TBP Balochi

وائس فار بلوچ مسنگ پرسنز ءِ رِد ءَ زورانسری بیگواہ عنایت اللہ بنگلزئی ءِ برات اسد بنگلزئی ءَ گل ءَ چہ ھال کتگ کہ گوشتگ کہ آئی ءِ برازتک ،13 سالی ئیں امان اللہ ، سی ٹی ڈی ءِ کارندھاں بیست فروری ءِ شپ دو ءَ چہ کلی جیو ، شال ءَ زورانسری بیگواہ کتگ-

زانگ بہ بیت امان اللہ ءِ پت ،عنایت اللہ ،پاکستانی پوج ءِ کارندھاں 23 مئی 2014 ءَ چہ اسلپنجی ءَ زورانسری بیگواہ کتگ- آئی ءِ پروڈکشن آرڈر ھم کمشن ءَ شنگ کتگ، بلے عنایت اللہ انگت یل کنگ نہ بیتگ- نو آئی ءِ کسان سالی ئیں چُک امان اللہ ھم زورانسری بیگواہ کتگ-

وی بی ایم پی ءَ کسان سالی ئیں امان اللہ ءِ زورانسری آوار جنی ءِ دلپدردی درشان کتگ مزنیں واکدار ءَ چہ لوٹ کتگ کہ آ امان اللہ ءُ آئی ءِ پت ءَ زوت یل بکن اِت-

ایران ءَ ٹاہ داتگ کہ جنگ ءِ بندات ءَ چہ ایران ءَ 1300 ءَ گیش مردم بیران بوتگ انت۔

بی بی سی عربی ءِ رد ءَ اقوام متحدہ ءَ ایران ءِ سفیر ءَ گشتگ کہ ایران ءِ سر ءَ امریکہ ءُ اسرائیل ءِ بالی ءُ میزائل اُرشانی آسر ءَ کم چہ کم 1332 ایرانی شھری بیران ءُ ھزاراں مردم ٹپی بوتگ انت۔

ایران ءِ سرکار ءِ جارکش فاطمہ مھاجرانی ءَ گْوشتگ کہ ڈیھ ءَ بیران بوتگیں 1332 مردمانی تہ ءَ 206 جنین ءُ چُک ھم ھوار اَنت۔

جارکش ءِ رد ءَ بیران بوتگیں مردمانی تہ ءَ 193 مردم 18 سال ءَ کم عمر بوتگ اَنت۔

فاطمہ مھاجرانی ءَ گشتگ کہ بیران بوتگیں مردمانی تہ ءَ کسان کسان جشت ماہ ءِ جنک انت، ٹپیگ کستر چار ماہ ءِ جنک انت۔

جارکش ءَ گوشتگ کہ سئے شمبے ءِ بیگاہ ءَ تاں دست کپتگیں کچ ءُ کساساں چہ پدر اِنت کہ جنگ ءِ بندات ءَ چہ 52 جان سلامتی ءِ آسراتی نشانگ جوڑ کنگ بوتگ اَنت۔

بلوچستان ءِ دو جتاجتائیں دمگ نوشکی ءُ گوادر وھدے کہ پنجاب ءِ دمگ ملتان ءَ ھپت مردم آوار جنگ ءُ بیگواہ کتگ-

گیشیں ھالانی رِد ءَ چاردہ فروری 2026 ءِ بیگاہ ءَ پنجاب ءِ دمگ ملتان ٹبہ ءَ چار بلوچ پاکستانی پوج ءِ کارندھاں آوار جتگ ءُ بیگواہ کتگ-

بیگواہ کنگ بیتگیں مردمانی پجّار کوہ سلیمان ءِ دمگ چہ فضلہ کچ ء سیادی داروکیِں محمد اسماعیل بزدار ء خدا بخش، بیست سالی ئیں جلیل بزدار ء محمد، بیست سالی ئیں محمد لطیف بزدار ءُ سے ھپت سالی ئیں غلام دین بزدار ء محمد خان نام ءَ چہ بیتگ کہ سرجمیں مردم مزدور اَنت-

اِھوالکار ءِ رِد ءَ چاریں مردم چاردہ فروری 2026 ءِ شپ کساس ھشت ءَ ملتان ٹبہ ءِ دمگ ءَ سی ٹی ڈی کارندھاں آوار جتگ اَنت چریشی ءَ پد ھچ وڑیں ھال نیست-

کھول ءِ گوشگ اِنت کہ تنی وھدے آیانی دزگیری ءِ ھچ وڑیں ھال دز نہ کپتگ نانکہ آئی ءِ درگت ءَ تھانہ یا آمیدگس ءَ سرپدی دیگ بیتگ چریشی ءِ سوب ءَ کھول سک ترس تہ ءَ اَنت-

دومی نیمگ ءَ نوشکی ءِ دمگ چہ جورکین ءَ یک ھپتگے ءَ ساری دو مردم زورانسری بیگواہ کنگ بیتگ اَنت- بیگواہ کنگ بیتگیں مردمانی پجّار رؤف ء خیر جان ءُ انجم ء چاکر خان نام ءَ چہ بیتگ اَنت، کہ آ پاکستانی پوج ءِ کارندھاں آوار جتگ ءُ بیگواہ کتگ اَنت-

کھول ءَ گوں واکدار ءَ لوٹ کتگ کہ اگاں آیانی سر ءُ کجام وڑیں بھتامے ھست گُڑا آیاں آمیدگس ءَ پیش بہ کن اِت اگاں ناں گُڑا زوت یل کن اِت-

ھمے وڑ 09 مارچ 2026 ءَ گوادر ءِ دمگ جیونی ءِ ھند پانوان ءَ شپ ءِ ساھت ءَ سے ءَ پاکستانی پوج ءُ چیریں ادارھانی کارندھاں شانزدہ سالی ئیں نودربر عبداللہ ء حکیم بلوچ جھمنند پانوان جیونی آوار جتگ ءُ بیگواہ کتگ-

