TBP Balochi

شال ءِ دمگ ھزار گنجی ءَ مری بنجل ءِ نزیک ءَ تراک، پولیس ءِ رد ءَ تراک ءِ آسر ءَ یک کسان سالیں زھگے زدگ بیتگ ءُ ھسپتال ءَ برگ بیتگ-

بنداتی اھوالانی رد ءَ اے تراک لینڈ مائن ءِ آسر ءَ بیت کنت اِنت، بلے پولیس ءُ بمب ڈسپوزل اسکواڈ ءِ ٹیم وئیل جاہ ءَ سر بیتگ انت –

پولیس ءِ رد ءَ وئیل ءِ سرجمی ءَ پٹ ءُ پول بوگ ءَ انت-

بلوچستان ءِ بنجاھی شھر شال ءَ بندیگیں بلوچ سیاسی کھولانی نیمگ ءَ زھرشانی بنجلے برجم دارگ بیتگ-

بلوچ یکجھتی کمیٹی ءِ گوشگ انت کہ ڈاکٹر ماہ رنگ بلوچ، سبگت اللہ شاجی، بیبگر بلوچ، گلزادی بلوچ، بیبو بلوچ ءُ دگہ سیاسی بندیگانی گیر کانونی ءُ گیر آئینی دزگیری ءِ ھلاپ ءَ آیانی کھولاں شال پریس کلب ءِ دیم ءَ زھرشانی بنجلے برجم داشتگ-

دیمتر ءَ گوشگ بیتگ کہ بنجل ءِ مول ءُ مراد ریاستی زوراکیانی ھلاپ ءَ توار ءِ برز کنگ انت ءُ بندیگیانی یل دیگ ءِ لوٹ انت – سیاسی باسکاں ابید ءِ آئین ءِ ترز ءَ بندیگ کنھ انسانی ھکانی لگتمالی انت –

آیاں گوشتگ ما شال ءَ دراھیں پھنانی مھلوک، چاگردی ءُ سیاسی باسک، انسانی ھکانی زمہ واری ءُ شھریاں گوں دزبندی آ زھرشانی بنجل ءَ بیا انت ءُ سانمندیں کھولاں ھمدردی درشان بہ کن انت-

بلوچستان ءِ سروزیر چہ سرفراز بگٹی ءِ نیمگ ءَ بلوچ یکجھتی کمیٹی سر ءَ جتگیں بھتامانی سر ءَ بی وائی سی ءِ رھشون سمی دین بلوچ ءَ سرفراز بگٹی چیلنج کتگ کہ اگاں آئی ءِ گور ءَ پاکستانی بیرک ءِ ماندارگ ءِ تامُر ھست گُڑا آ دیم ءَ پیش بہ کنت-

سرفراز بگٹی ءَ پاکستانی ٹی وی چینل ءِ اِھوالکار ءَ داتگیں انٹرویو ءِ بھتام جتگ کہ بلوچ یکجھتی کمیٹی ءِ رھشون پاکستان دُژمن اَنت ءُ آئی ٹاہ داتگ کہ سمی دین بلوچ ءَ یک تامُرے ءَ پاکستانی بیرک مانداشتگ-

سروزیر ءِ اے ٹاہ ءِ پسّہ ءَ سمی دین بلوچ ءَ یک تُرندیں درشانے شنگ کتگ کہ آئی ءِ تہ ءَ آئی ءَ گْوشتگ منی پُرایمنیں جُھد اڑوکی جوڑ کنگ ءِ واستا ھر وھد ءَ تھنا دروگ ءُ رسانکدر ءَ پروپیگنڈہ ء سھارگ زرتگ ءُ ھمے دروگ مروچی ھم دیم ءَ آرگ ءَ اِنت تاں انّی ھمینچو بھتام جتگ کہ ایشانی تہ ءَ یکے ھم پدر نہ بیتگ-

