TBP Balochi

بلوچستان ءِ بنجاھی شھر شال ءَ پاکستانی پوج ءُ چیریں ادارھاں یک زالبولے آوار جنگ ءَ پد بیگواہ کتگ-

آوار جنی ءِ وئیل سول ھسپتال شال ءَ گوستگیں شپ ءَ پیش اتکگ کہ اود ءَ پوج ءُ چیریں ادارھاں ماجبین ء غلام مصطفیٰ جھمنند واشک آوار جتگ ءُ پد ءَ بیگواہ کتگ-

ماجبین بلوچستان یونیورسٹی بی ایس لائبری سائنس ءِ نودربرے –

بلوچ یکجھتی کمیٹی ءَ ھال ءِ راست کنان ءَ گوشتگ ماجبین چیریں ادارہ ءُ پوج ءَ آوار جتگ ءُ بیگواہ کتگ-

بلوچستان ءَ بلوچ ورنایاں ھوار نی زالبولانی آوار جنی ءِ وئیل ھم پیش آیگ ءَ انت ءُ گوست ءَ ھم چیریں ادارھاں بلوچ زالبول آوار جتگ ءُ پد ءَ دروگیں کیس جتگ ءُ آیاں سلاہ بندیں گلاں بندوکی ءِ بھتام جتگ انت-

بلے ماجبین ءِ بارو ءَ تنی وھدی سرکاری تکاں دگہ گپ دیم ءَ نیتکگ انت-

بلوچ نیشنل موومنٹ ءِ نیمگ ءَ چہ بیست ھشت مئی نوزدہ ھشت نُھ ھشت ءَ بلوچستان ءَ بیتگیں ایٹمی ھیلکاری ءِ ھلاپ ءَ جرمنی ءِ شھر گوئٹنگن ءَ زھرشانی ءُ اسٹریٹ تھیٹر برجم دارگ بیتگ-

بی این ایم ءِ رِد ءَ زھرشانی ءِ مول اے ایٹمی تراکانی انسانی، ماھولیاتی ءُ چاگردی اسراتانی دیم آرگ اِنت، اے درگت ءَ ” وھدے پہاڑ رو ئے ” کوہ گریوگ ” سرھال سر ءَ۔یک الامتی تھیٹر ھم پیش کنگ بیتگ چریشی ءَ بلوچستان ءِ دمگ چاگی ءِ اسرمندیں راج رنجیں اکسکاری دروشم ءَ درشان کتگ-

اے درگت ءَ زھرشانی ءَ چہ تران کنان ءَ ترانکاراں گوشتگ پاکستان ءِ ایٹمی تراک ھاس پھازی گامگیج نہ بیتگ بلکیں آیانی نشانگ یک ایردستیں راج ءِ ڈیھ ءُ زندمان بیتگ اَنت-

زھرشانی کنوکاں گْوشتگ کہ چاگی وڑیں مڈی ءَ سر ریچیں دمگ بلوچستان ءِ بید راج ءِ منشا ءَ تجرباتی پڑ جوڑ کتگ چریشی ءِ آسر۔ءَ مروچی ھم اود ءِ جھمنند تباھکاریں نادُراھی ءُ لڑ ءُ بار ءِ دیمپانی کنگ ءَ اَنت-

ترانکارانی رِد ءَ چاگی ءِ جھمنند انگت ھم زھرناکیں آزمان ءَ سلاہ زیرگ ءُ گھتگیں آپانی ورگ ءَ لاچار اَنت کینسر ءُ کھولی نادُراھی ءِ گیش بیتگ وھدے کہ حکومت پاکستان اے اسراتاں چہ انکار کنان ءَ چاگی ھُشکیں زمین گوش اِیت ھالانکہ اود ءَ ھزارانی مردم آباد اَنت آیانی لوگ، زمین ءُ واب اے تراکانی ھرجان بیتگ اَنت-

ترانکاراں بیست ھشت مئی ءَ بلوچستان ءِ واستا ساھیں روچ کتگ ءُ گوشتگ کہ اے ھما روچ بیتگ وھدے پاکستان ءَ شاتکامی کتگ ءُ بلوچ راج ءَ را آیانی گماں ھوار سرگوز کتگ اَنت مئے سرڈگار سر ءَ بمب کل کتگ ءُ مارا بے توار مرگ واستا یل داتگ-

