TBP Balochi

کلات انتزامیہ ءَ لک پاس ھند سر ءَ بلوچ نندانک ءَ راج ھواری ءَ چہ دارگ ھاتر ءَ منگچر ھند سر ءَ دگ بند کتگ-

گیشیں ھالانی رِد ءَ منگچر ءَ ذائقہ ھوٹل نزیک ءَ کلات انتزامیہ ءُ پوج ءَ دگ گاڑیانی روگ آیگ واستا بند کتگ- دمگ ءَ چہ اِھوالکار رِد ءَ مروچی پوج ءَ دگ بند کتگ ءُ کلات انتزامیہ ءَ گْوشگ ءَ اِنت کہ آیانی پرمان سر ءَ پابند کنگ بیتگ اَنت بلے سبب ءَ گوشگ ءَ نہ اِنت-

بلے انتزامیہ تھی مردمے ءَ چہ ھال سر بیتگ کہ انتزامیہ ءُ ادارھانی میان ءَ کارگسی اِھوال ءَ بلوچ نندانک ءَ ھمگرنچی ءَ دارگ ءِ گپ کتگ-

زانگ بہ بیت کہ بلوچ یکجھتی کمیٹی ءِ سروکانی یل کنائینگ ھاتر ءَ لک پاس ھند سر ءَ سردار اختر مینگل ءِ سروکی ءَ نندانک دیگ بیگ ءَ اِنت ءُ باندا شش اپریل ءَ شال نیمگ ءَ لانگ مارچ ءِ جار جتگ – آئی ءِ دارگ ھاتر ءَ لک پاس نیمگاں ھکومت ءَ نیمگ چہ کُنڈ جتگ-

بلوچستان ءِ سرکار ءِ جارکش شاھد رند ءَ سردار اختر مینگل ءِ برجاھیں دھرنا ءُ لکپاس ءَ شال ءِ نیمگ ءَ لانگ مارچ کنگ ءِ درگت ءَ درشان دیان ءَ گوشتگ گوستگین روچ ءَ بی این پی ءِ دھرنا ءَ بی وائی سی ءِ رھشون ڈاکٹر صبیحہ بلوچ ءِ درشان ءِ سر ءَ دردناک اِنت-

شاھد رند ءَ گوشتگ بی این پی الیکشن کمیشن ءِ رجسٹرڈ پاٹی ءِ درھرنا ءَ اے دابیں درشان دردیگ انت ھمے وڑ ءَ اختر مینگل ءِ نیمگ ءَ اُستانی سرکار ءُ سرفراز بگٹی ءِ بارو ءَ درشان ءِ پسو ءَ اُستانی سرکار واک ءَ دار ایت-

اُستانی سرکار ءِ جارکش شاھد رند ءَ گوشتگ اختر مینگل ءَ استان ءِ سرکار ءَ آفر کتگ آ شاھوانی اسٹیڈیم ءَ جلسہ کت کنت اِنت بلے آئی ءَ اے آفر ٹکر جتگ ءُ وتی سَے لوٹانی سر ءَ اوشتاتگ استانی سرکار ایشی ءَ تچک کنت اِنت کہ شال ءَ یک سد ءُ چل ءُ چار جتگ ءُ اگاں شال ءِ نیمگ ءَ آئی ءَ لانگ مارچ کنگ ءِ جھد کت گڑا سرکار گامگیج زیر ایت-

دومی نیمگ ءَ بلوچستان نیشنل پاٹی ءَ شال ءِ لانگ مارچ ءِ جار جتگ کہ آئی ءَ بلوچ یکجھتی کمیٹی ءِ پلامرزی گون انت-

سردار اختر مینگل ءَ گوشتگ کہ مردم من ءَ گوشگ ءَ انت کہ لانگ مارچ ءِ جار پرچا دیر ءَ جتگ من آیاں گوشگ لوٹاں کہ براھوئی کولے کہ ” پدین کر کن” سارت کنگ ءُ ورگی انت- ھنچو کہ تباھگ تیار کنگ ءُ ورگ بیت مارا ھم ھنچو کنگ لوٹ ایت –