آئی ءَ سروزیر تچکی ءَ دلگوش گور کنان ءَ گْوشتگ کہ سرفراز بگٹی ءَ را تچکی ءَ چیلنج کتگ کہ آ اے تامُر ءَ راج دیم ءَ بیار اِیت بگش اِیت کدی، کجا ءُ کجام درگت ءَ من اے وڑ کتگ؟ اگاں آ وتی بھتام ءَ پدر بہ کنت من وت ءَ کانود ءِ دست ءَ دیاں بلے اگاں آ منانک ءَ پیش نہ کنت گُڑا پیش داشت کت نہ کنت گُڑا آئی ءَ دزکشی دیگ لوٹ اِیت-

سمی دین بلوچ ءَ آمیدگس ءَ چہ ھم لوٹ کتگ کہ آ سروزیر ءِ ھلاپ ءَ اے دروگ ءُ وتگڑیں درشان ءِ سر ءَ کانودی کاروائی بہ کنت-

آئی ءَ دیمتر ءَ گْوشتگ کہ اگاں دروگیں بھتام ءِ بُنیاد ءِ سر ءَ مردماں چست کنگ یا دزگیری کت کن اَنت گُڑا کانود درستانی واستا یک ھساب بیگ لوٹ اِیت-

ایڈوکیٹ اسرار بلوچ ءَ گْوشتگ کہ مروچی کساس روچ ءِ دوازدہ ءَ لھتے دبّوکیں مردم شال ءَ منی لوگ ءَ زورانسری پُترتگ اَنت ءُ پُترگ ءَ منی کستریں برات یرغمال کتگ اَنت- آیاں یکو منی درگت ءَ جُست ئے کتگ لوگ ءِ پَٹ ءُ پول کتگ ءُ چیز شنگ شانگ کتگ اَنت لھتے کتاب وتی ھمراھی ءَ برتگ اَنت ءُ لھتے ڈن ءَ چگل داتگ اَنت گیش بیھار اش داتگ ءُ شتگ اَنت-

آئی ءِ رِد ءَ گوستگیں یک ماھے ءَ چہ منی کھول ءَ یکشل ءَ تُرسینگ ءَ اَنت- ایف سی بُنجل ءُ ھازری دیگ ءَ لاچار کنگ ءَ اَنت آیاں ءَ ھر وھد ءَ گوشگ بیت کہ اسرار ءَ سرپد کن اِت سیاسی پُرکاراں چہ گستا بہ بیت ءُ دیمتر ءَ ھچ وڑیں پولیٹیکل پارٹسپیشن ءَ چہ دزکش بہ بیت اگاں ناں گُڑا آئی ءِ زمہ واری شما درست بہ اِت-

اسرار بلوچ ءَ گْوشتگ کہ انسانی ھکانی ادارھانی لگتمالی ءِ ھلاپ ءَ ایکٹوزم ءُ بی وائی سی ءِ کارکنانی سر ءَ کریک ڈاؤن ءَ پد ھما ایف آئی آر کارکنانی ءُ لَس مھلوک سر ءَ جتگ اَنت آیانی کانودی رھشونی کنگ ءُ اے کارکنانی وکالت کنگ پُشدر ءَ منی ءُ منی کھول تُرسینگ ءَ اَنت-من تچک کنگ لوٹ آں منی ءُ منی کھول ءَ ھرچ وڑیں تاوان بیت گُڑا اشی ءِ سرجمیں زمہ وار ریاست ءُ ادارہ بنت ما اے وڑیں بیھاراں چہ نہ تُرس ایں، ھک ءُ راستی جنگ برجاہ ءَ اِنت-

بلوچستان ءِ دمگ کیچ ءِ بنجاھی شھر تربت ءَ آپسر ءِ ھند ءَ پاکستانی پوج ءِ چوکی ءِ سر ءَ پشمبے ءِ بیگاہ ءَ دزبمب اُرشے بیتگ-

اے اُرش اسٹار پلس مارکیٹ ءِ نزیک ءَ بوتگ وھدے کہ کارندہ چیکنگ ءَ دزبند بیتگ انت-

چمدیستگیں مردمانی رد ءَ ناشناسیں موٹر سائیکل سواریں اُرش کنوکاں چیک پوسٹ ءِ نزیک ءَ اتکگ ءُ دزبمب چگل داتگ ءُ واتر بوتگ انت-

