TBP Balochi

نمدی یے پہ گوستانک ءَ

نبشتہ کار: ھزاران رھیم داد

رجانکار: عدنان فقیر

دیدگیں استاد تالپور

دی بلوچستان پوسٹ

بابا جان تو پشپدانی پشپد وھد ءِ دنزانی تھ ءَ بیگواھی ءَ دیستگ ءُ تو سرپد ئے کہ وھد چہ (دروھاپے ) ءَ ابید ھچّے نہ اِنت، تو زان ئے کہ گوستانک گمانی روانی ءِ نام اِنت ءُ بس۔

بابا جان تو وتی واھگ ءِ کشارانی توم انچیں زمینے ءَ چَنڈ اِتگ اَنت کہ تو زان ئے اد ءَ اے توپان ءُ شرتگانی دیمپان بنت بلے تو چو کوہ ءَ مھکم بوتگ ئے۔

من پہ تو نبشتہ کَنگ ءَ آں بلے زانگ ءَ نیاں کہ چے پد ءَ اے وڑیں وھداں وَ گیشتر کہ آزمان ءَ گم ءِ جمبراں مانپوشتگ ، بے تواری ءِ آواز چہ تیرانی توار ءَ بُرزتِریں، انچو سما بیت کہ ساہ کشگ اوں مزنیں گناھے، تھنائیں گھگیری نبشتہ کَنگ اِنت کہ پش کپتگ ءُ بوت کنت اے اوں وھد زوالی یے یا پہ شَرتگاں تیلانکے ءُ تھاری ءَ کندیلے۔ جنگ ءَ را من گال ءِ پوشاک ءَ چوں گور ءَ بدیاں ھما پوشاک کہ آیاں داتگ کہ اے پہ مئے ھستی ءِ بیگواہ کَنگ ءَ زوراکیانی نہ تموکیں دِرچے۔

من اے بابت ءَ جیڑگ ءَ آں کہ ورنائی چوں گمانی بارے ءِ توک ءَ مٹ اِتگ کہ ما تھنا آئی ءَ کوپگ دے ایں ءُ کل کنیں ءُ کودکی ءَ زوراکی ءِ میان ءَ گوں آزاراں گْوازینیں۔ داں من نبشتہ کناں وتی درد ءِ سرچمگ ءَ گوں وتی لبزاں درگیجاں، وتی گیرانی زمانگ ءَ گالانی چادر ءَ پیڑا آں۔ وھدے کہ تیر مئے سینگ ءَ سُمب اَنت چے آیانی توار اوں ھمیش اِنت کہ سمی ءُ مھرنگ ءِ گِرّان کَنگ ءِ وھد ءَ زمین ءِ توار اَت۔ ھما راھشون کہ آیاں گوستانک ءِ گرانیں بار وتی کوپگاں زرتگ، ھما کہ آیاں آزمان ءِ شاھگانی دَرپے ءَ جاگہ داتگ، ھما کہ آیاں کرنانی موتک ءُ زاری آسے ءِ دروشم ءَ مٹّاتگ اَنت۔ مھرنگ ءُ سمی ھمیش اَنت کہ ایشاں بلوچ ءَ را سرپد کت کہ مارا مدامی موتک آرگی نہ اِنت،ھمک روچ پشومان بوھگی نہ اِنت۔ بیست ءُ یک مارچ ءَ سینزدہ سالی ئیں نعمت ءِ بدن پہ تیر سُمبگ بوت ءُ پد ءَ بے دزرسیں بیبگر چہ آئی ءِ لوگ ءَ لَٹ ءُ شاپ کنان ءَ زورانسری بیگواہ کَنگ بوت۔ بابا جان من ءَ بگش گوں کہ ما گوں اے زمانگ ءَ چوں سپر بکنیں کہ اود ءَ یک زھگے ءِ دل پہ استان ءِ ناھاریں گژن ءِ آس ءِ توسگ ءَ ءُ پہ بلوچ ءِ ھون ریچی ءَ کم اِنت۔ چونیں استانے بیت کہ آئی ءَ چہ لنگیں مردمے ءِ توار ءَ ترس اِیت۔

ءُ چہ کسانیں کمبر ءِ کسہ ءَ تورناک تریں شے کجام اِنت؟ کسانیں تپلے کہ زمانگے ءَ آئی ءَ وتی بیگواھیں پت چئیرمین زاھد جان ءِ اکس دست ءَ بوتگ ءُ نوں یازدہ سال ءَ پد ھما شومّیں مارچ ءِ ماہ ءَ آئی ءِ دست ءِ اکس مٹ بیت۔ اے بری آئی ءِ ناکو شاہ جان اِنت کہ ھما پیسری ھونی ئیں سگار ءَ وتی ارجان جت۔ یک انچیں استانے کہ آئی ءِ لوٹ ھمیش اِنت کہ بلوچ ءِ ھمک زھگ چہ وتی پت ءِ ساھگ ءَ گستا بہ بیت ۔بلوچ ءِ مردین پہ آیاں بس ھالی ئیں تاکے کہ کدی اوں درّگ ءُ دور دیگ بیت۔
من ءَ بگش گوں بابا جان کہ گوستانک کدی چہ وتی نگاھاں کپ اِیت اگاں نا اے زوراکی مئے ھڈّانی دُرشگ ءَ کدی اوں دم نہ بارت۔

بابا جان بلوچستان پد ءَ گُلام چوٹے ءَ اتکگ ءُ اوشتاتگ۔ گوستگیں دو دھک ئیں کہ آیاں مئے تیوگیں پدریچے بے توار کتگ ءُ موتک مئے ھستی ءِ مدامی ئیں بھرے جوڑ کتگ۔ ءُ مرچی پد ءَ ھما نوبت سر کشان اِنت۔ بلوچ یکجھتی کمیٹی ءِ سر ءَ کریک ڈاؤن، گرگ ءُ بند کَنگ، گھگیری ءَ را گُٹّو کنگ۔ ڈاکٹر مھرنگ ءَ را بے سریں بُھتاماں گوں زندانی کَنگ۔

سڑک پد ءَ چہ زھرشانی کنوکاں سر ریچ اَنت ءُ ھما گوستگیں اوگام آیانی توار دوبر بُرز اِنت ( تم ماروگے ھم نکلیں گے)

مئے دمک ءُ دراں ھمے توار ھما وھد ءَ اِش کت کہ نواب اکبر خان بگٹی شھید کنگ بوت۔ ھما وھد ءَ کہ اے استان ءَ وتی ھونی ئیں کریک ڈاؤن دوھزار ءُ نھ ءَ بندات کت۔ ھما وھد ءَ کہ کریمہ ءِ آواز ۔۔۔ مئے اھد ءِ مھکم تریں آواز زوراکیانی چیر ءَ آرگ ءُ بے توار کَنگ بوت۔ ما وتی تورشت گھگیری ءِ دروشم داشت اَنت ءُ مرچی اوں ما وت ءَ ھما دام ءِ تھ ءَ مارگ ءَ ایں ءُ پہ زیبائی ءَ جھد ءَ اِنت کہ انگت استان ءِ پنجگانیں۔

ھمے سبب اِنت کہ دیم گوں تو کتگ بابا جان _ نہ تھنا زانتکارے ءِ رنگ ءَ بلکیں گوستانک ءِ چم دیستیں بامردے ءِ دروشم ءَ۔ ابیدے تو دگہ کے اِنت کہ اے پرشت ءُ پروش ءُ نگیگیں جاورانی پد پشت کہ بلوچ ءِ مجگ ءَ نکش اَنت ایشاں شرتر زانت۔ وھدے کہ با سمائیں ءُ سوھوئیں مردم وتارا چار راہ ءِ سر ءَ مار اَنت گڑا آ تھنا وتی دیم ءَ گوں گوستانک ءَ کت کن اَنت ءُ چہ آئی ءَ پسوانی لوٹ ءَ کت کن اَنت۔ بلے مئے جاور دگرے پہ ما گوستانک کتابانی اندر ءَ ایر نہ اِنت بلکیں آ تئی کر ءُ کشاں سر سر جَنگ ءَ اِنت۔