اختر مینگل ءَ گوشتگ کہ بائدیں سرپراز بگٹی ءَ زالبولاناں سریگ سر ءَ داتین انت بندیگ مہ کُتین انت – بلے تو گُش ئے کہ من چہ پوجی تُکاں وتی دیم ءَ سیاہ کناں –

سردار اختر مینگل ءَ گوشتگ کہ خان محراب خان ءِ وھد ءَ مئے ھمسایگ تاکتور بوتگ انت انگریز ءَ آ زوت گپتگ انت بلے خان محراب خان ءَ وتی لشکر تیار کرتگ گڑا آ وزیر گزیراں مشورہ داتگ کہ انگریز ءِ لشکر باز انت ما جنگ کُت نہ کن ایں شرتر ھمیش ایں بلے انگریز ھاکمی کنت بلے خان محراب خان ءَ گوشتگ کہ من زاناں من گوں انگریز ءَ جنگ کُت نہ کناں بلے مردماں ھما دستار کہ منی سر ءَ بستگ گڑا اے من ءَ چہ ھمے لوٹ ءَ کنت کہ جنگ بہ کناں ءُ نمیران بہ باں –

سردار اختر مینگل ءَ گوشتگ کہ اگاں سرکار ءِ سرے ھوش شتگ ءُ ا ٹکر زور ایت گڑا آئی ءِ انکار کنائینگ ھم مئے پرز انت – لانت ءُ ملامت کن ایں چریشی ءَ ھم اگاں سرکار مٹ نہ بوت گڑا چلتن ءَ ھما دست لھتے ڈوک کپتگ –

اختر مینگل ءَ براھوئی ءَ تران کناں ترندیں لپز کارمرز کتگ ءُ گوشتگ کہ مارا یل دیگ بہ بیت ما شال ءَ ھم زھرشانی کن ایں اگاں شمارا گپ کنگی ایں گڑا اے پٹ ءَ بیا ات – مئے لوٹ یکینے کہ دزگیریں مردین ءُ جنین یل کنگ بہ بنت مارا ھچ نہ لوٹ ایت ـ شمئے سیٹ نہ لوٹ آں کہ اودا شما پارمی چیپک داشتگ – مئے گور ءَ مئے پجار، ننگ ءُ ناموس شرتر انت –

اختر مینگل ءَ گوشتگ کہ سرپراز پریشان انت چو میاں قوال ءِ جواب دیوکانی وڑ ءَ پشت ءَ آواز دنت – مارا شمئے سرکار نہ لوٹ ایت ھما سیٹ کہ شما دُز اِتگاں ا شمئے ھپت پُشت ءَ شمارا مراد بات انت –

آئی ءَ گوشتگ کہ پونشی لانگ مارچ بندات بیت باندا مستونگ ءَ سرپدی روانک ءِ کشگ بیت پرچاکہ چاگردی ترامجاہ بند انت بازیں مردمے ءَ لانگ مارچ ءِ درگت ءَ سرپدی نیست ھمے باروا جار جن ایں – بلے ڈسپلن المی ایں – آئی ءَ دلوتانی درور داتگ ءُ گوشتگ کہ چوش مہ بیت دلوتانی پیم ءَ ھر یکے پہ دیم رؤگ ءَ ایں –

اختر مینگل ءَ نندانک ءِ مردمانی گوم ءَ کول کتگ کہ آ زالبولانی سر ءِ سریگ ءُ کماشاناں دستار ءِ نگھپان بیت – کہ مردماں آئی ءِ پسو داتگ – پد ءَ اختر مینگل ءَ گوشتگ کہ سوت مئیگ بیت – شش اپریل ءِ سھب ءِ نُھ ءَ مئے لانگ مارچ دیم پہ شال ءَ جنز ایت –

بلوچستان ءَ ریاستی لٹ شاپی ءِ ھلاپ ءَ زھرشانیانی وھد ءَ دزگیر بیتگیں بلوچ یکجھتی کمیٹی ءِ سروک ڈاکٹر ماہ رنگ بلوچ ءِ یل دیگ ءِ ھاتر ءَ سرکاری گپ ءُ تران بے سوب بیتگ-