انگت ءَ واکداراں اے اُرش ءِ بارو ءَ تاوانانی اھوال دیم ءَ نیتکگ انت-

انگت ءَ اے ارش ءِ زمہ واری کس ءَ نہ زرتگ، اگاں چہ اے گپ زانگ بہ بیت کہ بلوچستان ءَ پاکستانی لشکر ءِ سر ءَ اُرش گیش گندگ آیگ ءَ انت۔ ایشی ءَ پیسر مرچی کیچ ءِ دمگ دشت ءَ بمب ڈسپوزل اسکواڈ ءِ باسک نشانگ جوڑ کنگ بوتگ اَنت وھدے کہ آ یک سڑکے ءِ چارگ ءَ بیتگ انت ،دمگی مردمانی رد ءَ اے تراک ءَ کم چہ کم یک کارندھے بیران ءُ دو ٹپیگ بوتگ اَنت۔

پاکستانی پوج ءَ بازیں مردمے دزگیر کنگ ءَ پد بیگواہ کتگ انت-

بلوچستان ءِ دمگ سبی لھڑی ءِ کش ءُ گوراں پاکستانی پوج ءِ بازیں کچے ءَ زمینی ءُ برزی لشکر کشی مروچی برجاہ بیتگ ءُ لوگ لوگ ءَ پٹ ءُ پولے کتگ-

چہ سبی ءَ اھوال انت کہ پاکستانی پوج ءَ ھمے وھد ءَ لوگانی سر ءَ بیڑ برتگ ءُ دمگ ءَ دَہ ءِ کچ ءَ مردم دزگیر کتگ ءُ گون وت برتگ انت-

پاکستانی پوج ءَ دزگیر کتگیں مردم ناشناسیں جاھاں برتگ انت ءُ پد ءَ آیانی اھوال نہ بیتگ انت – گڈی اھوالانی رد ءَ لھڑی ءِ کش ءُ گوراں پاکستانی پوج ءِ لشکر کشی برجاہ بیتگ-

سبی لھڑی ءَ دزگیر بیتگیں مردمانی پجار زانگ نہ بیتگ انت ءُ دمگ ءَ آپریشن ءِ سبب ءَ موبائل نیٹ ورک پچ کنگ نہ بیتگ انت-

بلوچستان ءِ دمگ کیچ ءَ پاکستانی پوج بمب تراکے ءِ نشانگ کنگ بیتگ-

مروچی دشت ءِ دمگ درچکوہ ءَ ناشناسیں مردماں پاکستانی پوج ءِ بمب ڈسپوزل اسکواڈ ءِ پیادگ کارندہ ھما وھد ءَ تراک ءِ نشانگ کتگ اَنت وھدے آ راہ کلئیرینس ءَ دلگوش بیتگ اَنت-

دمگی اِھوالکار رِد ءَ تراک ءَ کم چہ کم یک کارندھے بیران ءُ دو ٹپی بیتگ اَنت بلے واکدارانی نیمگ ءَ اے درگت ءَ درشان انگت شنگ نہ بیتگ-

اُرش ءِ زمہ واری انگت ھچ گل ءَ نہ زرتگ-

بلوچستان ءِ نوشکی ءَ پاکستانی پوج ءِ سر ءَ اُرش ءِ اھوال دیم ءَ اتکگ-

ھالانی رد ءَ اُرش ءِ آسر ءَ دو کارندہ میاں خان ءُ نسیب اللہ مرتگ انت۔

اُرش پشمبے ءِ نیمروچ ءَ پیش اتکگ کہ اود ءَ ناشناسیں اُرشکاراں پوج نشانگ کتگ-

اُرش ءَ ھر دوک ٹپی بیتگ انت ءُ نادراھجاہ ءَ سر کنگ ءِ وھد ءَ ھردوکاں ساہ داتگ انت-

انوگ ءَ تاں کس ءَ زمہ واری نہ من اِتگ ءُ نہ کہ واکدارانی نیمگ ءَ چہ ھچ وڑیں بیان شنگ بوتگ انت۔

