TBP Balochi

واکدار نیمگ ءَ چہ شال لانگ مارچ ءِ دارگ ھاتر ءَ جتاجتائیں شھراں کارکنان آوار جنگ بیگ ءَ اَنت- بی این پی

سردار اختر مینگل ءِ سروکی ءَ بلوچستان نیشنل پارٹی لانگ مارچ شال لکپاس ٹنل نزیک ءَ نندانک دیگ ءَ اَنت، ھکومت ءَ اَڑان اوشتارینتگ لانگ مارچ شھر ءَ پُترگ داشتگ اَنت-

چہ وڈھ ءَ درتکگیں بی این پی مینگل ءِ لانگ مارچ شال ءَ پُترگ اَنت اود ءَ ھکومت ءَ بُنجاھی شھر ءَ پُترگ ءَ دارگ ءَ اَنت-

بی این پی ءِ رِد ءَ لانگ مارچ ءِ دارگ واستا انتزامیہ کاروائی برجاہ اَنت شال ءِ دمگ سونا خان ءَ زھرشانی کنگ ءَ بیست ءَ چہ گیش کارکنان دزگیری کتگ اَنت وھدے کہ سبی ءَ پولیس ءَ بی این پی دمگی سینئر نائب صدر گل الرحمن مری جنرل سیکریٹری ملک سلطان ، دھپال ماھی گیر ، سیکریٹری حمید اللہ بلوچ ، موسی خان ، یونٹ سیکریٹری شاہ محمد بانبھی ءُ دگہ دزگیر کتگ اَنت-

زانگ بہ بیت کہ ھکومت بلوچستان ءِ گپ دیوان بے سوبی ءَ پدب شال ءِ پُترگ ءَ جُھد ءَ سردار اختر مینگل دزگیری ءِ جار جتگ وھدے کہ بی این پی لانگ مارچ شال ءَ پُترگ ءَ چہ دارگ ھلاپ ءَ سرجمیں بلوچستان زھرشانی جار جتگ-

صوبائی ھکومت ءَ شال لانگ مارچ ءَ ھواریں مردمانی دارگ گوادر ءَ ھوار بازیں شھراں 144 جتگ وھدے کہ چہ شال ءَ رؤکیں دگ ھم پولیس ءَ بند کتگ اَنت-

سردار اختر مینگل ءِ سروکی ءَ بلوچستان نیشنل پاٹی ءِ لانگ مارچ شال ءَ روگ ءَ دارگ بیتگ ءُ بی این پی ءَ سرجمیں بلوچستان ءَ شٹرڈاؤن ءُ پھیہ جام ھرتال ءِ جار پرینتگ-

پاٹی ءِ باسک کڈن کنگ بیتگ انت کہ آ ھرکجا انت ھمود ءَ زھرشانی ءَ بندات بہ کن انت ءُ لکپاس ءَ دھرنا برجاہ بیت اِنت-

اختر مینگل ءِ رد ءَ لانگ مارچ ءِ دیم ءَ آڑانکانی سبب ءَ لکپاس ءَ دارگ بیتگ ءُ دھرنا برجاہ انت ءُ آئی ءَ گوشتگ مروچی سرجمیں بلوچستان ءَ پاٹی ءِ باسک دھرنا دیگ ءَ بندات کن انت ءُ دانکہ لانگ مارچ ءَ شال ءِ روگ ءَ اجازت نہ رس ایر لکپاس ءَ دَہ لگ ایت یا ماھے لگ ایت دھرنا برجاہ بیت انت-

آئی ءَ گوشتگ مئے کجام ھم باسکے ءَ تشے تاوان رس ات آئی ءِ زمہ وار ریاستی ادارہ ءُ استانی سرکار بیت انت ءُ پاٹی ءِ باسک کجام جاہ ءَ ھم مھتل ھمود ءَ دھرنا بہ دے انت ءُ مروچی سرجمیں بلوچستان ءَ شٹرڈاؤن ءُ پھیہ جام ھرتال بیت انت-

چہ پسنی ءَ ورنائیں ساھل ء گلاب ءِ لاش مروچی دزکپتگ، لاش پسنی وارڈ نمبر یک ءَ شاہ جان ھوٹل ءِ پشت ءَ درچکانی توک ءَ دزکپتگ-