سرگوست: سئے سر گنوک

نبشتہ کار: سنا بھار

دی بلوچستان پوسٹ

اے سر گوست ءِ کارست سئے زمین زادگ ءُ وتن شیدائیگ انت کہ آ پہ زمین وتی ساہ ءَ سر گوستگ انت۔ بلوچستان دلکشیں موسم چو مدامی وڑ ءَ ھست انت بلے یکیں جمبراں گشئے بلوچستان گیشتر زیبدار کتگ ات ھمے موسم ءَ سئےسر گنوکیں کارستانی کسہ بنداتی سبب بیت کہ آ سئیں سنگت پرپٹ ءَ سوار بوت انت ءُ دیم پہ کوھانی نیمگ ءَ رھادگ بوت انت ءُ یک کوھی ٹُلے ءَ نشت انت دیوان برجاہ ات کہ یک سنگتے ءِ زبان ءَ گپے در اتک کہ “یار زمین چنچو زیبا انت من ھُدا ءِ گور ءَ تھنا یکیں لوٹ ءَ وتی زمین ءِ کناں۔” دگہ سنگتے ءَ جواب دات “ھو یار زمین وَ سک زیبا انت بلے چون کن ئے گلامی ءَ زمین چہ مارا پُل اتگ۔” سیمی سنگت ءِ ھم وت ءَ گپانی تہ ءَ بے بھر نہ کت ءُ گشت کہ “ھو گلامی ھست بلے گلامی ءَ چہ درآھگ ءُ گلامی ءِ زمزیل پروشگ ھم بنت۔” دومی سنگت ءَ دوبر جواب دات کہ”گڑا زمین چون چہ گلامی ءَ رک ات کنت سنا ؟” گپ بندات کت کہ “یار ما چی کت کنیں اے انچیں شومیں استانے کہ کسی سر ءَ رھم نہ کنت۔ ما اگاں کسانیں گپے بہ کنیں گڑا بیگواہ بئیں۔ یک دو روچ ءَ پد مئے لاش جنگل ءُ گیابان ءَ در کپ انت۔” زیب کہ کوہ ءَ تَکا ات، آئی ءَ گشت “اڑے گنوک ھما راج یاکہ راجی پُسگ کہ آجوئی لوٹ انت گڑا آ کدی ھم چہ بیگوائی ءَ ءُ مرگ ءَ نہ ترس انت۔” نودان ءَ مدان مدان ءَ گشت “یار شما وتی دپ ءَ بند کن ات کہ کش ءَ آ نیمگ ءَ مردم ھست ءُ جاور چوش نہ انت کہ ما اے وڑیں جاہ ءَ ءُ اے وڑیں گپ بہ کنیں۔ نوں بس انت انچو گپ۔ پادا ات کہ وھد شتگ۔”اے گپاں گوں آ پاد اتک انت ءُ گسانی نیمگ ءَ رھادگ بوت انت۔ گِس سر بوگ ءَ پد کسانیں گین سارتے کش ات ءُ زیب ءَ گشت “یار وھد شتگ نوں من وتی نیمگ ءَ جُنزاں۔” گڑا سنگتاں پہ زیب ءِ سر کنگ ءَ پرپٹ کش ات۔ واتر ءَ سنا راہ ءِ جیڑان ات کہ یار ھو اگاں یک راجے آجو بوگ لوٹ ایت گڑا آ راجاں گار ءُ بیگوائی یاکہ مرگ ترس آماچ نہ کنت، گوں ھمے جیڑگاں داں واتر گِس ءَ سر بوت انت ءُ وھد ھلاس انت ءُ شپ تھار ات۔ گڑا سنا ءُ نودان ءَ وتی بِنڈُک پچ کت انت پہ وپسگ ءَ بلے ھمے ھبر سنا ءِ اندر ءِ وسوسے پیچ وران انت ءُ وت ءَ جست کنگ ءَ ات کہ تو راج ءِ گلامی ءِ زمزیلانی پروشگ ءَ چی کتگ؟ گڑا منی گور ءَ اے بابت ءِ پسو نیست پرچا کہ من ھچ نہ کتگ بلے ھما گپ انگت سنا ءَ چہ اندر ءَ وران ات آ راج کہ آجوئی لوٹ انت گڑا آ راجی پُسگ چہ بیگوائی ءُ مرگ ءَ نہ تُرس انت۔

ھمے گپ سئیں ملنگیں زمین ءِ پاسپان بوتگیں جواب بیت۔ اے گپ ءَ سنا ءِ جیڑگ گیشتر کنان کت انت کہ اگاں آ پُسگ بیگوائی ءُ مرگ ءَ نہ ترس انت گڑا ما پرچا مرگ ءِ تُرس ءَ ھاموش ایں۔ سنا وتی جیڑگ ءَ گوں پہ انچیں پیسلہ یے ءَ پہ جیڑگ بندات کت کہ مارا چہ گلامی ءِ وڑیں نادرائی ءَ بہ رکین ایت۔ سنا ءَ جیڑ اِت کہ اگاں منی ساہ دیگ ءَ گوں زمین رک ات کنت گڑا ما پرچا پہ زمین ءَ ندر مہ بئیں۔ آ داں بانگواہ ءَ ھمے جیڑھانی تہ ءَ گار ات دانکہ پدا واب کپت۔

