TBP Balochi

بلوچستان ءَ زورانسری آوار جنی ءِ دْرچ بندی ءِ نام ءَ نزانت، جتاجتائیں دمگاں چہ گیش سیزدہ مردم پاکستانی پوج ءِ دست ءَ بیگواہ کنگ بیتگ اَنت-

گیشیں ھالانی رِد ءَ بلوچستان ءِ تیاب دپی شھر گوادر ءِ تھسیل پسنی ءَ سے مردم پاکستانی پوج ءَ آوار جنگ ءَ پد زورانسری بیگواہ کتگ-

ھالانی رِد ء ڈگری کالج پسنی ءَ فرسٹ ایئر نودربر نودربر عامر بلوچ ء داد بخش ءُ عثمان بلوچ ء عبدالغنی گوستگیں شپ ءَ پسنی ءَ یک ھجام دُکانے ءَ چہ چست کتگ-

دوئیں کھول رسانکدر ءَ گْوشتگ کہ دوئیں ورنا کار وھد ءَ چست کتگ اَنت وھدے کہ وارث نامیں یک ورنایے سر دشت ءِ جھمنندے گوشگ بیگ ءَ اِنت کار وھد ءَ ڈیوٹی آر ایچ سی پسنی ءَ چہ چست کتگ اَنت-

اے بیگواھیں ورنایانی کھول ءَ واکدار ءَ گوں آیاں یل کنائینگ لوٹ کتگ گْوشتگ اے ورنا ھچ وڑیں سیاسی پُرکاریاں گوں ھچ سیادی نیست وھدے کہ عامر بلوچ یک نودربرے-

بیگواھیں عامر ءِ کھول ءَ گوشتگ کہ مئے کھول ءِ پرد عامر خان ، بیست نُھ اپریل دوھزار بیست پنچ ءِ بیگاہ ھپت نزیکی ءَ پسنی ءَ یک ھجامے ءِ دکان ءَ کار وھد ءَ پاکستانی چیریں ادارھانی کارندھاں آوار جتگ- عامر خان پسنی ڈگتی کالج بنداتی سال ءِ نودربرے-

آیاں گوشتگ کہ اے یک نوکیں گپے نہ اِنت – گوستناک ءَ ھم پسنی ءَ بازیں نودربرے اے وڑ زورانسری بیگواہ کتگ اَنت – بژن اِنت اشانی تہ ءَ بازیں ورنایے رند ءَ لاش ءِ دروشم ءَ دزکپتگ-

کھول ءَ گْوشتگ کہ مارا عامر خان ءِ زند ءِ درگت ءَ سک تُرس اِنت- آئی ءِ یکیں جرمے اش اِنت کہ آبلوچ نودربرے-

چہ تربت ءَ ھالانی رِد ءَ گوستگیں روچ ءَ دو ورنا شے حق بلوچ کہ آئی ءِ اُمر ھپدہ سال گوشگ بیگ ءَ اِنت ، ءُ آدم سلیم کہ شانژدہ سال گوشگ بیگ ءَ اِنت پاکستانی پوج ءَ دزگیری ءَ پد ناشناسیں جاھے برتگ-

شے حق ءِ گْوھار ءَ رسانکدر ءَ نبشتہ کتگ تُرس درشان کتگ گوشتگ کہ آ آئی ءِ جند ءِ پھازی درگت ءَ چہ پریشان اِنت، آئی ءَ پہ سلامتی یل کنائینگ ءَ دلجمی بدے اِت-

ھمے وڑ چہ تربت ڈی بلوچ ءَ یک ورنایے آوار جتگ ، اشی ءَ ساری آئی ءِ برات بیگواہ کنگ بیتگ-

کھول رِد ءَ عبدالمجید ء عبدالغنی گوستگیں شپ ءَ کراچی ءَ چہ تُربت آیگ ءَ راہ ڈی بلوچ ھند سر ءَ ناشناسیں مردماں آوار جتگ-

اِھوالکار گوشگ اِنت کہ عبدالمجید اے وھد ءَ وتی چُکانی ھمراھی ءَ گاڑی ءِ ودار ءَ اوشتوک بیتگ وھدے لھتے ناشناسیں مردماں آ زورانسری گاڑی ءَ مان کتگ وتی ھمراھی ءَ برتگ-

