TBP Balochi

پاکستانی پوج ءِ تک ءِ بنشون ( آئی ایس پی آر) ءَ گوشتگ کہ بلوچستان ءِ دمگ مستونگ ءَ چیریں اھوالے ءِ رد ءَ سر بیتگیں اھوالانی تک ءَ آپریشن ءَ چار مردم بیران بوتگ انت۔

بیان ءِ رد ءَ آدینگ ءِ روچ ءَ بوتگیں آپریشن ءِ وھد ءَ پاکستانی لشکر ءُ سلاھبندانی میان ءَ جنگ ءُ چوپ بیتگ انت۔

آئی ایس پی آر ءَ گشتگ کہ آپریشن ءَ پد جنگجاہ ءَ چہ سلاہ، گولہ بارود ءُ تراکناکیں شورو دزکپتگ انت وھدے کہ دمگ ءَ سرچ آپریشن برجاہ انت۔

بلے آئی ایس پی آر ءَ انگت ءَ اے اُرش ءَ بیران بوتگیں مردمانی پجار پدر نہ کتگ انت۔

بلوچ سلاہ بندانی نیمگ ءَ ھم اے درگت ءَ ھم درشان دیم ءَ نیتکگ انت ءُ ناکہ لس اھوالانی اے دابیں اھوالانی بارو ءَ دیم ءَ اتکگ انت-

گوست ءَ پیش ءَ ھم پاکستانی پوج ءَ چوشیں ویلانی توک ءَ مردمانی جنگ ءِ ٹاہ داتگ بیتگ انت-

پاکستانی لشکر ءَ بلوچستان ءِ دمگ چہ کیچ ءَ یک مردمے دزگیر ءُ بیگواہ کتگ ءُ ھشت ماہ پیش چہ نوشکی ءَ بیگواہ بیتگیں دو مردم یل بیتگ ءُ وتی لوگاں سر بیتگ انت-

گیشیں ھالانی رد ءَ پاکستانی لشکر ءَ کیچ ءِ دمگ زامران نیوانو ءَ یک مردمے دزگیر کتگ ءُ بیگواہ کتگ کہ آئی ءِ پجار بور جان ء غوث بخش ءِ نام ءَ زانگ بیتگ۔

دمگی مردمانی رد ءَ بور جان 8 ستمبر ءَ دزگیر کنگ بیتگ ءُ چہ ایشی ءَ پد آ بیگواہ اِنت۔

دومی نیمگ ءَ ھشت ماہ پیش چہ نوشکی ءَ بیگواہ بوتگیں رسول بخش مینگل ءُ سھیل احمد یل بیتگ ءُ وتی گساں سر بیتگ انت-

بلوچستان ءَ زوراکی ءَ بیگواہ کنگ ءِ ویلاں انسانی ھکانی گلانی دلگوش وتی نیمگ ءَ ترینتگ انت-

بلوچستان ءِ زورانسری بیگواھی ءِ درچ گوستگیں دو دھکاں گیش برجاہ انت ءُ اود ءَ کمتر مردم یل بنت ءُ دگہ دو کچ گیش بیگواہ کنگ بیگ ءَ انت-

دومی نیمگ ءَ کراچی ءُ اسلام آباد ءَ بیگواھیانی ھلاپ ءَ گوستگیں بازیں روچاں زھرشانی نندانک برجاہ انت کہ اود ءَ کھول وتی مردمانی یل کنگ ءِ لوٹ ءَ کنگ ءَ انت-

روکپتی بلوچستان ءِ دمگ چھبار ، نیکشھر ، زاھدان ءُ سرباز ءَ جتا جتائیں دمگاں ایرانی لشکر ءِ دست ءَ پنچ مردم آوار جنگ ءَ پد بیگواہ کنگ بوتگ انت ھمے وڑ ءَ سراوان ءَ بیگواہ کنگ بوتگیں مردمے یل بوتگ ۔

سرباز ءِ دمگ اھوران ءَ ایرانی لشکر ءِ دست ءَ بلوچ ورنایے بیگواہ کنگ بیتگ ۔ ھالانی رد ءَ سرباز ءِ دمگ اھوران ءَ ایرانی لشکر ءَ میرزا رھمت زھی آوار جنگ ءَ پد بیگواہ کرتگ ، میرزا ءِ درگت ءَ گوشگ بوگ ءَ انت گیریج ءَ کار ءَ بوتگ ءُ گریبے مردمے ۔

دمگی مردمانی رد ءَ چیریں ادارھانی کارمنداں میرزا لٹ ءُ کُٹ کرتگ ءُ زوریں منانک گپتگ کہ ھکومت ءِ ھلاپ ءَ ناشر کاریں گلاں گوں ھوار انت۔

میرزا زی آمیدگس ءَ پیش کنگ بوتگ اود ءَ آئی ءِ سر ءَ گوں ناشرکاریں گلاں ھوار بوگ ءِ بھتام ءَ دوازدہ سال بندیگ بوگ ءِ ھُکم جَنَگ بوتگ ۔

ھمے وڑ ءَ زاھدان ءَ ایرانی لشکر ءَ بلوچ ورنایے آوار جتگ ۔

زاھدان ءِ شھر ءَ آزادی کوچگ ءِ تھ ءَ ایرانی لشکر ءِ چیریں ادارھانی کارمنداں بلوچ ورنایے آوار جنگ ءَ پد بیگواہ کرتگ ۔

بیگواہ کنگ بوتگیں مردم ءِ پجار اُمر ء پکیر اللہ انت کہ آ زاھدان جھمنند انت ۔

ھالانی رد ءَ اُمر ایرانی لشکر ءَ چہ وتی نان بھا کنگ دُکان ءَ آوار جتگ ءُ بیگواہ کرتگ کہ آئی ءِ ھچ وڑیں اھوال نیست ۔

ھمے وڑ چھبار ءِ جھمنندیں دو ورنا کہ راسک ءَ لشکری کیمپ ءَ پہ وتی پیشیانی دیگ ءَ شتگ انت لشکریاں اوار جتگ ءُ بیگواہ کرتگ انت ۔

زوربیگواہ بوتگیں مردمانی پجار ماجد ءُ ھلیل انت کہ ھر دو برات انت در مھمد ءِ چُک انت ۔

