TBP Balochi

بلوچ یکجھتی کمیٹی بلوچستان ءَ برجاہ درکانودی کوش، زورانسری زورانسری آوار جنی ءُ ریاستی زوراکی گوں تُرندیں لبزاں ایر جتگ- عیدالفطر وڑیں یک وشیں روچے ءِ وھدے ءَ ھم بلوچ راج ءَ نشانگ کنگ ءَ اِنت، کہ سک دردناک ءُ کابل ایرجنی اِنت-

گل ءَ گوشتگ کہ مستونگ ءِ جھمنند دلمراد ءِ چُک، ورنا محمد عامر عیدالفطر ءِ روچ ءِ آیگ ءَ ساری پوج ءَ آئی ءِ لوگ ءَ چہ زورانسری آوار جتگ ءُ پنچ دمان ءَ رند تیر جتگ ءُ کُشتگ- اے کاروائی ءِ میان ءَ ھچ وڑیں وارنٹ پیش نہ کتگ ءُ نانکہ دگہ سرپدی داتگ-

کوش ءَ پد پوج ء کساس دوازدہ کلاکاں تاں لاش وتی دستیگ کتگ ءُ پد ءَ کھول ءِ دست ءَ داتگ- لاش ءِ دیگ ءِ وھد ءَ کھول زورانسری یک اسٹامپ کاگدے سر ءَ دستھت کنائینتگ ءُ آ وانگ ءِ موکل ھم نداتگ-

کھول ءَ تچک کتگ کہ اگاں اے کاگد کجام ھما گپ ءِ آیانی مپاد ءِ ھلاپ ءَ بیت آ آئی ءَ سرجمی ءَ رد کن اَنت-

محمد عامر ءِ مات ءَ ھم ءُ درد ءِ درشان کنان ءَ گوشتگ کہ وتی چُک من پہ بزگی رودینتگ اَنت، بلے یک ساھتے ءَ آئی ءِ چُک چہ آئی ءُ پُلگ بیتگ-

آئی ءِ گوشگ اِنت کہ ما وتی چُکاں ھمے ھاتر ءَ مزن کن ایں کہ ھرکس مئے لوگ ءَ نہ پُتر اِیت آیاں بہ بُکش اِیت؟ ؟ ما انچش بے مُھر جوڑ بیتگیں کہ مئے پھازوک ھچ کس نیست-

بی وائی سی ءَ گوشتگ کہ ھمے وڑ پنجگور ءِ دمگ ءَ 20 مارچ 2026 ءَ عبداللہ ھم کشتگ، کہ بلوچستان ءَ برجاہ ٹارگٹ کلنگ ءِ دْرچ اِنت ءُ دگہ یک کڑی یے-

بلوچ یکجھتی کمیٹی ءَ گوشتگ کہ اے چونیں ریاستی اود ءَ عید وڑیں وشیانی وھد ءَ پُرساں مٹ کتگ، اود ءَ کھول عید کنگ ءِ جاہ ءَ وتی دوستناکانی جنازہ ءَ بھرگ زیرگ ءَ لاچار بیتگ اَنت-

دیمتر ءَ گْوشتگ کہ بلوچستان ءَ وشی جاہ ءَ گم ءَ زرتگ، انسان کشگ بیگ ءَ اَنت ءُ اے درست بے توار اَنت-

بلوچ یکجھتی کمیٹی ءَ میان اُستمانی ھکانی گلاں چہ لوٹ کنت کہ آ سنگین ءِ انسانی ھکانی ھلاپ ورزیاں زوت گامگیج بزور اِیت- بلوچستان ءَ بلوچ راج ءِ کوش درچ ھمکروچی ھساب ءَ جوڑ بیتگ، اود ءَ ناں کسے جست گپت نانکہ پسّہ دنت-

انسانی ھکّانی باسک فتح بلوچ ءَ میان اُستمان ءِ انسانی ھکّانی کونسل ءِ چہ ششت ءُ ھشتمی دیوان ءَ تران کنان ءَ گُشتگ کہ من مرچی بلوچستان ءَ انسانی ھکّانی جاورھال ءِ بابت ءَ گپ جَنَگ ءَ آں، اود ءَ پاکستان ناتپاکیں ھیال ءِ زور دیگ ءِ ھاتر ءَ مُچانکی سزا ءَ را یک سلاھے ءِ داب ءَ کارمرز کنگ ءَ اِنت۔

