TBP Balochi

بلوچستان ءِ دمگ کیچ ءِ ھند ڈنک ءَ پاکستانی پوج ءِ گوم ءَ میڑ ءَ بیران بیتگیں سئیں ورنایانی لاش تنی وھدے پاکستان پوج دستیگ اَنت- آیانی دست ءَ دیگ ءَ نہ دیگ ءَ کھول تربت ڈی چوک سر ءَ نندانک داتگ-

گیشیں ھالانی رِد ءَ گوستگیں روچاں تربت ڈنک ءِ ھند سر ءَ پاکستانی پوج ءُ سلاہ بندیں مردمانی میان ءَ میڑ ءَ سے ورنا نبیل ھوت، عمر ذکاء اللہ ءُ فیروز بیران بیتگ اَنت- میڑ ءَ پد پوج ءَ لاش وتی دستیگ کتگ ءُ بُنجل ءَ برتگ اَنت، تنی وھدے پوج ءِ دست ءَ اَنت-

کھول گوشگ اِنت کہ وئیل ءَ سے روچ گوستگ بلے تنی وھدے میتاں دیگ ءَ نہ اِنت، آیاں ترس اِنت کہ تُرندیں گرمی ءِ سبب ءَ لاش ھراب بیت کن اَنت کہ ناں تھنا انسانی ہمدردی ءِ ھلاپ اِنت بلکیں مزھبی رسم ءُ رواجانی پیلو کنگ ھم اڑان اِنت-

کھول ءُ شھریاں زھرشانی نندانک سھب ءَ چہ برجاہ ءَ اِنت اود ءَ کھول ءَ دمگی مردم لاشاں زوت دست دیگ لوٹ کتگ-

کھول ءَ جار جتگ کہ اگاں لاش واتر دیگ نہ بیت اَنت گُڑا باندا نندانکجاہ ءَ مچی پاتھہ وانی کنگ بیت-

بلوچستان ءِ ھَند زیارت ءَ انوگیں روچ ءَ سی ٹی ڈی ءَ ھپت مردم ءِ کُشگ ءِ داوا کُتگ، چمیشاں چِہ یکے پَجّار گار ءُ بیگواھیں مردماں چہ بوتگ۔

وائس فار بلوچ مسنگ پرسنز ءَ یک لُکیں بیان ءَ گُشتگ کہ لشکر ءَ چوتیر سنجاوی ءَ ھپت مردمانی کُشگ ءِ داوا کُتگ۔ چمیشان چِہ یکے ءِ پَجّار گل محمد مری ء گلام نبی ءَ بوت، آئی ءَ را 20 دسمبر 2024 ءَ لشکر ءَ چہ سنجاوی ءَ زورانسری بیگواہ کُتگ۔

گل ءِ رِد ءَ، گل محمد مری ءِ زورانسری بیگواھی ءِ مالومات آئی ءِ کھول ءَ دیم دیگ بوتگ اَنت، ءُ آئی ءِ کیس بیگواھیں مردمانی کمیشن ءَ ھم داھل اَنت۔

زانگ بہ بیت کہ پاکستانی لشکر ءِ سر ءَ بیگواھیں مردماناں دروگیں میڑہ ءَ کُشگ ءِ دائمی برجا انت۔ گوستگیں ماہ ءَ دُکی ءَ ھم یک دگہ دروگیں میڑھے ءَ پنچ مردم کُشتگ اَنت۔

یات بہ بیت کہ ھما لاشانی آروک ءَ پد ھندی مھلوکاں سی ٹی ڈی ءِ بیان نہ منّ اِتگ ءُ گُشتگ کہ ھلک ءَ چُشیں دیمپانی نہ بوتگ، بلکے لشکر ءَ لاش دور داتگ ءُ آیاناں دیم پہ دیمی میڑہ ءِ رنگ داتگ۔

گوستگیں شپ ءِ ساھت دو نزیک ءَ پنجگور ءِ دمگ خدابادان ءَ تُرندیں تراک ءُ تُرندیں تیرگواری توار ز اش کنگ بیتگ-

