TBP Balochi

راست ءُ دلپھکی

نبشتہ کار: شَکّل بلوچ

دی بلوچستان پوسٹ

منی ند گُش ئے یکے ءَ پہ زور داشتگ۔ منی جیڑہ ند ءِ چست کنگ نہ اَت بلکہ جیڑگ ءُ نبشتہ کنگ اِنت۔ ھر ھما جاور، چاگرد ءِ درد ءُ تورشتاں من ءَ وتی امبازاں زُرتگ گُش ئے جایگ ءُ ایربرگ مہ بیت گڑا زند پھک ءَ اینّار ءُ ھوادگ بیت۔یکے ایش اِنت نبشتہ کنان کنان ءَ منی زند ءِ گیشتریں وھد ءِ بھر انت۔

پہ نبشتہ کارے ءَ نبشتہ کنگ اِنچو ھم آسان نہ انت بازیں زند ءِ جنجالانی دیمپان بوگی بیت۔ اے دردانی مارگ ءَ ترا وتی زند اوں کُربان کنگ کپ ایت، شَنک بوگ سرپدیں مردے ءِ کار اِنت۔ ھر ھما انسانی درنگاز جتائیں دروشماں گندگ ءُ سما کنگ بنت، کہ آ راست دوست یکپارگی ءَ ءُ گوں اِشتاپی ءَ رنگ کنگ ءُ پہ زورگ ءَ ھم آسان نہ انت۔ ترا زند ءِ ھر ھما لوٹ کُربان کنگی اَنت پہ راست ءِ ھاتر ءَ، سما چنکیاس تُرسناک بیت کہ ھمے ساھت ءَ جیڑگ ءَ بہ بَہ ئے، ھمے میانجی ءَ تئی سر ءَ اُرش کنت۔ جاوید ایم۔بی بلوچ یک بلوچ بوگ ءِ ھمراھی ءَ راست دوست ءُ انساندوستے ھم ھست اِنت۔

مجگ ءِ ٹپ ءُ ٹور کنگ ءِ ھاتر ءَ رِپک سازینگ بنت، جاوید ایم۔بی بلوچ راج ءِ یک تاگتے۔ بلوچ راج وتی تاگتاں باید انت بہ پَھریز اَنت۔ بلوچ راج ءَ سما گور بہ بیت، آ نوں بزان انت، کہ جاوید بلوچ کَے اِنت؟ پرچا چہ رسترانی نیمگ ءَ بیھار دیگ بیت؟ ایشی ءَ گُش اَنت، بلوچ تاگت، تاگت راستی یے۔

راستی چی یے؟ بلوچ راج ءِ سر ءَ زُلم ءُ زوراکیانی ھلاپ ءَ تَھنا اُوشتاتگ، زالم ءِ زُلمانی پَدّر کنگ ءِ ھاتر ءَ یک جگرے ءِ درکار بیت ءُ آ جگر دلپھکی ءُ راستی ءِ سما بوگ ئیگ انت۔ بلوچ راج باسما بوان اَنت، وتی پگری مڈّیانی بابت ءَ سرپد بوان اَنت۔جاوید ایم۔بی بلوچ، تھنا نہ اِنت، بلوچ راج جاوید بلوچ ءَ گوں ھمگام انت، جاوید بلوچ، بلوچ راج ءِ ھکّیگیں توار اِنت، ءُ بلوچ راج وتی توار ءَ بہ رکّین انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

نوشکی ءَ پاکستانی پوج ءِ بنجل ءِ سر ءَ اُرش ءَ پد ھیلی کاپٹر ءُ جاسوسیں بالیگانی بال برجاہ-

پاکستانی پوج ءِ بنجاھی بنجل ءِ سر ءَ نوشکی ءِ ھند گلنگور ءَ اُرش ءَ پد دمگ ءَ پوجی ھیلی کاپٹراں ھوار جاسوسیں بالیگانی بال برجاہ انت-

