TBP Balochi

بلوچستان ءِ جتا جتائیں جاہ کیچ ءُ مشکے ءَ پوج ءُ لیویز پورس ءِ سر ءَ سلاہ بندانی اُرش، سلاہ ءُ بنجل دستیگ –

کیچ ءِ ھند مند ءَ سلاہ بندیں مردماں پاکستانی پوج ءِ بنجل ءِ سر ءَ ٹوھیں کچے ءَ اُرش کتگ –

دمگی مردمانی رد ءَ سلاہ بندانی بازیں کچے ءَ مند ءِ ھند دریا چم ءَ پورسز ءِ بنجل ءِ سر ءَ اُرش کتگ ءُ بازیں کارندہ کشتگ انت ءُ ءُ بنجل دستیگ کتگ سلاہ ءُ دگہ ساز ءُ سامان برتگ انت-

گیش پورسز ءِ کمک ءَ آیوکیں کاروان ءِ سر ءَ سلاہ بنداں ھم اُرش کتگ-

ھمے وڑ سلاہ بندیں مردماں مشکے کلر، ریسٹ ھاؤس، ءُ گجر ءَ لیویز کارندھانی سر ءَ اُرش کتگ ءُ سلاہ پچگپتگ انت ءُ برتگ انت-

ھمے وڑ مشکے ءَ سلاہ بندیں مردماں یوپون ٹاورے ھم مانداشتگ ءُ پشت مانداتگ ءُ شتگ انت-

بلوچستان ءَ پورسز ءِ سر ءَ یکشلیں اُرشانی درچ برجاہ انت ءُ چِد ءُ پیش کلات ءَ سلاہ بندیں مردماں لیویز ءِ سر ءَ اُرش کتگ ءُ یک کارندھے کشتگ ءُ دو زدگ کتگ انت-

بیتگیں اُرشانی زمہ واری داں انگت ءَ کس ءَ پہ وت نہ زرتگ انت-

لیویز بنشون ءِ رد ءَ کلات ءِ دمگ توغو چھپری ءَ لیویز چوکی ءِ سر ءَ ناشناسیں مردماں اُرش کتگ-

اُرش ءَ یک لیویز کارندھے بیران ءُ دو سک زدگ بیتگ انت- زدگ بیتگین ڈی ایچ کیس ھسپتال کلات ءَ درمان کنگ ءَ پد شال ءَ برگ بیتگ انت-

وئیل ءَ پد لیویز ءِ پورس بازیں کچے ءَ سر بیتگ ءُ اُرشکارانی پٹ ءُ پول اش بندات کتگ-

سراوان ءَ سیمسر ءَ بیتگیں شوروانی تراک ءَ سَے مردم زدگ بیتگ اَنت-

زدگیں مردمانی توک ءَ یک چاردہ سالی ئیں ورنایے ھوار انت کہ آ ھم ھمے شوروانی زد ءَ اتکگ ءُ زدگ بیتگ –

زدگ بیتگین مردمانی پجار چاردہ سالی ئیں اسد اللہ زھروزئی پنام ءِ ھیر جان ء غلام جان، امام بخش بلوچزئی ءُ مولجان بلوچزئی ءِ ناماں زانگ بیتگ انت ھرسئیں مردم ھاکی بخش بمبپشت ءِ جھمنند انت-

اھوالانی رد ءَ ایشانی توک ءَ اسد اللہ ھمے ھند ءَ وتی پس ءُ دلوتاں چارینگ ءَ بیتگ کہ تراک ءِ زدگ ےَ اتکگ گوں-

ایشانی توک ءَ امام بخش ءُ مولجان سیمسر ءَ سپر کنگ ءَ بیتگ انت کہ آ ھم ھمے تراک ءِ زد ءَ اتکگ ءُ بیران بیتگ اَنت-

زانگ بہ بیت روکپتی بلوچستان ءَ وھد وھد ءِ سر ءَ چوشیں وئیل پیش آیگ ءَ انت کہ اود ءَ سیکورٹی پورسز ءِ نیمگ ءَ کل کتگیں شوروانی تراکانی زد ءَ مھلوک آیگ ءَ انت-

سال 2024 ءَ روکپتی بلوچستان ءَ 234 مردم ایرانی لشکر ءِ تیرگواری ءُ تراکانی زد ءَ اتکگ انت ءُ بیران ءُ زدگ بیتگ انت-