ھالانی رد ءَ آھانی سر ءَ کیسے بوتگ کہ آ ھلاس بوتگ ءُ دوئیں براس مدام راسک ءَ پہ وتی پیشیانی دیگ ءَ شتگ انت بلے اے رندی آ دزگیر کنگ بوتگ انت ءُ کھول ءِ جُست ءَ پرس ءَ رند زانگ بیتگ کہ چھبار ءِ زندان ءَ بندیگ انت-

ھمے وڑ نیکشھر ءَ ایرانی لشکر ءِ سپاہ ءِ چیر اندری بھر ءَ بلوچ ورنایے آوار جنگ ءَ پد بیگواہ کرتگ ۔

بیگواہ کنگ بوتگیں مردم ءِ پجار مھمد ھسین ء کریم بکش انت کہ آ نیکشھر ءِ دمگ ھیتان جھمنند انت ۔

گوشگ بوگ ءَ انت مھمد ھسن سپاہ ءِ چیر اندری کارمنداں اوار جتگ ءُ بیگواہ کرتگ کہ آئی ءِ ھھچ وڑیں اھوال نیست انت ءُ آئی ءِ کھول پریشان انت ۔

چہ سراوان ءَ زوربیگواہ کنگ بوتگیں رزا شھلی بُر مروچی یل بوتگ ۔

اھوالانی رد ءَ رزا شپ ءِ دو ءَ لشکریاں اوار جتگ ءُ دو روچ یکشلا لٹ ءُ کُٹ کرتگ کہ آں زی یل کنگ بیتگ ۔

دمگی مردمانی گوشگ انت لشکریاں رزا کڈن کرتگ کہ آں وتی کُشگ بیتگیں برازتک ءِ ھوناں بیھال بکنت ءُ لشکری کارمندانی پُشتا کیس جوڑ مکنت ۔

گڈی امباز
(وھدے زندگی ءَ ترا چہ مارا پُل ات)

نبشتہ کار: ابداللہ لتیپ

دی بلوچستان پوسٹ

لھتے مردم ھست کہ اچ مئے زندگی ءُ اچ مئے ھیالاں پہ ارزانی در نیا انت، آ چوں گرماگی لیوار سوچیں چاھڑاں سارتیں کوش ءِ شیکگ بنت ءُ وتی ھست بوھگ ءِ گواھی ءَ دے انت ،تاں جھان ھست انت آ شموشگ نہ بنت ، آ گوں وتی مھر، ایمانداری ءُ وپاداری ءَ مدام مئے دلانی تہ ءَ جاگہ کن انت ، بلے اے دابیں مردم سک ءَ کم بنت ءُ ازھار جان چہ ھما کمیں مردماں چہ یکے ات-

ازھار جان— منی ھمبل تو چہ سنگتی ءَ گیش یک مھروانیں براتے بیتگ ئے، تو چہ درستاں جتا ات ئے تئی دل سپاھی، تئی مھروانی، تئی مدامی بچکند ، کجام ھم وڑیں گرانیں ساھتاں چوں کوہ ءَ مھکم اوشتگ من ترا یک روچی ھم پہ جزباتی برانز گرگ ءَ نہ دیست،تو وتی تہ ءِ ھستیں درد ءُ رنج مدام گوں بچکنداں چیر دات انت،تئی پرپُکیں لُنٹانی سر ءَ بس تئی پل گوھریں بچکند ات انت کہ سھرا اِت انت، تو مدام گوں وتی بچکنداں دیوان وشنود کت انت ءُ سنگت کندینت انت ،من مدام ھمے سما کتگ کہ اے گمجتیں چاگرد ءِ تہ ءَ تو پہ مئے سھڑینگ ءُ دلگوش کنگ ءَ یک درمانے بیتگ ئے کہ تئی ھست بوھگ ءَ ما اے ٹپ ءُ ٹوریں چاگرد ءِ رنج شمشتگ انت۔

ازھار جان، من ترا ءُ مھاز ءَ چہ دیر انت کہ آشنا بیتگاں بلے گوں ترا ءُ مھاز ءَ چیزے وھد بیت سک ھور بیتگ آں ، انچو سما کناں کہ زندگی ءَ منا اے کسانیں موہ داتگ ات کہ ترا ءُ تئی مھر ءِ جھلانکی سرپد بباں، مئے میان ءَ اے کسانیں مدتے ءِ سنگتی ات بلے دائمی بوت تو زان ءِ سالانی سال چشیں مھروانیں برات سک کم دست کپ ایت، گوں تو مئے کندگ، مسکراہ دیوان ءُ کوچرائی برے برے ھاموشی، اے درست نی بس تھنا یات بیت انت پشت کپت انت تئی دوری ءِ رنجاں چوں ھما مُرگ ءَ پیسکگ ءَ آں کہ آئی ءِ کُدوہ آئی ءِ دنیا ءَ چی آئی ءَ پچگرگ بہ بیت-

تو پہ وتن انچوں شیدا اِت ئے چش کہ بالو پہ چراگ ءَ تو بلوچستان ءِ ھمک زیبائیا‌نی گندگ ءَ پند جت تو بلوچستان ءِ ابرم ءِ زیبائی چہ نزیک دیستگ ات انت سما کتگ ات انت ھمے کہ تو گلزمین ءِ زیبائی ءِ گپ پچ کت، تاں انچیں دریگے پچ بیت کہ آئی ءِ تہ ءَ گلزمین چو تئی دل ءِ چھرگ ءَ ات ، آئی ءِ تہ ءَ راسکوہ ءِ کوھانی بلندی چو تئی مھکمیں اوپار ءَ سھرا ات انت، اے نیلیں زِر تئی پگر ءِ جھلانکی درشان کنگ ءَ ات ، بے تواریں ریگزار تئی دانائی بے ھبری ءَ پیشدارگ ءَ ات ، تو مدام من ءَ ھمے سرپدی داتگ ات کہ گلزمین گوں دل ءِ چماں چارگی انت، ھما ندارگاں بگند کہ آ مئیم ءَ‌ نیا انت، ھما چیزاں گوش بدار کہ گوش دارگ نہ بنت ، زمین ءِ سینگ ءَ دست بجن آئی ءِ اندر ءِ اُپاراں بہ زان، تو اے زمین ءِ ابرم ءُ آئی ءِ زیبائی انچو مارا پیش داشت انت چوں کہ دیوانگیں مست ءِ شئیراں سمو ءِ دوستی بیان کنگ بیتگ ،وھدے تو بلوچستان کتگ تئی آ مھر شئیر ءُ گالاں گوں نبشتہ نہ بیتگ انت بلکیں گوں اکساں، تامُراں ، یاداشتاں ءُ زمین ءِ مھراں چہ سرِّچان بیتگ انت-