بی این ایم ءِ زھرشانی ءَ گوشتگ کہ ایٹمی تجربہ ساری ناں چُشیں ھیلداری گامگیج زرتگ ناں دمگی آبادی مھُریں جاھاں برتگ اَنت ءُ ناں رند ءَ چُشیں سرکاری پھلی دیم ءَ اَتکگ-

ترانکاراں اکوام متھدہ ءُ میان استمانی مردماں چہ دزبندی کتگ کہ پاکستان ءِ ایٹمی تجربات ءِ آسر ءَ بیتگیں انسانی ءُ ماھولیاتی تباھی شریں وڑے ءَ پٹ ءُ پول کنگ بہ بیت ءُ پاکستان ایٹمی سلاھانی کارمرز ءُ اے ھترناکیں آسر ءِ سر ءَ میان استمانی ھساب ءَ پسّہ بہ لوٹ اَنت-

چہ کیچ ءَ سر بیتگیں ھالانی رِد ءَ، عومری کھن ءَ غلام جان نامیں پولیس کارندہ ءِ زورانسری آوار جنی ءِ ھلاپ ءَ کھول ءَ دمگ مردمانی ھمراھی ءَ سامی ھند سر ءَ سی پیک دگ سر ءَ نندانک داتگ ءُ گاڑیانی روگ آیگ بند کتگ-

اِھوالکار رِد ءَ غلام جان گوستگیں روچ ءَ پاکستانی پوج ءَ لوگ سر ءَ بیڑبرگ میان ءَ آوار جتگ ءُ ناشناسیں جاھے ءَ برتگ – کھول آئی ءِ پہ سلامتی یل کنائینگ لوٹ کتگ کنان ءَ گوشتگ کہ اگاں ریاست ءَ آئی ءِ سر ءَ چُشیں شکے ھست گڑا آئی ءَ کانودی ھساب ءَ دزگیر کنگ بیتگ اَت، بلے پوج ءَ دُزانی پیم ءَ شپ وھد ءَ بلوچ دودمان ءَ لگتمال کنان ءَ آ بیگواہ کتگ-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں شال، زامران ءُ کولواہ ءَزورگریں پوج ءُ آئی ءِ کمکارانی سرا پنچ اُرش کتگ – اے اُرشانی تہ ءَ آئی ای ڈی، سلاہ بندیں اُرش، دزگیریں کمکارے ءِ کوش ھوار ایں –

جارکش ءَ گوشتگ کہ مروچی بلوچ لبریشن آرمی ءِ سرمچاراں شال ءِ نزیکیں ھند ڈگاری ءَ زورگریں پاکستانی پوج ءِ بم ڈسپوزل اسکواڈ ءِ کارمند ھما وھد ءَ ریموٹ کنٹرول آئی ای ڈی تراک ءِ نشانگ کتگ انت وھدیکہ آ پیادگ ءَ راہ ءِ کلئرنس ءَ کنگ ءَ بوتگ انت – تراک ءَ زورگریں پوج ءِ ھردو کارمند ھما دمان ءَ مُرتگ انت –

آئی ءَ گوشتگ کہ بلوچ لبریشن آرمی ءِ سرمچاراں سھب ءِ ادار دھ ءَ کیچ ءِ دمگ زامران کلگی ءَ زورگریں پاکستانی پوج ءِ کارمندانی سر ءَ ھما وھد ءَ ریموٹ کنٹرول آئی اِی ڈی بمب تراک ءِ کتگ وھدیکہ آ پرپٹ ءِ سر ءَ تر ءُ گرد ءَ بوتگ انت – تراک ءَ دو کارمند سک باز زدگ بوتگ انت وھدیکہ آیانی پرپٹ سک ناکارہ بوتگ –

آئی ءَ گوشتگ کہ بیست ءُ شش مئی ءَ سرمچاراں یک دگہ اُرشے زامران ءِ دمگ ساہ دیم ءَ کُتگ کہ اود ءَ سرمچاراں زوگریں پوج ءِ پانگس ءِ سر ءَ اُرش کتگ – سرمچاراں مزنیں سلاھاں گوں اُرش کنان ءَ زورگریں پوج جانی ءُ مالی تاوان داتگ –

