TBP Balochi

سندھ ءُ بلوچستان ءَ بیتگیں جتاجتائیں اُرشانی زمہ واری یو بی اے ءُ بی آر جی ءَ منّ اِتگ اَنت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ یو بی اے ءِ سرمچاراں گوستگیں بیگاہ 6:00 ءَ بولان ءَ شال سبی راجی شھدگ (N-65) اپطاری ءِ ھند سر ءَ ناکہ بندی برجاہ داشتگ ءُ کساس یک کلاکے نیم ءَ تاں اسنیپ چیکنگ برجاہ داشتگ اے میان ءَ گوزوکیں گاڑی ءُ مردم پٹ ءُ پول ءِ ھمراھی ءَ دمگ ءَ رؤکیں آؤکانی سر ءَ نگاہ ایر کتگ- اے گامگیج ءِ مول ءُ مراد زورگریں پوج ءُ شکی ئیں مردمانی پُرکاریانی سر ءَ نگاہ ایر کنگ ءُ دُژمن ءِ سُر ءُ پُرانی دارگ بیتگ-

جارکش ءَ گْوشتگ کہ اے میان ءَ بلوچ سرمچارانی دگہ یک ٹولی ءَ گوکرت ءِ ھند سر ءَ KMP-246 والو اسمبلی ھژدہ انچ گیس ءِ بُنجاھی پائپ لائن تراکناکیں شورواں چہ تباہ کتگ چریشی ءِ آسر ءَ شال ءَ ھوار کولپور، مچھ، مستونگ، کلات، پشین، زیارت ءَ گیس روگ سرجمی ءَ مھتل بیتگ، چریشی ءَ چہ سانمندیں دمگاں گیس پُجّارینگ سرجمی ءَ بند بیتگ-

جارکش ءَ گْوشتگ کہ اپطاری ءِ ھند سر ءَ دو جتاجتائیں کاروائیاں(N-65) ءَ برجاہ پُھل تراک ءَ چہ تراکینتگ چریشی ءِ آسر ءَ پُھل ءَ تاوان رس اِتگ اے میان ءَ سرمچاراں زورگریں آرمی ءِ کارمرزی سرویلنس کیمرہ ھم نشانگ کتگ ءُ تباہ کتگ اَنت-

جارکش ءَ دیمتر ءَ گْوشتگ اے اُرشاں پد چہ دراژ بیٹ ءَ سرمچارانی نیمگ ءَ پیشگامی کنوکیں بیست گاڑیانی ھمگرنچیں کاروان وتکاریں سلاھاں چہ نشانگ کتگ، چریشی ءِ آسر ءَ یک گاڑی یے تیرگواری ءِ نشانگ ءَ اتکگ دگ چہ جھل چپی بیتگ- چریشی ءِ آسر ءَ یک کارمندے یے مرتگ ءُ بازیں کارمندے یے سک ٹپی بیتگ اَنت- کاروائی ءِ میان ءَ زورگریں پوج ءَ سرمچارانی سنگرانی سر ءَ الٹریز ءُ کواڈ کاپٹر ٍڈرونزاں چہ بازیں ناکامیں اُرش کتگ، کہ آئی ءِ پسّہ ءَ سرمچاراں زوت کواڈ کاپٹر ڈرونانی سر ءَ پسّھی تیرگواری کتگ، چریشی ءِ آسر ءَ کواڈ کاپٹر ڈرون واتر شتگ اَنت- اے مھکمیں کاروائیانی زمہ واری مئے گل یو بی اے ءَ منّ اِتگ اَنت-

جارکش ءَ گوشتگ مئے اے وڑیں اُرش بلوچستان ءِ وتواجھی ءَ تاہ برجاہ بنت-

ھمے وڑ بلوچ ریپبلکن گارڈز ءِ جارکش دوستین بلوچ ءَ گوشتگ کہ بی آر جی ءِ سرمچاراں دوشی سندھ ءِ دنگ بکشیا پور ءِ نزیک ءَ مراد واہ ءَ چہ سوئی ءَ کراچی ءَ روکیں 36 انچ ءِ گیس پائپ لائن گوں تراکناکیں شورھاں تباہ کتگ۔

دوستین بلوچ ءَ اُرش ءِ زمہ واری منّ اتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔

