TBP Balochi

تیر سپتگیں جون

نبشتہ کار: امن بلوچ

دی بلوچستان پوسٹ

نبشتہ کارے نہ آں نزانتگ کسہ کجا بندات بیت چوں بندات بیت نزانتگ کجام بے وسی ءُ بزگی ءِ نبشتہ کنگ ءَ ند ءَ رِیسّیاناں بکناں کجام مات ءِ چیھانٹاں لبز بدیاں کجام گوھار ءِ روکیں جبین ءِ اُپارگاں بہ نزاراں ھچ نزانتگ ھچ سما نہ بوتگ ھمے ایردستیں چاگرد ءِ ایردستی ءِ سان ءِ گپتگیں مھلوک ءِ لڑ ءَ ھواریں بے نامیں سائی ءِ واھنداں ھمے پھم اتگ ھر وڑ ءَ بہ ئے بس شپ روچ کنگی ءُ روچ شپ کنگی انت دگہ ھچ کنگی نہ انت ھچ گشگی نہ انت ھچ پھمگی نہ انت – بلے لٹ ھما وھد ءَ توار کنت کہ وتی سر ءَ لگ ایت سما بیت چنچو بے وس بہ ئے چنچو لاچار بہ ئے جھان ءِ ھر تک ءَ بیزاری ءُ بے وسی ءَ ابید ھچ نہ مان ایت ھمے ساہ کہ زندگ بوھگ ءَ زیرگی انت ھمے اندر ءَ بدیں بوہ کنت بس ھمے گش ئے اے بدیں بوہ در بَیت ءُ پدا ھچبر مَیت انت-

من ءَ ھمے بے وسی ءِ سما ھمے وھد ءَ بیت کہ رسانکدر ءَ ھال چمان کپت (نامعلوم مسلح افراد کی فائرنگ سے اظہار ولد ملا مجیب زخمی)-

من ابکہ بیتاں باور بوھگ ءَ نہ ات جیڑ ات دروگے ازھار ءَ چی کتگ کہ کسے بیت انت ازھار ءَ تیر باراں بہ کنت ھمے بے وسی ءُ بے کراری ءَ من ءَ سر سر جنگ پرمات داں ھال رس ات ازھار نمیران بیتگ چماں چہ ارس پٹگ ءَ لگ ات انت ھچ کسہ باور بیگ ءَ نہ ات. باور بوھگ نہ ات کہ ازھار نمیران بیتگ ازھار ءَ مارا یل کتگ نوں دوبر ھچبر گوں ما ھم نیاد نہ بیت ھمے جیڑگ ءُ ھمے بے وسیانی میان ءَ اکس دیم ءَ کپت انت. پُل گونگیں ازھار ءِ تیر سپتگیں جون انت گوں ھوناں ششتگ – تھنا تیر سپتگیں جونے نہ ات بے ساھیں کُنٹ نہ ات کہ ارواہ ءَ بال کتگ ات بلکیں پہ ما ھما بزگی ھما بے وسی ھما بے کراری ھما کوھیں گم ات چد ءُ پیسر نہ پھم اتگ پہ وت ءَ نہ دیستگ ات – تھنا ازھار ءِ تیر سپتگیں تاسپیں بالاد نہ ات بلکیں مئے جھان ات ھچ مئے دست ءَ سستگ ات دارگ نہ بوت-

منی سالونک ازھار جان مارا ھچ گمان نہ ات تو چو اشتاپ کن ئے سالونک بوھگ ءَ. بلے تو مدام گوں ما ھال کت گپ گپ ءِ سرا تو گشت باریں ما کدی سالونک بہ ایں من مدام درائینت ازھار جان وھد ھست انگت ءَ مئے سالونکے ءِ وھد نہ انت-

ازھار جان من نزانت پہ تئی سالونکی ءَ ھانی ایں گلزمین سمبھ اتگ گوں تئی ھونانی وشبوھاں وت ءَ سمبھین ایت بانور بیت سالونک ءَ امبازاں زیر ایت منی ارواہ ازھار جان راستی ایش زند کسے پہ کس ءَ نہ اوشت ایت ھرکس امروز ءِ جلیں روچاں سرجم کنت – بلے تئی جتائی ءِ گرانیں بار مئے لگوریں زند ءِ کوپگاں زرت بوھگ ءَ نہ انت ھردے جیڑیں تو نمیران بوتگ ئے باور کن، باور نہ بیت ک تو نیست ئے-

من ھمے ودارایاں کدی بیا آں ملک ءُ تو من ءَ گند ئے بچکند ئے ءُ گش ئے ھال کن پُل کدی اتکگ ئے گڈی ءَ الم گش ئے گڑا آدینگ ءِ روچ ءَ تیار بو رویں پکنک ءَ دگہ روچاں تو زان ئے من دکان ءَ گٹاں-

ازھار جان یار مارا کئے نوں پکنکاں بارت کئے مارا آدینگ ودار ءَ نادین ایت ، ازھاز جان بیگاہ ءَ کئے مارا کوہ ءَ بارت شیرچاہ جوڑ کنت دات-

ازھار جان یار اے درستیں ارمان گوں تئی تیر سپتگیں، ھوناں گوں ششتگیں بالاد ءِ ھوری ءَ زمین ءِ میار بیت انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ زورانسری آوار جنی ءِ دْرچ یکشل ءَ برجاہ دگہ پنچ مردم بیگواہ کنگ بیتگ اَنت، اسلام آباد کراچی شال ءَ زھرشانی نندانک برجاہ ءَ اَنت-

بلوچستان ءِ جتاجتائیں دمگاں پنچ مردم آوار جنگ ءُ بیگواہ کنگ بیتگ اَنت –

گیشیں ھالانی رِد ءَ کیچ ءِ بُنجاھی شھر تربت ءَ سنگانی سر ءَ باکر ء شاکر گوستگیں پاکستانی پوج ءَ آئی ءِ لوگ ءَ چہ آوار جتگ -کھول ءِ رِد ءَ اشی پد سرکاری ادارھانی نیمگ ءَ ھچ وڑیں سرپدی دیگ نہ بیتگ-

ھمے وڑ دہ جولائی 2025 ءَ چہ وندر ءَ دو بلوچ نودربر، دوست علی بلوچ ءُ شاہ زیب بلوچ پاکستانی پوج ءِ دست ءَ آوار جنگ ءُ بیگواہ کنگ بیتگ اَنت-

دو ماہ ء گوزگ ءَ اَبید ناں آ آمیدگس ءَ پیش کنگ بیتگ اَنت نانکہ کھول سرپدی دیگ بیتگ اَنت-

کھول ءَ گوشتگ کہ آیاں وتی چُکانی جان ءِ ھترہ ھست اِنت ءُ آیاں ریاست ءَ چہ دزبندی کتگ کہ اگاں کسے ءَ بھتامے ھست گُڑا آیاں آمیدگس ءَ پیش بہ کن اِت یا کہ پہ سلامتی یل بہ کن اِت-

ھمے وڑ کیچ ءِ دمگ تگران ءَ پاکستانی پوج ءَ یک مردمے آوار جنگ ءَ پد بیگواہ کتگ کہ آئی ءِ پجّار غلام سرور داد محمد نام ءَ چہ بیتگ-

دمگی مردمانی رِد ءَ اے وئیل نُھ ستمبر ءَ بیتگ وھدے پوج ءَ تگران ءَ یک لوگے ءِ سر ءَ بیڑبرتگ – اے میان ءَ غلام سرور لوگ ءَ چہ آوار جتگ ءُ بیگواہ کتگ-