ماہ رنگ بلوچ ءِ گوھار ءِ رد ءَ مروچی شال ءَ ھدہ جیل ءَ ڈپٹی کمشنر شال ءِ سروکی ءَ یک سرکاری ٹولی ءَ ڈاکٹر ماہ رنگ بلوچ ءَ گوں گند ءُ نند ءُ آئی ءِ یل دیگ ءَ شرت اش ایر کتگ انت-

سرکاری ٹولی ءَ ستک داتگ کہ آئی ءِ ھلاپ ءَ تھری ایم پی او ءِ درچ ءِ بھتام واتر زیرگ بیت انت کہ ھما شرت کہ آ نبشتگیں چیزاں بہ من ایت-

1- ماہ رنگ بلوچ نبشتگ بہ کنت ءُ اے گپ ءَ ستک بہ کنت آ آئی ءِ زرمبشت بلوچ یکجھتی کمیٹی زھرشانیانی وھد ءَ دگاں بند نہ کنت اِنت ءُ مزن دگاں بند نہ کنت اِنت-

2- بلوچ یکجھتی کمیٹی ءِ سیاسی دھرنا ءُ مزنیں شھراں زھرشانیاں دزکش بیت اِنت-

ڈاکٹر ماہ رنگ بلوچ ءَ سرکار ءِ نیمگ ءَ پیش کتگیں شرت رد کتگ ءُ گپ تچک کتگ کہ دانگہ دراھیں دزگیر بیتگیں رھشون یکیں وھد ءَ یل نہ بنت اِنت آ وتی ایوک ءَ یل دیگ ءَ نہ من ایت –

ایشی ءِ سر ءَ سرکاری ٹولی ءَ گپ ءُ تران ءِ دیم ءَ نہ برگ ءِ پیسلہ کتگ-

زانگ بہ بیت گوستگیں بازیں روچاں سر بیتگیں اھولانی رد ءَ رد ءَ سرکار ماہ رنگ ءُ زھنی ءُ مازگی رنگ ءَ ترسینگ ءَ وتی مساماں منینگ ءِ جھد ءَ انت بلے داں انگت ءَ ماہ رنگ بلوچ ءُ دزگیری جاہ ءَ دراھیں مسام رد کتگ انت-

دومی نیمگ ءَ بلوچ یکجھتی کمیٹی ءُ بلوچستان نیشنل پاٹی ءِ سروکی ءَ ماہ رنگ بلوچ ءَ ھوار دراھیں دزگیر بیتگینانی یل دیگ ءِ ھاتر ءَ زھرشانیانی درچ برجاہ انت-

شال ءِ نزیل ءَ لکپاس ءَ سردار اختر مینگل ءِ سروکی ءَ دھرنا دیگ بیتگ ءُ شش اپریل ءَ شال ءَ لانگ مارچ کنگ ءِ جار پرینگ بیتگ-

سرجمیں بلوچستان ءَ ماہ رنگ بلوچ، بیبرگ زھری، بیبو بلوچ ءَ ھوار بازیں کچے ءَ رھشون بند ءُ قید انت-

عید ءِ روچ ےَ سرجمیں بلوچستان ءَ ھوار کراچی، لاھور، اسلام آباد ءَ ھزارانی کچ ءَ مھلوک ءَ زھرشانی کتگ ءُ دزگیر بیتگین مردمانی یل دیگ ءِ لوٹ کتگ انت-

سرکاری کریک ڈاؤن ءِ سبب ءَ بلوچستان ءِ بازیں جاھاں انٹرنیٹ سروس بند انت ءُ سیکورٹی بازیں کچے ءَ دارگ بیتگ انت دانکہ اے زھرشانیاں داشت کت بہ کن ایں –