گوستگیں شپ ءَ بیتگیں اُرشکاراں پورسز ءِ بنجاھی بنجل ءِ ھواری ءَ لیویز پوسٹ ھم دستیگ کتگ ءُ پوج ءِ کمک ءَ آیوکیں کاروان ھم نشانگ کنگ بیتگ-

اُرشاں پوج ءِ کارندھاں بازیں کچے ءَ تاوانانی چِست کنگ ءِ ھال انت بلے داں انگت ءَ واکداراں اے درگت ءَ دگہ اھوال دیم ءَ نیاؤرتگ انت-

نوشکی ءَ پاکستانی لشکر ءِ بنجاھی بنجل نشانگ جوڑ کنگ بوتگ ءُ بنجل دستیگ کنگ بیتگ ءُ ھمے وھد ءَ پہ کمک ءَ سر بوھوکیں لشکر ءِ کاروان ھم نشانگ جوڑ کنگ بوتگ ءُ بازیں تاوانانی ھال بوتگ۔

گوستگیں شپ ءَ نوشکی ءِ دمگ گلنگور ءَ پاکستانی لشکر ءِ بنجاھی کارگس ءِ سر ءَ جتا جتائیں نیمگاں چہ سلاہ بندیں مردماں اُرش کتگ۔ چہ سئے کلاک ءَ گیش دمگ ءَ ترندیں تیرگواری ءُ تراک برجاہ بوتگ اَنت۔

اھوالدار ءِ رد ءَ اُرش کنوک لشکر ءِ کیمپ ءِ گرگ ءَ سوبمند بوتگ اَنت وھدے کہ لشکر ءِ سلاہ ءُ گولہ بارود ھم دست کپتگ اَنت۔

اُرش ءِ وھد ءَ سلاہ بندیں مردماں ھمے جاہ ءَ لیویز ءِ پوسٹ ھم گپتگ ءُ کارندہ دزگیر کتگ اَنت کہ رند ءَ آ یلہ کنگ بوتگ اَنت۔

اھوالدار ءِ رد ءَ اے دمگ ءَ سر بوھوکیں پورسز ءِ کاروان ھم سلاہ بندیں مردمانی نیمگ ءَ سنگر گپتگیناں اُرش کتگ ءُ کہ ایشی ءِ آسر ءَ پورسز ءِ واستا گیشتریں تاوان بوتگ۔

یک ماھے ءِ تہ ءَ نوشکی ءَ پاکستانی لشکر ءِ سر ءَ اے دومی مزنیں اُرش اِنت ۔ ایشی ءَ چہ پیسر 26 مارچ ءَ بلوچ لبریشن آرمی ءَ نوشکی ءِ شھر ءِ نزیک ءَ وت کُش ءُ سنگر گپتگیں اُرشانی تہ ءَ پورسز نشانگ جوڑ کُتگ اَنت۔

بی ایل اے مجید بریگیڈ ءَ پاکستانی لشکر ءِ کارندہ سواریں بس ءَ گوں تراکناکیں گاڑی ءَ نشانگ جوڑ کتگ ءُ بس سرجم ءَ تباہ کتگ ءُ بی ایل اے ءِ ھاسیں اُرد ‘فتح اسکواڈ’ ءَ دگہ بسے ءِ کارندہ نشانگ جوڑ کتگ اَنت۔

اے سال ءَ بلوچ سلاھبندیں آجوئی گلانی اُرش گیش گندگ بوتگ اَنت۔ مارچ ءَ آجوئی دوستیں گلانی ھمسنت بلوچ راجی آجوئی سنگر (BRAS) ءَ جتا جتائیں جاھاں 88 اُرش کتگ انت۔

ایشی ءَ چہ پیسر بلوچ لبریشن آرمی ءِ مجید برگیڈ ءَ جعفر ایکسپریس دستیگ کتگ ءُ دو سد ءَ چہ گیش پاکستانی لشکر ءِ کارندہ یرگمال کتگ۔ رند ءَ درستیں کارندہ کشتگ بوتگ اَنت۔