گوں من اگاں چیزے یات ءُ یاتگار پشت کپتگ۔۔ آ ھما کلاہ انت بگندے کسانیں چیزے بلے منی دل ءَ سک مزن انت تو کہ لوٹائین اتگ ات من سر ءَ کُت چار ات تو گشت بزیرے ترا شرتر لگ اتگ من ءَ وَ سک دوست بیت بلے من ءَ زیرگی نہ ات تو گشت نزیرے ئے من چگلے دیاں، تو ءُ مھاز ءَ من ءَ وس کُت کہ بزیرے ، اے کلاہ چوناہ ءَ من ءَ سک دوست بیت یکے کلاہ ءِ جند شوک ات چوں تئی چھرگ ءَ جنگ ءَ ات دومی تو پہ دل من ءَ سوگات کتگ ات پمیشکا من کس ءَ ھم ندات ، اے یاتگار من ءَ تئی نزیکی ءِ گُمان ءَ دنت ،بِلے تو جسمانی دروشم ءٔ چہ مارا سک دور شتگ ئے بلے انچو گمان بیگ ءَ انت تو مئے گور ءَ ئے مارا چارگ ءَ ئے ءُ بچکندگ ءَ ئے وتی ھاموشی ءِ تہ ءَ , اے کلاہ بگندئے پہ دگرانی واستا یک کسانیں بے ارزشیں چیزے بہ بیت بلے منی واستا یک چیدگے کہ تئی ھستانک ءَ پیشداریت کہ تو ھمد ءَ مئے میان ءَ ساڑی یے ءُ ھچبر شموشگ نہ بہ ئے۔

ازھار جان، گرانتریں ھبر ھمیش انت تئی اناگھی روگ، تو زان ئے اے روچی من وت سھب ءِ ھشت بج ءَ وپتاں سرجمیں شپ ءَ آگاہ بیتگاں چیا کہ وانگ ءَ چٹی ات ، پد ءَ من سکیں گرانیں وابے ءَ چہ بُست کت دانکہ چاراں درستاں وتی بستر چست کتگاں گپ ءَ انت من وتی بسترانی پیچگ ءَ لگ اتاں تاں ناکو گپ ءَ ات گشی ملا مجیب ءِ چک انت من ءَ ساہ ءَ یل کُت من ھما دمان ءَ آزمان ءَ جست کُت چی بیتگ گشی اڑے ابود ازھار ءِ جت من گشت چی گشگ ءَ ئے تو ؟ سئے رند ءَ گشتی ازھارے جت یار ازھارے جت، من ءَ باور نہ بیگ ءَ ات نشتاں دل درھگ ءَ ات ، پون ءَ پچ کناں چاراں تھنا تو ئے منی دیم ءَ ، یار ازھار چشیں اشتاپی گڑا؟ من ترا وت پیسرگیں مگرب ءَ گپ کُت مزاک ءُ کوچرائی کت مئے گڈی گپ ھمیش ات پاداں بدار تو گشت من وتی پاد داشتگ انت بلے ایدگہ سھب ءَ تو ۔

ازھاز جان تو گوں وتی اشتاپی ئیں روگ ءَ انچیں دردے مئے دل ءِ سر ءَ ایر کُت کہ بیدے تو درمان نہ بیت دل تاھیر ءُ آرام نہ گیپت، تئی بچکنداں چو سھب ءِ درپشوکیں بام ءِ وڑ ءَ تاھیر بکش اتگ اے ھم چہ مارا پُلگ بوت انت ، تئی نرمُکیں توار کہ مدام مارا سکینے داتگ چہ مارا گستا کنگ بیت ،بلے تئی پگر تاں جھان ھست انت مان ایت ، تو مئے دلانی تہ ءَ زندگ ئے ،مئے ھور کش اتگیں اکسانی تہ ءَ،مئے ھما وھد ءُ پاسانی تہ ءَ کہ ھور گوازینتگ انت ،ھما زمین ء٘ کہ تو پہ مدامی وتی سر ایر کتگ ءُ وش وابے-

ازھار جان ، تو زان ئے مستریں درد چی انت؟ ھمے کہ تئی گڈی دیدار نہ بوت گڈی رند ءَ ترا امبازاں زرت نہ کُت، دریگتیں اے ساھت ءَ من ھمود ءَ ساڑی بوتیناں وتی دست تئی گرانھبائیں سر ءِ سر ءَ ایر کتیں تئی پیشانیگ بہ چُک اتیں ترا ھال بداتیں کہ گوں تو چینچو مھر بوتگ تئی ھست بوھگ چینچو پُر ارزشت بوتگ مئے زند ءِ تہ ءَ ، دریگتیں گڈی رند ءَ ترا امبازاں بہ زرتیں ھما امباز کہ آئی ءِ تہ ءَ تئی سرجمیں مھر ، دوستی ، سنگتی پہ دائمی ھمے امباز ءِ تہ ءَ کید کُتیناں ۔۔۔ بلے پھل کن کہ گلامی ءِ داتگیں سوگاتاں ھپت دریا پُشت چگل داتگ کہ تئی گُڈی امباز ءُ دیدار نہ بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

ھاں ماشٹر تو اتکے ھاں

نبشتہ کار: گلام جان

دی بلوچستان پوسٹ

اے دنیا یک بے باوریں جاھے کہ اِد ءَ ھچ چیز ءِ سر ءَ باور کنگ نہ بیت ءُ اے گپ من ازھار جان ءِ اے دُنیا ءَ چہ روگ ءَ پد شرتِر سرپد بیت آں، من ءَ چِنچو گپ ھست کہ گوں ترا کنَگی ءِ اِت اَنت بلے من نزانت کہ ازھار جان تو مارا چہ انچو جلدی جتا بہ ئے،نی من ھیراناں کہ اے گپاں گوں کئے ءَ بکناں،من ءَ ترا ھمے گوشگی اَت کہ جان تو چنچو مھروانیں انسانے ءِ ات ئے کہ دائم ءَ منی واست ءَ چو مھکمیں کلات ءَ اوشتاتگ ات ئے۔روچ بہ بیت اگاں شپ تو من ءَ بس ھمے گُشت کمے سبر کن تئی کار بیت من ءَ کتاب لازم اَت تو گشت منی کرا ھستیں من وت ترا دیان ئے، من ءَ وھدے کمک لازم بیتگ تو گوشتگ من وت ترا کمک کناں بلے ھئیر زاناں کسمت ءَ مئیگ ءُ تئی ھمراھی ھمینچو لکتگ اَت۔