بلے اردیں کہ دوبر چم ئِے پچ کُت انت گڑا آئی ءِ چماں تہنا گلامی ات ءُ دگہ ھچ گندگ ءَ نہ یتک گشئے زمین ورناہاں توار پِر کنگ ءَ انت “دانکہ مہ وپس کہ من رسترانی امبازاں گاراں۔” آ بے آرام انت۔ ھر نیمگ ءَ بزگی ءُ گلامی گندگ ءَ ات۔ سنا گوں زمین ءَ کول کنگ ءَ ات کہ “گلزمین اگاں من ءَ تئی گلامی ءِ رکینگ ءَ ساہ دیگ بہ کپ ایت من اگاں نہ دات گڑا ترا منی مرتگیں ارواہ ءِ سوگند انت کہ من ءَ وتی دلبند ءَ جاہ مہ دئے۔ گشئے ھمے کول ءَ گوں آ وشیں وابے ءَ کپت داں موبائل ءَ زنگے اتک۔ آ پاد اتک، موبائل ئِے دست ءَ کت زیب:”ھال کن کربان۔” زیب ءِ جواب اتک،”زالم انگت واب ئے؟ انچو واب۔” سنا: “اناں یار واب کج انت۔زیب: “بیا منی نیمگ ءَ رواں بازار ءَ لھتیں کار ھست۔” سنا:”شر کربان۔”زیب ءِ گور ءَ سر بوگ ءَ گوں زیب ءَ سنا ءِ چمانی سھری دیست ءُ گشت:”اڑے تئی چم چوش انت۔ سنا:”بس یار راہ گوات ات گڑا پمیشکا۔” زیب ءَ جواب دات:”یار اے گوات ءِ سُھری نہ انت گپے الم ھست بہ گش چی گپے؟” سنا: “بِل چماں۔ تو پاد ءِ رواں بازار ءَ۔” ھیر ما بازار ءِ سپر بندات کت گڑا راہ نیمگ ءَ زیب ءَ گشت کہ”اوشت پرپٹ ءَ دار۔” گڑا آ اشتات انت ءُ زیب ءَ گپ بندات کت:”یار موسم چون وش وش انت گوات ھچ نیست تو گشئے چم چہ گوات ءَ چوش انت۔” ہمد ءِ نودان ءَ ھم وتی دپ یک کت “بہ گش چی گپے؟ تو چہ مارا چیر دیگ ءَ ئے۔ “یار چمانی سُھری ءِ کسہ دراج انت۔ اے گشگ ءِ وھد نہ انت۔” نودان ءَ جواب دات، “گِس ءَ واتر کنیں گپ بہ کن۔ نوں بازار ءَ رواں۔” گڑا اردیں کہ اے گِس ءَ سر بوت انت زیب ءَ گشت: “بلے پُل بندات کن۔ سنا: “یار کسہ چوش انت کہ شما گوں من ءَ ھمراہدار بہ بئے، اگاں ھمرہ نہ بئے گڑا اناں مہ کن ات.”

زیب: “تو کسہ ءَ بہ کن یار ـ آ: “جیڑہ ایش انت من دوشی سرجمیں شپ گوں جیڑگاں سھب کتگ۔زیب: “تو چی جیڑ اتگ زالم؟” آ: “من ھما گپ ءِ سر ءَ جیڑگ ءَ بوتگاں ءُ پد ءَ اے جیڑ اتگ کہ من پرچا تُرس ءِ آماچاں۔پمیشکہ من ءِ گوں زمین ءَ کول کنائینتگ کہ من پہ زمین ءِ آجوئی ءَ وتی وس ءُ واک ءُ جھد کناں۔”“بلے بلے بزاں تئی جیڑگ ایش انت۔”نودان ءِ گپ بندات کت:”اڑے پُل ما دوئیناں ھم یکروچے انچوش جیڑ اتگ ات کہ مارا اے جھد ءّ بھر بوگی انت۔ ما ارادہ کتگ کہ مرچی گوں تو ھمے گپ ءَ درشان بہ کنیں۔ تو وش بھتی ئے کہ وت گپ بندات کت۔”

“ھیر پد ءَ دگہ روچے۔” سناہ ءَ گپ بندات کت،”ما کہ اے سپر ءِ مساپر بوگ ءِ ارادہ کتگ گڑا اشی ترتیب چون انت؟ما چہ مردم کجا شوھاز ایں؟ چون رو ایں کوہ ءَ؟“اڑے راہ مُچ انت۔ یکبرے ما وتی پیسلہ ءَ پکا نہ کنیں بس۔۔۔” سنا:”یار من چٹ پکا آں۔ پہ من ءَ دگہ ھچ گپ پشت نہ کپتگ۔”

گڑا ھیر آیاں سنگت شوھازگ بندات کت داں سرجمیں یک ماہے ءَ گشئے سنگت دست نہ کپت. ھمے میان ءَ سنا ءَ یک بروسھی سنگتے ھست کہ آئی ءَ وتی پیسلہ ءِ بابت ءَ سرپد کت ءُ راہ ءِ شوھازگ ءَ پہ جست کت۔ سنگت ءِ اولی گپ ھمیش ات کہ اے سپر پہ ھبر وش انت۔ سپر ءِ مساپر بوگ وش نہ انت۔ گُژن ، بزگی ءَ بہ گر بے وابی ، سک باز انت۔ ھر کسی وس ءَ نہ انت۔ من گوشاں انگت شری ءِ سر ءَ بہ جیڑ کربان۔” من جیڑ اتگ ءُ پکا آں۔“ھیر تو کہ پکا ئے گڑا من وڑے کناں۔ مردمے پہ ترا شوھازاں۔ بس ودار بہ کن۔

اے سئیں سنگت بے سبری ءِ گوں ودار کنگ ءَ اتنت بلے سنگت گار ات۔ سنا ءَ دوبر سنگت ھال کت۔ سنگت ءِ جواب ھم ھمیش ات کہ یار من شوھازگ ءَ آں، بلے چوشیں مردم دست کپگ ءَ نہ انت. گڑا اے سنگتاں وت شوھازگ بندات کت ءُ بازیں شوھازگ ءَ پد گوں یک سنگتے ءَ ھال کنگ ءَ سوبمند بوت انت۔ اے ساھت گشئے پہ آ سرگنوکاں زند ءِ وشتریں ساھت ات۔

سنگتاں گوں ھال کنان ءَ سنگت ءَ بازیں جست ءُ پد کت ءُ گُڈسر ءِ گشت کہ”شما سئیں وتی اکسے دیم بہ دے ات۔” گڑا سنا ءَ نودانءَ گشت”اڑے تو میا۔ ما تئی اکس ءَ دیم نہ دیاں۔ تو مات ءِ یکیں زھگ ئے۔” نودان ءَ جواب دات کہ “یکیں زھگ آں گڑا چی بیت؟ استاد اسلم وتی یکیں زھگ تھنا پہ پھر رکست کت۔” نودان بازیں درور دیگ ءَ پد آ سنگت وش نہ اتنت۔”اناں تو میا۔” نودان ءَ گشت “اگاں شما من ءَ نہ بر ات گوں ، گڑا من رواں دلاراں ھال دیاں کہ اے کوہ ءَ روگ لوٹ انت۔” ھمد ءَ زیب ءَ گشت “نوں تو پھک گنوک ئے۔ بہ رو مسیت ءَ جارے بہ جن کہ ما روگ ءَ ایں۔” ھیر بازیں گپ ءَ پد گڑا آ رازی بوت انت پہ نودان برگ ءَ گڑا سنا وتی ءُ زیب ءُ نودان ءِ یک اکسے دیم دات۔ آ سنگت ءَ بس جواب دات کہ جوان ءُ پدا گار بوت بلے اے سئیں ودار ءَ گوں نپس زورگ ات انت۔ بازیں روچ ءَ داں سنگت گار ات گڑا سنا ءَ برادشت نہ بوت وت کلوہ ئِے دیم دات کہ “مئے ترتیب چون بوت انت؟” سنگت ءَ کلوہ چار اے ءُ جواب نہ دات گڑا سنا گوں آ دوئیں سنگتاں گشت “یار اے سنگت جواب دیگ ءَ نہ انت۔” پدا سنا ءَ گشت”ما بلکیں کسان ایں پمیشکا مارا زورگ ءَ نہ انت۔”گڑا سنگتے ءَ جواب دات”اڑے ما چہ جنید ءَ کستر ایں؟ آ وتی ڈیھ ءِ پھازان ءَ نوشکی ءَ شھید بوت۔“سنا گڑا یار نہ زاناں چوش پرچا۔۔”