مرچی نوشکی ءَ اُرش ءِ زمہ واری انگت ءَ ھچ گل ءَ نہ زرتگ ءُ واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ گوشتگ منی پت ءِ بیگواھی ءَ ھشت روچ گوستگ انت بلے داں انگت ءَ آئی ءِ بارو ءَ ھچ سرپدی نہ رس اتگ انت-

آئی ءَ گوشتگ اے یک تھلیں راستی یے کہ پاکستان ءَ انسانی ھک کجام رنگ ءَ پامال بوگ ءَ انت- من ھما جد ءُ جھد ءِ بندات آ ھمے جھلانکیں درد ءَ پیداگ بیتگ کہ من وتی مردمانی اندر ءَ سما کن آں – اگاں من کجام چیز ءِ کسورواراں گڑا نا انساپی ءِ دیم ءَ بے توار بوگی انت- بلے نی آ بے تواری ایوک ءَ بس نہ انت ھما تاکت من ءَ پروشگ لوٹ انت ءُ اے وڑ کنگ ءَ – آیاں منی پت نشانگ کتگ ءُ من ءَ بلیک میل کنگ گچین کتگ-

آئی ءَ گوشتگ منی کسہ مان نہ گیش اتگ اے وڑیں دگہ ھم مھکمیں جھد ءِ بار ءَ وتی گمانی کوپگ ءَ کنگ ءَ انت- اے درد بس منی اَزم ءَ مھکم کنت اِنت دگہ نا انساپی ءَ اوپار کت نہ کنت اِنت-

زھیر احمد بلوچ ءِ بیگواھی ءَ دہ سال سرجم بوتگ ءُ پنجگور ءِ دمگ خدابادان ءِ ھند مواچ بازار ءَ سیمنارے برجم دارگ بوتگ، کہ اود ءَ سیاسی، چاگردی ءُ وکیل رھشوناں بھر زرتگ وھدیکہ بی وائی سی ءِ رھشونانی تواربندیں کلوہ گوشدارینگ بوتگ انت –

مراگش ءَ تران کنان ءَ زھیر احمد ءِ برات کفایت اللہ بلوچ ءَ گوشتگ کہ آئی ءِ برات سیزدہ اپریل دوھزار ءَ پانزدہ ءَ ھما وھد ءَ پوجی پانگسے ءِ نزیک ءَ آوار جنگ بوتگ کہ آ دیم پہ کراچی ءَ رؤگ ءَ بوتگ کہ روچ ء مروچی آئی ءِ ھچ ھال ءُ اھوال نیست – آئی ءَ گوشتگ کہ ما آئی ءِ یل کنائینگ ءَ ھر وڑیں جھد کتگ، وزیر ءُ گزیراں گوں گند ءُ نند کتگ بلے ھچ پہ ھچ –

آئی ءَ گوشتگ کہ زھیر احمد ءِ وڑ ءَ دگہ ھزاراں مردم بیگواہ انت کہ آیانی کھول ءِ مردماں ائید ءِ روچ ءَ ھم وتی دوستیگیں مردمانی اکس اش گون انت ءُ دگانی سر ءَ انت – آئی ءَ بھتام جتگ کہ سرکار وت کانود ءُ رھبندانی لگتمالی ءَ کنگ ءَ انت ءُ نوں زالبولاں ھم آوار جنگ ءَ انت –

کفایت اللہ ءَ گوشتگ کہ سردار اختر مینگل سرکار نہ ایں، بس بلوچ زالبولانی یل کنگ ءِ لوٹ ءَ کنگ ءَ انت – آئی ءَ گوشتگ کہ ما پیپلز پاٹی وڑیں راج دژمنیں پلیٹ فارمے ءَ سیاست کتگ چریشی ءَ من چہ وتی راج ءَ پھلی لوٹ آں –

آئی ءَ گوشتگ کہ سال 2022 ءَ منی برات ءِ ھال شال ءِ بندیگ جاہ ءَ بوتگ، گوستگیں آرمی ءِ چیف جنرل باجواہ ءَ پنجگور ءِ تر ءُ تاب ءِ وھد ءَ آئی ءِ یل کنگ ءِ کول ھم کتگ بلے روچ ءُ مروچی یل کنگ نہ بوتگ –