جیئند بلوچ ءَ گوشتگ کہ ھمے روچ ءَ زامران ءِ دمگ آرچنان کئور بی ایل اے ءِ سرمچاراں زورگریں پاکستانی پوج ءِ ھاتر ءَ راشن بروکیں دو گاڑی گپتگ ءُ مانداشتگ انت –

دیمتر ءَ جارکش ءَ گوشتگ کہ بلوچ لبریشن آرمی ءِ سرمچاراں بیست ءُ ھپت اپریل ءَ بیڑ برتگ ءُ لطیف ء محمد علی جھمند کولواہ جت دزگیر کتگ – لطیف ءَ دپ ءِ وت منّ اِتگ کہ اولسر ءَ آ دوزواھے ءِ دروشم ءَ بلوچ آجوئی لوٹوکانی گوم ءَ نزیک بوتگ بلے پد ءَ رند ءَ آ گوں کُشندہ ٹولی ءِ کارمند رشید ءِ گوم ءَ نزیک بوتگ –

عبدالطیف ءَ جست ءُ پد ءِ وھد ءَ وتی کتکاری من اِتگ انت ءُ گوشتگ کہ زورگریں پوج ءِ گوشگ ءِ پد ءَ آئی ءَ یک ٹریکنگ چپے وتی سنگتے ءِ گور ءَ سر کتگ کہ آئی ءَ نومبر 2022 ءَ کولواہ ءِ دمگ جت ءَ ھمے چپ سرمچارانی سامانانی تہ ءَ ھما وھد ءَ چیر داتگ وھدیکہ سرمچار ھمے ھند ءَ سپر ءَ بوتگ انت – زورگریں پاکستانی پوج ءَ ھمے چپ ٹریک کتگ ءُ ڈرون اُرش ءِ کتگ ءُ آپریشن بندات کتگ، چریشی ءَ بی ایل اے ءِ سرمچاراں جانی تاوانانی دیمپانی کنگ کپتگ –

جارکش ءَ گوشتگ کہ لطیف راجی دلار ءِ گوشگ بوتگ ءُ بلوچ راجی آمیدگس ءَ آ مرگ ءِ سزا داتگ کہ سرمچاراں 21 مئی ءَ کولواہ ءِ دمگ نگور ءَ آ کُشتگ –

گڈسر ءَ جارکش ءَ گوشتگ کہ بلوچ لبریشن آرمی اے درسیں اُرشانی زمہ واری ءَ من ایت –

بلوچستان ءِ دمگ آواران ءَ گوستگیں شپ ءَ یک جنینے ءَ ھوار دو مردمانی کوش ءِ ھلاپ ءَ سرجمیں شھر ءَ ھڑتال کنگ بیتگ۔ دراھیں کاروباری بُنجاہ ءُ دکان بند بوتگ اَنت وھدے کہ سرکاری کار ءُ کرد بند بوتگ اَنت۔

دمگی مردمانی رد ءَ گوستگیں شپ ءَ یک بج ءِ نزیک ءَ پاکستانی لشکر ءَ آواران ءِ دمگ مالار مچھی ءَ بازیں لوگانی سر ءَ اُرش کتگ۔ اے وھد ءَ دمگی مردمانی گھگیری ءِ سر ءَ لشکر ءَ لس مھلوک ءِ سر ءَ تیرگواری کت کہ ایشی ءِ آسر ءَ سنجر بلوچ ءِ چُک نئیم بلوچ ءُ ھوری ء کاسم بیران بوتگ اَنت ءُ یک نزوریں جنینے دادی بلوچ سک ٹپی بوت۔

اے وئیل ءَ پد بلوچ وومن پورم ءَ اے وئیل ءِ گھگیر کتگ ءُ ھڑتال ءِ لوٹ کتگ کہ لس مھلوک ءَ گوں سرجمیں زور ءَ پَسّو داتگ ءُ زھرشانی ءِ رد ءَ شھر بند کتگ۔

بلوچ وومن پورم ءَ وتی بیان ءِ تہ ءَ گْوشتگ کہ اے سال ءِ بندات ءَ چہ آواران ءَ بے آمیدگسی کوش ءِ بازیں جاور بوتگ اَنت، ءُ ایوک ءَ یک ھپتگے ءِ تہ ءَ اے پنچمی وئیل اِنت۔