ھیر روچ گوں ودار ءَ جنزان اتنت، اناگت ءَ یکروچے سنا ءِ موبائل ءَ توار کت داں ھما سنگت انت۔

سنگت: ھال کن ات شما چون ات؟ سنا: سلامتی کربان تو ھال کن؟ سنگت: کربان وتی ءُ سنگتانی جُتا جُتائیں اکس گوں سرجمیں اھوالاں راہ بہ دے ات۔ سنا: شر۔ سنگت: جوان۔ سنگت: شما پہ وت ءَ پنامے گچین بہ کن ات۔ ھمے گپاں گوں سئیں سنگت انچو گل بوت انت گشئے آزمان زمین ءَ اتکگ ات۔ سئیں سنگتاں وتی پنام گشت انت۔ ھیر پد ءَ سنگت ءَ بازیں نبشتانک ءُ کتاب دیم ھم دات کہ اشاں بہ وان ات ءُ پد ءَ گار بوت۔ داں چیزے روچ پد سنگت ءَ‌ ھال کت “چون ات شما؟ سنا: “ما وش ایں تو چون ئے؟”سنگت: “گڑا باریں چی گندگ ءَ ات ، شما وتئی چپ ءُ راست ءَ؟”سنا: “کربان بس گلامی انت۔ وڑ وڑیں چیز گندگ ءَ کیت۔” سنگت: گڑا اشی ءِ ولگوج کنگ ءَ شما چی کت کن ات؟”سنا: “کربان گل مارا ھر چونیں کار گشیت ما تیار ایں۔ اے سپر کہ بندات کتگ نوں پشت نہ کنز ایں۔” سنگت: ھو کربان پہ پشت کنزگ ءَ کس نئیت انت ھم۔۔”

—روان انت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دو جتاجتائیں دمگ تربت ءَ پاکستانی پوج ءِ سر ءَ اُرش وھدے کہ ھُزدار ءَ سلاہ بنداں ناکہ بندی ءِ میان ءَ دو مردم کشتگ ءُ یکے دزگیر کتگ-

گیشیں ھالانی رِد ءَ ھُزدار ءِ تھسیل کرخ ءَ بلوچ آجوئی لوٹوکیں سلاہ بندیں مردم دمگ ءَ پُترتگ اَنت سی پیک شھدگ سر ءَ چیک پوائنٹے جوڑ کتگ ناکہ بندی کتگ-

ھالانی رِد ءَ سلاہ بندیں مردماں ناکہ بندی ءِ میان ءَ تچگ ءِ جُھد کتگ دو مردم کشگ بیتگ ءُ یکے دزگیر کنگ بوتگ، آیانی سیادی گمانی پاکستانی چیریں ادارہ آئی ایس آئی ءَ چہ گوشگ بیگ ءَ اِنت-

وئیل ءَ پد پاکستانی پوج ءَ پیشکدمی کنگ جُھد کتگ اود ءَ پوج ءُ بلوچ آجوئی لوٹوکیں سلاہ بندانی میان ءَ تُرندیں میڑ بیتگ-

زانگ بہ بیت اشی ءَ ساری چار مارچ ءَ ھم مزنیں کچے ءَ بلوچ آجوئی لوٹوک کرخ شھر ءَ پترتگ اَنت پولیس تھانہ ءُ سرکاری ماڑی تباہ کتگ اَنت-

آ اُرش ءِ زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ وھدے کہ اے اُرش ءِ زمہ واری انگت ھچ گل ءَ نہ زرتگ-

ھمے وڑ کیچ ءِ ھند تجابان ءَ پاکستانی پوج ءِ کاروان ءَ ھوار یک گاڑی یے گوں تراکناکیں شورواں تباہ کنگ بوتگ-

سرکاری نیمگ ءَ اے اُرش راست کنگ بیتگ گوشتگ کہ تجابان ءَ ایف سی ءِ کاروان ءَ ھوار یک گاڑی یے ناشناسیں مردماں تراکناکیں شورواں چہ تباہ کتگ-

اُرش ءِ آسر ءَ گاڑی ءَ تاوان رس اِتگ وھدے کہ دو کارندہ ٹپی بیتگ اَنت-

اِھوالکار ءِ رِد ءَ ٹپی کارندہ الاج ھاتر ءَ نزیکیں نادُراھجاہ ءَ برگ بیتگ اَنت وھدے کہ وئیل ءَ پد پوج ءَ دمگ انگیر ءَ کتگ پٹ ءُ پول بندات کتگ-

اُرش ءِ زمہ واری انگت ھچ گل ءَ نہ زرتگ-

بلوچستان ءِ دمگ گوادر ءِ تھسیل جیونی ءِ دمگ کنٹانی ءَ پاکستانی پوج ءَ یکرندے پد ءَ سیمسری باپاری ءَ چہ ھمگرنچیں مزدورانی لوگ ءُ ماڑی مانداشتگ اَنت-

تیل ءِ کار ءُ بار ءَ چہ ھمگرنچیں مردم اے سنگین ءِ زیادتی گوشتگ رمضان المبارک ءِ ماہ ءَ مھنت کشانی مالی کوش گوشتگ-