گوادر ءِ ھند پدی زر ءَ شاھی ھوٹل ءَ پنچ اگست دوھزار ءُ بیست ءُ شش ءَ نسیب بلوچ ء عبدالشکور پاکستانی پوج ءِ کارندھاں آوار جنگ ءَ پد بیگواہ کتگ-

دومی نیمگ ءَ چہ کیچ ءِ دمگ شَے کھن ءَ چہ تربت ءَ بیست ءُ سَے اپریل دوھزار ءُ بیست ءُ شش ءَ آوار جنگ بیتگیں کیّا ء مھمد عیسیٰ پنچ اگست ءَ دوھزار ءُ بیست ءُ شش ءَ چہ تمپ بالیچہ ءَ یل کنگ بیتگ ءُ وتی گِس ءَ سر بیتگ-

زانگ بہ بیت کہ بلوچستان ءَ پہ زور بیگواہ کنگ ءِ درچ یکشل ءَ برجاہ انت-

بلوچ لبریشن آرمی ءَ وتی آفیشل چینل “ھکل” ءَ 12 منٹ ءُ55 سیکنڈانی تامر شنگ کتگ-

ھکل ءِ رد ءَ 31 جولائی 2026 ءَ بی ایل اے ءِ جنگولاں یک ھترناک ءُ گچینی کاروائی ءِ وھد ءَ پاکستانی پوج ءِ دو بنجل نشانگ کتگ انت – اے کاروائی شال کینٹونمنٹ ءَ کساس دہ کلو میٹر ءِ دوری ءَ ولی تنگی ءُ اسپین کاریز ءَ کنگ بیتگ-

تامر ءَ گندگ بیت انت کہ بی ایل اے ءِ سرمچار شوربندی ءَ ھاک ءَ جوڑ کتگیں یک نکشھے ءَ سرپدی دیگ ءَ انت-

نوکتریں سلاھاں گوں بندوکیں سرمچار نشانگ ءِ جاہ ءَ روگ ءَ گندگ بنت ءُبنجل ءَ راکٹ لانچراں گوں نشانگ کن انت-

تامر ءَ گندگ بیت انت کہ بلوچ لبریشن آرمی ءِ جنگول جاہ ءَ سر بنت ءُ بنجل ءَ دستیگ کن انت ءُ پوجی کارندھاں نشانگ کن انت ءُ دگہ ساز ءُ ساماناں ماندار انت ءُ دستیگ کن انت-

تامر ءَ پوجی کارندھانی لاش گندگ بنت ءُ سرمچار بازیں کچے ءَ سلاہ ءُ دگہ ساماناں گون وت بر انت-

بلوچستان ءِ دمگ سوراب گدر ءَ پاکستانی پوج ءِ برزی اُرش ءِ آسر ءَ شھریانی کوش ءِ ھلاپ ءَ پشمبے ءِ روچ ءَ بلوچستان ءِ جتا جتائیں دمگاں تھتک بند ءُ دربندیں ھڑتال برجاہ انت ءُ ھمے وڑ ءَ سانمندیں کھولاں لاش ایر کتگ ءِ مزن شھدگ ءِ سر ءَ زھرشانی کتگ-

بلوچ یکجھتی کمیٹی ءِ نیمگ ءَ داتگیں ھڑتال کال ءِ رِد ءَ سوراب، خضدار، کلات، مستونگ، نوشکی ، کلات ءُ دگہ دمگاں بازیں واپاری بنجل ءُ دکان بند اَنت۔ بازیں جاھاں ٹریفک ءِ روانی ھم سانمند بیتگ-

سوراب ءَ زھرشانی ءِ سبب ءَ کوئٹہ کراچی نیشنل ہائی وے ءِ سر ءَ ٹریپک ھاسیں رنگے ءَ سانمند بیتگ کہ اود ءَ زھرشانی کنوکاں اُرش ءَ بیران بوتگیں مردمانی لاش ایر کنگ ءَ زھرشانی کتگ۔ دمگی ھالانی رد ءَ شاہراہ ءِ دوئیں نیمگاں گاڑیانی دراجیں لین لگ اتگ اَنت۔

دمگی مردم ءُ زھرشانی کنوکیں مردمانی رد ءَ 12 اگست ءَ سوراب ءِ گدار گندان ءِ دمگ ءَ برزی اُرش ءَ چہ زالبول ءُ چُکاں ھوار 20 ءَ گیش مردم بیران ءُ 16 ٹپیگ بوتگ اَنت۔