اے دانکاں کہ من پہ تو نبشتہ کنگ ءَ آں اے ساھت ءَ من ءَ ھاٹیگ مان نیست کے تو چہ من سِست ءُ دیر ءُ جتا بیت ئے۔ تو یک باسمائیں انسان ءِ ات ئے کہ ترا دائم ءَ وتی راج گم پِر اَت،تو دائم ءَ ھمے پگر کُت کہ اے راج چون دیم ءَ بروت ءُ وتی اے بزَگی ،شُد ءُ درتہ پُچی اے ھلاس کنگ ءِ جھد ءَ بہ کنت من ءَ یات انت کہ تو گشتگ اَت کہ مارا اے راج ،کوم سرپدی دئیگی اِنت بلے اے زالماں ترا موہ ندات ۔

ترا اے سرزمین سک دوست اَت پمیشکا تو دائم ءَ تر اِت ئے ءُ اے زمین ءِ کوھانی،آپ ءُ چمگانی ،روزرد روچ برکت بیئگ ءِ اکس کشت اِت اَنت ءُ مارا ایشی ءِ زیبائی پیشداشت انت، ترا وتی سر ڈگار سک دوست اَت پمیشکا گوستگیں آدینگ ءِ روچ ءَ من،اِرپان ءُ تو گوں وتی سنگتاں در کپتیں دیم پہ نھنگ ءَ ءُ تو نبشتہ کتگ اَت کہ:

” بید ءِ زمین ءَ ھست چی”
“بید ءِ زمین ءَ ھچ مبات”

بلے آ روچی کہ تو وتی اے کسانیں بالاد ءُ نزوریں جان ءَ دژمن ءِ اے تیر جاگہ دات انت ءُ پد ءَ ھمے زمین ءِ میار بیت ئے ءُ وے زمین ءَ ترا گوں وتی امبازاں زرت، ازھار جان نی تو اد ءَ نہ ئے نی من ءَ کَے گوش ایت کہ ھاں ماشٹر تو اتکے ھاں دنیگا وھد ھستیں ءُ تو مھلہ چُٹّی کتگ اتکگے بازار ءَ ،ترا اے کوم ءِ چُک وانینگی اَنت۔

آ روچ کہ تئی تیر سپتگیں جان من دیست منی ھوش چہ سرا شت ءُ من اپسوز وارت کہ من ھچ کت نہ کت پہ تئی واستا من ءَ ھما اپسوز اِنت کہ من ءَ آرام ءَ نئیل ایت،من ءَ ھمے اَپسوز نئیل ایت کہ تو مئے شوکیں اکس وتی گوانکو ءِ سر ءَ کش اِت انت ءُ پد ءَ مارا ندات انت ما جاک کُت کہ مئے اکساں مارا وت ءَ بدے بلے تو دائم ءَ مارا کُنّت کت ءُ گُشت کہ وھدے شما چہ دنیا ءَ روئے منی گور ءَ شمئے اکس ایر انت پد ءَ من وتی وٹساپ اسٹیٹس ءَ ایر کنان ئے بلے من اے پگر نہ کت کہ تو مارا چو یل ءَ دئے روئے ءُ مارا گمانی کور چات ءَ دور دئے نی بے تئیگ ءَ اے بازار اے دکان اے جاگہ ءُ دیار گش ئے ورگ ءَ سر گپتگ اَنت۔

“پشت کپتگ تُشے زندگی انگت تو پدا بیا ”
“وابانی پد ءُ پیش سپر آگہ اِنت انگت گیمرتگاں سنگت”

ازھار جان تو پد ءَ بیا کہ بے ترا ما تئی سجوئیں دوست پُرشتگ انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ جتاجتائیں دمگاں بلوچ آجوئی لوٹوکانی نیمگ ءَ ڈیتھ اسکواڈ، پاکستانی پوج ءُ راشن بروکانی سر ءَ اُرش یکشل ءَ برجاہ ءَ اَنت-

بلوچ آجوئی لوٹوکانی نیمگ ءَ اے بھتام اِنت کہ ڈیتھ اسکواڈ ءِ ٹولی پاکستانی پوج ءُ چیریں اداراھانی چیردستی ءَ بلوچ آجوئی لوٹوکانی ھلاپ ءَ پُرکار، زورانسری آوار جنی ءُ ورنایانی تیرانی آماچ کنگ، دُزی، منشیاپ پروشی، مردماں زرگرگ ءَ اَبید بازیں سلّکاریاں ھوار اَنت-

دومی نیمگ ءَ بلوچ آجوئی لوٹوکیں گل بی ایل ایف ءُ بی ایل اے ءَ جتاجتائیں اُرشانی زمہ واری منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ گوشتگ کہ 8 ستمبر 2025 ءِ شپ ءَ کوھلو ءِ ھند راسے زئی ءَ شپ ءِ ساھت یازدہ ءَ سرمچاراں ریاستی چیریں ارداھانی کارندہ عثمان لوھارانی ءِ لوگ انگِر ءَنکُتگ ءُ آ کُڈن کتگ کہ وتی سلاھاں چگل بہ دنت ءُ باجو بہ بو، بلے آئی ءَ گھگیری کنگ ئے جھد کُتگ چہ اشی آسر ءَ سرمچاراں آ نشانگ کُتگ ءُ کُشتگ ۔

عثمان ء رسول بخش لوھارانی چہ گوستگیں دہ سالاں پہ زورگریں پاکستانی پوج ءَ نا تھنا کُمکاری کنگ ءَ بیتگ بلکیں بلوچ راجی جُنز ءِ ھلاپ ءَ ھم کار کنگ ءَ بیتگ ۔ آئی ءِ دوئیں بچّ ھم اے کارانی تہ ءَ گون بیتگ اَنت ۔ آئی ءِ بچ خان محمد ءُ محمد ولی چمالنگ کرب ءُ جوار ءِ ھند ءُ دمگاں مردمانی ھلاپ چاریگی ءُ سرمچارانی ھلاپ ءَ ھم کار ءَ بیتگ اَنت ۔