آئی ءَ گُشتگ کہ انوگیں ماھانی تہ ءَ پاکستانی ھکومت ءَ سر زاھری ءَ انچیں گامگیجے چست کُتگ کہ سیکیورٹی ءِ نام ءِ سر ءَ سرجم ءَ ھلک ءَ سزا دیگ ءِ اِنت۔ وتگڑیں ناشرکاری ءِ نام ءَ ءُ لس مھلوکی کانون ءِ رِد ءَ، دزگیری، نگرانی، ءُ روگ ءُ آیگ ءِ سر ءَ پابندی ءِ وڑیں وتگڑیں زورانسری یکشل ءَ برجم داشتگ۔

آئی ءَ وتی تران ءَ گُشتگ کہ اَملی داب ءَ اے چست ءُ ایر کانون ءِ لاگو کنگ ءِ ھاتر ءَ نہ اِنت بلکیں سیاسی چست ءُ ایر، ءُ توار چست کنوکانی بیھار دیگ ءِ ھاتر ءَ کارمرد بوگ ءَ اِنت۔ انوگ ءَ سیاسی باسکانی لوگ تباہ کُتگ اَنت۔ کھول تُرس ءِ دیمپانی ءَ کنگ ءَ اَنت۔ پورائیں دمگاں چاپہ جَنَگ بوگ ءَ اِنت ءُ دراجیں پوجی آپریشن کنگ بوگ ءَ اِنت کہ وانگ ءُ زانگ، روزگار، ھر روچی زندگی ءِ سر ءَ سان دَور دیگ بوگ ءَ اِنت۔

آئی ءَ گُشتگ کہ زورانسری بیگواھی یک دستاویزی ءُ تا انوگ ءَ جیڑہ ءِ گیشوار نہ بوگ اِنت۔ گار بوھوکیں کھولانی پسو دیگ ءَ اَبید آیانی سر ءَ گیش زورانسری کنگ بوگ ءَ اِنت۔

آئی ءَ گیش تران کنان ءَ گُشتگ ایشی ءِ آسر تُرس ءِ شکل ءَ درکَیت۔ اھوالکار وت سنسرشپ ءِ اِھتیار ءَ مجبور انت۔ نودربر گُشگ ءَ لرز اَنت۔ پُرایمنیں زھرشانی ءِ زھشونی کنوکیں زالبولانی سرجم ءَ نگرانی، زندان، بیھارانی دیمپانی ءَ کنگ ءَ اَنت۔

آئی ءَ گُشتگ کہ سیکیورٹی ھچ چوشیں سورت ءَ سیاسی درنگاز ءِ سر ءَ درائیں کمیونٹی ءَ را سزا دیگ ءِ جواز بوت نہ کنت۔ درملکی کانون گِھر زمہ واری ءُ جائزیں کانونی کارروائی(due process) ءِ لوٹ ءَ کنت۔

گڈسر ءَ گُشتگ ئِے کہ ما اے کونسل ءَ دزبندی کنیں کہ آ پاکستان ءَ را لوٹ بکنت کہ آ مُچانکی سزا ءَ ھلاس بکنت، آزاتیں پٹ ءُ پول ءِ موکل ءَ بدنت، ءُ بلوچستان ءَ بُنکی انسانی ھکّانی بُنپان ءَ جَزم جوڑ بکنت۔

شال ءِ ڈگاری ءِ زڑخو ءِ دمگ ءَ اُرش ءَ پاکستانی لشکر ءَ تاوان رس اتگ۔

ھالانی رد ءَ تراک پاکستانی لشکر ءِ پیادگیں سپاھیگانی سر ءَ ھما وھد ءَ بوتگ کہ آ نوکیں پوسٹ ءِ جوڑیشت ءِ جاہ ءَ روگ ءَ بوتگ اَنت۔ تراک ءَ چہ کارندھاں تاوان رس اتگ۔

اے وئیل ءَ پد مزنیں کساسے ءَ فورسز ءَ دمگ ءِ مردمانی روگ ءُ آیگ ءِ راہ بند کتگ ۔

زانگ بہ بیت کہ گوستگیں روچ ءَ بلوچستان ءِ دمگ منگچر ءَ پاکستانی لشکر ءَ دو جتا جتائیں اُرشانی دیمپانی بوتگ کہ ایشی ءِ آسر ءَ کم چہ کم سئے کارندہ بیران بوتگ اَنت۔

