TBP Balochi

بلوچستان ءِ جتاجتائیں دمگاں چاریگ کوش، پُھل ءُ ٹرانسمیشن لائن ءِ تراکینگ ءِ زمہ واری یو بی اے ءُ بی آر جی ءَ منّ اِتگ اَنت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراِں نُھ اگست ءِ سُھب 10:00 ءِ نزیک ءَ شال ءِ دمگ ڈغاری کراس ءَ ریاستی چاریف نصراللہ جتوئی ء حکیم تیرگواری ءِ نشانگ کتگ چریشی ءِ آسر ءَ آ جاہ پہ جاھی بیران بیتگ-

گل ءِ رِد ءَ اے مرد گوستگیں بازیں سالاں چہ پاکستانی چیریں ادارھانی واستا کار کنگ ءَ بیتگ ءُ سی ٹی ڈی ءَ چہ ھم ھمگرنچ بیتگ، اے میان ءَ بازیں بلوچ ورنایانی دزگیری ءُ جتاجتائیں وھداں بلوچ آجوئی لوٹوکانی نشان کنگ ءَ کرد پیلو کتگ-

مزار بلوچ ءِ رِد ءَ یازدہ اگست ءَ سبی ءِ دمگ بختیار آباد ڈومکی ءِ نزیک ءَ چہ ڈیرہ مراد جمالی ءَ سبی ءَ رؤکیں مزنیں ٹرانسمیشن لائن ٹاور تراکناکیں شورواں چہ تباہ کتگ اَنت چریشی ءِ آسر ءَ اوچ پاور پلانٹ ڈیرہ مراد جمالی ءَ چہ سبی ءَ گریڈ اسٹیشن ءَ بجلی پُجارینگ مھتل بیتگ-

یو بی اے ءِ جارکش ءِ رِد ءَ سیزدہ اگست ءِ شپ دو ءَ جتاجتائیں کاروائیاں بولان N-65 راجی شھدگ سر ءَ برجاہ کمبڑی پُھل تراکناکیں شورواں چہ تباہ کتگ اَنت چریشی ءِ آسر ءَ پُھل ءَ سک تاوان رس اِتگ ءَ گاڑیانی روگ ءُ آیگ مھتل بیتگ اَنت-

جارکش ءَ دیمتر ءَ گْوشتگ کہ سیزدہ اگست ءِ شپ 9:50 ءِ نزیک ءَ دگہ یک کاروائی ءَ کچھی ءِ بُنجاھی شھر ڈھاڈر سنی دگ سر ءَ برجاہ دوپاسی پُھل تراکناکیں شورواں چہ نشانگ کتگ چریشی ءِ آسر ءَ پُھل ءِ یک مزنیں بھرے سک تاوان رس اِتگ پُھل تباہ بیگ ءَ چہ ڈھاڈر ءُ سنی ءِ میان ءَ روگ ءُ آیگ مھتل بیتگ-

ھمے وڑ بی آر جی ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سیزدہ اگست ءِ شپ ءَ بلوچ ریپبلکن گارڈز ءِ سرمچاراں بلوچستان ءِ دمگ نصیر آباد ءِ ھند ڈیرہ مراد جمالی اوچ پاور پلانٹ ءَ چہ سندھ ءَ رؤکیں بجلی ءِ دو ٹاور تراکناکیں شورو پٹ کتگ ءُ تراکینتگ-

جارکش ءَ گْوشتگ کہ تراک ءَ دوئیں ٹاور تباہ کتگ-

درشانانی گُڈی دوئیں گلاں اُرشانی زمہ واری منّ اِتگ اَنت گوشتگ کہ مئے اے وڑیں کاروائی بلوچستان ءِ وتواجھی ءَ تاں برجاہ بنت-

ھاران ءِ دمگ لجے ءَ بازیں کچے ءَ پوجی آپریشن برجاہ انت-

بلوچستان ءِ دمگ چہ ھاران ءَ سر بیتگیں ھالانی رد ءَ چہ گوستگیں روچ ءَ بندات بیتگیں پوجی آپریشن برجاہ انت کہ اود ءَ پاکستانی پوج ءِ زمینی لشکر ءَ برزی کمک گون انت-

