مجگی سِلکاری (کرپشن)
نبشتہ کار: اسلم آزاد
دی بلوچستان پوسٹ
ایردستیں چاگرد ءِ تہ ءَ مجگی aغلامی ءِ باز رنگ ءُ دْروشم ھست اَنت ءُ آئی ءِ یک رنگے مجگی سِلکاری اِنت بزانکہ مجگی ھساب ءَ بدپئیل بوگ اِنت۔ ایشی ءَ من اگاں گیشتر ارزان کنگ ءِ جھد ءَ بہ کناں، گڑا ایشی ءِ بزانت ھمیش بیت کہ مردم ءَ را ھچ لیکھی ءُ کِردانکی (ایتیکل) رھبند مہ بیت۔
وھدے کہ چاگرد ایردست کنگ بیت گڑا آئی ءِ کِردانکی ءُ انسانی رھبند ءُ ھَک پادمال کنگ بنت، چاگرد ءِ مردم گوں چاگردی رھبنداں بندوک اَنت۔ وھدے چاگرد ءِ رھبند لگتمال کنگ بنت گڑا اود ءِ مردم ھم کردانکی زوالی ءِ آماچ بنت گڑا آ انسان ھَک ءِ گپ کنگ ءِ بدل ءَ ھما کاراں کن اَنت کہ آیاں زاتی نپ بہ رس ایت ءُ ھمے زاتی نپ چاگرد ءِ مردماں دیم ءَ باز تاوان دے انت انچشکہ مرچی بلوچ چاگِرد ءَ دیگ ءَ اِنت۔ اے بدپئیلیں مردم ءِ جیڑہ نہ اِنت۔
دومی لبزانک ءِ تہ ءَ شما چو ھم گوشت کن ات کہ بد کِردانکیں مردم بے زمیر بنت۔ بے زمیریں مردم ءَ را شرّ ءُ ھراب ءِ پرک نیست، آئی ءِ کرّ ءَ ماں چاگرد ءَ بدیں کارانی کنگ ءِ پیسلہ کنگ ءِ واک ھست۔ اگاں کسے ءِ کرّ ءَ زمیر ھست، گڑا آئی ءَ گوں کِردانکی ءُ انسانی رھبنداں گون ھمگرنچ کنگ کپ ایت۔ رھبندانی سر ءَ اوشتگ باز ھمت لوٹ ایت، مجگی ھساب ءَ بے کاریں مردم بھادر بوت نہ کنت، آ وتی زاتی نپ ءُ سِت ءِ واستہ انسانی رھبندانی گوم ءَ کمپرومائز کن اَنت۔ بدپئیلیں مردم ءِ مجگی نادْراھی سِلکاری اِنت۔ نامنیادیں انسانی، چاگردی، راجی، سیاسی، علمی ءُ زانشتی یکمُشتی ءِ امیت ءِ دارگ ءَ بلوچ ءَ تاوان ءِ بدل ءَ دگہ ھچ نہ رس ایت۔
ایردستیں چاگرد ءِ سرجمیں پِِڑ گَھنتری ءِ آماچ بوگ ءَ اَنت انچوشکہ مالی پِڑ، سیاستی پِڑ، آمیدگسی پِڑ، نیکراھی پِڑ، ربیدگی پڑ، زبانی پِڑ، وانگی پِڑ، ساچِشتی پِڑ، پَٹ ءُ پولی پِڑ ءُ آدگہ پِڑ ھست اَنت پرچاکہ اے دْراہ بلوچ ءِ واستہ نہ اَنت بلکیں کبزہ گیری یے ءِ دارگ ءُ توانگر کنگ اِنت۔ بلے درستاں چہ گیشتر مجگی بدپئیلیں مردم ھمے ھمے وانندگیں تبک اِنت انچشکہ اے سی، ڈی سی، ڈی پی او ءُ آدگہ مردم اَنت۔ ایشاں نوآباتکاری نزام ءِ وانگ ونتگ، ایشانی گَھگیری ءِ سوچ ھلاس کنگ بوتگ ءُ سامراجی سوچ ایشانی تہ ءَ مان کنگ بوتگ۔ اے وتی ھر چیز ءَ سامراجی لیکہ ءِ بنیات ءَ چار اَنت ءُ مانا کن اَنت۔
میانی تبک ءِ مردمانی گیشتریں کار مجگی عمل اِنت چوشکہ وانگ، وانینگ، نبشتہ کنگ، ءُ ھلاج کنگ اِنت۔ ایردست ءِ میانی تبک ءِ مردمانی مستریں مجگی جیڑہ ایش انت کہ آ وتی مردماں مجگی ھساب ءَ نزّیکی نہ کن اَنت، وت ءَ را ھر وھد ءَ گوں زورگیر ءَ نزیکّی کن اَنت چاپولسی کن اَنت بلے زورگیر ایشانی سر ءَ ھچ بیسہ نہ کنت، ایشاں نہ منّ اَنت، اے ونندگیں تبک ھَندی مردم اَنت ءُ مدام سامراج ءِ دیم ءَ وت ءَ لونجان کن اَنت، بلے اے تبک ءِ مردمانی بے زانتی ھمش اِنت کہ آ چہ زورگیر ءَ اُمیت کن اَنت کہ زورگیر آیاناں وتی مردم بہ کن اَنت پرچاکہ ھمے مردمانی مجگی وابستگی ءُ زاتی نپ گوں زورگیر ءَ بندوک اَنت۔