آئی ءِ گْوشگ ءِ رد ءَ بلوچستان ءَ سرکاری ادارگاں سرجم ءَ (استثنی) دیگ بوتگ اَنت ءُ آ بے ھچ کانودی جواز ءَ زور کارمرد کنگ ءَ اَنت۔

بلوچ یکجھتی کمیٹی ءَ ھم اے وئیل ءِ سر ءَ پدردی درشان کتگ ءُ گْوشتگ کہ نئیم بلوچ ءُ آئی ءِ ماس ھوری بی بی پاکستانی لشکر ءِ تیرگواری ءَ بیران بوتگ اَنت۔ کمیٹی ءِ رد ءَ اے اولی رند نہ اِنت کہ اے ھاندان ءِ نشانگ جوڑ کنگ بوتگ۔ 2015 ءَ نئیم ءِ دگہ یک ماسی یے گوھر بلوچ ءُ آئی ءِ ھپت سیاد ءُ وارس یک بالی اُرشے ءَ بیران بوتگ اَنت۔ 2023 ءَ نئیم بلوچ وت ھم زور بیگواہ کنگ بوتگ۔ آئی ءِ مات کہ نوں اے وئیل ءَ ٹپیگ اِنت، پیسر ءَ ھم پاکستانی لشکر ءَ دزگیر کتگ۔

بیان ءِ تہ ءَ گیش گْوشگ بیتگ کہ گوستگیں لھتیں روچاں ایوک ءَ آواران ءُ مشکے ءِ دمگ ءَ درجناں مردم بے آمیدگسی ءَ کُشگ بوتگ اَنت بلے ملکی رسانکدر بے توار اِنت ءُ میان اُستمانی تک ءَ ھچ وڑیں پسو ءِ دیم ءَ نہ آتکگ۔

بلوچ یکجھتی کمیٹی ءُ بلوچ وومن پورم ءَ چہ میان اُستمانی گل، ءُ میان استمانی انسانی ھکانی گلاں دزبندی کتگ کہ اے وئیلانی سر ءَ یک آجوئیں، شُوھاز ءُ میان اُستمانی پٹ ءُ پولے ءِ بندوبست ءَ بہ کن اَنت۔

دوئیں گلاں گْوشتگ کہ اے جاور ایوک ءَ زاتی جیڑہ نہ اَنت بلکیں یک یکجاھیں پالیسی یے ءِ بھر اَنت کہ ایشی ءِ مول ءُ مراد بلوچ ءِ پجار، گھگیر ءُ ھست بوگ ءِ ھلاس کنگ اِنت۔

بلوچستان ءِ بنجاھی شھر شال ءَ گوں ھمگرنچیں ڈگاری ءَ پاکستانی فورسز ءِ بمب ڈسپوزل اسکواڈ ءِ کارندھانی سر ءَ بم تراک ءَ بیرانیانی ھال انت-

بم یک دیسی بمبے بوتگ کہ ایشی ءَ فرنٹیئر کانسٹیبلری ( ایف سی) ءِ بمب ڈسپوزل اسکواڈ نشانگ کنگ بیتگ انت-

دمگی مردمانی رد ءَ اے تراک ءِ زد ءَ دو کارندہ اتکگ انت- چریشانی توک ءَ کہ کم چہ کم یکے بیران بوتگ۔ بلے انگت ءَ واکداراں اے تراک ءِ بابت ءَ بیان شنگ نہ کتگ۔

گوستگیں ماھانی تہ ءَ پاکستانی لشکر ءَ بلوچستان ءَ بازیں اُرشانی دیمپانی بوتگ کہ ایشی ءِ تہ ءَ بم تراک ءُ تیرگواری ھوار انت۔ آجوئی دوستیں جتا جتائیں گلاں اے اُرشانی زمہ واری زرتگ انت۔ بلے انگت ءَ کس ءَ اے اُرش ءِ زمہ واری نہ زرتگ۔

بلوچستان ءِ دمگ موسی خیل ءِ دمگ راڑہ شم ءَ پاکستانی پوج ءَ یک کاروائی ءَ تیرگواری ءِ رِد ءَ چار سلاہ بندیں مردمانی جنگ ءِ ٹاہ داتگ-