اھوالانی رد ءَ اے ورنا گوستگیں روچاں بیگواہ بیتگ، لاش ءِ دزکپگ ءَ پد لاش، پسنی آر ایچ سی ھسپتال ءَ برگ بیتگ-

پسنی ءِ پولیس ءَ پٹ ءُ پول بندات کتگ کہ دانکہ اے سرپدی بہ بیت انت کہ اے ورنا ءِ مرگ چتور بیتگ-

کھول ءِ مردم پسنی پریس کلب ءِدیم ءَ زھرشانی کنگ ءَ انت ءُ جرمکارانی دزگیری ءِ لوٹ ءَ کنگ ءَ انت-

بلوچستان نیشنل پاٹی ءِ لکپاس ءِ جاورھالانی سر ءَ یک ترسی درشانے شنگ کنان ءَ گوشتگ سیکورٹی پورسز ءَ بی این پی ءِ سروک سردار اختر مینگل ءَ ھوار دھرناگاہ ءَ جاڑیگیں مردم انگیر کتگ انت-

بی این پی ءَ اے امل زوراکی گشتگ ءُ ھچ رنگ ءَ اوپار کنگ نہ بیت اِنت-

درشان ءَ گوشگ بیتگ بلوچ نیشنل پاٹی دراھیں مزن شھدگاں زھرشانی ءِ تک ءَ بند کنگ ءِ جارانک ءَ جنت اِنت ءُ پاٹی ءَ گشتگ اے گپ پیش ءَ تچک کنگ بیتگ ھرچ گامگیجے چِست کنگ بیت اِنت درستیں زمہ وار سرکار ءُ انتزامیہ ءِ سر ءَ بیت اِنت-

بی این پی ءَ گوشتگ اگاں تاکت ءِ کارمردی بیتگ گڑا ایشی ءِ درستیں آسری زمہ وار سرکار ءُ انتزامیہ ءِ سر ءَ لڈگ بیت اِنت-

نیشنل پارٹی ءِ راھشون ءُ بندیگیں بی وائی سی ءِ زالبولیں باسک بیبو بلوچ ءِ پت ماما غفار قمبرانی پاکستانی پوج ءَ آوار جتگ ءُ بیگواہ کتگ-

آئی ءِ چُک رِد ءَ منی پت غفار قمبرانی چہ شال ءَ آوار جتگ وھدے کہ منی گْھار بیبو بلوچ بندیگ اِنت- ما پاکستانی ھکومت اے گامگیج ءَ تُرندی ءَ ایر جن ایں-

زانگ بہ بیت اشی ءَ ساری پاکستانی پوج ءَ بی وائی سی ءِ راھشون ڈاکٹر صبیحہ بلوچ ءِ مات ھم چہ ھب چوکی ءَ آوار جتگ ءُ بیگواہ کتگ- آئی ءِ یل بیگ جنک وت ءَ دزگیر دیگ ءَ شرت داتگ-

کھول ءَ زھیر بلوچ ءِ زورانسری آوار جنی ءَ دہ سال سرجم بیگ ءَ سیمینار برجم دارگ جار-

پنجگور پریس کلب ءَ پریس کانفرنس کنان ءَ زھیر بلوچ ءِ کھول ءَ گْوشتگ کہ زورانسری آوار جنی یک درآئینی ءُ در کانونی کارے کہ ھکومتی ادارہ بید جواز ءَ شپانی پاساں لوگاں پُتر اَنت بلوچ دودماناں لگتمال کنان ءُ سرجمیں کھول گم ءَ رنجانی تہ ءَ دوچار اِنت پد ءَ آ کانون پروشان ءَ بازیں سالاں تاں مئے دوستناک ءَ بیگواہ کن اَنت کہ وت پاکستان ءِ آئین ءِ بدتریں ھلاپ ورزی اِنت-