دمگی اِھوالکار رِد ءَ اے اُرش سرکاری پلامرزی ٹولی فرحان سر ءَ کنگ بیتگ-

اِھوالکار رِد

دمگی اِھوالکار گوشگ اِنت کہ اُرش میان ءَ دمگ ءَ بازیں تراکاں پد تیرگواری درچ داں دیراں برجاہ بیتگ-

اِھوالکار رِد ءَ اے اُرش جانی تاوان ھال اِنت بلے سرکاری واکدار نیمگ ءَ چہ اے درگت ءَ ھچ وڑیں پدری دیم ءَ نتیکگ –

چہ ھاران ءَ دو جتاجتائیں ھنداں چہ دو لاش دزکپتگ اَنت- گیشیں ھالانی رِد ءَ، یک لاشے چہ کلی کشمیر ءَ دزکپتگ، وھدے کہ دومی لاش گواش دگ ، سوربڈو ءِ دمگ ءَ چہ دزکپتگ-

چہ کلی کشمیر ءَ دزکپتگیں لاش ءِ پجّار حفیظ اللہ ء داد محمد، جھمنند گزی، ھاران نام ءَ چہ بیتگ- اِھوالکار رِد ءَ حفیظ اللہ بیست شش اپریل ءَ بیگواہ بیتگ- اے کُشتگ ءُ لاش گونی تہ ءَ بند کتگ ءُ گلّہ ڈگارے ءِ تہ ءَ دور داتگ- پولیس ءَ حفیظ اللہ ءِ بیگواھی ءِ ایف آئی آر لاش دزکپگ ءَ ساری پنچ مردم دزگیر کتگ ءُ پٹ ءُ پول بندات کتگ، کہ اے وھد ءَ پولیس ءِ دست ءَ اَنت-

دومی لاش گواش دگ، سوریڈو ءِ دمگ ءَ دزکپتگ کہ آئی ءِ پجّار انگت نہ بیتگ- اِھوالکار رِد ءَ لاش ءِ ھمراھی ءَ سے رنگی ئیں بیرکے ھم ایر کتگ ءُ کُشگ بیتگیں مردم تیر جنگ ءُ کُشگ بیتگ-

پولیس دوئیں وئیلاں پٹ ءُ پول کنگ ءَ اِنت، وھدے کہ راجی پارٹیانی نیمگ ءَ اے وئیلانی سر ءَ ترندیں دلپدردی ودی بیت-

بلوچستان ءِ دمگ کیچ ءِ ھند تمپ ءَ سلاہ بندیں مردمانی اُرش ءَ سرکاری پلامرزی ٹولی ءِ سلاہ بندیں ٹولی ءَ چہ سیادی داروکیں مردمے بیران بیتگ-

گوستگیں شپ ءَ تمپ ءِ دمگ ملک آباد ءَ سلاہ بندیں مردم یک لوگے ءِ تہ ءَ پُترتگ اَنت سرکاری پلامرزی سلاہ بندیں ٹولی ءِ ڈیتھ اسکواڈ ءِ باسک سعید عابد ءِ برات زبیر عابد تیرگواری کتگ ءُ کُشتگ-

اِھوالکار رِد ءَ سلاہ بندیں مردماں پرپٹ ءُ دگہ سامان وتی دستیگ کتگ ءُ گوں وت برتگ اَنت-

سرجمیں بلوچستان ءَ پاکستانی پلامرزی ٹولی ءِ سلاہ بندیں ٹولی پُرکار اَنت آ ڈیتھ اسکواڈ نام ءَ چہ زانگ بنت-

سیاسی ءُ چاگردی پارٹیانی رِد ءَ اے ٹولی مردم بیگواہ ءُ کُشگ ءَ اَبید دگہ سلّکاریاں ھمگرنچ بیتگ اَنت-

بلوچستان ءِ دمگ پنجگور ءَ پاکستانی لشکر ءِ دست ءَ بیگواہ بوتگیں مردمے ءِ لاش جنگل ءَ دزکپتگ ۔