راستی ءَ بندوکیں آزمانکے : من بی ایل ایف ءَ رو آں

نبشتہ کار : زھور پزل

دی بلوچستان پوسٹ

میتگ ءِ تہ ءَ یکیں مِستری اَت کہ آئی ءَ موٹر سائیکل ءُ ٹالوکی سائیکل ءِ دُکانے پچ کرتگ اَت، پنچر ئِے گِپت ءُ انجن ئِے ھم پچ کت ءُ اے دگہ چیزانی شر کنگ ءِ زانت، جْوان شکر ورنا اَت۔ ھمک سُھب آتک دوکان ئِے پچ کُرت ءُ نشت داں مگرب ءَ جُوان دُکان ءَ اَت، جْوان درستیں براتاں چَہ کستر اَت بلے چہ آ براتاں تگڑاتِر ءُ تونگتِر اَت، جْوان ءَ اے دُکان کرایہ گون اَت، چوناھا سَے دُکان تاں آ دوئیں بند اِت اَنت ءُ ھمے یکیں جْوان ءَ پَچ کُرتگ اَت ءُ شوک چلگ ءَ اَت۔ جْوان مدام آپ ءِ رَند ءَ ھمے دکان مالک ءِ لوگ ءَ شت ، مالک ءِ لوگ دکان ءِ پُشت ءَ اَت ،برے برے سُبارگ ھم دکان واجہ ءِ لوگ ءِ مردماں جْوان ءَ دات گوں ، جْوان اے لوگ ءِ تہ ءِ چو چُکے ءِ پیم ءَ اَت کدی کدی کہ کار نہ بوت گڑا شت دُکان مالک ءِ لوگ ءَ ، دُکان مالک ءَ کسان سالیں جنین زھگے ھست اَت کہ آئی ءَ جْوان سک دوست اَت، ھمے کہ سُبارگ بوت آتک ءُ جْوان ءِ سُبارگ ئِے آورت اَنت، سردیں بوتلے آپ ئِے آورت، جْوان ءُ ماھل ءِ مھر روچ پہ روچ مُھکم تِر بوان بوت ءُ وت ماں وت ءَ سوگند ءُ مُسامے ھم کُت کہ ما بھ یک ءُ دومیگ ءَ یلہ نہ کنیں، اگاں ما آروس کنیں گڑا گوں یک ءُ دومیگ ءَ اگاں ناں سرجمیں زند آروس نہ کنیں۔ وھد گْوزان بوت ماھل ءِ مات سھیگ ءُ سرپد بوت، ماھل ءِ مات ءَ جْوان ءَ گُشت ترا کہ ماھل دوست اِنت گڑا وتی سانگ ءَ بیار پہ ماھل ءَ زوت کہ اگاں دگرے ءَ سانگ آورت ماھل ءِ پِت ھمائی ءَ زور اِیت۔ گڑا جْوان اے گپاں گوں سک پریشان بوت، ھمے جیڑ اِیت کہ نوں من ءَ وڑے کنگی اِنت ، یک روچے جْوان نشتگ اَت کہ ماھل آتک دُکان ءِ پُشتہ ءَ جْوان ئِے توار جَت، جْوان ھمے ساھت ءَ موٹر سائیکل ءَ گوں گُلائش اَت، توار اِش کنئگ ءَ گوں جْوان ءَ دست کار یل دات ءُ شُت ماھل ءِ کِرّ ءَ ، داں دیم مرچی ریتکگ ءُ سیاہ تَرّ اِتگ اَت۔ جْوان انچو آتک ماھل ءَ دست گِپت اَنت جْوان ءِ وتی سر ئِے سر ءَ ایر کُت ءُ گُشت ئِے ،، پُل جان! مرچی مھلہ برو گوں وتی مات ءَ مئے بابت ءَ گپ بجن ءُ بگُوش ئِے تئی سانگ ءَ کار اِیت اگاں ناں منی پت ءِ برات زھگ دلمانگ اِنت پہ من، وھدے ما دیر بکنیں پت وتی برات زھگ ءَ پمن ءَ زور اِیت۔ جْوان ءَ اے گپ ءِ اِش کنگ ءَ گش ئے یک بارے آئی ءِ سر ءَ کَپت، ماھل ءِ تسلّہ دات کہ مرچی من الّم ءَ مات ءَ گُشاں، ماھل پہ مُلوری شُت جْوان اوشتاتگ اَت ءُ ماھل ءَ چارگ ءَ اَت ، ماھل کہ اندیم بوت جْوان آتک ءُ زوت زوت ءَ دکان ئِے بند کُرت ءُ وتی سائیکل ءَ جت ءِ کِکّے دراتک دیم پہ لوگ ءَ ، انچوشکہ لوگ ءَ سر بوت مات ءَ را توار ئِے کُت، ماتی کجا ئے! ،او ماتی! داں مات آپ ٹانکی سر ءَ اَت ءُ توارے پد ءَ دات ،جی ابا! من اد ءَ ٹانکی ءِ سر ءَ آں، جْوان پہ اشتاپی شُت مات ءِ کش ءَ نشت ءُ گوں مات ءَ گُشت ئِے ،اما ” من ءَ واجداد ءِ زامات کن ، پت ءَ مرچی گپ بجن گوں لازم ، بگوش ھر ھال ءَ من ءَ واجداد ءِ زامات کن اگاں ناں من دگہ جاگھاں زامات نہ باں او بِھ سور نہ کناں۔

