مزنیں شاھدگانی سر ءَ ناکہ بندی ءِ یک سلسلگے برجاہ انت کہ اود ءَ 11 جتا جتائیں جاجاں ناکہ بندی ءِ وھد ءَ 16 تجارتی گاڑی نشانگ جوڑ کتگ اَنت۔ اے بیڑاں دیم پہ دیمی جنگ ءِ وھد ءَ بی ایل اے ءِ پنچ سرمچار ڈیھ ءِ پھازگ ءَ کربان بیتگ انت-
جارکش ءَ گوشتگ 16اگست ءَ سرمچاراں بسیمہ ءَ پتک ءُ زیک ءِ ھند ءُ سوراب ءُ گدر ءِ ھند ءَ بنجاھی شھدگ ءِ سر ءَ سَے جتا جتائیں جاھاں ناکہ بندی کتگ ءُ بازیں اداراں چیکینگ کتگ ءُ زیک ءَ زورگریں لشکر ءَ پیشگامی کنگ ءِ جھد کتگ سرمچاراں جوانیں پسو داتگ ءُ اے اُرش ءَ زورگرین پوج ءِ شش کارندہ مرتگ ءُ چار ٹپی بیتگ انت- ءُ یک گاڑی ءَ سکا تاوان رس اتگ – اے جنگ ءُ چوپ ءَ بی ایل اے ءِ یک سرمچار مشتاق پنام ءِ کوہ یار شھید بیتگ-
جارکش ءَ گوشتگ 17 اگست ءَ ھوشاپ ءِ نزیک تل ءِ ھند ءَ سرمچاراں زورگریں پوج ءِ گاڑی آئی ای ڈی ءِ نشانگ کتگ – چریشی ءِ آسر ءَ زورگریں پوج ءِ دو کارندہ مرتگ ءُ چار ٹپی بیتگ انت-
جارکش ءَ گوشتگ ھاران ءِ دمگ زاروزی ءَ سرمچاراں یک کاروائی ءِ وھد ءَ ’’ڈیتھ اسکواڈ‘‘ ءِ سروک صوفی ممتاز ءِ گچینی کارندہ علی حیدر ء جان شال ساسولی جھمنند برشونکی دزگیر کتگ۔ جست ءُ پرس ءِ وھد ءَ اے کارندہ ءَ من اتگ کہ آ ڈیتھ اسکواڈ ءَ ہوار بوھگ ءَ زورگیریں فوج ءِ آسراتی ءُ سرپدی دیگ ءَ ھوار بوتگ۔ آئی ءَ بی ایل اے سرمچار سنگت علی جان پنام سدیس ءِ کوش ءَ وتی براہ راست دست مان بوھگ ءِ ھم من اتگ ۔ علی حیدر ءَ گیشتر پدر کتگ کہ اے ٹولی زالبولانی اکسانی ایڈیٹنگ ءُ بلیک میل کنگ ءُ خاران شھر ءُ آئی ءِ کش ءُ گوراں دُزی ءُ لٹ ءُ کُٹ ءِ بازیں سنگینیں وئیلاں ھوار بوتگ۔ جست ءُ پرس ءِ وھد ءَ آئی ءَ وتی دگہ مجرمانی ھمراھانی نام پدر کتگ ءُ دگہ بازیں ھاسیں راز ھم پدر کتگ اَنت۔ اے نیٹ ورک ءَ گوں ھمگرنچیں سمیر ء رفیق جھمنند برشونکی، پیسر ءَ کُشگ بوتگ ءُ دگہ کارندہ ھم زوت وتی گڈی آسر ءَ سر کنگ بنت۔ بلوچ راجی آمید گس ءَ راجی گداری ءِ جرم ءِ سر ءَ علی حیدر موت ءِ سزا داتگ کہ سرمچاراں کشتگ۔
ھمے روچ ءَ چاگی ءَ تجارتی راہ ءَ چاہ سر ءَ سرمچاراں یک تجارتی گاڑی یے نشانگ جوڑ کنگ ءِ وھد ءَ چگائی تجارتی راہ چارسر ءَ 2 تجارتی گاڑی دستیگ کتگ انت۔ دیمترا نوشکی خاران روٹ ءِ سر ءَ زرین جنگل ءَ 2 تجارتی گاڑی ءِ ٹائر تراکینتگ انت۔ ھمے روچ ءَ سرمچاراں خاران شال ءِ راہ ءَ پتکن ءَ شاھدگ بند کتگ ءُ ساھتانی ساھت راہ وتی کنٹرول ءَ کتگ۔