اے درگت ءَ بلوچ یکجھتی کمیٹی ءَ وتی یک درشانے ءَ گْوشتگ کہ ھشت مارچ گوادر ءِ دیر دراجیں دمگ موچن کپڑ، کنٹانی ءَ بازیں بلوچیں مردم سیمسری باپاری ءَ چہ مزدوری کن اَنت وتی لوگ ءَ تیلانک دے اَنت دگہ یک نا انساپی دیمپانی کنگ کپتگ اود ءَ پاکستانی ادارھاں آ بُنکی آسراتی ءُ وھدے دیگ جاہ آئی ءَ تیل مانداشتگ اَنت کہ آیانی کمائی کنگ ءِ یکیں راہ اِنت-

درشان ءِ تہ ءَ گوشتگ اے کار تچکی برجاہ مالی زوراکی ءَ پیشدار اِیت چریشی ءَ بلوچ راج بازیں دھکاں چہ دیمپانی کنگ ءَ اَنت- بلوچ آبادی ءِ گوما اے وڑیں رویشگ کنگ بیت انچش آ یک کالونی ءَ نشتگ اَنت، اود ءَ ادارھانی نیمگ ءَ چہ زندگ بیگ ءِ ھرچ کسان چہ کسانیں امل ءُ کار ءُ بار ءَ جرم سرپد بنت-

آئی ءَ گْوشتگ کہ بلوچ یکجھتی کمیٹی ءَ لوٹ کنت کہ انسانی ہمدردیں گل درشاناں چہ برزتر بہ بنت پاکستان ءَ آئی ءِ پالیسیانی سر ءَ پسھی جوڑ کنگ ءِ ھاتر ءَ کردی گامگیج بزور اَنت کہ آیاں بازیں دھکاں چہ بلوچ راج ءَ را آئی ءِ بُنکی مالی ھکاں چہ مھکمیں دروشم ءَ چہ زبھر کتگ-

بلوچ لبریشن آرمی ءَ وتی آفیشل چینل ھکل ءَ آپریشن ھیروپ ءَ بھر زیروکیں دگہ چار نمیرانیں ھمراھانی اکس ءُ اھوال شنگ کتگ انت-

اولی ءِ پجار فدائی سھیل احمد بگٹی پنام ءِ وطن زاد ء ڈاڈا بگٹی جھمنند مچ بولان ءِ نام ءَ کتگ – آئی ءَ مارچ 2025 ءَ بی ایل اے ءَ بھر زرتگ ءُ مئی 2025 ءَ مجید بریگیڈ ءِ بھر جوڑ بیتگ – آئی ءِ ٹک رائیجو بگٹی بیتگ ءُ آپریشن ھیروپ ٹو ءَ نوشکی ءَ شھید بیتگ-

فدائی وطن زاد ءَ وتی آشوبی کرد ءُ امل ءِ سبب ءَ راستی ءِ منانکاں وتی نام ءِ کساس ءَ وطن زاد بیتگ- فدائی ءِ بیگ آئی ءِ پیسلہ ستک ءِ چیدگ بیتگ باز رند ءَ گوستانک ءَ دیم ءَ روگ ءِ واستا زات ءَ گیش سرگوز بیگ ءُ کربانی ءِ گڈی تک ءَ روگ کپ ایت- بلوچ سرمچار ھمے ستک ءُ جزبگ ءِ ھواری ءَ وطن ءَ پنجاپی ءِ پنجگاں آجو کنگ ءَ وتی زندگیاں کربان کنگ ءَ انت-

آپریشن ھیروپ ٹو ءِ وھد ءَ نوشکی ءِ میدان ءَ وطن زاد ءَ ھما پلسپہ ءِ کربانی ءَ املی رنگ داتگ کہ آئی ءَ دشمن ءِ دیم ءَ مِک بیتگ ءُ جنگ دیان ءَ اے کلوہ یل داتگ کہ فدائی ایوک ءَ یک جنگی کردے نہ انت بلکیں آشوپی پکر ءِ چیدگ انت – راجی آجوئی ءَ زاتی زندگی ءَ چہ باز گیش نھاد دار سرپد بیت انت-

دومی ءِ پجار شھید ولید جان پندرانی پنام ءِ چاکر ء گل محمد پندرانی جھمنند سریاب مل کالونی شال ءِ نام ءَ کتگ – آئی ءَ جون2025 ءَ بی ایل اے ءَ بھر زرتگ آپریشن ھیروپ ءَ نوشکی ءَ شھید بوتگ-

سریاب ءِ دمکاں چِست بیتگیں ولید جان پندرانی روکیں راھانی مساپر نہ بیتگ بلکیں چاکر جوڑ بیتگ ءُ اے ناگیگیں راھ گچین کتگ انت گام گام ءَ چکاسی بیتگ انت-شھر ءِ وشیانی مُچی آئی ءِ پادانی چیر ءَ نہ بیتگ انت جون 2025 ءَ آئی ءَ زانشتی رنگ ءَ کوھانی بے تواری وتی توار جوڑ کتگ انت آ ایوک ءَ یک جنگولے نہ بیتگ بلکیں یک وابے ءِ مانا بیتگ- آئی ءِ پریچ آئی ءَ نوشکی ءِ پَٹ ءَ دزکپتگ- آپریشن ھیروپ ءِ تپشیں گرم ءَ وھدیکہ بارودانی دوت آسمان ءَ امباز کنگ ءَ بیتگ انت گڑا چاکر ءَ دشمن ءِ دیم ءَ مزنیں کوھے جوڑ بیتگ ءُ راجدپتر ءَ نمیران بوتگ-

سیمی ءِ پجار شھید فھیم مینگل پنام ءِ کوبرا ء ریٹائرڈ صوبیدار محمد بخش جھمنند زر آباد نوشکی ءِ نام ءَ کتگ – آئی ءَ 11 جون 2025 ءَ بی ایل اے ءَ بھر زرتگ ءُ آپریشن ھیروپ ءَ نوشکی ءَ شھید بوتگ-