کھول رِد ءَ اے اولی رند نہ اِنت، اشی ءَ ساری عبدالمجید ءِ یک براتے ھم ھمے وڑ زورانسری آوار جتگ ءُ بیگواہ کتگ، کہ پد ءَ چیزے وھد ءَ پد یل داتگ-

عبدالمجید ءِ کھول ءَ وئیل سر ءَ دلپدردی درشان کنان ءَ ھکومت ءُ ھمگرنچیں ادارھاں چہ لوٹ کتگ کہ آ عبدالمجید ءَ زوت پہ سلامتی یل کنائینگ ھاتر ءَ گامگیج بزور اَنت-

ھمے وڑ چہ تربت ءَ ھال اِنت کہ احسان فاروق ء نعیم کہ خیر آباد ءِ جھمنند اِنت – بیست چار اپریل دوھزار بیست پنچ ءَ تربت ءَ چہ دُبئی ءَ روگ واستا کراچی نیمگ ءَ روگ ءَ بیتگ کہ تلار چیک پوسٹ سر ءَ پاکستانی پوج ءَ چست کتگ زورانسری آوار جنی ءِ نشانگ کتگ- احسان ءِ درگت ءَ کھول ءَ ھچ وڑیں سرپدی دیگ ءَ نہ اِنت-

ھمے وڑ گوستگیں شپ ءَ سبی ءِ دمگ لھڑی ءِ ھند سر ءَ پاکستانی پوج لوگانی سر ءَ بیڑبرتگ پنچ مردم آوار جتگ ءُ بیگواہ کتگ-

چہ ڈیرہ بگٹی ءَ ھم پاکستانی پوج ءَ یک مردمے زورانسری آوار جنی ءِ نشانگ کتگ- بلے آئی ءِ پجّار انگت نہ بیتگ-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ کیچ ءِ دمگ بلیدہ ءَ یک کاروائی ءِ وھد ءَ پاکستانی پوج ءُ چیریں ادارھانی کارندھانی جوڑ کرتگیں وتگڑیں گل ڈیتھ اسکواڈ ءِ سروک ناسر کریم کشتگ-

ڈیتھ اسکواڈ کے انت ءُ سیاسی ءُ مھلوک ءِ زبانی پہ ڈیتھ اسکواڈ ءَ چی انت؟

بلوچستان ءَ ڈیتھ اسکواڈ ءِ نام ھما نامانی توک ءَ گندگ ءَ کیت کہ آئی ءَ بلوچ ورنایانی کُشگ ءُ زورانسری بیگواھی ءَ ھوار انت-

ڈیتھ اسکواڈ تھنا مکران ءُ کیچ ءَ اناں بلکیں بلوچستان ءِ بازیں جاھاں پوج ءِ چیردستی ءَ کار کنگ ءَ گندگ بیت اِنت-

ڈیتھ اسکواڈ ءِ ھلاپ ءَ بلوچ مھلوک ءَ گوست ءَ زھرشانی کتگ ءُ آئی ءِ سلاھانی پچگرگ ءُ دزی ءُ ڈنکیانی دارگ ءِ لوٹ کتگ-

ڈیتھ اسکواڈ بلوچستان ءَ ایوک ءَ بلوچ ورنانی کوش ءُ بیگواہ کنگ ءِ ناماں زانگ نہ بیت بلکیں آئی ءِ سر ءَ اے بھتام ھم گندگ ءَ کیت کہ آ دمگ ءَ چاگردی سلکاری ءُ نشہ آوریں چیز ءُ دگر دگراں ھواری ءَ گندگ بیت اِنت-

بی ایل اے ءِ جارکش جیئند بلوچ ءَ گوشتگ سَے شمبے ءِ مگرب ءِ وھد ءَ الندور ءَ بلوچ لبریشن آرمی ءِ سرمچاراں یک سلاہ بندیں اُرشے ءَ ناصر کریم ء عبدالکریم ھما وھد ءَ نشانگ کتگ کہ آ وتی ھمراھانی ھمراھی ءَ گاڑی ءَ جاڑیگ بوتگ – اُرش ءَ ناصر ھما جاہ ءَ مرتگ ءُ آئی ءِ ھمراہ زبیر زدگ بیتگ-