پوج ءِ ٹاہ اِنت کہ جنگ بیتگیں مردم ھائی وے ءِ سر ءَ بمب ایر کنگ ءَ بیتگ اَنت وھدے کہ پوج ءَ کاروائی کتگ، تیرگواری ءِ رِد ءَ پد پوج وئیلجاہ ءَ سر بیتگ ءَ مزنیں کچے ءَ سلاہ ھم دزکپتگ اَنت-

پوج گوشگ اِنت کہ کُشگ بیتگیں مردم جتاجتائیں کیساں نام ءُ دپ بیتگ اَنت-

پوج ءَ ٹاہ داتگ کہ آیانی نشانگ مساپر بس ءُ سیکورٹی چیک پوسٹ بیتگ اَنت، ءُ اشانی پُرکاری دمگ ءَ ایمنی ءِ جاوراں ھراب کنگ ءَ بیتگ اَنت-

کشگ بیتگیں ورنایانی تہ ءَ اکبر بزدار، سلیمان بزدار، ملک احمد بزدار ءُ بخت محمد بزدار ھوار اَنت – اشانی درگت ءَ گوشگ بیگ ءَ اِنت لھتے وھد ءَ ساری پاکستانی پوج ءَ بیگواہ کتگ اَنت-

بلوچستان ءَ گوستانک ءَ ھم اے وڑیں کاروائیانی سر ءَ انسانی ھکانی گل ءُ بیگواھیں مردمانی کھولانی نیمگ ءَ چہ پھازی درشان اِتگ-

اے گلانی رِد ءَ بازیں رند ءَ پوج نیمگ ءَ چہ بیگواھیں مردم دروگیں میڑاں جتگ اَنت ءُ پد آ سلاہ بندیں مردم پدر کتگ اَنت-

بیگواھیں مردمانی کھولانی گوشگ اِنت کہ آیانی دوستناک ماھانی ماہ سالانی سال بیگواہ بیتگ اَنت، ءُ پد ءَ آیانی لاش دروگیں میڑے ءَ دزکپتگ اَنت-

گوستگیں روچاں بارکھان ءِ دمگ ءَ سی ٹی ڈی اے وڑیں دروگیں میڑ ءَ سے مردمانی جنگ ٹاہ داتگ اَت ءُ پد ءَ آیانی پجّار چہ پیسر بیگواھیں مردماں چہ بیتگ اَنت-

بلوچستان ءِ دمگ کیچ ءِ ھند زامران، کلکی ءَ پاکستانی لشکر بمب تراکے ءِ نشانگ جوڑ کنگ بوتگ۔

پورسز ءِ کارندہ ھما وھد ءَ نشانگ کنگ بیتگ انت کہ آ پرپٹ ءَ سوار بوتگ ءُ روگ ءَ بیتگ انت-

دمگی مردمانی رد ءَ اے اُرش ءَ لشکر ءَ تاوان رس اتگ بلے انگت ءَ واکدارانی بنگپ پدر نہ بوتگ انت۔

ارش ءِ زمہ واری انگت ءَ کس ءَ نہ من اتگ بلے دمگ ءَ بلوچ آجوئی لوٹوکیں سلاہ بندیں گل پرکار اَنت۔

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ بی ایل اے وتی دیرگیں، ایماندار ءُ دلیریں کماندار ملک ھان مھمد مری ء میرو ھان مری ءِ نمیرانی ءَ دلپدرد انت ءُ آئی ءِ نمیرانی ءَ ھال ءَ راج ءِ باسمائیں مھلوک ءَ سر کنت – واجہ ءَ بازیں وھدے بوتگ کہ گوں بی ایل اے ءَ ھمگرنچ بوتگ ءُ پیراں سالی ءَ وتی راجی کرد ءَ پیلو کنگ ءَ بوتگ –

