بلوچستان ءُ کراچی ءَ زالبولاں ھوار پنچ مردم یل کنگ بیتگ انت ءُ دگہ پنچ آوار جنگ ءُ بیگواہ کنگ بیتگ انت-
بلوچستان ءِ جتاجتائیں دمگاں زورانسری بیگواھی ءِ آماچیں پنچ مردم یل کنگ بیتگ اَنت۔
گیشیں ھالانی رد ءَ محمد عارف، بی بی رفیعہ ءُ بی بی ندا 21 جولائی 2026 ءَ چہ مستونگ ءَ دزگیر کنگ ءُ بیگواہ کنگ بوتگ اَنت کہ 6اگست 2026 ءَ چہ مستونگ ءَ یل کنگ بوتگ اَنت۔
ھمے رنگ ءَ خاران ءِ نندوکیں مظفر ء ڈاکٹر احمد 7 اگست 2025 ءَ زورانسری ءبیگواہ کنگ بوتگ ءُ نزیک ءَ یک سالے ءَ پد 6 اگست 2026 ءَ چہ شال ءَ یل کنگ بوتگ۔
دومی نیمگ ءَ محمد فیضان ء عبدالحامد کمبرانی شال ءِ دمگ کمبرانی شریف آباد ءَ چہ بیگواہ بوتگ۔ ھاندان ءِ گشگ ءِ رد ءَ آئی ایس آئی، سی ٹی ڈی، ایف سی ءُ لس پوشاکی کارندہاں آ سھب ءِ سئے بج ءَ پد چہ وتی لوگ ءَ برتگ۔ محمد فیضان ھم یل کنگ بیتگ۔
ھمے وڑ ءَ شال ءِ دمگ کلی الماس بالی پٹ دگ ءَ ھبدہ سالی ئیں نودربر اسفند بلوچ ء دوست مھمد چار اگست دوھزار ءُ بیست ءُ شش ءِ سھب ءَ پاکستانی چیریں ادارہ، سی ٹی ڈی ءُ ایم آئی ءِ کارندھاں گون وت برتگ کہ چریشی ءَ پد آ بیگواہ انت-
ھمے وڑ چہ شال ءَ بیست ءُ ھپت سالی ئیں واجد ء مھمد انور دہ اگست دوھزار ءُ بیست ءُ چار ءَ آوار جنگ بیتگ کہ دو سال ءِ گوزگ ءَ پد ھم آئی ءِ بارو ءَ ھچ وڑین اھوال دیم ءَ نیتکگ انت-
ھمے وڑ چہ کراچی ءَ حاجی شاہ علی ٹاون شراپی ملیر ءَ دو مردم بیست ءُ شش سالی ئیں مزدور اسامہ ء صادق ءُ بیست ءُ پنچ سالی ئیں مزدور نیاز ء رشید یک اگست دوھزار ءُ بیست ءُ شش ءَ شپ ءِ ساھت کساس یک ءُ نیم ءَ رینجرز ےُ سی ٹی ڈی ءِ کارندھاں دزگیر کتگ ءُ برتگ انت-
ھمے وڑ ءَ ھمے دمگ ءَ دگہ یک مردمے شاھد ء عبدالحمید گمے شپ ءَ شنبے گوٹھ شراپی ملیر ءَ آوار جنگ بیتگ –
زانگ بہ بیت بلوچستان ءَ زورانسری آوار جنی ءِ سانمندیں کھول ترس ءُ پاتراپاں وتی مردمانی بیگواھی ءِ گپاں سالانی سال ھم پدر نہ کن انت چریشی ءَ چہ لھتے وئیل بازیں وھداں پد پدر بنت-