آئی ءَ گوشتگ ناصر کریم زھور بلیدھی ءِ سروکی ءَ ھستیں ڈیتھ اسکواڈ ءِ سروکی ءَ کنگ ءَ بیتگ – آئی ءِ ٹولی ءَ راھانی بندگ ، سلاہ بندیں گشت، لوگانی بیڑ، ورنایانی بیگواہ کنگ ءُ تیرانی نشانگ کنگ ءِ جرماں ھوار بیتگ ءُ اے کارانی سبب ءَ زورگریں پوج ءَ آئی ءَ را دزی ءُ ڈنگی ءُ ملام ءُ نشہ واپار داری ءَ مھار گٹ ءَ داتگ انت-

آئی ءَ گوشتگ بلوچ کُش کاروائیانی سبب ءَ ناصر کریم بلوچ لبریشن آرمی ءِ ھٹ لسٹ ءَ ھوار بیتگ کہ سرمچاراں کشتگ ءُ گڈی آسر ءَ سر کتگ- اے نیٹورک ءِ دراھیں باسکانی نشانگی بیتگ ءُ زوت آ ھمے ڈول ءَ آسری ءَ سر کنگ بنت اِنت-

بلوچستان ھائی کورٹ ءَ 3 ایم پی او ءِ رِد ءَ بندیگ بلوچ رھشونانی آجوئی ءِ جیڑہ، ھکومت ءَ 40 مردمانی آجو کنگ ءِ رپورٹ آمیدگس ءَ پیش کُت۔

شال بلوچستان ھائی کورٹ ءَ بلوچ یکجھتی کمیٹی ءِ رھشونانی ءُ دگہ سیاسی باسکانی بے رھبندی بُنیات ءَ دزگیری ءِ بگیر ءَ نبشتگیں کاگدانی چار ءُ تپاس مرچی چیف جسٹس اعجاز سواتی ءُ جسٹس عامر رانا ءَ ھواری ءَ بوت انت۔

چار ءُ تپاس ءِ میان ءَ بلوچستان نیشنل پارٹی ءِ بُنجاھی سینئر نائب صدر ءُ گوستگیں صدر بلوچستان ھائی کورٹ بار ساجد ترین ایڈووکیٹ ءَ سبوت پیش کُت، سبوتاں چہ پد آمیدگس ءَ بازیں رھشون ءُ باسکانی آجو کنگ ءِ ھکم دات، چمیشی ءِ رِد ءَ ھکومت بلوچستان ءَ 40 مردمانی آجو کنگ ءِ رپورٹ آمیدگیس ءَ جما کنائینت، ھمے مردماناں 3 ایم پی او آرڈرز واپس زُرتگ ءُ آجو کُتگ انت۔

آمیدگس ءَ چہ تُرندی ءَ ھدایت کُتگ کہ بلوچ یکجھتی کمیٹی ءِ رھشون ڈاکٹر ماہ رنگ بلوچ، گل زادی بلوچ ءُ بیبرگ بلوچ ءَ چہ شال زندان چِہ دومی ھندی زندان ءَ برگ مہ بنت۔

آمیدگس ءَ کیس ءِ چار ءُ تپاس دوشمبے تک ایر کنگ ءَ ھکومت ءَ را گیشیں مردمانی یل کنائینگ ءِ سِتک ایر کُتگ ءُ ھدایت داتگ، ھکومت بلوچستان ءَ آمیدگس ءَ را یکین کنائینتگ کہ دیم ءِ چار ءُ تپاس ءَ گیش مردماں آجو کنیں۔

آمیدگس ءَ بی وائی سی راھدربرانی 3 ایم پی او ءِ رِد ءَ چہ دزگیریانی بابت ءَ جتائیں لگ اِتگینانی ھم چار ءُ تپاس بوت۔

ڈاکٹر حمل، سبغت اللہ شاہ جی ءُ بیبرگ بلوچ ءِ کیسزانی گشگ بوت کہ ڈاکٹر حمل آزات کنگ بوتگ، وھدے شاہ جی ءُ بیبرگ تننگا بندیگ ءَ اَنت۔ آمیدگس ءَ چہ ھکومت ءَ دوشمبے ءَ تک درشانی ءِ لوٹ کُت۔

ڈاکٹر ماہ رنگ بلوچ ءِ دزگیری ءَ ھم چار ءُ تپاس بوت، چمیشاں چِہ ریاستی وکیل ءَ آمیدگس ءَ یکین کنائینتگ ءُ گُشتگ کہ داں دوشمبے ءَ آیانی دزگیری ءِ سرجم ءَ کیس ءِ بیان ءَ آمیدگس ءِ دیم ءَ پیش کنائینگ بیت۔ آمیدگس ءَ گُشتگ کہ اگاں آجوئی ممکن نہ بوت گڑا کانونی جواز پیش کنیں۔