مات ءَ دست رزّانی شودگ یل دات ءُ جْوان ءِ دیم ئِے چار اِت داں جْوان سُھر تَرّاِتگ ، مات ءَ پسّو دات ءُ گُشت ، منی چُک منی دل سرد بیت تو ھر جاگہ ءَ آروس کن ئے بلے تئی پت نہ منّ اِیت کہ تئی پت ءَ ترا وتی گُوھارزتک ءَ پہ نامینتگ۔مات گپ سرجم نہ اَت کہ جْوان ءَ گپ ءِ تہ ءَ دور کُت ،پِت اگاں من ءَ اد ءَ زامات نہ کنت من ءَ کسمیں من بی ایل ایف ءَ رو آں۔یِھ منی چُک تو گنوک ئے کہ چوشیں گپ جن ئے ، مات ءَ گُشت۔جْوان مات ءِ کش ءَ چہ پاد آتک ءُ شت وتی بان ءَ پُترت، مات بزگ پریشان بوت ءُ رزان ءِ ششت اَنت آتک بورچی ءَ ، جوان بان تہ ءَ اَت ءُ مات برانڈہ ءَ تھت ءِ سر ءَ نشتگ اَت کہ جْوان ءِ پِت آتک ، جْوان ءِ پت انچوش کہ نِشت ءُ مات ءَ ورگی آپ ندات ءُ آتک کش ءِ نشت ءُ گُشت ئِے، مرچی تئی چُک ءَ مھلہ دکان بند کتگ ءُ اتکگ زان ئے چیا؟ پت ءَ پسّو دات ،، چیا بزان؟مات ءَ جوان ءِ سرجمیں گپ جت اَت ، پت ءَ گپ اِش کرت اَنت ءُ گشت ,, اے وڈ بھ نبی کہ من وتی گْوھار زبان داتگ، نوں کجام دیم ءَ من آئی ءَ را انا بکناں؟ چُک ءَ بُگوش گنوک مہ بو نند پہ آرام، تئی تروزتکیں ،رنگ دانگ ءَ کس ءَ چہ کمتر نہ اِنت سلامتیں چُکے، تئی سکی ءُ وشّیاں گون اِنت، درآمد بھ سکّی ءَ تئی ھمراہ نہ بنت ، ھرجاگہ ءَ رو ئے برو بلے تئی دشتار منی گوھار ءِ چُک اِنت، جوان درستیں گپ ءَ پت ءِ اِش کنگ ءَ اَت ۔ جوان چہ بان ءَ در اتک ءُ پت ئِے گُشت ، شر گڑا من شتاں منی جُست پد ءَ ھچ جاگہ ءَ مکن اِت ، جوان شت سائیکل ءَ جت ئِے-