جارکش ءَ گوشتگ کہ چہ گل ءِ نیمگ ءَ چہ عثمان لوھارانی مدام بھتامانی راست کنگ ءِ پیش بیگ ءُ وتی سپائی دیگ ءِ موہ داتگ، بلے اشی ءَ اے کلوہ دلگوش گور نہ کتگ اَنت ءُ زرمشبت ءِ ھلاپیں پرکاری گیش کتگ اَنت- انّیگاں شھید حیدر الی ٹھینگانی ءِ زورانسری آوار جنی ءَ پد شھیدی ءَ ھوار بیتگ-

جارکش ءَ گوشتگ کہ نُھ ستمبر ءِ شپ ءَ بلوچستان لبریشن فرنٹ ءِ سرمچاراں شپ ءِ دہ ءَ چہ دوازدہ تاں آواراں داں بیلہ شھدگ “ارہ انگریز چڑھائی” ھند سر ءَ ناکہ بندی کتگ ءُ بند کتگ ءُ پٹ ءُ پول کتگ – اے میان ءَ زورگریں پوج ءَ دیر ءَ چہ مارٹر ءِ بازیں گولھے آس داتگ، بلے نزیکیں آیگ تُرس اِتگ- ھمے وھد ءَ سرمچارانی دگہ یک ٹولی ءَ دگ ءِ جوڑ کنوکیں بند ساچی شرکت ءِ سر ءَ اُرش کتگ، آئی ءِ سرجمیں مشینری مانداشتگ اَنت – کاروائی ءِ میان ءَ پوریاگر گپتگ اَنت ءُ پٹ ءُ پول ءَ پد مردمگری ءِ بنیاد ءَ یل داتگ اَنت-

جارکش ءَ گوشتگ کہ یازدہ دستمبر ءِ روچ یازدہ ءَ بی ایل ایف ءِ سرمچاراں گل ءِ چیریں انٹیلی جنس ونگ ءَ چہ دزکپتگیں ھالانی بُنیاد ءُ کاروائی کنان ءَ ھُزدار ءِ دمگ اورناچ بازار ءَ ریاستی ڈیتھ اسکواڈ ءِ ھاسیں کارمند ءُ وتگڑیں سرکاری چریک میر الھی بخش سمالانی ء جان محمد، جھمنند یک تنگی اورناچ دزگیر کتگ – آ اے وھد ءَ گل ءِ پٹ ءُ پولی ٹولی ءِ دست ءَ اِنت جُست ءُ پُرس ءِ سرجم بیگ ءَ گل ءِ پیسلہ ءِ سر ءَ کار کنگ بیت-

جارکش ءَ گوشتگ کہ دہ ستمبر ءِ سُھب شش ءَ بلوچستان لبریشن فرنٹ ءِ سرمچاراں ھاران ءِ دمگ تازینہ ھوک آپ ءِ ھند سر ءَ یک چیریں کاروائی ءَ ڈیتھ اسکواڈ ءِ ھاسیں کارمند جنگی خان ءِ اوتاک انگِر ءَ کتگ آئی ءَ را سلاھانی دور دیگ ءُ باجو بیگ ءَ گوشتگ کہ بلے آئی ءَ سرمچارانی سر ءَ اُرش ءِ جُھد کتگ- پسّھی کاروائی ءَ ڈیتھ اسکواڈ ءِ سے کارندہ جاہ پہ جاھی مرتگ اَنت کہ آیانی تہ ءَ جنگی ھان، ثناءاللہ ءُ حسرت ھوار اَنت- اے میان ءَ ڈیتھ اسکواڈ ءِ یک دگہ کارندھے نزیکیں کوھاں چہ سرمچارانی سر ءَ اُرشکاری ءَ بیتگ، بلے اسنائپر ٹولی ءِ وھد سر کاروائی ءَ آ زوت نشانگ بیتگ ءُ جاہ پہ جاھی مرتگ، کہ آئی ءِ پجّار سید خان نام ءَ چہ بوتگ-

جارکش ءَ گوشتگ کاروائی سرجم کنگ ءَ پد سرمچاراں اوتاکاں چہ سلاہ ءُ دگہ ھال اھوالی سامان دستیگ کتگ اَنت-

جارکش ءَ گوشتگ کہ زانگ بہ بیت کہ جنگی ھان پنّام جنگو ء نیک مھمد زورگریں پوج ءِ چیردستی ءَ وتگڑیں ڈیتھ اسکواڈ ءِ ھاسیں سروکے بیتگ، کہ گوستگیں بازیں وھدے ءَ سرمچارانی ھلاپ ءَ پُرکار بیتگ- بلوچستان لبریشن فرنٹ ءِ سرمچاراں زاھد سمالانی پنّام ءِ میرل ءِ شھیدی ءَ ھم ھمے ٹولی تچکی ءَ ھوار بیتگ-

جارکش ءَ گوشتگ کہ بیڑ وھد ءَ ھمے دمگ ءَ چہ سرمچاراں چار مردم دزگیر کتگ اَنت بلے پد ءَ بلوچ زرمبشت ءِ ھلاپیں پُرکاریاں ھوار نہ بیگ ءِ سبب ءَ آ پہ شرپ یل داتگ اَنت-

جارکش ءَ گوشتگ کہ بلوچستان لبریشن فرنٹ کوھلو، ھاران، اورناچ ءُ جھاؤ اُرشانی زمہ واری ءَ منّ اِیت ءُ چہ رسانکدر ءَ زورگریں پوج ءِ کُمکاراں ھوار اے سرجمیں مردماں پھلی ءِ گنجائش ھست اِنت – اگاں آ بلوچ ھلاپیں پُرکاریاں یل دنت- اگاں ناں سرجمیں بلوچستان ءَ اے سرجمیں دُژمنیں توانمنداں جوانیں وڑے ءَ نشانگ کن ایں-