دیگہ 90 مردمانی چہ دزگیری ءِ سیادی ءَ کیس ءَ گُشگ بوت کہ چمیشاں چِہ 16 مردم ریاستی زندان ءَ نہ انت، 20 آجو کنگ بوتگ انت ءُ یکے ءَ را گڈانی ءِ زندان ءَ را دیگ بوتگ، ءُ انچوش کہ وھدے کھول زندان ءَ شُتگ انت جیلوں گڑا مالوم بوت کہ چہ ھمے 16 ءِ تہ ءَ بس 3 مردم زندان ءَ اِت انت، چہ ھمشاں چِہ یکے آجو کُتگ دگہ 13 مردمانی ھچ ھال نیست انت، چمیشی ءَ چِہ وکیل ءُ کھولاں سک ءَ رنجیگ ءِ درشان کُتگ۔

آمیدگس ءَ ھکم داتگ کہ ھما مردمانی پَھریزگ ءَ یکین جوڑ بکن اِت ءُ آیاناں آیانی کھولانی دست ءَ بدی اِت۔

دومی نیمگ ءَ بندیگیں بی وائی سی رھشون بیبو بلوچ ءُ گل زادی بلوچ ءِ کیسز ءَ ھم آمیدگس ءَ ھکومت ءَ را داں دوشمبے ءَ تچکیں رپورٹ ءِ جما کنگ ءِ ھکم داتگ۔

بیبو بلوچ ءِ وکیل ءَ وتی ھیال درشان کُت کہ آئی ءِ پِت ھم بندیگ کنائینگ بوتگ، مات سک ءَ نادراہ انت ءُ بیبو ءَ دومی ھند ءِ زندان ءَ دیم دیگ بوتگ، چمیشکا انسانی بنیات ءَ آجو دیگ بہ بیت وھدے کہ آمیدگس ءَ آجوئی ءِ ھکم نہ دات۔

بلوچ یکجھتی کمیٹی ءِ جار ءِ پد ءَ سرجمیں بلوچستان ءَ 29 اپریل ءَ رنجیگیں روچ دارگ بیتگ- ھمے وھد ءَ جتا جتائیں ھنداں زھرشانی، زالبول ءُ زھگاں بازیں کچے ءَ بھر زرتگ ءُ پُر ایمنیں روانک کش اتگ ءُ ریاستی زوراکی، زورانسری بیگواھی ءُ ابید ءِ آمیدگسی پرمان ءَ کوشانی ھلاپ ءَ توار برز کتگ-

بی وائی سی ءَ اے روچ وتی دزگیریں رھشون ماہ رنگ ، بیبو، گلزادی، بیبرگ ءُ شاجی سبگت اللہ ءِ دزگیری، بلوچستان ءَ برجاھیں دروگیں دیم پہ دیمی کوش، زورانسری بیگواھی ءُ انسانی ھکانی لگتمالیانی ھلاپ ءَ دارگ ءِ جار جتگ بیتگ-

شال ءَ زورانسری بیگواھیں مردمانی کھول، گیش زالبول ءُ زھگ، ڈی سی آفس ءِ دیم ءَ مُچ بیتگ انت، زھرشانی کنوکاں وتی دوستیگیں مردمانی اکس ءُ ناماں ھوار چارٹ چِست جتگ انت ءُ بے تواری ءِ ھواری ءَ زھرشانی نندانک داتگ ءُ زھرشانی یاداشت کتگ- زھرشانی کنوکاں تچک ءَ کلوہ داتگ کہ زورانسری بیگواھی ءُ دزگیریاں ابید آیانی توار ءَ ایر موش بوت نہ کنت اِنت-

دالبندین ءَ ڈی سی آفس ءِ دیم ءَ رنجیگی ءِ چیدگ کنگ بیتگ، زھرشانی کنوکاں بے تواری ءِ گرِد کنان ءَ بیگواھین ءُ دزگیریں نامانی چارٹ چِست کتگ بیتگ انت-

ھزدار ءِ شھر ءَ پرایمنیں زھرشانی کنان ءَ ریاستی پالیسیانی ھلاپ ءَ جست چِست کنگ بیتگ، زھرشانی کنوکاں گوشتگ آ بیگواھیں مردماں ھچبر پراموش نہ انت ءُ آیانی واستا انساپ لوٹ انت-