اھوالانی رد ءَ آپریشن ءِ وھد ءَ پاکستانی پوج ءِ ڈرون اُرش ءَ دھکانکار سلطان محمد ء حاجی ملک عثمان ساسولی بیران بیتگ-

دمگ ءَ داں روچ ءَ پوجی ڈرونز ءُ ھیلی کاپٹرانی بال برجاہ انت- چریشی ءَ گیش شھریانی جانی تاوانانی گمان کنگ بوگ ءَ انت-

زانگ بہ بیت بلوچستان ءَ پاکستانی پوج ءِ نیمگ ءَ بازیں شھریانی سر ءَ بمبگواری ءُ ڈرون اُرشانی اھوال دیم ءَ اتکگ انت- گوستگیں روچاں سوراب ءَ پاکستانی جیٹ جھازانی بمباری ءَ بیست ءَ گیش شھری بیران، آیانی توک ءَ زھگ ءُ زالبول ھوار انت-

ھاران ءَ ھوار ھزدار ءِ جتا جتائیں جاہ زھری ءُ مولہ ءَ ھم ڈرون اُرشاں یکیں کھول ءِ بازیں مردم نشانگ بوتگ انت-

پاکستانی پوج ءَ اُرشانی ھال راست کتگ ءُ گوشتگ آیان پوجی نشانگ کتگ ءُ ٹاہ داتگ کہ پورسز ءَ سلاہ بندین مردمانی بنجل نشانگ کتگ انت-

بلوچستان ءِ بنجاھی شھر شال ءَ دو ورنا آوار جنگ ءَ پد بیگواہ کنگ بیتگ انت-

گیشیں ھالانی رد ءَ یازدہ اگست ءِ شپ ءَ شال ءِ دمگ ولی جیٹ ءَ پاکستانی لشکر ءَ دو ورنا دزگیر کنگ ءَ پد بیگواہ کتگ انت-

اھوالانی رد ءَ بیگواہ کنگ بیتگیں ورنایانی پجار ھبدہ سالی ئیں قیصر ء خان محمد ءُ دکاندار سمیر ء محمد خان ھوار انت-

پاکستانی لشکر ءِ دست ءَ آوار جنگ بیتگیں دوئیں ورنا داں انگت ءَ دیم ءَ آرگ نہ بیتگ انت-

شال تپتان شھدگ N40، ءَ تپتان ءُ نوکنڈی ءِ میان ءَ ناشناسیں مردماں تجارتی سَے گاڑی سوتکگ انت-

ٹرانسپورٹ ءُ تاجر برادری ءِ رد ءَ سلاہ بندیں مردماں یک ٹرالر، یک دس ویلر ٹرک ءُ یک آئل ٹینکرے زورانسری داشتگ ءُ پد ءَ ھرسئیں گاڑی سوتکگ انت-

بنداتی ھالانی رد ءَ وئیل ھچ وڑیں جانی تاوان نہ بیتگ بلے سئیں گاڑیانی سر ءَ آس کپگ ءَ بازیں کچے ءَ مالی تاوانانی دیمپانی بیتگ انت-

وئیل ءِ بارو ءَ داں انگت ءَ واکداراں ھچ وڑیں درشان نہ داتگ-

بلوچستان ءِ دمگ نوشکی ءَ لوگے ءَ تیرگواری ءَ مات ءُ جنک کُشگ بیتگ انت-

پولیس بنشون ءِ رد ءَ آدینگ ءُ شمبے ءِ میانی شپ ءَ ناشناسیں مردماں کلی مینگل ءَ یک لوگے ءَ دور کتگ ءُ اود ءَ مات ءُ جنک تیرگواری کتگ ءُ کشتگ انت-

کشگ بیتگیں مات ءُ جنک علی احمد محمد حسنی ءِ لوگ بانک ءُ جنک انت ءُ آ یک چوکیداری ءِ نوکری ءَ انت ءُ اے وھد ءَ آ لوگ ءَ جاڑیگ نہ بیتگ –