جارکش ءَ گوشتگ 18اگست ءَ چاگی ءِ دلبندین ءُ یکمچ ءِ نیام ءَ سرمچاراں زورگیریں لشکر ءُ تجارتی گاڑیانی کاروان ءِ سربستگ ءُ نشانگ جوڑ کتگ انت۔ 30 منٹ ءَ گیش ءِ برجاہ بیتگیں اُرش ءَ زورگیریں لشکر ءِ 3 کارندہ مرتگ ءُ بازینے ٹپیگ بوتگ اَنت ءُ تجارتی گاڑی ھم تاوان بوتگ اَنت۔ سرمچاراں چارسر ءِ دمگ ءَ دگہ 3 جاگہ ءَ لشکر ءِ کاروان نشانگ جوڑ کتگ ءُ مزنیں تاوانے داتگ انت۔
کلات ءِ دمگ مکئی ءِ نزیک ءَ سرمچاراں زورگیریں لشکر ءِ کارندہ ھما وھد ءَ ریموٹ کنٹرول ءِ آئی ای ڈی ءِ تراک ءَ گوں نشانگ جوڑ کتگ انت وھدے کہ آ فوجی گاڑیانی سیکورٹی ءِ ھاترا یک ھالیگیں سنگر ءِ تہ ءَ سر بوھگ ءَ بیتگ انت۔ تراک ءِ آسر ءَ فورسز ءِ 6 کارندہ جاہ پہ جاہ ءَ مرتگ انت۔
ھمے روچ ءَ سرمچاراں چاگی ءِ دمگ کرودک ءَ اُرش ءَ زورگیریں لشکر نشانگ جوڑ کتگ ءُ نوکچاہ ءِ جاہ ءَ ‘ڈیتھ اسکواڈ’ ءِ گاڑی تباہ کنگ بوتگ۔ گیشتر زورگیریں لشکر ءِ دیم ءَ آیگ ءِ کوشست کتگ اُرش ءَ بے سوب بیتگ- اے اُرشانی تہ ءَ زورگیریں لشکر ءُ ڈیتھ اسکواڈ ءِ سرجم ءَ 8 کارندہ مرتگ ءُ بازینے ٹپیگ بوتگ اَنت۔
ایشی ءَ ابید چاگی ءِ تجارتی راہ ءِ سر ءَ بارتاگزی پوائنٹ ءَ ناکہ بندی ءِ وھد ءَ سرمچاراں یک بسے ءَ 2 شکی ئیں مردم دزگیر کتگ انت۔ پٹ ءُ پول ءَ پدر بوتگ اے ملٹری انٹیلی جنس ءِ کارندہ بوتگ انت کہ آ چہ شال ءَ تپتان ءَ روگ ءَ بیتگ انت ءُ ابید پجار ءَ سپر کنگ بیتگ انت ملٹری انٹیلی جنس ءِ کارندہ انت۔ دوئیں بلوچ راجی آمید گس ءِ پیسلہ ءِ رد ءَ کشتگ انت۔ سرمچاراں ھمے جاہ ءَ یک تجارتی گاڑی یے ھم دستیگ کتگ-
سوراب ءِ دمگ ھاجیکہ ءَ زورگیریں لشکر ءُ سرمچارانی نیام ءَ ترندیں جنگے بندات بوتگ کہ ایشی ءِ تہ ءَ زورگیریں لشکر ءِ بازیں کارندہ مرتگ ءُ ٹپیگ بوتگ اَنت۔ اے جنگ ءُ چوپ ءَ بی ایل اے ءِ دو سرمچار سنگت مرید ءُ سنگت بھاول شھید بوتگ انت-
جارکش ءَ گوشتگ تربت ءِ دمگ زوربازار ءَ سرمچاراں یک کاروائی ءِ وھد ءَ فوجی انٹیلی جنس ءِ کارندہ انیس فقیر کُشتگ۔ اے مرد ءِ سر ءَ زوراکیاں زورگیریں فورسز ءِ آسراتی ءُ سرپدی دیگ ءُ چاریگری ءَ ھوار بوتگ۔