بلوچ لبریشن آرمی ءِ جارکش جیئند بلوچ شنگ کتگیں درشان ءِ تہ ءَ گوشتگ کہ گوستگیں روچ ءَ کلات ءِ دمگ شیخڑی ءَ بلوچ لبریشن آرمی ءِ سرمچاراں زورگریں، پاکستانی پوج ءِ پیادگ کارندہ ھما وھد ءَ سنگر گپتگ ءُ نشانگ کتگ اَنت وھدے آ یک روچے ءَ ساری سرمچارانی اُرش ءَ تباہ بیتگیں وتی گاڑی ءِ نزیک ءَ سر بیتگ اَنت- اے کاروائی ءَ زورگریں پوج ءِ یک کارندھے مرتگ ءُ دگہ دو ٹپی بیتگ اَنت-

جارکش ءَ گوشتگ دوشمبے ءِ روچ ءَ کلات ءِ دمگ مکئی ءَ بلوچ لبریشن آرمی ءِ سرمچاراں زورگریں پاکستانی پوج ءِ پیادگ کارندہ ریموٹ کنٹرول آئی ای ڈی اُرش ءَ نشانگ کتگ اَنت، چریشی ءِ آسر ءَ یک کارندھے مرتگ ءُ یکے ٹپی بیتگ-

جارکش ءَ گوشتگ گوستگیں شپ ءَ سرمچاراں بولان ءِ دمگ بی بی نانی ءَ بُنجاھی شھدگ سر ءَ ناکہ بندی کتگ داں دو کلاکاں چہ گیش برجاہ بیتگ- اے میان ءَ سرمچاراں پٹ ءُ پول ھم کتگ-

1. جارکش ءَ دیمتر ءَ گوشتگ مروچی کیچ ءِ دمگ مند ءَ بلوچ لبریشن آرمی ءِ سرمچاراں زورگریں پاکستانی پوج ءِ واستا راشن سرکنوکیں یک گاڑی یے گوں راشن ءَ ھوار وتی دستیگ کتگ پٹ ءُ پول برجاہ ءَ اِنت-

درشانانی گُڈی ءَ اُرشانی زمہ واری منّ اِتگ ءُ گوشتگ کہ مئے کاروائی داں بلوچستان ءِ وتواجھی ءَ برجاہ بنت-

شال ءِ انسداد ناشرکاری ءِ آمیدگس ءَ ششمی رند ءَ بلوچ یکجھتی کمیٹی ءِ رھشونانی ریمانڈ گیش کتگ ءُ دگہ 15روچ ءِ واستا ڈاکٹر ماہ رنگ بلوچ ءُ آئی ءِ چاریں ھمراھاں پولیس ءِ دست ءَ دیگ ءِ پرمان داتگ۔

پنچ شمبے ءِ روچ ءَ پولیس ءَ ڈاکٹر ماہ رنگ بلوچ، بیبو بلوچ، گلزادی بلوچ، سبغت اللہ شاہجی ءُ بیبگر بلوچ ترندیں سیکورٹی ءِ چیر دستی ءَ آمیدگس ءَ پیش کتگ اَنت۔ آمید گس ءَ دومی مردماں دلیل گوشدارگ ءَ پد ریمانڈ ءِ وھد ءِ گیش کنگ ءِ پیسلہ کتگ ۔

اے پرمان پیسر ءَ داتگیں پنچ روچی ریمانڈ ءِ مدت ءِ سرجم بوھگ ءَ پد شنگ کنگ بوتگ۔ یات بہ بیت کہ پیسریگیں گوشدارگ ھپتگی چھٹی ءِ روچ ءَ بوتگ کہ ایشی ءِ تہ ءَ آمید گس ءَ بی وائی سی ءِ سروک پنچ روچ ءِ واستا پولیس ءِ دست ءَ دیگ بیتگ انت۔

کیس ءِ گوشدارگ ءَ پد رسانکدر ءَ گوں گپ ءُ تران کنان ءَ ڈاکٹر ماہ رنگ بلوچ ءَ گشتگ کہ آئی ءِ ھلاپ ءَ کیس ءُ آمید گس ءِ کارروائی پیش ءَ ٹھینگ بوتگیں اسکرپٹ ءِ بھر انت ۔

آھاں گوشتگ کہ مئے ھلاپ ءَ پیسلہ ءَ پیش ءَ نبشتہ کنگ بنت، آمیدگس کڈن کنگ بیتگ، مئے کیسانی گوشدارگ بیت۔ اے وڑیں آمیدگس آزات نہ اَنت کہ اود ءَ سرکاری ادارہ پیسلاھانی پیسلہ ءَ پیسر ءَ کن اَنت۔ مارا انساپ ءِ ھچ وڑیں امیت نیست، بلے ما ھر وڑ ءَ وتی جھد ءَ برجاہ داریں۔

ڈاکٹر ماہ رنگ بلوچ ءَ دیمترا گْوشتگ کہ آھانی پرامن سیاسی ءُ جمھوری کردار ءِ سرپوشگ ءِ ھاتر ءَ ریاست کیس ءُ دروگیں بھتامانی سر ءَ زورگ ءَ اِنت بلے آھانی مول ءُ مراد لس توار ءِ ھاموش کنگ اِنت کہ ھچ وڑ ءَ بوت نہ کنت۔

بی وائی سی ءِ وکیلاں ھم اے پیسلہ ءِ سر ءَ ترندیں درشان پیش کتگ ءُ گْوشتگ کہ آیانی کلائنٹ ناجائزیں رنگ ءَ دراجیں ریمانڈ ءَ دارگ بوھگ ءَ اَنت۔

آھاں گشتگ کہ اے ریمانڈ بس وھد ءِ زوال کنگ ءُ اے رھشوناں زھنی ءُ جسمانی زور ءِ چیر ءَ دارگ ءِ پندل انت۔ اے وڑیں یکشلیں ریمانڈ ءِ گیش کنگ ءِ رد ءَ ھچ وڑیں کانونی شک ءِ رد ءَ جائز نہ اِنت۔ آمیدگس پولیس ءِ مرزی ءِ بدل ءَ کانون ءِ رد ءَ پیسلہ بہ دنت۔

وکیلاں اے گپ ءِ سر ءَ ھم زور داتگ کہ آمیدگس ءَ وتی موکلانی ھلاپ ءَ ھچ وڑیں ھاسیں شاھد پیش نہ کنگ ءَ ابید ھم ریمانڈ ءِ مدت یکشل ءَ گیش کنگ بوھگ ءَ اِنت کہ اے بنیاتی انسانی ھکانی لگتمالی اِنت۔