تو دو ھزار ءُ شش ءُ دو ھزار ءُ نُھ ءِ آس دیستگ، تو دو ھزار ءُ چاردہ ءِ بے کبریں لاشانی سرون ءَ اوشتوک بوتگ ئے، تو دو ھزار ءُ بیست ءَ کریمہ ءِ کوش ءَ پد بوتگیں ھاموشی ءِ تھ ءَ زندگی کتگ۔

ءُ نوں کہ توار نوک اَنت، ھما مردمانی وارس کہ گوں بے دردی ءَ چہ ما پُلگ بوت اَنت، تھنا ھما زوراکی ءُ ھما بیرانی دیمپان بوھگ ءَ پہ، مھرنگ ءُ سمی ءِ توار کہ یک وھدے دمکانی زینت اَت نوں زندان آیانی باھوٹ اِنت، پہ ایشانی بیگواہ کَنگ ءَ آئی ءَ چنچو سال پکار بوت۔ بلوچ چہ دگہ توارے ءَ زبھر بوت۔ بلے ھون ریچی برجاہ اِنت ماتانی کُٹ ھالی اَنت۔ جنین جنوزام اَنت۔ پت ھچ جاگہ درا نہ بنت۔ چک پتانی پولگ ءَ، پت چکانی پولگ ءَ ءُ نوں مات جنکانی پولگ ءَ۔

من ءَ بگش گوں بابا جان ایشاں چہ پد نوں استان چے کَنگ لوٹگ ءَ اِنت، چے آ گوستگیں کسہ ءَ نوک کنت، اے تواراں بے توار کنت کہ آئی بلوچ ءِ گوستگیں سیاسی راھشوناں گوں انچو کت۔ زوراکی ءِ اےنوکیں دِرچ وت ءَ گوں چونیں آسرے کار اِیت؟ ءُ پد ءَ ھاس انچیں وھدے ءَ کہ بلوچ ءِ سلاہ بندیں جھد ھمیش اِنت نوکی مھکم تِر بوتگ۔ چے اے بوت کنت کہ اے زمین ءَ نشتگیں آ دگہ ایردستیں راج گوما ھمدست بہ باں؟ چے ما اے امیت ءَ نشت کنیں کہ نام نھادیں مھزبیں دنیا ایشی ءَ پیش کہ مئے کلیں مردم استان ءِ ھَشّ ءَ نہ دُرشتگاں پہ ما دستے شھار اِیت؟اگاں نا جنینانی بیگواھی اوں چو پیشی ئیں وڑ ءَ مئے ھمروچیگیں زند ءِ بھرے بیت؟

منی ترس ایش اِنت کہ استان نوں ورنائیں زالاں ترسینگ ءَ اِنت کہ آ وتی راھشونانی بیگواھی ءِ دیم ءَ مھکمی ءَ گوں اوشتاتگ اَنت، انچو سما بوھگ ءَ اِنت کہ استان زوراکی ءِ نوکیں دورے ءَ دور کَنگ ءَ اِنت،ھما بلوچ زالاں کلوہ دیگ ءَ اِنت کہ آ پد کنزگ نہ زان اَنت۔

نبا کن ئے، سر جھل بہ بیت۔ کے مئے ھمراہ بیت؟ من گوں امیتے ءَ پہ تو نبشتہ کَنگ ءَ آں، تئی پسوانی وداریگ آں۔ من ءَ بگش گوں بابا جان، چے ما مدامی ھمے ھیرّوپ ءِ تھ ءَ دنزانی دیمپان بئیں، مدامی بیگواہ، مدامی مئے جاھاں دِگر؟

ورنائیں بلوچ نبشتہ کار ءُ اھوالکار ھزاران رحیم داد بلوچے اَت؟ ءُ پد ءَ ھاس انچیں وھدے ءَ کہ بلوچ ءِ سلاہ بندیں جھد ھمیش اِنت نوکی مھکم تِر بوتگ۔ چے اے بوت کنت کہ اے زمین ءَ نشتگیں آ دگہ ایردستیں راج گوما ھمدست بہ باں؟ چے ما اے امیت ءَ نشت کنیں کہ نام نھادیں مھزبیں دنیا ایشی ءَ پیش کہ مئے کلیں مردم استان ءِ ھَشّ ءَ نہ دُرشتگاں پہ ما دستے شھار اِیت؟اگاں نا جنینانی بیگواھی اوں چو پیشی ئیں وڑ ءَ مئے ھمروچیگیں زند ءِ بھرے بیت؟

منی ترس ایش اِنت کہ استان نوں ورنائیں زالاں ترسینگ ءَ اِنت کہ آ وتی راھشونانی بیگواھی ءِ دیم ءَ مھکمی ءَ گوں اوشتاتگ اَنت، انچو سما بوھگ ءَ اِنت کہ استان زوراکی ءِ نوکیں دورے ءَ دور کَنگ ءَ اِنت،ھما بلوچ زالاں کلوہ دیگ ءَ اِنت کہ آ پد کنزگ نہ زان اَنت۔ نبا کن ئے۔ سر جھل بہ بیت۔ کے مئے ھمراہ بیت؟ من گوں امیتے ءَ پہ تو نبشتہ کَنگ ءَ آں، تئی پسوانی وداریگ آں۔ من ءَ بگش گوں بابا جان، چے ما مدامی ھمے ھیرّوپ ءِ تھ ءَ دنزانی دیمپان بئیں، مدامی بیگواہ، مدامی مئے جاھاں دِگر؟

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ دمگ چہ لیاری ءَ پاکستانی پوج ءَ یک مردمے آوار جتگ ءُ بیگواہ کتگ-

بیگواہ کنگ بیتگیں مردم ءِ پجار اختر ء اکبر ءِ نام ءَ زانگ بیتگ-

اے ورنا گوستگیں روچاں یازدہ اپریل ءِ سھب ءِ چار بج ءَ پاکستانی پوج ءَ لیاری ءِ دمگ چہ کلری سرگوات ءَ لوگ ءَ آوار جتگ ءُ برتگ کہ چریشی ءَ پ آ بیگواہ انت-

ریاستی ادارھانی زِد

ٹی بی پی شونگال

پاکستان ءِ مزن تاکتاں بلوچ یکجھتی کمیٹی ءِ زالبولیں زھشونانی یل دیگ ءِ بلوچستان نیشنل پاٹی( مینگل) ءِ زھرشانی ھمک وھدانی ڈول ءَ تاکت ءِ زور ءَ ھلاس کنگ ءِ پالیسی یکشل ءَ برجاہ داشتگ انت، ءُ ریاست ءِ ردیں پالیسیانی سزا مھلوک ءُ تاجراں سگگ کپگ ءَ انت- سرمایہ داری ءِ واستا پُر ایمنیں جاورانی ٹاہ دیوکیں سرکار، وتی ردیں پیسلاھانی زور ءَ دمگی تاجر کروڑانی کلدار ءِ تاوانانی دیمپان کتگ انت-