کِکّ ءُ اسٹاٹ ئِے کرت ءُ سوار بوت دراتک چہ گیٹ ءَ۔ بزگیں مات ھُشک ھیران اَت ،پت ءَ گُشت :پریشان مبو اے روت پسنی ءَ گوھار ءِ لوگ ءَ دو سَے روچ ءَ نند اِیت زھراں وارت ءُ کیت بلے گپے زان ئے نوں جوان سور تیار کنگی اِنت کہ اے برے جاگھے دپ جنت کہ من ءَ اد ءَ آروس بدے۔ مات پسّو گُشت ھرچی تو گش ئے ! مات بیوس اَت نا وتی لوگواجھے ءِ گپ ئِے پروشت کت ءُ نا چُک ءِ ھمراھی کُرت کُت، چار ماہ گوستگ اَت کہ جوان ئِے ھچ ھال ءُ گواہ نیست اَت، پت ءُ براتاں اد ءَ جُست پُرس اود ءَ جُست پُرس بلے ھچ ھال نیست اَت جوان ءِ میتگ ءَ اے گپ شنگ اَت کہ جْوان تنظیم شُتگ کوہ ءَ اِنت ، میتگ ھمک مردم ءَ جوان ءِ پِت گٹ کرت کہ تئی چُک کوہ ءَ شُتگ تو بزگ بَہ ئے ، ترا سرکار بزگ کنت ،تئی آ دگہ چُکاں چست کنت لٹ دنت کہ برات ءَ بیار ، بلے جوان ءِ پت ءُ برات لاچار اتاں کہ دست ءِ ھچ ءَ نہ رست ، بازیں پیگامے راہ دات کہ جوان ءَ بُگوش بیا ما ترا ھما جاگہ آروس دئیں کہ تو لوٹ ئے، بلے جوان ءِ ھچ ھال نیست اَت، ھمے جاوراں دگہ سَے ماہ گوست کہ اچانگ ءَ یک بیگاھے ءَ جوان میتگ ءِ ھوٹلانی دیم ءَ نشتگ اَت ، میتگ ھر مردمے کہ گوست روک روک ءَ چار اِت ئِے جوان ، جوان نشتگ اَت سگریٹ ءِ دپ ءَ اَت ، یکے ءَ جوان پت ھال دات کہ تئی زھگ اتکگ ھوٹلانی دپ ءَ نشتگ ، جوان پت ءُ یک براتے شتاں داں ھو جوان اِنت نشتگ چاھے دیم ءِ ءُ سگریٹ ءِ دست ءَ ، اے دوئیناں جوان زوت ءُ اتکاں لوگ ءَ ، بزگیں مات ءُ گوھار ، نشار برات درس کیجاہ اتاں جُست ئِے کُت تو کجا بوتگ ئے، مردم وت ءَ چو گار کنت ءُ روت ھانوادہ ، جوان چپت اَت ہچ گپے جندئے نہ جنت ، ھمے ساہت ءَ چاریں نیمگ لوگ گیرہ بوت ،ھمک نیمگ پوج اَت ، جوان ئِے چست کت ءُ گوں وت بُرت اِش ، پت برات ءِ شر جت ءُ دور دات اَنت مات ءُ نشار دُرس یک لوگے ءَ کت اَنت ءُ بان ءِ دپ اِش بند کُت ،جوان ءِ چم اِش پٹی بست ءُ گاڑی ءَ کُت ءُ زرت شُت، جوان شپ ءَ کہ تفتیش اِش کُت ءُ جت کہ کجام تنظیم ءِ باسکے ئے ، کجام کوہ ءَ بوتگ ئے، کجا کاروائی کتگ ، جوان ایشاں سک جت بلے جوان ھچ نہ منّ اِت ، پت بے کساس وزیر ءُ گزیرانی کر ءَ شُت بلے ھچ پہ ھچ، ماھل اود ءَ دلترک اَت ، بزگیں مات ءِ ھالت ھراب اَت ھُشکیں گریوگ ءُ دُوا لوٹگ، ماھے ءَ پد جوان دراتک ، پت ءَ واجدادی زامات کت ، سور تیاری بوت ، جوان ءِ سور روچ ءَ پت ءَ جوان ءَ چہ جُست کُت تو کوہ ءَ ھانوادہ مہ شتیں پہ واجدادی زامات بوگ ھاتر ءَجوان پسّو دات کہ من کوہ ءَ نہ شُتاں من کُنٹانی ءَ کار ءَ بوتگ آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ابوظئبی ءِ واکداراں اے گپ ءِ پدرائی کتگ کہ میزائل ءِ ٹکر ءَ دو مردم بیران ءُ سئے ٹپی بوتگ انت۔ واکدار ءِ رد ءَ بازیں گاڑیاں ھم تاوان رس اتگ ۔