کھول ءِ گوشگ اِنت کہ آوار جنگ ءَ پد آئی ءِ ھچ وڑں ھال نیست نانکہ واکدار ءِ نیمگ ءَ اشی ءِ دزگیری ءِ پدر کنگ بیتگ-

غلام سرور ءِ کھول ءَ سرکار ءَ چہ لوٹ کتگ کہ آئی ءَ زوت یل بہ کن اِت اگاں آئی ءِ سر ءَ کجام وڑیں بھتامے ھست آمیدگس ءَ پیش بہ کن اِت-

ھمے وڑ بلوچستان ءِ دمگ چاگی بدگ ءَ یکمشبے ءَ نیمروچ ءِ کساس ساھت دو ءَ گوستگیں صوبائی نائب صدر بلوچ اسٹوڈنٹس آرگنائزیشن ( پجار) شفقت ء محمد قاسم ناشناسیں سلاہ بندیں مردماں چہ بس ءَ ایر گپتگ ءُ آوار جتگ اَنت-

کھول ءِ رِد ءَ شفقت ناز کہ میڈیکل ءِ پڑ ءَ چہ سیادی دار اِیت ءُ شرپمندیں شھری یے ءُ اے وھد ءَ وتی کھول ءِ ھمراھی ءَ سپر کنگ ءَ بیتگ کہ لھتے سلاہ بندیں مردماں بس ءَ چہ آئی ءِ کھول ءِ چمّانی دیم ءَ زورانسری آوار جتگ-

کھول ءَ واکدار ءَ چہ لوٹ کتگ کہ شفقت ناز ءَ یل بہ کن اِت ءُ بلوچستان ءَ زورانسری آوار جنی ءَ ھلاس کنگ ءِ ھاتر ءَ جوانیں گامگیج زوگ ءِ لوٹ کتگ –

دومی نیمگ ءَ بیگواھیں مردمانی یل کنائینگ ءِ ھاتر ءَ کھولانی زھرشانی نندانک برجاہ-

شال پریس کلب ءِ دیم ءَ وائس فار بلوچ مسنگ پرسنز ءِ زورانسری آوار جنی ءِ ھلاپ ءَ دراجے مدتے ءَ چہ برجاہ زھرشانی بُنجل ءَ مروچی پنچ ھزار نُھ سد سی شش روچ سرجم بیتگ-

اے درگت ءَ جتاجتائیں پڑ ءِ مردم اَتکگ ءُ کھول ءَ چہ ھمدردی درشان ءِ کتگ زورانسری آوار جنی ءِ گر ءُ دار ءُ بیگواھیں مردمانی دیم ءِ آرگ لوٹ کتگ-

ھمے وڑ ءَ کراچی پریس کلب ءَ دیم نشتگیں کھولانی نندانک مروچی چارشمبے ءَ سی ھپتمی روچ ءَ پُترتگ-

بیگواھیں ورنا زاھد علی بلوچ ءِ پت عبدالحمید بلوچ ءَ رسانکدر ءَ تران کنان ءَ گوشتگ کہ آئی ءِ چُک بے میار اِنت ءُ مھنتی ورنایے کہ وتی کھول ءِ کوپگ بیتگ، بلے مروچی آ چہ مارا پچ گرگ بیتگ- آئی ءَ گوشتگ اگاں آئی ءَ چُشیں گناھے کتگ گُڑا آمیدگس ءَ پیش بہ کن اِت ءُ چو درکانودی بیگواہ مہ کن اِت-

انسانی ھکانی کارکنانی رِد ءَ کراچی ءِ جتاجتائیں دمگاں چہ بازیں بلوچ ورنایے بیگواہ ءَ اِنت کہ آیانی تہ ءَ شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت – اے درست گریبیں لوگاں گوں سیادی دار اَنت، بلے اشانی زورانسری آوار جنی کھول ءَ سک دلسیاھیانی دیمپانی کتگ اَنت-

زھرشانی کنوکانی گوشگ اِنت کہ ھور یا روچ، ھچ وڑیں اڑان مارا نزور کُت نہ کن اَنت – آیانی یکیں لوٹ اِنت کہ آیانی دوستناک پہ سلامتی واتر بیار اِیت یا اگاں آیانی سر ءَ بھتام ھست گُڑا آمیدگس ءَ پیش بہ کن اِت ءُ انساپ بدے اِت-

ھمے وڑ اسلام آباد ءَ بی وائی سی سروک ءُ بیگواھیں مردمانی یل کنائینگ ءِ ھاتر ءَ برجاھیں زھرشانی نندانک ءِ پنجاہ ءُ ھپت روچ سرجم بیتگ-

کھولاں مرچی ھم زھرشانی روانکے کش اتگ ءُ پہ وتی لوٹانی ھک ءَ ناراہ جتگ ءُ بلوچ یکجھتی کمیٹی ءِ بندیگیں سروک ءُ زور بیگواھیں مردمانی آجوئی ءِ لوٹ کتگ۔

آیانی گوشگ اِنت کہ مئے اد ءَ زھرشانی کنگ ءِ مول ھمیش اِنت ڈاکٹر ماہ رنگ بلوچ ءَ ھوار بلوچ یکجھتی کمیٹی ءِ بندیگیں سروک یل کنگ بہ بنت، زور بیگواھیں مردم آجو کنگ بہ بنت ءُ بلوچستان ءِ زوریں بیگواھی بند کنگ بہ بیت۔

آیانی گوشگ اِنت بلوچستان ءَ بلوچ یکجھتی کمیٹی ءِسروکاں ھوار آدگہ سیاسی کارکنانی دزگیر کنگءِ مول ھمیش اِنت کہ اود ءَ کس پہ وتی ھک ءُ زوریں بیگواھی ءُ ریاستی زوراکیانی بگیری ءَ توار چست مہ کنت۔

آیانی گوشگ اِنت کہ مئے لوٹ ڈیھ ءَ آئین ءُ کانود ءِ رد ءَ اَنت دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔

کسرکند ءِ بازار ءُ نیکشھر – چھبار شھدگ ءَ ایرانی لشکر ءِ دست ءَ دو مردم بیگواہ-

مرچی کسرکند ءِ بازار ءَ بلوچ ورنایے ایرانی لشکر ءِ چیریں ادارھانی کارمنداں لَٹ ءُ کٹ کنگ ءَ پد آوار جتگ ءُ بیگواہ کرتگ ۔

زوربیگواہ کنگ بوتگیں مردم ءِ پجار ابداللہ ء نیاز کسرکند ءِ میتگ ازیز آباد ءِ جھمنند انت ۔

ابداللہ مرچی سُھب ءَ کسرکند ءِ شھر ءَ شتگ کہ اود ءَ لشکریاں ابید آمیدگس ءِ ھُکم یا میارباری ءِ پدر کنگ ءَ آ لَٹ ءُ کُٹ کنگ ءَ پد آوار جتگ ءُ بیگواہ کرتگ ۔

دومی نیمگ ءَ نیکشھر۔چھبار شھدگ ءَ دو ماہ پیسر ءَ روْکیں بلوچ ورنایے ایرانی لشکریانی نیمگاں چہ آوار جنگ ءَ پد زور بیگواہ کنگ بوتگ کہ انگت ءَ آئی ءِ ھچ وڑیں ھال نیست ۔

زوربیگواہ کنگ بوتگیں مردم ءِ پجار مھمد اُمر ء ھُداداد انت کہ آ نیکشھر ءِ میتگ زیرک اباد جھمنند انت ۔

مھمد اُمر چہ نیکشھر ءَ چھبار ءَ روگ ءَ بوتگ کہ سپاہ ءِ چیر اندری ٹولی ءَ آوار جنگ ءَ پد زوربیگواہ کرتگ ۔