بلوچستان ءِ اڑوکی سرکار ءِ اگدوداراں پریس کانفرنس ءِ زور ءَ ریاستی زوراکی ءِ ھلاپ ءَ بلوچ یکجھتی کمیٹی ءِ پرایمنیں مھلوک ءِ گھگیری زرمبشت ءَ ناشری ءَ ھوار کنگ ءَ یکشلیں جھد ءَ انت، چریشی ءَ آئی ءِ گیر سنجیدگی پدر انت – سرکار ءِ بے اگلیں گامگیجانی سبب ءَ بلوچستان ءِ دو مزن تریں شھدگ چہ پانزدہ روچاں بند انت، ءُ گچینی راھانی سر ءَ کنٹینرز ایر کنگ ءُ گار جنگ بیتگ انت ءُ مھلوک ءِ دراھیں روگ ءُ آیگی راہ بند کتگ انت-

بلوچ راجدوستیں پاٹی یکشل ءَ ریاست ءَ ھبردار کنگ ءَ انت کہ پُر ایمنیں زرمبشت ءَ تاکت ءِ زور ءَ پروش دیگ ممکن نہ انت – ریاستی زوراکی ءِ ھلاپ ءَ چِست بیتگیں زرمبشت ءَ گیش زوراکی ءَ پروش دات نہ کن ئے- ریاست ءِ ردیں پالیسیانی ھلاپ ءَ سرجمیں بلوچستان ءَ شٹرڈاؤن ھڑتال، روانک ءُ زھرشانی اے گپ ءِ منانک انت کہ بلوچ رھشونانی بندیگ کنگ ءَ ابید ھم مھلوک ءِ گھگیری زرمبشت برجاہ انت-

ڈاکٹر ماہ رنگ، بیبو بلوچ، بیبرگ بلوچ ءُ سبگت اللہ شاجی ءَ ھوار سدانی کچ ءَ سیاسی باسکانی دزگیری ءِ ھلاپ ءَ مستونگ ءَ سردار اختر مینگل ءِ زھرشانی نندانک چہ پانزدہ روچاں برجاہ انت، بلے ریاستی ادارہ بلوچستان ءِ ناگیگ بیوکیں جاورانی شر کنگ ءَ ابید سیاسی باسکانی دزگیری ءَ لوگانی سر ءَ بیڑ برگ ءَ انت – گلزادی بلوچ ءِ دزگیری ءَ پد لٹ ءُ کٹانی نشانگ – پاکستان ءِ آمیدگسانی انساپ ءِ رھبندانی ناسرجمی ءُ ریاستی زِد ءَ بلوچستان ءِ ھستیں جاوراں گیش ھراب کنگ ءِ سبب بوگ ءَ انت-

بلوچ یکجھتی کمیٹی ءَ یک جارانکے ءَ گوشتگ بنجاھی سروکانی دزگیری ءُ گل ءِ سر ءَ ریاست ءِ کریک ڈاؤن داں انگت ءَ برجاہ انت-

آئی ءَ گوشتگ بی وائی سی ءِ سروک ءُ باسکانی وتی رھبندانی لیکہ، زانشت ءُ راجی مول ءُ مراد ءَ اوشتوک انے – گوستگیں بیست روچاں بلوچ راج زھرشانی کنگ ءَ انت-

آئی ءَ گوشتگ اے مشکل ءُ ناگیگیں جاوراں بلوچ راج ءِ اتھاد ءُ یکجاھی ءَ یل بے مٹیں کردے پیلو کتگ کہ ریاستی زُلمانی ھلاپ ءَ گھگیری برجاہ داشتگ-

آئی ءَ گوشتگ بنجاھی سروکانی ھلاپ ءَ 13 اپریل یکشمبے ءِ روچ ءَ سرجمیں بلوچستان ءَ زھرشانی ءُ نندانک برجاہ کنگ بنت اِنت- دراھیں ھنکین اے درگت ءَ وتی چن ءُ لانچ ءَ بہ کن انت ءُ جوانیں رنگے ءَ اے کار ءَ برجم بہ دار اَنت-

بلوچ یکجھتی کمیٹی ریاست پاکستان ءَ تچک کنت اِنت کہ ریاستی سلکاری ءُ رستریاں بی وائی سی ءِ زانشتی سروک ءُ باسکاں زیر دست کت نہ کنت ما اے زوراکی ءِ دیمپانی ءَ راج ءِ ھواری ءَ کن ایں ءُ مارا دل ءُ ستک اوست انت ما اے زوراکی ءِ رھبند ءَ راجی زور ءِ ھواری ءَ پروش دے ایں-

20 میان اُستمانی گَلاں، گریٹا تھنبرگ ءُ برتانیہ ءِ باسک پارلیمنٹ جان میکڈونل ءِ یکجاھی لوٹ: بلوچ چُکچینی بند بہ بیت، دزگیر کُتگیں رھشوناں آجو کنگ بہ بنت۔

بلوچ یکجھتی کمیٹی ءِ رھدربر سبیہ بلوچ ءَ چاگردی رسانکدر ءَ یک لس میان اُستمانی ءِ سر ءَ وتی اگاھی دیم داتگ، آئی ءِ گُشگ اِنت پورائیں دنیا ءَ 20 گلاں ءُ آیانی گون ءَ ھمراھیں نامداری چاگردی باسک گریٹا تھنبرگ ءُ برتانیہ ءِ باسک پارلیمنٹ جان میکڈونل ءَ یک مُچانکی کلوہ ءِ سر ءَ دزنبشت کتگ انت، کہ میان اُستمان ءِ مزن کمشنر ءِ انسانی ھکّاں، وولکر تُرک ءَ دیم دیگ بوت۔

اے کلوہ ءِ تہ ءَ چہ میان اُستمان ءَ لوٹ کُتگ کہ آ پاکستان ءَ را بلوچ راج ءِ ھلاپ ءَ برجا بوتگیں اِستانی زُلم ءُ زوراکی ءُ انسانی ھکّانی سر ءَ ترندیں ھلاپ ورزی ءِ سر ءَ وتی کُتگیں کارانی بابت ءَ وتی پسو ءَ بدنت ءُ بلوچ یکجھتی کمیٹی ءِ دزگیر کُتگیں سیاسی کیڈراں زوتاں چہ زوت یل کنائینگ ءَ وتی کرد ءَ پیلو بکنت۔

کلوہ ءِ تہ ءَ چِست کُتگیں لھتے لوٹ ءُ گُزر:

کلوہ ءِ تہ ءَ 21 مارچ ءَ شال ءَ یک پرایمنی نندانک ءِ سر ءَ پاکستانی پھازوکیں لشکر ءِ زوراکی ءِ بابت ءَ گھگیری کُتگ اَت، چمیشی ءَ کم چہ کم سے مردم، چمیشانی تہ یک کسانیں گونڈویے ھم ھوار بوتگ، شھید ءُ بازیں مھلوکے ٹَپی بوتگ۔

زھرشانی کنوک زورانسری بیگواہ بوتگیں مردمانی یل کنگ ءِ ھاتر ءَ لوٹ کُتگ اَت، بلے آیانی سر ءَ لٹ شاپی، ارسی گیس ءُ دزگیرانی وسیلہ پسو داتگ۔

کلوہ ءِ تہ گْوشگ بوتگ اَت کہ ھمے دزگیر بوتگینانی تہ ءَ ڈاکٹر ماہ رنگ بلوچ ھم ھوار انت،،کہ آ زورانسری بیگواھانی ءُ بلوچ راج ءِ ھلاپ، ریاستی زُلم ءُ زوراکیانی ھلاپ ءَ یک مھکمیں آوازے، آئی ءِ دراھ سلامتی چہ زندان ءَ در انسانی بوتگیں زوراکی، ھرابیں وردن ءُ دراھجانی آسراتیانی نہ بوگ ءِ سبب ءَ آئی ءِ زند گوں تیزی ءَ ھراب بوگ ءَ انت۔