نال ( تھسیل ھزدار) ءَ ھم شھریاں بی وائی سی ءِ گون ءَ ھمدردی ءِ واستا زھرشانی کتگ – زھرشانی کنوکاں زورانسری بیگواھی، ابید آمیدگسی کوش ءُ ریاستی زوراکیانی ھلاپ ءَ توار برز کتگ ءُ لوٹ کتگ کہ بیگواھیں مردم دیم ءَ آرگ بہ بنت اِنت-

مستونگ ءَ رنجیگیں روچ ءِ وھد ءَ چار جتا جتائیں جاھاں چیدگی زھرشانی کنگ بیتگ – اے جاھاں گوستگیں زوراکیانی یادگار سرپد بنت اِنت- کہ ایشانی توک ءَ نواب ھوٹل ( کہ اود ءَ راجی مُچی ءِ کاروان ءِ سر ءَ اُرش بیتگ) –

گرلز ھائی اسکول( کہ اود ءَ بمب تراک ءَ بازیں نودربر بیران بیتگ انت، سراوان پریس کلب ءُ میلاد النبی مسیت ءَ کہ اود ءَ نیکراھی مُچی ءِ سر ءَ بمب تراک کنگ بیتگ)-

ھمے جاھاں زھرشانی کنوک اوشتاتگ ءُ وتی جزبگ ءُ لوٹانی درشان اش کتگ ءُ آیاں اے تچک کتگ کہ اے وئیلانی ھلاپ ءَ نا ایوک ءَ یاداشت کن آں بلکیں ایشانی ھلاپ ءَ گھگیری کن اَنت-

ھمے وڑ پنجگور ءَ ھم بلوچ یکجھتی ءِ نیمگ ءَ رنجیگیں روچ دارگ بیتگ کہ اود ءَ زالبول ءُ دگراں زھرشانی ءِ بے توار روانک ءُ رنجیگی ءِ چیدگ ءُ زُلم ءُ زوراکیانی ھلاپ ءَ چیدگ کَشی کتگ-

بلوچ یکجھتی کمیٹی ءِ رد ءَ رنجیگیں روچ ءِ دارگ زھرشانی ریاستی زوراکی، انسانی ھکانی لگتمالی ءُ سیاسی باسکانی دزگیری ءِ ھلاپ ءَ یک پُر ایمن ، مُچی ءِ درشان انت، جتا جتائیں جاھاں شھراں اے گپ ءِ پدراھی ءَ کنت اِنت کہ مھلوک زورانسری بیگواھی ءُ دگہ ریاستی کاروائیانی ھلاپ ءَ بے توار نہ بیت اِنت وتی دوستیگیں مردمانی واستا جد ءُ جھد ءَ برجاہ کنت اِنت-

گوستگیں شپ ءَ تربت ءِ دمگ ڈنک ءَ ایف سی ءِ کاروان ءِ سر ءَ بیتگیں اُرش ءَ پد دو نیمگی جنگ ءُ چوپ ءَ بیران بیتگیں سَے کَسانی پجار بیتگ انت-

بیران بیتگینانی توک ءَ نبیل اھمد ء رسول بخش ھوت، زکا اللہ سنگھور ء علی سنگھور ءُ فیروز پنام ءِ ساربان ء اللہ بخش ءِ ناماں زانگ بیتگ انت-

نبیل اھمد ءُ زکا اللہ سنگھور ھردوک گوگدان ءِ جھمنند انت ءُ فیروز ءِ سیادی آپسر ڈاکی بازار ءَ انت-

ھرسئیں مردمانی لاش داں انگت ءَ ایف سی ءِ دست ءَ انت ءُ آیاں کھولانی ھوالگ ءَ کنگ ءَ نہ انت – دمگی مردمانی گوشگ انت کہ اے ھرسئیں مردم دو روچ پیش ایف سی ءِ کاروان ءِ سر اش بستگ ءُ ترندیں اُرش ءَ پد بیران بیتگ انت ءُ چریشی ءَ پورسز ءِ بازیں کارندہ کشگ ءُ زدگ بیتگ انت-