جارکش ءَ گوشتگ کہ کماندار ملک ھان مری ءِ سیادی گوں یک ھنچیں کھولے ءَ بوتگ کہ بلوچستان ءِ گھگیری ءِ راج دپتر ءَ آیانی بلاھیں کرد یے – آئی ءِ پیروک جانی مری ءَ انگیریز سامراج ءِ گوم ءَ جنگ داتگ ءُ ھڑب ءَ بوتگیں گوستانکی جنگ ءَ آ نمیران بوتگ کہ اے کھول ءِ ھاتر ءَ آشوبی ربیت ءِ بندات بوتگ – ھمے ربیت ءِ برجاہ داران ءَ آئی ءِ مستریں برات گلام نبی مری سال 1973 ءَ گوں نواب ھیربکش مری ءَ ھمکوپگ بوتگ ءُ سلاہ بندیں جھد ءِ تہ ءَ وتی کرد پیلو کتگ ءُ تاں بیرانی ءِ وھد ءَ نواب مری ءِ ھمراہ بوتگ – آئی ءَ چہ پد کھول ءِ دستار ملک ھان مھمد مری ءِ سر ءَ دیگ بوتگ –

آئی ءَ گوشتگ کہ ملک ھان مریءَ وتی ورنائی ءَ سال پنجاہ ءُ ھشت ءِ جنگ ءَ وھدیکہ نواب نوروز ھان کہ دزگیر بوتگ گڈا پہ کمک ءِ ھاتر ءَ آئی ءَ وتی سنگت زرتگ ءُ چہ کوہلو ءَ پیادگ ءَ در اتکگ ءُ جھالوان ءَ وت ءَ سر کتگ ءُ وتی گھگیری زند” بندات کتگ چرائی ءَ پد آئی ءَ وتی سرجمیں زند بلوچ راجی آجوئی زرمبش ءَ داتگ – آ ایوک ءَ نواب نوروز ھان ءِ زرمبش ءِ شاھد نہ بوتگ بلکنہ وت ھوار ھم بوتگ ءُ آئی زند ھمے تمردی ءِ چیدگ جوڈ بوتگ کہ ناں لب ءُ ملام ءَ مٹ کُت کُتگ ءُ ناکہ نگیگیں جاوراں – آئی ءِ زھگ ظفر مری ءَ ھستیں وھد ءِ بلوچ راجی زرمبش ءِ تہ ءَ نمیران بوتگ ءُ واجہ ءَ وتی کھول ءِ بازیں مردمانی نمیرانی ءِ درد سگ اِتگ –

آئی ءَ گوشتگ کی کماندار ملک ھان مھمد مری نمیرانیں اُستاد جنرل اسلم بلوچ ءِ نزیکیں سنگتانی تہ ءَ یکے بوتگ – سال 2005 ءَ وھدیکہ اسلم بلوچ بولان ءِ اوتاک ءِ کماندار بوتگ ءُ راجی جھدے رھشونی ءَ کنگ ءَ بوتگ ھما وھد ءَ چہ ملک ھان مری ایوک ءَ نزیکیں سنگت نہ بوتگ بلکیں آئی ءِ رھشونی کتگ ءُ شور ءُ سلاہ ءُ پگری سھارہ جوڑ بوتگ – اے نزیکی ادارکی یا جاورانی نگیگی سوب نہ بوتگ بلکیں نزریہ گوں بندوک بوتگ کہ وھدے ھمراھی ءَ مھکتر بوتگ – وھدیکہ نمیرانیں اسلم بلوچ ءَ بلوچ لبریشن آرمی یک آشوبی ءُ ادارھی دروشم ءَ برگ ءِ کار بندات کتگ گڈا ملک ھان مری ھما کمانداراں چہ یکے بوتگ کہ آئی ءَ ٹکی ربیت، کھولی نزیکی یکگور کتگ ءُ اے بدلی ءِ ھمراہ داری کتگ – آ ھما مردمانی تہ ءَ ھوار بوتگ کہ آیاں ایوک ءَ اسلم بلوچ ءِ نزریہ بس نہ منّ اِتگ بلکیں وتی زند ءِ گڈی ساھت ءَ تاں ھمگرنچ بوتگ – آئی ءِ ھمگرنچی زاتی ءِ نہ بوتگ بلکیں ھما نزریہ ءَ گوں بوتگ کہ ھنچش اسلم بلوچ ءَ پکری سنچ ءُ آشوبی گل ءِ سازی ءِ درچ ءَ زرمبشت ءِ جان ءُ رگاں ھوار بیتگ-