بلوچ سیاسی پاٹیانی لوٹ انت کہ ماہ رنگ بلوچ ءَ ھوار دراھیں دزگیر بیتگیں رھشون ءُ باسک یل دیگ بہ بنت ءُ بلوچستان ءَ پوجی زوراکی بند کنگ بہ بنت-

کلات ءِ دمگ چہ کوھنگ ءَ سیادی داروکیں بیست ھشت سالی ئیں عبدالمالک ء محمد یوسف، کہ یازدہ اکتوبر دوھزار بیست چار چہ تربت ءَ پاکستانی پوج ءَ زورانسری آوار جتگ ءُ بیگواہ کتگ، آئی ءِ لاش گوستگیں شپ ءَ باغبانہ ءَ دزکپتگ- پوج نیمگ ءَ چہ ٹاہ دیگ بیتگ کہ مالک بلوچ پوج ءِ گوم ءَ میڑ ءَ جنگ بیتگ، چریشی ءَ پد آئی ءِ لاش باغبانہ ءَ چگل داتگ-

بلے کھول ءُ دمگ مردماں اے ٹاہ رد کتگ گْوشتگ کہ عبدالمالک یک زورانسری بیگواھیں مردمے بیتگ ءُ آ دروگیں میڑ ءَ کُشتگ-

عبدالمالک بلوچ ءِ میت آئی ءِ کھول دست ءَ داتگ، کہ آیاں کلات ءَ بنکی ھنکین ءَ کل ءُ کسارت کتگ-

زانگ بہ بیت کہ مالک بلوچ ءِ بیگواھی ءَ پد آئی کھول باز رند ءَ دگ بند کتگ زھرشانی نکش کنائینگ ءُ ھکومتی نمائندگاں چہ آئی ءِ یل کنائینگ لوٹ کتگ – وھدے کہ سے ءُ چار مارچ ءَ چہ کلات ءَ زورانسری بیگواہ کنگ بیتگیں کساس پنجاہ مردمانی واستا زھرشانی ءِ میان ءَ ھم عبدالمالک ءِ کھول گپ دیوانی ٹولی ءِ دیم ءَ آئی ءِ یل کنائینگ لوٹ کتگ، چریشی ءَ دمگی انتزامیہ ءَ پانزدہ روچ ءِ وھد لوٹ اِتگ-

کھول ءَ گْوشتگ کہ بازیں ماہ ءِ جُھد، اُمیت ءُ یکشل ءَ زھرشانی ءَ اَبید، آئی ءِ ودار یک لاشے ءِ دروشمے ءَ اَتکگ- اے تُرسناکیں وئیل ءَ دمگ ءَ گم زھری ءِ ودی بیتگ، ءُ کھول ءَ ھوار انسانی ھکانی ادارہ ءُ دمگ مردم ءَ اشی ءِ سر ءَ دلپدردی درشان اِتگ-

کھول ءَ گْوشتگ کہ گوستگیں شپ ءَ پوج ءَ آ لوٹائینتگ اَنت یک کاگدے سر ءَ دسھت کنائینتگ ءُ اے میان ءَ لاش ءَ جاٹ ءَ گور ءَ داتگ ءُ تُپنگ کش ءَ ایر کتگ اکس کش اِتگ-

بلوچ یکجھتی کمیٹی ءِ بُنجاھی راھشون ڈاکٹر صبیحہ بلوچ ءَ آدینگ ءِ روچ ءَ مستونگ لکپاس ءِ ھند سر ءَ بی این پی ءِ نندانک ءَ چہ تران کنان ءَ گْوشتگ کہ وھدے ما بلوچستان گوش ایں – مئے درستانی چمّاں یک رُژنائی یے گندگ کئیت، مئے دل گل بنت، اے ھما مھر اِنت کہ مارا درستاں یکجاہ کنت، اے ھما مھر اِنت کہ مردمانی سینگ ءَ بولان کنت ءُ توکلاں چلتن جوڑ کنت-

آئی ءَ گْوشتگ کہ مروچی ما کہ زندمان ءَ گوازینگ ءَ ایں اے زندمانے نہ اِنت کہ ھرچ جاہ ءَ مارا جُست کنگ بہ بیت کجا چہ آیگ ءَ ئے کجا چہ روگ ءَ ئے –