کھول ءِ گوشگ انت کہ ما کہ لشکریانی بنجل ءُ آمیدگس ءَ شتگ ایں بلے لشکریاں مھمد اُمر ءِ میارباری یاکہ آوار جنگ بابت ءَ ھچ نگوشتگ ءُ گوں آئی ءَ ملاکات کنگ ءِ موکل ھم دیگ نہ بوتگ ۔

یکبرے پد ءَ بچکند

نبشتہ کار: مھمد الی

دی بلوچستان پوسٹ

مھروانیں! ازھار اے ساھت ءَ کہ من پہ ترا نبشتہ کنگ ءَ آں منی لبز منی ھمراہ نہ انت منی لبز تئی لنٹانی سر ءِ بچکندگ انت بلے ھمے بچکند اے ساھت ءَ نہ سگگوکیں گم ءُ تورشتانی ھما گرانیں بارانی دروشم ءَ جبین ءِ رگ رگ ءَ ھوار کپتگ انت اندر ءَ بے کراری یے رُستگ ما گوں وت ءَ نہ ایں مئے جیڑگانی تہ ءَ بس تو ءُ پشکپتگیں یات انت راجی گلامی ءُ مئے بے سمائی ءَ ترا اَچ ماں سست ءُ نمیران کت تئی ھاموشی ءَ چونیں کارے کت مئے پگر، سسا بے ھاٹیگ بوت انت چش اناگھی تو تیرباراں کنگ بیتے تو وتی لاگریں بالاد ءَ پہ شان سئے رگبار تیر اندر ءَ جاہ دات ءُ وت ءَ نمیران کت۔

ازھار مئے چاگرد ءِ کارستانی تہ ءَ یک شوکیں ءُ زیبائیں کارستے اَت ھما کارست کہ آئی ءَ چہ ھرکس دلجم اَت ھستیں وھد ءِ تہ ءَ ازھار ءِ رنگیں کارست ءِ پولگ گران انت۔ ھمے وڑ ءَ ازھار ءَ ھر چیز پھم ات زمین ءِ گلامی راج ءِ بزگی لنگڑی ھمے سوب ات کہ رستراں ازھار نمیران کت، اَردیں من گوں ازھار ءَ ڈیک وارتگ گڑا کندگ مزاک مسکرا ھبر ھال کتگ ءُ برے ما مھاز ءُ برے گلام جان کلاگ بستگ انت ءُ کند اِتگ۔

ازھار اے ساھت ءَ تو چی جیڑگ ءَ بیتگ ئے وھدے لگوریں رستر ءِ داشتگیں چانوگراں توپگ تئی سینگ ءَ سک داتگ، تو بچکندگ ءَ بیتگ ئے نا؟ ھو من زاناں من دلجماں کہ تو پہ بچکند مَرگ امباز اِتگ ھمے ساھت ءَ کہ مھاز تئی گِردیں پیشانی ءَ چکگ ءَ انت اے ساھت ءَ تئی بچکند مھکم انت، ازھار، تو مرگ پہ مڑاھے امباز ات-

مھروان! من ءَ پہ تو زھیر بوھگ ءَ انت اے ساھت ءَ من وتی ھیالاں ھمے باور کنائینگایاں کہ تو نیست ئے،بلے باور بوھگ ءَ نہ انت منی نز ءَ تو ھست ئے مئے دیوان انت تئی کندگ ءُ ٹھکاں دیوان سمبھینتگ ءُ من ءَ کلاگ بندگ ءَ ئے بلے من مدام ترا کلاگ بست ءُ گشت تو باریں کدی زیبا بہ ئے تو پسو دات مھمد یار من ءَ بِل اِت من مدام پہ شما زیبا آں، بلے مھروان! ترا اچ ما سست ءُ جتا اش کت یار ازھار اَچ تو گش ئے مند نوں ورگ ءَ سر گپتگ نشت بوھگ ءَ نہ انت ھر کجا بے کراری انت ایوکی انت-

ازھار ترا یاد انت تو مدام منی انسٹاگرام ءِ نبشتگیں نکانانی سر ءَ پسو داتگ کہ اے نکان پلاں کتاب ئیگ انت تو ایر کتگ گڑا من مدام تئی پسو دیگ ءَ ابکہ بوتاں کہ اے چوں زانت؟ گڑا یک روچے روزرد ءِ وھد ءَ من اتکاں تئی دکان اءَ پہ کارے ءَ گڑا من جست کت کہ ازھار من مدام اسٹوری ایر کناں تو چوں زان ئے کہ اے پلاں کتاب ءَ پلاں آرٹیکل ءَ مان انت تئی پسو ھمیش ات اے آرٹیکل کہ تو نبشتہ کتگ گڑا اے من زی ونتگ پلاں کتاب ئیگ انت من گشت بل تو کجا ءُ کتاب کجا تو گوں دکان ءَ انچش بندوک ئے ترا ورگ ءَ وھد نہ رس ایت گڑا تئی پسہ ھمیش ات یار تو راست گش ئے من ءَ وھد نہ رس ایت بلے من ھردیں کہ کتابے دیم ءَ کنگی بیت گڑا گوربام ءِ وھد ءَ پاد کایاں ڈن ءَ تھت ءِ سر ءَ ننداں کتابے دیم ءَ کناں ھمے ساھت من ءَ سک دوست بیت اے ساھت ءَ مرگانی چِری چِری چکانی توار کتاب وانگ ءِ ھُب ءَ‌گیش کن انت ھمے وھد ءَ کتاب واناں اگاں وھد رس ایت گڑا مھاز ءِ گوم ءَ آرٹیکل یا کتاب واناں منی کتاب وانگ ءِ وھد ھمیش انت مھمد جان دگہ وھد من ءَ نیست کہ من پہ وت چیزے بہ کناں۔

مرچہ من ءَ تئی سجئیں گپ ءُ ھبر ٹھک ءُ بچکند درست یاد پیداکاں،ازھار سئی بہ بو من داں زمین میار کنگ ءَ گوں تو ھمراہ اتاں بلے منی دستاں ھاٹیگ نیست ات کہ پہ تو سئے چنک ھاک ندر بکناں من ءَ پہ ترا شات نہ بوت کہ ترا وتی دستاں گوں ھاکاں ھوار بکناں۔ بلے اگاں من بزانتیں تو پہ زمین ءَ چش شیدا بوتگ ئے پہ ھاک ءِ وشبو ءَ چُش اشتاپ کتگ گڑا من الم اے گلزمین ءِ مسکیں ھاک ءِ سئے چنک پہ تو کولیگ کتگ ات۔مھروان!من ھمے سرپد بوتاں تو ھست ئے تو مئے میان ءَ بچکندگ ءَ ئے۔ منی ایمان انت اے ساھت ءَ من اے چاریں پرشتگیں گالاں نبشتہ کنگ ءَ آں ترا نوتک ءَ امبازاں زرتگ پہ تبے وش اتک کتگ
تو گوں نوتک ءَ ھوار کُلیں شھیداں گوں ھم دیوان ءِ ڈیھ ءِ ھالاں کنان ئے من زاناں تو مئے لگوری ءِ گلہ الم ءَ کتگ انت۔ پہ گلگ گشتگ مردماں گلامی ءِ ھچ سما نیست گلامی ءِ گرم ءِ چیر ءَ کُل سچگ ءَ انت بلے سما کنگ ءَ نہ انت اے گرم اے تبد چو اشکر ءَ زمین ءِ دلبند ءَ روک انت سوب کُل گلامی انت بلے کس سما کنگ ءَ نہ انت۔