بیران بوتگیں مردم ءِ پجار پنجگور ءِ سریکوران ءِ نندوکیں حسن جان ء یار مھمد ءِ نام ءَ زانگ بیتگ۔

اھوالانی رد ءَ لیویز ءِ کارمند حسن جان 29 اپریل ءَ پنجگور ءِ چتکان بازار ءِ دمگ ءَ پاکستانی لشکر ءَ دزگیر کتگ ءُ پد ءَ آ بیگواہ بوتگ۔ آئی ءِ لاش پد ءَ جنگل ءَ دزکپتگ۔

بلوچستان ءِ تہ ءَ گیر کانونی کوش ءِ اولی وئیل نہ اِنت۔ گوستگیں وھداں ھم ھزاراں مردم بندیگ جاہ ءَ بیگواہ بوھگ ءَ پد کشگ بیتگ انت۔ بلوچ راجدوستیں پارٹی ءُ انسانی ھکانی باسک گوستگیں دو دھکاں چہ اے وئیلانی ھلاپ ءَ زھرشانی کنگ ءَ اَنت۔

ڈنک ءِ وئیل ءَ لاشانی واتر نہ کنگ ءِ ھلاپ ءَ جدگال ڈن ءَ زھرشانی (ڈی بلوچ)، مردماں راہ بند کتگ۔

ڈنک وئیل ءَ بیران بوتگیں نبیل ھوت، عمر زک اللہ ءُ فیروز ءِ لاشانی واتر نہ کنگ ءِ ھلاپ ءَ زھرشانی کنگ ءَ جدگال ڈن ءَ ایم 8 شاہراہ بند کنگ بیتگ۔

زھرشانی کنوکاں گْوشتگ کہ سئے روچ ءَ پد ھم لاش آھانی دست ءَ دیگ نہ بوھگ ءَ اَنت کہ ترندیں گرم ءَ ھم ھراب بوت کن اَنت۔

آئی ءَ گوشت کہ ما باز رند ءَ انتظامیہ ءُ لورسز ءَ چہ لاشانی دیگ ءِ دزبندی ءِ لوٹ کتگ بلے آھاں ھچ وڑیں سبب ءَ مئے گپ گوش نہ داشتگ-

بلوچ نیشنل مومنٹ ءِ نیمگ ءَ “بلوچستان لابنگ ڈے” ءِ سرھال ءَ برجم داشتگیں دیوان ءِ وھد ءَ چہ بلوچستان ءَ سیادی داروکیں بیگواھیں مردمانی کھولاں برتانیہ ءِ پارلیمنٹ ءِ باسک ءَ گند ءُ نند کتگ ءُ وتی مردمانی بیگواھی ءِ بارو ءَ اھوال داتگ انت-

ھمے وھد ءَ بیگواہ کنگ بیتگیں بلوچ نودربر رھشون زاکر مجید بلوچ ءِ مات ھم جاڑیگ بیتگ کہ آئی ءَ گوستگیں بازیں سالاں وتی اوپار ءُ جد ءُ جھد ءِ کِسہ کتگ انت-

آئی ءَ اے گند ءُ نند ءَ تچک کتگ کہ آئی ءِ زھگ چون 2009 ءَ بیگواہ کنگ بیتگ ءُ داں انگت ءَ آ انساپ ءِ شوھاز ءَ انت – زاکر مجید ءِ مات ءَ میان اُستمانی برادری ءَ لوٹ کتگ کہ آ بلوچستان ءَ برجاھیں زورانسری بیگواھیانی ھاتر ءَ توار چست بہ کن انت ءُ سانمندیں کھولانی گون ءَ ھمدردی بہ کن انت-

بلوچ سلاہ بندانی گوشگ انت کہ آ ھرکجا بہ لوٹ انت آ دگانی سر ءَ وتی زور ءَ کڈن کت کن انت کہ آیانی توک ءَ اے زور ھست انت کہ آ دگانی سر ءَ اوشت انت ءُ گاڑیاں پٹ ءُ پول ءُ دگہ دگہ کاروائیاں کنگ ءَ انت-