اے کچ ءُ کساساں 122 مردم بیران ءُ 114 مردم زدگ بیتگ انت – ایشانی توک ءَ 8 زالبول بیران ءُ 7 زدگ بیتگ انت – ایشانی توک ءَ 14 زھگ بیران ءُ 8 زدگ بیتگ انت کہ ایشانی توک ءَ 8 مردم اوگانی بیران بیتگ انت ءُ 16 زدگ بیتگ انت-

شمبے ءِ شپ ءَ شال ءِ دمگ سریاب ڈگری کالج ءِ نزیک ءَ پاکستانی پورسز ءِ چیک پوسٹ ءِ سر ءَ سلاہ بندیں مردماں اُرش کتگ- ھمے وھد ءَ شھر ءَ بازیں تراک ءُ تیرگواریانی توار اشکنگ بیتگ انت-

داں انگت ءَ واکداراں اے درگت ءَ دگہ گپ دیم ءَ نیاؤرتگ انت- ھمے ور پورسز ءَ بازیں کچے ءَ دمگ انگیر ءَ کتگ ءُ پٹ ءُ پول بندات کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ چاردہ فروری ءِ بیگاہ ءِ پنچ ءَ پنجگور ءِ دمگ پروم ءَ پولیس اسٹیشن ءُ نادرا کارگس سر ءَ اُرش کتگ، پٹ ءُ پول میان ءَ ھچ وڑیں سلاھاں شورو دزنہ کپتگ، بلے سرمچاراں تھانہ ڈیبل ءُ کُرسی پروشتگ اَنت، نادرا کارگس ءِ لیپ ٹاپ ءُ کیمرہ دستیگ کتگ ءُ کارگس مانداشتگ-

جارکش ءَ گْوشتگ کہ پروم ءَ دگہ ھندے ءَ گشت میان ءَ سرمچاراں یک لیویز کارمندے ءَ چہ Ak-47 ءِ دستیگ کتگ، بلے لیویز کارمند بلوچ بیگ ءَ سبب ءَ ھچ وڑیں تاوان نداتگ-

جارکش ءَ گْوشتگ کہ کلہ کور پروم ءَ ایف سی چوکی سر ءَ پٹ کتگیں پاکستانی پوج ءِ سرویلنس ءِ کیمرہ، نادُراھجاہ ءِ دیم ءَ پِٹ کتگیں پوج ءِ کارمرزی سرویلنس ءِ کیمرہ ءُ کھدہ ھکیم بازار ءَ پاکستانی پوج ءِ پِٹ کُتگیں سرویلنس ءِ کیمرہ نشانگ کتگ ءُ تباہ کتگ-

جارکش ءَ بلوچستان لبریشن فرنٹ اے سرجمیں کاروائیانی زمہ واری ءَ منّ اِیت، ءُ بلوچستان ءِ وتواجھی ءَ تاں پاکستانی پوج ءُ پوجی شوربندیانی سر ءَ مئے اُرش برجاہ بنت-

بلوچستان ءِ دمگ مستونگ ءَ ورنا ءِ زورانسری بیگواھی ءِ ھلاپ ءَ کھول ءَ زھرشانی نندانک دیان ءَ کراچی ءُ شال ءِ بنجاھی شھدگ بند کتگ-

اھوالانی رد ءَ پشمبے ءِ روچ ءَ مستونگ ءِ ھند میجر چوک ءِ نزیک ءَ بیگواہ کنگ بیتگیں عزیز آباد ءِ جھمنندیں ورنا کامران ء ھاجی میف اھمد مھمد شھی ءِ یل کنائینگ ءِ ھاتر ءَ کھول ءُ سیاداں ءُ مھلوک ءَ شال ءُ کراچی ءِ بنجاھی شھدگ نواب ھوٹل ءِ ھند ءَ زھرشانی نندانک داتگ ءُ نشتگ انت-

زانگ بہ بیت ورنا ءِ پت ءَ گوستگیں روچ ءَ تامربندے شنگ کنان ءَ دزبندی کتگ ءُ گوشتگ منی زھگ ءَ یل بہ کن ات ءُ اگاں یل نہ بیت گڑا دگ ءَ زھرشانی کن ایں ءُ بند کن ایں- یل نہ کنگ ءِ پژدر ءَ مروچی آیاں دگ بند کتگ ءُ نندانک ءَ نشتگ انت-