چار ءُ دلگوشی ءِ چم گندی آئی ءِ سیل ءَ ڈن ءُ جان شودی ءِ نزیک ءَ لگائینتگ انت اِش کہ آئی ءِ زاتی زند ءِ ھلاپ ورزی ءَ رؤت، آئی ءِ زندانی جاہ چیریں ادارھانی دزمھار ءَ اِنت ءُ آئی ءِ کھول ءِ مِلّگ ءِ موکل دیگ نہ بنت کہ چہ ھمے اَملانی رِد ءَ آئی ءِ زند ءِ سر ءَ ھترہ بوت کنت۔

کلوہ ءِ تہ ءَ سمی دین بلوچ ءِ کراچی ءَ دزگیری، ءُ زورانسری، لٹ شاپی ءِ بابت ءَ ھم نبشت، آئی ءِ پُشدر ءَ دروگیں بُھتام ءِ رِد ءَ دو بر ءَ دزگیر کُتگ بوتگ ءُرند ءَ آئی ءَ را یک کرّا ءَ یل دیگ بوتگ۔ کلوہ ءِ رِد ءَ اے ساھت ءَ بازیں مردم دزگیر ءُ بیگواہ کنگ بوتگ انت۔

بلوچستان ءَ اِستانی زوراکی ءُ میان اُستمان ءِ ھاموشی۔

کلوہ ءِ تہ ءَ گُشگ بوتگ اَت کہ سرجمیں بلوچستان ءَ مھلوک ریاست ءِ زُلم ءُ زوراکیاں اَبید ھم یکشل ءَ دگانی سر ءَ اوشتاتگ انت، ءُ وتی لوٹانی ھاتر ءَ پُشت کِنزی ءَ مہ کن کن انت، بلے پاکستانی ریاست میان اُستمانی تاگتانی ھاموشی ءِ ھمراھی ءَ چہ ھم آ گیش زُلم ءُ زوراکیانی، دزگیریاں دیگ ءَ انت کہ بس تھنا زھرشان کنوکانی سر ءَ انا بلکیں انسان شرپ ءُ بُنکی ھکّانی سر ءَ اُرش انت۔

اے ھم تچک کنگ بوتگ کہ شال ءِ اُرش تھنا جاور نہ انت بلکیں بلوچ راج ءِ ھلاپ چنکیاس سالاں برجا بوتگیں ریاستی زوراکیانی پندل ءِ بَھر انت
1948 ءَ بلوچستان ءِ زورانسری کبزہ ءَ پد ریاست ءَ کبزہ، لشکر کشی ءُ چُکچینی ءِ رِپک داشتگ ئِے چمیشی ءِ رد ءَ ھزارانی کچ ءَ زورانسری بیگواھیانی، آمیدگسی کُشکا ءُ زورانسری گار ءُ بیگواھیانی کاگد ءِ درگت ءَ سابت بوتگ۔

ریاستی لشکر کشی، باھند رپک ءُ ھنر ءِ تہ ءَ بمب ءُ ٹوپ، مالی بند ءُ بوج، ءُ بُنکی ھکّانی یکجاھی ھلاپ ورزی ءَ ھوار انت۔

ابرمی گواجن ءِ ریاستی ءُ در ملکی کش ءُ بر ءَ بلوچ راج ءَ گوں ترندی ءَ نیزگاری ءُ جھندم ءِ آچ ءِ سر ءَ دور داتگ اندری نوآبادیاتی نزام ءُ بے ردی کُشکا ءِ بلوچستان ءَ چہ دنیا ءِ گیش لشکر کشی ءُ نزوریں جاگھانی تہ بدل کُتگ انت۔

میان اُستمانی لوٹ:

کلوہ ءِ گڈسر ءَ دزنبشت کُتگیں مردماں بلوچ راج ءُ بلوچ یکجھتی کمیٹی ءِ گون ءَ سرجم ءَ مُچانکی ءِ درشان کُت ءُ وتی لوٹ دیم ءَ ایر کُت انت

ڈاکٹر ماہ رنگ بلوچ، بیبوں بلوچ، سبغت اللہ بلوچ، گلزادی بلوچ، بیبگر بلوچ، ءُ دگہ درستیں دزگیر کُتگیں باسکانی یل کنگ۔ زورانسری گار ءُ بیگواھانی ءُ اِستانی زُلم ءُ زوراکی ءِ ھلاسی۔ پاکستانی لشکر ءِ چہ بلوچستان ءَ سرجم ءَ در کنائینگ ءِ لوٹ ھوار انت۔

بلوچستان ءِ دو جتاجتائیں دمگ چہ ڈیرہ بگٹی ءُ گوادر ءَ پاکستانی پوج ءِ دست ءَ دو کسان سالی ئیں ورنا آوار جنگ بیتگ ءُ وھدے یکے ورنایے آجو بیتگ-

گیشیں ھالانی رِد ءَ مروچی ڈیرہ بگٹی ءِ دمگ چہ سوئی ءَ یک ھوٹلے ءَ سیزدہ سالی ئیں محمد حیات ء تولا بگٹی ءُ سیوا ء ناڑی بگٹی پاکستانی چیریں ادارھانی ادارہ ءُ ” ڈیتھ اسکواڈ ” ءِ باسکاں آوار جتگ اَنت چریشی ءَ پد دوئیں بیگواہ بیتگ اَنت-

ھمے وڑ چہ گوادر ءَ بیست ءُ سے مارچ دوھزار ءُ بیست ءُ پنچ ءَ آوار جنگ بیتگیں بلوچی زبان ءِ ورنائیں شائر نبیل نود ھم آجو بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ مئے سرمچاراں تربت، جعفر آباد ءُ پنجگور ءَ سَے جتا جتائیں اُرشاں پاکستانی پوج ءِ آلہ کار، زیلی پورسز ءُ مڈی بروک نشانگ کتگ انت-

آئی ءَ بلوچ لبریشن آرمی ءَ گوشتگ سرمچاراں گوستگیں شپ ءَ جعفر آباد ءِ دمگ ڈیرہ اللہ یار ءَ میر حسن پولیس چیک پوسٹ ءَ دزبمب اُرشے ءِ نشانگ کتگ کہ چریشی ءَ سَے کارندہ زدگ بیتگ انت-

جارکش ءَ گوشتگ یک دگہ کاروائی یے بی ایل اے ءِ سرمچاراں پنجگور ءِ دمگ پروم ءَ زورگریں پاکستانی پوج ءِ واستا مڈی بروکیں یک گاڑی یے اُرشے ءِ نشانگ کتگ – سرمچاراں ٹرک گاڑی ءِ ٹائر تیرگواری کتگ ءُ ناکارہ کتگ انت، ڈرائیور سرپد کتگ ءُ یل کتگ انت-

آئی ءَ گوشت بلوچ لبریشن آرمی ءِ سرمچاراں پشمبے ءِ شپ ءَ تربت ءِ دمگ کلاتک ءَ فضل ء ابراھیم جھمنند گیبن ءَ سلاہ بندیں اُرشے ءَ کشتگ- فضل زورگریں پاکستانی پوج ءِ جوڑ کرتگیں وتگڑیں ڈیتھ اسکواڈ ءِ گچینی کارندھے بیتگ، کہ راشد پٹھان ءِ سروکی ءَ کار ءَ بیتگ-

جارکش ءَ گوشتگ فضل ابراھیم 2011 ءَ پاکستانی پوج ءِ واستا چاریگری ءِ کار ءَ کتگ، چریشی ءَ 2011 ءَ کیچ ءِ دمگ ناصر آباد ءَ ڈکیتی ءِ وھد ءَ مساپر برین گاڑیانی سر ءَ تیرگواری کتگ ءُ زالبول ءُ زھگانی کُشت ءُ کوش کتگ- ایشی ءَ ابید آ گیبن ءَ پوجی زوراکیاں تچک ءَ ھوار بیتگ کہ چریشی ءَ 12 بلوچ کشتگ انت-