جارکش ءَ گوشتگ 19 اگست ءَ ھاران ءِ دمگ سوتکگان ءَ سرمچاراں گوں مزنیں مشینری ءِ کمک ءَ یک بنجاھی پُھلے تباہ کتگ ءُ ھمے شپ ءَ چاگی (چارسر) ءَ زورگیریں لشکر ءِ کارمرز کتگیں اسپورٹس اسٹیڈیم ءَ گوں تراک کنوکیں شورواں تباہ کتگ۔ ھمے روچ ءَ کلات ءِ دمگ دشت بابا ءَ سرمچاراں بنجاھی شھدگ ءِ سر ءَ یک تجارتی کنٹینرے دستیگ کتگ ءُ دمگ ءَ دیم ءَ آیوکیں بکتربندیں گاڑی ءُ دگہ فوجی گاڑی نشانگ جوڑ کتگ اَنت۔
جارکش ءَ گوشتگ 20 اگست ءَ پشین ءِ شھر سرانان سرمچاراں سرجم ءَ کنٹرول کتگ۔ سرمچارانی جتا جتائیں ٹولیاں شھر ءِ ھاسیں جاھاں سنگر گپتگ ءُ پولیس اسٹیشن، نادر ءِ کارگس ءُ دگہ سرکاری ماڑیانی کنٹرول کتگ۔ ھم وھد ءَ پولیس ءِ 10 کارندہ دزگیر کنگ بوتگ اَنت بلے پد ءَ آ گل ءِ پالیسی ءِ رد ءَ یلہ کنگ بوتگ اَنت۔ سرمچاراں چہ پولیس اسٹیشن ءَ مزنیں کساسے ءَ سلاہ، گولہ بارود، دگہ جنگی سامان ءُ گاڑی برتگ انت ءُ پد ءَ پولیس اسٹیشن گوں تراکناکیں شورواں سرجم ءَ تباہ کتگ۔ اے درگت ءَ دگہ سرمچاراں شھدگانی سر ءَ کنٹرول کتگ ءُ اسنیپ چیکنگ ءِ امل برجاہ داشتگ۔
جارکش ءَ گوشتگ بیگاہ ءَ سرمچاراں قلعہ عبداللہ ءِ سلطان ءِ دمگ ءَ زورگیریں لشکر ءِ 15 گاڑیانی کاروان ءِ سربستگ ءُ اُرش کتگ۔ زورگیر فوج ءِ 3 گاڑی تچک ءَ اُرش ءِ زد ءَ اتکگ تباہ بوتگ انت وھدیکہ 2 دگہ گاڑیاں باز تاوان رس اتگ۔ اے اُرش ءَ زورگریں لشکر ءِ 4 کارندہ مرتگ ءُ بازینے ٹپیگ بوتگ اَنت۔
جارکش ءَ گوشتگ ھمے روچ ءَ چاگی ءِ دمگ جوجکی ءَ 2 تجارتی گاڑی دستیگ کتگ انت ءُ سوتکگ امت ءُ واشک (آرماگئے) ءَ 2 گاڑیانی ٹائر تراکینتگ اَنت۔
جارکش ءَ گوشتگ بلیدہ ءِ دمگ میناز ءَ سرمچاراں زورگیریں لشکر ءِ راشن ءِ برگ ءِ 2 مال برداریں گاڑی ءُ یک پک اپ گاڑی یے نشانگ جوڑ کتگ ءُ کوچگ ءِ ھند ءَ لشکر ءِ دو ٹریکٹر سوتکگ انت۔ دومی نیمگ ءَ زامران (دشتوک) ءَ تراک ءِ آسر ءَ زورگیریں لشکر ءِ راشن بروکیں دو گاڑی نشانگ جوڑ کتگ اَنت۔
جارکش ءَ گوشتگ 21 اگست ءَ خاران ءِ دمگ البت ءَ بند ءُ ساچی کمپنی ءِ دو کارندہ دزگیر کتگ انت کہ آ زورگیریں لشکر ءِ واستا پوسٹ جوڑ کنگ ءَ بیتگ انت۔ ات مردمانی جست ءُ پرس کنگ بوھگ ءَ انت۔ ھمے روچ ءَ چاگی (چارسر) ءَ سرمچاراں تجارتی راہ ءِ سر ءَ دگہ 5 گاڑی دستیگ کتگ اَنت۔
ایشی ءَ چہ پیسر سرمچاراں 8اگست ءَ بُلیدہ زومدان ءَ زورگیریں لشکر ءِ پوسٹ ءُ 12اگست ءَ تربت ءِ کوچگی دمگاں زوورگءں لشکر ءِ پوسٹاں گرنیڈ لانچر آس داتگ ءُ دشمن جانی ءُ مالی تاوانانی دیمپان کتگ-
