بلوچ یکجھتی کمیٹی ءِ باسک گلزادی بلوچ ءَ چہ بندیگجاہ ءَ بلوچ راج ءِ نام ءَ نمدی ءِ داتگ، نمدی ءِ تہ ءَ آئی ءَ وتی دزگیری، چیریں ادارھانی داتگیں ازیت درشان کتگ انت ءُ بلوچ راج ھاسکر زالبولاں ھمے کلوہ داتگ کہ وتی جھد ءَ مھکمی ءَ گوں برجاہ بہ دار انت –
نمدی ءَ نبشتہ انت:
منی بلوچ راج!
امیت انت شما دراہ وش ءُ سلامت ات، الم مروچی شما جاھے ناں جاھے ، دگ ءُ چار راھے ءِ سر ءَ ھک ءِ ھاتر ءَ توار چست کنگ ءَ بہ ئے – مروچی ھم بلوچ مات زوراکی ءِ بگیری ءَ گھگیری ءِ چیدگ انت، شما مروچی ھم الم ھما نارھاں دگانی سر ءَ جنگ ءَ ات کہ زیک زوراک ءِ گوشے کر کُتگ انت –
ھما وھد ءَ کہ دومی رند ءَ دیم چیر داتگیں ریاستی کارمند منی گِس ءَ پُترتگ انت گڑا آ گنوکیں کُچک ءُ رسترانی وڑ ءَ ھر نیمگ ءَ دپ جنگ ءَ بوتگ انت، زاہ ءُ بد کنان ءَ من ءَ شوھاز ءَ بوتگ انت –
وھدیکہ من آیانی دیم ءَ اتکگ انت گڑا منی سر ءَ زھر ءَ ٹوپ ءَ ایر بوتگ انت، اگاں آیانی وس بہ شُت ایمنی چم ءِ کش اِت انت ءُ من ءَ کُشت اش، آیانی لرزوکیں دستانی گندگ ءَ سما بوگ ءَ ات کہ توپک دستیں دژمن ءَ چہ مئے پرایمنیں زرمبش ءِ دیم ءَ پروش وارتگ – من ءَ کشان کنان ءَ گاڑی ءِ توک ءَ دور دیگ ءِ وھد ءَ چہ پُشت ءَ یکے ءَ من ءَ سَے رند ءَ کُنداک جت ءُ زاہ ءُ بد کنان ءَ گاڑی ءِ دروازگ بند اش کُرت –
کمو دور رؤک ءَ پد یک جاھے ءَ گاڑی اشتات، دو کارمنداں منی دست پُشت ءَ بست انت ءُ من ءَ کوٹی ءَ بُرت اش ھمودا بازیں مردمے ءَ وتی دپ پل لکوشت – من درسیں گپاں گوشدارگ اِت انت، منی برزاد تاں ءُ بندوک تاں، اگاں کمے دست سُرینتگ انت گڑا چہ پُشت ءَ یکے ءَ من ءَ مُشت جتگ اگاں پاد سُرینتگ انت گڑا منی گور ءَ اوشتوکیں مردمے ءَ پاداں لگت ءِ جتگ ءُ من ءَ دور دور داتگ – اے وھد ءَ من ءَ سر جھل کنگی بوتگ اگاں سر کمے بُرز بوتگ گڑا یکے ءَ منی دیم ءَ مُشت جتگ –
بازیں وھدے ءِ کساس ادارے ءِ گوزگ ءَ پد اناگت ءَ کسے ءَ من ءَ توار پرجت کہ بہ نند، وھدیکہ من نشتاں گڑا اود ءَ نشتگیں دگہ یکے ءَ من ءَ وتگڑیں بھتام جت گوشت کہ بہ منّ اگاں من آیانی گپانی پسو ءَ اِناں کُت گڑا یکے ءَ منی سر ءِ سر ءَ زور ءَ جت کہ منی سر پاداں لگ اِت ءُ اناگت ءَ یکے ءَ منی لاپ ءَ دو رند ءَ زوراں گُوں مُشت جت کہ چریشی ءَ منی جان ءَ دردے چست بوت، دو رند ءَ منی گوم ءَ ھمے وڑ کنگ بوت –