آئی ءَ گوشتگ آلہ کار فضل ءَ 2013 ءَ کیچ کلاتک ءَ گریبیں مستری ءِ آوار جنی ءَ زورگریں پوج ءِ دست ءَ داتگ، شش ماہ ءَ پد آئی ءِ لاش دزکپتگ، ھمے وڑ 2012 ءال تیرگواری یے کتگ ءُ یک دگہ ورنایے سمیر کشتگ، ھمے وڑ 2015 ءَ کیچ ءِ دمگ کھن ءَ ناکہ بندی ءِ وھد ءَ گل ءِ ھمراہ ھالق بلوچ ءِ اش شھید کتگ، ءُ 2016 ءَ گیبن ءَ جامع مسیت ءَ ڈن تیرگواری کتگ ءُ یک بے گناھیں بلوچے کشتگے-

درشان ءِ گڈسر ءَ جارکش ءَ گوشتگ کہ آلہ کار فضل ءِ جرم ءِ دراھیں منانک انت کہ زورگریں پوج ءِ ھمراھی ءَ لوگانی سر ءَ بیڑانی وھد ءَ چادر ءُ چار دیواریانی پامالیانی زورانسری بیگواھی ءُ ٹارگٹ کلنگ ءَ ھوار بیتگ، راجی گداری ءِ سر ءَ فضل ءَ را بلوچ راجی آمیدگس ءَ مرگ ءِ سزا داتگ چریشی ءَ سرمچاراں امل کتگ ءُ گڈی آسر ءَ سر کتگ-

ڈاکٹر مالک زمین سوداگر

نبشتہ کار: شکّل بلوچ

دی بلوچستان پوسٹ

بلوچ راج ءِ چُکچینی، مال ءُ مڈیانی لُٹ ءُ پل ءَ پاکستان ءِ وتگڑیں پارلیمانی سیاست کنوک ھما بلوچ ھوار انت کہ 77 سال ءَ یکشل ءَ برجا انت، ایشی ءِ تہ ڈاکٹر مالک بلاھیں کردے پہ بلوچ راج ءِ چُکچینی، بلوچ سائل ءُ وسائلانی لُٹ ءُ پل ءَ تچک ءَ ھوار انت۔ ایشی ءِ اگاں ما گپ ءَ بکنیں اے بلاھیں مناپکے، ایشی ءَ گْوادر ءِ زمینانی کبزہ ءَ تچک ءَ دست ئِے مان۔

بلوچ راچ سرجم ءَ وتی سرڈگار ءِ آجو کنگ ءَ بلوچ راج ءِ راجی پوج ءِ گون ءَ گون اَنت گوں۔ پاکستان ءِ ناشرکاریں اِستان ءَ بلوچ راج ءِ رھشون زندانی کنگ ءَ پد اِستان نوں ڈاکٹر مالک ءِ وڑیں وتگڑیں بلوچ ءَ دیم ءَ آرگ ءِ جُھد ءُ کوشست ءَ کنگ ءَ اِنت داں کہ بلوچ راج ءِ مال ءُ مڈیانی لُٹ ءُ پُل ءَ آسانی بہ بیت۔ ڈاکٹر مالک یک سیاسی سوداگرے، بلوچ راج ءَ چہ ایشی ءَ اُمیت ءِ درگ بزاں وتی راج ءِ چُکچینی ءِ برابر ءَ شریک دار اِنت۔ اے گپ چہ کس ءَ چیر نہ انت، کہ مرچی بلوچ راج وت ماں وت شری ءِ سر ءَ پوہ ءُ سرپد انت کہ ڈاکٹر مالک بلوچ راج ءِ بلاھیں دژمنے، زانگ بہ بیت کہ پاکستان ءِ دہشتگردیں ریاست ءَ وھدے ڈاکٹر ماھرنگ بلوچ دزگیر کُتگ اَت آئی ءَ وتی منڈی چم جَھل جَت ءُ بلوچ راج ءِ گوجنانی سودا ءَ گوں شوکی ءَ دزمانجی ءَ پھک ھوار اِنت۔ ما بلوچ راج دزبندی کنیں کہ بلوچ راج ءِ راجی پوج ءَ کہ آ چُشیں وتگڑیں بلوچاں چہ بزگیں بلوچ راج ءِ راجی مڈیاں بہ رکین اَنت، چُشیں راجدروھاں چہ وتی ڈیھ ءَ بہ تاچین اَنت۔ بلوچ راج ھچبر چُشیں وتگڑیں بلوچاں وتی رھشون نہ لیک ایت کہ آ گوں دژمن ءَ ھوار بہ بیت ءُ بلوچ ءِ مڈیانی سودا ءَ ءُ بلوچ راج ءِ چُکچینی ءَ بکن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ نیشنل مومنٹ ءِ سروک ڈاکٹر نسیم بلوچ ءَ زرمبش تاک ءِ نیمگ گرگ بوتگیں گلگدار ءَ گپ کنان ءَ گوشتگ ما آئی ءَ را راستی ءِ دلیریں توار ءِ رنگ ءَ دیستگ –

گلگدار ءِ پُژدری کسہ شھید گلام مھمد ءَ گوں سیاسی پند، ریاستی زوراکی ءَ پد مھکمیں گلام مھمد ءِ مھکمی، راج ءُ آئی زمہ واری۔ ڈاکٹر نسیم بلوچ

آئی ءَ جست گرگ بوتگ تو نودربری ءِ وھد ءَ گوں راجکاری کار ءَ بندوک ئے ءُ بنداتی روچاں تو سرکار ءِ دوستیں گل بلوچستان نیشنل مومنٹ ھئی گروپ ءِ نودربرگل ءَ ھوار بوتگ ئے، ھمے وھد ءَ واجہ گلام مھمد بلوچ ھم بلوچستان نیشنل مومنٹ ھَئی گل ءِ بنجلی دیوانجاہ ءِ باسک اَت۔ ھمے زمانگ ءَ واجہ گلام مھمد بلوچ ءِ باروا چیزے گوشت کن ئے؟

ڈاکٹر نسیم بلوچ ءَ پسو ءَ گوشت واجہ گلام مھمد بلوچ ءِ ھما بنداتی زمانگ ءَ ھم سیاسی مارشت کمو جتا بوتگ اَنت ءُ یک تْرندیں نگدکارے بوتگ۔ وھدے من بلوچستان نیشنل موومنٹ (حئی گروپ) ءِ نودربر گل ءِ بھر اِتاں بی ایس او آزاد ءِ جوڑ بوگ ءِ زمانگ ءَ من واجہ گلام مھمد نزیک ءَ چہ نہ دیستگ اَت، بلے رند ءَ ما سینئریں سنگتانی کِرّ ءَ، چو کہ ڈاکٹر اللہ نزر، شھید ڈاکٹر منان جان، ڈاکٹر دین جان، چئیرمین واجہ ھلیل بلوچ، ھمے وڑ ءَ شھید ساجد ھسین ءِ ک٘رّ ءَ ھم لھتیں گپّ ءُ یات در برتگ اَت۔

آئی ءَ گوشت واجہ گلام مھمد پرو پارلیمنٹ بی این ایم ءِ تہ ءَ بوتگ، بلے مدام ھمے لیکہ داشتگ ئےِ کہ پارلیمنٹ شتل، دوتل ءُ دوپوستی یے۔

ڈاکٹر نسیم بلوچ ءَ جست گرگ بوتگ کہ شما بلوچستان نیشنل مومنٹ ءِ نودربر بھرگ (ونگ) ءِ تہ ءَ سیاست کنگ ءَ اِت کہ سرکار ءِ دوستیں پگر ءِ منّوکیں گلّے اَت، ھمے جاوراں واجہ گلام مھمد بلوچ ءِ پگر ءُ ھیال کجام نیمگ ءَ اَت۔؟