آیاں گْوشتگ کہ اے زندمانے نہ اِنت ما ھر روچ لاش چست بہ کن ایں- اے زندمانے نہ اِنت ھر روچ ما وتی بیگواھیں براتاں بہ شوھاز ایں، اے زندمانے نہ اِنت کہ ڈن ءَ چہ کسے بئیت جست بہ کنت تو کے ءِ، تئی پجّار چی اِنت، تئی دمگ کجام اِنت اد ءَ چی کنگ ءَ ئے-

آئی ءَ گْوشتگ کہ ما اے اُمیت ءَ اوشتاتگ اَنت کہ وتی سرجمیں راج ءَ پاد کن ایں ءُ وتی دُژمن ءَ اد ءَ تچگ ءَ ھم موہ ندے ایں-

آئی ءَ گْوشتگ کہ ما وتی دُژمن ءِ اے سرجمیں ھیالاں ھم اد ءَ کلّ کن ایں، اے کرپٹ، دُز، بے زمیر ءُ بے اکلاک، اشی ءِ داتگیں سرجمیں آدّتاں اد ءَ کلّ کن ایں-

ڈاکٹر صبیحہ بلوچ ءَ گْوشتگ کہ مئے سر ءَ پرز اِنت کہ وتی چکاں، مردماں شئور بدے ایں کہ آ وتی سرڈگار واستا، وتی راج واستا چست بہ بنت- مروچی زالبول شئوری دروشم ءَ اے جُھد ءِ بھر اَنت، آ سرپد اَنت کہ جنگ تئی سر ءَ کئیت، تئی لوگ ءَ سر بیت گُڑا آ نچار اِیت تو جنینے ءِ یا کہ مردین-

دیمتر ءَ گْوشتگ کہ ما اے اُمیت ءَ اوشتاتگیں کہ وتی سرجمیں راج ءَ پاد بہ کن ایں ءُ وتی دُژمن ءَ اد ءَ چہ تاچینگ ءَ موہ ھم ندے ایں-

آئی ءَ گْوشتگ ما زان ایں کہ اے راہ سک نگیگیں اِنت، ما زان ایں کہ ما اشکرانی تہ ءَ دست مان کتگ اشی ءَ مئے دست سُتک کنت، ما زان ایں کہ اے راہ ءَ چینچو دلسیاھی ھست بلے ما اے ھم زان ایں کہ آ منزل چتو شوک اِنت- ما ھم زان ایں کہ ھمے بلوچستان واستا ما جُھد کنگ ءَ ایں آ چینچو زبیا اِنت-

آئی ءَ گوشتگ کہ مارا جزباتی گوشتگ اِت ، ءُ گوشتگ اِنت کہ آیاں دُژمن ندیستگ بلے ما اد ءَ گوش ایں تو یکجاھی ءِ تاکت ندیستگ کہ وھدے یک مردمے وتی سرجمیں آسودگی، وتی زندمان، وتی شریں روچ ءَ راج ءَ واستا یل کنت در کئیت گڑا راج آئی ءَ را تھنا یل ندنت-

بلوچستان ءِ بازیں جاھانی ھواری ءَ شال ءَ انٹرنیٹ سروس داں انگت ءَ بند اِنت- چریشی ءِ سبب ءَ مھلوک ءَ بازیں جنجالانی دیمپانی انت-

گوستگیں ماہ ءَ بلوچ یکجھتی کمیٹی ءِ زھرشانیانی وھد ءَ شال ءَ بازیں روچاں انٹرنیٹ بند کنگ بیتگ ءُ نی بلوچستان نیشنل پاٹی ءِ لانگ مارچ ءَ پد ھم انٹرنیٹ سروس اڑانک برجاہ انت-