اے گپ بلوچستان ءَ ھستیں پاکستان ءِ پارلیمنٹ ءِ باسکاں ھم راست کتگ کہ بلوچستان ءِ گیشتریں جاھاں بلوچ سلاہ بندیں مردم بزانکہ بلوچستان ءِ آجوئی ءِ واستا جنگ ءَ انت آ ھرکجا بہ لوٹ انت وتی زور ءِ گون ءَ دگانی سر ءَ اوشت انت ءُ گاڑیاں پٹ ءُ پول کن انت-

بلوچستان پارلیمنٹ ءِ مھلوک ءِ گوشگ انت کہ اے پٹ ءُ پول ءَ ھمے پدر بیت انت کہ سرکار ءِ تاکت ھلاس بوتگ ءُ بلوچ سلاہ بندانی تاکت گیش ءُ آ ھرکجا ءُ کجام وھد ءَ دگانی سر ءَ سرکپگ ءَ گندگ بنت اِنت-

ڈھاڈر چہ شال ءَ 138 کلو میٹر ءِ دوری ءَ انت کہ اود ءَ سلاہ بندیں مردماں دگ بستگ ءُ گاڑیانی پٹ ءُ پول برجاہ داشتگ –

اے سلاہ بندانی نیمگ ءَ اے دابیں کاروائی ھرچ وھد ءَ گندگ ءَ آیگ ءَ انت بلے لھتے وھدانی توک ءَ اے دابیں کاروائیانی توک ءَ ترندی اتکگ چُشکہ پشت ما پشت ءَ چوشیں کاروائی بوگ ءَ انت ءُ دومی گچینی گپ ایش انت کہ اے کاروائیانی وھد ءَ آ کاروائی کن انت ءُ واتری رو انت ءُ اود ءَ سیکورٹی پورسز ءِ نیمگ ءَ ھچ پئیمیں گامگیج گندگ نہ بنت انت-

کاروائیانی وھد ءَ سلاہ بند داں بازیں اداراھاں گاڑیانی پٹ ءُ پول کنگ ءَ پد ءُ اگاں گاڑیانی توک ءَ آیاں شکی ئیں مردمے دزکپتگ گڑا آئی ءَ گون وت بر انت-

گوستگیں وھداں پاکستانی پورسز ءَ بندوکیں بازیں مردم سلاہ بندیں مردماں چہ بساں ایر گپتگ ءُ پد ءَ آیانی سر ءَ تیرگواری کتگ ءُ کشتگ انت-

دوشیگیں وئیل بلوچستان ءِ ڈھاڈر ءِ نزیک ءَ جھل مگسی ءِ دگ ءَ سلاہ بندیں مردمانی نیمگ ءَ چہ دو کلاکاں چہ گیش ناکہ بندی کنگ بیتگ-

جاڑیگیں مردمانی رِد ءَ سلاہ بندیں مردماں دگ ءِ سر ءَ ناکہ جتگ ءُ آیوک ءُ رؤکیں گاڑیانی پٹ ءُ پول کتگ-

بلوچ راجی آجوئی سنگر (براس) ءِ جارکش بلوچ خان ءَ وتی شنگ کرتگیں درشانے ءِ تہ ءَ گوشتگ کہ بلوچ راجی جنگ بس یک راج یے، نسل یا مزھب یے بگیری ءَ نہ انت، بلکیں زورگریں ریاست ءُ لُٹ ءُ پلی ترام ءِ بگیری ءَ رھبندی جنگے – ھردو لس پنجابیانی یل کنگ ءَ براس ءَ وتی بنگپ پدر کتگ کہ ھمے زوتاں گل ءَ چہ مستونگ ءِ دمگ درینگڑھ دزگیر کتگ بوتگ انت –