ڈاکٹر نسیم بلوچ ءَ پسو ءَ گوشتگ واجہ گلام مھمد ءِ لیکہ ھمے سالاں ردوم زورگ ءَ بوتگ۔ آ پارلیمانی گلے ءَ بوتگ، بلے یکّین ءُ بیسّہ نہ داشتگ ئےِ۔ ما دیستگ کہ آئی ءِ وھد ءِ مردم شتگ وزیر ءُ گزیر بوتگ انت، بلے واجہ کردانکی(عمَلی) رِد ءَ بھر نہ بوتگ۔ گْوش اَنت کہ آ ھمے ترام ءَ چہ دیر اِنت دلپروش بوتگ ءُ ناوشی یے درشان کتگ۔

ڈاکٹر نسیم بلوچ ءَ چہ زرمبش تاک ءِ نیمگ ءَ جست گرگ بوت کہ جنوری ۲۰۰۲ ءِ کونسل سیشن ءَ چہ بائیکاٹ (یک کِرّی) ءَ پد بی ایس او آزاد جوڑ بوت، کونسل سیشن ءَ پد شمئے اے کار واجہ گلام مھمد ءَ چون ءُ کجام پیم ءَ چار اِتگ؟

پسو ءَ ڈاکٹر نسیم بلوچ ءَ گوشت اِشی پسو ءَ من دو وڑ ءَ دیگ لوٹ آں، چی ءَ کہ اِد ءَمن واجہ دو دْروشم ءَ دیستگ۔ اول ھمے بائیکاٹ ءِ روچ ءَ کہ ما گوں اکثریت ءَ کونسل سیشن یلہ دات۔ مئے سُھل ءُ تْران ءِ واستا بی این ایم ھئی ٹولی ءَ چہ سئے باسکی جمائتے راہ دیگ بوت۔ اے جمائت ءِ دو مردم من ءَ یات اِنت کہ واجہ گلام مھمد ءُ ھیر جان (موجودہ ایم پی اے) اِت اَنت۔ سیمی من ءَ یات آیگ ءَ نہ اِنت۔

آئی ءَ گوشت ھیر! سُھل ءُ تْران وَ سوبین بَیگی نہ اَت کہ مئے ڈیمانڈ بی ایس او ءَ را در پارلیمانی سیاست ءَ آرگ اَت۔ اے ڈیمانڈ ما زانت منّگ نہ بیت۔ ھمے گپ ءُ ڈسکشن ءِ سر ءَ مارا آ وھد ءِ چیئرمین مھراب مری ءُ سیکریٹری جنرل نادر کدوس گپّ ءَ نہ اِشت۔ رزلٹ ھمے بوت کہ درست سنگتاں بائیکاٹ کرت۔ جمائت کہ واتر شُت، من ءَ ڈاکٹر اللہ نزر گْوش اِیت کہ من ھیراناں واجہ گلام مھمد چی ءَ ایشانی جمائت ءُ ھمراھی ءَ گون اِنت۔ گْوشگ ءِ مول ءُ مراد ایش اِنت کہ ڈاکٹر اللہ نزر ءَ بازیں چیزانی سرپدی بوتگ اَت کہ آ وھد ءَ مارا نہ بوتگ، بلے چہ ڈاکٹر ءِ درشان ءَ من ھمے مار اِت کہ واجہ گلام مھمد اے راہ ءِ پکائیں منّوکے کہ مرچی واجہ ڈاکٹر اللہ نزر ءُ بی ایس او آزاد ءَ گچین کُرتگ۔

آئی ءَ گوشت دومی دْروشم کونسل سیشن ءَ پد اَت۔ آئی ءَ مدام کُمک ءُ دلبڈی داتگ اَت۔ واجہ ءَ اے گام ھژدری لیک اِتگ ءُ ایشی را آشوبی گامگیجے گْوشتگ۔ آئی ءَ بی ایس او آزاد ءَ را یک نوکیں ءُ جرات مندیں گامگیجے ءِ رنگ ءَ چار اِت ءُ گوشت ئےِ کہ اے پہ بلوچ ورناھاں نوکیں سیاسی سما ءِ بستار ءَ کار کنت۔

آئی ءَ جست گرگ بوت کہ انچوش کہ گْوشگ بوت کہ جنوری ۲۰۰۲ ءَ بی ایس او آزاد جوڑ بوت، کساس لھتیں ماہ ءَ رند واجہ گلام مھمد بلوچ ءَ اے وھد ءَ بلوچ نیشنل مومنٹ ءِ بنکی رھشونانی گوں آئی ایس آئی ءَ نزّیکی ءِ راز پاشک کت، ایشی ءِ سوب چے اَت؟ باریں آئی ءَ چرایاں جتائیں کِشکے گچین کُتگ اَت؟

ڈاکٹر نسیم بلوچ ءَ پسو ءَ گوشت واجہ ءِ پاشک ءُ درشان کنگ گیشتریں نااُمیتی ءُ آئی ءِ وشروھی (اخلاقی) زمہ واری ات اَنت۔ آ ھما وھد ءَ بی این ایم ءِ کمک کارمستر (نائب صدر) ءُ پارٹی ءِ جیڑھانی نزّیکیں مردمے اَت، پمیشکا آئی ءَ بازیں گپّ ءُ ھالاں سرپدی ھست اَت کہ بی این ایم ءِ تہ ءَ لھتیں واکداریں مردماں گوں انٹیلی جنس ایجنسیاں چونیں منّوگری کتگ۔ بلوچ کاز ءَ چہ دوری ءَ آئی ءَ را لاچار کت کہ گپ بہ جنت۔ آئی ءَ زانتگ اَت کہ ھاموشی آئی ءَ را شریک ء جرم کنت۔ من ءَ یات اِنت کہ من ءُ ڈاکٹر امداد ءُ شھید ساجد ھسین شال ءَ جاپان ھوٹل ءَ واجہ گلام مھمد ءِ گِندگ (ملاقات) ءَ شتیں۔ اے ھمے وھد اَت کہ نیشنل پارٹی جوڑ بوگ ءِ کار ءِ تہ ءَ اِنت ءُ ڈاکٹر ھئی ءُ ڈاکٹر مالک ٹیم ءِ نیمگ ءَ بی این ایم ءِ ھلاسی ءِ تیاری اِنت۔ واجہ گلام مھمد منّگ ءَ تیار نہ اَت۔ ما ھمد ءَ اَت اِیں کہ نیشنل پارٹی ءِ سروکے ھالک (خالق) بیسیمہ ءِ جاہ منندے، دگہ کسے ءِ ھمراھی ءَ ھمد ءَ اتک ءُ واجہ گلام مھمد ءَ گوں گپّ ءُ تْران ءَ لگ اِت۔ واجہ ءَ آئی ءِ گپّ بُرّ اِت ءُ گْوشت کہ شُمارا ھرچی کنگی اِنت بہ کن ات، من زاناں شما دارگ نہ بہ اِت۔ ھالک بلوچ (خالق بلوچ) ءَ گْوشت کہ ما ترا اسلام آباد ءَ راہ دیگ ءِ پلان کتگ، (منی ھیال ءَ سینیٹری ءِ گپّ ءَ اَت)۔ واجہ ءَ جواب دات کہ من اسلام آباد ءَ نہ رواں کہ گار باں۔

آئی ءَ جست گرگ بوت ’’سقوط بولان” ءِ شِنگ بوگ ءَ پد بی ایس او آزاد ءِ نودربراں واجہ گلام مھمد بلوچ ءِ اے کار کُجام ھساب ءَ چار اِت؟