شال ءُ مستونگ ءَ یکم اپریل ءَ موبائل انٹرنیٹ بند انت بلے پی ٹی سی ایل ءُ لینڈ لائن انٹرنیٹ پچ انت سرکاری لیکھانی بنگپ ءِ رد ءَ انٹرنیٹ سروس ءِ بندش سیکورٹی ءِ ترس ءِ بنیاد ءَ کتگ بلے بی این پی ءِ رھشونانی گوشگ انت کہ اے گامگیج زھرشانی ءِ بے سوب کنگ ءِ جھدانی بھر انت-

انٹرنیٹ ءِ بندش ءِ سبب ءَ مھلوک ءَ بازیں رنگے ءَ مشکلانی دیمپانی انت گیشتر درملکانی مھلوک ءَ وتی کھولانی گون ءَ عید ءِ وھد ءَ رھوت کنگ ءَ ھم مشکلانی دیمپانی کنگ کپتگ-

بی این پی ءَ ماہ رنگ ءَ ھوار بلوچ یکجھتی کمیٹی ءِ باسکانی دزگیری ءِ ھلاپ ءَ 28 مارچ ءَ چہ وڈھ ءَ داں شال ءَ لانگ مارچ کنگ بندات کتگ بلے زھرشانی کنوک شال ءَ پترگ ءَ دارگ بیتگ انت ءُ بی این پی ءَ مستونگ ءَ لکپاس ٹنل ءِ نزیک ءَ زھرشانی نندانک داتگ کہ گوستگیں یک ھپتگے ءَ چہ برجاہ انت-

بی این پی ءِ سروک سردار اختر مینگل ءَ گوشتگ سرکار ءِ گپ ءُ تران بے سوب بیتگ چریشی ءَ شش اپریل ءَ دوبر شال ءِ نیمگ ءَ پیشگامی کنت اِنت-

آئی ءَ گوشتگ مستونگ ءَ مئے گپ ءَ گوشدارگ ءَ نہ اَنت نی شال ءَ رویں وتی توار ءَ دیمتر ءَ جنزین انت-

سرکار ءَ زھرشانی کنوک شال ءِ پترگ ءَ دارگ ءِ ھاتر ءَ مستونگ ءُ شال ءِ میان ءَ بازیں جاھاں کنٹینرز ءُ اڑانک بندات کتگ انت ءُ لکپاس ٹنل ءِ نزیک ءَ دگ ءِ سر ءَ گار جنگ بیتگ ءُ راہ بند کنگ بیتگ-

راھانی بندش ءِ سبب ءَ چہ بیست ءُ ھشت مارچ ءَ بہ گر داں انیگ ءَ مستونگ، کلات، سوراب، ھزدار، نوشکی، ھاران، چاگی، واشک، پنجگور، کیچ ءُ گوادر ءَ شال ءِ زمینی راہ سستگ انت-

دومی نیمگ ءَ چہ گوادر ءَ ھک دو تھریک ءُ جماعت اسلامی بلوچستان ءِ استانی سروک مولانا ھدایت الرھمان ءَ ھم ماہ رنگ بلوچ ءَ ھوار بلوچ زالبولانی دزگیری ءِ ھلاپ ءَ ھپت اپریل ءَ چہ گوادر شال ءَ لانگ مارچ ءِ جار جتگ –

اود ءَ جمھوری وتن پاٹی ءِ رھشون ءُ گوستگیں استانی اسمبلی ءِ باسک نوابزادہ گوھرام بگٹی سرکار ءَ بلوچ یکجھتی کمیٹی ءِ سر ءَ کریک ڈاؤن ءُ بلوچ زالبولانی دزگیری ءِ ھلاپ ءَ لانگ مارچ ءِ پژدر ءَ دزگیر کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ مئے سرمچاراں کیچ ءَ زورگریں پوج دو جتاجتائیں اُرشاں نشانگ کتگ ءُ سک جانی تاوان داتگ اَنت-