ناشناسیں بندیگ جاھے ءَ من ءَ وڑ وڑیں بیھار دیگ بوگ ءَ ات کہ ما تئی سرجمیں کھول ءَ بیگواہ کن ایں، تئی برات بیگواہ کنگ بیت –
اے درسیں گپانی جنگ ءِ مول ءُ مراد ھمیش ات کہ بازیں وھدے بیت ریاست ءِ زوراکی مئے سر ءَ برجاہ انت کہ زورانسری آوار جنی، ژانگولیں جون، لٹ شاپ کُتکیں نیم مردگیں مردمانی ویرانگاں کپتگیں جون دگہ ھمے دابیں بازیں وئیل کہ بلوچستان ءَ ھمک روچ بوگ ءَ انت – بلے نوں ریاست ءِ جیڑہ ھما بے وسیں بلوچ مات ءُ گْوھار ءُ زھگاں کہ آیانی دست ءَ وتی دوستیگیں مردمانی اکساں ابید دگہ ھچ نیست ءُ ریاستی مشینری ھمیشی ءِ ھلاس کنگ ءَ وتی سرجمیں زور جنگ ءَ انت – تنخواہ زوریں ریاستی کارمند نوں بلوچ زالبولانی گشان ءِ سر ءَ اُرش کنگ ءَ ھم پدکنز نہ بنت –
گڑا اے وھد ءَ دروگ ءِ سر ءَ اوشتوکیں ریاست ءَ ھم اے کلوہ سر بہ بیت کہ بلوچ زالبول اناگتی اے جھد ءِ بھر جوڑ نہ بوتگ انت بلکیں آ شئوری، وتی رکینگ ءُ راجی جیڑیانی جھدے مھکمیں بھر انت – ھمے ھاتر ءَ بیھار، زورانسری آوار جنی، بجن بکوش چگل دے پالیسی نوں زالبولاں داشت نہ کنت، اگاں پہ زوراکی ءَ مردم ھاموش کنگ بوتیناں گڑا 2006 ءَ پد یک ماسومیں زھگے مھرنگ جوڑ نہ بوتگ ات، اگاں زورانسری آوار جنی جیڑیانی گیشگیوار بہ بوتیں گڑا دودا ءِ سمی ھستیں وھدے یزید واستا کوہ نہ بوتگ ات – اگاں پہ لٹ ءُ کُٹ ءَ لیکہ دارگ بہ بوت ایں گڑا راشد حسین ءِ مات بس زالبول ءُ زاکر مجید ءِ مات راج بی بی پجار جوڑ نہ بوت آں – اگاں پہ توپک ءِ زور ءَ سسا ءِ سر ءَ زورگری بہ بوت ایں گڑا دست پاد بندوکیں گلزادی مروچی تئی دیم ءَ پہ دیم نہ بوتگ ات کہ تو یکشل ءَ چار اداراں لٹ شاپ کتگ – اے دابیں ھزاراں کسہ ھست انت کہ وتی بیگواھیں یا ژانگولیں دوستگیں مردماں پد ریاستی زوراکی ءِ دیم ءَ گھگیری ءِ چیدگ انت –
منی پہ وتی راج ءَ کلوہ ھمیش انت کہ مارا مھکمی ءَ گوں اے پاشسٹیں ریاست ءِ دیم دارگی انت – اے مارا سسائی پروشگ لوٹ آں بلے مارا چہ وتی جھد ءَ پدکنزگی نہ انت، ما ھک ءِ سر ءَ ئیں ما وتی بیگواھیں مردمانی تواریں ءُ اے توار مدامی باتل ءِ دیم ءَ بُرز بیت –
گلزادی بلوچ
14 اپریل 2025
ہدہ جیل، شال
