سوراب ءِ وئیل
ٹی بی پی شونگال
بلوچستان ءِ دمگ سوراب ءِ ھند گدر گوْندان ءَ 12 اگست ءِ سھب ءَ پاکستانی بمبگواریں بالیگانی بمبگواری ءِ آسر ءَ بازیں مردمے بیران ءَ زدگ بیتگ انت- ناسرجمیں دمگی اھوالانی رد ءَ بیران ءُ زدگ بیتگیں مردمانی کساس بیست ءُ ھپت گوشگ بوتگ – اے وئیل ءِ ھلاپ ءَ کھولاں لاشانی ھمراھی ءَ شال کراچی ءِ مزن شھدگ ءِ سر ءَ زھرشانی نندانک داتگ ءُ وتی زھرشانی یاداشت کنائینتگ- وئیل ءِ سر ءَ بلوچ راجدوست پاٹی ءُ انسانی ھکانی گلانی نیمگ ءَ ترندیں ایرجنی دیم ءَ اتکگ انت-
ڈی ایچ کیو سوراب ءِ میڈیکل سپرنٹنڈنٹ ءِ نیمگ ءَ شنگ بیتگیں سرجمیں درشان ءِ رد ءَ وئیل ءَ پد ھسپتال ءَ شش لاش آرگ بیتگ انت کہ آیانی تہ ءَ زالبول ءُ زھگ ھم ھوار انت – بیران بیتگیں مردمانی اُمر دو ءَ بہ گر داں 50 سال ءِ میان ءَ گوشگ بیتگ – ھسپتال انتزامیہ ءِ رد ءَ 16 زدگ بیتگیں آرگ بیتگ انت کہ آیانی تہ ءَ گیشتر زالبول ءُ زھگ ھوار انت یکے ءَ بہ گر داں 40 سال ءِ میان ءِ اُمری مردم انت- دومی نیمگ ءَ دمگی مردمانی گوشگ انت بازیں لاش پوج ءَ دستیگ کتگ ءُ گون وت برتگ انت چریشی ءِ آسر ءَ بازیں لاش ھسپتال ءَ آرگ نہ بیتگ انت چریشی ءَ آیانی کساس ءُ پجار زانگ نہ بیتگ انت – دمگی مردمانی رد ءَ وئیل ءَ پد بازیں مردم داں انگت ءَ بیگواہ انت، بلے داں انگت ءَ اے زانگ نہ بیتگ آ انگت ءَ دیوالانی چیر ءَ انت یا ترندیں تراک ءَ آیانی ھڈ ءُ جان گندگ نہ بنت-
سوراب وئیل اے اولی وئیل نہ انت – بلوچستان ءَ گوست ءَ ھم پاکستانی بمبگواریں بالیگ ءُ گن شپ ھیکی کاپٹرانی کاروائیاں لس آبادی سانمند ءُ شھری بیران بیتگ انت – بلوچستان ءَ میان اُستمانی میڈیا آجوئی ءَ اتک نہ کنت ءُ دمگی اھوالکار ھم ریاستی زور ءِ پد ءَ کار کت نہ کنت- اے داب ءَ پوجی کاروائی ءُ لس آبادی ءِ سانمند بیتگیں وئیلاں آجوئی ءِ دروشم ءَ رپورٹنگ کنگ نا سرجمی انت – پد ءَ ریاستی ادارہ ءُ پاکستانی میڈیا ءِ زور ءَ یک لس درشاندابے دیم ءَ کیت انت – بلے سانمند بیتگیں مھلوکانی راستی ءُ زمین ءِ راستی جتا جتائیں کس پیش کن انت-
سوراب ءِ وئیل ایوک ءَ نا ریاستی ردی یا یک پوجی آپریشنے ءِ بژنیگ ءِ آسر نہ انت – اے ھنچیں زورگیری ءِ نزام انت کہ یک دگہ ھونریچیں اکسے – چریشی ءَ دھکاں بلوچستان ءِ سیاسی واک، مڈی ءُ مھلوک ءِ توار وتی زور ءِ چیر دست کنگ ءِ جھد ءَ انت- اسلام آباد بلوچستان ءِ سر ءَ ھاکمی کنگ ءِ ٹاہ ءَ الم دنت بلے ایوک ءَ تاکت ءِ کارمردی ءَ ھاکمی ءِ شرپ یا سیاسی سنچ ودینگ نہ بیت – جنگی بالیگانی روک وٹی، لوگانی تباھی، شھریانی بیرانی، زورانسری بیگواھی ءُ ترس ءِ زور ءَ کجام ھم سرڈگار ءِ مھلوک ءَ وتی زیردستی ءَ کت کن ئے بلے آیانی توار ءِ پسھوا ھچبر ھلاس کت نہ کن ئے –