مراگش ءَ تران کنان ءَ زھیر احمد ءِ زھگ ادیبہ ءَ گوشتگ کہ اگاں آئی ءِ پت ءَ جرمے کتگ گڑا آمیدگس ءَ پیش کنگ بہ بیت ءُ آئی ءَ ملا فرہاد ءِ آوار جنی ھم ترندی ءَ ایرجتگ-

مراگش ءَ بی وائی سی ءِ بنجاھی رھشون ڈاکٹر صبیحہ بلوچ، سمی دین بلوچ ءُ ایمان مزاری ءِ توار بند ھم گوشدارینگ بوتگ انت –

مراگش ءَ ائیشہ، زویہ ءُ دگراں ھم تران کتگ ءُ ھمے لوٹ کتگ کہ اگاں آیانی پت ءَ جرمے کتگ آمیدگس ءَ آرگ بہ بنت –

ڈسٹرکٹ بار ایسوسی ایشن ءِ امان اللہ کریم، مسلم لیگ نون ءِ ڈویژنل صدر اشرف ساگر، بی این پی ءِ دمگی جنرل سیکٹری قدیر احمد ءُ نیشنل پاٹی ءِ گوستگیں سرکماش حاجی صالح محمد بلوچ ءَ تران کتگ ءُ گوشتگ کہ اگاں ھرکس ءَ جرم ءِ کتگ گڑا آئی ءِ پیسلہ ءَ آمیدگس بہ کنت –

امان اللہ کریم ءَ گوشتگ کہ بندیگی ایوکی ءُ بیگواھیں مردمانی جیڑہ کانود ءُ رھبندانی لگتمالی ئے – آئی ءَ گوشتگ کہ پولیس ءِ زمہ داری ایں کہ بیست ءُ چار ادارانی تہ ءَ ایاں آمیدگس ءَ بیار ایت – ما بار ءِ پلیٹ فارم ءَ چہ اے جھد ءَ ھر فورم ءَ برجاہ داریں –

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ بلوچستان ءِ دو جتاجتائیں دمگ بارکھان ءُ ھاران ءَ پاکستانی پوج ءِ کارندھانی ءُ ھال اھوالی ٹاور سر ءَ بیتگیں اُرش زمہ واری منّ اِتگ اَنت-

بی ایل ایف ءِ جارکش ءَ درشان ءِ تہ ءَ گْوشتگ کہ مئے سرمچاراں دوازدہ اپریل ءِ بیگاہ ءِ چار بیست ءِ نزیک ءَ، بارکھان ءُ رکھنی ءِ میانی دمگ ءَ پرپٹ ءَ سوار پاکستانی پوج ءِ پوجی کاروان آئی ای ڈی بمب اُرش ءَ نشانگ کتگ- اُرش ءَ یک پرپٹے سرجم ءَ تباہ بیتگ ءُ اشی ءَ سوار دو کارندہ جاہ پہ جاھی مرتگ اَنت وھدے کہ دو پرپٹ کمو تاوان رس اِتگ-

جارکش ءَ گْوشتگ کہ راجی آجوئی ءِ اے جُھد ءَ تاکت ءِ سرچمگ راج اِنت- بی ایل ایف راج ءِ تاکت ءُ پلامرزی سرجمی ستک کنت ءُ مارا وشی بیت کہ بلوچ راج آجوئی ءِ اے جُھد ءُ وتی سرمچارانی گوم ءَ ھمکوپگ اَنت-

جارکش ءَ دگہ یک درشانے ءِ تہ ءَ گْوشتگ کہ مئے سرمچاراں سیزدہ اپریل ءِ روچ ءِ یازدہ ءَ ھاران ءِ دمگ راسکوہ بُلندُک ءَ چاریگی واستا پٹ کتگیں ٹیلی کمیونیکیشن شرکت یوپون موبائل ٹاور سر ءَ اُرش کتگ اود ءَ ساڑی ئیں سرجمیں مشینری مانداشتگ ءُ تباہ کتگ اَنت-