آھاں گشتگ کہ آ اے پیسلہ ءِ ھلاپ ءَ انساپ ءِ ھاتر ءَ مزنیں آمید گساں دیم ءَ جنز ایں۔

بلوچستان ءِ دمگ ھاران لجے ءَ مرچی سھب ءَ ناشناسیں سلاہ بندیں مردماں سرکاری کمک ءِ سلاہ بندیں گل ءِ سروک حافظ ممتاز ءِ پناہ گاہ ءِ سر ءَ اُرش کتگ۔ دمگی مردمانی رد ءَ اے اُرش ءَ چار مردم بیران ءُ پنچ تاں شش مردم آوار جنگ بیتگ انت۔

بیران بوتگیں مردمانی پجار جنگی خان، سید خان، ھسرت ءُ ثنا اللہ ءِ ناماں بوتگ انت۔

حافظ ممتاز ھما گل ءِ سروکی ءَ اِنت، مھلوک اے گل ءَ ”ڈیتھ ءِ اسکواڈ“ ءِ نام ءَ زانت۔ ڈیتھ اسکواڈز بلوچستان ءِ تہ ءَ ھنچیں سلاہ بندیں گلے کہ آھانی سر ءَ سرکار ءِ کمک کنگ ءِ بھتام جنگ بیت۔ انسانی ھکانی گل ءُ دمگی مردمانی گشگ انت کہ اے گل راجدوستانی پلامرزی کنوکاں نشانگ جوڑ کنگ، درکانودی کوش ءُ زورانسری بیگواہ کنگ ءَ ھوار انت۔

دنیگتا اے اُرش ءِ زمہ واری کس ءَ نہ زرتگ، اگاں چہ پیسر ءَ ھم بلوچ آجوئی ءِ سلاھ بندیں گلاں ھمے رنگیں اُرشانی زمہ واری زرتگ انت –

دومی نیمگ ءَ بلوچستان سرکار ءَ شال ءَ گمانی رنگ ءَ اُرش بیگ ءِ پژدر ءَ شیواری جار پرینتگ ءُ سیکورٹی شیوار کتگ انت-

اُستانی سرکار ءَ بنجاھی شھر شال ءِ سول سیکرٹریٹ ءَ گمانی رنگ ءَ ناشرکاری ءِ پژدر ءَ مھکمہ سروسز اینڈ جنرل ایڈمینسٹریشن ءَ تھریٹ الرٹ شنگ کتگ-

سرکار ءِ بنشون ءِ رد ءَ سلاہ بندیں مردماں شَور کتگ کہ آ سرکاری کار جاہ ءُ بنجلاں نشانگ کن انت ءُ چریشی ءِ پژدر ءَ سیکورٹی ءِ ھاتر ءَ کارندہ شیوار کنگ بیتگ انت-

سرکار ءَ ترس درشان کنان ءَ گوشتگ اُرشکاراں سَے سنگل کیبن سرکاری گاڑی گون انت ءُ آیاں ایف سی ءِ کارندھانی پوشاک گور ءَ انت ءُ چریشی ءِ ترس ءَ سرکار ءَ اندری ءُ درایگی تکاں پھزداری ترند کتگ انت-

زاھدان ءُ سراوان ءَ جتاجتائیں وئیلاں زی سے مردم آوار جنگ ءَ پد بیگواہ کنگ بوتگ انت ۔

گیشیں ھالانی رد ءَ زاھدان ءَ پازل کوچگ ءَ ایرانی لشکر ءَ دو بلوچ ورنا آوار جتگ ءُ زوربیگواہ کرتگ انت ۔

گوشگ بوتگ کہ لشکریانی دو گاڑیاں سواریں سپاھیگاں بندات ءَ دو اوشتاتگیں پرپٹ دستیگ کرتگ انت کہ چریشی ءَ پد آھاں دو رھگوزے ورنا ھم گپتگ ءُ پہ زور گاڑی ءَ سوار کتگ ءُ برتگ انت۔

بیگواہ کنگ بوتگیں مردمانی پجار زانگ نہ بیتگ انت ءُ ناکہ آوار جنگ ءِ سوب زانگ بیتگ ۔

دومی نیمگ ءَ چہ سراوان ءَ بلوچ ورناء بیگواہ بوتگ ۔

ھالانی رد ءَ رَزا شھلی بر چیزے روچ ءَ ساری چہ ایرانشھر ءَ در کپتگ ءُ سراوان ءَ شتگ کہ اود ءَ بیگواہ بیتگ ۔

گوشگ بوگ ءَ انت رزا شھلی بر ءِ پنچ سالگیں برازتک پیشی سال ءَ ایرانشھر ءِ دمگ چاہ جمال ءَ ایرانی لشکر ءِ تَچکیں تیرگواری ءَ کُشگ بیتگ ، رزا شھلی بُر ءَ آئی ءِ ناھک ءِ کوش بگیری ءَ ایرانی لشکر ءِ سپاھیگانی سزا دیگ ءَ پہ مدام جھد کرتگ ، ایرانی امیدگس ءَ لشکری کُشندہ دزگیر کنگ ءَ پد وئیل کتگ انت ۔

اے گپ زانگ بہ بیت چہ امیدگس ءِ اے پیسلہ ءَ رند انگت ھم رزا شھلی بُر دست کَش نہ بوتگ ءُ داں انوگ ءَ مدام ایرانی ریاست ءِ مزن مزنیں آمیدگس ءَ شتگ ءُ وتی برازتک ءِ ھونانی بدل ءَ لشکری کارمند ءِ سزا دیگ ءِ لوٹوک بوتگ ۔

رزا شھلی بُر ءِ اچانگی بیگواھی ءَ آئی ءِ کھول شکیگ انت کہ آں ریاستی چیریں ادارہ ءَ آوار جتگ ۔

کھول ءَ پولیس ایجنسی سپاہ ءُ امیدگسانی گور ءَ آئی ءِ جُست کرتگ بلہ ریاستی کجام ھم ادارہ ءَ رزا ءِ دزگیر کنگ نہ منّ اتگ ۔