جارکش ءَ گوشتگ 29 جولائی ءَ شال ءِ دمگ کلی سردہ ءَ گوں زورگیریں لشکر ءَ جنگ ءِ وھد ءَ بلوچ لبریشن آرمی ءِ سرمچار حاجی ھاپز محمد اقبال شاہوانی پنام ءِ ماسٹر جھمنند کلی سردہ شال شھید بوتگ۔
جارکش ءَ گوشتگ 10 ءُ 11 اگست ءِ میانی شپ ءَ زھری ءِ دمگ سوہندہ ءَ زورگیریں لشکر ءُ سرمچارانی نیام ءَ بوتگی ترندیں جنگ ءَ زورگیریں لشکر ءِ بازیں کارندہ مرتگ ءُ ٹپیگ بوتگ اَنت۔ اے جنگ ءُ چوپانی وھد ءَ سرمچار سنگت ابوبکر نیچاری پنام ءِ لالی شھید بوتگ۔
جارکش ءَ گوشتگ بلوچ لبریشن آرمی اے گپ ءَ پدر کنت کہ بلوچستان ءِ ابرمی مڈیانی لٹ ءُ پُل، نوآبادیاتی استھسالی ءِ منصوبگ ءُ زسرگیریں لشکر ءِ فوجی سر ءُ پرانی ھلاپ ءَ ’زرکاری بندش‘ ءِ پالیسی ءِ سر ءَ سک باز امل کنگ بیت۔ بلوچستان ءِ درستیں ھاسیں تجارتی ءُ زرکاری شھدگانی سر یَ ناکہ بندی ءِ پتر کار گیش ءُ گیوار کنگ بیت ءُ زورگیریں فوج ءِ زرکاری لوٹانی رکھینگ ءِ ھاترا درستیں گاڑی ءُ منسوبگ دیم ءَ نشانگ جوڑ کنگ بنت۔
ھمے پیم زامران ءُ آئی ءِ کش ءُ گور ءِ دمگاں پہ زورگیریں لشکر ءِ راشن ءُ رسد ءِ سامانانی روگ ءُ آیگ ءِ سر ءَ بندش انگت ءَ برجاہ اِنت۔ دراھیں دمگی ڈرائیور، ٹھیکیدار ءُ تاجراں ھال دیگ بیت کہ آ زورگیریں لشکر ءِ راشن یا ھرچ وڑیں کمک ءِ دیگ ءَ سرجم ءَ دست کش بہ بہ اَنت۔ ھلاپ ورزی ءِ وھد ءَ درستیں انسانی ءُ مالی تاوان ءِ زمہ واری ھما مردم وت بہ اَنت۔ سرمچار راجی آجوئی ءِ مول ءُ مراد ءَ تاں وتی کاروائیاں نہ اوشتوکیں رنگے ءَ برجاہ دار ایت۔
جارکش جیئند بلوچ ءَ گوشتگ پہ ڈیھ ءِ آجوئی ءَ ندر بوکیں شھیداں بلوچ لبریشن آرمی سکیں مزنیں شانے ءَ سھرین ندر کنت – شھید مشتاق پنام ءِ کوہ یار، شھید سنگت علی جان، شھید انگت مرید، شھید سنگت بھاول، شھید سنگت ھاجی ھاپز محمد اقبال ءُ شھید سنگت ابوبکر نیچاری ءِ بے دروریں کربانیان راجی جد ءُ جھد ءِ نوکتریں تاک لیٹ اتگ – شھیدانی رتکگیں ھون ءِ ترمپ ترمپ آجوئی ءِ کاروان ءَ جنزین انت – سرمچارانی توکل ءَ ساہ دے انت – بی ایل اے اے شھیدانی رھبند ءِ پاسداری ءَ کنان ءَ یک رندے پد ءَ اھد کنت آیانی پشکپتگیں کار گڈی آسر چوشکہ آجو بلوچستان ءِ سرجمی ءَ ھر نھاد ءَ برجاہ بیت انت-