اُرش ءَ پد بیران بوتگیں مردمانی سیاد ءُ دمگی مردماں سوراب ءِ مستریں شھدگ شال کراچی نیشنل ہائی وے ءِ سر ءَ جون ایر کتگ اَنت ۔

زھرشانی کنوکانی گْوشگ اِنت کہ داں ایشانی لوٹ پیلو کنگ مہ بنت اے زھرشانی ءُ دھرنا برجاہ مان اَنت۔ شاہراہ ءِ بند کنگ ءَ چہ بلوچستان ءِ اندری دمگاں گوں کراچی ءُ شال ءَ ہمگرنچیں مستریں زمینی راہ سستگ۔

پاکستانی پوج ءِ ھمگرنچیں ادارہ آئی ایس پی آر ءَ ٹاہ داتگ کہ بلوچستان ءِ دمگ سوراب ءَ ناشرکاری ءِ گاڑی ءَ پٹ کنگ ءِ ھاتر ءَ تراکناکیں شورو جاڑیگ کنگ ءَ بیتگ اَنت کہ آ ھما وھد ءَ ترک اِتگ چریشی ءَ ھشت ناشرکار ءُ بازین ئِے ٹپی بیتگ اَنت-

آئی ایس پی آر ءَ ٹاہ ءِ رِد ءَ اود ءَ ھستیں دگہ تراکناکیں شورو ھم اے تراک ءِ زِد ءَ اتکگ اَنت، چریشی ءِ آسر ءَ دگہ تراک بیتگ اَنت ءُ اے ھند ءِ نزیک ءَ جھمنندیں سئے شھری ھم بیران بیتگ اَنت-

پوج ءِ ھمگرنچیں اداہ ءَ ٹاہ داتگ کہ پوج ءَ زوت کاروائی کنان ءَ سیکورٹی پورسز ءُ بلوچستان پولیس جاہ پہ جاھی سر بیتگ اَنت ءُ زمہ واریں مردم ءُ کمکارانی شوھازگ ءِ ھاتر ءَ یک یکجاھی کلیئرنس آپریشن بندات کتگ – آپریشن ءِ میان ءَ سیکیورٹی پوج ءَ تچوکیں ناشرکارانی سُر ءُ پُر دیستگ اَنت ءُ زوت کاروائی کنان ءَ دگہ دہ کُشتگ-

آئی ایس پی آر ءِ رِد ءَ اے وئیل ءَ تنی وھدے یکجاھی ھساب ءَ ھژدہ ناشرکار جنگ بیتگ اَنت، بلے تیرگواری ءِ بُنیاد ءَ دو پوجی ٹپی ھم بیتگ اَنت-

وھدے کہ آئی ایس پی آر ءَ ٹاہ ءِ ھلاپ ءَ، سانمندیں شھریانی گوشگ اِنت کہ شپ ءَ پاکستانی پوج ءِ ڈرون اُرش ءَ چہ آئی ءِ لوگ تباہ، سیادانی بیران ءُ ٹپی بیتگ اَنت-

پاکستانی اُرش ءَ پد دمگی مردم ءُ کمکاری ٹولیاں سانمندانی کچ یکجاہ کتگ اَنت، بلے مردمانی گوشگ اِنت کہ تنی وھدے بازیں لاشے پوج دستیگ اَنت-

بنداتی ءُ رستگیں کچ بیست ءَ چہ گیش مردم ھوار اَنت، رسول بخش ءِ لوگ بانُک پیرزالیں زالبول مراد بانو بیرانی پدری بیتگ اَنت، وھدے دگہ مردم سک ٹپی بیتگ اَنت-

ٹپی ءُ بیران بیتگیں مردمانی تہ ءَ چُک ھوار اَنت، آیانی تہ ءَ یک سالی ئیں الھیر، دو سالی ئیں فاطمہ ءُ ضیاء الرحمن، چار سالی ئیں سعدیہ ءُ حبیبہ، پنچ سالی ئیں رابعہ ءُ دوازدہ سالی ئیں عاصم ھوار اَنت-

ٹپیانی تہ ءَ زھرہ ء عبدالعزیز، شاہ سارہ، صابیہ ءُ ھاجرہ ءَ ھوار دگہ زالبول ءُ مرد ھوار اَنت-