آئی ءَ پسو ءَ گوشت ما آئی ءَ را راستی ءِ دلیریں توار ءِ رنگ ءَ دیست۔ “سقوط بولان” تھنا مردمانی سر ءَ نگد ءُ شرگداری یے (تنقیدے) نہ بوتگ، اے یک لیکھی دستاویزے اَت کہ آئی ءَ راجدوستی ءِ سر ءَ سودا جنوک ءُ منّوگری کتگیں مردماں چہ سوال کتگ اَت۔ یک رھشونے کہ مارا اے پیشدارگ ءَ اِنت آشوب راست گوئی، ایمانداری، کربانی ءُ زُلم ءِ نزام ءِ نہ منّگ ءَ چہ پیداک بیت اِنت۔

ڈاکٹر نسیم بلوچ ءَ جست گرگ بوت ۲۰۰۶ ءَ وھدے تو بی این ایم ءَ ھوار بیت ئے ایشی ءِ سوب چے اَت؟

آئی ءَ پسو ءَ گوشت اے دو ھزار ھشت ءِ پروری ءِ ماہ اَت۔ ھمے ماہ ءَ من وتی میڈیکل تالیم آسر کتگ اَت ءُ ھاؤس جاب کنگ ءَ اِت آں۔ وانگ ءِ ھلاسی ءَ پد من بی ایس او ءِ ممبر بوت نہ کرت۔ من ءَ بی ایس او ءِ ھمے سیاست دیم ءَ برگی اَت۔ اشی ءِ واستا بی این ایم یکیں ءُ گچینیں پلیٹ پارم اَت۔ واجہ گلام مھمد جولائی ءِ کونسل سیشن ءِ تیاری ءَ شالءَ دورہ کنگ ءَ اَت۔ ایشی ءَ پیسر آ وھدے بی این ایم ءِ سی سی ممبر چیئرمین واجہ ھلیل بلوچ ءُ ڈاکٹر منان جان پیسر ءَ گوم ءَ گپ جتگ اَت ءُ من گوں بازیں سنگتاں بی این ایم ءَ آیگ ءَ تیار اِت آں۔ راجی آجوئی ءُ گھگیری (مزاحمت) ءِ راہ ھمیش اَت، من ھمد ءَ ھوار بوت آں۔

آئی ءَ جست گرگ بوت بلوچ نیشنل مومنٹ ءَ ھوار بوگ ءَ پیسر تئی گوں واجہ گلام مھمد ءَ ھمے بارو ءَ گپّ ءُ تران بوتگ؟ اگاں ھو! گڑا ورداس (تفصیل) ءَ گوشت کن ئے؟

پسو ءَ گوشت ئِے مئے اولی ھال گوں ڈاکٹر منان جان بوتگ اَت۔ پد ءَ آئی ءُ چئیرمین ھلیل ءَ یکجاہ گوم ءَ ھال اھوال کت۔ سک کسانیں ڈسکشنے ءَ پد ما بی این ایم ءِ بھر بوت اِیں۔ انچو کہ من بُرز ءَ گْوشت کہ ھمے وھد ءَ واجہ گلام مھمد کونسل سیشن ءِ تیاری ءَ پہ دورہ ءَ بوتگ شال ءَ، ھمد ءَ مئے دیوان ھم بوت، گپّ ءُ تْران بوت۔

ڈاکٹر نسیم بلوچ ءَ جست گرگ بوت ۳ دسمبر ۲۰۰۶ ءَ واجہ گلام مھمد بلوچ وھدے چیریں ادارھاں زور بیگواہ کت، 20 دسمبر 2007 ءَ چہ سبی ءَ آجو کنگ ءِ ڈرامہ کت ءُ آئی ءَ پولیس ءِ دست ءَ دات، پد ءَ اکتوبر ءَ آ زمانت ءِ سر ءَ یلو کنگ بوت، یلہ بوگ ءَ پد تو واجہ گلام مھمد چون دیستگ؟ اے جست ءَ من پمیشکا کنگ ءَ آں کہ تو ھم چیریں ادارھانی آزارجاھاں بند بیتگ ئے ءُ زورگر ءِ زوراکی چہ نزیک ءَ دیستگ اَنت۔

آئی ءَ پسو ءَ گوشت کہ چوش کہ اِشی ءِ پسّو ءَ من گوں وتی کسہ ءَ دے آں، ءُ پد ءَ ھما گپاں پہ واجہ گلام مھمد ءَ لیکاں۔

آئی ءَ گوشت منی دو رندءَ زور بیگواھی ءِ تجربہ منی زند ءِ تورناک تِریں بھر اِت اَنت۔ پاکستان آوار جنی ءَ گوں ترا کمشرپ کنت، لٹ دنت ءُ در اِنسانی سلوک کنت۔ ترا چہ تئی بنیادی ھکّاں زبھر کنت، بلے اے کار ءَ چہ من ءَ ھما راستی رست اَنت یا ھما تاکت کہ منی اندر ءِ انسان گشیتر مھکم بوت کہ من زاناں من ءَ چونائیں زند ءَ نہ رستگ اَت۔ چوشیں وھد ءَ تو وتارا ھم شر سرپد بہ ئے زان ئے ءُ ریاست ءَ ھم، چی ءَ کہ اے ریاست ءِ ھچ کیل ءَ پیلو کنگ ءَ نہ اِنت، بس یک بدماش ءُ رسترے۔
اے گپ ءَ منی اندر ءَ یک بلاھیں اُمیتے پیداک کت، منی اَمَل ءُ کار یا منی توار پہ مکسد ءُ مانادار بوتگ ءُ پہ ریاست ءَ بیمّے بوتگ کہ آ مجبور بوتگ من ءَ آوار بہ جنت گار بہ کنت۔

زور بیگواھی نہ ایوک ءَ تئی بدن ءِ چکاس اِنت، بلکیں تئی رُو ءِ ھم چکاس اِنت۔ واجہ گلام مھمد ءَ اے سابت کرت کہ انسان ءَ را گوں زمزیلاں بست کن اَنت، بلے ھیالاں ناں آ ترا کید ءُ تھنا زور بیگواہ کت کنت، بلے ترا چہ تئی راج ءَ سست نہ کنت۔۔ من گوں گھتر ءُ گچینیں مکسد ءِ مارشت ءَ ڈنّ ءَ دراتک آں۔ من گیشتر راہ ءُ رھبند ءِ سر ءَ بوت آں، گیشتر دلگوش دات ءُ بلوچ آجوئی ءِ جھد ءِ سر ءَ گیشتر کمٹڈ بوت آں۔

اے زور بیگواھی ءَ مھکمیں واجہ گلام مھمد گیشتر مھکم کتگ اَت۔ زور بیگواھی ءِ ھیال من ءَ سک بے تاھیر کنت، ھمے وڑ ءَ من ءَ مھکم گم کنت کہ مارا زوراکی ءُ زور بیگواھی ایر جنگی اِنت، بلے واجہ گلام بلوچ پہ زور گار ءُ بیگواہ کنگ ھما بے رھمیں پالیسی اَت کہ مرچی ھم برجاہ ءُ بلوچ مھلوک اِیشی ءِ سر ءَ وڑ وڑیں زھرشانی کنگ ءَ اِنت۔ اے رھبند سرکار ءَ پہ واجہ ءِ ھاموش کنگ ءَ کارمرز کت۔ ھیر! گار ءُ بیگواھی ءِ درد ءُ دوراں من شری ءَ سرپد باں کہ من وت دو رند ءَ اے دیستگ۔ واجہ ءِ سر ءَ آ درد ءُ اندوھانی کساس گیشتر بنت کہ آ پارٹی یے ءِ سروک بوتگ، بلے پد ءَ ھم آئی کمپرومائز نہ کتگ، گوں راج ءُ راج ءِ بیسہ ءَ دَگا ءُ بے اِیمانی نہ کتگ۔