میانجی ءِ تک ءَ برجاھیں جنگ ءِ وھد ءَ ابوظھبی ءَ ھم بازیں اُرش بوتگ ءُ ایران ءَ تاں انوگ ءَ ادا 2100 ءَ چہ گیش میزائل ءُ ڈرون آس داتگ انت۔

اگاں چہ وزارت دفاع ءِ گشگ انت کہ گیشتریں اُرش دارگ بوتگ انت بلے اد ءَ انگت ءَ زانتکاری ءِ رسگ ءَ مشکل ھست انت۔

اُرشانی سبب ءَ بوتگیں تاوان ءِ اکس ءُ ویڈیو ریکارڈ کنگ ءِ سبب ءَ تاں انوگ ءَ چہ 100 ءَ گیش مردم دزگیر کنگ بوتگ اَنت۔

برطانیہ ءِ درئی کارانی کارگس ءَ برطانیہ ءِ شھریاں ھال داتگ کہ اد ءَ سرکار ءِ سرا تنقید کنوکیں مواد ءِ پوسٹ کنگ ھم ناجائز اِنت۔

بلے ابوظھبی ءِ اے اُرش امارات ءِ تہ ءَ رنگ داتگیں ایمنی ءُ استھکام ءِ آدینک ءَ مورینک کنگ ءَ اَنت۔

واکدار ءِ گشگ انت کہ ایران ءِ گوما ہرچ گپ ءُ تران ءِ تہ ءَ آئی ءِ میزائل ءُ ڈرون پروگرامانی سر ءَ دراجیں مدتے ءِ بندش ھوار کنگ بہ بیت۔

واکدار ءَ اے گپ ءَ ھم من اَنت کہ ایران ءِ اُرشاں امارات ءَ را مجبور کتگ کہ آ وتی سیکورٹی سیادی ءَ گوں واشنگٹن ءَ گیش بہ کنت۔

یک ایران ءِ فوجی کارندھے ءَ گْوشتگ کہ اگاں امریکہ ایران ءِ سرزمین یا آئی ءِ جزیرھانی سر ءَ کہ خلیج فارس ءَ اَنت زمینی اُرشے بہ کنت گڑا اے ملک ”آبنائے باب المندب ءَ نوکیں جیڑھے پچ کنت“۔

اے ھال سرکاری ھال رسانکی ادارہ تسنیم ءُ فارس ءَ شنگ کتگ کہ آ گوں گارڈ انقلابی ءَ ھمگرنچ اَنت۔

یمن ءِ حوثی کہ ایران ءِ ھمراھاں پیسر ءَ باب المنداب ءِ دمگ ءَ اُرش کتگ۔

آبنائے باب المندب بحیرہ احمر ءُ بھر ھند ءِ نیام ءَ یک گزرانکی راہ یے ۔

زانگ بہ بیت امریکہ ءُ ایران ءِ نیام ءَ گپ ءُ ترانانی ٹاھاں امریکہ ءِ سروک ڈونلڈ ٹرمپ کنگ ءَ انت بلے دومی نیمگ ءَ ایران گپ ءُ تراناں رد کنگ ءَ انت۔

ایران ءِ پوجی واک ءِ سروک گوشگ انت امریکہ ءَ جنگ ءَ پروش وارتگ ءُ چریشی ءَ آ گپ ءُ تران ءِ ٹاہ ءَ دیم ءَ آرگ ءَ انت۔

دگہ اھوالے ءَ اے گپ ءُ تران ءَ گمانی رنگ ءَ پاکستان ءِ مزن شھر اسلام آباد ءَ بوگ ءِ گمان انت۔ بلے ایران ءِ نیمگ ءَ انگت ءَ چوشیں ھاسیں درشان دیم ءَ نیتکگ انت۔

بلوچستان ءِ دمگ منگچر ءَ پاکستان پوج دو جتاجتائیں اُرشانی دیمپانی کنگ کپتگ-

بنداتی ھالانی رِد ءَ بمب ڈسپوزل اسکواڈ ءِ کارندہ یک تراکناکیں شورو ءِ ناکارہ کنگ ءِ کاروائی ءَ دلگوش بیتگ اَنت کہ اے میان ءَ تُرندیں تراکے بیتگ، چریشی ءِ آسر ءَ کم چہ کم سے کارندہ بیران بیتگ اَنت-

