نوشکی ءَ پاکستانی لشکر ءِ بنجاھی بنجل نشانگ جوڑ کنگ بوتگ ءُ بنجل دستیگ کنگ بیتگ ءُ ھمے وھد ءَ پہ کمک ءَ سر بوھوکیں لشکر ءِ کاروان ھم نشانگ جوڑ کنگ بوتگ ءُ بازیں تاوانانی ھال بوتگ۔
گوستگیں شپ ءَ نوشکی ءِ دمگ گلنگور ءَ پاکستانی لشکر ءِ بنجاھی کارگس ءِ سر ءَ جتا جتائیں نیمگاں چہ سلاہ بندیں مردماں اُرش کتگ۔ چہ سئے کلاک ءَ گیش دمگ ءَ ترندیں تیرگواری ءُ تراک برجاہ بوتگ اَنت۔
اھوالدار ءِ رد ءَ اُرش کنوک لشکر ءِ کیمپ ءِ گرگ ءَ سوبمند بوتگ اَنت وھدے کہ لشکر ءِ سلاہ ءُ گولہ بارود ھم دست کپتگ اَنت۔
اُرش ءِ وھد ءَ سلاہ بندیں مردماں ھمے جاہ ءَ لیویز ءِ پوسٹ ھم گپتگ ءُ کارندہ دزگیر کتگ اَنت کہ رند ءَ آ یلہ کنگ بوتگ اَنت۔
اھوالدار ءِ رد ءَ اے دمگ ءَ سر بوھوکیں پورسز ءِ کاروان ھم سلاہ بندیں مردمانی نیمگ ءَ سنگر گپتگیناں اُرش کتگ ءُ کہ ایشی ءِ آسر ءَ پورسز ءِ واستا گیشتریں تاوان بوتگ۔
یک ماھے ءِ تہ ءَ نوشکی ءَ پاکستانی لشکر ءِ سر ءَ اے دومی مزنیں اُرش اِنت ۔ ایشی ءَ چہ پیسر 26 مارچ ءَ بلوچ لبریشن آرمی ءَ نوشکی ءِ شھر ءِ نزیک ءَ وت کُش ءُ سنگر گپتگیں اُرشانی تہ ءَ پورسز نشانگ جوڑ کُتگ اَنت۔
بی ایل اے مجید بریگیڈ ءَ پاکستانی لشکر ءِ کارندہ سواریں بس ءَ گوں تراکناکیں گاڑی ءَ نشانگ جوڑ کتگ ءُ بس سرجم ءَ تباہ کتگ ءُ بی ایل اے ءِ ھاسیں اُرد ‘فتح اسکواڈ’ ءَ دگہ بسے ءِ کارندہ نشانگ جوڑ کتگ اَنت۔
اے سال ءَ بلوچ سلاھبندیں آجوئی گلانی اُرش گیش گندگ بوتگ اَنت۔ مارچ ءَ آجوئی دوستیں گلانی ھمسنت بلوچ راجی آجوئی سنگر (BRAS) ءَ جتا جتائیں جاھاں 88 اُرش کتگ انت۔
ایشی ءَ چہ پیسر بلوچ لبریشن آرمی ءِ مجید برگیڈ ءَ جعفر ایکسپریس دستیگ کتگ ءُ دو سد ءَ چہ گیش پاکستانی لشکر ءِ کارندہ یرگمال کتگ۔ رند ءَ درستیں کارندہ کشتگ بوتگ اَنت۔
مرچی نوشکی ءَ اُرش ءِ زمہ واری انگت ءَ ھچ گل ءَ نہ زرتگ ءُ واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