زھیر بلوچ ءِ جنک ءَ اے درگت ءَ گوشتگ کہ منی پت سیزدہ اپریل دوھزار پانزدہ ریاستی ادارھاں ھب چوکی ءَ چہ زورانسری بیگواہ کتگ آئی ءِ زورانسری آوار جنی ءَ مروچی دہ سال ءِ یک دراجیں مدتے سرجم بیتگ ءُ مارا اے سرپدی نیست کہ آ کجا اِنت ءُ کجام جاور ھال ءَ اِنت-

آئی ءَ گْوشتگ کہ اے دھیں سالاں ما بستار کھول کہ کانونی گامگیج کتگ، ما ھب ءُ پنجگور ءَ زھرشانی نکش کنائینتگ، شال ءَ شتگ ایں ءُ وتی کیس نکش کنائینتگ، اسلام آباد ءَ تاں وتی پت ءِ زورانسری آوار جنی ءِ ھلاپ ءَ توار چست کتگ بلے دہ سال گوزگ ءَ اَبید منی پت ءِ ھچ وڑیں ھال نیست-

کھول ءَ گْوشتگ کہ ما اے دھیں سالاں وتی زندمان پہ زبزگ ءُ واری گوازینتگ کہ آئی ءِ درشان کنگ مئے گور ءَ تچکیں لبز نیست-

آئی ءَ گْوشتگ کہ زورانسری آوار جنی یک انچیں درانسانی ءُ دلسیاہ دیوکیں کارے کہ اشی ءَ تھنا یک انسانے بیگواہ نہ بیت بلکیں اشی ءِ ھمراھی ءَ آئی ءِ وشی، وتیگانی گوم ءَ گوازینتگ وھد ءُ زندمان ءِ وشی ھالاس بنت ءُ یک دراجیں ءُ نہ کٹوکیں گم ءُ دلسیاھی سیادی پش کپ اِیت-

آئی ءَ گْوشتگ کہ ریاست یا آئی ءِ ادارھاں گمان اِنت کہ اے اھساس نیست کہ اے درانسانی کار ءَ چہ چنت مردم آہ ءُ گم اشانی نام بیتگ اَنت-

کھول رِد ءَ مئے عید نو عید نہ اَنت اے وشیاں سریچیں روچ مئے واستا گیش گمانی سبب جوڑ بنت آ دگرانی وشیاں گند ایں ھمے مھسوس کن ایں کہ اے وشی مئے گوم ءَ بہ گوازنیت ایں بلے ھما لوگ ءِ چراگ ءِ چراگ کہ بند بہ بیت اود ءَ رُژنایے چتو بیت کنت؟ منی پت مئے وشیانی چراگ بیتگ ءُ مارا انچیں جاورے ءِ تہ ءَ دور داتگ کہ ما اے پیسلہ کت نہ کن ایں کہ ما زندگیں یا مرتگیں-

زھیر بلوچ ءِ جنکو ءَ گوشتگ کہ چوشکہ منی پت ءِ زورانسری آوار جنی ءَ سیزدہ اپریل دوھزار بیست پنچ ءَ دہ سال سرجم بیگ ءَ اِنت ما اشی ءِ سر ءَ پریس کانفرنسے ءَ چہ جار ءَ جن ایں کہ ما وتی پت ءِ زورانسری آوار جنی سر ءَ سیزدہ اپریل دوھزار بیست پنچ ءَ یک سیمینارے برجم دار ایں-

آئی ءَ گُڈی ءَ گوشتگ کہ سیمینار ءِ جاہ ءُ وھد ءِ جار ءَ ما آؤکیں روچاں کن ایں-

منی سیاسی لیکھانی سزا منی پت ءُ کھول ءَ دیگ بوگ ءَ انت – ڈاکٹر صبیحہ بلوچ

بلوچ نودربر رھشون ءُ بلوچ یکجھتی کمیٹی ءِ باسک ڈاکٹر صبیحہ بلوچ ءَ بھتام جنان ءَ منی پت میر بشیر اھمد ھب ءِ سپریڈنٹ پولیس آفس ءَ برگ بیتگ ءُ گوشگ بیتگ آئی ءِ یل دیگ ھما وھد ءَ بیت اِنت صبیحہ بلوچ دزگیری دنت اِنت-