گل ءِ جارکش بلوچ خان ءِ گوشگ انت کہ سرمچارانی دست ءَ دزگیر کنگ بوتگیں پنجاپی نزیر احمد ء غلام حسین جھمنند اٹک پنجاپ ءَ ظفر اقبال ء محمد زمان جھمنند اٹک پنجاپ 29 اپریل ءَ مردمگری ءُ وش ءُ سلامتی یل کتگ انت – اے براس ءِ سرمچاراں بلوچستان ءِ دمگ درینگڑھ ءَ مستونگ ءَ دزگیر کتگ بوتگ انت، چوش کہ چہ بندات ءَ جست ءُ پد ءِ وھد ءَ اے گپ زانتگ کہ اشاں گوں ریاستی ادارہ، پوج یا انٹلی جنس ءَ نزیکی نیست – بلوچ زرمبش ءِ رھبندانی رِد ءَ ما اے مردم راج، زبان یا پجار ءِ نام ءَ نکشتگ انت بلکنہ انسانیت ءُ آشوبی رھبند دیم ءَ کتگ ءُ مروچی پہ شرپ یل داتگ انت – اے گامگیج براس ءِ ھمے رھبنداں پدر کنت کہ مئے جنگ راج یے، مزھب یے یا لس مردمے ءِ بگیری ءَ نہ انت بلکنہ زورگیریں ریاست ءُ آئی لٹ پُلی ترامانی بگیری ءَ انت –

آئی ءَ گوشتگ بلوچ راجی آجوئی سنگر (براس) ءَ یکرندے پدا جھان ءِ دیم ءَ اے گپ پدر کتگ کہ بلوچ راجی جنگ نسل، مزھب ءِ نہ انت بلکنہ وتی سرڈگار ءِ پھازگ ءُ آجوئی ءِ ھاتر ءَ انت – دژمن ریاست ءِ نیمگ ءَ آجوئی زرمبش ءَ نسل پرستی نام دیگ ایوک ءَ پروپگنڈہ ءِ نہ انت بلکنہ دژمن ءِ اخلاقی بے سوبی ھم پدر کنت – بلوچ سرمچارانی جنگ گوں زورگریں ریاست ءَ انت، راج، مزھب یا لس مردمانی بگیری ءَ نہ انت –

جارکش ءَ گوشتگ کی براس ھمسنتیں آجوئی لوٹوکیں سنگر اے گپ ءَ پدر کنت کہ بلوچ جھدکارانی درسیں پوجی کار بس زورگریں پاکستانی ریاست ءُ آئی ءِ زوراکیانی بگیری ءَ انت – ما دژمن پوج، انٹلی جنس ادارہ، لٹ پُلی پروجکٹس ءُ دژمن ءِ کمک کارانی سرا اُرش کن ایں یک راج یے ءِ مردمانی بگیری ءَ نہ کن ایں –

آئی ءَ گوشتگ کہ چیزیں روچ ایں دژمن ریاست ءِ نیمگ ءَ پروپگنڈہ کنگ بوگ ءَ انت کہ آئی ءِمول بلوچ آجوئی زرمبش ءَ میان استمانی تکاں بدنام بہ کنت – دژمن ھمے پروپگنڈہ ءَ بلوچ سرمچارانی جھد ءَ نسلی نپرت ءِ بےسوبیں جھدے کنگ ءَ انت – اے گپ راجدپتر ءِ بھر یے کہ لس مردمانی پھازگ ءَ بلوچ سرمچار وتی اولی پرز لیک انت – کہ اشی ءِ زندگیں درور گوستگیں ماہ ءَ نوشکی، اورماڈہ ءُ راڈشم ءَ لس پنجاپیانی پجار کنگ ءَ پد یل کنگ – اشی ءِ یک دگہ درورے ھمسنتیں گل بی ایل اے ءِ انت کہ ائی ءَ جعفر ایکسپریس ءَ ھلوش کتگیں لس پنجاپی پجار کنگ ءَ پد وش ءُ سلامتی یل کتگ انت –