جارکش ءَ گْوشتگ سے اپریل ءِ سُھب ھشت ءُ نیم ءِ نزیک ءَ کیچ ءِ دمگ مند مھیر ءُ بلوچ آباد ءِ میانی ءَ زورگریں پاکستانی پوج ءِ پیادگ کارندھانی سر ءَ ھما وھد ءَ آئی ای ڈی بمبے ءَ گوں نشانگ کتگ اَنت وھدے آ دگ ءَ کلیئرنس. ءَ دلگوش بیتگ اَنت- اُرش ءِ نشانگ ءَ آیگ ءَ چہ پنچ کارندہ جاہ پہ جاھی مرتگ اَنت، وھدے کہ پیراملیٹری پوج 165 ونگ ءَ چہ ھمگرنچ نائیک ولی محمد کاکڑ ءَ ھوار دو کارندہ ٹپی بیتگ اَنت-

جارکش ءَ گْوشتگ اُرش ءَ پد پوج ءِ ھیلی کاپٹر ءُ ھپدہ گاڑیانی کاروان سر بیتگ ءُ مرتگیں ءُ ٹپی پوجی زرتگ ءُ تربت ھیڈکوارٹر نیمگ ءَ شتگ اَنت-

جارکش ءَ گْوشتگ دگہ یک اُرشے، سے اپریل ءِ شپ ھپت چل ءَ، مند ءِ دمگ سورو ءَ ایم آئی ءِ کارگس دستی بمب اُرش ءَ نشانگ کتگ، دستی بمب کارگس تہ ءَ کپتگ، چریشی ءِ آسر ءَ آیاں جانی ءُ مالی تاوان چست کنگ کپتگ-

جارکش ءَ گْوشتگ بلوچ سرمچار ھرچ جنگ سر ءَ دُژمن ءَ نشانگ کتگ آئی ءَ سک جانی ءُ مالی تاوان دیگ ءَ اِنت، چریشی ءِ سوب ءَ زورگریں پوج وتی پروشی چیر دیگ ءَ مرتگیں کارمندانی پجّار ءَ پدر کنگ ءَ تُرسگ ءَ اِنت دانکہ وتی پوج ءِ ھوسلہ برجاہ بدار اِیت-

جارکش ءَ گْوشتگ بی ایل ایف اے اُرشانی زمہ واریاں منّ اِیت ءُ بلوچستان ءِ وتواجھی ءَ تاں زورگریں پوج ءُ آئی کمکاراں نشانگ کنت-

بلوچستان ءِ دمگ چہ ڈیرہ بگٹی ءَ پاکستانی پوج ءَ یک مردمے آوار جتگ ءُ بیگواہ کتگ-

بیگواہ کنگ بیتگ مردم ءِ پجّار قدیر ء نور حسن بگٹی نام ءَ چہ بیتگ-

اِھوالکار رِد ءَ مروچی سھب ءَ پاکستانی پوج ءَ اے ورنا آوار جتگ ءُ بیگواہ کتگ-

بلوچ راج ءِ توار ڈاکٹر ماہ رنگ بلوچ

نبشتہ کار: شَکّل بلوچ

دی بلوچستان پوسٹ

اگاں ما بچاریں بلوچ راج ءِ جُنز یکشل ءَ یکیں داب ءَ جُنزان انت، کجام ھم دور بہ بیت بلے بلوچ راج وتی داتگیں رھشونانی پگر ءُ لیکہ ءِ سر ءَ یک ھساب ءَ ھما وڑ اوشتاتگ انت۔ بلوچ راجی جُنز ءِ تہ ءَ اِستان ءَ وتی جتائیں پندلاں گوں بلوچ راج ءِ توار ھاموش کنگ ءِ جُھد کُتگ۔انچوش کہ ما اے چیز ءَ درست مالوم ءُ سرپدیں کہ اِستان ءَ بی۔این۔ایم ءُ بی۔ایس۔او۔ آزات ءِ پلیٹ پام ولگوج کنگ ءِ ھاتر ءَ کریک ڈاؤن کُتگ اَت۔ ءُ مرچی بلوچ راج ءِ توار بی وائی سی ءِ دروشم ءَ ڈاکٹر ماہ رنگ بلوچ، بلوچ ءِ آواز جوڑ بوت بلے استان ءَ آئی ءَ را ھم زندان ءَ بندیگ کُت۔ مرچی بلوچستان ءِ ھر کُنڈ ءَ بلوچ راج بُست ءُ باھند انت ءُ اِستان ءَ را بیھار دیگ ءِ جُھد ءَ انت کہ مئے رھشون ڈاکٹر ماہ رنگ ءَ آجو کن اِت۔