اھوالانی رد ءَ علی احمد ءِ لوگ بانک یک پرائیویٹ اسکولے ءَ کار ءَ بیتگ – ھردوکانی لاش میر گل خان نصیر ھسپتال ءَ سر کنگ بیتگ انت ءُ اود ءَ اژدری چار ءُ ٹپاس ءَ پد لاش کھول ءِ دست ءَ دیگ بیتگ انت-

پولیس پٹ ءُ پول کنگ ءَ انت انگت ءَ ایف آئی آر درج کنگ نہ بیتگ-

دومی وئیل قلعہ عبداللہ ءِ دمگ سیگی ءَ پیش اتکگ کہ اود ءَ ناشناسیں مردماں گاڑی ءِ سر ءَ تیرگواری کتگ ءُ دو زالبول بیران ءُ جنک ءُ پت زدگ بیتگ انت-

اھوالانی رد ءَ اے مردم چہ کراچی ءَ واپاری درچ ءَ آیگ ءَ بیتگ انت ءُ ایشانی سیادی گلستان کراچی ءَ انت-

سیمی وئیل نصیر آباد ءَ پیش اتکگ کہ اود ءَ دو زالبول کشگ بیتگ انت-

بلوچستان ءَ پیش اتکگیں بیست ءُ چار ساھتاں شش زالبول کشگ بیتگ انت-

بلوچستان ءِ بنجاھی شھر ءَ 14 اگست ءِ مراگش ءِ سر ءَ راکٹ ءُ گرنیڈ لانچر اُرش ، بولان ءَ مزن شھدگ ءِ سر ءَ تراک ءُ ھرنائی ءَ پولیس پوسٹ ءِ گوں تراکناکیں شورواں تباہ کنگ ءِ وئیل دیم ءَ اتکگ اَنت ۔

دمگی مردمانی رد ءَ شال ءل زیارت کالونی ءَ 14اگست ءَ مراگش ءِ وھد ءَ ناشناسیں مردمانی نیمگ ءَ بازیں راکٹ ءُ گرنیڈ لانچر آس دیگ بیتگ انت۔ بنشون ءِ گشگ انت کہ اُرش ءِ وھد ءَ دمگ ءَ نزیک ءَ 8 تراک ءِ توار بوتگ انت۔

بنشون ءِ رد ءَ اُرش ءِ وھد ءَ مراگش ءَ سی ٹی ڈی ءُ ایف سی مزنیں کساسے ءَ کارندہ جاڑیگ بوتگ اَنت۔ البت ھچ وڑیں ٹپی ءُ بیران بوھگ ءِ سرکاری اھوال دیگ نہ بیتگ انت-

دومی نیمگ ءَ بولان ءِ ہائی وے این 65 ءِ سر ءَ کمبڑی پل ءِ نزیک ءَ تراک ءِ ھال رس اِتگ۔ تراک ءَ چہ پد شاھدگ ءِ سر ءَ روانی مھتل بیتگ۔

انگت ءَ اے وئیلانی زمہ واری کس ءَ نہ زرتگ انت۔

بلوچستان ءِ دمگ پنجگور ءَ اسپتال ءَ آرگ بوتگیں پنچیں لاشاں چہ دگہ دو لاشانی پجار کنگ بوتگ انت۔

لھتے روچ پیسر پاکستانی لشکر ءَ ٹاہ داتگ ات کہ آیاں آپریشن ءِ تہ ءَ پنچ مردم کُشتگ ءُ آہانی لاش ہسپتال ءَ سر کتگ انت کہ چہ آہاں سئے مردمانی پجار پیسرا بوتگ ات ءُ دو لاشانی پجار نوں سرجم بوتگ۔

نوکیں پجار بوتگیں مردمانی تہ ءَ گوارگو ءِ نندوکیں وزیر احمد ء جمال ءُ سبز آپ ءِ نندوکیں جاسم ء عبید اللہ ءِ ناماں زانگ بوتگ اَنت۔