آئی ءَ گوشتگ کہ بلے پاکستانی پوج ءَ مدامی بلوچ راج یکجاھیں سزا ءِ نشانگ کتگ چادر ءُ چاردیوالی ءِ لگتمال کنان ءَ زھگ ءُ زالبول کماش زورانسری آوار جتگ انت، نمیران کتگ انت یا گارءُ بیگواہ کتگ انت – دژمن ءِ اے ریاستی ناشرکاری ایوک ءَ بلوچانی ناں بلکنہ سرجمیں انسانیت ءِ بگیری ءَ کتکاری یے –

آئی ءَ گوشتگ کہ پاکستانی ریاست ءَ جنگ ءِ پڑ ءَ ھر وھد ءَ کہ بلوچ سرمچارانی دیم ءَ یکشل ءَ پروش وارتگ گڈا آئی ءَ دگہ شور ءِ ٹھینتگ ءُ وتگڑیں گل جوڈ کتگ لگور بوتگیں ایجنٹ زرتگ انت لس پنجاپی نشانگ کتگ ءُ اشی ءِ الزام ءَ بلوچ گلانی سرا لڈگ ءَ انت – اے پندل ھمے زوتاں ماں روکپتی بلوچستان ءِ دمگ مھرستان مگس ءَ بوتگ کہ اودا پاکستانی انٹلی جنس ادارہ ءُ سرفراز بنگلزئی ءِ وڈیں لگور بوتگیں مردم کارمرز کتگ ءُ لس پنجاپی ءَ کشگ ءَ انت –

جارکش ءَ گوشتگ کہ بلوچ راجی آجوئی ءِ جنگ یک پگری، اخلاقی ءُ سیاسی زرمبش ءِ جنگ ایں کہ راستی، دیمھونی ءُ راج ءِ پلامرزی ءَ بوگ ءَ انت – براس یکبرے پدا وتی درسیں سرمچار، پلامرز ءُ راج ءَ باور کنائین ایت کہ مئے جھد ءِ ھر گام ، دیمھونی ءُ گھگیری ءِ کرتن یک نصب العین ءَ بندوک ایں – ما یک راجے ءِ ھیسیت ءَ وتی آجوئی ءَ لوٹ ایں مارا ھچ وڈیں راج، نسل یا مزھب ، یا لس مردمانی بگیری ءَ دژمنی ایجنڈہ گون نیست –

جارکش ءَ گوشتگ کہ براس ءِ اے درشان ھما درسیں مردمانی ھم ھاتر ءَ انت کہ گوست ءَ لاچاری، نزوری یا زاتی دژمن ءَ گوں ھوار کپتگ گڈا بلوچ راجی آجوئی زرمبش ءَ پھل کنگ ءِ دروازگ پچ ایں – ھر ھما مردم وتی کتکاریاں منّ انت ءُ دژمن ءِ ھمراھی ءَ یل کن انت دوبر دیھونی دیگ لوٹ انت پہ آیاں ھم زرمبش ءِ دروازگ بند نہ ایں بلے شرت ھمیش ایں کہ آ دل ءُ ستک توبہ بہ کن انت ءُ دیمترا وتی زند ءَ وتی کرتن ءَ تچک بہ کن انت راج آیاں پھل کت کنت کہ دل ستک وتی ھاک ءِ گوم ءَ کتگیں دگائی ءِ پھلی ءَ بہ لوٹ ایت –

آئی ءَ گڈسر ءَ گوشتگ کہ براس جھان ءِ درسیں اجوئی لوٹوکیں راج، انسانی ھکانی ادارہ ءُ باسمائیں مردماں آگاہ کنگ لوٹ ایت کہ آ بلوچ زرمبش ءَ پاکستان ءِ پروپگنڈھی چشمک ءَ مہ چار ایت – بلوچستان ءَ براجاھیں جھد راجدپتری راجے ءِ رکینگ، وتی سرڈگار ءَ پہ ھک ءُ رھبندی جنگ یے – ما ھر ھما توار ءَ وش اتک کن ایں کہ انساپ، آجوئی ءُ انسانیت ءِ رھبندانی سرا باور کنت –