آئی ءَ گوشتگ کہ ملک ھان نادراھی ءِ سوب ءَ 86 سال ءِ اُمر ءَ بیران بوتگ، ءُ گل ءِ پیسلہ ءِ رِد ءَ آ راجی شرپ ءُ آھترام ءَ گوں کل ءُ کسارت کنگ بوتگ ءُ مروچی آئی ءِ یات ءَ آ دروت ندر کنگ بوگ ءَ انت تاکہ آئی ءِ کرد بلوچ راجی دپتر ءِ بھر بہ بیت –

بلوچ لبریشن آرمی کمانڈر ملک ھان مری ءِ بیرانی ءَ نا ایوک ءَ گل ءِ درد سرپد بلکیں زرمبشت ءِ واستا یک چیدگے ھم من ایت ءُ سرزاھری ءَ بے توار بوگ ءُ گوستگیں تکاں ترینگ ءَ گچینی کردانی واھند بیتگ – آئی ءِ روگ مارا باز کمی سما بیت انت ءُ آئی ءِ کرد مارا سکارینت کردار مِر انت بلے نزریہ، کول ءُ کربانی درچ برجاہ بنت اِنت-

درشان ءِ گُڈسر ءَ گوشگ بیتگ بی ایل اے آئی ءِ کھول، نزیکیں ھمراہ، ءُ دراھیں باسکاں ھمدردی ءِ درشان ءَ کنت اِنت ھمایاں کمانڈر ملک ھان مری ءِ وڑیں رھشونانی ھواری ءَ جد ءُ جھد ءِ شپ ءُ روچ گوازینتگ انت – ما آئی ءِ نزریہ ءِ وارس بوگ ءِ اَھد ءَ کن ایں ءُ آئی ءِ یاد ءُ جد ءُ جھد ءَ گل ءِ نساب ءُ یاداشت ءَ مھکم کنگ بنت اِنت-

بلوچ وومن فورم ءَ آواران ءَ زالبول ءَ ھوار دو شھریانی درکانودی کوش تُرندی ءَ ایر جنان ءَ بیست ھشت مئی ءَ چارشمبے ءِ روچ ءَ سرجمیں دمگ ءَ شٹر ڈاؤن جار جتگ-

فورم رِد ءَ آواران ءِ دمگ مالار ماچی ءَ بیست شش مئی شپ کانود ایر کنوکیں ادارھاں بے کانودی ءَ کاروائی کنان ءَ سر ءُ دیم تیرگواری کتگ چریشی ءِ آسر ءَ دو مردم نعیم بلوچ ءُ یک زالبولے ھوری بلوچ بیران بیتگ اَنت وھدے کہ نعیم بلوچ ءِ کماشیں مات دادی بلوچ سک ٹپی بیتگ-

وئیل ھلاپ ءَ کھول ءُ دمگی مردماں لاش زرتگ ءُ آواران ءِ شھر ءَ سر بیتگ اَنت انساپ واستا تُرندیں زھرشانی ءُ ناراہ جتگ اِت-

بلوچ وومن فورم ءَ وتی درشان ءِ تہ ءَ گْوشتگ کہ ھمے سال ءِ بنداتی ءَ چہ آواران ءَ درکانودی کوش ءِ بازیں وئیلے دیم ءَ اَتکگ ءُ تھنا یک ھپتگے ءَ میان ءَ پنجمی وئیل اِنت کہ ترسناک ءُ کابل ایرجنگ اِنت-

فورم ءَ ریاستی ادارھاں سر ءَ بلوچ چُکچینی ءِ بھتام جنان ءَ گْوشتگ کہ ادارہ سرجمی ءَ بے لگام کتگ اَنت ءُ آ بلوچ دمگاں تاکت کارمرز کنگ ءَ اَنت-

جارکش ءَ گْوشتگ اسرمندیں کھولاں چہ یکجھتی درشان کنان ءَ تھی ءُ میان استمانی ادارھاں چہ لوٹ کتگ کہ آ اے وئیلاں سنجیدگی ءَ چہ گامگیج بزور اَنت ءُ ریاستی زوراکی ءِ ھلاپ ءَ توار چست بکن اَنت-

گُڈی ءَ فورم ءَ آواران ءِ راج ء چہ دزبندی کتگ کہ آ بیست ھشت مئی ءِ ھڑتال ءَ جوانیں وڑے ءَ بھر بزیر اَنت ءُ کھول ءِ گوم ءَ یکجاھی درشان بکن اَنت-