فھیم مینگل کہ آ گوریلا سَرپاں کوبرا ءِ تیزی ءِ نام ءَ زانگ بیتگ – نوشکی ءِ ھما سھر دابیں ھاک ءِ ھما استار بیتگ کہ آیاں جیڑگاں ابید گھگیری ءِ راہ پہ وت گچین کتگ کوبرا ءِ جنگی سنچ ءُ دشمن ءِ سر ءَ اُرش کنگ ءِ تیزی ءَ آئی ءِ نام پدراھی ءَ کنت- آ بے تواری ءَ داں نشانگ ءَ سر بوگ ءُ ترندی ءَ الگار کنگ ءَ شیوار زانگ بیتگ- آپریشن ھیروپ ءِ وھد ءَ وھدیکہ بلوچستان ءِ کُنڈ کنڈا بارود ءِ بوہ تالان بوتگ گڑا فھیم مینگل ءَ وتی بنکی ھنکین نوشکی ءَ دشمن ءِ سر ءَ کھر بیان ءَ دیوالے جوڑ بیتگ ءُ ھاک ءِ ھک ءَ پیلو کنان ءَ نمیران بوتگ –

چارُمی ءِ پجار شھید محمد اشرف مینگل پنام ءِ سربلند ء عبدالرھمان مینگک جھمنند پندران کلات ءِ نام ءَ کتگ- آئی ءَ 2025 ءَ بی ایل اے ءَ بھر زرتگ ءُ کلات ءِ میدان ءَ بوتگ- آ نوشکی ءَ آپریشن ھیروپ ٹو ءَ شھید بیتگ-

آئی ءَ گوشتگ محمد اشرف مینگل ھما ھمراھاں بلندیں ھوسلگانی درچ ءَ آئی ءَ سربلند ءِ نام داتگ- کلات ءِ شیپ چاریں تلاراں ءُ گیرت داریں رھبندانی واجہ بیتگ- آئی ءِ سپر اِشک ءِ جزبگ ءِ منت نہ بیتگ بلکیں اے ھما زلم ءُ زوراکی ءِ پسو بیتگ کہ آئی ءِ کھول ءَ اوپار کتگ- سربلند ءِ سرجمیں کھول مچانکی سزا ءِ زالمانیں کانون ءِ درچ ءَ نشانگ کنگ بیتگ انت- آئی ءِ پِیریں پت ءُ برات زورانسری بیگواہ کنگ بیتگ انت چریشی ءَ اشرف ءِ دل ءَ آجوئی ءِ دلموش ءَ یک آسے ءِ رنگ ءَ مٹ کتگ- وتیگانی جتائی ءُ زنداناں ترندی ءَ آ پروشگ ءَ ابید گیش پھتو بیتگ- ءُ 2024 ءَ آئی ءَ دراھیں جیڑہ بُر اتگ ءُ سلاہ بندیں جد ءُ جھد ءِ راہ گچین کتگ-

سربلند ءَ کلات ءِ تلاراں وتی لشکری سنچ چو آسن ءَ مھکم کتگ – آ یک ھنچیں سرمچارے بیتگ کہ وتی ھاک ءِ مھر ءِ نور بیتگ- وھدیکہ آپریشن ھیروپ بندات بوتگ گڑا آئی ءَ نوشکی ءِ میدان ءَ مرگ ءَ چم دیم ءَ کتگ ءُ جنگ ءِ سکین داتگ- ترندیں جنگ ءُ چوپ ءِ وھد ءَ آئی ءَ منینتگ کہ ھما راج ءِ ورنایاں زندانانی ترس ءَ ابید میدانِ جنگ ءِ نیمگ ءَ رھادگ کن گڑا آئی ءِ پروش دیگ نا ممکن انت- محمد اشرف مینگل ءَ گڈی ساہ ءَ جنگ کنان ءَ شھیدی وتی نام ءَ کتگ ءُ وتی نام ءِ ڈول ءَ وتی راج ءِ سر برز کتگ-

تربت ءِ دمگ گوگدان ءَ پاکستانی پوج ءِ نیمگ ءَ چہ شپ ءِ وھد ءَ یکرندے پد ءَ علی فقیر سنگھور ءِ لوگ سر ءَ بیڑبرتگ ءُ پروشت ءُ پروش، لعل بخش آدم ءِ لوگ سر ءَ بیڑ ءِ ھم ھال اِنت-

اِھوالکار ءِ رِد ءَ گوستگیں شپ ءَ کساس دو ءَ پاکستانی پوج ءَ گوگدان ءِ جھمنند ءُ گوستگیں کونسلر علی فقیر سنگپھور ءِ لوگ سر ءَ بیڑبرتگ- کھول ءَ گوشتگ پٹ ءُ پول ءِ میان ءَ لوگ ءِ دروازگ ءُ الماری پروشت ءُ پروش کتگ اَنت وھدے کہ زالبولانی سر ءَ لَٹ ءُ کُٹ کتگ اَنت ءُ کھول گوما بے ادبی ءُ زاہ بد کتگ-

کھول ءِ رِد ءَ کاروائی ءِ میان یک ھُنڈا 125 موٹر سائیکل، موباھل فون ءُ واستا تیاریں مردینے ءُ جنینے گُد وتی ھمراھی ءَ برتگ اَنت- آئی ءِ گوشگ اِنت اشی ءَ ساری باز رند ءَ شپ ءِ وھد ءَ بیڑبرتگ ءَ یک موٹر سائیکلے پیسر ءَ برتگ کہ تاں انگت واتر نہ کتگ-

کھول ءَ دیمتر ءَ گوشتگ کہ اگاں کھول ءِ کجام ورنا اگاں جاگھے شتگ گڑا آئی ءِ سزا ءَ زالبول ءُ چُکاں تُرسینگ ءُ ھر وھد ءَ لوگ سر ءَ بیڑ جنگ نا انساپی اِنت- آیانی گوشگ ءِ رِد ءَ دمگی واجکارانی ھمراھی ءَ بُنجل ءَ شتگ اَنت نبشتھی ھساب ءَ داتگ کہ اگاں آیانی کجام مردم جاگھے شتگ گُڑا آیانی زمہ وار آ نہ اَنت-

دومی نیمگ ءَ اِھوالکار ءِ گوشگ اِنت کہ پاکستانی پوج ءَ ھمے شپ ءَ گوگدان ءَ لعل بخش آدم نامیں مردمے ءِ لوگ ءَ ھم بیڑبرتگ-