مھروان! تو گوں نوتک ءَ وتی ءُ مھاز ءِ مھر ءِ کسھاں پہ دابے آرگ ءَ بہ ئے نوتک پہ ناز ترا گوشدارگ ءَ بیت ءُ ناز کنت ازھار جان گُڈی ترا گشگ لوٹاں ترا یاد انت تو انستاگرام ءَ پوسٹ ءَ نبشتہ کتگ ات کہ:

“بید ءِ زمین ءَ ھست چی”
“بید ءِ زمین ءَ ھچ مبات”

ترا گشگ لوٹاں پہ ترا بید ءِ زمین ھچ نہ بیت پہ ترا بس زمین ھست ات ءُ تو پہ زمین ءَ وت ءَ ندر کت۔ مھروان! سئی بہ بو ترا چو اشتاپی بے انانی ءَ مارا یل کنگی نہ ات گوں تو زندگی ءِ بازیں کسہ پشت کپت انت گوں تو مارا باز چیز گندگی ات،تو مئے دیوانانی براہ بیتگ ئے کندگانی نور بیتگ ئے،مئے دیوانانی براہ چہ تو پد شتگ تئی بچکندگانی نور مسکیں ھاک ءَ وتی کتگ بس بے کراری پشت کپتگ مردم گوں وت ءَ نہ انت ھمے بے کراری برے دمکے ءَ سر ءَ کش ایت سر سر جنگ ءَ پرمائیت دیوان جاہ ءَ کُنٹگ رودینتگ سنگت نشت نہ بنت تو مارا گرانیں بارے کوپگاں دات ءُ اچ ما گِسر کپتے چو زوت ترا روگی نہ ات،گُڈی ءَ مارا پھل کن ما پہ تو ھچ کت کنگ ءَ نہ ایں ما پہ تو ھچ کت نہ کت-

“یکبرے پد ءَ بچکند تئی ھون ءِ وشبوہ ھمک میتگ ءَ شنگ اِتگ”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ واشک، تربت، چاگی ءَ پوج ءُ شرکت ءُ پولیس کارندھانی سر ءَ سلاہ بنداں اُرش کتگ ءُ شرکت ءِ مشینری ءُ پولیس کارندھانی سلاہ پچگرگ بیتگ انت-

واشُک ءِ دمگ پتک ءَ سی پیک شھدگ ءَ پجار نہ بوتگیں سلاہ بندیں مردماں پاکستانی لشکر ءِ واستا وراک ءُ راشن بروکیں کاروان گوں وتکار ءُ ٹوھیں سلاھاں اُرش ءَ نشانگ کتگ کہ چریشی ءَ لشکر ءَ جانی تاوان دیمپانی کنگ کپتگ-

اُرش ءَ پد پاکستانی لشکر ءِ جنگی بالیگ وئیل جاہ ءَ اتکگ انت ءُ سر بوتگ انت ۔

ھمے وڑ ءَ چاگی ءِ دمگ زیارت بلانوش ءَ پجار نہ بوتگیں سلاہ بندیں مردماں دوشی پاکستانی لشکر ءِ چیر دستی ءَ دگ جوڑ کنوکیں شرکتے ئِے سر ءَ اُرش کتگ ءُ شرکت ءِ گاڑی تیرگواری ءَ پد مانداشتگ انت کہ چریشی ءَ شرکت ءَ تاوانانی دیمپان بوتگ ۔

چہ اُرش ءَ پد سلاہ بند چہ وئیل جاہ ءَ در آھگ ءَ سوبین بوتگ انت ۔

تُربَت ءِ دمگ جوسک ءَ مرچی پجار نہ بوتگیں سلاہ بندیں مردماں پولیس ءِ کارمند دزگیر کرتگ انت ءُ سلاہ پچ گپتگ انت ۔

اھوالانی رد ءَ مروچی نیم روچ ءَ پجار نہ بوتگیں سلاہ بندیں مردماں پولیس ءِ کارمند کہ پی ڈی ایم اے شرکت ءِ چیر دستی ءَ پھازداری ءَ بوتگ انت آوار جتگ ءُ گوں وت برتگ انت کہ سلاھانی پچ گرگ ءَ پد یل داتگ انت ۔

سلاہ بندیں مردماں توپکانی دستیگ کنگ ءَ پد پہ سوبمندی چہ وئیل جاہ ءَ در کپتگ انت ۔

چوش کہ بلوچستان ءَ اے وڑیں اُرشانی زمہ واری مدام بلوچ آجوئی لوٹوک ءِ گلّاں زرتگ انت ، بلے اے اُرشانی زمہ واری انگت ءَ ھچ گلّ ءَ نہ زرتگ انت ۔

اِزھار دشت ءَ سر نہ بوت

نبشتہ کار: زبیر گلاب

دی بلوچستان پوسٹ

انسان ءِ سر ءَ مرگ وَ چونھا پَرز اِنت بنی آدم اتگک پہ مِرگ بلے ھُدا ءَ زند ترا داتگ تو اے زِند‌ ءَ چون دیم ءَ برے ءُ چون وتا پیشدارے بلے گپ پد ءَ ھما اِنت ترا مِرگی اِنت ھر وڑ بہ بئے ، بلے ھمے مَرگ لھتیں مردُم ءِ سِدگ سَک ءَ گِران اِنت انسان ءَ چَٹ پرشش ایت ءُ روت ءُ لھتیں مردُم ءِ روگ ھم مردُم ءَ باور نہ کنت بلے چون کن ایں ما ایردستیں چاگِردئے ءَ زندگی کنگ ءَ ایں گڑا‌ ھمے ایردستی منی ءُ تئی وشیاں چون سَگ ایت روچے چیزئے بارت برے براتے برے سیادے ءُ برے مھروانیں دوست ءُ سنگتے،ھمے ایردستیں چاگِرد ءَ مئے مھروان بُرت دیدگیں اِزھار جان اِزّو یار ترا یات اِنت؟ آ شپی تو گُشتگ اَت زُبیر باندا شپ ءَ پِکنِک‌ ئے کنیں سُھب ءَ بیا گُڑا چیزاں ٹھین ایں-

یارر اِزو ھمے سھب ءَ من سئوت ءِ پِر کُتگ اَت کمرہ ساپ کُت اَنت ءُ اناگہ ءَ سنگتے اتک ءُ گُشت ئے زُبیر سئوت ءَ بند کن کہ دِگہ وڑیں ھالے من گُشت اے مُلک ءَ زاناں کدی مارا وشیں ھال رس اتگ؟ بلے یار اِزّوو منی وَھم ءُ گُمان ھِچ تئی نیمگ ءَ نہ شُت پرچا بُروت پرچا بُروت تو زاناں چی کُتگ یار؟ یار من واست ءِ درآیگ ءُ تئی نیمگ ءَ آیگ ءَ اے ھال سر بُوت کہ اِزّھار ئے جَتگ! اے ھال ءَ گوں منی گُوش بند بیتاں ءُ من نہ زاناں چوں دراتکاں چہ اوتاک ءَ سنگتے ءَ من ءَ گُشت بیا منی سائیکل ءِ سر ءَ رواں، من کہ دراتک آں داں گنداں کیمپ ءِ دپ ءَ واجہ(تئی کماش) اوشتاتگ ءُ من دیم پہ کیمپ ءِ دروازگ ءَ تاں کماش ءَ من ءَ گِپت ءُ گُشت “بابا بیا نئیلگ ءَ اِنت” من گُشت واجہ ازھار چون اِنت؟ واجہ ءَ اوپار ءُ مُھکمی ءَ گوں کندگاں گُشت ” من وت نہ زاناں من وتی دُکان ءَ بُوتگاں” ھمے ساھت ءَ یکے اتک ءُ سر بُوت ءُ جُستی کُت”واجہ چی بُوتگ؟ واجہ ءَ گوں بچکنداں پسّو دات “اِزھار اِش جَتگ بزّگ ءَ را” یار اِزوو من کماش ءَ گِنداں ھیران آں یار تو کماش ءِ جِند بوتگ ئے ھما برداشت ھما اوپار ھما سَگ یارر تئی کُجام کسّہ ءَ بہ کناں؟-