‏نُگرہ بالاد

نبشتہ کار: نادیہ بلوچ

دی بلوچستان پوسٹ

من لائبریری ءَ درامدانی نیام ءَ نندوک اِتاں، ناں منی گُھار ءِ ناں منی سیاد ءُ وارسے ھست اَت چُشیں جنکے ھم نیست اَت کہ من گوں آئی ءَ ھمتران بہ باں درامدانی نیام ءَ من چو شیتان ءَ تھنا وتی کُرسی ءِ سر ءَ نندوک اَتاں مکسود جافری ءِ انگریزی شئیراں گوں وتی ھیالاں تاکانی سر ءَ درشانگ ءَ اِتاں اناگتی من وتی گوانکو چِست کُت کسے ءَ من آں ازِھار ءِ بچکندگیں اکسے دیم داتگ اَت ءُ نبشتگ اَت” تو سھیگ ئے ؟ من وت ءَ وت چمّ سورے دات کہ چُش چے بیتگ کہ منی سھیگ بوگ المّی اِنت، منی چم اِسٹیٹساں کپتاں کہ ازھار ءِ اکس اَت ءُ نبشتگ اَت کہ “بھشت تئی ھنکین بات” اے سھت لبزانی تہ ءَ درشانگ نہ بیت- منی دستاں من آں اِنچو ھم ھمراداری نہ کُت کہ من یکّے جُست بِگراں کہ چی بیتگ من تھنا question mark ءِ دیم دات ” سُھبی ده بجا وتی دُکان ءَ جَنگ بیتگ آئی ءَ پسّو دات اِشی ءَ چہ پد منی پادانی چیر ءَ زمین ءَ من آں دروہ اِت منی اوشتگ ءِ capacity چہ من پچ ءِ گِپت منی چمّانی دیم ءَ سیاهی ءَ مانشان ات من نزانت اے بے تواریں لائبریری ءَ کے ءَ ھال بدیاں کہ مئے نُگرہ بالادیں دوستے اَچ ما پُلگ بیتگ ،وتی دُکان ءَ بے تواری ءَ جَنگ بیتگ چہ مئے ءُ شُمئے بے تواری ءَ جَنگ بیتگ-

من لوٹ اِت کہ دُرستاں ھال بِدیاں کہ مھاز ءِ مھروانیں دوست چہ مھاز ءَ ابدمانی پُلگ بیت ، مھاز ءِ تھنائی ءَ نوکیں بوگے پِر کنگ بیت بلے ھرکس وت ءَ دلگوش اَت ھرکسے ءِ چمّ بائیو ءَ سکّ اَتاں کہ mdcat چکّاس نزیک اَت اے بہ سُدّاں کے ھال بہ دنت کہ ھما اِیشانی کُشوک اِنت آ اِشاں ڈاکٹری سیٹ چوں دنت بلے بہ سمائی ءَ دگہ بُن پِر نیست اگاں کسے بے سما بوگ لوٹ اِیت گُڑا گیشتر بے سما بہ بات-

من گوں تھاریں چمّاں زوت لائبریری ءَ در اَتکاں دُرستانی ٹیلگ من آں گُناھگاری ءِ پئیم ءَ سکّ اَت انت من گوں ارسیگیں چمّاں وت ءَ کوٹے ءَ سر کُت کہ بلکیں اود ءَ کسے آگاہ بہ بیت ءُ من ھالے بدیانی کہ شُما سھیگ ئے کہ مھاز مرچی دوبر چورو کنگ بیتگ مھاز ءِ ارواه چہ مھاز ءَ پُلگ بیتگ بلے کس نیست اَت درست بے تواری ءَ واب اَت انت کس آگاہ نہ اَت کہ من بگل گیر بہ کُتیں گوں ارسیگیں چمّاں ھال بِداتیں کہ مند ءَ آس کپتگ کودِکیں پریشتگے کُشگ بیتگ من گُشت دریگتیں من ھم واب بہ بیتیناں اے ھال ءَ زند بر سھیگ مہ بیتیناں۔

من کوٹے ءِ دپ ءَ ڈنّ ءَ نِشت آں وت تسّل ءَ دات کہ اے دروگے ، من پد ءَ وتی گوانکو دست جت پد ونت بھشت تئی ھنکین بات اگاں اِزھار مُپت گُناه ءَ جَنگ بیتگ گُڑا شھید بیتگ ، ءُ شھید ءِ ھنکین وت بھشت اِنت. اِزھار یک توسیپ کنوکیں کارستے بیتگ درستاں چہ گیش آئی ءَ ھُدا ءِ ابرمے توسیپ کُتگ ،کوه ءُ کپوتانی توسیپ لبنان ءُ بلوچ آباد ءِ ویرانگیں دمکانی توسیپ منھاج ءِ توار ءُ دِرتہ پُچّیں بلوچانی اوپار ءِ توسیپ آئی ءَ وتی کِمراہ ءِ چمّاں مارا مند ئے بازیں ندارگ ءِ پیشداشت‌ ، مند ءِ کوه ھم اِزھار ءَ گیر کاراں کہ اِزھار ءَ سے روچیں کوھاں نہ شُتگ گوں بیل ءُ ھمبلاں چاه ءِ اڑ نہ داتگ سوتے گوش نہ داشتگ سنگتانی مسکرائی ءَ ٹھک نہ داتگ کوھانی ڈوک ءُ ڈلّ الّم تئی ھون ریچی ءَ چیھانٹ جن اَنت آ المّ تئی مرگ ءَ موتک کار اَنت۔

اِزھار تو باسما مہ بوتین ئے شرتِر اَت ،تو کتاب مہ ونتیں شر تِر اَت ،تو بلوچے مہ بوتین ئے شر تِر اَت ازھار اگاں تو بلوچے مہ بوتین ئے گُڑا چو زوت جھان ءِ زیبائی یل کُتگ اَت انت؟ ازھار اگاں تو زانتگ اَت کہ من جَنگ باں گُڑا مارا کرّ ءُ کور بہ کُتیں کہ ما ترا مہ دیستیں ءُ تئی مرگ ءِ ھال مہ اِش کُتیں بلے تو زالمانی پئیما وتی سنگت دروہ اِت انت ءُ تھنا یل کُتاں –

یار اِزھار گُڈی جُست” بلوچے جان اَنچو بے نیاد اِنت کہ ھر کُجا تیرانی آماچ بہ بیت تاں ھِچ نہ بیت؟

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-