وئیل ءَ بیران بیتگیں مردمانی کچ بیست ءَ چہ گیش گوشگ بیگ ءَ اَِنت، بلے تنی وھدے بازیں لاشیں پوج دستیگ اَنت-

دومی نیمگ، وئیل ءِ ھلاپ ءَ کراچی، شال شھدگ سر ءَ سوراب ءِ ھند سر ءَ زھرشانی برجاہ ءَ اِنت- زھرشانی کنوکاں ھم آئی ایس پی آر درشان رد کتگ اَنت ءُ اے دروگ لیکہ اَت-

سلاہ بندیں مردماں مائننگ کمپنی ءِ سائٹ نشانگ جوڑ کتگ ءُ کارندہ گوں وت برتگ انت۔

گیشیں ھالانی رد ءَ بلوچستان ءِ دمگ چاگی ءِ ھند ماہیان کور ءَ سلاہ بندیں مردماں مائننگ کمپنی ءِ سائٹ ءِ سر ءَ اُرش کتگ ءُ جاہ ءِ سر ءَ لکاں کلدار ءِ سامان دستیگ کتگ انت ۔

ھالانی رد ءَ ھمے وھد ءَ سلاہ بندیں مردماں ھما جاہ ءَ ھستیں مائننگ کمپنی ءِ ھپت مردم ھم دزگیر کتگ ءُ ناشناسیں جاھے ءَ برتگ اَنت۔

آوار جنگ بوتگیں کارندہانی تہ ءَ گلگت سیادی داروکیں، وجاھت، واجد، شاھد ءُ صابر ءِ چار کارمند ھوار اَنت ءُ سئے دمگی کارندہ ضیاؤالدین جھمنند دالبندین، شاہ سلیم جھمنند ماھیان، ءُ سعید محمد جھمنند ماھیان چاگی ءِ ناماں زانگ بیتگ انت۔

دمگی مردمانی رد ءَ سلاہ بندیں مردم بازیں کلاکاں جاڑیگ بوتگ اَنت بلے سیکورٹی فورسز ءَ کارروائی کنگ ءَ بے سوب بوتگ- سلاہ بنداں مائن ءَ جاڑیگیں یک زمباد گاڑی، چار بائی فور پک اپ، بیست ءَ چہ گیش سولر پلیٹ، موٹر سائیکل ءُ مائنگ ءَ ھستیں دگہ سامان ھم برتگ اَنت۔

چاگی پولیس ءِ رد ءَ اے وئیل ءَ پد سلاہ بندانی شوھاز برجاہ انت ءُ آوار جنگ بیتگیں مردمانی پچگرگ برجاہ انت-

سوراب گدار گوندان ءَ دوازدہ اگست ءَ پاکستانی برزی اُرش ءَ 6 مردم بیران ءُ 16 ٹپیگ بوتگ اَنت۔پولیس ءُ دمگی مردماں ٹپیگ ءُ بیران بوتگیں مردم ڈی ایچ کیو ہسپتال سوراب ءَ سر کتگ اَنت کہ اود ءَ ٹپیانی درمانی بوگ ءَ اِنت۔

دمگی مردمانی رد ءَ بیران بوتگیں مردمانی تہ ءَ سئے جنین ءُ چُک ءُ سئے مردین ھوار اَنت۔ بیران بوتگیں مردمانی پجار راج بابو رسول بخش ءِ جنین، نورجان ءِ جنین صفیہ، نورجان ءِ 2 سالی ئیں زھگ جلال، شبیر احمد ء خداداد، نورجان ی رسول بخش ءُ کریم داد ء رسول بخش ءِ ناماں زانگ بوتگ انت۔

ٹپیگانی تہ ءَ 9 مردین ءُ جنین ھوار اَنت ءُ 7کسان سالیں زھگ ءُ جنک ھم ھوار اَنت ۔ ٹپیانی تہ ءَ یک سالی ئیں عاصم، سئے سالی ئیں راحبیہ، پنچ سالی ئیں سادیہ، ھپت سالی ئیں فاطمہ، دو سالی ئیں ضیاء الرحمان، یک سالی ئیً امیر ءُ چار سالی ئیں حسینہ ھوار انت۔