چاگردی ترامجاھاں شنگ بیتگیں درشان ءَ صبیحہ بلوچ ءَ گوشتگ منی پت ءَ ھچ جرم نیست انت بلکین منی سیاسی لیکھانی پژدر ءَ چِست کنگ بیتگ اے کانون نہ انت بلکیں سیاسی بلیک میلنگ انت-

آئی ءَ گوشتگ منی پرکاریانی سبب ءَ منی کھول پیش ءَ ھم ترسینگ بیتگ وھدیکہ ترسینگ ءَ ھچ نہ بیتگ گڑا نشانگ کنگ بیتگ انت-

آئی ءَ گوشتگ بلے ریاست ایشی ءَ بے ھیال انت کہ نزریات لوگانی توک ءَ نہ بیت اِنت کہ بلکیں دلانی توک ءَ بیت انت جُکگ ءِ نام ءَ نہ زانت انت اے دابیں کاروائیاں ما بے توار نہ بہ ایں-

زانگ بہ بیت مروچی سھب ءَ بلوچستان سرکار ءِ جارکش ءَ ڈاکٹر صبیحہ بلوچ ءِ ھلاپ ءَ گمانی رنگ ءَ ریاست ءِ بگیر داریں درشانانی سر ءَ کاروائی کنگ ءِ جار جتگ –

پاکستانی پوج ءَ سَے بندیگیں مردم کشتگ انت-

چہ مشکے ءَ سر بیتگیں اھوالانی رد ءَ سَے لاش دزکپتگ انت کہ آ پوج ءَ دروگیں میڑ ءِ نام ءَ کشتگ ءُ چگل داتگ انت کہ آیانی پجار زھور ء ھزور، شاہ نواز ء جلال ءُ ھبیب ء عیدو ءِ ناماں زانگ بیتگ انت-

دمگی مردمانی رد ءَ زھور ءُ شاہ نواز گوستگیں شپ ءَ مشکے ءِ دمگ شردوھی ءَ پاکستانی پوج ءَ برتگ انت ءُ ھبیب بیست روچ پیش پاکستانی پوج ءَ آوار جتگ بیتگ-

مروچی آیانی ٹپ ءُ ٹوریں لاش دزکپتگ انت-

زانگ بہ بیت گوستگیں روچ ءَ ھم چہ ھزدار ءَ سَے مردمانی لاش دزکپتگ انت کہ پاکستانی پوج ءَ دیم پہ دیمی میڑ ءِ نام داتگ انت پد ءَ آیانی پجار بیگواھیں مردمانی ناماں زانگ بیتگ انت-

بلوچستان ءِ جتا جتائیں جاھاں داں انگت ءَ گوستگیں روچ ءَ ھشت مردمانی لاش دزکپتگ انت کہ میڑانی نام دیگ بیتگ انت بازینانی پجار نہ بیتگ انت-

بلوچ یکجھتی کمیٹی ءِ رھشون ڈاکٹر صبیحہ بلوچ ءَ گوشتگ ما پیش ءَ تچک کتگ ءُ انگت تچک کن ایں ما ھچ جیڑہ پیداگ نہ کن ایں ما بستار ءِ راج آجو، تچک ءُ پر ایمنیں زند ء گوازینگ ءِ واھشت ءَ داریں – ھما زندگی اچ ما ریاست ءَ پچ گپتگ ءُ جنگ لوٹ ایت ھروھد ءَ مئے ازت ءُ ننگ ءَ چیلینج کنت اِنت مارا چست کنت ءُ مئے لاشاں ویرانگاں دور دنت انت-

آئی ءَ گوشتگ مروچی کلات کوھنگ ءِ جھمنندیں بیست ءُ ھشت سالی ئیں عبدالمالک ء مھمد یوسف کہ یازدہ اکتوبر دوھزار ءُ بیست ءُ چار ءَ چہ تربت ءَ پاکستانی پوج ءَ چست کتگ ءُ یک دروگیں میڑھے ءَ شھید کنگ بیتگ-