اے تبک چاگرد ءِ تہ ءَ ھر ڈولیں سِلکاری کن اَنت کہ وت ءَ را چہ میانی تبک ءَ در بہ کن اَنت ءُ مستریں تبک (رولنگ کلاس) ءِ تہ ءَ بدل بہ کن اَنت۔ لس مھلوک ءَ باور کنائینگ ءِ جھد ءَ کن اَنت کہ ما ایلیٹ کلاس ءَ گوں بندوک ایں گڑا ھمے چیز ءَ سابت کنگ ءِ ھاتر ءَ دو نمبر گاڈی زور اَنت، آمیدگس ءَ دروگیں کیس جوڑ کن اَنت، نادْراجاھاں نیزگاراں دو نمبر دوا ءُ درمان دے اَنت، ” ٹوکن دیگ بنت بّلے توری آیاں گاڈی نیست“، ڈیوٹی نہ دے اَنت، زّر زور اَنت، پولیس ادارگانی تہ ءَ زر زور اَنت، مردم کُش انت، ءُ دروگیں سوگند وار اَنت۔ ،
وتساچیں پَٹ ءُ لوٹ، وتساچیں کیس، نکلی ڈگری، دو نمبریں دوا، ءُ سپارش اے درست گِر کِردانکی عمل ءِ بھر اَنت، بلے راجی ایردستی ءُ سبب ءَ اے درستیں نادْراھی بلوچ چاگرد ءِ تہ ءَ نارمل انَت۔ راستی ءَ اگاں بچار ئے گڑا ترا سما کپ ایت کہ اے درستیں سِلکاری نوآباتکار ءَ بلوچ چاگرد ءِ اندر ءَ پہ زانت مان کتگ اَنت، یاکہ بلوچ چاگرد ءِ سر ءَ زورمُشتگ اَنت، دانکہ لس مھلوک مجگی ھساب ءَ مھزور بہ بیت ءُ آیاں کبزہ گیر ءِ لُٹ ءُ پانچ ءُ سازیتگیں پندل گنِدگ ءَ میا اَنت۔ پرچاکہ کہ یک بدپئیلیں نزامے ءِ چلائینگ ءِ ھاتر ءَ ترا جوگاڈیں مردمے بوگ لوٹ ایت، دانکہ مردم مجگی ھساب ءَ سرجمی ءَ کرپٹ مہ بیت گڑا آ نوآباتکار ءِ پالیسیانی سر ءَ پلہ مرزی کُت نہ کنت، نوآباتکار ءَ بلوچ چاگرد ءِ تہ ءَ سِلکاری شینگ کنگ ءَ اِنت کہ مردم بدکِرد بوگ ءُ چاپلوسی کنگ ءَ وتی سر ءَ بُرز بہ کن اَنت۔
بلوچ چاگرد ءِ نام نیادیں وانندیں تبک چاگرد ءِ سرجمیں سیاسی، راجمانی، مالی، ریاستی، نوآباتکاری سِلکاریاں ءُ ناانساپیاں گنِد اَنت ءُ آیانی بنُکی سبباں ھم سرپد بنت بلے مجگی بے وس جوڑ بوتگ اَنت، ناانساپی ءِ ھلاپ ءَ توار چست نہ کن اَنت، نبشتہ نہ کن اَنت، زھرشانی روانک ءُ نندانکانی ھمراداری ءَ نہ کن اَنت کہ زورگیر چہ مارا دلگران بیت، مئے زاتی نپانی سر ءَ سان کپ ایت۔ اے مردم وتی زاتی سیادی ءُ مکسد ءَ ابید راج ءِ واستہ ترس ءِ چات ءَ کُود اَنت، ایشانی لیکہ ھمیش انت کہ سرجمیں راج ءُ چاگرد ءَ آس بہ لگیت جیڑھے نہ انت مارا بس آسراتی ءُ نام بہ رس ایت۔
اے کرپٹ ماپیا (میانی وانندگیں تبک) ھر ھما کار ءَ کنت کہ زورگیر ءَ گیش ءَ چہ گیش توانگر کنت، ایردستیں مردماں گیش ءَ چہ گیش نزور کنت۔ دومی گالانی تہ ءَ ما چون گُشت کن ایں کہ اے کرپٹ ماپیا زورگیر ءَ وتی کبزہ گیری ءِ نزام ءِ چلاائینگ ءِ ھاتر ءَ جوڑ کتُگ، ایشاں کمو لَب ءُ آسراتی ءُ سِلکاری کنگ ءِ موکل دیگ بیت دانکہ اے تبک نوآباتکار ءِ ھمگام بہ بیت ءُ آئی ءِ ردیں لیکہ ءَ دیم ءَ بہ بر اَنت۔ اے تبک ریاست ءِ چانوگر ءِ ھساب ءَ کار کنت۔
مجگی سِلکاری یک ناسوریں نادْراھی یے ءِ وڑ ءَ بلوچ چاگرد ءِ روتگاں روان اِنت، ءُ چاگرد ءِ کِردانی ءُ انسانی رھبنداں ولگوج کنگ ءَ اِنت۔ اے نادْراھی ءِ بنُکی سبب راجی ایردستی ءَ گوں بندوک اِنت دانکہ زورگیر بلوچ سرزمین ءِ سر ءَ کبزہ گیر اِنت اے نادْراھی روچ پہ روچ گیشتر ودان اِنت ءُ بلوچ چاگرد ءِ آیوکیں پدریچ ءَ یک مزنیں کِردانکی نیستی یے (بحرانے) ءِ تہ ءَ دور دنت ءُ آئی ءِ سان نسل در نسل تالان بنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستانپوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-