یار اِزّوو تو انچیں مھروان ئے اِت ئے ھر وھد ھر وڑیں جاوراں گوں کندگاں چو کوہ ءَ مھکم اوشتاتگ ات ئے من ءَ اے ھم یاد نہ کنت کہ منی ءُ تئی سنگتی چون ءُ کُجا بِندات بوتگ ءُ من ءَ اے ھم یاد نہ کنت کہ چون ءُ چی وڑ بوتگ ، بلے مئے نیام ءَ یک انچیں مھرے ودی بوت کہ ھمک وشی ءُ گماں یکجاہ اِتیں،سُھب داں مگرب دُکان ءَ اگاں وھد رس اتگ گُڑا آدینگ ءِ روچ بوتگ کہ ما برے اوتاک ءَ نشتگیں ءُ کدی کوہ ءَ پہ چاہ ئے ءَ شُتگیں ما ءُ تو اِنچو کتاب ھم نہ ونتگ نہ کہ ترا ءَ را دِگہ شریں زانت ئے ھرچی دربرتگ چہ ھمے چاگِرد ءَ چاگِرد ءِ جاوراں بلے ھرچی ونتگ دِل ءِ گون ءَ ونتگ اے یک انچیں پگرے یے واھُند بوتگے کہ چیزانی سر ءَ تو اَنچو گپ جَتگ ما ھیران بوتگیں ءُ ھروھد چاگِرد ءِ مردُم گوں ایرتیں نِگاھے ءَ گوں چارِتگ آں ءُ گُشتگ “ ھما کار کہ ما اِش نہ کن ایں ءُ ما اِش چُکّی پھم ایں ءُ پد ءَ اے کاراں مئے ھما مردُم وت ءَ راج دوست لیک اَنت سیاسی ءُ سماجی پد ءَ مارا چہ گیشتِر ھمے مردُم اے کاراں کن اَنت یکے ایشانی گپاں بہ گِند ایت وَ کُوہ کپ کن اَنت تو گُش اے نو راج ءَ بڈّ ءَ بند اَنت بلے پد ءَ اِشانی کاراں بگندے، انسان باید وتی سُوچ ءُ وتی کِرد ءَ مزن بہ کنت بلے مئے مردُم ایش اَنت اے کُجا مار ءَ ءُ کُوم ءَ بڈّ ءَ بند اَنت اے وتی زاتی زندگی ءَ گیش نہ اَنت ھُشک ءَ بس گپ کن اَنت ” ءُ من مُدام گُشتگ تو “ناول” گِدار ے بہ لِک” ترا یات اِنت تو چی گُشتگ؟ ھو یار بلے مارا مُو نہ رَس یت گرک ایں ءُ ما ٹھک داتگ، اے کُلیں چیز یک جاہ کُتگ اَنت ءُ تو یک چیزے نبشتگ وتی انستا ءَ “پھمگی زند مارا دُرست آں کِرد مارا مرگ ءَ پد زندگ بکاں”-

اڑے اِزو ترا یات اِنت؟ مَگرب ءِ وھد ءَ یک مرد کارے اتکگ اَت ءُ سَک اشتاپ کنگ ءَ اَت کہ من ءَ بلیس(ایزی لوڈ) بہ دے 500 ءِ تو گوں موبائل ءَ وتی کار ءَ دِلگوش اِت ئے ءُ تو پنچ سد ءِ بدلاں تو شش سد دیم دات ءُ تو گُشت من 600 دیم داتگ ءُ ھمے مردکار ءَ کُوکار کُت ءُ گُشت “شُما گپ ءَ گُوش نہ دار اِت زھن گوں موبائل ءَ اِنت” ھمے نیام ءَ تو کندان ءَ گُشت “پرواہ نیست واجہ تو پنچ سد بہ دے” ھمے پرواہ نیست ئے گُشگ ءَ گوں مرد پُرشت ءُ گُشت ئے “نا من زراں پورہ دیاں”من گُشت یار اِزّوو اے چون اِنچو یار اُوپار تو گُشت “ھر وھد ءَ تئی دیم ءِ مردُم جزباتی اِنت تو ھِچ مہ گُش گوں سنگینی ءَ آئی ءَ سمجارین آ وت پُروشیت”-

یار اِزّوو! تئی ھمے بے ھَبّری ھرکسی کار ءَ گوں وت ءَ ھوار گیجگ کسے ءَ کہ ترا کارے بہ گُشتیں اگاں وس ءَ ات تئی دپ ءَ نا در نہ اتکگ، ھر وھد دست گٹ اَت دیوانگ ءَ پہ ھاک ءَ پہ وتی گُلزمین ءَ ھر وھد گوانکوں گون اَت ئے سنگتانی اکس گِپتاں ءُ مھاز ءَ مُدام گُشتگ “من شُمئے شریں اَکس کشّاں ءُ شُما یکے ھم منی اکس ءَ شر نہ کش اِت بلے یار اِزّوو تو مُدام گُشتگ “اڑے اے چیز مارا انو دوست نہ باں بلے مرگ ءَ پد کُلیں چیز شوک باں اگاں باور نہ کن ات شُما بہ مِر اِت من وت شُما را وتی وٹس ایپ ءِ اسٹیٹس ءَ کناں ھھھھ، بلے یار اِزّوو مرچی تئی جِند اسٹیس بوت ھر جاہ توے دِگہ کس ءُ تو لوٹ اِتگ اَت اَنچو بہ بیت کہ من پہ وتی زمین ءَ شھید بہ باں، تو گُشتگ اَت “من ءَ لَٹ ئے گِین مان نیست من ءَ گُڑا ھما وھد ءَ بہ جناں” ھمے وڑ بُوت نا دگہ جستے نا ھال ءُ ھَبر ے بس اِزھار توے؟ ھو ازھار من ءَ گو ھمے ھبر ءٔ تپنگ دیم گوں ترا اش کت بہ جَن بُرو!-

اڑے اِزّوو ترا یات اِنت گُڈّسر ءَ ما دشت ءَ شُت ایں ترا ناسی ئیں گُد پِر اَت سنگتے ءَ گُشت یار اِزھار وتی بڈّ ءَ چادِر ءَ پَتاہ کہ تئی گُد سک ھاک چِن اَنت ءُ ترا یاد اِنت تو چی گُشت؟ تو پہ بچکندگے گُشت “یار ما دشت ءَ اتکگ ایں ءُ پد ءَ ھاک دنز ءُ پُلک ءَ مہ امباز انت گُڑا مئے دشت ءِ آیگ ءَ چی پائدو ءُ تو ٹھک دیان ءَ دیم منی نیمگ کُت ءُ گُشت چی گُشے زُبیر؟ من گُشت راست گُشے مُلا ءِ چُک ءُ ما ٹھک دات۔