جارکش ءَ گْوشتگ بی ایل ایف اے اُرشانی زمہ واریاں منّ اِیت ءُ بلوچستان ءِ وتواجھی ءَ تاں زورگریں پوج ءُ پوجی شوربندیاں نشانگ کنت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءَ گوشتگ کہ بی ایل اے ءِ سرمچاراں ھاران ءَ یک کاروائی یے ءِ میان ءَ لیویز تانہ دستیگ کتگ ءُ اود ءَ درستیں سلاہ برتگ اَنت ءُ دمگ ءَ تر ءُ گرد کتگ۔

آئی ءَ گوشتگ کہ گوستگیں شپ ءِ ادار یک ءِ نزیک ءَ ھاران ءِ ھند مسکان کلات ءَ لیویز ءِ یک تانھے سرمچاراں انگر کتگ ءُ وتی دست ءَ کتگ۔ اے کاروائی ءِ میان ءَ تانھا ءَ جاڑیگیں دہ کارندہ دزگیر کتگ انت ءُ اود ءَ درستیں سلاہ ءُ لشکری سامان دستیگ کتگ اَنت۔ برتگین سلاھاں سیزدہ سی تیری ءُ دگہ سامان ھوار اَنت۔ دزگیر کتگیں کارندہ راج ءِ تاوان دیگ ءَ ھوار نہ بیتگ اَنت ءُ آ یل داتگ انت۔

جارکش ءَ گوشتگ کہ اے کاروائی ءَ پد سرمچاراں دمگ ءَ تر ءُ گرد برجاہ داشتگ دانکہ زورگریں لشکر ءِ پسھی کاروائی ءِ دیم ءَ داشت بہ کن اَنت ءُ دمگ ءَ وتی ساڑی بوگ ءَ پیش داشتگ۔

آئی گوشتگ کہ لھتے روچ پیش ڈی آئی جی رکشان ءِ سروکی ءَ یک دیوانے ءَ پیسلہ کنگ بیتگ کہ اگاں چونیں بلوچ ورنایے ءِ گوں بلوچ آجوئی لوٹوکیں گلاں سْیادی زانگ بیت گڑا پولیس ءُ لیویز ءَ موکل دیگ بیتگ اَنت کہ اے وڑیں مردم ھما دمان ءَ تیر جنگ بہ بنت انت۔ اے وڑیں شور دیانی مول لیویز ءُ پولیس کارندھاں بلوچ راج ءِ بگیری ءَ اوشتارینگ ءُ آیاں ریاست ءِ زوراکیانی کمک کار جوڑ کنگ اِنت۔اے پندل ھندی لشکر ءُ بلوچ راج ءِ میان ءَ دوری یے ءِ ودی کنگ ءِ جھد ءَ اِنت۔ کہ لیویز ءُ پولیس کارندہ گیشتر ھندی بلوچ اَنت۔ ھمے سوب ءَ آیاں گیشتر گوں گل ءَ دژمنی نیست۔ اگاں اے کارندہ ریاست ءِ زوراکیاں ھوار بیت اَنت ءُ بلوچ راج ءِ سر ءَ زورکی کُت اش گڑا آ نشانگ کنگ بنت انت-

جارکش ءَ گوشتگ اے وڑیں درستیں ناشرکار کہ ریاست ءِ زوراکی ءَ ھوار اَنت، آ اگاں بلوچے بہ بیت آ ھم بکشگ نہ بیت پرچا کہ آ وتی سرڈگار ءُ راج ءِ بگیری ءَ دژمنی ءَ یک وڑ ءَ شریدار اَنت۔

بلوچ یکجھتی کمیٹی ( بی وائی سی) ءِ نیمگ ءَ چہ ڈاکٹر ماہ رنگ بلوچ، صبغت اللہ شاہ جی، بیبو بلوچ ءُ بیبگر بلوچ ءِ دزگیری ءِ ھلاپ ءَ یکشمبے ءِ روچ ءَ سرجمیں بلوچستان ءَ ھزرانی مردم دگانی سر ءَ درتکگ اَنت وھدے کہ بازیں جاھانی سر ءَ پاکستانی پوج ءَ زھرشانی کنوکانی ھلاپ ءَ تاکت کارمرز کتگ-