اے رندی بلوچ راج ءِ ھر پُسگ اِستان ءِ پندلاں شر سرپد ءُ پوہ انت کہ پاکستان وتی سِلیں کاراں دگنیا ءِ دیم ءَ آشنا انت۔ بی وائی سی ھر بلوچ ءِ آواز اِنت، ءُ بلوچ راج ءِ رھشونی ءَ کنگ ءَ انت۔ اِستان ءَ بلوچ راج ءِ چُکچینی ءِ ھاتر ءَ سی ٹی ڈی جوڑ کُت ءُ زانگ بیت شھید بالاچ آمیدگس ءِ پیش بوگ ءَ ابید ھم آئی ءَ را بے دردی ءَ شھید کُت ءُ ھمے درگت ءَ شھید بالاچ ءِ ناھکیں کوش ءِ ھلاپ ءَ سرجمیں بلوچستان پاد آتک ءُ استان ءِ چیریں ،سلیں کارانی دگنیا ءِ دیم ءَ آرگ ءَ اِستان ءَ ڈاکٹر ماہ رنگ ءِ اے اَمل دوست نہ بوت، ایشی ءَ چہ اَبید بلوچ چُکچینی ءِ ھلاپ ءَ ماں یک راجی مُچّی یے اڈ دات ءُ اِستان ءَ بلوچ ءِ راجی مُچّی ءِ ولگوج کنگ ءِ ھاتر ءَ وڑ وڑیں رپک ءُ ھنر ساز اِت بلے اِستان اد ءَ ھم ناکام بوت، ایشی ءَ چہ ابید بی وائی سی ءَ دیم پہ اسلام آباد مارچ کُت اود ءَ ھم اِستان ءِ سلیں کارانی سھرا کنگ ءِ ھاتر ءَ اسلام آباد ءِ جھمنندیں مردم ھم سرپد ءُ پوہ بوت انت۔ بلے اِستان روچ مروچی بلوچ ءِ چُکچینی یکشل ءَ برجا داشتگ بلے بی وائی سی اِستان ءِ رپکانی پروشگ ءَ یک داب ءَ اِستان ءِ ھلاپ ءَ ڈالبندین ءَ یک دگہ مزنیں راجی مُچی یے اڈ دات۔ اد ءَ چہ زانگ بیت کہ اِستان بلوچ راجی جُنز ءَ ھمینچو لاچار کُتگ کہ مرچی ڈاکٹر ماہ رنگ گوں بی وائی سی ءِ باسک ماں زندان ءَ بندیگ کُتگ انت۔

ایشی ءَ چہ اَبید ھم بلوچ راج پہ ڈاکٹر ماہ رنگ ءِ آجو کنگ ءِ ھاتر ءَ پورائیں بلوچستان ءَ ھر کنڈ ءَ بلوچ راج اِستان ءِ سلیں کارانی بگیری ءَ روانک کَشگ ءَ انت۔ بلے ایشی ءِ تہ ءَ دگہ انچیں سیاسی جاورے جوڑ کُتگ کہ مھلوک اے چیز ءَ سرپد نہ انت کہ ما کَے سر ءَ بیسہ بدار اِیں، بی این پی اختر مینگل ءِ دروشم ءَ ”تحفظ ننگ ءُ ناموس“ ءِ نام ءَ وڈھ ءَ بگر داں شال ءَ روانک برجا انت، ءُ اے روانک تننگا شال ءَ سر نہ انت، بلے بلوچ راج ءِ رھشون اے چیز ءَ جیڑگ ءَ انت کہ اگاں اختر مینگل پہ بی وائی سی ءِ رھشونانی آجو کنائینگ ءِ ھاتر ءَ ھمراہ انت، اگاں ھمراہ انت گڑا۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-