زانگ بہ بیت ھما سئے مردمانی کہ پیسر ءَ پجار کنگ بیتگ اَنت آیانی تہ ءَ زورانسری آوار جنگ بیتگیں پیر جان ء کچکول، شعیب ءُ حافظ مدثر ھوار ات انت-

زانگ بہ بیت کہ شعیب بلوچ 8 فروری 2023 ءَ پاکستانی لشکر ءَ زورانسری بیگواہ کتگ ءُ پیر جان ھمے سال ءَ 10 جون ءَ زورانسری بیگواہ کنگ بوتگ، آیانی بیگواھی ءَ پد آ دیم ءَ زندگی ءَ آرگ نہ بیتگ انت-

بلوچستان ءَ یک شورشے ءِ بے توار کنگ ءَ اود ءَ لس شھری بیگواہ ءُ پد ءَ آیانی لٹ ءُ کٹیں جون ءُ پد ءَ سلاہ بندیں گلاں گوں ھمگرنچ بوگ ءَ انت بلے پاکستانی پوج ءِ اے دابیں ٹاہ ءُ بھتام یکشل ءَ رد بوگ ءَ گندگ آیگ ءَ انت-

پاکستان ءِ آجوئی ءِ روچ ءِ درگت ءَ بلوچستان ءِ گیشتریں دمگانی تہ ءَ بلوچستان ءِ بنجاھی شھر شال ءَ ھوار بے تواری ءُ بے جزبگ ءِ درشانی گندگ ءَ آیگ ءَ انت۔ ھمے درچ ءَ بازیں تجارتی بنجک ءُ بازار بند بوتگ اَنت وھدے کہ سڑکانی سر ءَ ٹریفک ھم لس روچی رنگ ءَ باز کم بوتگ۔ شھری ءِ مزنیں کساسے ءَ وتی لوگاں در نیتکگ انت ءُ جتا جتائیں دمگاں ھمک روچی زندمان سکا سانمند بیتگ۔

شال ءِ ھاسیں تجارتی بنجل، بازار ءُ کاروباری دمگانی گیشتر دکان بند بوتگ انت۔ بنجاھی ءُ شھری دگاں ٹریفک ھم لس روچی رنگ ءَ سک کم بوتگ امت کہ ایشی ءِ سبب ءَ شھر ءِ بازیں دمگ ویران گندگ بوتگ امت۔ لھتیں جاھاں سڑک ءُ بازارانی سر ءَ تھنا لھتیں شھری گندگ بوتگ اَنت ءُ پبلک ٹرانسپورٹ ءِ کار ھم کم بوتگ اَنت۔

بلوچستان ءِ دگہ مزنیں شھر ءُ دمگاں چہ رس اتگیں ھالانی رد ءَ ھمے درچ ءَ کاروباری چست ءُ ایر کم بوتگ انت ءُ لس مھلوک ءِ سُر ءُ پُر کم بوتگ انت۔ بازیں دمگاں بازار بند بوھگ ءِ سبب ءَ تجارتی کار ءُ واپار بند بوتگ انت ءُ شھریاں وتی لوگ ءَ نندگ ءِ پرمان داتگ انت۔

دومی نیمگ ءَ شال ءَ ھوار جتا جتائیں گچینی جاہ، فورس کیمپ، سرکاری کارگس ءُ ھاسیں کارجاہ ءِ کش ءُ گور ءَ سیکورٹی ءِ سکیں بند ءُ بست کنگ بوتگ۔ سیکورٹی ءِ گیشیں کارندہ دارگ ءُ ھاسیں جاھاں سر ءُ پرانی سر ءَ گچی

شال ءَ ھوار جتاجتائیں جاھاں سرکاری ادارگ ءُ پورسز ءِ چیردستی ءَ کمے ءِ کساس ءَ مراگش بیتگ انت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ گوستگیں شپ ءَ سرمچاراں پنجاب ءِ دمگ روجھان ءَ میر ھزار ءِ ھند ءَ چہ سوئی ءَ پنجاب ءَ روکیں 36انچ گیس پائپ لائن تراکناکیں شوروقں گوں تباہ کتگ-