تراک ءَ پد دمگ ءَ پیشگامی کنوکیں پوج نشانگ کنگ بیتگ-

ھالانی رِد ءَ سلاہ بندیں مردماں پوج ءِ بکتربندیں گاڑی ءِ سر ءَ اُرش کتگ، چریشی ءِ آسر ءَ تُرندیں تیرگواری ءِ رِد ءَ برجاہ بیتگ-

تنی وھدے اُرش ءِ آسر بیتگیں تاوانانی سرپدی نیتکگ اَنت نانکہ اُرش ءِ زمہ واری دگہ گلے ءَ منّ اِتگ-

بنگلہ دیش ءِ مزن وزیر طارق رحمان ءَ سوشل میڈیا ءِ پوسٹ یک بنگپے ءِ سرھال جوڑ بوتگ۔

سوشل نیٹ ورک ءِ ویب سائیٹ ایکس ءِ سر ءَ داتگیں پوسٹ ءِ تہ ءَ آئی ءَ 25 مارچ 1971 ءَ بوتگیں وئیل ءِ ھوالہ داتگ ءُ پاکستانی لشکر ءِ واستا ترندیں لبز کارمرز کتگ۔

اے پوسٹ ءِ سر ءَ بازیں گپ دیم ءَ آیگ ءَ انت پرچا کہ طارق رحمان ءِ پارٹی بنگلہ دیش نیشنلسٹ پارٹی ءَ راجدپتری رنگ ءَ پاکستان ءِ ھلاپ ءَ نرمیں لیکہ زرتگ۔

طارق رحمان ءِ مزن وزیر بوھگ ءَ پیسر محمد یونس ءِ نگران حکومت ءِ دور ءَ پاکستان ءُ بنگلہ دیش ءِ نیام ءَ یک ھاسیں نزیکی یے بوتگ۔

میان اُستمان ءَ انسانی ھکانی کونسل ءِ 61می دیوان ءَ جاپانی انسانی ھکانی باسک شُن فوجیکی ءَ وتی گشتانک ءَ بلوچستان ءَ انسانی ھکانی لگتمالی ءِ سر ءَ پاکستان ءِ سر ءَ سک باز ایراد گپتگ۔

فوجیکی ءَ کونسل ءَ گوں تران کنان ءَ نمائندگاں چہ لوٹ کت کہ ”بلوچ ماتانی ھیال ءَ بہ کن اِت کہ آ وتی دوستیں مردمانی شوھازگ ءَ بے وس اَنت“ ءُ یک انچیں جاور ھالے ءِ بابت ءَ گپ جت کہ آ چہ ترس ءُ بیم ءَ پُر اِنت۔ آئی ءِ رد ءَ ایوک ءَ 2025 ءَ بلوچستان ءَ زورانسری ءَ بیگواہ کنگ ءِ 1200 ءَ چہ گیش کیس دیم ءَ اتکگ انت کہ ایشی ءِ تہ ءَ جنین آدم ءُ کم چہ کم 75 نودربر ھوار اَنت۔ بیان ءِ رد ءَ انگت ءَ ھزار ءَ چہ گیش مردم بیگواہ اَنت ءُ ٹارچر، درکانودی کُشگ ءُ ناجائزیں بندیگ کنگ ءِ بھتام برجاہ اَنت۔

آئی ءَ گیش گْوشتگ کہ پاکستانی واکدار بلوچستان ءَ ابرمی مڈیانی لُٹ ءُ پل ءِ بے رھبندیں کارمرد کنگ ءِ اجازت ءَ دیگ ءَ اَنت۔ آئی ءِ گشگ ءِ رد ءَ اے استان ءِ پوپل ءُ سھر ءِ مزنیں بنجل ءَ چہ زرباری بوھگ ءَ ابید ھم دمگی آبادی ءِ گریبی ءِ آماچ انت وھدے کہ درملکی مھلوک گیشتر نپ چست کنگ ءَ انت۔

آئی ءَ دمگی مردمانی رزامندی ءِ ھلاپ ءَ درکنگ ءِ سر ءَ ھم جیڑہ درشان کتگ ءُ اے کار ءَ را میان اُستمانی کانود ءِ ھلاپ ورزی لیک اِتگ چوش کہ اقوام متحدہ ءِ بومی راجانی ھک ءِ جار (UNDRIP) ءُ مدنی ءُ سیاسی ھک ءِ میان استمانی مسام (ICCPR)۔