اڑے اِزّوو تو یارر نوکیں پلپٹے ءِ(موٹرسائیکل) زُرتگ اَت کہ اے نیمون ءَ کہ دسمبر ءَ ما دشت ءَ سر تانی چارگ ءَ پد ءَ رویں ءُ تو گُشتگ اَت اے رَندی کمّو داریں سجّیں دشت ءَ گُولیں کُلیں میتگاں چاریں، ءُ من ترا ھمے کَلاگ گِپت ءُ گُشت تو بلکیں (Documentary) ءِ جوڑ کنگ ءَ دِل مانگ ءِ تو اِدا نوکی کمالان بیبگر نہ بہ ئے ءُ کدیر ترا اِنچو روچ ءِ مُوکل نہ دنت تو زھم جَتگ تو ھمدا دُکان بہ نند دشت وت تئی چارگ ءَ کیت تو مہ رو ءُ آ دیم ءَ سر زئی آں گُشتگ اَت کہ الّم بیا اِت دسمبر دیر اِنت اَنو بیا اِت بلے تو گُشت اَنو نَبی دست بنداں ما انو کراچی ،شال ءُ کاران ءَ بوتگاں دُکان ءِ ھالات گڑبڑ آں ھر چی بی دیم ءَ انشاللہ-

بلے جان تو دشت ءَ سر نہ بُوت ئے ءُ تئی یکیں واھشت ھم اِشکند بُوت بلے یار اِزّوو ترا چہ پد مئے ھَلک ءَ انچیں ابیتکی یے مانشان اتگ کہ کسّہ نہ بیت ءُ دُرستاں چہ گیش مئے اوتاک ھمے کہ تو اَتکگ ءُ گُشتگ “اڑے زُبیر ھال کن باریں پاوربیک (Powerback) ءَ چارج مان من ءَ کمّو زر جَنگی اِنت” من مُدام گُشتگ مُلا ءِ چُک بس ایں یار تو اوتاک ءَ ھم شری سر ءَ نہ نندے بس “نیٹ ءُ نیٹ” اِنچو (reels) ءِ چارگ تو گوں بچکنداں گُشتگ “اِنّاں اڑے من ءَ زر دیم دیگی اِنت بچار وڑے بہ کن پاور بیک ءَ یا کہ لیپ ٹوپ ءَ ٹئین ات یار چی کنیں زُبیر ما گُلامیں کُومے ما اگاں کار مہ کن ایں شُدکُش ایت” یار اِزّوو من ءَ دست ھمراھی کنگ ءَ نہ اَنت پہ تو من ھچ نبشتہ کُت کنگ ءَ نہ آں مھروان تو گُڈسر ءَ من ءَ باز رند ءَ اے ھَبّر گُشت زُبیر ھاجی نزیر ء چُک” تو گُشت زُبیر تئی پِت ءَ بُگش ھَجے بہ کن ترا اے نام سَک لَگِ اتگ گوں ءُ تو اَنچو کند اِت سَک باز” ازّو نو من ءَ کئے گُش ایت ھاجی نزیر ءِ چُک ترا لوکل ھست؟ ءُ اوتاک ءَ ھرکس ءَ تو گُشتگ “بیٹا تئی نام کئے اِنت ترا لوکل ھست؟ اِزّو جان نمیران ئے جان- “گیر کارا‌ں ترا گوں بچکنداں”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ ورنایانی کوش ءُ مئے زمہ واری

نبشتہ کار: اُزمان‌ ھمل

دی بلوچستان پوسٹ

چہ پاکستان ءِ نیمگ ءَ بلوچ کُش پالیسی نوک ٹھینتگیں پالیسی یے نہ انت. ھما روچ ءَ کہ پاکستان ءَ وتی زوراکی ءِ پنجگاں گوں پُرگنجیں زمین کہ وتی ایر دست کتگ چہ ھما روچاں پُرگنجیں زمین ءِ اوبادگانی چُکچینی برجاہ انت اے میان ءَ پاکستان ءَ وتی بلوچ کُش پالیسی بزاں کار رھبندانی چھر ءُ دروشم مٹ کتگ انت مدام گوں وتی نوک ساز اِتگیں پندلاں دیم ءَ اتکگ ءُ وتی ھما روشت ءِ جند برجاہ داشتگ. اے میان ءَ بلوچستان‌ ءِ تہ ءَ چشیں میتگ ءُ بازار یا چشیں کھولے پش نہ کپتگ کہ آ پاکستان ءِ زوراکیانی آماچ نہ بیتگ ، میتگا‌نی میتگ ماندارگ بیتگ انت چہ جند ءِ بُن‌ پیروکی ھلک ءُ ھنکیناں چہ مھلوک لڈّینگ بیتگ انت، روزیگی (معاشی)راہ ءُ در بند کنگ بیتگ انت ماتانی تاسُکیں بچ چمانی دیم‌ ءَ کُشگ بیتگ انت ، چِست کنگ بیتگ انت پد ءَ آیانی داگ داتگیں ءُ ڈریل کتگیں جون‌ دور دیگ بیتگ اَنت. ایشاں ابید زورانسری گار ءُ بیگواھی ءِ یک نہ کُٹوکیں دْرچے بنا کنگ بیتگ کہ روچ ءِ مروچی گوں تُرندی ءٔ برجاہ انت ھمک چشیں روچے نیست کہ بلوچ ورناہ زورانسری گار ءُ بیگواہ کنگ نہ بنت ھزارانی کچ ءَ بلوچ ھمے زورانسری گار ءُ بیگواھی ءِ کھرانی دیمپان انت کہ آیانی تہ ءَ بلوچ نودربر ءُ لس پوریاگر ءَ بگر تاں بلوچ ءِ گِراں لجیں مات ءُ گھاراں بیا پاکستان ءِ تھار ءُ جدیمگیں کوٹیا‌نی دیمپان انت ءُ آزار سگگ ءَ انت کہ پاکستان آیانی بیگواھی ءِ منگ ءَ جاڑیگ نہ انت-

مروچی کہ ما گندگ ءَ ایں چہ پاکستان‌ ءِ نیمگ ءَ بلوچ کُش پالیسی ءِ تہ ءَ گیشی آرگ بیتگ اے پالیسیانی تہ ءَ پاکستان‌ جتا جتائیں کار رھبندانی سر ءَ کار کنگ‌ ءَ انت، چش کہ دروگیں میڑ ءِ‌ نام ءِ سر ءَ زوربیگواھیں بلوچ ورنایانی شھید کنگ، کُشندہ ٹولیانی دست ءَ باسمائیں بلوچ پُسگانی نشانگ کنگ ھوار انت.

”بانک کریمہ وتی نبشتانک ءِ تہ ءَ گش ایت کہ “ھردیں زورگیر ،لُٹ ءُ پل کنوکیں تبک ءُ تاکتانی ھستانکی (وجود) ترس آماچ بنت گڑا آ سَربتگی ءِ دنیا ءَ سر کش اَنت ” مروچی پاکستان ءِ بلوچ کُش پالیسی ءِ روشت ءِ تہ ءَ ترندی ھمے چیز ءَ پدر کنت کہ پاکستان چہ بلوچ ءِ باسمائیں ورنایاں ترس آماچ ءُ سربتگ انت چاگرد ءِ ھمک ھما باسمائیں مردماں وتی بلوچ کُش پالیسی ءِ نشانگ کنگ‌ ءَ انت کہ آ یک شریں پگر ءُ سماہ (شعور) یے داریت گوستگیں روچاں چہ مند ءُ گومازی ءَ یکیں روچ ءَ چہ پاکستان ءِ داشتگیں کُشندہ ٹولی(ڈیتھ اسکواڈ) ءِ دست‌ ءَ سئے بلوچ پُسگانی گوں بے دردی ءَ شھید کنگ پہ بلوچ راج ءُ بلوچ چاگرد ءَ سک ءَ پدردیں گپ ئے اگاں ھمے وڑ بلوچ مھلوک ءَ وتی چاگرد ءِ‌ تہ ءَ سھرا بیتگیں ھمک روچی زوراکیانی ھلاپ ءَ پاد نہ یتک ءُ گھگیری نہ کت پہ ترس چم نَز کت انت ءُ بے تواری ءَ گوں نِشت وتی باریگ ءِ ودار کت چہ پاکستان ءِ نیمگ ءَ مئے چاگرد ءِ سر ءَ مُشگ بیتگیں بے زمیر ءُ کم زرپیں مردم کہ پاکستان ءَ پہ بلوچ چکچینی ءَ واک داتگ انت آیانی ھلاپ ءَ گوں یکجاھی ءَ توار چست نہ کت گڑا پہ جزم بزان اِت کہ مئے چاگرد ءُ مئے ھستانک ءَ پہ گار بوگ‌ ءَ کس داشت نہ کنت-