جارکش ءَ گوشتگ اے اُرش ءِ زمہ واری ءَ مئے بی ار جی من ایت ءُ مئے اے وڑیں کاروائی بلوچستان ءِ آجوئی ءَ داں برجاہ بنت-

بلوچستان ءِ جتاجتائیں دمگ تربت، مستونگ، مند ، ھرنائی ءَ روجان ءَ وزیر داخلہ، پاکستانی پوج، گیس پائپ لائن ءُ چوکی تراکینگ بیتگ اَنت وھدے کہ سلاہ بندانی نیمگ ءَ ناکہ بندی-

گیشیں ھالانی رِد ءَ مستونگ ءِ دمگ کنڈ عمرانی ءِ نزیک ءَ بلوچستان ءِ وزیر داخلہ ضیاءاللہ لانگو ءِ کاروان ءِ سر ءَ سلاہ بندیں مردماں اُرش کتگ – بنداتی ھالانی رِد ءَ ضیاءاللہ لانگو اُرش ءَ رکّ اِتگ، وھدے کہ کاروان ءَ ھوار سے کارندہ ٹپی بیتگ اَنت-

ھمے وڑ کیچ ءِ بُنجاھی شھر تربت ءَ شھید فدا چوک ءِ نزیک ءَ پاکستانی پوج ءِ گاڑی آئی ای ڈی ءَ چہ نشانگ کتگ – بنداتی ھالانی رِد ءَ تراک ءَ پد جانی تاوان ءِ گمان کنگ بیگ ءَ اِنت، بلے اے درگت ءَ چہ سرکاری نیمگ ءَ بیرانی ءُ ٹپّیانی کچ پدر کنگ نہ بیتگ اَنت-

تراک ءَ پد پوج ءَ دمگ انگیر ءَ کتگ – واکدار ءِ نیمگ ءَ تنی وھدے اُرش ءِ تُرندی ءُ جانی تاوان ءِ درگت ءَ ھچ وڑیں درشان شنگ نہ کتگ-

ھمے وڑ ھرنائی ءَ گوستگیں شپ ءَ ناشناسیں سلاہ بندیں مردماں پنچ – مائل پولیس چیک پوسٹ تراکناکیں شورواں چہ نشانگ کتگ – بنداتی ھالانی رِد ءَ تراک ءِ آسر ءَ چیک پوسٹ ءِ ماڑی ءَ سک تاوان رس اِتگ ءُ پروشتگ، بلے جانی تاوان ءِ ھال سر نہ بیتگ-

دومی نیمگ ءَ مند ءِ دمگ کوہ ڈغار ءِ ھند سر ءَ زبیدہ جلال دگ سر ءَ سلاہ بندیں مردمانی ناکہ بندی کتگ پٹ ءُ پول کتگ- اے میان ءَ مند گواک ءَ پاکستانی پوج ءِ یک چیک پوسٹ ءِ سر ءَ ھم سلاہ بندیں مردمانی نیمگ ءَ چہ اُرش ءِ ھال اِنت-

ھمے وڑ کیچ ءِ دمگ بلیدہ ءَ پاکستانی پوج ءِ بُنجل ءِ سر ءَ راکٹ اُرش ءِ ھال سر بیتگ- دمگی اِھوالکار ءِ رِد ءَ بُنجل ءِ سر ءَ B-12 راکٹ آس داتگ، کہ بُنجل ءِ تہ ءَ کپگ ءَ پد تراک اِتگ-

ھمے وڑ بلوچستان ءِ دمگ روجان وستی ءَ میر ھزار خان ءِ ھند سر ءَ گیس پائپ لائن تراک ءَ چہ تباہ بیگ ءِ ھال دیم ءَ اتکگ-

تنی وھدے اے وئیلانی زمہ واری ھچ گل ءَ نہ زرتگ اَنت-