گیشیں ھالانی رِد ءَ بلوچستان ءِ گیشتریں شھراں یکشمبے ءِ روچ ءَ بی وائی سی ءِ جار پد ءَ ھزرانی مردم دگانی سر ءَ درتکگ اَنت ءُ بی وائی سی ءِ سروک ءُ کارکنانی یل کنائینگ لوٹ کتگ-

سرجمیں بلوچستان ءَ بیؤکیں زھرشانی ءَ ھوار زھرشانی کنوکانی دستاں پلے کارڈز ءُ بینرز چست کتگ بیتگ اَنت آیانی سر ءَ دزگیریں رھشونانی یل کنائینگ ریاستی زوراکی ءِ ھلاپ ءَ ناراہ نکش بیتگ اَنت – روانک ءَ مردماں ھکومت ءِ ھلاپ ءَ ناراہ ھم جتگ-

ترانکاراں دزگیری ءِ زرواکی گْوشتگ ءُ تُرندی ءَ ایر جتگ ءُ زوت یل کنائینگ لوٹ کتگ-

رھشوناں تران تہ ءَ گْوشتگ کہ سیاسی کارکنانی دزگیری زورانسری آوار جنی، انسانی ھکانی ھلاپ ورزی ءُ بلوچستان ءِ مڈیانی لُٹ ءُ پُل منّگ نہ بیت- آیاں گْوشتگ کہ ڈاکٹر ماہ رنگ بلوچ ءِ دزگیری ءَ چہ زرمشبت ایرموش کنگ نہ بنت-

ترانکاراں گْوشتگ کہ ھکومت تاکت ءَ چہ تواراں ایرموش کنگ جُھد ءَ اِنت بلے بلوچ راج وتی ھکانی واستا مھکم اِنت ءُ جُھد ءَ برجاہ دار اِیت-

ترانکاراں کڈن کتگ کہ اگاں دزگیریں رھشون زوت یل کنگ نہ بیت اَنت گُڑا زھرشانی دراجکش کنگ ءُ سرجمیں بلوچستان ءَ تلان بیت-

آئی ءَ گْوشتگ کہ بی وائی سی ءِ ھلاپ ءَ کریک ڈاؤن ءَ چہ ھک ایرموش کنگ نہ بیت نانکہ دزگیری ءُ زورانسری آوار جنی ءَ چہ سیاسی زرمبشت ھلاس نہ بنت بلکیں ریاست ھمینچو تُرندی بکنت راجی ھکانی زرمبشت گیشتر مھکم بنت- بی وائی سی کریک ڈاؤن ءُ دزگیریاں چہ وتی توار ءَ نہ دار ایں بلکیں گیش ترندی کئیت-

ترانکاراں گْوشتگ کہ ڈاکٹر ماہ رنگ بلوچ یک نام یا یک پردے نہ اِنت نو راج ءِ روہ اِنت ءُ بلوچستان ءِ پجّار جوڑ بیتگ ڈاکٹر دزگیر کتگ ءُ ریاست ءَ اگاں اے جیڑ اِتگ کہ بلوچ راجی زرمشبت بے توار بیت گُڑا زانگ لوٹ اِیت کہ نو ھرچ بلوچ ماہ رنگ ءِ لوٹوک جوڑ بیتگ اَنت ڈاکٹر ماہ رنگ بلوچ مئے ساھانی تہ ءَ ھوار اِنت مئے ساہ چتو بے توار بنت-