“جہ بہ جن بے ساری ءِ بے زانتی ءَ شھمات کن”
“کہ تئی بیگواھی ءِ سامان سرجم بیتگ انت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ زورانسری آوار جنی ءِ درچ اوشتگ ءِ نام ءَ نزانت –

بلوچستان انسانی ھکانی ءُ بلوچ بیگواھیں مردمانی یل کنائینگ ءِ ھاتر ءَ توار چست کنگ کنوکیں گلانی ریاستی زوراکی ءُ زورانسری آوار جنی ءِ ھلاپ ءَ یکشل ءَ توار چست کنگ ءَ اَنت ءُ آ لوٹ ءَ ھم کنگ ءَ اَنت زورانسری آوار جنی ءِ درچ بند کنگ بہ بیت بیگواھیں مردم یل کنگ بہ بنت-

ھمے وڑ مروچی چہ شال ءَ پاکستانی پوج ءَ مولانا خلیل اللہ شھاب آوار جنگ ءَ پد ناشناسیں جاھے ءَ برتگ-

ھالانی رِد ءَ شپ ءِ وھد ءَ سی ٹی ڈی ءَ الم دین ءِ لوگ ءِ سر ءَ بیڑبرتگ ءُ مولانا خلیل اللہ شھاب دزگیر کتگ ءُ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال نیست-

مولانا خلیل شھاب ءِ آفیشل پیچ سر ءَ یک پوسٹے ءَ گوشگ بیتگ کہ پاکستانی پوج، سی ٹی ڈی ءِ کارندھانی مزنیں کچے ءَ دمگ انگیر ءَ کتگ ءُ بیڑبرتگ، اے میان ءَ کسے ءَ نزیک ءِ روگ یا جُست کنگ ءِ اجازت دیگ نہ بیتگ، گوشگ بیگ ءَ اِنت کہ پوج کارندھاں مولانا آئی ءِ کمرہ ءَ چہ چست کتگ ءُ برتگ-

واکدار ءَ اے درگت ءَ ھچ وڑیں ھال شنگ نہ کتگ-

ھمے وڑ کراچی پریس کلب ءِ ڈن ءَ زورانسری آوار جنی ءِ ھلاپ ءَ زھرشانی بُنجل ءَ سے شمبے ءِ روچ ءَ سی ششمی روچ ءَ پُترتگ – ھور ءَ اَبید زالبول، چُک ءُ کماش وتی دوستناکانی یل کنائینگ ءِ ھاتر ءَ اوشتاتگ اَنت-

بُنجل ءَ ساڑی بیگواھیں ورنا زاھد علی بلوچ ءِ پت عبدالحمید بلوچ ءَ رسانکدر ءَ تران کنان ءَ گوشتگ کہ منی چُک یک مھنتی یے ورنایے، کہ وتی کھول ءِ کوپگ جوڑ بیتگ، بلے مروچی آ مارا چہ پچ گرگ بیتگ- اگاں آئی ءِ سر ءَ کجام وڑیں بھتامے ھست گُڑا آمیدگس ءَ پیش بہ کن اِنت- کانود درستانی واستا یک ھساب بہ بیت ءُ کسے ءَ درکانودی سزا دیگ ءِ ھک نیست-

انسانی ھکانی کارکنانی رِد ءَ کراچی ءِ جتاجتائیں دمگاں چہ بازیں بلوچ ورنایے بیگواہ ءَ اِنت کہ آیانی تہ ءَ شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت – اے درست گریبیں لوگاں گوں سیادی دار اَنت، بلے اشانی زورانسری آوار جنی کھول ءَ سک دلسیاھیانی دیمپانی کتگ اَنت-

کھول ءِ رِد ءَ زورانسری آوار جنی ناں تھنا انسانی ھکانی ھلاپ ورزی اِنت بلکیں آئی ءَ چہ مالی جاور ءِ تباہ کنگ اِنت- لوگانی لاپ دیوکیں ورنایانی ساڑی نہ بیگ کھولاں دو وھد ءِ نان واستا تلوسگ ءَ اَنت ءُ بازیں مات وتی چُکانی گستائی چہ نادُراہ جوڑ بیتگ اَنت-

زھرشانی بُنجل ءَ نشتگیں کھولاں گوشتگ آ وتی دوستناکانی یل کنائینگ ءَ تاں بُنجل ءَ یل نہ کن ایں ءُ میان اُستمانی ھکانی گل چہ کمک ءِ لوٹ ءُ گامگیج زیرگ ءِ لوٹ کن ایں-

ھمے وڑ اسلام آباد ءَ بیگواھیں مردمانی ءُ بی وائی سی ءِ بندیگیں سروکانی کھولانی زھرشانی نندانک ءَ مروچی پنجاہ ششمی روچ ءَ ھم برجاہ-

آیانی گوشگ اِنت کہ مروچی مئے نندانک ءَ پنجاہ شش روچ سرجم بیتگ بلے نہ دلگوش کنوکیں ھکومت ءُ آئی ءِ مردمانی بے تواری برجاہ ءَ اِنت-

آیاں گوشتگ کہ مئے زھرشانی نندانک تاں ھما روچ ءَ برجاہ دانکہ بی وائی سی ءِ سروک ءُ بیگواھیں دوستناک یل کنگ نہ بنت-

بلوچستان ءِ جتاجتائیں دمگاں پاکستانی پوج ءِ سر ءَ بمب اُرش ءُ سلاہ بندیں اُرشانی درچ یکشل ءَ برجاہ ءَ اَنت-

گیشیں ھالانی رِد ءَ بلوچستان ءِ دمگ کیچ ءُ کلات ءُ مستونگ ءَ پاکستانی پوج جتاجتائیں اُرشاں نشانگ کنگ بیتگ ءُ وھدے کہ سلاہ بنداں مڈی بروکیں گاڑی ھم نشانگ کتگ اَنت-

کیچ ءِ دمگ تمپ ءَ نزر آباد ءِ ھند سر ءَ پاکستانی پوج ءِ کاروان ءَ ھوار یک گاڑی یے ناشناسیں مردماں بمب تراک ءِ نشانگ کتگ – تراک ءَ پوج ءِ گاڑی تباہ بیتگ وھدے کہ بازیں کارمندے یے مرتگ کہ آئی ءِ پجّار ظفر خان جھمنند میانوانی، پنجاب نام ءَ چہ بیتگ-

دمگی اِھوالکار ءِ رِد ءَ بلوچ سلاہ بندیں آجوئی لوٹوکاں دمگ شھدگ سر ءَ ناکہ بندی کتگ پوج ءِ پیشگامی ءِ جُھد کتگ ءُ تراک ءِ نشانگ بیتگ بلے واکدار ءَ اے درگت ءَ ھچ وڑیں ھال دیم ءَ نیتکگ-