پاکستان ءِ بنجاھی وزیر عطا اللہ تارڑ ءَ گوشت کہ بھارت ءِ نیمگ ءَ چہ ھرچ وڑیں فوجی کاروائی ءَ را یک پکّائیں ءُ پیسلہ کنوکیں پسوے دیگ بیت انت-

پاکستان ءِ وفاقی ھال رسانی ءِ وزیر عطا اللہ تارڑ ءِ گشگ اِنت کہ پاکستان ءَ گچینی انٹیلی جنس ھست کہ پھلگام ءِ وئیل ءِ بنیاد ءَ آیوکیں 24 ءَ بگر داں 36 کلاک ءِ تہ ءَ پاکستان ءِ ھلاپ ءَ بھارت ءِ ارادہ اِنت کہ آ فوجی کارروائی ءَ بہ کنت۔

زانگ بہ بیت کہ بھارتی مزن وزیر نریندر مودی ءَ پیسر ءَ ھم گْوشتگ کہ پھلگام ءِ اُرش ءِ پسو ءِ رھبند، ٹارگٹ ءُ وھد ءِ زانگ ءِ ھاترا سلاہ بندیں اُرد ءَ را ”سرجمیں آپریشنل آجوئی“ ھست۔

سئے شمبے ءِ روچ ءَ شنگ بوتگیں بیان ءِ تہ ءَ وفاقی وزیر ءِ اھوالکاری ءَ گوشت کہ پاکستان دمگ ءَ بھارت ءِ وت مہ وتی منسپ ، قاضی ءُ جلادی ءِ کرد ءَ را سک رد کنت انت۔

آئی ءَ گوشت کہ پاکستان وت دو دھکاں چہ ناشرکاری ءِ دیم ءَ انت ءُ دگنیا ءَ کدی دگہ ھچ وڑیں ھوپ ءِ دیمپان نہ بوتگ-

وفاقی وزیر ءَ گوشت کہ پھلگام ءِ اُرش ءَ پد پاکستان ءَ یک زمہ واریں ریاست ءِ بستار ءَ آزات ءُ بے رھبندیں پٹ ءُ پول ءِ پیشکش کتگ۔ بلے گیر سنجدیگی ءَ ہندوستان ءَ بے اگلی ءَ جنگ ءِ راہ ءِ روگ ءِ راہ گچین کتگ کہ ایشی ءِ سبب ءَ دمگ ءُ دنیا ءَ تباہ کنوکیں آسر دیم ءَ کاینت۔

وفاقی وزیر ءَ اے گپ پدر کت کہ بھارت ءِ نیمگ ءَ چہ ھرچ فوجی کاروائہ ءَ را یک ھاسیں ءُ پیسلہ کنوکیں پسو ءِ گوما دیم پہ دیم کنگ بیت۔

آئی ءَ گیش گوشت کہ میان اُستمانی برادری ءَ را اے گپ ءِ سرپد بوھگ ءِ زلورت اِنت کہ جنگ ءِ ھرابیں آسرانی زمہ واری ایوک ءَ بھارت ءِ سر ءَ کپ ایت۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست نُھ اپریل ءَ سے شمبے ءِ نیمروچ ساھت یک ءَ پنجگور ءِ دمگ چتکان بازار ءَ پوجی کارندھانی سر ءَ نوکیں سلاھاں گوں اُرش کتگ، چریشی ءِ آسر ءَ زورگریں پوج ءِ دو کارندہ جاہ پہ جاھی مرتگ اَنت-

جارکش ءَ گْوشتگ کہ بلوچ سرمچارانی تُرس ءَ چہ لَس مھلوک ءَ وتی مول ءُ مرادانی واستا کارمرز کنت ءُ توژگ ءُ سامان زیرگ ءَ دیم دنت-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت ءُ راج ءَ را کڈن کنت کہ آ پوج ءُ ایف سی ءَ چہ گستا بہ بنت پرچاکہ کجام وھد ءَ مئے سرمچارانی نشانگ ءَ بنت ما نہ لوٹ ایں کہ مئے کاروائی ءَ لَس مھلوک ءَ کجام وڑیں تاوان بہ رس اِیت-

کیچ ءِ بُنجاھی شھر تربت ءَ پاکستانی پوج ءِ آپریشن میان ءَ سے مردم بیران بیتگ اَنت-

ھالانی رِد ءَ تربت ءِ دمگ ڈنک ءَ شپ وھد ءَ دو تراکاں پد تُرنریں تیرگواری توار اش کنگ بیتگ، چریشی ءَ پد پوج ءَ دمگ انگیر ءَ کتگ لوگ لوگ پٹ ءُ پول بندات کتگ-