بلوچستان ءَ بیگواھیں مردمانی لاشانی دزکپگ یکشل ءَ برجاہ گوستگیں بیست ءُ چار ساھتانی میان ءَ بلوچستان ءِ جتا جتائیں جاھاں سَے لاش دزکپتگ انت-

بلوچستان ءِ دمگ تربت ءَ یک لاشے دزکپتگ کہ بلوچستان ءَ اے لاش ءِ ھواری ءَ ھیست ءُ چار ساھتاں سیمی لاش انت-

دزکپتگیں لاش ءِ پجار شیر خان نزر جھمنند پسنی ءِ نام ءَ زانگ بیتگ کہ آ پانزدہ اپریل ءَ تربت جوسک ءَ بیگواہ کنگ بیتگ کہ آئی ءِ بیگواھی ءِ ھال بی وائی سی ءَ پدر کتگ –

دمگی اھوالانی رد ءَ شیر خان ءِ جسم ءَ تیرانی ٹپ پر بیتگ انت ءُ آئی ءِ لاش گوستگیں روچ چار شمبے ءَ تربت ءَ یونیورسٹی ءِ پشت ءَ دزکپتگ-

گوستگیں روچ ءَ کسان سالیں نزام ء مھمود تھسیل پسنی ءَ دزکپتگ کہ آ پاکستانی چیریں ادارھاں دوازدہ اپریل ءَ بیگواہ کتگ بیتگ-

ھمے وڑ ھزدار ءِ دمگ نال ءَ دگہ فاروق ء نور اھمد مینگل ءِ لاش دزکپتگ بیتگ کہ نور اھمد بی این پی ءِ دمگی سروکے ءُ آ پی این پی ءِ دھرنا ءَ جاڑیگیں مردمے بیتگ ءُ چاردہ اپریل ءَ فاروق آوار جنگ بیتگ ءُ گوستگیں روچ ءَ آئی ءِ لاش دزکپتگ-

بلوچستان ءِ دمگ چہ پنجگور ءَ زی بیگواہ کنگ بیتگیں دگہ لھتے مردمانی پجّار بیتگ-

گیشیں ھالانی رِد ءَ پاکستانی پوج ءَ زی پنجگور ءِ دمگ پروم ءَ لشکر کشی بندات کنان ءَ لوگ لوگ ءَ پٹ ءُ پول کتگ ءُ زالبول ءُ چُکاں ھوار بازیں مردمے آوار جتگ اَنت-

زی بیگواہ کنگ بیتگیں دگہ دو مردم ءِ پجّار بیتگ اَنت کہ آیانی تہ ءَ سمیر ء ابراھیم جھمنند تربت ءُ نظام ء حاجی عیسی ھوار اَنت-

دمگی مردمانی رِد ءَ سمیر تربت ءِ جھمنند اِنت ءُ اے وھد ءَ پروم ءَ وتی سیادانی گند ءُ نند ءَ اتکگ بیتگ آ وتی یک سیادی سیف اللہ ء دلمراد ھمراھی ءَ لشکر کشی میان ءَ آوار جنگ بیتگ-

زانگ بہ بیت کہ زی چہ پروم ءَ لشکر کشی ءِ میان ءَ پاکستانی پوج ءَ بازیں مردمے آوار جتگ اَت کہ تنی وھدے ھشت مردم ءِ پجّار بیتگ اَنت-

پروم ءَ لشکر کشی ءُ مردمانی زورانسری آوار جنی ءِ ھلاپ ءَ دمگ مردمانی نیمگ ءَ چہ مروچی یک روانکے برجم دارگ بیتگ ، کہ پروم جائین ءَ چہ بندات بیتگ ایف سی بُنجل دیم ءَ نندانک دروشم اتکگ-

گُڈی ھالانی رِد ءَ اے وھد ءَ مزنیں کچے ءَ مردم آیانی تہ ءَ زالبول ءُ چکانی مزنیں کچے ءَ ھوار اَنت ایف سی بُنجل دیم ءَ نندانک ءَ نشتگ اَنت-