آئی ءَ انسانی ھکانی جھدکار ڈاکٹر مھرنگ بلوچ ءِ بندیگ کنگ ءِ سر ءَ ھم گپ جتگ کہ آ یک سالے ءَ گیش اِنت کہ آئی ءَ چہ پرامنیں زھرشانی ءِ درشان کنگ ءَ پد زندان ءَ اِنت ءُ اے گپ ءَ را ریاستی زُلمانی درور لیک اِتگ۔

آئی ءَ اے جاور ھال ءَ را ”شرپ ءُ انساپ ءِ نیستی “ گوشتگ ءُ میان اُستمانی برادری ءِ بے تواری ءِ سر ءَ جُست ءُ پُرس کتگ ءُ ھشدار داتگ کہ سرجمیں راجے ءَ بے تواری ءِ تہ ءَ ھلاس کنگ ترس بیت۔

فوجیکی ءَ اقوام متحدہ ءِ انسانی ھکانی کونسل ءَ چہ لوٹ کتگ کہ آ ریکو ڈیک ءِ وڑیں مزنیں دمگاں آزاتیں پٹ ءُ پول ءَ ھوار الکاپیں گامگیج بہ زوریت ءُ پاکستان ءَ را زوراسری ءَ بیگواہ کنگ ءُ دمگی ھکانی بابت ءَ میان استمانی مسام ءِ کنگ ءِ لوٹ ءَ بہ کنت۔

آئی ءَ اے ھم گوشتگ کہ میان اُستمانی فنڈنگ ​​ءَ را دمگی چاگرد ءِ رزامندی، روزگار ءِ ایمنی ءُ گریبی ءِ کمی ءِ وڑیں ھاسیں شرت جوڑ کنگ بہ بیت۔

آئی ءَ وتی گپ ءِ آسر ءَ اے ھبر ءِ سر ءَ ھبر دات کہ ”انساپ ءِ دیر کنگ انساپ ءِ رد کنگ اِنت“ ءُ بلوچستان ءِ ھراب بوھوکیں انسانی جاور ھالانی تہ ءَ میان اُستمانی دزمانجنی ءِ لوٹ گیش بوگ ءَ اَنت۔

قطر ءِ درئی کارانی وزارت ءِ گشگ انت کہ اے امریکہ ءُ ایران ءِ جنگ ءِ ھلاس کنگ ءِ جھد ءِ بھر نہ انت۔

پریس بریفنگ ءِ ساھت ءَ دری کارانی وزارت ءِ جارکش ڈاکٹر ماجد الانساری ءَ گوشتگ کہ مئے دلگوشی وتی ملک ءِ سر ءَ اُرشانی ھلاس کنگ ءُ وتی سرزمین ءِ رکھینگ ءِ سر ءَ اِنت۔

نامداریں تندجاہ بی بی سی ءِ رد ءَ من چہ آئی ءَ جُست کُتگ کہ خلیج ءِ ملکانی سر ءَ اُرشانی پد ءَ گوں ایران ءَ نارملیں سیادی انگت ممکن اِنت ءُ آئی ءَ گْوشتگ کہ ما وتی لیکہ ءَ بدل کُت نہ کن ایں۔

وھدے ایران ءُ امریکا ءِ گپ ءُ تران ءِ بابت ءَ جُست کنگ ءَ آئی ءَ گْوشتگ کہ اے گپ ءُ تران ءِ تہ ءَ ھواریں مردماں جست بکن اِت من پیسر ءَ ھمے گْوشتگ کہ ما اے گپ ءُ ترانانی تہ ءَ گون نہ ایں ۔

ڈاکٹر ماجد الانساری ءَ گیش گوشتگ کہ ایران ءَ پنچ شمبے ءَ چہ قطر ءِ سر ءَ ھچ وڑیں میزائل ءُ ڈرون اُرش نہ کتگ۔

بلے آئی ءَ گْوشتگ کہ ”گُڈّی رند ءَ کہ من اے پوڈیم ءِ سر ءَ اوشتاتگ آں، دو اُرش زوت پد ءَ بوتگ اَنت“ ءُ ایران انگت ”مئے خلیج ءِ ھمساھگاں“ اُرش کنگ ءَ اِنت۔

“ما وت ءَ پھریز اتگ ، مئے سر ءَ تاں انوگ ءَ 200 ءَ چہ گیش ڈرون اُرش بوتگ ءُ پسو دیگ مئے ھَک اِنت، بلے اے درگت ءَ ما انگت ءَ پیسلہ نہ کتگ۔”