کِتاب ءِ نام: (بلوچ اور اُن کا وطن) بلوچ ءُ آیانی ڈیھ

نبشتہ کار: ڈاکٹر پاروک بلوچ

چمشانک : اُلپت پیز

دی بلوچستان پوسٹ

ڈاکٹر پاروک بلوچ ءِ اے کتاب بلوچ اور اُن کا وطن بلوچ ءُ بلوچ ءِ ڈیھ ” سائل ءُ گواجنانی بابت ءَ اِنت ءُ گوست ءَ بلوچاں آیانی واست ءَ زورگیرانی ھلاپ ءَ چوں گَھگیری کُرتگ۔۔ڈاکٹر پاروک بلوچ بُندپتر نویسے ءُ بلوچستان مزن شھدربرجاہ ءَ بندپتر ءِ ڈیپارٹمنٹ ءَ اسسٹنٹ پروپیسری ءِ اُگدہ ءِ سر ءَ وانینگ ءَ بوتگ ۔ آئی ءَ بلوچستان ءِ بُندپتر ءِ سر ءَ مزنیں کچے ءَ کتاب نبشتہ کُتگ ءُ یک جوانیں پٹ ءُ پولی دابے ءَ بلوچستان ءِ بُندپتر دیم ءَ آؤرتگ۔ آئی ءَ بازیں کِتاب بلوچستان ءِ بابت ءَ نبشتہ کُرتگ۔
لھتیں کتابانی نام چو اے وڑ ءَ اَنت۔
1: بلوچ و بلوچستان قدیم مؤرخین کی نظر میں۔
2: بلوچ قدیم قبائل اور بلوچستان کی تاریخ
3 بلوچ اور آریائی تعلقات اے ھوار اَنت۔
من اے چمشانک ءَ (بلوچ اور اُن کا وطن) بلوچ ءُ بلوچ ءِ ڈیھ ھمے کِتاب ءِ پشدر ءَ درشان کُتگ۔

چُشکہ ما گوست ءَ پِچار ایں بلوچ چہ وھداں ھمے زالم ءُ زوراوریں ھاکمانی زلم ءِ آماچ بوتگ ءُ اے وھد ءَ بلوچ بلوچستان ءَ ھوار سندھ، پنجاپ، ایران، اوگانستان، اَربستان ءَ جھمنند بوتگ اَنت- اگاں ما بہ چار ایں تاں بلوچ ءَ ھر وھد زالمانی زُلم ءِ ھلاپ ءَ گَھگیری کُتگ کہ داں مرچی ءَ آئی ءِ گَھگیری گوں پاکستان ءَ برجاہ اِنت۔

بازیں بُندپتر نویس بلوچاں آرین، کُرد، اَرب ءُ ایران ءَ چہ آؤکیں راجے لیک اَنت بلے چُش نہ اِنت بلوچ چہ وھداں ھمے ڈیھ بلوچستان ءِ جھمنندیں راجے بوتگ ءُ مرچی ءَ داں بلوچ ھمے ڈیھ ءِ بلوچستان ءَ جھمنند اَنت ، اگاں ما بلوچ ءَ چہ در آؤکیں راجے بہ لیکیں گڑا اے بے پائدہ اِنت چی ءَ کہ بلوچ چہ آرین ،کرد ءُ اَرب ءَ پیسر ھمے زمین ءَ نندوک بوتگ ءُ بلوچ ءِ دودمان سک باز کوھن اِنت کہ آ “مھرگڑھ” دودمان ءِ نام ءَ زانگ بیت ءُ کہ آ 1100 ھزار سال کوھن اِنت۔

دومی نیمگ ءَ بازیں لبزانک کار ءُ بُندپتر نویس بلوچی زبان ءَ چہ آرین زبان ءَ در آؤکیں زبانے گُش اَنت کہ اے گپ ءِ تہ ءَ ھم ھِچ راستی نیست اِنت چی ءَ کہ بلوچ چہ آرین ءَ پیسر ماں بلوچستان ءَ آباد بوتگ اَنت ءُ چہ آرین ءَ پیسر آئی ءَ وت ءَ یک زبانے بوتگ۔ ما اے گُشت کنیں کہ بلوچی زبان گوں آرین زبان ءَ ھوار بوتگ-

اگاں ما پچار ایں بازیں بُندپتر نویس بلوچ راج ءَ چہ براھوی زبان ءِ ھبر کنوکیں بلوچاں جتائیں راجے لیک اَنت کہ ایشی ءِ تہ ءَ ھم ھچ راستی نیست۔ چی ءَ کہ تو زبان ءِ بنیات ءَ ھِچ راج ءَ چہ جِتا کُت نہ کن ئے بلوچ چہ وھداں بلوچستان ءَ جھممند بوتگ ءُ آیاں ھچبر وتی نام ءِ دیم ءَ براھوئی کارمرز نہ کُتگ۔ اگاں ما بچاریں مارا بُندپتر ءِ ھچ کتابانی تہ ءَ براھوئی راج دست نہ کپ ایت اے لبز برتانیہ ءَ پہ بلوچ ءِ بھر ءُ بانگ کنگ ءِ واست ءَ کارمرز کتگ۔چوناھا زوراور یک کومے ءِ سر ءَ ھاکمی کنگ ءَ چہ پیسر آئی ءَ را بھر ءُ بانگ کنت آ دین ءِ بُنیاد بہ بیت یا زُبان ءِ ۔ اگاں ما بہ چار ایں ھرچ (خان) ھان بلوچے کہ بوتگ آھاں براھوئی زبان کارمرز کتگ بلے آیاں ھرچ وھد ءَ وتی نام ءِ دیم ءَ (خان) ھان بلوچ نبشتہ کتگ-

بلوچ ءِ سرزمین بلوچستان (جغرافیائی) نکش ءِ ارزشت ءِ سوَب ءَ تیوگیں دنیا ءِ تہ ءَ یک کِردے دار ایت۔ پمیشکا ھرچ وھد ءَ تاگتور ءُ زورگرانی چم بلوچستان ءِ سر ءَ سک اَنت – سکندر آعظم ءُ سائرس اعظم ءَ بِگر تاں سنڈیمن ءُ جناہ ءَ ھرچ پیمیں ھاکماں اے زمین ءِ ارزشت زانتگ ءُ آیاں ھمے جُھد کُتگ کہ بلوچستان ءِ سر ءَ ھاکمی بہ کن اَنت۔