ھرنائی ءِ دمگ شاھرگ ٹاکری ءَ کول مائن ءِ مزورانی سر ءَ بیتگیں اُرش ءِ ھلاپ ءَ شاھرگ پھاٹک ءَ دگ بندین ھرتال برجاہ-

زھرشانی آل پارٹی ءِ نیمگ ءَ کنگ بوگ ءَ انت- ھرنائی داں شال ءِ دگ شاھرگ پھاٹک ءَ اڑانک دیگ ءُ سرجم ءَ بند کنگ بیتگ- وئیل ترندیں لبزاں گوں ایر جنگ بوگ ءَ انت- وئیل ءَ ھواریں ناشرکارانی دزگیری ءُ آیاں سزا دیگ ءِ لوٹ ءَ کنگ ءَ انت-

گوستگین روچ ءَ ھرنائی ءِ تھسیل شاھرگ ءَ یک گاڑی ءِ سر ءَ بیتگیں تراک ءَ یازدہ مردم بیران ءُ شش زدگ بیتگ ات اَنت-

ھرنائی لیویز ءِ رد ءَ نشانگ بیتگیں کارندھانی سیادی سوات ءَ ھوار ھیبرپکتوانو ءِ جتا جتائیں ھندان انت-

بلوچستان ءِ دمگ چہ پنجگور ءَ پاکستانی پوج ءَ دو مردم آوار جنگ. بیتگ اَنت وھدے کہ چہ بلیدہ ءَ یک مردمے آوار جنگ بیتگ-

گیشیں ھالانی رِد ءَ پنجگور ءِ دمگ پروم ءَ مروچی مگرب وھد ءَ پاکستانی پوج ءَ ھیدرآباد ھند سر ءَ بیڑبرتگ دو مردم آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار جمعہ ء عیسی ءُ نظام ء عرض محمد نام ءَ چہ بیتگ اَنت-

دمگی اِھولکار ءِ رِد ءَ پاکستانی پوج ءَ بیڑ وھد ءَ لوگاں ساڑی ئیں آ دگہ مردم لَٹ ءُ کُٹانی نشانگ کتگ اَنت وھدے کہ اے میان ءَ لوگانی تہ ءَ پروشت ءُ پروش ھم کتگ-

ھمے وڑ بلیدہ ءِ دمگ کور پُشت چاردہ فروری دوھزار بیست چار ءِ اِشاء ءِ وھد ءَ پاکستانی پوج ءُ ڈیتھ اسکواڈ کارمنداں عبدالخالق ءِ لوگانی سر ءَ بیڑبرتگ ءُ مردم تُرسینتگ اَنت ءُ ھمے میان ءَ یک ورنایے سید جان ء عبدالخالق زورانسری آوار جتگ ءُ ناشناسیں جاھے ءَ برتگ-

لسبیلہ پریس کلب ھب ءَ زورانسری بیگواھیں عادل بلوچ ءِ یل کنائینگ ھاتر ءَ کھول ءَ پریس کانفرنس کنان ءَ گْوشتگ کہ اگاں چل ءُ ھشت کلاکانی تہ ءَ عادل احمد یل کنگ نہ بیت گُڑا بُنجاھی آر سی ڈی دگ سر ءَ نندانک دے ایں تُرندیں زھرشانی کنگ بیت-

گیشیں ھالانی رِد ءَ زھری ھُزدار ءِ جھمنندیں ورنا عادل احمد بلوچ ء منیر احمد ءِ کھول ءَ ھب ءَ پریس کانفرنس کنان ءَ گْوشتگ کہ آ شش فروری 2025 ءَ ھب اٹک پمپ ءِ نزیک ءَ پاکستانی پوج ءَ چست کتگ ءُ بیگواہ کتگ انگت بیگواہ اِنت-

پریس کانفرنس ءَ عادل احمد بلوچ ءِ گْھار بی بی ریھانہ ءِ گوم ءَ ماہ زیب بلوچ ءُ بی ایس او ءِ گوستگیں چیئرمین عمران بلوچ ھم ساڑی بیتگ-

آیاں گْوشتگ کہ چل ھشت کلاکانہ تہ ءَ عادل احمد یل کنگ نہ بیت گُڑا بھوانی ءَ بُنجاھی آر سی ڈی شھدگ سر ءَ نندانک دے ایں تُرندیں زھرشانی کن ایں-