آئی ءَ جست گرگ بوت 2008 ءَ تو سینٹرل کمیٹی ءِ باسک گیچن بوت ئے، اے وھد ءَ واجہ گلام مھمد ءِ رھشونی بودشت تو چون دیستگ، اگاں واجہ انوں زندگ بیتیں گڑا بلوچ راجکاری کجام جاہ ءَ سر اَت؟

آئی ءَ پسو ءَ گوشت اگاں واجہ زندگ بوتیں منی گمان ءَ بلوچ ءِ سیاست ءِ لیکھی بنیاد گیشتر مچیور یا متھد بوت کرتگ اَت۔ آئی ءِ تہ ءَ ساپیں وژن، دورچاری ءُ یک پدریچے ءِ رھشونی کنگ ءِ تاکت ھست اَت۔ آئی ءِ نہ بوگ یک ھورکیں جاھے کہ انگت منتگ ءُ ما آئی ءَ مدام مار اِیں۔ آ ایوک ءَ رھشونے نہ بوتگ، بلکیں آشوبی پگر ءِ چیدگ بوتگ۔

آئی ءَ جست گرگ بوت لھتیں یات کہ آ گوں واجہ گلام مھمد بلوچ ءَ بندوک بہ بنت؟

ڈاکٹر نسیم ءَ پسو ءَ گوشت آئی ءِ گپّ کہ یک آجوئیں بلوچستانے بہ بیت، یک بلوچستانے کہ چہ کرپشن، جاگیرداری ءُ اندری تپاوتاں آجو بہ بیت۔ آئی ءَ یک اِنساپ ءِ چاگردے ءِ واب دیستگ اَت کہ اُود ءَ ھچ کس پہ راستی ءِ گْوشگ ءَ دارگ مہ بیت۔ آئی ءِ سادگی، تب ءُ وتی کار ءُ پرز ءِ گھتریں مارشت منی دل ءَ نبشتہ اَنت کہ بے ھیال نہ بنت۔

نمدی یے نودو ءِ نام ءَ

نبشتہ کار: کمبر آرپ

دی بلوچستان پوسٹ

دیدگیں نودو

تئی بیگْواھی ءَ پد ھما اِنت کہ منی دِل ءَ جیڑگانی آبشارے رِچگ ءَ اِنت۔ھردیں کہ تئی اکسے یا توار بندے دیم ءَ کَیت وَ گنتر۔ انوں ترا ھژدہ روچ بزاں432 کلاک بیت کہ چمّاں اندر ئے۔ ھر ساھت چو زومّ ئیگ ءَ دَج اِیت ءُ ھمے جیڑگ کپ اِیت کہ نودو ھرابیں مردمانی دست ءَ شُت۔باریں ورگ ئِے دینت اگاں ناں شُد ءَ ھلاک اِنت؟ باریں جن اَنت ئِے اگاں ناں؟ رنگ رنگیں جُست اَنت بلے ایشانی پسّہ بس تئی گْور ءَ بنت، یار!
من ءَ اڑے تئی بچکندگ گیر آیگ ءَ اَنت سک باز چہ باز ءَ باز تر۔ تئی گال ،،، تو زان ئے تئی اے شَیر کہ:

“چہ تو رند نود ھورک بنت رنگ میتگ ءِ ”
“کے بہ کنت تئی وڑ ءَ چُش ھُنر میتگ ءَ “

پہ من روچے پنچ ،شش رند ءَ گوشدارگ وَ الّمی منتگ۔ تو زان ئے منی سِتک بازیں جاھاں پُرشت ءُ پُروش ءِ آماچ اِنت۔نوں اگاں بدنامی ءَ دستے چست بہ کناں وَ میاریگ باں۔ واجہ ءِ جند ءِ شگان کُش اَنت من ءَ ترا مردم دوست دارگ ءَ اَنت ،تو باز یات کنگ بوھگ ءَ ئے، ھر کجا گِند نبیل اِنت۔ زبیر ءَ گند چون اِنت نودو! تئی گْوشتگیں گال کہ مارشت ءُ زندگی ءَ پکار اَنت کہ من ءَ را یک رُژنائیں رُژنے ءِ تْرانگ ءَ پِرّین اَنت بلے ھمے شومّیں جیڑگے گُٹ ءِ لوپ اِنت کہ یار مئے سنگت ،ھمراہ ھمسپر مارا تھنا مہ کنت۔! افووو کلام ئِے بہ جنت! تئی اد ءَ نہ بوھگ ءَ تو زان ئے من تئی وانگ گیشتر کتگ۔ مرچی گش ئے تئی گالاں یک نوکیں ءُ زند بکشیں مانایے گون ءُ گردگ ءَ اِنت۔ من ھم چہ ایشاں سان زورگ ءَ آں سک باز اڑے۔تئی لچّہ کاری تئی مزن ملّی ءُ دلیری ءِ گواھی ءَ دینت۔ تو وت گش ئے:

باندا تژن ءَ لگوری ءِ کسّے مہ جنت
چنچو برد ھست ءُ زھم ءُ تپَر میتگ ءَ

وللہ تو بلاھے ئے۔ من ءَ ھما روچ ءَ گمان بوتگ اَت کہ من ءُ زھور تئی کر ءَ ماں بلوچستان شھدربرجاہ ءَ آتک ایں۔ منی اولی رند اَت کہ گوں تو ھم دیوان اِت آں۔ تو من ءَ چہ ھما روچ ءَ دوست بوت ئے۔ ھو بلے ھمے بِساکے(BSAC) تو مئے سر ءَ توک کت۔ اد ءَ من کمو باز گلِگ داراں گوں تو ھاھاھاھا۔۔ ھیر سوچ اے گپ ءَ ، تو دلبریں مردمے ئے ، تئی چاگرد ءِ چارگ ءِ وتی دابے ،اندازے ھمے چیز ءِ من شیداھے آں۔ تو جتا ئے نودووو!۔

اڑے نبیل بلے اے بھ سرپد مہ بو کہ تو تھنا منتگ ئے۔تو تھنا نہ ئے بلکیں ما درست ھمد ایں ءُ پہ تو جیڑگ ءَ ایں، تئی آجوئی ءِ بابت ءَ ، آجوئی ءِ رند ءِ شاتکامی ءِ بابت ءَ ۔ تئی نوکیں شَیرانی ھم وداریگ ایں۔۔۔ ھو بس ھمے ودار اِنت کہ ما ایشی ءَ چہ وت ءَ ملما کتگ۔ تو سھیگ نہ ئے بلے اے درست ترا یات کنگ ءَ اَنت،درست وداریگ اَنت۔ اِینچُک ءَ وَ نوں بزان کہ تو مئے درستانی مارگ ءَ ئے، مئے درستانی مارشتاں چول جن ئے۔ من ھمد آں تئی آجوئی ءِ امیت چَنکاں کتگ ءُ ترا نمدی یے نبیسگ ءَ آں۔ من وت نہ زاناں من چے نبیسگ ءَ آں بلے ھو ھمیش اِنت۔ گْوش اَنت کہ نبشتہ ءَ مردم سُبک تر بیت پمیشکا نوں بس کن ۔ بس کن کہ ما دَمبُرتگ ایں یار بیا واتر اے زبیر ءَ من ءَ دلسیاہ کتگ۔

اھد نزّ اتکگ ءُ امبروز ءِ سپر گیمّرتگ
بے ترا زند کلمپوگے کہ جوہ ءَ بُرتگ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-