ھمے وڑ مروچی کلات ءِ دمگ شیخری ءُ مورگند ءِ ھندانی سر ءَ پاکستانی پوج ھما وھد ءَ سنگر گپتگ نشانگ کتگ وھدے آ دمگ ءُ پیشگامی کنگ ءَ بیتگ بلے اُرش ءُ تاوانانی درگت ءَ ھچ وڑیں درشان دیم ءَ نیتکگ-

ھمے وڑ مستونگ ءَ سلاہ بندیں مردماں مڈی بروکیں یک گاڑی یے ٹائر تیرگواری کتگ ءُ تاوان داتگ اَنت-

دومی نیمگ ءَ مستونت تمپ ءَ بیتگیں اُرش زمہ واری بلوچ آجوئی لوٹوکیں گل بلوچ لبریشن آرمی ءَ منّ اِتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ سرمچاراں تمپ ءَ زورگریں پاکستانی پوج آئی ای ڈی اُرش ءَ نشانگ کتگ ءُ سک تاوان ءِ دیمپان کتگ ، وھدے کہ مستونگ ءَ مڈی بروکیں گاڑی ھم نشانگ کتگ-

جارکش ءَ گوشتگ بی ایل اے ءِ سرمچاراں کیچ ءِ دمگ تمپ ، نزر آباد ءَ زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی ءَ چہ نشانگ کتگ ،تراک ءِ آسر ءَ پوجی گاڑی سرجمی ءَ تباہ بیتگ ءُ اشی ءَ سوار سرجمیں کارندہ مرتگ اَنت-

جارکش ءَ گوشتگ ھمے وڑ بلوچ لبریشن آرمی ءِ سرمچاراں مستونگ ءِ دمگ کھڈکوچہ ءَ مڈی بروکیں یک گاڑی یے سر ءَ اُرش کتگ ءُ آ تاوان داتگ-

جارکش ءَ گوشتگ بلوچ لبریشن آرمی اے اُرشانی زمہ واری ءَ منّ اِیت

دومی نیمگ ءَ بلوچ آجوئی لوٹوکیں گل بلوچستان لبریشن فرنٹ ءَ ھازر سروس پوجی کارندہ محمد حنیف ء عبدالغنی دزگیر کنگ زمہ واری منّ اِتگ-

جارکش میجر گْوھرام بلوچ ءَ گْوشتگ کہ ھشت ستمبر 2025 ءَ مئے سرمچاراں چہ شال ءَ ھمگرنچیں دمگ دشت عمر ڈھور، مستونگ ءَ یک بیڑے ءِ کاروائی ءِ میان محمد حنیف ء عبدالغنی جھمنند ڈھاڈر آوار جتگ کہ زورگریں پاکستانی پوج ءِ یک ھازر سروس کاردارے – دزگیریں پوجی کارندہ ءَ چہ بنداتی پٹ ءُ پول سرجم بیتگ بلے گل وتی پیسلہ ءَ جار ءَ آئی ءِ گور ءَ دزکپتگیں ھال اھوالی وسیلگ ءِ سرجمی ءَ پٹ ءُ پول ءَ پد کن ایں-

جارکش ءَ گوشتگ بنداتی پٹ ءُ پول ءَ چہ آئی ءَ دزکپتگیں گاکداں چہ تچکی ءَ منانک دزکپتگ اَنت کہ زورگریں پوج ءَ ھواری ءَ پد آئی ءِ کار سبی بلوچستان ءَ بیتگ ءُ آئی ءِ بدلی مستونگ ءَ کنگ بیتگ-

جارکش ءَ گوشتگ بلوچستان لبریشن فرنٹ پاکستانی پوج ءِ ھازر سروس کارندہ محمد حنیف ء عبدالغنی دزگیری ءِ جار ءَ جنت ءُ چہ آئی ھمگرنچ گل کجام ھما پیسلہ ءَ کنت چہ آئی ءَ بلوچ راج ءَ رسانکدر ءَ سرپد کنگ بنت-

جھانی رسانکدر ءَ شنگ بوتگیں تامربند ءُ ھالانی رِد ءَ اسرائیل ءِ بُرزی لشکر ءَ کَتَر ءِ بنجاھی شھر دوھَہ ءَ ھماس ءِ سیاسی کارکنانی ماڑی نشانگ کرتگ۔

تامربندانی تھا گندگ بوتگ کہ ھماس ءِ سیاسی پارٹی ءِ کارکنانی بنجاھی ماڑی اے اُرش ءِ زد ءَ کپتگ ات اوں بازیں تاوان ئیے آماچ بوگ ءَ ھوار آئی ءِ لھتے بَھر آس ھم گپتگ اَنت۔

اسرائیل ءِ میڈیا ءَ اے گپ منّ اتگ ءُ گوشتگ کہ ما کَتَر ءَ ھماس ءِ سیاسی کارکنانی جاگہ اُرش ءَ نشانگ کرتگ ، اھانی گوشگ انت کہ ھماس ءِ سیاسی لیڈر ھلیل الھیہ ءُ جبارین مئے نشانگ بیتگ انت ، اُرش پہ سوبمندی بوتگ ءُ نی اُرش ءِ ھالانی ودار ءَ نشتگ ایں ۔

ھماس ءَ الجزیرہ ءِ نیوز آرا گوشتگ کہ مئے مردم یک دیوانے ءَ دزگٹ بوتگ انت کہ اودا اسرائیل ءَ نشانگ کرتگ انت۔

اسرائیل ءَ ٹاپار جتگ کہ اُرش ءَ پیسر ما وتی کوشش کرتگ کہ لس مھلوک ءَ اے کاروائی نیام ءَ تاوان مہ رس ایت ، ما وتی چیر اندری بھر بزاں انٹیلی جنس تیز کار گپتگ ۔

گوشگ بوگا انت اسرائیل ءِ جیٹ آں 12 میزائل اے ماڑی سرا آس داتگ ۔
اسرائیل ءِ چھاردمی چینل ءَ گوشتگ اسرائیل ءِ 10 جیٹ ءَ اے اپریشن ءَ بھر زرتگ ات ۔

اسرائیل ءِ مزن نامیں مردمے ءَ گوشتگ کہ اُرش وھداں ھماس ءِ سرجمیں لیڈر ماڑی تھا بوتگ انت ۔
اسرائیل ءِ دوازدھمی چینل ءَ گوشتگ کہ بریتانیا ءُ امریکی چاریگ ڈرون اُرش ءَ چہ پیسر کَتَر ءِ ازمان سرا بوتگ انت ھمے وڑا نتانیاھو ءَ گوشتگ کہ اے اُرش ءَ پیسر ما ٹرمپ کرا سرجم موکل گپتگ ۔

کَتَر ءِ رسانکدر ءَ گوشتگ کہ دنیگا پولیس آں دو بیران بوتگیں لاش چہ ماڑی ءَ در کرتگ اوں اے دگرانی پٹ پول بندات انت ۔

گوشگ بوگا انت ھلیل الھیہ چہ اُرش ءَ رکّ اتگ اوں اسرائیل ءِ اُرش سوبمند نہ بوتگ ۔

العربیہ چینل ءَ ھلیل الھیہ ، زاھر جبارین ، ھالد مشئل اوں نزار اَوَزاللہ ءِ مرگ ءِ ھال راست کرتگ ۔

اے دیوان امریکہ ءَ بنگیج کرتگ ات تاکہ ھماس گوم ءَ پہ گزہ ءِ جنگ ءِ ھلاس بوگ ءَ کَتَر تھا پیسلہ بکننت ۔

ھماس ءَ گوشتگ اے اُرش ءَ کَتَر ءِ دست سرجم ءَ ھوار انت ۔