آیاں گْوشتگ کہ ریاست تاکت ءِ نشہ ءَ بے میاریں زھرشانی کنوکانی ھلاپ ءَ تاکت کارمرز کنت گیشتر گینگ ودی کنگ ءَ اِنت کہ اے ریاست ءِ واستا شر نہ اِنت- ریاست گیر زمہ داری ءِ زوراکی ءَ یل بکنت پُرایمنیں سیاسی جُھد ءِ ھلاپ ءَ کریک ڈاؤن بند بہ کنت اگاں اے رویشگ برجاہ بیت گُڑا آؤکیں وھداں ریاست واستا ھترہ بیت-

آئی ءَ گْوشتگ کہ پُرایمنیں سیاسی جُھد ءِ دیم ءَ گپ دیوان جاہ ءَ ریاست تُپنگ ءَ زُرتگ ءُ اوشتاتگ ءُ اے ریاست ءِ اکلاکی پروش بیت، میانی استمانی مزھبیں جھان بلوچ چُکچینی ءِ ھلاپ ءَ پاکستان ءِ دست ءَ بدار اِیت دانکہ گیش انسانی جانانی تاوان مہ بیت-

گوادر ءِ تجربگ کار اھوالکار ءِ نیمگ ءَ نہ دیستیں مردمے ءَ جان ءِ کُشگ ءِ بیھار داتگ۔

“گوادر ءِ توار” نامی ئیں چاگردی رسانکدر ھالتاک ءِ جوڑینوک بزاں سر ءُ نامی ئیں سنگت اھوالکار جاوید ایم بی ءَ را گوستگیں شپ ءَ بے زانگیں چہ گوانکوی لمبرے ءَ گوانک ءُ ترانگ، کلوھانی وسیلہ کُشگ ءِ گُرّ ءُ نِھِر ھال سربوتگ۔

گوادر ءِ دگہ یکے اوں اھوالکار عین کادر ءَ چاگردی رسانکدر ءِ سر ءَ بیھاری کلوہ اسکرین شاٹ آئی ءِ سر ءَ دیم دیگ بوتگ ءُ نشتگ۔

آئی ءِ گْوش اِنت، جاوید ایم بی ءَ پیسر گُرّ ئِے رستگ چہ ایشی ءَ رَند فون کال ءِ وسیلہ ءَ یک ھاس ھالے ءِ شِنگ بوگ ءِ سر ءَ دلترپکہ ءِ آسر ءَ بیھار ئِے داتگ سنگین۔

گوانک جنوک ءَ تچکیں لبزاں گوں اھوالکار ءَ را گُشتگ ئِے کہ وتی کپن ءَ جاڑی کن۔

جاوید ایم بی ءِ گُرّ ءُ نِھِر چار ءُ تپاس کُتگ ءُ گْوشتگ کہ آئی ءَ چہ دراجیں مُدّتے ءَ اھوالکاری زمہ واریاں پیلو کنگ ءَ زوراور ءِ دیمپان انت، آئی ءِ گُشگ اَت کہ چُشیں کسم ءِ پاترپّاں اھوالکارانی گپ جَنَگ ءِ آجوئی ءِ سر ءَ اُرش انت ۔

اھوالکاراں، سول سوسائٹی ءُ شھری دمگی جاورانی سر ءَ وتی ترندیں پدکرد زاھر کُتگ ءُ چہ ھکومت ءَ زوت دلگوشی ءِ زورگ ءُ زمہ واریں مردمانی بگیر ءَ کارروائی ءِ لوٹ کُتگ۔

یات بہ بیت کہ بلوچستان ءَ اھوالکاراں ءُ رسانکدری ادارھاں در جانبدار اھوالکارانی سر ءَ باز رند ءَ نشانگ کُتگ اَنت، انیگ ءَ بلوچستان ءِ ھلک بارکھان ءِ سیادی داروکیں اھوالکار آصف خھان کھیتران ءَ را گُرّ ئِے داتگ آئی ءِ دکان ءَ را چہ پولوس ءِ نیمگ ءَ بند کنگ بوتگ، ءُ رند آ گار ءُ بیگواہ کنگ بوتگ۔

شہ بارکھان ءَ گار ءُ بیگواہ بوتگیں اھوالکار آصف ھان کھیتران روچ ءِ مروچی گار اِنت۔