دمگی مردماں اے ھم گوشتگ کہ بیران بوتگیں مردمانی کچ گیشتر اِنت بلے اے گپ ءِ آزاتیں رنگ ءَ پٹ ءُ پول نہ بوتگ۔ اے وئیل ءِ بابت ءَ سیکورٹی ءِ کارندھانی نیمگ ءَ چہ سرکاری بیان دیم ءَ نہ اتکگ انت۔

وئیل ءَ پد بیران بوتگیں مردمانی سیاد ءُ وارس ءُ دمگی مردماں سوراب مین چوک ءَ شال ءُ کراچی مزنشھدگ این 25 ءَ بیران بوتگیں مردمانی لاش ایر کتگ ءُ زھرشانی بندات کتگ کہ ایشی ءَ چہ شاھدگ ءِ سر ءَ روانی مھتل بیتگ ءُ دوئیں نیمگ ءَ گاڑیانی دراجیں لین جوڑ بوتگ انت۔ زھرشانی کنوکاں دھرنا ءِ برجاہ دارگ ءِ جار جتگ داں آھانی لوٹ منگ نہ بنت ۔

بلوچ یکجھی کمیٹی ءَ اے وئیل ءِ سر ءَ پدردی درشان کتگ ءُ گوشتگ شھری آبادی ھاسیں رنگ ءَ زالبول ءُ زھگانی بیرانی ءِ پژدر ءَ تچک ءَ ھک ءُ ھساب ءِ لوٹ کتگ۔

دومی نیمگ ءَ بلوچستان نیشنل پارٹی ءِ سروک سردار اختر مینگل ءَ اے وئیل ءِ سر ءَ لیکہ دیان ءَ اے جُست چست کتگ کہ اے چُک ناشرکار گندگ بنت؟ آئی ءَ گوشت کہ اے تپلیں چک اَنت آیانی میار چے اِنت؟ آیا کدی زھگانی کُشگ ءَ چہ امن ءُ ایمنی اتک کنت؟

سردار اختر جان مینگل ءَ گیش کرتگ: اے فلسطین اِنت،کشمیر اِنت،ناں اے بلوچستان اِنت۔

سوشل میڈیا پلیٹ فارم ایکس ءِ سر ءَ وتی لیکہ ءِ تہ ءَ ایڈووکیٹ ساجد ترین ءَ ھم آماچیں ھاندان آنی گوما یکجاھی ءِ درشانی کتگ ءُ سوراب ءَ برزی اُرش ءَ زالبول ءُ زھگاں ھوار 27 مردم بیران بوھگ ءِ وئیل پدری لیک اتگ-

بلوچستان ءِ جتاجتائیں دمگاں سلاہ بندانی اُرشاں ءُ تیرگواری ءِ وئیل ءِ ھال اِنت، آئی ءِ تہ ءَ پولیس تھانہ، پاکستانی پوج ءِ چوکیاں ءُ گاڑیانی نشانگ کنگ ھال اِنت-

پولیس ءِ رِد ءَ چاگی ءِ دمگ چھتر ءَ ناشناسیں سلاہ بندیں مردماں تراکناکیں شورواں چہ پولیس تھانہ تباہ کتگ- ھالانی رِد ءَ تراک گوستگیں شپ ءَ کنگ بیتگ، چریشی ءِ آسر ءَ تھانہ ءِ ماڑی سرجمی ءَ لُمبیتگ کپتگ-

دومی نیمگ ءَ چاگی ءِ دمگ یک مچ ءَ سلاہ بندیں مردمانی نیمگ ءَ سے اوپاری گاڑیانی سر ءَ تیرگواری ءِ ھال اِنت-

اِھوالکار ءِ رِد ءَ تیرگواری ءِ آسر ءَ گاڑی ناکارہ بوتگ اَنت، وھدے کہ اُرشکاراں یک مال کشیں گاڑی یے وتی ھمراھی ءَ برتگ-

ھمے وڑ ھُزدار ءِ دمگ واڈھ ءَ آر سی ڈی شھدگ سر ءَ ھم پاکستانی پوج ءِ دو گاڑی سلاہ بندیں مردماں اُرش ءِ نشانگ کتگ- اِھوالکار ءِ رِد ءَ گاڑیانی تہ ءَ یک بکتر بند گاڑی یے ھم ھوار بیتگ اَنت ءُ اُرش ءِ آسر ءَ دو گاڑیاں سک تاوان رس اِتگ- اِھوالکار ءَ پوجی کارندھانی بیرانی ءِ ٹاہ داتگ، بلے اے بیرانیانی پدری سرکاری ھساب ءَ کنگ نہ بیتگ-