آئی ءِ مسلہ بس ایش انت ھما زندگی مارا ریاست ءَ مشتگ ھما مارا کبول نہ انت- ریاست ءِ مشتگیں زندگی ایش انت کہ آ مارا جنت اِنت ءُ ما بے توار بہ بہ ایں چست بہ کنت ءُ ما بے توار بہ بہ ایں لٹ شاپی زنداناں بندیگ بہ کنت ءُ ما بے توار بہ بہ ایں وتی دوستگیں مردمانی واستا در پہ در بہ بہ ایں ما بے توار بہ ایں ھروھد ءَ مارا مرگ ءُ آوار جنی ءِ ساھگ ءَ بہ کنت ءُ ما بے توار بہ بہ ایں اے دابیں زند مارا کبول نہ انت-

آئی ءَ گیش گوشتگ اگاں ریاست سرپد بیت انت کہ مسلہ ماہ رنگ، صبیحہ، شاجی یا بیبگر انت گڑا ریاست رد سرپد بیت اِنت مسلہ ریاست وت انت پرچاکہ ریاستی ناشری، زلم ءُ زوراکی برجاہ انت – ما بہ بہ ایں یا مہ بہ ایں یکے وَ لازم بیت انت یکے نا یکے ءَ چست بوگی انت ھمے واستا مسلہ گوں مارا نہ انت ریاست ءَ انت ما درد، زلم ءُ زوراکی ءُ مرگ ءَ آجو بیگ ءُ وشھالیں زند گوازینگ لوٹ ایں –

بلوچستان ھکومت ءِ نیمگ ءَ سینیٹ ءِ پیسریگیں چیئرمین صادق سنجرانی، ڈپٹی اسپیکر بلوچستان اسمبلی راھیلہ درانی ءُ وزیر تعلیم ءَ ھواریں گچینی ٹولی ءَ مروچی سردار اختر مینگل ءَ گوں گپ تران کنگ ءِ واستا لکپاس ءَ دھرناگاہ ءَ اتکگ انت-

اے سیمی بر انت کہ سرکار ءِ نیمگ ءَ پہ گپ ءُ تران ءَ دیم دیگ بیت۔ ایشی ءَ چہ پیسر دو رند ءَ گپ ءُ تران بے سوب بوتگ ات، ایشی ءَ پد سردار اختر مینگل ءَ 6 اپریل ءَ دھرنا ءَ جنزینگ ءُ دیم پہ کوئٹہ ءَ زھرشانی مارچ ءِ جار جتگ ات۔

اھولانی رد ءَ سرکاری ڈل ءَ دھرنا ءِ بھر زوروکاں چہ پرامنیں گیواری ءِ لوٹ کتگ ءُ زھرشانی کنوکیں مردمانی لوٹانی سر ءَ سنگینیں گپ ءُ تران ءِ کوشست کتگ۔ بلے انگت ءَ گپ ءُ تران ءِ سوبمندی یا ناکامی ءِ بابت ءَ ھچ گشگ ءِ وھد ھلاس بوتگ۔

سردار اختر مینگل ءِ سروکی ءَ ڈاکٹر مھرنگ بلوچ ءُ اے دگہ دزگیریں مردمانی دزگیری ءِ ھلاپ ءَ بازیں روچاں مان لک پاس ءَ دھرنا کنگ ءَ انت ءُ آیانی یلہ کنگ ءِ لوٹ کنگ ءَ انت ۔ دھرنا ءِ بھر زوروکیں مردمانی گْوشگ اِنت کہ داں ایشانی لوٹ پیلو کنگ مہ بنت اے زھرشانی برجاہ مان ایت۔

بلوچستان ءِ سیاسی جاور اے وھد ءَ ناگیگیں موہ ءَ انت ءُ اگاں 6 اپریل ءَ کوئٹہ ءِ نیمگ ءَ روانک دیگ بہ بیت جاور انگت گیشتر نگیگ بوگ ءِ گمان انت۔

سیاسی زانتکارانی رد ءَ نوں سرجمیں دلگوش سردار اختر مینگل ءُ سرکاری ڈل ءِ اے ھاسیں گند ءُ نند ءِ نیمگ ءَ اِنت کہ آؤکیں سیاسی منظر نامہ ءِ رھبند ءِ زانگ ءَ بوت کنت۔