دمگی اھوالکار رِد ءَ تراکانی درچ شپ کساس چار ءَ بندات بیتگ، داں سھب پنچ ءَ وھد وھد سر ءَ تیرگواری رِد برجاہ بیتگ- سرچ آپریشن میان ءَ پوج ءَ ڈنک ءَ دو مردم تیرگواری کتگ ءُ کُشتگ اَنت- بلے اے آپریشن تربت ءِ دمگی انتزامیہ نیمگ ءَ ھچ وڑیں ھال دیم ءَ نیتکگ-

ھمے وڑ تربت ءِ دمگ چہ چوسک ءَ ھم یک مردمے ءِ بیرانی ءِ ناسرجمیں ھال سر بیتگ-

دومی نیمگ ءَ پاکستانی پوج ءِ ھمگرنچیں ادارہ آئی ایس پی آر ءَ یک درشانے ءِ تہ ءَ ٹاہ داتگ کہ تربت ءَ چیریں ھالانی رِد ءَ آپریشن میان ءَ سے سلاہ بندیں مردم تُرندیں تیرگواری رِد ءَ بیران بیتگ اَنت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ بلوچستان ءِ دمگ ڈیرہ بگٹی ءِ ٹوبو ءَ زورگریں پاکستانی پوج ءِ یک چیک پوسٹ کسان ءُ مزنیں سلاھاں چہ اُرش کتگ- اے اُرش ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ بلوچ ریپبلکن گارڈز اے اُرش زمہ واری ءَ منّ اِیت – مئے اے وڑیں اُرش بلوچستان ءِ وتواجھی ءَ تاں برجاہ بنت-

چہ شال ءَ ھالانی رد ءَ ھمے ماہ ءِ 26 اپریل ءَ پاکستانی لشکر ءَ رودراتکی بائی پاس ءِ سر ءَ چہ نائی ءِ دکان ءَ دو ورنا دزگیر کتگ ءُ ناشناسیں جاھے ءَ برتگ اَنت۔

دوئیں ورنایانی پجار عبدالباسط مالی خسن ءُ غلام محمد ء گھور خان ءِ ناماں بوتگ اَنت کہ اسپلنجی مستونگ ءِ نندوک اَنت۔

بلوچ یکجھی کمیٹی ءَ دوئیں مردمانی زورانسری بیگواھی ءِ ھال راست کتگ۔

زانگ بہ بیت کہ بلوچستان ءِ دمگ مستونگ ءِ ھند اسپلنجی ءَ گوستگیں چار روچ ءَ چہ یک فوجی آپریشنے برجاہ اِنت کہ ایشی ءِ تہ ءَ تاں انوگ ءَ پورسز ءَ پنچ مردم دزگیر کتگ ءُ پد ءَ بیگواہ کتگ انت۔

اسپلنجی ءِ وئیل ءِ ھلاپ ءَ دمگی مردماں ایف سی کیمپ ءِ دیم ءَ زھرشانی کتگ ءُ دزگیریں مردمانی یل کنگ ءِ لوٹ کتگ۔

دومی نیمگ ءَ بلوچستان ءِ دمگ آواران ءِ تھسیل مشکے ءَ یک مردمے ھم بندیگ کنگ ءَ پد پاکستانی لشکر ءَ پہ زور بیگواہ کتگ۔

اھوالانی رد ءَ بیگواھیں مردم ءِ پجار مشکے ءِ دمگ کندری ءِ نندوکیں محمد ءِ چُک نصیر احمد ءِ نام ءَ زانگ بیتگ۔ گوشگ بوگ ءَ انت کہ پاکستانی انٹیلی جنس ایجنسیاں دو روچ پیسر آ چہ وتی لوگ ءَ دزگیر کتگ ءُ چہ ایشی ءَ پد آ بیگواہ اِنت۔

دمگی مردمانی گشگ اِنت کہ پاکستانی لشکر ءَ نصیر احمد کیمپ ءَ تلب کتگ بلے آ وتی دزبندی ءِ سبب ءَ اود ءَ شت بوت نہ بوتگ ءُ پد ءَ لشکر ءَ آئی ءِ لوگ ءَ اُرش کتگ ءُ دزگیر کتگ ءُ بیگواہ کتگ۔