ھمے وڑ گوستگیں روچ ءَ منگچر ءَ بُنجاھی بازار ءَ پاکستانی پوج ءِ یک چوکی ءِ سر ءَ سلاہ بندیں مردماں اُرش کتگ- دمگی اِھوالکار ءِ رِد ءَ اُرش داں دیراں برجاہ بیتگ، اے میان ءَ دمگ ءَ تُرندیں تیرگواری ءُ تراکانی توار اش کنگ بیتگ- اُرش ءَ پوج ءَ جانی تاوان ءِ رسگ ءِ ٹاہ داتگ، بلے اے اُرش ءِ درگت ءَ سرکاری نیمگ ءَ ھچ وڑیں درشان دیم ءَ نیتکگ-

دومی نیمگ ءَ گوستگیں شپ ءَ جھاؤ ءِ دمگ ڈولیجی ءَ ھم پاکستانی پوج ءِ یک بُنجلے سلاہ بنداں اُرش ءِ نشانگ کتگ ءُ اُرش ءِ آسر ءَ جانی تاوان ھال اِنت-

تنی وھدے اے وئیلانی زمہ واری ھچ گل ءَ نہ زرتگ اَنت-

بلوچستان ءِ دمگ سوراب ءَ پاکستانی پوج ءِ جیٹ جھازانی بمباری ءَ بیست ءَ گیش مردم بیران ءُ بازیں کچے ءَ ٹپیگ بیتگ انت- برزی بمباری گوستگیں شپ ءَ سوراب ءِ دمگ گدر گوندان ءَ پیش اتکگ-

اکس:

بلوچستان ءِ دمگ کیچ ءِ ھند بلیدہ سوراپ ءَ گوستگیں شپ ءَ ناشناسیں سلاہ بندیں مردمانی اُرش ءَ مسلم جیئند ءَ ھوار کم چہ کم چار مردم ٹپیگ بوتگ اَنت۔ مسلم جیئند ءَ پد ءَ وتی ٹپانی درد نہ سگ اتگ ءُ بیران بیتگ۔

دمگی مردمانی رد ءَ اے اُرش مگرب ءَ پد بوتگ کہ ھمے وھد ءَ دمگ ءَ تراک ءُ مزنیں تیرگواری ءِ توار اِش کنگ بوتگ۔ بنشون ءِ رد ءَ سلاہ بندیں مردماں مسلم جیئند ءِ پناہ گاہ نشانگ جوڑ کتگ کہ آ وھد ءَ دگہ مردم ھم اود ءَ ھوار بوتگ اَنت۔

اے اُرش ءَ مسلم جیئند ءُ کم چہ کم دگہ سَے مردم ٹپیگ بوتگ اَنت۔ بنداتی ھالانی رد ءَ ٹپیانی جاور ھال ءِ بابت ءَ دگہ ھچ وڑیں ھال ءُ اھوال دست نہ کپتگ بلے پد ءَ دمگی مردمانی اے گپ ءِ پدرائی کتگ کہ مسلم جیئند وتی ٹپیانی سبب ءَ بیران بوتگ۔

دمگی مردمانی گْوشگ اِنت کہ مسلم جیئند پیسر ءَ ھم گوں بلوچ سلاھبندیں گلے ءَ ھمگرنچ بیتگ، بلے رند ءَ آ سرینڈر بیتگ۔ دمگی مردماں گیشتر گْوشتگ کہ آ اے وھد ءَ یک سلاہ بندیں گلے ءِ سروکی ءَ کنگ ءَ اَت کہ آ وھد ءَ دمگی ”ڈیتھ اسکواڈ“ ءِ نام ءَ زانگ بیت ءُ پاکستانی لشکر ءِ کمک ءَ پرکار انت۔

بلے اے وئیل ءِ مول ءُ مراد ءُ دگہ ٹپیانی انوگیں جاور ھال ءِ بابت ءَ دگہ ھچ وڑیں ھال ءُ اھوال شنگ نہ بوتگ۔ انگت ءَ کس ءَ اے اُرش ءِ زمہ واری نہ زرتگ۔