بلوچستان مرچی سَے بھر ءِ تہ ءَ بھر اِنت کہ آئی ءِ یک بھرے گوں ایران، یک بھرے گوں اوگانستان ءُ یک بھرے گوں پاکستان بزاں سندھ ءُ پنجاپ ءِ گون ءَ ھوار اِنت۔ بلوچستان ءَ را چوش بھر ءُ بانگ سامراجی تاکت برتانیہ ءَ کُتگ۔ چوش کہ بلوچستان ءِ (جغرافیہ) نکش ءَ دنیا ءِ تہ ءَ پُر ارزشت اِنت، ھمے پیم ءَ بلوچستان ءِ سائل وسائل ھم دنیا ءِ چمانی چیر ءَ اَنت بلوچستان ءِ تہ ءَ بازیں کیمتی ئیں ابرمی وسائل دست کپ اَنت- بلوچستان ءِ گواجنگانی تہ ءَ گیس (کہ 1952 ءَ ماں سوئی ءَ دریاپت بوتگ)، تیل ، کوئلہ ، سُھر ءُ نُگرہ کہ اے وسائل مارا چاگی ، ڈیرہ بگٹی ءُ کوھلو ءَ دست کپ اَنت کہ آ سیندک ءُ رکوڈک ءِ نام ءَ زانگ بنت-

اگاں ما بلوچ ءِ گْوست ءَ شریں وڑے ءَ بہ وان اِیں۔ چہ آیاں اے زانگ بیت کہ بلوچ بلوچستان ءِ تہ ءَ 1100 یازدہ ھزار سال ءَ پیسر آباد بوتگ۔ بلوچ دودمان بزاں مھرگڑھ دنیا ءِ تہ ءَ یک کوھنیں دودمانے زانگ بیت- 2200 دو ھزار دو سد ک م ءَ مھر گڑھ دودمان زوال ءِ نیمگ ءَ روت بزاں بازیں بلوچ ھُشک سالی ءُ موسم ءِ بدل بوگ ءِ سوب ءَ ماں سندھ ءُ ایران ءَ آباد بنت ءُ ایشی ءِ سوب ءَ بلوچ آبادی کم ترّ ایت ءُ بلوچستان ءِ تہ ءَ دری راج بزاں دراوڑی راج کاینت ءُ آباد بنت کہ آھانی دودمان دراوڑی دودمان زانگ بیت۔

1500 پانزدہ سد ک م ءَ آرین ارش کار بلوچستان ءِ سر ءَ اُرش کن اَنت آرین ارش کارانی ھلاپ ءَ بلوچ گھگیری کن اَنت بلے بلوچ ءِ تاداد کم بوگ ءِ سوب ءَ بلوچ پروش وارت- چہ آرین ارش کاراں پد ءَ بلوچ ءِ سر ءَ ایران ءِ ھاکم ماں نُھمی کرن ک م (854) ءَ کبزہ کنت-

ھمے پیم ءَ چارمی کرن ک م ءَ (359) سکندر اعظم ءِ پوج بلوچستان ءِ سر ءَ ارش کنت ءُ (فتح)کبزہ کنت- چہ سکندر اعظم ءَ پد بلوچستان ءِ سر ءَ موریا حکمران بلوچستان ءِ سر ءَ کبزہ کنت ماں ھپتمی کرن (644) ءَ عرب ھاکم بزاں ریاست مدینہ بلوچستان ءِ سر ءَ کبزہ کنت بلکیں اَرب ھاکم تیوگیں 400 چارسد سال بلوچستان ءِ سر ءَ ھاکمی کنت-
گوستانک نویس گُش اَنت کہ اَرب ءِ آیگ ءَ پیسر بلوچ آتش پرست ءُ بُت پرست بوتگ اَنت کہ ایشانی ڈس ءُ نشان مارا بلوچستان ءِ بازیں ھنداں دست کپ اَنت-

چہ اَرب ھاکماں پد بزاں ماں یازدھمی ایسوی ءَ مھمود گزنوی بلوچستان ءِ سر ءَ کبزہ کنت ءُ مھمود گزنوی ءَ پد مُگل ھاکم بلوچستان ءِ سر ءَ کبزہ کن اَنت- چوشکہ پانزدھمی کرن ءَ مُگل ءِ ھاکم زوال بیت ءُ بلوچستان ءِ سر ءَ بلوچ ءِ اھمدزئی ھاکمی کنت۔ 1839 ءَ یکبرے پد ءَ بلوچستان ءَ برتانیہ کبزہ کنت- برتانیہ ءِ کبزہ داں 1947 برجاہ بیت کہ پد 11 اگست 1947 ءَ بلوچستان یک آزاتیں ریاستے جوڑ بیت ءُ بلے ایشی ءَ پد یکبرے پد ءَ 27 مارچ 1948 ءَ پاکستانی ریاست بلوچستان ءِ سر ءَ کبزہ کنت کہ داں روچ مرچی ءَ آئی ءِ کبزہ برجاہ انت ءُ بلوچ گوں آئی ءَ جنگ کنگ ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

کیچ ءِ دمگ مند ءِ ھند آپسی کھن ءُ شیپچار ءَ برجاہ پاکستانی پوج ءِ دو چوکیانی سر ءَ سلاہ بندیں مردماں اُرش کتگ-

دمگی اِھوالکار ءِ رِد ءَ اُرشکاراں یکیں وھد ءَ دوئیں چوکیانی سر ءَ اُرش کتگ چریشی ءَ پد دمگ ءَ تُرندیں میڑ ھال سر بیتگ-

ھالانی رِد ءَ سلاہ مردماں اُرش ءَ پد دوئیں چوکیانی سر ءَ دستیگ کتگ ءُ اود ءَ ھستیں سلاہ ءُ دگہ سامان وتی دستیگ کتگ اَنت-

اِھوالکار ءَ اے ھم گوشتگ کہ اُرشکاراں پد ءَ دوئیں چوکی مانداشتگ اَنت-

وئیل سرکاری نیمگ ءَ راست ءُ رد دیم ءَ نیتکگ- نانکہ اُرش ءِ زمہ واری دگہ گلے ءَ منّ اِتگ-